ᓄᓇᒥᒃ ᓄᓇᒥᐅᑕᕐᓂᑉᓗ ᐊᐅᓚᑦᓯᓂᕐᒧᑦ ᑎᒥᐅᔪᑦ
ᐃᓚᖓ 1
ᐱᕕᑦᓴᖃᕐᓂᖓᑦ
10.1.1
ᒐᕙᒪᒃᑯᖏᑦ ᑲᓇᑕᐅᑉ ᑲᒪᒻᒪᑕ ᐅᑯᓇᓐᖓᑦ ᑎᒥᐅᔪᓂᒃ ᓴᖅᑭᖅᑕᐅᒍᒫᖅᑐᓂᒃ ᑎᒥᖁᑎᒋᔭᐅᑎᓪᓗᒋᑦ ᑭᓇᒃᑯᑐᐃᓐᓇᕐᓄᑦ ᒐᕙᒪᐅᔪᓄᑦ ᑐᓐᖓᕕᖃᕐᓗᑎᒃ ᐊᖏᕈᑎᒥᒃ, ᑐᓐᖓᕕᒋᓗᒋᑦ ᐅᑯᐊ ᐱᕕᑦᓴᖃᕐᓂᐅᔪᑦ:
(a)
ᕐᑳᖓᓄᑦ ᐱᔪᓐᓇᐅᑎᓄᑦ ᐋᖅᑭᑦᓱᐃᔩᑦ (ᐋᖅᑭᑦᓱᐃᔩᑦ), ᑕᖅᑮᑦ 6 ᑭᖑᕐᖓᓂ ᐅᓪᓗᖓᑕ ᐊᖏᕈᑎᐅᑉ ᐊᖏᖅᑕᐅᓂᖓᑕ, ᐋᒡᒐᒐᓗᐊᖅ ᓴᖅᑭᖅᑕᐅᓂᖅᐸᑕ ᐅᓪᓘᑉ ᒥᑦᓯᑎᓐᓂ; ᐊᒻᒪᓗ
(b)
ᐅᑯᐊ ᑎᒥᐅᔪᑦ, ᐱᓗᐊᖅᑐᒥᒃ
(i)
ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ
(ii)
ᓄᓇᕗᒻᒥ ᐸᕐᓇᐃᔩᑦ, ᐊᒻᒪᓗ
(iii)
ᓄᓇᕗᒻᒥ ᐃᒪᓕᕆᔨᒃᑯᑦ,
ᐊᐃᑉᐸᖓᓂ ᓇᓪᓕᐅᓂᕐᓯᐅᕐᓂᖓᑦᑕ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᐋᒡᒐᐅᒐᓗᐊᖅ ᓴᖅᑭᖅᑕᐅᓂᖅᐸᑦ ᐅᓪᓗᕐᒥ ᓯᕗᕐᖓᓂ.
10.1.2
ᐊᐳᖅᑕᕐᕕᖃᖅᑎᑕᐅᒐᑎᒃ ᑲᒪᒋᔭᕆᐊᓕᖏᑦ ᒐᕙᒪᒃᑯᖏᑦᑕ ᑲᓇᑕᐅᑉ, ᑎᒥᐅᔪᑦ ᐅᖃᐅᓯᐅᔪᑦ 10.1.1-ᒥ ᓴᖅᑭᖅᑕᐅᒋᐊᓖᑦ ᒪᓕᒐᖅᑎᒍᑦ ᒪᓕᒐᓕᐅᕐᕕᒻᒥ ᑎᒍᒥᐊᕈᓐᓇᕐᕕᓕᒫᖓᒍᑦ.
ᐃᓚᖓ 2
ᐊᐅᓚᓂᖓ ᐊᑐᓕᖅᑎᑦᓯᓂᐅᑉ
10.2.1
ᐃᓘᓐᓇᑎᒃ ᓴᓐᖏᓂᕆᔭᐅᔪᑦ, ᐊᐅᓚᔾᔪᑏᑦ, ᑐᕌᒐᖏᑦ ᑲᒪᒋᔭᕆᐊᓕᖏᓐᓗ ᑎᒥᐅᔪᑦ ᐅᖃᐅᓯᐅᔪᑦ 10.1.1-ᒥ ᓇᓗᓇᐃᖅᑕᐅᓯᒪᓂᐊᖅᑐᖅ ᒪᓕᒐᖅᑎᒍᑦ. ᐊᐅᓚᓂᐅᔪᑦ ᐊᑦᑐᐊᓐᖏᑦᑐᑦ ᓴᓐᖏᓂᕆᔭᒧᑦ, ᐊᐅᓚᓂᐅᔪᓄᑦ, ᑐᕌᒐᕐᓄᑦ ᑲᒪᒋᔭᕆᐊᓕᓐᓄᑦ, ᑲᑎᒪᔩᑦ ᖃᑦᓯᐅᓂᖏᓐᓄᑦ ᐊᒻᒪᓗ ᐊᐅᓚᓂᖓᑦ ᑎᓕᔭᐅᓂᖏᑦᑕ ᑲᑎᒪᔩᑦ ᑎᒥᐅᔪᓄᑦ, ᐊᑐᓕᖅᑎᑕᐅᒍᓐᓇᖅᑐᖅ ᒪᓕᒐᖅᑎᒍᑦ, ᑭᓯᐊᓂ ᐊᑐᓕᖅᑎᑦᓯᓂᐅᔪᖅ ᒪᓕᒐᖅᑎᒍᑦ ᑕᑯᓐᓇᖅᑕᐅᒋᐊᖃᓐᖏᑦᑐᖅ ᐊᖏᓪᓕᒋᐊᕆᒍᑕᐅᓗᓂ ᓴᓐᖏᓐᓂᐅᔪᓂᒃ ᓇᓗᓇᐃᖅᑕᐅᓯᒪᔪᓂᒃ 10.6.1-ᒥ ᐊᒻᒪᓗ 10.7.1-ᒥ.
ᐃᓚᖓ 3
ᕐᑳᖓᒍᑦ ᑲᒪᒋᒃᑲᓐᓂᕆᐊᓖᑦ
10.3.1
ᒪᓕᒐᖅ ᐊᑦᑐᐊᔪᖅ ᑎᒥᐅᔪᓄᑦ ᐅᖃᐅᓯᐅᔪᑦ 10.1.1-ᒥ ᐱᕕᖃᖅᑎᑦᓯᑐᐃᓐᓇᕆᐊᓖᑦ ᐊᓯᖏᓐᓂᒃ ᐅᖃᐅᓯᐅᓐᖏᑦᑐᓂᒃ ᐃᓛᒃᑰᖅᑐᓂ 11, 12, 13 ᐊᒻᒪᓗ 21, ᑐᓂᔭᐅᒃᑲᓐᓂᕈᓐᓇᖅᓱᑎᓪᓗ ᕐᑳᖓᒍᑦ ᓴᓐᖏᓂᒃᑲᓐᓂᐅᔪᓂᒃ, ᐊᐅᓚᓂᐅᔪᓂᒃ, ᑐᕌᒐᕐᓂᒃ ᑲᒪᒋᒋᐊᓕᓐᓂᓘᓐᓃᑦ ᐅᖃᐅᓯᐅᔪᓂᒃ ᑎᒥᐅᔪᓂᒃ.
ᐃᓚᖓ 4
ᑐᑭᒧᐊᑦᑎᑦᓯᖃᑎᖃᕐᓂᖅ ᐊᑦᑐᐊᔪᓂᒃ ᑎᒥᐅᔪᓂᒃ
10.4.1
ᒪᓕᒐᖅ ᐃᒪᐃᑦᓱᓐᓇᖅᑐᖅ, ᑐᓐᖓᕕᖃᕐᓗᓂ ᓇᐅᑐᐃᓐᓇᕐᒥᒃ ᐊᐅᓚᓂᐅᔪᒥᒃ ᐃᓗᐊᓃᑦᑐᒥᒃ ᐊᒋᕈᑎᐅᑉ, ᐱᕕᖃᖅᑎᑐᑦᓯᒍᑕᐅᓗᓂ ᑎᒥᐅᔪᓂᒃ ᐅᖃᐅᓯᐅᔪᓂᒃ 10.1.1-ᒥ ᑐᑭᒧᐊᑦᑦᓯᓗᑎᒃ ᓴᓐᖏᓂᕐᒥᓂᒃ, ᐊᐅᓚᓂᕐᒥᓂᒃ, ᑲᒪᒋᒋᐊᓕᒻᒥᓂᓪᓘᓐᓃᑦ ᐊᔾᔨᒐᓚᖏᓐᓂ ᑎᒥᐅᔪᓂ ᑎᒍᒥᐊᖅᑐᒥ ᓄᓇᓂᒃ ᐊᑦᑐᐊᔪᓂᒃ ᓄᓇᕗᒻᒥ.
ᐃᓚᖓ 5
ᑐᓴᖅᑕᐅᒃᑲᐃᓂᖅ ᑐᓴᕋᑦᓴᓂᒃ
10.5.1
ᑎᒥᐅᔪᑦ ᐅᖃᐅᓯᐅᔪᑦ 10.1.1-ᒥ ᐃᒪᐃᓐᓂᐊᖅᑐᑦ ᐱᓕᕈᑎᒃ ᑐᓴᖅᑕᐅᒃᑲᐃᓕᕈᑎᓪᓗ ᑐᓴᕋᑦᓴᓂᒃ ᑐᓐᖓᕕᖃᖅᑐᓂᒃ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑑᑎᔪᓂᒃ ᐊᑦᑐᐊᔪᓂᒃ ᑲᓐᖑᓇᖅᑐᓄᑦ ᐊᒻᒪᓗ ᐊᑐᐃᓐᓇᖃᕐᓂᕐᒧᑦ ᑐᓴᕋᑦᓴᓂᒃ ᒐᕙᒪᒃᑯᓐᓂ ᒥᓂᔅᑕᐅᕕᐅᔪᑎᑐᑦ. ᒐᕙᒪᒃᑯᑦ ᐃᓱᒪᖅᓲᑎᖃᖅᐸᑕ ᑐᓴᖅᑎᑦᓯᓂᕐᒥᒃ ᑎᒥᐅᔪᓄᑦ, ᐅᕝᕙᓗ ᑎᒥᐅᔪᖅ ᐃᓱᒪᖅᓲᑎᖃᖅᐸᑦ ᑐᓴᖅᑎᑦᓯᓂᕐᒥᒃ ᑭᓇᑐᐃᓐᓇᕐᒧᑦ ᑕᖅᑲᐅᖓ, ᐃᓱᒪᒋᔭᐅᖃᓯᐅᑎᓂᐊᖅᑐᑦ ᑐᕌᒐᐃᑦ ᐊᖏᕈᑎᒧᑦ ᑲᔪᓯᑎᑕᐅᑎᓪᓗᒋᑦ ᐃᓱᒪᖅᓲᑕᐅᔪᑦ.
ᐃᓚᖓ 6
ᑲᑎᑎᕆᓂᖅ ᓄᑦᑎᖅᑎᕆᓂᕐᓗ
10.6.1
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᐊᖏᕈᑎᒥ, ᒐᕙᒪᒃᑯᖏᑦ ᑲᓇᑕᐅᑉ ᒪᓕᒐᓕᐅᕐᕕᓪᓘᓐᓃᑦ, ᑕᒪᕐᒥᒃ ᐱᔪᓐᓇᕐᓂᖃᖅᓱᑎᒃ, ᒪᓕᒐᖅᑎᒍᑦ ᑲᑎᑎᑦᓱᒍᓐᓇᖅᑐᑦ ᓄᑦᑎᖅᑎᕆᓗᑎᓪᓘᓐᓃᑦ ᐊᐅᓚᓂᖏᓐᓂᒃ ᑎᒥᐅᔪᑦ ᐅᖃᐅᓯᐅᔪᑦ 10.1.1-ᒥ, ᐅᕝᕙᓗ ᑲᑎᑎᑦᓯᓗᑎᒃ ᓈᓚᓐᓂᐅᔪᓂᒃ ᐊᐅᓚᑕᐅᔪᓂᒃ ᑎᒥᐅᔪᓄᑦ, ᑭᓯᐊᓂ ᐊᑐᓂᑦ ᒪᓕᒐᐃᑦ ᓄᖑᑎᕆᒍᑕᐅᔾᔮᖏᑦᑐᑦ ᐊᑦᑐᐃᓂᕐᓗᓐᓂᖃᕐᓗᑎᓪᓘᓐᓃᑦ ᑲᑎᓯᒪᔪᓂᒃ ᓴᓐᖏᓂᐅᔪᓂᒃ, ᐊᐅᓚᓂᐅᔪᓂᒃ, ᑐᕌᒐᕐᓂᒃ ᑲᒪᒋᔭᕆᐊᓕᓐᓂᓪᓗ ᐅᖃᐅᓯᐅᔪᓄᑦ ᑎᒥᐅᔪᓄᑦ, ᐅᕝᕙᓗ ᐊᖏᓪᓕᒋᐊᕆᓗᑎᒃ ᓴᓐᖏᓂᖏᓐᓂᒃ ᒐᕙᒪᒃᑯᑦ ᐊᑦᑐᐊᔪᓄᑦ ᑖᒃᑯᓄᖓ, ᐊᒻᒪᓗ, ᐊᐳᖅᓯᒪᕕᒋᓇᒍ ᐃᓘᓐᓈᒍᑦ ᑭᓪᓕᒋᔭᐅᔪᑦ, ᐊᑐᓂᑦ ᒪᓕᒐᐃᑦ ᐃᒪᐃᓐᓂᐊᖅᑐᑦ,
(a)
ᓴᐳᔾᔨᓗᑎᒃ ᐅᑯᓇᓐᖓᑦ ᑐᓴᐅᒪᔭᐅᓗᐊᕆᐊᓐᖏᑦᑐᓂᒃ
(i)
ᐸᕐᓇᓐᓂᕐᒧᑦ ᐊᑐᐊᒐᕐᓂᒃ ᐊᐅᓚᓂᐅᔪᖅ,
(ii)
ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᓐᓂᐅᔪᑦ,
(iii)
ᕿᒥᕐᕈᓂᖅ ᐊᐅᓚᓂᐅᔪᓂᒃ,
(iv)
ᐱᕙᓪᓕᐊᓂᕐᒧᑦ ᐊᑦᑐᖅᑕᐅᓂᐅᔪᓂᒃ ᕿᒥᕐᕈᓂᖅ, ᐊᒻᒪᓗ
(v)
ᐃᒪᐅᑉ ᐊᑐᖅᑕᐅᓂᖓᑕ ᐊᖏᖅᑕᐅᓂᖏᑦ, ᑭᓯᐊᓂ ᑖᒃᑯᐊ ᐊᐅᓚᓂᐅᔪᑦ ᑲᓐᖑᓇᕆᐊᖃᓐᖏᑦᑐᑦ ᐊᑦᑐᖅᑕᐅᓂᕐᒧᑦ ᕿᒥᕐᕈᓂᐅᔪᓄᑦ ᐊᐅᓚᓂᐅᔪᓄᑦ;
(b)
ᐊᓯᔾᔨᖅᑕᐅᒋᐊᖃᓐᖏᑦᑐᑦ ᐱᔭᕆᐊᓖᑦ ᐊᐅᓚᓂᕐᒧᑦ ᑐᑦᒃᓯᕋᐅᑏᑦ ᒪᓕᑦᑕᖓᓐᓂᒃ ᐅᕝᕙᓗ ᓄᓇᐅᑉ ᐊᑐᖅᑕᐅᓂᖓᓂᒃ ᐸᕐᓇᐅᑏᑦ ᐅᕝᕙᓗ ᐱᔭᕆᐊᓕᓐᓂᒃ ᐊᑑᑎᒋᐊᑐᓐᖏᑦᑐᖅ ᐋᖅᑮᔪᖃᓚᐅᖅᑎᓐᓇᒍ ᕿᒥᕐᕈᓂᕐᒥᒃ ᐊᐅᓚᓂᐅᔪᒧᑦ ᑐᑦᓯᕋᐅᑎᒥᒃ;
(c)
ᐋᒡᒐᐅᒐᓗᐊᖅ ᐊᖏᕈᑎᑎᒍᑦ ᐱᕕᖃᖅᑎᑕᐅᑉᐸᑦ, ᐊᓯᔾᔩᒋᐊᖃᓐᖏᑦᑐᖅ ᐱᔭᕆᐊᓕᒻᒥᒃ ᐊᐅᓚᓂᕐᒧᑦ ᑐᑦᓯᕋᐅᑎ ᕿᒥᕐᕈᔭᐅᓂᖓᓄᑦ, ᑕᐃᒪᐃᓕᖓᒐᔭᕐᓂᖅᐸᑦ, ᐊᖏᖅᑕᐅᓚᐅᓐᖏᓐᓂᖓᓂ, ᓚᐃᓴᓐᓯ ᐊᐅᓚᓂᐅᔪᕐᓘᓐᓃᑦ ᐊᖏᖅᑕᐅᑉᐸᑦ;
(d)
ᒥᑭᓪᓕᑎᑦᑕᐃᓕᓗᒍ ᖃᐅᔨᓴᕐᓂᐅᑎᑕᐅᔪᖅ ᐊᖏᕈᑎᑎᒍᑦ;
(e)
ᐊᑦᑐᐃᓂᕐᓗᓐᓂᖃᓐᖏᓗᓂ ᐱᔪᓐᓇᕐᓂᖏᓐᓂᒃ ᐅᖃᐅᓯᐅᔪᑦ ᑎᒥᐅᔪᑦ ᐱᓇᓱᐊᕐᓗᑎᒃ ᑖᒃᑯᓇᓐᖓᓪᓗᐊᖅ ᑐᓴᕋᑦᓴᓂᒃ ᐅᕝᕙᓗ ᐊᑑᑎᓂᖅ ᐃᖅᑲᖅᑐᐃᕕᒃᑯᑎᒍᑦ ᓴᓐᖏᓂᐅᔪᓂᒃ ᐱᕕᖃᖅᑎᑕᐅᒍᑎᒃ ᐊᖏᕈᑎᑎᒍᑦ;
(f)
ᒥᑭᓪᓕᑎᑦᑕᐃᓕᓗᒍ ᑕᖅᑳᓐᖓᑦ ᐃᓄᓐᓂᒃ ᐃᓚᐅᑎᓐᓂᐅᔪᑦ ᐅᕝᕙᓗ ᐊᑦᑐᐃᓂᕐᓗᑦᑕᐃᓕᓗᑎᒃ ᐱᔪᓐᓇᕐᓂᕆᔭᖏᓐᓂᒃ ᑭᓇᒃᑯᑐᐃᓐᓇᐃᑦ ᐃᓚᐅᑎᓐᓂᕐᒧᑦ ᐊᐅᓚᓂᐅᔪᓄᑦ ᑖᒃᑯᓄᖓ ᐅᖃᐅᓯᐅᔪᓄᑦ ᑎᒥᐅᔪᓄᑦ;
(g)
ᐊᓯᔾᔩᒋᐊᖃᓐᖏᑦᑐᖅ ᐱᔪᓐᓇᕐᓂᖏᓐᓂᒃ ᑭᓇᑐᐃᓐᓇᐅᑉ ᓈᓚᐅᑦᑕᐅᒍᓐᓇᕐᓂᕐᒧᑦ ᐅᖃᐅᓯᐅᔪᑦ ᑎᒥᐅᔪᓄᑦ ᐃᓄᑦᑎᑐᑦ, ᐅᕝᕙᓗ ᐊᓯᔾᔨᖅᑕᐅᒋᐊᖃᓐᖏᑦᑐᑦ ᑲᒪᒋᔭᕆᐊᓖᑦ ᐅᖃᐅᓯᐅᔪᑦ ᑎᒥᐅᔪᓄᑦ ᐊᐅᓚᓂᖃᖅᑎᓪᓗᒋᑦ ᐱᓇᓱᐊᕐᓂᖏᑦ ᐃᓄᑦᑎᑐᑦ; ᐊᒻᒪᓗ
(h)
ᓴᐳᔾᔨᓗᑎᒃ ᑭᓇᒃᑯᑐᐃᓐᓇᕐᓂᒃ ᑎᒥᐅᔪᓂᒃ.
10.6.2
ᑲᑎᖅᓱᑎᖅᑕᐅᓂᕐᒧᑦ ᓄᑦᑎᖅᑎᕆᓂᕐᒧᓪᓗ ᓴᓐᖏᓂᐅᔪᑦ ᓇᓗᓇᔭᐃᖅᑕᐅᔪᑦ 10.6.1-ᒥ ᐊᑑᑎᓕᓂᐊᖅᑐᑦ ᐊᕐᕌᒍᐃᑦ ᐱᖓᓱᑦ ᐊᓂᒍᖅᐸᑕ ᓴᖅᑭᑕᐅᓚᐅᖅᑎᓪᓗᒋᑦ ᑖᒃᑯᐊᓪᓗᐊᑦ ᑎᒥᐅᔪᑦ ᐅᖃᐅᓯᔪᑦ 10.1.1-ᒥ. ᓯᕗᓐᕐᖓᓂ ᑖᒃᑯᐊ ᓴᓐᖏᓂᐅᔪᑦ ᐊᑑᑎᓂᖏᑦᑕ, ᑲᑎᑎᕆᓂᖅ ᓄᑦᑎᖅᑎᕆᓂᕐᓘᓐᓃᑦ ᑭᓯᐊᓂ ᐊᑑᑎᒍᓐᓇᕐᓂᐊᖅᑐᖅ ᑎᑎᖅᑲᑎᒍᑦ ᐊᖏᖅᑕᐅᓚᐅᖅᑎᓪᓗᒍ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.
ᐃᓚᖓ 7
ᐊᐅᓚᑦᓯᔾᔪᑎᑦᓴᐃᑦ ᐊᔾᔨᒌᓐᖏᑦᑐᑦ
10.7.1
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐱᕕᖃᖅᑎᑦᓯᓂᐅᔪᑦ ᐊᖏᕈᑎᒥ, ᒐᕙᒪᒃᑯᖏᑦ ᑲᓇᑕᐅᑉ ᒪᓕᒐᓕᐅᕐᕕᓪᓘᓐᓃ,ᑦ, ᐊᑐᓂᑦ ᐱᔪᓐᓇᕐᓂᓂ ᐊᑐᕐᓗᒍ, ᒪᓕᒐᖅᑎᒍᑦ ᐊᓯᔾᔩᒍᓐᓇᖅᑐᑦ ᐱᕕᖃᖅᑎᑦᓯᒍᑕᐅᔪᓂᒃ ᐊᖏᕈᑎᒥ ᐊᑦᑐᐊᔪᓂᒃ ᑎᒥᐅᔪᓄᑦ ᐅᖃᐅᓯᐅᔪᓄᑦ 10.1.1-ᒥ, ᐊᑦᑐᐊᔪᓄᑦ ᐅᑯᓄᖓ ᐊᐅᓚᑦᓯᓂᕐᒨᖓᔪᓄᑦ:
(a)
ᖃᑦᓯᐅᓂᖏᑦ ᑲᑎᒪᔨᐅᔪᑦ, ᖃᑦᓯᐅᓂᖏᑦ ᑎᓕᔭᐅᒋᐊᓖᑦ ᓂᕈᐊᕋᑦᓴᓕᐊᖑᓚᐅᖅᑎᓪᓗᒋᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᒪᓕᑦᓯᐊᑐᐊᖅᐸᑕ ᐊᒥᓲᓂᕆᒋᐊᓕᖏᓐᓂᒃ ᐱᕕᑦᓴᖃᕐᓗᑎᓪᓗ ᐊᕕᑦᑐᖅᓯᒪᔪᑦ ᑭᒡᒐᖅᑐᐃᔨᖃᕐᓂᕐᒥᒃ;
(b)
ᐊᑯᓂᐅᓂᖏᑦ ᑲᑎᒪᔨᖏᑦᑕ ᑎᓕᔭᐅᒃᑲᓂᕐᓂᖏᓪᓘᓐᓃᑦ, ᑲᔪᓯᓂᖃᑦᓯᐊᑐᐊᖅᐸᑦ ᑲᑎᒪᔨᐅᓂᖓ;
(c)
ᑐᓴᕋᑦᓴᐃᑦ ᐊᑐᐃᓐᓇᐅᑎᑕᐅᒋᐊᓖᑦ ᑎᒥᐅᔪᓄᑦ, ᑐᓐᖓᕕᒋᓗᒋᑦ ᑭᓪᓕᖏᑦ ᓇᓗᓇᐃᔭᖅᑕᐅᓯᒪᔪᑦ 10.6.1(e)-ᒥ;
(d)
ᐱᔪᓐᓇᕐᓂᕆᔭᐅᔪᖅ ᑎᒥᐅᔪᒧᑦ ᐊᑦᑐᐊᔪᖅ ᓯᕗᓕᖅᑎᓄᑦ ᖃᐅᔨᒪᔪᒻᒪᕆᓐᓄᓪᓗ; ᐊᒻᒪᓗ
(e)
ᐊᑦᑐᐊᔪᓄᑦ ᐱᕕᖃᖅᑎᑦᓯᓂᖏᓐᓄᑦ ᐃᓛᒃᑯᑦ 12-ᒥ
(i)
ᑭᖑᕙᕆᐊᖅᑕᐅᓂᖓ ᐅᕝᕙᓗ, ᐊᖏᖅᑕᐅᓗᑎᒃ ᓄᓇᕗᒻᒥ ᐊᕙᑎᓕᔨᒃᑯᓐᓄᑦ, ᓇᐃᓪᓕᒋᐊᕆᓂᖅ ᐱᔭᕇᕆᐊᖃᕐᕕᐅᔪᓂᒃ ᐊᐅᓚᓂᐅᔪᓄᑦ,
(ii)
ᖃᑦᓯᐅᒋᐊᖃᕐᓂᖏᑦ ᑲᑎᒪᒋᐊᖅᑐᑦ ᓈᒻᒪᓐᓂᐊᕈᑎᒃ ᓄᓇᕗᒻᒥ ᐊᕙᑎᓕᕆᔨᒃᑯᓐᓄᑦ;
(iii)
ᐊᐅᓚᓂᐅᔪᑦ ᐊᐅᓚᑕᐅᔪᑦ 12.5.3-ᒧᑦ ᐊᒻᒪᓗ ᒪᓕᒐᕋᓛᓕᐊᕆᓯᒪᔭᖏᓐᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᐅᖃᐅᓯᐅᔪᑦ 12.2.23-ᒥ, ᑐᓐᖓᕕᒋᑦᓱᒋᑦ ᑭᓪᓕᒋᔭᐅᑎᑕᐅᔪᑦ 10.6.1(e)-ᒥ, (f), ᐊᒻᒪᓗ (g), ᐊᒻᒪᓗ
(iv)
ᐊᐅᓚᓂᐅᔪᑦ ᓄᓇᕗᒻᒥ ᐊᕙᑎᓕᕆᔨᒃᑯᓐᓄᑦ ᑲᒪᒋᔭᕆᐊᓖᑦ ᐃᓱᒪᒋᖃᓯᐅᑎᓗᒋᑦ ᕿᒥᕐᕈᔭᐅᔪᖃᓕᖅᐸᑦ ᐊᐅᓚᓂᐅᔪᒧᑦ ᑐᑦᓯᕋᐅᑎᒥᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᐃᓱᒪᒋᔭᖃᖃᓯᐅᑎᒍᓐᓇᖅᐸᑕ ᑎᓕᔭᐅᔾᔪᑎᒋᓯᒪᔭᖓᑦ ᐊᑦᑐᖅᑕᐅᓂᕐᓗᖏᒃᑲᓗᐊᕐᒪᖔᖅ.
10.7.2
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐊᓯᖏᑦ ᐱᕕᖃᖅᑎᑦᓯᓂᐅᔪᑦ ᐊᖏᕈᑎᒥ, ᒐᕙᒪᒃᑯᖏᑦ ᑲᓇᑕᐅᑉ ᒪᓕᒐᓕᐅᖅᑏᓪᓘᓐᓃᑦ ᐱᕕᖃᖅᑎᑦᓯᓯᒪᑉᐸᑕ ᐊᐅᓚᑦᓯᓂᐅᔪᓂᒃ ᐅᖃᐅᓯᐅᔪᓂᒃ 10.7.1-ᒥ ᐊᐅᓚᑕᐅᖁᓪᓗᒋᑦ ᐊᐅᓚᑦᓯᔨᖏᓐᓄᑦ ᓯᕗᓕᖅᑏᑦ ᐅᕝᕙᓗ ᑲᒥᓯᓇᖓᑦᑕ ᓯᕗᓕᖅᑏᑦ, ᒪᓕᒐᐃᑦ ᐊᔾᔨᒌᓐᖏᓕᐅᒥᔮᑐᐃᓐᓇᕆᐊᓖᑦ ᐱᕕᖃᖅᑎᑕᐅᓂᒃᑯᑦ ᐊᖏᕈᑎᑎᒍᑦ ᐊᑦᑐᐊᔪᓄᑦ ᐊᐅᓚᑦᓯᓂᕐᒨᖓᔪᓄᑦ ᐅᖃᐅᓯᐅᔪᓄᑦ 10.7.1-ᒥ ᑐᓐᖓᕕᒋᑦᓱᒋᑦ ᑭᓪᓕᒋᔭᐅᑎᑕᐅᔪᑦ ᐃᓗᐊᓂ.
10.7.3
ᓴᓐᖏᓂᐅᔪᑦ ᐊᔾᔨᒌᓐᓂᐊᖏᑦᑯᑦ ᐅᖃᐅᓯᐅᔪᑦ 10.7.1-ᒥ ᐊᒻᒪᓗ 10.7.2-ᒥ ᐊᑑᑎᓕᕐᓂᐊᖅᑐᖅ ᐊᕐᕌᒍ ᐊᑕᐅᓯᖅ ᐊᓂᒍᖅᐸᑦ ᓴᖅᑭᖅᑕᐅᓚᐅᖅᑎᓪᓗᒋᑦ ᑖᒃᑯᐊᓪᓗᐊᑦ ᑎᒥᐅᔪᑦ ᐅᖃᐅᓯᐅᔪᑦ 10.1.1-ᒥ. ᓯᕗᕐᖓᓂ ᑖᒃᑯᐊ ᓴᓐᖏᓂᐅᔪᑦ ᐊᑐᓕᕐᓂᖏᑦᑕ, ᐊᔾᔨᒋᓐᖏᑕᖓᒎᕐᓂᖅ ᑎᑎᖅᑲᑎᒍᑦ ᐊᖏᖅᑕᐅᓯᒪᒋᐊᖃᕐᓂᐊᖅᑐᖅ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᐅᔪᓄᑦ.
ᐃᓚᖓ 8
ᐃᓱᒪᓯᐅᕆᓂᖅ
10.8.1
ᒐᕙᒪᒃᑯᑦ ᐃᓱᒪᓯᐅᕆᑦᓯᐊᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐊᒻᒪᓗ ᐊᑦᑐᐊᔪᓂᒃ ᑎᒥᐅᔪᓂᒃ ᐅᖃᐅᓯᐅᔪᓂᒃ 10.1.1-ᒥ ᓯᕗᕐᖓᓂ ᐊᐅᓚᔾᔭᒋᐊᕈᑎᖃᕐᓂᐅᑉ ᐊᑖᓂ 10.6.1, 10.7.1 ᐅᕝᕙᓗ 10.7.2. ᑖᒃᑯᐊᓪᓗᐊᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᒥᐅᔪᕐᓘᓐᓃᑦ ᐃᒪᐃᑦᓴᕆᐊᓕᒃ, ᑐᑦᓯᕋᖅᑐᖃᖅᐸᑦ, ᓈᓚᑦᑎᖃᖅᑎᑕᐅᒋᐊᓖᑦ ᑖᑦᓱᒧᖓᓪᓗᐊᖅ ᒥᓂᔅᑕᒧᑦ ᐃᓚᒋᔭᐅᓗᓂ ᐃᓱᒪᓯᐅᕆᓂᐅᔪᒧᑦ.
ᐃᓚᖓ 9
ᑎᒦᑦ ᓯᓚᑖᓃᑦᑐᓄᑦ ᑮᓇᐅᔭᖃᖅᑎᑕᐅᓂᖏᑦ
10.9.1
ᐊᖏᕈᑎ ᐊᔾᔨᐅᓐᖏᑎᑦᓯᒍᑕᐅᔾᔮᖏᑦᑐᖅ ᐱᔪᓐᓇᕐᓂᖏᓐᓂᒃ ᐃᓄᐃᑦ ᐱᕚᓪᓕᕈᑎᑦᓴᖓᓂᒃ ᓇᓪᓕᑐᐃᓐᓇᖏᓐᓂᒃ ᐊᐅᓚᓂᐅᔪᑦ ᓯᓚᑖᓂᒃ ᑮᓇᐅᔭᖃᖅᑎᑕᐅᔪᑦ ᓴᖅᑭᓕᐅᒥᔮᑐᐃᓐᓇᕆᐊᓖᑦ.
ᐃᓚᖓ 10
ᐅᖓᕝᕙᕆᐊᖅᑕᐅᓂᖏᑦ ᒪᓕᒐᐃᑦ
10.10.1
ᒪᓕᒐᖅ ᓴᖅᑮᓂᕐᒧᑦ ᓇᓪᓕᑐᐃᓐᓇᖏᓐᓂᒃ ᑎᒥᐅᔪᑦ ᐅᖃᐅᓯᐅᔪᑦ 10.1.1-ᒥ ᐊᑑᑎᓕᖅᓯᒪᓐᖏᑐᐊᖅᐸᑕ ᓯᕗᓪᓕᖅᐹᒥ ᓇᓪᓕᐅᓂᖅᓯᐅᕐᓂᖃᖅᑎᓪᓗᒍ ᐅᓪᓗᖅ ᓇᓗᓇᐃᖅᑕᐅᓯᒪᔪᖅ ᓴᖅᑭᖅᑕᐅᓂᖏᓐᓄᑦ,
(a)
ᐋᖅᑭᒋᐊᒃᑲᐃᔨᓅᖓᔪᓄᑦ, ᒥᓂᔅᑕ ᑎᓕᓯᓂᐊᖅᑐᖅ ᐃᓄᓐᓂᒃ ᑲᑎᒪᔨᐅᓂᐊᖅᑎᓪᓗᒋᑦ ᐋᖅᑭᒋᐊᒃᑲᐃᔨᓄᑦ; ᐊᒻᒪᓗ
(b)
ᓄᓇᕗᒻᒥ ᐊᕙᑎᓕᕆᔨᓅᖓᔪᓄᑦ, ᓄᓇᕗᒻᒥ ᐸᕐᓇᐃᔨᓄᑦ, ᐅᕝᕙᓗ ᓄᓇᕗᒻᒥ ᐃᒪᓕᕆᔨᒃᑯᓐᓄᑦ, ᐱᕕᖃᖅᑎᑦᓯᒍᑕᐅᔪᑦ ᐊᑦᑐᐊᐅᔪᓄᑦ ᑎᓕᔭᐅᓂᖏᓐᓄᑦ ᑲᑎᒪᔩᑦ ᑕᐃᑯᖓ ᑎᒥᐅᔪᒧᑦ ᐃᓱᒪᒋᔭᐅᓂᐊᖅᑐᑦ ᐊᑑᑎᓕᕆᐊᖏᑦ ᓇᓪᓕᐅᓂᖅᓴᐅᕐᓇᐅᑉ ᐅᓪᓗᖓᓂ, ᐊᒻᒪᓗ
10.10.2
ᐊᐳᖅᓯᒪᕕᒋᓐᖏᒃᑲᓗᐊᖅᓱᒍ 10.2.1, ᐅᕝᕙᓗ ᐊᓯᖏᑦ ᐱᕕᖃᖅᑎᑦᓯᓂᐅᔪᑦ ᐊᖏᕈᑎᒥ, ᑎᒥᐅᔪᖅ ᓴᖅᑭᖅᑕᐅᑉᐸᑦ ᐊᑖᓂ 10.10.1, ᒐᕙᒪᒃᑯᑦ ᐊᑐᐃᓐᓇᐅᑎᑦᓯᒍᓐᓇᖅᑐᑦ, ᒪᓕᒐᖅᑎᒍᑦ ᑎᓕᔭᐅᓂᒃᑯᓪᓘᓐᓃᑦ, ᐊᐅᓚᓂᐅᔪᒧᑦ ᐊᑦᑐᐊᔪᒧᑦ ᑕᐃᑯᖓ ᑎᒥᐅᔪᒧᑦ, ᒪᓕᓐᖏᑦᑐᑦ ᑖᒃᑯᓇᓐᖓᑦ ᓴᓐᖏᓂᐅᔪᓂᒃ ᑲᒪᒋᒋᐊᓕᓐᓂᓪᓗ, ᐊᐅᓚᑦᓯᓂᕐᒧᑦ ᐊᐅᓚᓂᖓᓂᒃ ᑎᒥᐅᔫᑉ.
10.10.3
ᒐᕙᒪᒃᑯᑦ ᐃᒪᐃᑦᓱᓐᓇᖅᑐᑦ, ᖃᖓᑐᐃᓐᓇᑦᓯᐊᖅ, ᓴᖅᑮᑲᓂᕐᓂᕐᒥᒃ ᐊᐅᓚᓂᐅᔪᒥᒃ ᐱᕕᖃᖅᑎᑦᓯᒍᑕᐅᔪᒥᒃ, ᐊᒻᒪᓗ ᒪᓕᑦᓯᐊᕐᓗᑎᒃ, ᐊᓯᖏᓐᓂᒃ ᐃᓚᖏᓐᓂᒃ ᐆᒪ ᐃᓛᒃᑰᖅᑑᑉ, ᓇᐅᑐᐃᓐᓇᖅ ᑎᒥᐅᔪᖅ ᓴᖅᑭᖅᑕᐅᔪᖅ ᐊᑖᓂ 10.10.1.
