ᐱᕙᓪᓕᐊᑎᑦᓯᓂᕐᒧᑦ ᐊᑦᑐᖅᑕᐅᓂᖅ
ᐃᓚᖓ 1
ᑐᑭᖏᑦ
12.1.1
ᐅᕙᓂ ᐃᓛᒃᑰᖅᑐᒥ:
“ᐆᒪᔫᖃᑎᒌᓐᓂᖅ” ᑐᑭᓕᒃ ᓄᓇᓕᓐᓂ ᐆᒪᔫᖃᑎᒌᑦᑐᑦ ᐊᕙᑖᓂᓗ ᐊᐅᓚᓂᖃᖃᑎᒌᑦᑐᑦ;
“ᒥᓂᔅᑕ” ᑐᑭᓕᒃ ᐊᓯᐊᒍᑦ ᐅᖃᖅᑕᐅᓯᒪᓐᖏᑐᐊᖅᐸᑦ ᒐᕙᒪᑐᖃᒃᑯᑦ ᐊᕕᑦᑐᖅᓯᒪᔪᓪᓘᓐᓃᑦ ᒥᓂᔅᑕᖓᑦ ᐊᕕᑦᑐᖅᓯᒪᔪᓂ ᑎᒍᒥᐊᖅᑐᖅ ᐱᔪᓐᓇᕐᓂᖃᖅᑎᑦᓯᓂᕐᒧᑦ ᐊᐅᓚᓂᐅᔪᓂᒃ ᑲᔪᓯᑎᑦᓯᓂᕐᒥᒃ; ᑭᓯᐊᓂᓕ, ᒐᕙᒪᒃᑯᖏᑦ ᑲᓇᑕᐅᑉ ᐊᕕᑦᑐᖅᓯᒪᔪᓂᓗ ᒐᕙᒪᐃᑦ ᐃᒪᐃᑦᓱᓐᓇᖅᐳᑦ, ᐃᓗᐊᓂ ᑎᒍᒥᐊᖅᑕᒥ ᐊᕕᑦᑐᖅᓯᒪᓃᑦ, ᑎᓕᓯᒍᓐᓇᖅᑐᑦ ᐊᑕᐅᓯᕐᒥᒃ ᒥᓂᔅᑕᒥᒃ ᑎᒍᒥᐊᕐᓂᖅᑎᓪᓗᒍ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓂᒃ ᑲᒪᒋᔭᖃᕐᓗᑎᓪᓗ ᐊᐅᓚᓂᓕᒫᓂᒃ ᑐᓂᔭᐅᔪᓂᒃ “ᒥᓂᔅᑕᒧᑦ”;
“ᓄᓇᓕᓐᓂ ᐅᓯᑲᑦᑕᕐᕕᐅᓂᖏᑦ” ᑐᑭᓕᒃ ᐅᒥᐊᕐᔪᐊᒃᑯᑦ ᐅᓯᔭᐅᔪᑦ ᐱᔾᔪᑎᓪᓗᐊᑕᖃᖅᓱᑎᒃ ᑎᑭᑎᑦᓯᓂᕐᒧᑦ ᓄᓇᓕᓐᓂ ᓄᓇᕗᒻᒥ ᓂᕿᓂᒃ, ᐃᓪᓗᓯᐅᑎᓂᒃ, ᓴᓇᔭᑦᓴᓂᒃ ᐃᓪᓗᑦᓴᓂᒃ ᐊᓯᖏᓐᓂᓪᓗ ᓄᓇᓕᓐᓄᑦ ᐊᑦᑐᐊᔪᓄᑦ ᐃᓪᓗᓄᑦ, ᐊᒻᒪᓗ ᐊᑦᑐᐊᔪᓄᑦ ᓱᓇᑦᓴᓄᑦ ᓴᓇᔭᑦᓴᓄᓪᓗ;
“ᑐᑦᓯᕋᖅᑐᖅ” ᐊᑦᑐᐊᔪᓄᑦ ᐊᐅᓚᓂᕐᒧᑦ ᑐᑦᓯᕋᐅᑎ, ᑐᑭᓕᒃ, ᐃᓄᒃ, ᑎᒥᐅᔪᖅ ᐅᕝᕙᓗ ᒐᕙᒪᒃᑯᓐᓂ ᐱᔪᓐᓇᕐᓂᓕᒃ ᑐᑦᓯᕋᖅᑐᖅ ᐊᐅᓚᓂᕐᒥᒃ.
ᐃᓚᖓ 2
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ
12.2.1 - ᓴᖅᑭᖅᑕᐅᓂᖏᑦ
ᓄᓇᕗᒻᒥ ᐊᑦᑐᑦᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓴᖅᑭᖅᑕᐅᓂᐊᖅᑐᖅᑦ ᑎᒥᖁᑎᒋᔭᐅᑎᓪᓗᒋᑦ ᑭᓇᒃᑯᑐᐃᓐᓇᕐᓅᖓᔪᓄᑦ ᒐᕙᒪᓄᑦ. ᑎᒍᒥᐊᖅᑕᐅᓂᖏᑦ ᐊᐅᓚᓂᖏᑦᑕ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔩᑦ ᑎᒍᒥᐊᖅᑕᐅᓂᐊᖅᑐᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.
12.2.2 - ᐊᐅᓚᓂᖏᑦ
ᐊᐅᓚᓂᓪᓗᐊᑕᕆᓂᐊᖅᑕᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦᑕ ᐃᒪᐃᑦᑑᓂᐊᖅᑐᑦ:
(a)
ᕿᒥᕐᕈᕙᓪᓗᑎᒃ ᐊᐅᓚᓂᐅᔪᓄᑦ ᑐᑦᓯᕋᐅᑎᓂᒃ ᓇᓗᓇᐃᔭᐃᒍᑎᒋᓗᒍ ᕿᒥᕐᕈᔭᐅᒃᑲᓐᓂᕆᐊᖃᕐᒪᖔᖅ;
(b)
ᐃᑉᐱᒍᓱᑦᓯᐊᕐᓗᑎᒃ ᓇᓗᓇᐃᔭᐃᓗᑎᓪᓗ ᖃᓄᑎᒋᑦ ᐊᕕᑦᑐᖅᓯᒪᔪᓂ ᐊᑦᑐᐃᓂᖃᕐᒪᖔᖅ ᐊᐅᓚᓂᐅᔪᖅ, ᓲᕐᓗ ᑐᑭᖓ ᐃᓱᒪᒋᔭᐅᖃᓯᐅᑎᒋᐊᓕᒃ ᒥᓂᔅᑕᒧᑦ ᖃᓄᖅᑑᕈᑎᖃᖅᑎᓪᓗᒍ ᐊᕕᑦᑐᖅᓯᒪᔪᓂ ᐱᔪᒪᔭᕆᔭᐅᔪᒥᒃ;
(c)
ᕿᒥᕐᕈᓗᑎᒃ ᐆᒪᔫᖃᑎᒌᓐᓂᐅᔪᒥᒃ ᐃᓅᓯᕐᒧᓪᓗ ᖃᕿᒪᓇᓱᐊᕐᓂᕐᒧᑦ ᐊᑦᑐᐃᓂᖏᓐᓂᒃ ᐊᐅᓚᓂᕐᒧᑦ ᑐᑦᓯᕋᐅᑏᑦ;
(d)
ᓇᓗᓇᐃᖅᓯᓗᑎᒃ ᑐᓐᖓᕕᖃᕐᓗᑎᒃ ᕿᒥᕐᕈᓂᐅᔪᒥᒃ, ᐊᐅᓚᓂᕐᒧᑦ ᑐᑦᓯᕋᐅᑏᑦ ᑲᔪᓯᒋᐊᕐᒪᖔᑕ, ᒋᐊᖃᖅᐸᑕᓗ, ᖃᓄᐃᓕᖓᔪᓂᒃ ᑐᑭᖃᓗᑎᒃ, ᖃᓄᐃᓐᓂᐊᕐᓂᕐᒥᓂᒃ ᓇᓗᓇᐃᖅᓯᓕᕐᓗᑎᒃ ᒥᓂᔅᑕᒧᑦ, ᐊᒻᒪᓗ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᖃᓄᐃᓕᖓᓂᐊᕐᓂᖓᓂᒃ ᐊᑦᑐᐊᔪᓄᑦ ᐃᓅᓯᕐᒧᑦ ᖃᑭᒪᓇᓱᐊᕐᓂᒃᑯᓪᓗ ᐊᑦᑐᖅᑕᐅᓂᐅᔪᓂᒃ ᐊᑦᑐᐊᖏᑦᑐᓂᒃ ᐆᒪᔫᑲᑎᒌᑦᑐᓄᑦ ᐊᑦᑐᖅᑕᐅᓂᐅᔪᑦ ᐃᓱᒪᓕᐅᕈᑕᐅᒋᐊᖏᑦ ᑕᑯᓐᓇᖅᑕᐅᓂᐊᖅᑐᑦ ᒥᓂᔅᑕᒧᑦ; ᐊᒻᒪᓗ
(e)
ᖃᐅᔨᓴᕐᓗᑎᒃ ᐊᐅᓚᓂᐅᔪᓂᒃ ᑐᓐᖓᕕᖃᕐᓗᑎᒃ ᐱᕕᖃᖅᑎᑦᓯᒍᑕᐅᔪᓂᒃ ᐃᓚᖓ 7-ᒥ.
12.2.3
ᑎᓕᔭᐅᔾᔪᑎᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐱᖃᓯᐅᔾᔨᔾᔮᖏᑦᑐᑦ ᓴᖅᑭᖅᑕᐅᓂᕐᒧᑦ ᐱᔭᕆᐊᓕᓐᓂᒃ ᐃᓅᓯᕐᒨᖓᔪᓄᑦ ᖃᑭᒪᓇᓱᐊᕐᓂᒧᕐᑦ ᐱᕚᓪᓕᕈᑎᑦᓴᓂᒃ.
12.2.4
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᔪᓯᑎᑦᓯᓂᐊᕐᑐᑦ ᐊᓯᖏᓐᓂᒃ ᐊᐅᓚᓂᐅᔪᓂᒃ ᓇᓗᓇᐃᖅᑕᐅᓯᒪᓂᖏᑦ ᒪᓕᓪᓗᒋᑦ ᓂᕆᐅᒋᔭᐅᓂᖏᓐᓘᓐᓃᑦ ᐊᖏᕈᑎᒥ, ᐊᒻᒪᓗ ᕐᑳᖓᒍᑦ ᐊᐅᓚᓂᔪᑦ ᐊᖏᖃᑎᒌᒍᑕᐅᓕᐅᒥᔮᑐᐃᓐᓇᕆᐊᓖᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᒐᕙᒪᒃᑯᖏᓐᓄᓪᓗ ᑲᓇᑕᐅᑉ ᐊᕕᑦᑐᖅᓯᒪᔪᓂᓘᓐᓃᑦ ᒐᕙᒪᐃᑦ ᐅᕝᕙᓗ ᐋᖅᑭᑦᑕᐅᓯᒪᑉᐸᑕ ᐱᖁᔭᖅᑎᒍᑦ.
12.2.5 - ᓯᕗᓪᓕᐅᔾᔭᐅᓗᑎᒃ ᑐᕌᒐᕆᔭᐅᒋᐊᓖᑦ
ᑲᔪᓯᑎᑦᓯᓗᑎᒃ ᐊᐅᓚᓂᕐᒥᓂᒃ, ᓯᕗᓪᓕᐅᔾᔭᐅᓗᑎᒃ ᑐᕌᒐᕆᔭᐅᔪᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᖃᖓᓕᒫᑦᓯᐊᖅ ᓴᐳᔾᔨᓂᐅᒋᐊᓖᑦ ᖃᐅᔨᒪᑎᑦᓯᒍᑕᐅᓪᓗᑎᓪᓗ ᑕᕝᕙ>ᐅᔪᓂᒃ ᓯᕗᓂᑦᑎᓐᓂᓪᓗ ᖃᓄᐃᓐᖏᑦᓯᐊᕐᓂᖏᓐᓂᒃ ᓄᓇᓕᓖᑦ ᐊᒻᒪᓗ ᓄᓇᓖᑦ ᓄᓇᕗᒻᒥ, ᓴᐳᔾᔨᒍᑕᐅᓗᓂᓗ ᐆᒪᔫᖃᑎᒌᑦᑐᑦ ᖃᓄᐃᓐᖏᓐᓂᖏᓐᓄᑦ ᓄᓇᕗᒻᒥ. ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐃᓱᒪᒋᔭᖃᖃᓯᐅᑎᓂᐊᕐᒥᔪᑦ ᓄᓇᓕᓕᓐᓂᒃ ᑲᓇᑕᒥ ᓯᓚᑖᓃᑦᑐᓂᒃ ᓄᓇᕗᑦ.
12.2.6 - ᑲᑎᒪᔨᖏᑦ ᖃᓄᕐᓗ ᑎᓕᔭᐅᓲᖑᒻᒪᖔᑕ
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖃᕐᓂᐊᖅᑐᑦ 9-ᓂᒃ, ᐃᓚᖓᑦ ᐃᑦᓯᕙᐅᑕᓕᒋᔭᐅᓗᓂ. ᑲᑎᒪᔨᖏᑦ ᑎᓕᔭᐅᓂᐊᖅᑐᑦ ᐃᒫᒃ:
(a)
ᓯᑕᒪᑦ ᑎᓕᔭᐅᓂᐊᖅᑐᑦ ᒐᕙᒪᑐᖃᒃᑯᑦ ᒥᓂᔅᑕᖓᓐᓄᑦ ᐅᑭᐅᖅᑕᖅᑐᒧᑦ, ᓂᕈᐊᕋᑦᓴᓕᐅᓚᐅᖅᑎᓪᓗᒋᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ;
(b)
ᒪᕐᕉᒃ ᑲᑎᒪᔩᒃ ᑎᓕᔭᐅᓂᐊᖅᑑᒃ ᒥᓂᔅᑕᒧᑦ ᐊᑕᐅᓯᐅᓐᖏᑦᑐᒧᓪᓘᓐᓃᑦ ᒥᓂᔅᑕᖏᓐᓄᑦ ᒐᕙᒪᒃᑯᖏᑦᑕ ᑲᓇᑕᐅᑉ;
(c)
ᒪᕐᕉᒃ ᑲᑎᒪᔩᒃ ᑎᓕᔭᐅᓂᐊᖅᑑᒃ ᒥᓂᔅᑕᖓᓐᓄᑦ ᒥᓂᔅᑕᖏᓐᓄᓘᓐᓃᑦ ᐊᕕᑦᑐᖅᓯᒪᔪᓂ ᒐᕙᒪᐃᑦ; ᐊᐃᑉᐸᖓ ᑎᓕᔭᐅᒋᐊᓕᒃ ᓄᓇᒥᐅᑕᓕᕆᓂᕐᒧᑦ ᒥᓂᔅᑕᒧᑦ;
(d)
ᓂᕈᐊᕋᑦᓴᓂᒃ ᐊᖏᖃᑎᒌᒍᑕᐅᓯᒪᔪᓂᒃ ᐊᑐᐃᓐᓇᐅᑎᑕᐅᔪᓂᓪᓗ ᐃᓄᒻᒧᑦ ᑎᓕᔭᐅᓯᒪᔪᒧᑦ ᐊ`ᑖᓂ (a)-(c)-ᒧᓄᑦ, ᐃᑦᓯᕙᐅᑕᓕᒃ ᑎᓕᔭᐅᓂᐊᖅᑐᑦ ᒐᕙᒪᑐᖃᒃᑯᑦ ᒥᓂᔅᑕᖓᓐᓄᑦ ᐅᑭᐅᖅᑕᖅᑐᒧᑦ ᐅᖃᖃᑎᖃᓚᐅᕐᓗᓂ ᐊᕕᑦᑐᖅᓯᒪᔪᓂ ᒐᕙᒪᓂᒃ;
(e)
ᓂᕈᐊᕋᑦᓴᓕᐊᖑᓚᐅᖅᑎᓪᓗᒍ ᑎᓕᔭᐅᓚᐅᖅᑎᓪᓗᒍᓗ ᐃᑦᓯᕙᐅᑕᓕᒃ, ᓂᕈᐊᖅᑕᐅᓂᐅᓴᓂᖅᓴᐅᓂᐊᖅᑐᑦ ᓄᓇᕗᒻᒥ ᓄᓇᓖᑦ ᓂᕈᐊᕋᑦᓴᐃᑦ ᑕᐃᒫᑦᓴᐃᓐᓇᓪᓗᐊᖅ ᐱᔪᓐᓇᕐᓂᖃᖅᐸᑕ.
12.2.7
ᑎᓕᔭᐅᓕᑕᐃᓐᓇᑎᓪᓗᒋᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᑲᑎᒪᔨᓄᑦ, ᒪᕐᕉᒃ ᑲᑎᒪᔩᒃ ᐊᑖᓂ ᑎᑎᕋᖅᓯᒪᔪᖅ 12.2.6(a), ᐊᑕᐅᓯᖅ ᑲᑎᒪᔨ ᐊᑖᓂ 12.2.6(b) ᐊᒻᒪᓗ ᐊᑕᐅᓯᖅ ᑲᑎᒪᔨ ᐊᑖᓂ 12.2.6(c) ᑎᓕᔭᐅᓂᐊᖅᑐᑦ ᐊᕐᕌᒍᓄᑦ ᐱᖓᓱᓄᑦ, ᐊᒻᒪᓗ ᐃᓚᖏᑦ ᑲᑎᒪᔩᑦ ᐊᑖᓂ 12.2.6(a), (b), ᐊᒻᒪᓗ (c) ᑎᓕᔭᐅᓂᐊᖅᑐᑦ ᐊᕐᕌᒍᓄᑦ ᓯᑕᒪᓄᑦ. ᑭᖑᓂᖓᒍᑦ, ᑎᓕᔭᐅᔪᓕᒫᑦ ᐊᑕᕙᓐᓂᐊᖅᑐᑦ ᐊᕐᕌᒍᓄᑦ ᐱᖓᓱᓄᑦ, ᐋᒡᒐᐅᒐᓗᐊᖅ ᑲᑎᒪᔨ ᑎᓕᔭᐅᔪᖅ ᐃᓇᖐᓗᓂ ᑲᑎᒪᔨᒥᒃ ᐃᓱᓕᑦᓯᖏᑦᑐᒥᒃ ᐊᒥᐊᒃᑯᖓᓂᒃ ᑎᓕᔭᐅᓂᐊᖅᑐᑦ ᑲᑎᒪᔨᐅᓂᐅᒐᔭᖅᑑᑉ ᐊᑯᓂᐅᓂᖓᓄᑦ.
12.2.8
ᐃᑦᓯᕙᐅᑕᓕᖓᑦ ᑎᓕᔭᐅᓂᐊᖅᑐᖅ ᐊᕐᕌᒍᓄᑦ ᐱᖓᓱᓄᑦ.
12.2.9
ᑲᑎᒪᔨᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐲᖅᑕᐅᒍᓐᓇᖅᑐᑦ ᖃᖓᑐᐃᓐᓇᑦᓯᐊᖅ ᓱᓇᑐᐃᓐᓇᖅ ᐱᔾᔪᑕᐅᓗᓂ.
12.2.10
ᑲᑎᒪᔨᒥᒃ ᓄᖅᑲᖅᑐᖃᖅᐸᑦ, ᐃᓇᖐᔪᖅ ᓂᕈᐊᕋᑦᓴᓕᐊᖑᒍᓐᓇᖅᑐᖅ ᑎᓕᔭᐅᓗᓂᓗ ᑐᓐᖓᕕᒋᓗᒋᑦ ᐱᕕᖃᖅᑎᖅᓯᒍᑕᐅᔪᑦ ᐊᑖᓂ 12.2.6 ᐊᒥᐊᒃᑯᖓᓄᑦ ᑲᑎᒪᔨᐅᓂᐅᒐᔭᖅᑑᑉ.
12.2.11
ᑲᑎᒪᔨᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑎᓕᔭᐅᒃᑲᓐᓂᕈᓐᓇᖅᑐᑦ.
12.2.12
ᑲᑎᒪᔨᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᑦ ᑲᒪᕙᓐᓂᐊᖅᑐᑦ ᐃᖅᑲᓇᐃᔮᒥᓂᒃ ᐅᑯᓇᓐᖓᑦ ᒪᓕᓪᓗᑎᒃ:
(a)
ᐸᑎᒻᒥᒋᐊᓖᑦ ᑐᓐᖓᕕᖃᕐᓗᑎᒃ ᐸᐃᑉᐹᒥᒃ ᓇᓗᓇᐃᔭᖅᑕᐅᓯᒪᔪᒥᒃ ᐃᓚᒍᑕᖅ 5-4-ᒥ, ᐊᑑᑎᒋᐊᓕᒃ ᑲᑎᒪᔨᐅᓂᕐᒧᑦ ᐃᖏᓐᖏᓂᕐᒥᓂ, ᐊᖏᖅᑎᑦᓯᒍᓐᓇᖅᑎᑕᐅᔫᑉ ᒪᓕᒐᖅᑎᒍᑦ ᓵᖓᓐᓂ;
(b)
ᐊᑦᑐᐊᔪᑦ ᒪᓕᒐᐃᑦ ᐊᐳᖅᓯᒪᓂᕐᒨᖓᔪᑦ, ᓇᐅᑐᐃᓐᓇᖅ ᑲᑎᒪᔨ ᐃᓅᓗᓂ ᐊᔾᔨᐅᓐᖏᑎᑕᐅᓐᖏᓚᐅᖅᐸᑦ ᐃᓅᓂᖓ ᐱᔾᔪᑕᐅᓗᓂ; ᐊᒻᒪᓗ
(c)
ᐃᒪᐃᓕᖓᓂᖏᑦ ᐊᖏᕈᑎᐅᑉ.
12.2.13
ᑲᑎᒪᔨᒃᑲᓐᓂᕐᓂᒃ ᑎᓕᔭᐅᓕᐅᒥᔮᖅᑐᖃᕈᓐᓇᖅᑐᖅ ᑕᐃᒫᑦᓴᐃᓐᓇᖅ ᐋᖅᑭᑦᑕᐅᓯᒪᒻᒪᑕ 12.2.6(a)-ᒥ, (b)-ᒥ, ᐊᒻᒪᓗ (c)-ᒥ. ᑕᐃᒪᐃᑦᑐᑦ ᑲᑎᒪᔩᑦ ᑎᓕᔭᐅᒍᓐᓇᖅᑐᑦ ᓱᓇᑐᐃᓐᓇᕐᒥᒃ ᐱᔾᔪᑎᓪᓗᐊᑕᖃᕐᓗᑎᒃ, ᐅᕝᕙᓗ ᐊᑕᓗᑎᒃ ᐊᕐᕌᒍᐃᑦ ᐱᖓᓱᑦ ᐅᖓᑖᓅᓐᖏᑦᑐᖅ.
12.2.14
ᐱᖁᔭᖅᑎᒍᑦ ᐱᔪᓐᓇᕐᓂᖃᖅᑎᑕᐅᒍᓐᓇᖅᑐᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓈᓚᑦᑎᖃᓕᕈᓐᓇᕐᓗᑎᒃ ᒪᕐᕉᓕᖅᑲᖓᔫᓐᓂᒃ ᐅᖓᑖᓂᓘᓐᓃᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ. ᓈᓚᑦᑎᖃᕐᓂᐊᖅᐸᑕ ᑕᐃᒪᐃᓪᓗᐊᕇᒋᐊᓖᑦ ᓈᓴᐅᑎᖏᑦ ᑎᓕᔭᐅᔪᑦ ᒐᕙᒪᒃᑯᓐᓄᑦ ᐃᓄᓐᓄᓪᓗ ᑎᒥᖁᑕᐅᔪᓄᑦ ᓂᕈᐊᕋᑦᓴᐃᑦ. ᐱᖁᔭᖅᑎᒍᑦ ᐱᔪᓐᓇᕐᓂᖃᖅᑎᑕᐅᒍᓐᓇᖅᑐᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑎᓕᓯᓂᕐᒥᒃ ᓈᓚᐅᑦᑎᓄᑦ ᐃᓘᓐᓇᖏᓐᓂᒃ ᓴᓐᖏᓂᖏᓐᓂᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ, ᐱᖃᓯᐅᑎᑦᓱᓂ ᓈᓚᓐᓂᖃᖅᑎᑦᓯᒍᓐᓇᕐᓂᖅ.
12.2.15 - ᐊᓪᓚᕕᒻᒪᕆᒃ, ᑲᑎᒪᓃᑦ
ᐊᓪᓚᕕᒻᒪᕆᖓᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓄᓇᕗᒻᒦᓐᓂᐊᖅᑐᖅ.
12.2.16
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᐸᕐᓇᐃᔩᑦ, ᐊᑲᐅᓈᕋᐃᑉᐸᑦ, ᑲᑎᒪᕙᓐᓂᐊᖅᑐᑦ ᓄᓇᕗᒻᒥ.
12.2.17
ᓄᓇᕗᒻᒥ ᐊᑦᑐᖅᑕᐅᕐᓂᕐᒧᑦ ᐸᕐᓇᐃᔩᑦ ᐱᓇᓱᐊᕐᓂᖓᑦ ᐊᐅᓚᓂᖃᕐᓂᐊᖅᑐᖅ ᐊᑐᕐᓗᑎᒃ ᐅᖃᐅᓯᕐᓂᒃ ᐃᓕᑕᕆᔭᐅᓯᒪᔪᓂᒃ ᑲᓇᑕᒥ ᐱᖁᔭᖅᑎᒍᑦ ᑕᐃᒪᐃᑦᓴᕆᐊᖃᕐᓂᓂ ᒪᓕᓪᓗᒍ ᐊᑐᐊᒐᒃᑯᓗᓐᓃᑦ, ᐊᒻᒪᓗ, ᑐᑦᓯᕋᖅᑐᖃᖅᐸᑦ ᑲᑎᒪᔨᒥᒃ, ᐃᓄᑦᑎᑐᑦᑕᐅᖅ.
12.2.18
ᐃᑦᓯᕙᐅᑕᓕᒃ ᑲᑎᒪᑎᑦᓯᓂᐊᖅᑐᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓂᒃ ᐅᓪᓗᐃᑦ 21 ᐃᓗᐊᓐᓂ ᖃᐅᔨᒃᑲᐃᔪᖃᓚᐅᖅᑎᓪᓗᒍ ᓇᓪᓕᖏᓐᓂᒃ ᑕᓪᓕᒪᑦ ᑲᑎᒪᔨᖏᑦᑕ, ᑎᑎᕋᖅᓯᒪᓗᓂ ᑲᑎᒪᒍᒪᓂᐅᔪᖅ ᓇᓗᓇᐃᖅᓯᓯᒪᓗᓂ ᑲᑎᒪᓂᕐᒧᑦ ᐱᔾᔪᑕᐅᔪᒥᒃ.
12.2.19 - ᑲᑎᒪᔩᑦ ᓈᒻᒪᓐᓂᖏᑦ, ᓂᕈᐊᕐᓂᖅ
ᐋᖅᑭᑦᑕᐅᔪᓕᒫᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᐋᖅᑭᑦᑕᐅᕙᓐᓂᐊᖅᑐᑦ ᐊᒥᓲᓂᖅᓴᓄᑦ ᓂᕈᐊᖅᑐᓄᑦ.
12.2.20
ᐊᑐᓂᑦ ᑲᑎᒪᔩᑦ ᐃᑦᓯᕙᐅᑕᓕᐅᑉ ᐊᓯᖏᑦ ᐊᑕᐅᓯᐊᕐᓗᑎᒃ ᓂᕈᐊᕈᑎᖃᕈᓐᓇᖅᑐᑦ ᖃᓄᖅᑑᕈᑕᐅᒋᐊᓕᒻᒥᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ. ᐊᔾᔨᒌᑦᑐᖃᖅᐸᑦ ᓂᕈᐊᖅᑐᓂᒃ, ᐃᑦᓯᕙᐅᑕᓕᒃ ᓂᕈᐊᕐᓂᐊᖅᑐᖅ.
12.2.21
ᑕᓪᓕᒪᑦ ᑲᑎᒪᔨᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓂ ᑲᑎᒪᒋᐊᖅᐸᑕ ᓈᒻᒪᑦᑐᑦ.
12.2.22
ᐃᓐᓄᒋᐊᓕᓐᓂᖅᑕᖃᖅᐸᑦ ᕿᒥᕐᕈᔨᓂ ᓄᖅᑲᐅᒥᒍᑕᐅᔾᔮᖏᑦᑐᖅ ᑲᑎᒪᔨᐅᑲᐃᓐᓇᕈᓐᓇᕐᓂᕐᒧᑦ.
12.2.23 - ᒪᓕᒐᕋᓛᑦ ᐊᐅᓚᓃᓪᓗ
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ, ᐅᖃᖃᑎᖃᓚᐅᕐᓗᑎᒃ, ᓴᓇᒍᓐᓇᖅᑐᑦ ᑎᑎᕋᕐᓗᑎᓪᓗ ᒪᓕᒐᕋᓛᓂᒃ ᒪᓕᒐᕐᓂᓪᓗ ᐊᐅᓚᓂᐅᔪᓄᑦ ᐅᑯᓄᖓ ᐊᑦᑐᐊᔪᓂᒃ:
(a)
ᑲᑎᒪᓂᖏᑦᑕ ᐊᐅᓚᓂᖏᓐᓄᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ;
(b)
ᐊᐅᓚᓂᖏᑦ ᐱᓇᓱᐊᕐᓂᖏᑦᑕ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐱᖃᓯᐅᑎᑦᓱᑎᒃ ᓇᔫᑎᒋᐊᖃᕐᓂᐅᔪᑦ ᐊᒻᒪᓗ ᐊᑐᕐᓂᖅ ᐅᕐᑳᓚᐅᑎᒃᑯᑦ ᑲᑎᒪᓂᕐᒥᒃ ᑕᐃᒪᐃᑦᑐᒐᓚᓐᓂᓘᓐᓃᑦ;
(c)
ᓴᖅᑭᖅᑕᐅᓂᖏᑦ ᑲᑎᒪᔨᕋᓛᖑᑲᐃᓐᓇᕐᓂᐊᖅᑐᑦ ᑲᑎᒪᔨᕋᓛᖑᓂᐊᖅᑐᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ, ᐋᖅᑭᑦᑕᐅᓂᖏᓐᓄᓪᓗ ᑲᑎᒪᔩᑦ ᓈᒻᒪᓐᓂᕋᖅᑕᐅᓂᖏᓐᓄᑦ;
(d)
ᑲᔪᓯᓂᖏᑦ ᐃᖅᑲᓇᐃᔮᖏᑦᑕ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ, ᐊᐅᓚᑕᐅᓂᖏᑦ ᐃᓗᐊᓂ ᐊᐅᓚᓂᖏᑦᑕ, ᑲᒪᒋᔭᖏᓪᓗ ᓱᕗᓕᖅᑎᖏᑦᑕ ᐃᖅᑲᓇᐃᔭᖅᑎᖏᑦᑕᓗ;
(e)
ᐊᐅᓚᓂᖏᑦ ᐅᓂᒃᑳᖃᕐᓂᕐᒧᑦ ᐅᓐᓂᓗᓐᓂᕐᒧᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ;
(f)
ᐊᐅᓚᓃᑦ ᖃᐅᔨᒪᓕᑕᐃᓪᓗ ᓄᐊᑦᓯᓂᕐᒧᑦ ᑐᓴᕋᑦᓴᓂᒃ ᐃᓱᒪᒋᔭᐅᔪᓂᓪᓗ;
(g)
ᐊᐅᓚᓃᑦ ᐊᑐᖅᑕᐅᓂᐊᖅᑐᑦ ᐊᒻᒪᓗ ᑐᓂᓯᓂᖅ ᓇᓗᓇᐃᕈᑎᑦᓴᓂᒃ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᖃᖅᑎᓪᓗᒍ ᓵᖓᓐᓂ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ;
(h)
ᓴᖅᑭᖅᑕᐅᓂᖏᑦ ᖃᐅᔨᒪᓕᑕᐅᒋᐊᓖᑦ ᐸᕐᓇᑕᐅᓂᖓᓄᑦ ᐊᑦᑐᐃᓂᕐᒧᑦ ᐅᖃᐅᓯᖅᑕᐃᑦ; ᐊᒻᒪᓗ
(i)
ᐃᓘᓐᓈᒍᑦ, ᐊᐅᓚᓂᖏᑦ ᐱᓇᓱᐊᕐᓂᖏᑦᑕ ᐱᓇᓱᐊᕐᕕᐅᓂᖏᑦᑕᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ.
12.2.24 - ᑭᓇᒃᑯᑐᐃᓐᓇᕐᓄᑦ ᓈᓚᓐᓃᑦ
ᐋᖅᑭᓱᖅᑕᐅᑎᓪᓗᒋᑦ ᒪᓕᒐᕋᓛᖏᑦ ᒪᓕᒐᐃᓪᓗ ᐊᐅᓚᓂᕐᒧᑦ ᐊᐅᓚᑕᐅᓂᖏᓐᓄᑦ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᐅᔪᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᐸᕐᓇᐃᔩᑦ ᐃᒪᐃᓐᓂᐊᖅᑐᑦ:
(a)
ᑎᑭᐅᑎᓗᒍ ᐃᓗᓕᖅᑐᔪᒥᒃ ᐊᑑᑎᓂᖓᓄᑦ ᑐᓐᖓᕕᖏᓐᓂᒃ ᐱᑦᓯᐊᖅᑕᐅᓯᓐᓇᕐᓂᐅᑉ ᐊᐅᓚᓂᐅᔪᒃᑯᓪᓗ ᐊᔾᔨᒌᑎᑦᓯᓂᖅ, ᓇᓗᓇᐃᕆᐊᒃᑲᓐᓂᕐᓗᒍ ᐊᓯᔾᔨᕆᐊᕈᓐᓇᕐᓂᖅ ᑐᓴᐅᒪᑎᑦᓯᓂᕐᓗ ᐱᓗᐊᖅᑐᒥᒃ
(i)
ᐱᕕᖃᖅᑎᑦᓗᑎᒃ, ᐊᑲᐅᓈᕋᐃᑉᐸᑦ, ᑐᓂᔭᐅᓂᖏᓐᓂᒃ ᓇᓗᓇᐃᖁᑎᑦᓴᐃᑦ ᑐᓂᔭᑦᓴᐅᒐᔭᓐᖏᑦᑐᑦ ᐊᑖᓂ ᐱᔭᕆᐊᑐᔪᑦ ᒪᓕᒐᐃᑦ ᐃᑎᖅᑎᑦᓯᓂᕐᒧᑦ ᓇᓗᓇᐃᕈᑎᑦᓴᓂᒃ, ᐊᒻᒪᓗ
(ii)
ᐃᑉᐱᒋᑦᓯᐊᕐᓗᒋᑦ ᐱᖅᑯᓯᖏᑦ ᐃᓄᐃᑦ ᐅᖃᐅᓯᒃᑯᑦ ᑐᓴᐅᒪᖃᑦᑕᐅᑎᓂᕆᓲᖏᑦ ᖃᓄᖅᑑᓲᖑᓂᖏᓪᓗ; ᐊᒻᒪᓗ
(b)
ᐅᓚᕕᒋᐊᖅᑐᖃᕐᓂᖅᐸᑦ, ᐱᕕᖃᖅᑎᑦᓯᐊᕐᓗᒋᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ.
12.2.25
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐱᔪᓐᓇᕐᓂᖃᕐᓂᐊᖅᑐᑦ ᖃᐃᖁᔨᒍᓐᓇᕐᓂᕐᒥᒃ ᑕᐅᑐᑦᑐᒥᓂᕐᓂᒃ, ᐸᐃᑉᐹᓂᒃ ᓱᓇᒐᓚᓐᓂᒃ ᑲᔪᓯᑎᑦᓯᓗᑎᒃ ᑎᒍᒥᐊᖅᑕᒥᓐᓂᒃ.
12.2.26
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓈᓚᓐᓂᖃᕐᓂᖏᑦ ᐊᐅᓚᓂᖃᖅᐸᓐᓂᐊᖅᑐᑦ ᐊᑐᕐᓗᑎᒃ ᑲᓇᑕᒥ ᐃᓕᑕᕆᔭᐅᓯᒪᔪᓂᒃ ᐅᖃᐅᓯᕐᓂᒃ ᑕᐃᒪᐃᑦᓴᕆᐊᖃᕈᑎᒃ ᒪᓕᒐᖅᑎᒍᑦ ᐊᑐᐊᒐᖅᑎᒍᓪᓘᓐᓃᑦ, ᐊᒻᒪᓗ, ᑐᑦᓯᕋᖅᑐᖃᖅᐸᑦ ᑲᑎᒪᔨᒥᒃ, ᐃᓄᑦᑎᑐᑦ ᐅᖃᐅᓯᖅ.
12.2.27
ᐊᐅᓚᓂᒋᐊᓕᓕᒫᑦ ᐊᑑᑎᔭᐅᓂᐊᖅᑐᑦ ᖃᐅᔨᒃᑲᐃᓗᑎᒃ, ᑐᓴᕋᑦᓴᓂᒃ ᑐᓴᖅᑕᐅᒃᑲᐃᓗᑎᒃ, ᐋᖅᑭᑦᓱᐃᓗᑎᓪᓗ ᓈᓚᓐᓂᑦᓴᐅᔪᓂᒃ ᓇᒥᐅᓂᐊᕐᒪᖔᕐᓗ ᑭᓇᒃᑯᑐᐃᓐᓇᕐᓂᒃ ᐅᔾᔨᕈᓱᒃᑲᓐᓂᑎᑦᓯᓗᑎᒃ ᐃᓚᐅᑎᓐᓂᐅᒍᓐᓇᖅᑐᒥᒃ ᓈᓚᓐᓂᐅᔪᓂ.
12.2.28 - ᓯᕗᓕᖅᑏᑦ ᐃᖅᑲᓇᐃᔭᖅᑏᓪᓗ
ᓯᕗᓕᖅᑎᒋᔭᐅᒋᐊᓖᑦ ᐃᖅᑲᓇᐃᔭᖅᑎᒋᔭᐅᒋᐊᓖᓪᓗ ᐃᖏᕐᕋᑦᓯᐊᖁᓪᓗᒍ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ, ᐱᖃᓯᐅᑎᑦᓱᑎᒃ ᖃᐅᔨᒪᔪᒻᒪᕇᑦ ᐃᓄᐃᓪᓘᓐᓃᑦ ᖃᐅᔨᒪᔭᕆᐊᓕᓐᓂᒃ ᖃᐅᔨᒪᔪᑦ, ᑎᓕᔭᐅᒍᓐᓇᖅᑐᑦ, ᐊᑭᓕᖅᑕᐅᓂᐊᖅᓱᑎᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᑲᑎᒪᔨᓄᑦ ᐃᓕᑕᖅᓯᓂᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᓈᒻᒪᑐᐃᓐᓇᕆᐊᓕᒃ ᐃᓚᖓᓂ.
12.2.29
ᓯᕗᓕᖅᑏᑦ ᐃᖅᑲᓇᐃᔭᖅᑏᓪᓗ ᑭᐅᖃᑦᑕᕆᐊᖃᕐᓂᐊᖅᑐᑦ, ᑐᑭᒧᐊᑦᑎᑕᐅᓗᑎᓪᓗ ᐊᐅᓚᑦᓯᓂᖏᓐᓄᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.
12.2.30
ᓯᕗᓕᖅᑎᓕᒫᖏᑦ ᐃᖅᑲᓇᐃᔭᖅᑎᖏᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦᑕ ᒪᓕᒋᐊᓖᑦ ᑖᒃᑯᓇᓐᖓᓴᐃᓐᓇᖅ ᒪᓕᒐᖏᓐᓂᒃ ᐊᐳᖅᓯᒪᓂᕐᒨᖓᔪᓂᒃ ᑲᑎᒪᔨᖏᑦᑕ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ.
12.2.31 - ᐊᑭᓕᖅᑐᕆᐊᓕᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ
ᐊᑭᓕᖅᑐᕆᐊᓕᖏᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑎᒍᒥᐊᖅᑕᐅᓂᐊᖅᑐᑦ ᒐᕙᒪᒃᑯᓐᓄᑦ. ᓄᓇᕗᒻᒥ ᐊᑦᑐᖅᑕᐅᕐᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᐸᕐᓇᐃᐸᓐᓂᐊᖅᑐᑦ ᐊᕐᕌᒍᒧᑦ ᑮᓇᐅᔭᖅᑑᑎᑦᓴᓂᒃ ᕿᒥᕐᕈᔭᐅᒋᐊᓕᓐᓂᒃ ᐊᖏᖅᑕᐅᒋᐊᓕᓐᓂᓪᓗ ᒐᕙᒪᒃᑯᓐᓄᑦ.
ᐃᓚᖓ 3
ᐊᑦᑐᐊᓂᖏᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᓂᕐᒧᑦ ᐱᕕᖃᑦᑎᑦᓯᒍᑕᐅᔪᑦ
12.3.1
ᓄᓇᕗᒻᒥ ᐸᕐᓇᐃᔩᑦ ᓇᓗᓇᐃᖅᓯᑉᐸᑕ, ᑐᓐᖓᕕᒋᑦᓱᒍ 11.5.10, ᐊᐅᓚᓂᐅᔪᒧᑦ ᑐᑦᓯᕋᐅᑎ ᒪᓕᒋᐊᖓ ᓄᓇᒥᒃ ᐊᑐᕐᓂᒧᕐᑦ ᐸᕐᓇᐅᑎᓂᒃ, ᐅᕝᕙᓗ ᐊᓯᔾᔨᐊᕐᔪᑦᓯᒪᔪᖅ ᐊᖏᖅᑕᐅᑉᐸᑦ, ᓄᓇᕗᒻᒥ ᐸᕐᓇᐃᔩᑦ, ᑐᓐᖓᕕᒋᑦᓱᒋᑦ 12.3.2, 12.3.3 ᐊᒻᒪᓗ 12.3.4, ᓯᕗᒧᑦᑎᑦᓯᓂᐊᖅᑐᑦ ᐊᐅᓚᓂᐅᔪᒧᑦ ᑐᑦᓯᕋᐅᑎᒥᒃ ᑲᑦᓱᖓᐃᓐᓂᖃᕐᓗᑎᑦ ᐃᓱᒪᓕᐅᕆᔾᔪᑎᖃᕐᓗᑎᓪᓗ ᓄᓇᕗᒻᒥ ᐊᑦᑐᖅᑕᐃᓂᕐᒧᑦ ᕿᒥᕐᕈᔨᓄᑦ ᕿᒥᕐᕈᓂᐊᖅᑎᓪᓗᒋᑦ.
12.3.2
ᐊᐅᓚᓂᐅᔪᑦ ᑐᑦᓯᕋᐅᑏᑦ ᐊᑖᓃᑦᑐᑦ ᐃᓚᖓ 12-1 ᕿᒥᕐᕈᔭᐅᒋᐊᑐᔾᔮᖏᑦᑐᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ. ᓄᓇᕗᒻᒥ ᐸᕐᓇᐃᔩᑦ ᓯᕗᒧᑦᑎᑦᓯᔾᔮᖏᑦᑐᑦ ᑕᐃᒪᐃᑦᑐᓂᒃ ᑐᑦᓯᕋᐅᑎᓂᒃ ᓄᓇᕗᒻᒥ ᐊᑦᑐᖅᑕᐃᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ.
12.3.3
ᑕᐃᒪᐃᓕᖓᒐᓗᐊᖅᑎᓪᓗᒍ 12.3.2, ᓄᓇᕗᒻᒥ ᐸᕐᓇᐃᔨᑦ ᑐᓂᓯᒍᓐᓇᖅᑐᑦ ᐊᐅᓚᓂᕐᒧᑦ ᑐᑦᓯᕋᐅᑎᒥᒃ ᐊᑖᓂ ᐅᐃᒍ 12-1 ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᕿᒥᕐᕈᓂᐊᖅᑎᓪᓗᒋᑦ, ᓄᓇᕗᒻᒥ ᐸᕐᓇᐃᔩᑦ ᐃᓱᒫᓘᑎᖃᖅᐸᑕ ᐊᑦᑐᐊᔪᓂᒃ ᐊᑦᑐᖅᑕᐃᓂᐊᕐᓂᖓᓐᓄᑦ ᑕᐃᑦᓱᒪ ᐊᐅᓚᓂᐅᔫᑉ ᐊᑦᑐᐊᔪᓄᑦ ᐊᓯᖏᓐᓄᑦ ᐱᕙᓪᓕᐊᓂᕐᒧᑦ ᐊᐅᓚᓂᐅᔪᓄᑦ ᐸᕐᓇᑕᐅᔪᒥ.
12.3.4
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᕿᒥᕐᕈᔾᔮᖏᑦᑐᑦ ᑐᑦᓯᕋᐅᑎᓂᒃ ᒪᓕᓐᖏᑦᑐᓂᒃ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᒃ, ᐋᒡᒐᐅᒐᓗᐊᖅ ᑕᐃᒪᐃᒋᐊᑐᓐᖏᑎᑕᐅᓯᒪᑉᐸᑦ ᐊᑖᓂ 11.5.11 ᐅᕝᕙᓗ ᐊᓯᔾᔨᐊᕐᔪᓐᓂᐅᔪᖅ ᐊᖏᖅᑕᐅᓯᒪᑉᐸᑦ ᐊᑖᓂ 11.5.10.
12.3.5
12.3.1 ᑎᑭᓪᓗᒍ 12.3.4 ᐊᑑᑎᓂᐊᖅᑐᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ ᐊᖏᖅᑕᐅᑉᐸᑦ ᑐᓐᖓᕕᒋᑦᓱᒍ 11.5.9. ᐱᑕᖃᓐᖏᑉᐸᑦ ᐊᖏᖅᑕᐅᓯᒪᔪᒥᒃ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᒃ, ᐊᐅᓚᓂᐅᔪᓄᑦ ᑐᑦᓯᕋᐅᑎᓕᒫᑦ ᐊᓯᖏᑦ ᐊᑖᓃᑦᑐᑦ ᐅᐃᒍ 12-1 ᑐᓂᔭᐅᓂᐊᖅᑐᑦ ᑐᕋᐃᓐᓇᕐᓗᑎᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐸᕐᓇᐃᔨᖏᓐᓄᑦ ᕿᒥᕐᕈᔭᐅᓂᐊᖅᑎᓪᓗᒋᑦ.
ᐃᓚᖓ 4
ᕿᒥᕐᕈᓂᖅ ᐊᐅᓚᓂᐅᔪᓄᑦ ᑐᑦᓯᕋᐅᑎᓂᒃ
12.4.1
ᐱᔭᐅᑐᐊᖅᐸᑕ ᓇᓪᓕᖏᑦ ᐊᐅᓚᓂᐅᔪᒧᑦ ᑐᑦᓯᕋᐅᑎᐅᑉ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᕿᒥᕐᕈᓂᐊᖅᑐᑦ ᑐᑦᓯᕋᐅᑎᒥᒃ ᓇᓗᓇᐃᖅᓯᒐᓱᐊᕐᓗᑎᒃ ᐊᑦᑐᐃᓂᖃᓪᓚᕆᓐᓂᐊᕐᒪᖔᖅ, ᑕᐃᒪᐃᑉᐸᓪᓗ ᕿᒥᕐᕈᒋᐊᖃᕐᒪᖔᖅ ᐊᑖᓂ ᐃᓚᖓ 5 ᐅᕝᕙᓗ 6.
12.4.2
ᕿᒥᕐᕈᓕᕈᑎᒃ ᐊᐅᓚᓂᕐᒧᑦ ᑐᑦᓯᕋᐅᑎᒥᒃ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᖃᐅᔨᒪᓕᑕᖃᕐᓂᐊᖅᑐᑦ ᐅᑯᓇᓐᖓᑦ ᑐᓐᖓᕕᖃᕐᓗᑎᒃ:
(a)
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓇᓗᓇᐃᖅᓯᓂᐊᖅᑐᑦ ᕿᒥᕐᕈᓂᖅᑕᖃᕆᐊᖃᕆᐊᖓ, ᑕᑯᓐᓇᖅᑕᖓᑦᑎᒍᑦ ᐃᒪᐃᑦᑐᖃᖅᐸᑦ:
(i)
ᐊᐅᓚᓂᐅᔪᖅ ᐊᑦᑐᐃᓂᕐᓗᓐᓂᖃᕐᓂᐊᖅᐸᑦ ᓯᓚᒥᒃ, ᐆᒪᔪᖃᕐᕕᓐᓂᒃ ᐅᕝᕙᓗ ᐃᓄᐃᑦ ᐊᖑᓇᓱᓐᓂᕆᕙᑦᑕᖏᓐᓂᒃ;
(ii)
ᐊᐅᓚᓂᐅᔪᖅ ᐊᑦᑐᐃᓂᕐᓗᓐᓂᖃᕐᓂᐅᓴᑉᐸᑦ ᐅᑭᐅᖅᑕᖅᑐᒥᐅᓂᒃ;
(iii)
ᐊᐅᓚᓂᐅᔪᖅ ᑭᓇᒃᑯᑐᐃᓐᓇᕐᓂᒃ ᐃᓱᒫᓗᑦᑎᑦᓯᓪᓚᕆᓐᓂᐊᖅᐸᑦ, ᐅᕝᕙᓗ
(iv)
ᐊᐅᓚᓂᐅᔪᖅ ᐃᓗᓕᖃᖅᐸᑦ ᖃᐅᔨᒪᓪᓚᕆᒋᐊᓕᓐᓅᖓᔪᓂᒃ ᐊᑦᑐᐃᓂᕆᒐᔭᖅᑕᖏᑦ ᖃᐅᔨᒪᔭᐅᓐᖏᓪᓗᑎᒃ;
(b)
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓇᓗᓇᐃᖅᓯᕙᓐᓂᐊᖅᑐᑦ ᕿᒥᕐᕈᓂᖅᑕᖃᕆᐊᑐᓐᖏᒋᐊᖓ, ᑕᑯᓐᓇᖅᑕᖓᑦᑎᒍᑦ, ᐊᐅᓚᓂᐅᔪᖅ ᐃᓱᒫᓘᑕᐅᓚᖓᔫᔮᓐᖏᑉᐸᑦ ᑭᓇᒃᑯᑐᐃᓐᓇᕐᓄᑦ ᐊᒻᒪᓗ
(i)
ᐊᑦᑐᐃᓂᕐᓗᓐᓂᖅᑕᖃᓗᐊᓚᖓᔫᔮᓐᖏᑉᐸᑦ, ᐅᕝᕙᓗ
(ii)
ᐊᐅᓚᓂᐅᔪᖅ ᐊᑦᑐᐃᓂᕐᓗᓐᓂᖃᕐᓂᐊᕋᓗᐊᖅᑎᓪᓗᒍ ᓂᕆᐅᒋᔭᐅᕙᒌᖅᑐᓂᒃ ᒥᑭᓪᓕᑎᖅᑕᐅᒍᒫᕐᓂᐊᖅᓱᑎᓪᓗ ᖃᐅᔨᒪᔭᐅᔪᓄᑦ; ᐊᒻᒪᓗ
(c)
ᓇᓗᓇᐃᑦᓯᓕᕈᑎᒃ ᕿᒥᕐᕈᓂᖅᑕᖃᕆᐊᖃᕐᒪᖔᖅ ᐅᕝᕙᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᐊᑑᑎᖃᖅᑎᑦᓯᓂᖅᓴᐅᓂᐊᖅᑐᑦ ᐱᕕᖃᖅᑦᓯᒍᑕᐅᔪᓂᒃ ᐊᑖᓂ 12.4.2(a).
12.4.3
ᓇᐅᑐᐃᓐᓇᖅ ᑐᑦᓯᕋᐅᑎ ᐃᓗᓕᖓᓐᓄᑦ ᐊᐅᓚᓂᖓᓄᓪᓘᓐᓃᑦ ᐊᐅᓚᓂᐅᔪᒧᑦ ᑐᑦᓯᕋᐅᑎᐅᑉ ᑲᔪᓯᒍᓐᓇᖅᑎᑕᐅᓯᒪᔫᑉ ᑐᓐᖓᕕᒋᑦᓱᒋᑦ ᐅᑯᐊ ᐱᕕᖃᖅᑎᑦᓯᓂᐅᔪᑦ ᕿᒥᕐᕈᔭᐅᒋᐊᑐᔾᔮᖏᑦᑐᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᐃᒪᐃᑦᑐᖃᓐᖏᑐᐊᖅᐸᑦ:
(a)
ᐃᓗᓕᖓ ᐊᐅᓚᓂᐅᔪᕐᓘᓐᓃᑦ ᐃᓚᒋᔭᐅᑦᓴᐅᑎᒋᓐᓂᖏᑉᐸᑦ ᑐᑦᓯᕋᕆᐊᓐᖓᕐᒪᑕ; ᐅᕝᕙᓗ
(b)
ᐃᓚᒍᑦᓯᐅᔾᔭᐅᑉᐸᑦ ᐊᓯᔾᔩᓪᓚᕆᒐᔭᖅᐸᑦ ᐊᐅᓚᓂᐅᔪᒥᒃ.
12.4.4
ᐱᔭᐅᓚᐅᖅᑎᓪᓗᒋᑦ ᐊᐅᓚᓂᐅᔪᒧᑦ ᑐᑦᓯᕋᐅᑏᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᕿᒥᕐᕈᓂᐊᖅᑐᑦ ᑐᑦᓯᕋᐅᑎᓂᒃ ᓇᓗᓇᐃᖅᓯᓗᑎᓪᓗ ᒥᓂᔅᑕᒧᑦ ᑎᑎᕋᕐᓗᑎᒃ ᐃᒫᒃ:
(a)
ᑐᑦᓯᕋᐅᑎ ᑲᔪᓯᑎᑕᐅᒍᓐᓇᖅᑐᖅ ᕿᒥᕐᕈᔭᐅᓐᖏᓪᓗᓂ ᐊᑖᓂ ᐃᓚᖓ 5 ᐅᕝᕙᓗ 6; ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᐃᓱᒪᓕᐅᕆᒍᓐᓇᖅᑐᑦ ᓇᓗᓇᐃᖅᓯᒪᔪᓂᒃ ᑐᑭᖏᓐᓄᑦ ᐃᒪᐃᓕᖓᓂᖏᓐᓄᓪᓗ ᐊᑕᔪᓄᑦ ᓇᐅᑐᐃᓐᓇᕐᓄᑦ ᐊᖏᖅᑕᐅᔪᒧᑦ, ᐊᑦᑐᐊᔪᓄᑦ ᑐᕌᒐᓪᓗᐊᑕᐅᔪᓄᑦ ᓇᓗᓇᐃᖅᑕᐅᓯᒪᔪᓄᑦ 12.2.5-ᒥ;
(b)
ᑐᑦᓯᕋᐅᑎ ᕿᒥᕐᕈᔭᐅᒋᐊᖃᖅᐸᑦ ᐊᑖᓂ ᐃᓚᖓ 5 ᐅᕝᕙᓗ 6; ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓇᓗᓇᐃᖅᓯᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓱᒫᓘᑕᐅᔪᓂᒃ ᐃᓱᒪᑦᓴᖅᓯᐅᕈᑕᐅᒋᐊᓕᓐᓂᒃ ᕿᒥᕐᕈᓂᕐᒥ.
(c)
ᑐᑦᓯᕋᐅᑎ ᓴᓇᓯᒪᑦᓯᐊᖏᑉᐸᑦ ᕿᒥᕐᕈᑦᓯᐊᕋᑦᓴᐅᓐᖏᓪᓗᓂ, ᐊᒻᒪᓗ ᐅᑎᖅᑎᑕᐅᒋᐊᖃᕐᓗᓂ ᑐᑦᓯᕋᖅᑐᒧᑦ ᑐᑭᓯᓇᖅᑎᑕᐅᒋᐊᒃᑲᓐᓂᕐᓗᓂ; ᐅᕝᕙᓗ
(d)
ᐊᑦᑐᐃᓂᕐᓗᓐᓂᐅᑐᐃᓐᓇᕆᐊᓖᑦ ᑐᑦᓯᕌᖑᔪᒧᑦ ᓈᒻᒪᖏᑉᐸᑕ ᐋᖅᑭᒋᐊᕆᐊᖃᕐᓗᑎᒃ ᖁᔭᓈᖅᑕᐅᓗᑎᓪᓘᓐᓃᑦ.
12.4.5
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᕋᓛᖏᑦ ᑲᒪᒋᒋᐊᓕᒻᒥᓂᒃ ᑲᔪᓯᑎᑦᓯᓂᐊᖅᑐᑦ ᐊᑖᓂ 12.4.4:
(a)
ᒪᓕᒐᖅᑎᒍᑦ ᓚᐃᓴᓐᓯᖃᕆᐊᖃᖅᑐᖃᖅᐸᑦ ᐋᖅᑮᔪᖃᕐᓂᐊᕐᓗᓂ ᐱᕕᑦᓴᖃᕐᓂᐅᑉ ᐃᓗᐊᓂ, ᐱᕕᑦᓴᖃᕐᓂᐅᑉ ᐃᓗᐊᓂ ᐱᕕᖃᖅᑎᑕᐅᓗᓂ ᓚᐃᓴᓐᓯᓕᕆᔨ ᒪᓕᒍᓐᓇᖅᑎᑕᐅᓗᓂ ᐱᔭᕆᐊᓕᒻᒥᒃ;
(b)
ᐊᖏᓚᐅᖅᑎᓪᓗᒍ ᒥᓂᔅᑕ, ᐱᕕᑦᓴᖃᕐᓗᓂ ᐅᓪᓗᐃᑦ 45 ᐅᖓᑖᓂ; ᐅᕝᕙᓗ
(c)
ᐊᓯᐊᒍᑦ, ᐅᓪᓗᐃᑦ 45 ᐃᓗᐊᓂ.
12.4.6
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓇᓗᓇᐃᖅᓯᑉᐸᑕ ᒥᓂᔅᑕᒧᑦ ᑐᑦᓯᕋᐅᑎ ᑲᔪᓯᑎᑕᐅᑐᐃᓐᓇᕆᐊᖃᕆᐊᖓ ᕿᒥᕐᕈᔭᐅᓐᖏᓪᓗᓂ, ᑐᑦᓯ?ᐅᑎ ᑲᔪᓯᑎᑕᐅᓂᐊᑦᑐᑦ ᑖᒃᑯᐊᓪᓗᐊᑦ ᐱᖁᔭᐃᑦ ᐊᑖᓂ, ᒥᓂᔅᑕ ᕿᒥᕐᕈᔭᐅᖁᔨᓯᓐᖏᑐᐊᖅᐸᑦ.
12.4.7
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓇᓗᓇᐃᖅᓯᑉᐸᑕ ᒥᓂᔅᑕᒧᑦ ᑐᑦᓯᕋᐅᑎ ᕿᒥᕐᕈᔭᐅᒋᐊᖃᕆᐊᖓ, ᒥᓂᔅᑕ ᐃᒪᐃᓪᓂᐊᖅᑐᖅ:
(a)
ᑕᐃᒪᐃᑦᓴᕆᐊᖃᖅᐸᑦ, ᒪᓕᒐᖅᑎᒍᑦ ᐊᓯᐊᒍᓪᓘᓐᓃᑦ, ᑐᓂᓗᒍ ᒥᓂᔅᑕᖓᓐᓄᑦ ᐊᕙᑎᓕᕆᔨᒃᑯᑦ ᕿᒥᕐᕈᔭᐅᓂᐊᖅᑎᓪᓗᒍ ᒐᕙᒪᑐᖃᒃᑯᓐᓂᒃ ᕿᒥᕐᕈᔨᓂᒃ; ᕿᒥᕐᕈᓂᖅ ᐱᖃᓯᐅᔾᔨᓂᐊᖅᑐᖅ ᑕᒪᒃᑮᓐᓂᒃ ᐊᑦᑐᐃᓂᐅᔪᓂᒃ ᐃᓅᓯᕐᓂᒃ ᖃᑭᒪᓇᓱᐊᕐᓂᕐᒥᓪᓗ ᐆᒪᔪᓂᓪᓗ ᐊᑦᑐᐃᓂᕆᑐᐃᓐᓇᕆᐊᓕᖏᓐᓂᒃ;
(b)
ᑐᑦᓯᕋᐅᑎ ᕿᒥᕐᕈᔭᐅᒋᐊᑐᓐᖏᑉᐸᑦ ᒐᕙᒪᑐᖃᒃᑯᓐᓂᒃ ᐊᕙᑎᒥᒃ ᕿᒥᕐᕈᔨᓄᑦ, ᑐᑦᓯᕋᐅᑏᑦ ᑐᓂᓗᒋᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᕿᒥᕐᕈᓂᐊᖅᑎᓪᓗᒋᑦ ᓯᓚᐅᑉ ᐃᓄᐃᓪᓗ ᐊᑦᑐᖅᑕᐅᓂᐊᕐᓂᖏᓐᓂᒃ ᓄᓇᕗᒻᒥ; ᐅᕝᕙᓗ
(c)
ᑐᑦᓯᕋᐅᑎ ᑲᓇᑕᒥ ᐊᕕᑦᑐᖅᓯᒪᔪᓂᓘᓐᓃᑦ ᐃᑉᐱᒋᔭᐅᓗᐊᓐᖏᑉᐸᑦ, ᑐᓴᖅᑎᓪᓗᒍ ᑐᑦᓯᕋᖅᓯᒪᔪᖅ ᑐᑦᓯᕋᐅᑎ ᖁᔭᓈᖅᑕᐅᒋᐊᖃᕆᐊᖓ ᐋᖅᑭᒋᐊᖅᑕᐅᓗᓂᓘᓐᓃᑦ ᑐᓂᔭᐅᒃᑲᓂᕐᓗᓂ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᑲᒪᒋᔭᐅᓂᐊᖅᑎᓪᓗᒋᑦ ᑐᓐᖓᕕᖃᕐᓗᑎᒃ 12.2.4-ᒥᒃ.
12.4.7
(ᐋᖅᑭᒋᐊᖅᑕᐅᔪᖅ P.C. 2008-977 ᒪᐃ 29, 2008)
ᓄᓇᕗᒻᒥ ᐊᕙᑎᓕᕆᔨᒃᑯᑦ ᓇᓗᓇᐃᖅᓯᑉᐸᑕ ᐅᖃᕐᓗᑎᒃ ᒥᓂᔅᑕᒧᑦ ᐱᓕᕆᐊᒧᑦ ᑐᒃᓯᕋᐅᑦ ᕿᒥᕐᕈᓇᑦᑕᐅᒋᐊᒃᑲᓐᓂᕆᐊᖃᕐᓂᖓᓂᒃ, ᒥᓂᔅᑕ ᐃᒪᐃᓕᐅᕆᐊᖃᖅᐳᖅ:
(a)
ᓇᓗᓇᐃᖅᓯᓗᓂ ᐱᓕᕆᐊᒧᑦ ᑐᒃᓯᕋᐅᑦ ᐊᕙᑎᓕᕆᔨᒃᑯᑦ ᒥᓂᔅᑕᖓᓄᑦ ᕿᒥᕐᕈᓇᑦᑕᐅᖁᓪᓗᒍ, ᕿᒥᕐᕈᓇᒋᐊᒃᑲᓂᖅᑕᐅᖃᓯᐅᑎᓗᑎᒃ ᑕᒪᒃᑮᒃ ᐃᓅᓯᕐᒧᑦ ᒪᑭᒪᔾᔪᑎᒃᓴᑦ ᐊᒻᒪᓗ ᓄᓇᒦᓐᖔᖅᑐᓂᒃ ᐊᑐᖅᑕᐅᖃᑦᑕᖅᑐᓂᒃ ᐊᒃᑐᐃᓯᒪᔪᑦ, ᒐᕙᒪᑐᖃᒃᑯᑦ ᐊᕙᑎᒥᒃ ᖃᐅᔨᓴᕐᓂᕐᒧᑦ ᕿᒥᕐᕈᒋᐊᖅᑎᖏᓐᓄᑦ ᒪᓕᓪᓗᒋᑦ ᐃᓚᖓ 6 ᐊᖏᕈᑎᓂ ᐃᒪᐃᓕᖓᔪᖅ:
(i)
ᐱᓕᕆᐊᒧᑦ ᑐᒃᓯᕋᐅᑦ ᐃᓚᒋᔭᐅᑎᓪᓗᒋᑦ ᐱᖕᒪᕆᐅᑕᐅᔪᑦ ᑲᓇᑕᓕᒫᒥ ᑲᒪᖃᑕᐅᔪᒪᔪᑦ ᐊᒻᒪᓗ ᒐᕙᒪᑐᖃᒃᑯᑦ ᒥᓂᔅᑕᖓ ᓇᓗᓇᐃᖅᓯᓗᓂ, ᐱᔾᔪᑎᒋᔭᒥᓂᒃ ᑎᑎᕋᖅᓯᒪᔪᒃᑯᑦ ᓇᓗᓇᐃᖅᓯᓗᓂ, ᐱᓕᕆᐊᒧᑦ ᑐᒃᓯᕋᐅᑦ ᓈᖕᒪᓂᖅᐹᖑᓂᐊᖅᐳᖅ ᕿᒥᕐᕈᓇᑦᑕᐅᑉᐸᑦ ᐃᓚᖓ 6 ᐊᖏᕈᑎᓂ, ᐃᒪᐃᓕᖓᑎᓪᓗᒍ:
(A)
ᕿᒥᕐᕈᓇᑦᑕᐅᓗᓂ ᒪᓕᓪᓗᒋᑦ ᑖᒃᑯᓇᓃᑦᑐᑦ ᑎᑎᕋᖅᓯᒪᔪᓂ ᑭᓯᐊᓂ ᓈᖕᒪᓯᐊᖅᐸᑦ ᐊᒻᒪᓗ ᐋᖅᑭᑦᓯᒪᓂᖓᓄᑦ ᐃᓕᖓᓗᓂ ᐱᓇᓱᐊᒐᑦᓴᐅᔪᓄᑦ ᐊᕕᑦᑐᖅᓯᒪᓂᖓᓂ 12.2.5
(B)
ᐱᓇᓱᐊᖅᑕᐅᓂᖃᕆᐊᓕᒃ ᐅᓪᓗᓂ 90-ᓂᒃ ᐅᕝᕙᓘᓐᓃᑦ ᑭᖑᓂᐊᒍᑦ ᓱᓕ 90-ᑲᓐᓂᕐᓂᒃ ᐅᓪᓗᓂ ᒐᕙᒪᑐᖃᒃᑯᓐᓂ ᒥᓂᔅᑕ ᖃᐅᔨᒃᑲᐃᓂᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ ᑎᑎᕋᖅᓯᒪᔪᒃᑯᑦ ᐅᖓᕙᕆᐊᖅᑕᐅᒋᐊᖃᕐᓂᖓᓂᒃ ᓇᓗᓇᐃᖅᑕᐅᓇᓱᐊᖅᑎᓪᓗᒍ
(C)
ᓇᓗᓇᐃᖅᑕᐅᔭᕆᐊᓕᒃ ᑐᓴᕋᓱᐊᕈᑕᐅᓚᐅᖅᑎᓪᓗᒍ ᐊᕙᑎᓕᕆᔨᒃᑯᑦ ᒥᓂᔅᑕᖓᓂᒃ, ᓄᓇᕗᒻᒥ ᒥᓂᔅᑕᒥᒃ ᑲᒪᒋᔭᖃᖅᑐᒥᒃ ᐊᕙᑎᓕᕆᓂᕐᒥᒃ ᐊᒻᒪᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ
ᐅᕝᕙᓘᓐᓃᑦ,
(ii)
ᐱᓕᕆᐊᒧᑦ ᑐᒃᓯᕋᐅᑦ ᐱᓕᕆᐊᖑᔭᕆᐊᓕᒃ ᐃᓚᖓ ᓄᓇᖓᑕ ᐃᓗᐊᓂ ᐊᒻᒪᓗ ᐃᓚᖓ ᓯᓚᑖᓂ ᑕᕝᕗᓐᖓᖓᑉᐸ ᐃᓛᒃᑰᖓᓂᖓᓄᑦ, ᑭᓯᐊᓂ ᒥᓂᔅᑕ, ᐊᕙᑎᓕᕆᓂᕐᒧᑦ ᒥᓂᔅᑕ ᐊᒻᒪᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᖏᕈᑎᖃᖅᐸᑕ ᐱᓕᕆᐊᒧᑦ ᑐᒃᓯᕋᐅᑦ ᕿᒥᕐᕈᓇᑦᑕᐅᓂᐊᕐᓂᖓᓂᒃ ᒪᓕᓪᓗᒍ ᐃᓚᖓ 5 ᐊᖏᕈᑎᓂ.
12.4.8
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦ ᓇᓗᓇᐃᖅᓯᑉᐸᑕ ᒥᓂᔅᑕᒧᑦ ᐅᑎᖅᑎᑕᐅᒋᐊᖃᕆᐊᖓ ᑐᑦᓯᕋᐅᑎ ᑐᑭᓯᓇᖅᓯᑎᑕᐅᒋᐊᒃᑲᓐᓂᕐᓗᓂ, ᒥᓂᔅᑕ ᐅᑎᖅᑎᑦᓯᓂᐊᖅᑐᖅ ᑐᑦᓯᕋᐅᑎᒥᒃ ᑐᑦᓯᕋᖅᓯᒪᔪᒧᑦ ᑐᑭᓯᓇᖅᑎᒋᐊᒃᑲᓐᓂᕐᓗᒍ ᑐᓂᒃᑲᓐᓂᕐᓗᒍᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᑲᒪᒋᔭᐅᓂᐊᖅᑎᓪᓗᒋᑦ ᑐᓐᖓᕕᖃᕐᓗᑎᒃ 12.4.4(a), (b) ᐅᕝᕙᓗ (d).
12.4.9
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᖅᓯᑉᐸᑦ ᒥᓂᔅᑕᒧᑦ ᑐᑦᓯᕋᐅᑎ ᐋᖅᑭᒋᐊᕆᐊᖃᕆᐊᖓ ᐅᕝᕙᓗ ᖁᔭᓈᖅᑕᐅᓗᓂ, ᒥᓂᔅᑕ, ᐅᖃᖃᑎᖃᓚᐅᕐᓗᓂ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓂᒃ, ᐃᒪᐃᓐᓂᐊᖅᑐᖅ:
(a)
ᐅᑎᖅᑎᓪᓗᒍ ᑐᑦᑎᕋᐅᑎ ᑐᑦᓯᕋᖅᓯᒪᔪᒧᑦ ᐋᖅᑭᒋᐊᖅᑕᐅᓂᐊᖅᑎᓪᓗᒍ ᑐᓂᔭᐅᒃᑲᓐᓂᕐᓗᓂᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᒪᒋᔭᐅᓂᐊᖅᑎᓪᓗᒋᑦ ᑐᓐᖓᕕᖃᕐᓗᑎᒃ 12.4.4;
(b)
ᑲᓇᑕᒥ ᐊᕕᑦᑐᖅᓯᒪᔪᓂᓘᓐᓃᑦ ᐅᔾᔨᕆᔭᐅᔫᔮᖅᐸᑦ ᑐᑦᓯᕋᐅᑎ ᕿᒥᕐᕈᔭᐅᖁᔭᐅᓗᓂ, ᑐᓂᓗᒍ ᑐᑦᓯᕋᐅᑎ ᕿᒥᕐᕈᔭᐅᓂᐊᖅᑎᓪᓗᒍ ᐱᕕᖃᖅᑎᑕᐅᓂᖓ ᐊᑖᓂ 12.4.7(a) ᐅᕝᕙᓗ (b) ᑎᑎᖅᑲᑕᖃᕐᓗᓂ ᐱᔾᔪᑕᐅᔪᓂᒃ ᑖᑦᓱᒧᖓ ᐋᖅᑭᑦᑕᐅᔪᒧᑦ; ᐅᕝᕙᓗ
(c)
ᑐᓴᖅᑎᓪᓗᒍ ᑐᑦᓯᕋᖅᓯᒪᔪᖅ ᐊᐅᓚᓂᐅᔪᖅ ᖁᔭᓈᖅᑖᐅᒋᐊᖃᕆᐊᖓ.
ᐃᓚᖓ 5
ᕿᒥᕐᕈᓂᖏᑦ ᐊᐅᓚᓂᐅᔪᓄᑦ ᑐᑦᓯᕋᐅᑎᓂᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦᑕ
12.5.1
ᐊᐅᓪᓚᑎᑦᓯᒍᓂ ᑐᑦᓯᕋᐅᑎᓂᒃ ᕿᒥᕐᕈᔭᐅᖁᔨᓗᓂ, ᒥᓂᔅᑕ ᓇᓗᓇᐃᖅᓯᑐᐃᓐᓇᕆᐊᓕᒃ ᓇᓗᓇᐃᖅᓯᒪᔪᓂᒃ ᐃᓱᒫᓘᑕᐅᔪᓂᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᖏᓐᓄᑦ ᐃᓱᒪᑦᓴᖅᓯᐅᕈᑎᒋᓂᐊᖅᑕᖏᓐᓂᒃ ᕿᒥᕐᕈᓂᕐᒥ. ᑖᓐᓇ ᐊᐳᖅᓯᒪᒍᑕᐅᓂᐊᓐᖏᑦᑐᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᕿᒥᕐᕈᓂᕐᒥᒃ ᓱᓇᑐᐃᓐᓇᕐᓂᒃ ᑎᓕᔭᐅᔾᔪᑎᒋᓯᒪᔭᖏᑦᑕ ᐃᓗᐊᓐᓂ.
12.5.2
ᐊᐅᓚᓂᕐᒧᑦ ᑐᑦᓯᕋᐅᑎ ᑐᓂᔭᐅᑉᐸᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᕿᒥᕐᕈᔭᐅᓂᐊᖅᑎᓪᓗᒋᑦ ᒥᓂᔅᑕᒧᑦ, ᕿᒥᕐᕈᔩᑦ, ᑐᑭᓯᒋᐊᓚᐅᕐᓗᑎᒃ ᓈᒻᒪᒐᔭᖅᑑᔮᖅᑐᓂᒃ, ᑐᓂᓯᓗᑎᒃ ᖃᐅᔨᒪᓕᑕᕐᓂᒃ ᑐᑦᓯᕋᖅᑐᒧᑦ ᐸᕐᓇᐅᑎᒋᓂᐊᖅᑕᖓᓂᒃ ᐊᑦᑐᖅᑕᐅᓂᕐᒧᑦ ᐅᖃᐅᓯᖅᑕᕐᒧᑦ. ᑐᑦᓯᕋᖅᓯᒪᔪᖅ ᐅᖃᐅᓯᖅᑕᕐᒥᒃ ᐸᕐᓇᐃᒋᐊᓕᒃ ᑐᓐᖓᕕᒋᑦᓱᒋᑦ ᖃᐅᔨᒪᓕᑕᐅᔪᑦ ᓴᖅᑭᖅᑕᐅᔪᑦ ᕿᒥᕐᕈᔨᓄᑦ. ᐊᐅᓚᓂᕐᒧᑦ ᑐᑦᓯᕋᐅᑎ ᐃᓗᓕᖃᑦᓴᐅᑎᒋᑐᐊᖅᐸᑦ ᑐᓴᐅᒪᔭᐅᒋᐊᓕᓐᓂᒃ, ᓈᒻᒪᒋᔭᐅᑐᐃᓐᓇᕆᐊᓕᒃ ᑐᑦᓯᕋᐅᑎ ᐅᖃᐅᓯᖅᑕᖃᕆᐊᑐᓐᖏᓪᓗᓂ. ᐅᖃᐅᓯᖅᑕᕆᔭᐅᔪᖅ ᓈᒻᒪᓈᖅᐸᑦ ᐅᑯᓇᓐᖓᑦ ᐃᓗᓕᖃᕆᐊᓕᒃ:
(a)
ᐊᐅᓚᓂᕐᒥᒃ ᓇᓗᓇᐃᔭᐃᔪᒥᒃ, ᐱᖃᓯᐅᑎᑦᓱᓂ ᐱᔾᔪᑕᐅᔪᖅ ᑭᓐᖒᒪᑦᓯᒍᑕᐅᔪᕐᓗ ᐊᐅᓚᓂᐅᔪᒥᒃ;
(b)
ᓂᕆᐅᒋᔭᐅᔪᑦ ᐊᑦᑐᐃᓂᐅᓂᐊᖅᑐᓂᒃ ᓯᓚᒥᒃ ᐃᓅᓯᕐᒥᓪᓗ ᖃᑭᒪᓇᓱᐊᕐᓂᒃᑯᑦ ᐊᐅᓚᓂᐅᔪᒧᑦ;
(c)
ᓂᕆᐅᒋᔭᐅᔪᑦ ᐊᑦᑐᐃᓂᐅᓂᐊᕆᐊᖏᑦ ᐊᕙᑎᒥᒃ ᐊᐅᓚᓂᐅᔪᒧᑦ;
(d)
ᐊᐅᓚᓂᕆᒋᔭᖏᑦ ᑐᑦᓯᕋᖅᑑᑉ ᐱᖃᓯᐅᑎᑦᓱᓂ ᐊᓯᔾᔨᕆᐊᓕᓐᓄᑦ ᐸᕐᓇᐅᑏᑦ, ᐊᑦᑐᐃᓂᖅ ᒥᑭᓪᓕᑎᒃᑲᓐᓂᖁᓪᓗᒍ.
(e)
ᐊᐅᓚᓂᐅᓂᐊᖅᑐᑦ ᑐᑦᓯᕋᖅᓯᒪᔫᑉ ᑐᑦᓯᕌᖏᑦ ᐱᕕᓕᒫᒃᑯᑦ ᐱᕚᓪᓕᖁᓪᓗᒍ ᐊᐅᓚᓂᖅ, ᐃᓱᒪᑦᓴᖅᓯᐅᕈᑕᐅᓗᓂ ᐅᖃᐅᓯᐅᓯᒪᔪᓄᑦ ᓄᓇᓕᓐᓂᒃ ᐊᕕᑦᑐᖅᓯᒪᔪᓂᓪᓗ ᐱᕚᓪᓕᕈᑕᐅᒋᐊᖏᑦ;
(f)
ᐊᐅᓚᓂᐅᔪᑦ ᑐᑦᓯᕋᖅᓯᒪᔫᑉ ᐊᑐᕐᓂᐊᖅᑕᖏᑦ ᐊᑭᓕᐅᑎᒋᓗᒋᑦ ᐱᔪᒪᔭᕆᔭᐅᔪᓄᑦ ᐊᑦᑐᖅᑕᐅᓯᒪᓪᓚᕆᑦᑐᓄᑦ ᐊᐅᓚᓂᐅᔪᒧᑦ;
(g)
ᖃᐅᔨᓴᕐᓂᕐᒧᑦ ᐊᐅᓚᓂᕆᒍᒫᕐᓂᐊᖅᑕᖓ ᑐᑦᓯᕋᖅᑑᑉ ᐊᑦᑐᐊᔪᓄᑦ ᓯᓚᒧᑦ ᐃᓅᓯᕐᒧᓪᓗ ᖃᕿᒪᓇᓱᐊᕐᓂᒃᑯᑦ ᐊᑦᑐᖅᑕᐅᓂᕐᒧᑦ;
(h)
ᑕᑯᓐᓇᖅᑕᐅᓂᖏᑦ ᓄᓇᐃᑦ ᐃᒪᐃᓪᓗ ᑐᑦᓯᕋᖅᓯᒪᔫᑉ ᐊᑐᕈᒪᔭᖏᑦ, ᐊᑐᕈᒪᒐᔭᖅᑕᖏᓪᓘᓐᓃᑦ;
(i)
ᓇᓖᕌᕋᑦᓴᐃᑦ ᐊᑐᓕᖅᑎᑕᐅᓂᖓᓄᑦ ᑐᑦᓯᕋᐅᑎᐅᑉ; ᐊᒻᒪᓗ
(j)
ᐊᓯᓕᒫᖏᑦ ᑲᒪᒋᔭᕆᐊᓖᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑕᕝᕗᓐᖓᖓᓂᕋᖅᑕᐅᑉᐸᑕ.
12.5.3 - ᓈᓚᓐᓂᖃᕐᓃᑦ
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᕿᒥᕐᕈᓂᖃᕈᓐᓇᖅᑐᑦ ᑎᑎᖅᑲᑎᒍᑦ, ᑭᓇᒃᑯᑐᐃᓐᓇᕐᓂᒃ ᓈᓚᓐᓂᖃᖅᑎᑦᓯᓗᑎᒃ ᐅᕝᕙᓗ ᐊᓯᖏᑦᑎᒍᑦ ᐊᐅᓚᓂᒃᑯᑦ ᓈᒻᒪᒋᔭᒥᑦᑎᒍᑦ ᐊᐅᓚᓂᕐᒨᖓᔪᓄᑦ ᐊᑦᑐᐃᓂᐅᔪᓄᓪᓗ.
12.5.4 - ᐱᕕᑦᓴᖃᕐᓂᐅᔪᖅ
ᒥᓂᔅᑕ ᑐᑦᓯᕋᕈᓐᓇᖅᑐᖅ ᓯᕗᓪᓕᐅᑎᔭᐅᖁᔭᒥᓂᒃ ᐱᕕᑦᓴᖃᕐᓂᐅᔪᒥᓪᓗ ᐱᔭᕇᖅᓯᓂᕐᒧᑦ ᕿᒥᕐᕈᓂᕐᒥᒃ.
12.5.5 - ᑲᒪᒋᔭᐅᒋᐊᖅᓯᒪᔪᑦ
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ, ᕿᒥᕐᕈᓕᕈᑎᒃ ᑐᑦᓯᕋᐅᑎᒥᒃ, ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐃᓘᓐᓇᖏᓐᓂᒃ ᐊᑦᑐᐊᔪᓂᒃ ᐱᓕᕆᔾᔪᑕᐅᔪᒧᑦ, ᐱᖃᓯᐅᑎᑦᓱᑎᒃ ᐅᑯᐊ:
(a)
ᐊᐅᓚᓂᐅᔪᖅ ᐱᕚᓪᓕᑎᑦᓯᒐᔭᕐᒪᖔᖅ ᓴᐳᔾᔨᓗᓂᓗ ᑕᕝᕙᐅᔪᓂᒃ ᓯᕗᓂᑦᑎᓐᓂᓗ ᖃᓄᐃᓐᖏᒃᓯᐊᕐᓂᖏᓐᓂᒃ ᓄᓇᓕᖃᖅᑐᑦ ᓄᓇᓖᓪᓗ ᓄᓇᕗᒻᒥ, ᐃᓱᒪᒋᖃᓯᐅᑎᑦᓱᑎᒃ ᐱᔪᒪᔭᕆᔭᖏᑦ ᐊᓯᖏᑦ ᑲᓇᑕᒥᐅᑦ;
(b)
ᐊᐅᓚᓂᐅᔪᑦ ᐊᑦᑐᐃᓂᖃᕋᔭᕐᒪᖔᖅ ᐊᕙᑎᒥᒃ ᓄᓇᕗᒻᒥ;
(c)
ᑐᑦᓯᕋᐅᑎ ᑕᑯᑦᓴᐅᑎᑦᓯᒻᒪᖔᖅ ᓯᕗᓪᓕᐅᑎᔭᖏᓐᓂᒃ ᐊᑐᖅᑐᖁᑎᒋᔭᖏᓐᓂᓪᓗ ᓄᓇᕗᒻᒥᐅᑦ;
(d)
ᐊᐅᓚᓂᐅᔪᑦ ᑐᑦᓯᕋᖅᓯᒪᔫᑉ ᑐᑦᓯᕌᕆᔭᖏᑦ ᐊᑑᑎᑦᑕᐃᓕᓂᐊᕐᓗᒋᑦ ᒥᑭᓪᓕᑎᕐᓗᒋᓪᓗ ᐊᑦᑐᐃᓂᕐᓗᓐᓂᐅᔪᑦ;
(e)
ᐊᐅᓚᓂᕆᒍᒪᔭᖏᑦ ᑐᑦᓯᕋᖅᑑᑉ, ᐊᐅᓚᓂᐅᒋᐊᓖᓪᓘᓐᓃᑦ, ᐊᑭᓕᐅᑎᓄᑦ ᐊᑦᑐᖅᑕᐅᔪᓄᑦ ᐊᐅᓚᓂᐅᔪᒧᑦ;
(f)
ᑐᓴᖅᑎᑦᓯᓂᖅ ᐃᖏᕐᕋᓂᐅᔪᓂᒃ;
(g)
ᖃᐅᔨᓴᖅᑕᐅᓂᖅ ᐊᐅᓚᓂᕐᒥᒃ ᑐᑦᓯᕋᖅᑑᑉ ᓴᖅᑭᕐᓂᐊᖅᑕᖓ, ᓴᖅᑭᖅᑕᐅᒋᐊᓕᓪᓘᓐᓃᑦ, ᐊᕙᑎᐅᑉ ᐃᓅᓰᓪᓗ ᐊᑦᑐᖅᑕᐅᓂᖏᓐᓄᑦ; ᐊᒻᒪᓗ
(h)
ᐊᐅᓚᓂᕆᒍᒪᔭᖏᑦ ᑐᑦᓯᕋᖅᑑᑉ, ᐊᐅᓚᓂᐅᒋᐊᓖᓐᓘᓐᓃᑦ, ᐅᑎᖅᑎᑦᓯᒍᑕᐅᓗᑎᒃ ᐊᕙᑎᒥᒃ ᑭᖑᓂᖓᒍᑦ ᐊᐅᓚᓂᐅᔪᖅ ᕿᒪᑦᑕᐅᓚᐅᖅᑎᓪᓗᒍ.
12.5.6 - ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᑦᑕ ᐅᓂᒃᑳᖏᑦ
ᕿᒥᕐᕈᓚᐅᕐᓗᑎᒃ ᑐᑦᓯᕋᐅᑎᓂᒃ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐅᓂᒃᑲᓕᐅᕐᓂᐊᖅᑐᑦ ᒥᓂᔅᑕᒧᑦ ᑐᑦᓯᕋᖅᑐᒧᓪᓗ ᐅᑯᓇᓐᖓᑦ ᐃᓗᓕᖃᕐᓗᑎᒃ:
(a)
ᕿᒥᕐᕈᔭᐅᓂᖏᑦ ᐊᐅᓚᓂᐅᔫᑉ ᐊᑦᑐᐃᓂᖏᓪᓗ;
(b)
ᓇᓗᓇᐃᖅᓯᓂᖅ ᐊᐅᓚᓂᐅᔪᖅ ᑲᔪᓯᒋᐊᖃᕐᒪᖔᖅ ᑐᓐᖓᕕᖃᕐᓗᓂ ᕿᒥᕐᕈᔭᐅᓂᕐᒥᒃ ᐊᑖᓂ (a); ᐊᒻᒪᓗ
(c)
ᐊᐅᓚᓂᐅᔪᖅ ᑲᔪᓯᒐᔭᕐᓂᖅᐸᑦ, ᐅᖃᐅᓯᖅᑕᖏᑦ ᐃᒪᐃᓕᖓᓂᖏᓪᓗ ᐊᑦᑐᐊᔪᑦ ᑐᕌᒐᓪᓗᐊᑕᕐᓄᑦ ᓇᓗᓇᐃᔭᖅᑕᐅᓯᒪᔪᑦ 12.2.5-ᒥ.
12.5.7
ᐱᓯᒪᓕᕈᓂ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐅᓂᒃᑳᖏᓐᓂᒃ, ᒥᓂᔅᑕ ᐃᒪᐃᓐᓂᐊᖅᑐᖅ:
(a)
ᐊᖏᕐᓗᓂ ᐅᓂᒃᑳᖏᓐᓂᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐊᐅᓚᓂᐅᔪᖅ ᑲᔪᓯᒋᐊᖃᕐᒪᖔᖅ ᑲᔪᓯᒋᐊᖃᓐᖏᒻᒪᖔᕐᓘᓐᓃᑦ, ᐱᖃᓯᐅᑎᑦᓱᑎᒃ ᐅᖃᐅᓯᖏᑦ ᐃᒪᐃᓕᖓᓂᖏᓪᓗ;
(b)
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᖅᓯᑉᐸᑕ ᐊᐅᓚᓂᐅᔪᖅ ᑲᔪᓯᒋᐊᖃᕆᐊᖓ, ᕿᐱᓗᓪᓗᑎᒃ ᓇᓗᓇᐃᖅᑕᐅᓯᒪᔪᒥᒃ ᑐᓐᖓᕕᖃᕐᓗᑎᒃ ᑐᑦᓯᕋᐅᑎ ᑲᓇᑕᒥ ᐊᕕᑦᑐᖅᓯᒪᔪᓂᓘᓐᓃᑦ ᐱᔪᒪᔭᐅᓐᖏᒋᐊᖓ; ᑐᑦᓯᕋᖅᓯᒪᔪᖅ ᖃᐅᔨᒃᑲᖅᑕᐅᓂᐊᖅᑐᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ;
(c)
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᖅᓯᑉᐸᑕ ᐊᐅᓚᓂᐅᔪᖅ ᑲᔪᓯᒋᐊᖃᕆᐊᖓ, ᕿᐱᓗᓪᓗᑎᒃ ᐅᓂᒃᑳᓂᒃ ᐅᑯᓇᓐᖓᑦ ᑐᓐᖓᕕᖃᕐᓗᑎᒃ:
(i)
ᓇᓪᓕᑐᐃᓐᓇᖏᑦ ᑐᑭᖏᑦ ᐃᒪᐃᓕᖓᓂᖏᓪᓗ ᐅᖁᒪᐃᓐᓂᖅᓴᐅᑉᐸᑕ ᐊᑑᑎᒋᐊᓕᓐᓂᒃ ᐅᕝᕙᓗ ᒥᑭᓪᓕᑎᕋᑦᓴᐅᖏᑉᐸᑕ ᓈᒻᒪᑦᑐᒧᑦ ᐊᕙᑎᒧᑦ ᐃᓅᓯᒃᑯᓪᓗ ᖃᑭᒪᓇᓱᐊᕐᓂᕐᒧᑦ ᐊᑦᑐᖅᑕᓂᐅᒃᑯᑦ;
(ii)
ᑐᑭᖏᑦ ᐃᒪᐃᓕᖓᓂᖏᓪᓗ ᐅᖁᒪᐃᓗᐊᖅᐸᑕ ᑲᔪᓯᒍᑕᐅᑦᓯᐊᕋᔭᕋᑎᒃ ᐊᐅᓚᓂᐅᔪᒧᑦ ᑲᓇᑕᒥ ᐊᕕᑦᑐᖅᓯᒪᔪᓂᓘᓐᓃᑦ ᐅᔾᔨᕆᔭᐅᔪᓂ;
ᖃᓄᐃᓕᖓᓂᐅᔪᓂᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑐᑭᖏᓐᓂ ᐃᒪᐃᓕᖓᓂᖏᓐᓂᓪᓗ ᐃᓱᒪᑦᓴᖅᓯᐅᕈᑎᖃᒃᑲᓐᓂᕐᓂᐊᖅᑐᑦ ᐊᑖᓂ ᐊᐅᓚᓂᐅᔪᑦ ᐊᖏᖅᑕᐅᑉᐸᑦ ᒥᓂᔅᑕ ᐱᔾᔪᑎᖃᕋᓗᐊᖅᑎᓪᓗᒍ;
(d)
ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᖅᓯᑉᐸᑕ ᐊᐅᓚᓂᐅᔪᖅ ᑲᔪᓯᒋᐊᖃᓐᖏᒋᐊᖓ, ᕿᐱᓗᓪᓗᒍ ᐊᐅᓚᓂᖅ ᐊᖏᖅᑕᐅᒋᐊᖃᕐᓂᕆᐊᖓ ᐱᒻᒪᕆᐅᓂᖓᓄᑦ ᑲᓇᑕᒧᑦ ᐊᕕᑦᑐᖅᓯᒪᔪᓄᓪᓗ; ᑕᐃᒪᐃᑉᐸᑦ, ᒥᓂᔅᑕ ᐅᑎᖅᑎᑦᓯᒋᐊᓕᒃ ᐅᓂᒃᑳᓂᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᐃᓱᒪᑦᓴᖅᓯᐅᕈᑎᖃᕐᓂᐊᖅᑎᓪᓗᒋᑦ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐊᑕᒋᐊᓕᓐᓂᒃ ᓇᐅᑐᐃᓐᓇᕐᒧᑦ ᐊᐅᓚᓂᐅᔪᒧᑦ ᐊᖏᖅᑕᐅᒋᐊᓕᒻᒧᑦ; ᐅᕝᕙᓗ
(e)
ᐅᓂᒃᑳᑦ ᐃᓗᓕᖃᓐᖏᓗᐊᖅᐸᑕ ᐊᕙᑎᒨᖓᔪᓄᑦ ᐃᓅᓯᕆᔭᐅᔪᓄᓪᓗ, ᐅᑎᖅᑎᓪᓗᒋᑦ ᐅᓂᒃᑳᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᕿᒥᕐᕈᔭᐅᒃᑲᓐᓂᕐᓂᐊᖅᑎᓪᓗᒋᑦ ᓈᓚᓐᓂᖃᕈᑕᐅᓂᐊᖅᑎᓪᓗᒋᓪᓘᓐᓃᑦ; ᕿᒥᕐᕈᓂᖅᑕᖃᒃᑲᓐᓂᓚᐅᖅᑎᓪᓗᒍ ᓈᓚᓐᓂᖅᑕᖃᓚᐅᖅᑎᓪᓗᒍᓘᓐᓃᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ
ᕿᒥᕐᕈᔩᑦ ᑐᓂᓯᓂᐊᖅᑐᑦ ᐅᓂᒃᑲᓂᒃ ᒥᓂᔅᑕᒧᑦ ᐊᖏᖅᑕᐅᓂᐊᖅᑎᓪᓗᒋᑦ ᕿᐱᓗᑦᑕᐅᓗᑎᓪᓘᓐᓃᑦ ᑐᓐᖓᕕᒋᓗᒋᑦ (a), (b), (c), ᐅᕝᕙᓗ (d).
12.5.8
ᐃᓱᒪᑦᓴᖅᓯᐅᕈᑎᖃᓚᐅᕐᓗᑎᒃ ᐃᓱᒪᑦᓴᖅᓯᐅᕈᑎᖃᒃᑲᓐᓂᓚᐅᕐᓗᑎᓪᓘᓐᓃᑦ, ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐊᐅᓚᓂᐅᔫᑉ ᐊᖏᖅᑕᐅᓂᖓᑕ ᑐᓐᖓᕕᒋᓗᒋᑦ 12.5.7 (c) ᐅᕝᕙᓗ (d), ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐃᒪᐃᓐᓂᐊᖅᑐᑦ:
(a)
ᐅᓪᓗᐃᑦ 30 ᐃᓗᐊᓐᓂ, ᐅᕝᕙᓗ ᐱᕕᑦᓴᖃᖅᑎᑕᐅᓂᖅ ᒥᓂᔅᑕᒧᑦ, ᐊᓯᔾᔩᒍᓐᓇᖅᑐᑦ ᓈᒻᒪᒋᔭᒥᓂᒃ.
(b)
ᑐᓂᒃᑲᓐᓂᕐᓗᒍ ᐋᖅᑭᒋᐊᖅᓯᒪᔪᖅ ᐅᓂᒃᑳᖅ ᒥᓂᔅᑕᒧᑦ; ᐊᒻᒪᓗ
(c)
ᐋᖅᑭᒋᐊᖅᓯᒪᔪᑦ ᐅᓂᒃᑳᖏᑦ ᐊᑐᐃᓐᓇᐅᑎᑕᐅᓗᑎᒃ ᑕᖅᑲᐅᖓ ᐃᓄᓐᓄᑦ.
12.5.9
ᐱᔭᐅᒍᑎᒃ ᐋᖅᑭᒋᐊᖅᓯᒪᔪᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐅᓂᒃᑳᖏᑦ ᐊᑖᓂ 12.5.8, ᒥᓂᔅᑕ ᐃᒪᐃᓐᓂᐊᖅᑐᖅ:
(a)
ᓈᒻᒪᒋᓗᒋᑦ ᑐᑭᖏᑦ ᐃᒪᐃᓕᖓᓂᖏᓪᓗ; ᐅᕝᕙᓗ
(b)
ᕿᐱᓗᓪᓗᑎᒃ ᐊᓯᔾᔩᓗᑎᓪᓘᓐᓃᑦ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ, ᐊᑕᖏᕐᓗᑎᒃ ᐃᓚᐃᓐᓇᖏᓪᓘᓐᓃᑦ, ᑐᓐᖓᕕᖃᕐᓗᑎᒃ ᑎᑎᕋᖅᓯᒪᔪᓂᒃ 12.5.7 (c)(i) ᐊᒻᒪᓗ (ii).
12.5.10
ᒥᓂᔅᑕ ᐊᑐᐃᓐᓇᐅᑎᑦᓯᓂᐊᖅᑐᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᑎᑎᕋᖅᓯᒪᔪᓂᒃ ᐱᔾᔪᑕᐅᔪᓂᒃ ᐋᖅᑭᑦᑕᐅᔪᓕᒫᓄᑦ.
12.5.11
ᑕᐃᒪᐃᓕᖓᒐᓗᐊᖅᑎᓪᓗᒍ 12.5.7 ᐊᒻᒪᓗ 12.5.9, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᖃᓄᐃᓐᓂᐊᕐᓂᕆᔭᖏᑦ ᐊᑦᑐᐊᔪᓄᑦ ᐃᓅᓯᕐᒥ ᖃᑭᒪᓇᓱᐊᕐᓂᕐᒧᑦ ᐊᑦᑐᐃᓂᐅᔪᓄᑦ ᐊᑦᑐᐊᖏᑦᑐᓄᑦ ᐊᕙᑎᒥᒃ ᐊᑦᑐᐃᓂᐅᔪᓄᑦ ᐃᓱᒪᓕᐅᕈᑕᐅᒋᐊᖏᑦ ᑕᑯᓐᓇᖅᑕᐅᓂᐊᖅᑐᑦ ᒥᓂᔅᑕᒧᑦ, ᐊᖏᖅᑕᐅᑐᐃᓐᓇᕆᐊᖃᖅᓱᑎᒃ, ᕿᐱᓗᑦᑕᐅᓗᑎᒃ ᐊᓯᔾᔨᖅᑕᐅᓗᑎᓪᓘᓐᓃᑦ ᒥᓂᔅᑕᒧᑦ ᑭᓪᓕᖃᖅᑎᓐᓇᒋᑦ ᑐᓐᖓᕕᒋᓗᒋᑦ 12.5.7 ᐊᒻᒪᓗ 12.5.9.
12.5.12
ᐱᔭᕇᓚᐅᖅᑎᓪᓗᒍ ᐊᐅᓚᓂᖅ ᓇᓗᓇᐃᔭᖅᑕᐅᔪᖅ 12.5.1-12.5.11 ᓇᓗᓇᐃᖅᑕᐅᓯᒪᑉᐸᑦ ᐊᐅᓚᓂᖅ ᑲᔪᓯᒋᐊᖃᕆᐊᖓ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑐᓂᓯᓂᐊᖅᑐᑦ ᐊᐅᓚᓂᐅᔪᒧᑦ ᓇᓕᖅᑲᒥᒃ ᐱᖃᐅᓯᑎᓗᑎᒃ ᓇᐅᑐᐃᓐᓇᐃᑦ ᑐᑭᖏᑦ ᐃᒪᐃᓕᖓᓂᖏᓪᓗ ᐊᖏᖅᑕᐅᓯᒪᔪᑦ ᐋᖅᑭᒋᐊᖅᑕᐅᓯᒪᔪᓪᓘᓐᓃᑦ ᒥᓂᔅᑕᒧᑦ.
ᐃᓚᖓ 6
ᕿᒥᕐᕈᓂᖓᑦ ᒐᕙᒪᑐᖃᒃᑯᓐᓂᒃ ᐊᕙᑎᒥᒃ ᕿᒥᕐᕈᔩᑦ
12.6.1 - ᐃᓘᓐᓈᒍᑦ
ᒥᓂᔅᑕ ᐊᑖᓂ 12.4.7(a) ᑐᓂᓯᒍᒪᑉᐸᑕ ᐊᐅᓚᓂᕐᒧᑦ ᑐᑦᓯᕋᐅᑎᒥᒃ ᒥᓂᔅᑕᖓᓐᓄᑦ ᐊᕙᑎᓕᕆᔨᒃᑯᑦ ᑭᓇᒃᑯᑐᐃᓐᓇᕐᓄᑦ ᕿᒥᕐᕈᒐᑦᓴᐅᓂᐊᖅᑎᓪᓗᒋᑦ ᕿᒥᕐᕈᑎᓪᓗᒋᑦ ᒐᕙᒪᑐᖃᒃᑯᑦ ᐊᕙᑎᒥᒃ ᕿᒥᕐᕈᔨᖏᓐᓄᑦ, ᕿᒥᕐᕈᔪᑦ ᕿᒥᕐᕈᓂᐊᖅᑐᑦ ᑐᓐᖓᕕᖃᕐᓗᑎᒃ ᐱᕕᖃᖅᑎᑦᓯᒍᑕᐅᔪᓂᒃ ᐅᕙᓂᖓ ᐃᓚᖓᓂ ᐊᒻᒪᓗ ᐊᓯᖏᑦ ᐊᐅᓚᓂᐅᔪᑦ, ᑐᓐᖓᕕᐅᔪᑦ ᐃᓘᓐᓈᒍᓪᓗ ᐊᐅᓚᓂᐅᔪᑦ ᐱᕕᖃᖅᑎᑦᓯᒍᑕᐅᔪᑦ ᒪᑐᐃᖔᖅᑐᒥᒃ ᐃᓗᓕᖅᑐᔪᒥᓪᓗ ᑭᓇᒃᑯᑐᐃᓐᓇᕐᓄᑦ ᕿᒥᕐᕈᓂᐅᔪᒥᒃ ᐱᕕᖃᖅᑎᑕᐅᓂᕐᒥᑎᒍᑦ ᐊᕙᑎᒥᒃ ᕿᒥᕐᕈᔪᓄᑦ ᐊᐅᓚᓂᐅᔪᓄᑦ ᖃᐅᔨᒪᓕᑕᕐᓄᑦ (S.O.R./84-467, 22 ᔫᓂ, 1984).
12.6.2 - ᐃᓚᒋᔭᐅᔪᑦ ᕿᒥᕐᕈᔪᓄᑦ
ᐊᐅᓚᓂᕐᒧᑦ ᑐᑦᓯᕋᐅᑎᒧᑦ ᓄᓇᕗᒻᒥ, ᒥᓂᔅᑕ ᐊᕙᑎᓕᕆᓂᕐᒧᑦ ᐃᓱᒪᖅᓱᕐᓗᓂ ᑎᓕᓯᒍᓐᓇᕐᓂᐊᖅᑐᖅ ᐃᓚᒋᔭᐅᔪᓂᒃ ᕿᒥᕐᕈᔨᓄᑦ ᑐᓐᖓᕕᖃᕐᓗᓂ ᒥᓂᔅᑕᐃᑦ ᐊᐅᓚᓂᕆᒐᔪᑦᑕᖏᓐᓂᒃ ᑭᓯᐊᓂ ᑖᒃᑯᐊ
ᐃᓚᒋᔭᐅᔪᑦ ᓯᑕᒪᐅᔪᓪᓗᐊᖏᑦ ᑎᓕᔭᐅᓂᐊᖅᑐᑦ ᓂᕈᐊᕋᑦᓴᓕᐊᖑᓯᒪᔪᓂᒃ ᑐᓂᔭᐅᓯᒪᔪᓂᒃ ᒥᓂᔅᑕᖓᓐᓄᒃ ᐊᕙᑎᓕᕆᔨᒃᑯᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐊᒻᒪᓗ ᓯᑕᒪᐅᔪᓪᓗᐊᖏᑦ ᓂᕈᐊᕋᑦᓴᓕᐊᖑᓯᒪᔪᓂᒃ ᒥᓂᔅᑕᖓᓐᓄᑦ ᐊᕙᑎᓕᕆᔨᒃᑯᑦ ᐊᕕᑦᑐᖅᓯᒪᔪᓂ ᒐᕙᒪᒃᑯᑦ ᒥᓂᔅᑕᖓᓐᓂᒃ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᕕᑦᑐᖅᓯᔪᓂᓘᓐᓃᑦ ᒐᕙᒪᒃᑯᑦ ᒥᓂᔅᑕᖓᑦ ᓂᕈᐊᕋᑦᓴᓕᐅᕆᐊᖃᓐᖏᑦᑐᑦ ᑲᑎᒪᔨᐅᖃᑕᐅᒌᖅᑐᓂᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ.
12.6.3
ᐊᐅᓚᓂᕐᒧᑦ ᑐᑦᓯᕋᐅᑎ ᐊᑑᑎᓂᐊᖅᐸᑦ ᐃᓗᐊᓂ ᓄᓇᕗᑦ ᐊᑦᑐᐊᔪᓪᓗ ᐊᑐᖅᑕᐅᔪᑦ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ, ᓯᑕᒪᐅᔪᓪᓗᐊᖏᑦ ᕿᒥᕐᕈᔩᑦ ᑎᓕᔭᐅᓂᐊᖅᑐᑦ ᓂᕈᐊᕋᑦᓴᓕᐊᖑᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᓯᖏᓐᓄᓪᓗ ᐊᑦᑐᐊᔪᓄᑦ ᓄᓇᖃᖅᖅᓯᒪᔪᓄᑦ, ᑐᓐᖓᕕᖃᕐᓗᑎᒃ ᐊᖏᕈᑕᐅᓯᒪᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᑐᓄᑦ.
12.6.4
ᐃᓚᒋᔭᐅᔪᑦ ᕿᒥᕐᕈᔨᓄᑦ ᐃᒪᐃᓐᓂᐊᖅᑐᑦ:
(a)
ᐃᓚᐃᓐᓈᕐᓂᖃᓐᖏᓗᑎᒃ ᐊᐳᖅᓯᒪᓂᖃᓐᖏᓪᓗᑎᓪᓗ ᐊᑦᑐᐊᔪᓄᑦ ᐊᐅᓚᓂᕐᒥᒃ ᑐᑦᓯᕋᐅᑎᓄᑦ ᕿᒥᕐᕈᔭᐅᔪᓄᑦ; ᑐᑭᓯᓇᖅᑎᑲᓐᓂᕐᓗᒍ ᓇᓪᓕᑐᐃᓐᓇᖏᑦ ᕿᒥᕐᕈᔩᑦ ᐃᓅᒍᓂ ᐃᓚᐃᓐᓈᖅᑐᑎᑐᑦ ᑕᐅᑐᑦᑕᐅᒋᐊᖃᓐᖏᑦᑐᖅ ᐃᓅᓂᖓ ᐱᔾᔪᑕᐅᓪᓗᓂ; ᐊᒻᒪᓗ
(b)
ᖃᐅᔨᒪᓂᖃᑦᓯᐊᕐᓗᓂ ᐊᑐᖃᑦᑕᖅᓯᒪᓗᓂᓗ ᐊᑦᑐᐊᔪᓂᒃ ᓂᕆᐅᒋᔭᐅᔪᓄᑦ ᖃᐅᔨᒪᔭᕆᐊᓕᓐᓄᑦ, ᐊᕙᑎᒨᖓᔪᓄᑦ ᐃᓅᓯᕐᒥᓪᓘᓐᓃᑦ ᐊᑦᑐᐃᓂᖏᓐᓂᒃ ᐊᐅᓚᕐᓂᒥᒃ ᑐᑦᓯᕋᐅᑎᐅᑉ ᕿᒥᕐᕈᔭᐅᔫᑉ.
12.6.5 - ᖃᐅᔨᒪᓕᑕᐃᑦ
ᑕᕝᕙᐅᓕᑐᐊᕈᑎᒃ, ᕿᒥᕐᕈᔩᑦ ᑐᓂᓯᑐᐃᓐᓇᕆᐊᓖᑦ ᐊᐅᓚᓂᕐᒥᒃ ᑐᑦᓯᕋᖅᑐᒧᑦ ᖃᐅᔨᒪᓕᑕᑦᓴᓂᒃ ᐸᕐᓇᑕᐅᓂᖓᓄᑦ ᐅᖃᐅᓯᖅᑕᖓᑕ ᑐᑦᓯᕋᖅᑑᑉ ᐊᕙᑎᒨᖓᔪᓄᑦ ᐃᓅᓯᕐᓂᓪᓗ ᖃᑭᒪᓇᓱᐊᕐᓂᒃᑯᑦ ᐊᑦᑐᐃᓂᐊᖅᑐᓂᒃ. ᖃᐅᔨᒪᓕᑕᐅᔪᑦ ᐊᑲᐅᓈᕋᐃᑉᐸᑦ, ᐱᔭᕆᐊᓖᑦ ᐅᖃᐅᓯᖅᑕᖓᓂᒃ ᑐᓴᕋᑦᓴᖅᑕᖃᕐᓗᓂ ᐊᑦᑐᐊᔪᓂᒃ ᑎᑎᕋᖅᓯᒪᔪᓄᑦ 12.5.2-ᒥ. ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᕿᒥᕐᖁᓂᐊᖅᑐᑦ ᖃᐅᔨᒪᓕᑕᐅᔪᓂᒃ ᐅᖃᐅᓯᖃᕐᓗᑎᓪᓗ ᐱᕙᓪᓕᐊᓂᖏᓐᓅᖓᔪᓄᑦ.
12.6.6
ᕿᒥᕐᕈᔪᑦ ᖃᐅᔨᓴᑦᓯᐊᕆᐊᓖᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐱᕕᑦᓴᖃᕐᓯᐊᕋᓗᐊᕐᒪᖔᑕ ᕿᒥᕐᕈᓂᕐᒥᒃ ᑐᑦᓯᕋᖅᑑᑉ ᐊᑦᑐᐃᓂᕐᒧᑦ ᐅᖃᐅᓯᖅᑕᖓᓂᒃ ᐱᒋᐊᓚᐅᓐᖏᓐᓂᖏᓐᓂ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᐅᔪᑦ, ᕿᒥᕐᕈᔩᓪᓗ ᐃᓱᒪᒋᔭᐅᖃᖃᓯᐅᑎᓂᐊᕐᒥᔪᑦ ᐃᓱᒪᓕᐅᕈᑕᐅᔪᓂᒃ ᐃᓱᒫᓘᑕᐅᔪᓂᓪᓘᓐᓃᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᖅᓯᒪᔭᖏᓐᓂᒃ.
12.6.7 - ᓈᓚᓐᓃᑦ
ᑭᓇᒃᑯᑐᐃᓐᓇᕐᓂᒃ ᓈᓚᓐᓂᖃᖅᑎᑦᓯᑎᓪᓗᒋᑦ ᐅᑯᐊ ᐊᑖᓂ, ᕿᒥᕐᕈᔩᑦ ᐊᑦᓱᖏᖅᓯᒪᓂᐊᖅᑐᑦ 12.24, 12.2.26, ᐊᒻᒪᓗ 12.2.27-ᒧᑦ. ᕿᒥᕈᔩᑦ ᓴᓐᖏᓂᖏᑦ, ᐱᖃᓯᐅᑎᑦᓱᑎᒃ ᓴᓐᖏᓂᖏᑦ ᖃᐃᖁᔨᒍᓐᓇᕐᓂᕐᒧᑦ, ᐃᓄᐃᓴᓐᓂᖅᓴᐅᒋᐊᖃᓐᖏᑦᑐᑦ ᐊᑦᑐᐃᓐᓇᕆᔭᐅᔪᓂᒃ ᒐᕙᒪᑐᖃᒃᑯᑦ ᐊᕙᑎᒥᒃ ᕿᒥᕐᕈᓂᖏᓐᓂᒃ ᐊᒻᒪᓗ ᕿᒥᕐᕈᔨᓂᒃ ᓴᖅᑭᖅᑕᐅᔪᓂᒃ ᐊᑖᓂ ᒪᓕᒐᖏᑦᑕ ᐃᓘᓐᓇᐃᓐᓄᑦ ᐊᑦᑐᐊᔪᑦ.
12.6.8 - ᐊᑦᑐᐊᔪᑦ
ᕿᒥᕐᕈᔩᑦ ᕿᒥᕐᕈᓕᕈᑎᒃ ᓇᓪᓕᑐᐃᓐᓇᖏᓐᓂᒃ ᐊᐅᓚᓂᕐᒧᑦ ᑐᑦᓯᕋᐅᑎᓂᒃ, ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐊᑦᑐᐊᔪᓂᒃ ᐱᓕᕆᔾᔪᑎᖓᓂᒃ, ᐱᖃᓯᐅᑎᑦᓱᓂ ᑕᐃᒃᑯᐊ ᑎᑎᕋᖅᓯᒪᔪᑦ 12.5.5-ᒥ.
12.6.9 - ᐅᓂᒃᑳᑦ
ᕿᒥᕐᕈᒌᖅᐸᑕ, ᕿᒥᕐᕈᔩᑦ ᓯᕗᒧᑦᑎᑦᓯᓂᐊᖅᑐᑦ ᐅᓂᒃᑳᓂᒃ ᒥᓂᔅᑕᖓᓐᓄᑦ ᐊᕙᑎᓕᕆᔨᒃᑯᑦ ᐊᒻᒪᓗ ᒥᓂᔅᑕ, ᑭᒃᑲᑐᐃᓐᓇᕐᓂ ᑐᓴᖅᑎᑦᓯᓂᐊᖅᑐ ᐊᔾᔨᖏᓐᓂᓪᓗ ᐊᐅᓪᓚᑎᑦᓯᓗᓂ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ.
12.6.10
ᐱᑐᐊᕈᑎᒃ ᓇᓕᖅᑲᖏᓐᓂᒃ ᐅᓂᒃᑳᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐅᓪᓗᖃᕐᓂᐊᖅᑐᑦ 60-ᓂᒃ ᕿᒥᕐᕈᒍᓐᓇᕐᓗᑎᒃ ᓯᕗᒧᐊᑦᑎᓪᓗᒋᓪᓗ ᖃᐅᔨᔭᓂ ᐃᓱᓕᔾᔪᑕᐅᔪᓪᓗ ᒥᓂᔅᑕᒧᑦ ᐊᑦᑐᐊᔪᓄᑦ ᐊᕙᑎᒧᑦ ᐃᓅᓯᕐᓂᓗ ᖃᑭᒪᓇᓱᐊᕐᓂᒃᑯᑦ ᐊᑦᑐᐃᓂᐅᔪᓄᑦ ᓄᓇᕗᒻᒥ. ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᔭᐃᒍᓐᓇᖅᑐᑦ ᓈᒻᒪᖏᓐᓂᖏᓐᓂᒃ ᕿᒥᕐᕈᔩᑦ ᐅᓂᒃᑳᖏᓐᓃᑦᑐᑦ, ᕐᑳᖓᒍᒃᑯᓐᓂᖅ ᑐᑭᖏᓐᓂᒃ, ᐃᒪᐃᓕᖓᓂᐅᔪᓂᒃ ᒥᑭᓪᓕᑎᕈᑕᐅᔪᓂᓪᓗ ᐊᑕᒋᐊᓕᓐᓂᒃ ᓇᐅᑐᐃᓐᓇᕐᒧᑦ ᐊᐅᓚᓂᐅᔪᒧᑦ ᐊᖏᕐᓂᐅᔪᒧᑦ, ᕐᑳᖓᒍᒃᑲᓐᓂᖅ ᑲᑎᖅᓱᕆᐊᓕᓐᓂᒃ, ᐊᒻᒪᓗ ᐊᓯᓕᒫᖏᑦ ᐃᓱᓕᑦᓯᒍᑕᐅᔪᑦ ᐊᓚᒡᒐᐃᒋᔭᐅᔪᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᐱᖃᐅᓯᑎᑦᓱᓂ ᐊᐅᓚᓂᐅᔪᒥᒃ ᑐᑦᓯᕋᐅᑎ ᑲᔪᓯᒋᐊᖃᕐᒪᖔᖅ. ᑕᐃᒪᐃᓕᕈᓂ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐸᕐᓇᐃᔨᖏᑦ ᖃᐅᔨᒪᓕᑕᖃᕐᓂᐊᖅᑐᑦ ᑐᕌᒐᓪᓗᐊᓴᐅᔪᓂᒃ ᓇᓗᓇᐃᔭᖅᑕᐅᓯᒪᔪᓂᒃ 12.2.5-ᒥ.
12.6.11
ᕿᒥᕐᕈᔨᓄᑦ ᐅᓂᒃᑳᓂᒃ ᐱᓚᐅᕐᓗᑎᒃ ᐃᓱᒪᓕᐅᕈᑕᐅᔪᓂᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᒥᓂᔅᑕ ᐃᒪᐃᓐᓂᐊᖅᑐᖅ:
(a)
ᐊᖏᕐᓗᓂ ᐅᓂᒃᑳᓂᒃ ᑐᑭᖏᓐᓂᓪᓗ ᐃᒪᐃᓕᖓᓂᖏᓐᓂᓪᓗ ᑐᑦᓯᕌᖑᔪᓂᒃ ᕿᒥᕐᕈᔨᓄᑦ ᐊᑑᑎᓂᖏᑦ ᒪᓕᑦᓱᒋᑦ ᓄᓇᕗᒻᒥ;
(b)
ᐊᖏᕐᓗᓂ ᐅᓂᒃᑳᓂᒃ ᒪᓕᓪᓗᒋᑦ ᐊᑑᑎᓂᖏᑦ ᓄᓇᕗᒻᒧᑦ ᐋᖅᑭᒋᐊᕈᑕᐅᖁᔭᐅᔪᓂᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ; ᐅᕝᕙᓗ
(c)
ᕿᐱᓗᓪᓗᒋᑦ ᕿᒥᕐᕈᔨᓄᑦ ᐅᓂᒃᑲᖏᑦ ᐃᓚᖏᓪᓘᓐᓃᑦ ᐃᓗᐊᓃᑦᑐᑦ ᐊᑑᑎᓂᖏᑦ ᒪᓕᑦᓱᒋᑦ ᓄᓇᕗᒻᒧᑦ ᐃᒪᐃᓕᖓᑎᓪᓗᒋᑦ
(i)
ᐊᐅᓚᓂᕐᒧᑦ ᑐᑦᓯᕋᐅᑎ ᕿᐱᓗᑦᑕᐅᒋᐊᓕᒃ ᑐᑦᓯᕋᐅᑎ ᐱᔭᐅᒍᒪᓐᖏᑉᐸᑦ ᑲᓇᑕᒥ ᐊᕕᑦᑐᖅᓯᒪᔪᓂᓘᓐᓃᑦ ᑕᐃᒪᐃᑉᐸᑦ ᑐᑦᓯᕋᖅᑐᖅ ᑐᓴᖅᑎᑕᐅᓂᐊᖅᑐᖅ ᒥᓂᔅᑕᒧᑦ,
(ii)
ᐊᐅᓚᓂᕐᒧᑦ ᑐᑦᓯᕋᐅᑎ ᑲᔪᓯᑎᑕᐅᒋᐊᓕᒃ ᐱᒻᒪᕆᐅᓄᑦ ᑲᓇᑕᒧᑦ ᐊᕕᑦᑐᖅᓯᒪᔪᓄᓪᓗ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐃᓱᒪᑦᓴᖅᓯᐅᕈᑎᖃᕐᓂᐊᖅᑐᖅ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐊᑦᑐᐊᔪᓂᒃ ᓄᓇᕗᒻᒧᑦ ᐊᑕᒋᐊᖃᖅᓱᑎᓪᓗ ᐊᖏᖅᑕᐅᔪᓄᑦ; ᐅᕝᕙᓗ
(iii)
ᑐᑭᖏᑦ ᐃᒪᐃᓕᖓᓂᖏᓪᓗ ᐅᖁᒪᐃᓐᓂᖅᓴᐅᑉᐸᑕ ᐱᔭᕆᐊᓕᓐᓂᒃ ᐅᕝᕙᓗ ᓈᒻᒪᖏᑉᐸᑕ ᒥᑭᓪᓕᑎᕆᒍᑕᐅᓂᐊᕐᓗᑎᒃ ᓈᒻᒪᑦᑐᒧᑦ ᐊᑦᑐᐃᓂᖓᓄᑦ ᐊᕙᑎᒥᒃ ᐃᓄᓐᓂᓘᓐᓃᑦ ᖃᑭᒪᓇᓱᐊᕐᓂᒃᑯᑦ ᐊᑦᑐᐃᓂᖓᓂᒃ ᐊᐅᓚᓂᐅᑉ, ᑕᐃᒪᐃᑉᐸᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐃᓱᒪᑦᓴᖅᓯᐅᕈᑎᖃᒃᑲᓐᓂᕐᐊᖅᑐᑦ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐊᑦᑐᐊᔪᓂᒃ ᓄᓇᕗᒻᒧᑦ ᑕᑯᓐᓇᖅᓱᒋᑦ ᒥᓂᔅᑕᐅᑉ ᓈᒻᒪᒋᓐᖏᑕᖏᑦ.
12.6.12
ᐃᓱᒪᑦᓴᖅᓯᐅᕈᑎᖃᓕᕈᑎᒃ ᐃᓱᒪᑦᓴᖅᓯᐅᕈᑎᖃᒃᑲᓐᓂᓕᕈᑎᓪᓗ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐊᐅᓚᓂᐅᔫᑉ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐃᒪᐃᓐᓂᐊᖅᐳᑦ, ᐅᓪᓗᐃᑦ 30 ᐅᖓᑖᓂᐅᖏᑦᑐᖅ ᐊᖏᖃᑎᒌᒍᑕᐅᓯᒪᔫᓪᓘᓐᓃᑦ ᐱᕕᑦᓴᖃᕐᓂᐅᑉ ᒥᓂᔅᑕᒧᑦ, ᐊᑦᑐᐊᔪᓄᑦ ᑐᑭᖏᓐᓄᒃ ᐃᒪᐃᓕᖓᓂᖏᓐᓄᓪᓗ ᑖᒃᑯᐊᓗ ᐊᑕᒋᐊᖃᖅᓱᑎᒃ ᐃᓘᓐᓇᖏᓐᓄᑦ ᐊᐅᓚᓂᕐᒧᑦ ᑐᑦᓯᕋᐅᑎᓄᑦ.
12.6.13
ᓄᓇᕗᒻᒥ ᐊᑦᑐᖅᑕᐃᓂᕐᒧᑦ ᕿᒥᕐᕈᔩᑦ ᐅᓂᒃᑳᖏᑦ ᐱᔭᐅᓚᐅᖅᑎᓪᓗᒋᑦ ᕐᑳᖓᒍᒃᑲᓐᓂᖅ 12.6.12, ᒥᓂᔅᑕ ᐃᒪᐃᓐᓂᐊᖅᑐᖅ:
(a)
ᐊᖏᕐᓗᑎᒃ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ; ᐅᕝᕙᓗ
(b)
ᕿᐱᓗᓪᓗᑎᒃ ᐊᓯᔾᔩᓗᑎᓪᓘᓐᓃᑦ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ, ᐊᑕᖏᕐᓗᑎᒃ ᐃᓚᖏᓐᓂᓘᓐᓃᑦ, ᐃᒪᐃᑉᐸᑦ
(i)
ᑐᑭᖏᑦ ᐃᒪᐃᓕᖓᓂᖏᓐᓗ ᐅᖁᒪᐃᓐᓂᖅᓴᐅᑉᐸᑕ ᐱᔭᕆᐊᓕᓐᓂᒃ ᐅᕝᕙᓗ ᓈᒻᒪᖏᑉᐸᑕ ᒥᑭᓪᓕᑎᕆᓂᕐᒧᑦ ᑎᑭᐅᑎᓗᓂ ᓈᒻᒪᒋᔭᐅᔪᒧᑦ ᐊᕙᑎᒨᖓᔪᓄᑦ ᐃᓅᓯᕐᒧᓪᓗ ᖃᑭᒪᓇᓱᐊᕐᓂᕐᒧᑦ ᐊᑦᑐᐃᓂᐅᔪᓂᒃ ᓄᓇᕗᒻᒥ, ᐅᕝᕙᓗ
(ii)
ᑐᑭᖏᑦ ᐃᒪᐃᓕᖓᓂᖏᓪᓗ ᐊᑦᑐᐊᔪᑦ ᓄᓇᕗᒻᒧᑦ ᐅᖁᒪᐃᓕᐊᖅᐸᑕ ᑐᑭᓯᓂᕐᓗᒍᑕᐅᓗᑎᒃ ᐊᐅᓚᓂᕐᒧᑦ ᑲᓇᑕᒥ ᐊᕕᑦᑐᖅᓯᒪᔪᓂᓗ ᐱᔪᒪᔭᕆᔭᐅᔪᒥᒃ.
12.6.14
ᒥᓂᔅᑕ ᑐᓂᓯᓂᐊᖅᑐᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᑎᑎᕋᖅᓯᒪᔪᓂᒃ ᐱᔾᔪᑕᐅᔪᓂᒃ ᐋᖅᑭᑦᑕᐅᔪᓕᒫᓄᑦ ᐊᑦᑐᐊᔪᓄᑦ ᓄᓇᕗᒻᒧᑦ.
12.6.15
ᑲᒪᒋᔭᖓᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐊᑦᑐᐊᔪᑦ ᓇᐅᑐᐃᓐᓇᕐᓄᑦ ᒐᕙᒪᑐᖃᒃᑯᑦ ᐊᕙᑎᒥᒃ ᕿᒥᕐᕈᔨᖏᑦᑕ ᐅᓂᒃᑳᖏᓐᓄᑦ ᐊᑑᑎᓂᐊᖅᑐᑦ ᐃᓚᖏᓐᓄᑦ ᑕᐃᑦᓱᒪ ᐅᓂᒃᑳᑉ ᐊᑑᑎᓂᖃᖅᑐᑦ ᐊᑦᑐᐊᔪᓪᓘᓐᓃᑦ ᓄᓇᕗᒻᒧᑦ.
12.6.16
ᑕᐃᒪᐃᓕᖓᒐᓗᐊᖅᑎᓪᓗᒋᑦ 12.6.11 ᐊᒻᒪᓗ 12.6.13, ᕿᒥᕐᕈᔩᑦ ᐅᓂᒃᑳᖏᑦ ᐅᕝᕙᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᓇᓗᓇᐃᖅᑕᖓᑦ ᐊᑦᑐᐊᓂᖃᖅᑐᖅ ᐃᓅᓯᕐᒥ ᖃᑭᒪᓇᓱᐊᕐᓂᒧᕐᑦ ᐊᑦᑐᐃᓂᐅᔪᓂᒃ ᐊᑦᑐᐊᖏᑦᑐᓂᒃ ᐊᕙᑎᒧᑦ ᐊᑦᑐᐃᓂᐅᔪᓄᑦ ᑕᑯᓐᓇᖅᑕᐅᓂᐊᖅᑐᑦ ᐃᓱᒪᓕᐅᕈᑕᐅᒋᐊᖏᑦ ᒥᓂᔅᑕᒧᑦ, ᐊᖏᖅᑕᐅᑐᐃᓐᓇᕆᐊᓖᑦ ᕿᐱᓗᑦᑕᐅᓗᑎᓪᓘᓐᓃᑦ ᐊᓯᔾᔨᖅᑕᐅᓗᑎᓪᓘᓐᓃᑦ ᒥᓂᔅᑕᒧᑦ ᑭᓪᓕᖃᖅᑎᓐᓇᒋᑦ ᓇᓗᓇᐃᔭᖅᑕᐅᓯᒪᔪᓂᒃ 12.6.11 ᐊᒻᒪᓗ 12.6.13-ᒥ.
12.6.17
ᐱᔭᕇᖅᐸᑦ ᐊᐅᓚᓂᐅᒋᐊᓕᒃ ᓇᓗᓇᐃᔭᖅᑕᐅᔪᖅ 12.6.1-ᒥᒃ 12.6.16-ᒧᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑐᓂᓯᓂᐊᖅᑐᑦ ᐊᐅᓚᓂᕐᒧᑦ ᓇᓕᖅᑲᒥᒃ ᐱᖃᓯᐅᑎᓗᑎᒃ ᓇᐅᑐᐃᓐᓇᐃᑦ ᑐᑭᖏᑦ ᐃᒪᐃᓕᖓᓂᖏᓪᓗ ᐊᖏᖅᑕᐅᓯᒪᔪᑦ ᐊᓯᔾᔨᖅᑕᐅᓯᒪᔪᓪᓘᓐᓃᑦ ᒥᓂᔅᑕᒧᑦ.
ᐃᓚᖓ 7
ᖃᐅᔨᓴᕐᓂᖅ
12.7.1 - ᐊᐅᓚᓂᕐᒥᒃ ᖃᐅᔨᓴᕐᓂᖅ
ᑐᑭᖏᑦ ᐃᒪᐃᓕᖓᓂᖏᓪᓗ ᐃᓗᐊᓃᑦᑐᑦ ᐅᑯᐊ:
(a)
(b)
ᐃᓱᒪᓕᐅᕈᑕᐅᔪᖅ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᑐᓐᖓᕕᒋᑦᓱᒋᑦ 12.4.4(a); ᐅᕝᕙᓗ
(c)
ᓇᐅᑐᐃᓐᓇᐃᑦ ᐊᖏᖅᑕᐅᔪᑦ ᓄᓇᕗᒻᒥ ᐃᒪᓕᕆᔨᒃᑯᓐᓄᑦ,
ᓴᖅᑮᒍᓐᓇᖅᑐᖅ ᖃᐅᔨᕐᓴᕐᓂᕐᒧᑦ ᐊᐅᓚᓂᐅᔪᒥᒃ ᐊᐅᓚᓂᕐᒧᑦ ᓇᓗᓇᐃᔭᖅᑕᐅᑐᐃᓐᓇᕆᐊᖃᖅᓱᑎᓪᓗ
ᑎᒍᒥᐊᖅᑕᐅᔪᑦ ᑐᑦᓯᕋᖅᑐᒧᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᒐᕙᒪᒃᑯᓄᓪᓘᓐᓃᑦ.
12.7.2
ᐱᔾᔪᑕᐅᔪᖅ ᖃᐅᔨᕐᓴᓂᕐᒧᑦ ᐊᐅᓚᓂᐅᔪᒧᑦ ᐋᖅᑭᑦᑕᐅᓯᒪᔪᒧᑦ 12.7.1-ᒥ ᐃᒪᐃᑦᑑᓂᐊᖅᑐᖅ:
(a)
ᖃᐅᔨᓴᕐᓗᒋᑦ ᐊᑦᑐᐊᔪᑦ ᐊᑦᑐᐃᓂᖏᑦ ᐊᐅᓚᓂᐅᔪᑦ ᐊᕙᑎᒥᒃ ᐃᓅᓯᕆᔭᐅᔪᓂᓪᓗ ᓄᓇᕗᒻᒥ;
(b)
ᓇᓗᓇᐃᖅᓯᓗᑎᒃ ᐊᑐᕐᓂᐊᕐᒪᖔᑕ ᖃᓄᑎᒋᓗ ᓄᓇᒥᒃ ᓄᓇᒥᐅᑕᓂᓪᓘᓐᓃᑦ ᑲᔪᓯᑎᑕᐅᒻᒪᖔᖅ ᑐᑭᖏᑦᑕ ᐃᒪᐃᓕᖓᓂᖏᑦᑕᓗ ᐃᓗᐊᓂ.
(c)
ᐊᑐᐃᓐᓇᐅᑎᑦᓯᓗᑎᒃ ᑐᓴᕋᑦᓴᖃᕐᕕᒻᒥᒃ ᑎᒥᐅᔪᓄᑦ ᑲᔪᓯᑎᑦᓯᓂᐊᖅᑐᓄᑦ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᓄᓇᒥᒃ ᓄᓇᒥᐅᑕᕐᓂᓘᓐᓃᑦ ᐊᑐᕐᓂᕐᒧᑦ ᐊᖏᕈᑎᓂᒃ; ᐊᒻᒪᓗ
(d)
ᖃᐅᔨᓴᕐᓗᑎᒃ ᑕᐃᒫᑦᓯᐊᕐᒪᖔᑕ ᓂᕆᐅᒋᔭᐅᓯᒪᔪᑦ ᐃᓗᐊᓃᑦᑐᑦ ᐊᐅᓚᓂᐅᑉ ᐊᑦᑐᐃᓂᕐᒧᑦ ᐅᖃᐅᓯᖏᑦᑕ.
12.7.3
ᐊᐳᖅᓯᒪᕕᓐᖏᓪᓗᒋᑦ 12.7.2, ᖃᐅᔨᕐᓴᓂᕐᒧᑦ ᐊᐅᓚᓂᐅᔪᖅ ᐋᖅᑭᑦᑕᐅᔪᖅ ᑕᐃᑰᓇ ᐱᖃᓯᐅᔾᔨᒍᓐᓇᖅᑐᖅ:
(a)
ᐱᔭᕆᐊᖃᖅᑎᑕᐅᔪᖅ ᒪᓕᒐᓕᕆᓂᕐᒧᑦ ᑎᒥᐅᔪᑦ ᑐᑦᓯᕋᖅᑐᕐᓗ ᐊᑐᐃᓐᓇᐅᑎᑦᓯᓗᑎᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᐅᓂᒃᑳᓂᒃ ᑐᓴᕋᑦᓴᓂᓪᓗ ᐊᑦᑐᐊᔪᓂᒃ ᐊᐅᓚᓂᕐᔪᓄᑦ ᐊᑦᑐᐃᓂᐅᔪᓄᓪᓗ, ᐊᑐᓕᖅᑎᑕᐅᓂᖏᓐᓂᓪᓗ ᒥᑭᓪᓕᑎᕆᒍᑎᐅᔪᑦ;
(b)
ᕿᒥᕐᕈᓕᐅᒥᔮᖅᐸᓪᓗᑎᒃ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᖃᐅᔨᓴᕐᓂᐅᔪᓂᒃ ᐊᐅᓚᓂᐅᔪᓄᑦ; ᐊᒻᒪᓗ
(c)
ᑐᓐᖓᕕᒋᓗᒍ (b), ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐅᓂᒃᑳᓕᐅᕆᐊᓖᑦ ᓈᒻᒪᓐᓂᖓᓄᑦ ᖃᐅᔨᕐᓴᕐᓂᒧᑦ ᐊᐅᓚᓂᐅᑉ ᐊᒻᒪᓗ ᐊᕙᑎᒥᒃ ᐃᓅᓯᕐᓂᓪᓗ ᖃᑭᒪᓇᓱᐊᕐᓂᒃᑯᑦ ᐊᑦᑐᐃᓂᖏᓐᓂᒃ ᐊᐅᓚᓂᐅᑉ.
12.7.4
ᑎᒍᒥᐊᖅᑐᑦ ᒐᕙᒪᒃᑯᓐᓂ ᑎᒥᐅᔪᑦ ᒥᓂᔅᑕᐅᕕᐅᔪᓪᓗ ᑲᔪᓯᓂᐊᖅᑐᑦ ᑲᔪᓯᑎᑦᓯᓗᑎᒃ ᑎᒍᒥᐊᖅᑕᒥᓐᓂᒃ ᖃᐅᔨᓴᕐᓂᕐᒧᑦ ᑲᑎᖅᓱᐃᓂᕐᒧᓪᓗ. ᖃᐅᔨᓴᕐᓂᐅᔪᓂᒃ ᖃᐅᔨᓴᕐᓂᐅᔪᑦ ᑐᓂᔭᐅᔪᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᐊᔾᔨᒋᒋᐊᖃᓐᖏᑕᖏᑦ ᐊᓯᖏᑦᑕ.
12.7.5
ᓇᐅᑐᐃᓐᓇᖅ ᖃᐅᔨᓴᕐᓂᕐᒧᑦ ᐊᐅᓚᓂᐅᔪᖅ ᓴᖅᑭᖅᑕᐅᔪᖅ ᐊᐅᓚᓂᕐᒧᑦ ᐊᑖᓂ 12.7.1 ᐋᖅᑭᑦᓯᒪᓂᐊᖅᑐᖅ ᐊᔾᔨᖏᓐᓂᒃ ᑲᒪᔪᖃᖁᓇᒍ ᑲᒪᒋᔭᕆᐊᓖᑦ ᐊᐅᓚᑦᓯᓗᑎᓪᓗ ᑐᑭᒧᐊᑦᑎᑕᐅᓂᖏᓐᓂᒃ ᖃᐅᔨᕐᓴᕐᓂᒧᑦ ᐊᐅᓚᓂᐅᔪᑦ, ᐃᒪᐃᑦᓱᓐᓇᖅᓱᑎᓪᓗ, ᕐᑳᖓᒍᒃᑲᓐᓂᖅ ᐊᓯᖏᑦᑕ ᐊᑦᑐᐊᔪᑦ, ᐊᑐᐃᓐᓇᐅᑎᑦᓯᓗᑎᒃ ᐊᓯᔾᔨᕐᓂᐅᔪᓄᑦ ᖃᐅᔨᓴᖅᑕᐅᒋᐊᓕᓐᓄᑦ ᐊᐅᓚᓂᐅᔪᒥᓪᓗ ᓇᓗᓇᐃᔭᐃᔾᔪᑎᓂᒃ.
12.7.6 - ᐃᓘᓐᓈᒍᑦ ᖃᐅᔨᕐᓴᓂᖅ
ᐱᔭᕆᐊᖃᕐᒥᒻᒪᑦ ᐃᓘᓐᓈᒍᑦ ᖃᐅᔨᕐᓴᕐᓂᖅ ᓄᐊᑦᓯᓗᑎᒃ ᕿᒥᕐᕈᓗᑎᓪᓗ ᑐᓴᖅᑕᐅᔪᓂᒃ ᐊᑯᓃᖅᑐᒨᖓᔪᓂᒃ ᖃᓄᐃᓐᓂᖓᓄᓪᓗ ᐊᕙᑎᐅᑉ ᐃᓅᓯᐅᓪᓗ ᖃᑭᒪᓇᓱᐊᕐᓂᒃᑯᑦ ᓄᓇᕗᒻᒥ. ᒐᕙᒪᒃᑯᑦ, ᑲᑐᔾᔨᖃᑎᖃᖅᓱᑎᒃ ᓄᓇᕗᒻᒥ ᐸᕐᓇᐃᔨᒃᑯᓐᓂᒃ, ᑎᒍᒥᐊᕐᓂᐊᖅᑐᖅ ᐱᕙᓪᓕᐊᑎᑦᓯᓂᕐᒥᒃ ᐃᓘᓐᓈᒍᑦ ᖃᐅᔨᕐᓴᕐᓂᕐᒧᑦ ᐸᕐᓇᐅᑎᒥᒃ ᑐᑭᒧᐊᑦᑎᑦᓯᓂᕐᒥᓪᓗ ᐃᓘᓐᓈᒍᑦ ᖃᐅᔨᓴᕐᓂᕐᒥᒃ ᑲᑎᖅᓱᖅᑕᐅᔪᓂᓪᓗ. ᓄᓇᕗᒻᒥ ᐸᕐᓇᐃᔩᑦ ᐃᒪᐃᓐᓂᐊᖅᑐᑦ:
(a)
ᑐᓐᖓᕕᒋᓗᒍ ᐸᕐᓇᐅᑎ, ᓄᐊᑦᓯᓗᑎᒃ ᑐᓴᕋᑦᓴᓂᒃ ᑲᑎᖅᓱᖅᑕᐅᓯᒪᔪᓂᓪᓗ ᐊᑐᐃᓐᓇᐅᑎᑕᐅᔪᓂᒃ ᐃᖅᑲᓇᐃᔭᕐᕕᓐᓂ, ᒐᕙᒪᒃᑯᓐᓂ ᒥᓂᔅᑕᐅᕕᐅᔪᓂ ᑎᒥᐅᔪᓂᓗ, ᐊᓯᖏᓐᓂᓪᓗ;
(b)
ᑐᓐᖓᕕᒋᓗᒍ ᐸᕐᓇᐅᑎ, ᐅᓂᒃᑳᓕᐅᒥᔮᖅᐸᓪᓗᑎᒃ ᐊᕙᑎᐅᑉ ᐃᓅᓯᐅᓪᓗ ᖃᓄᐃᓕᖓᓂᖓᓂᒃ ᓄᓇᕗᒻᒥ;
(c)
ᐊᑐᕐᓗᑎᒃ ᑐᓴᕋᑦᓴᓂᒃ ᓄᐊᑕᐅᓯᒪᔪᓂᒃ ᐊᑖᓂ (a) ᐊᒻᒪᓗ (b), ᑲᔪᓯᑎᑦᓯᒍᑎᒋᓗᒍ ᑎᒍᒥᐊᖅᑕᒥᓐᓂᒃ ᐊᑖᓂ ᐃᓛᒃᑯᑦ 11.
12.7.7
ᓄᓇᕗᒻᒥ ᐸᕐᓇᐃᔩᑦ ᑐᓂᓯᒍᓐᓇᖅᑐᑦ ᐃᓚᖏᓐᓂᒃ ᐃᓘᓐᓇᖏᓐᓂᓘᓐᓃᑦ ᐊᐅᓚᓂᕐᒥᓐᓂᒃ ᐊᑖᓂ ᐆᒪ ᐃᓚᖓ ᑲᑎᒪᔨᖏᓐᓄᑦ ᓄᓇᕗᒻᒥ ᐸᕐᓇᐃᔩᑦ ᓯᕗᓕᖅᑎᖏᑦᑕᓘᓐᓃᑦ ᐃᖅᑲᓇᐃᔭᖅᑎᖏᓐᓄᓘᓐᓃᑦ ᓄᓇᕗᒻᒥ ᐸᕐᓇᐃᔩᑦ.
ᐃᓚᖓ 8
ᐋᖅᑭᒋᐊᕐᕕᖃᕈᓐᓇᕐᓂᖅ ᐊᑦᑐᐊᔪᖅ ᓇᓕᖅᑲᓄᑦ
12.8.1
ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖏᑦ ᑐᓂᔭᐅᔪᑦ ᐊᑖᓂ ᓇᓪᓕᑐᐃᓐᓇᖏᑦᑕ 12.5.12 ᐅᕝᕙᓗ 12.6.17 ᐃᓗᓕᖃᑐᐃᓐᓇᕆᐊᓖᑦ ᑐᑭᖏᓐᓂᒃ ᐃᒪᐃᓕᖓᓂᐅᔪᓂᓪᓗ ᐊᑑᑎᓕᕐᓂᐊᖅᐸᑕ ᖃᖓᑐᐃᓐᓇᖅ ᓯᕗᓂᑦᑎᓐᓂ ᐊᑑᑎᓕᖅᐸᓪᓘᓐᓃᑦ ᓱᓇᑐᐃᓐᓇᖅ ᐊᐅᓚᓂᐅᔪᖅ.
12.8.2
ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᓇᒻᒥᓂ ᐅᕝᕙᓘᓐᓃᑦ ᐊᑑᑎᖁᔭᐅᒍᑎ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᑐᑦᓯᕋᖅᑐᖅ, ᐊᓯᖏᓪᓘᓐᓃᑦ, ᐃᓱᒪᑦᓴᖅᓯᐅᒃᑲᓐᓂᕐᓗᑎᒃ ᑐᑭᖏᓐᓂ ᐃᒪᐃᓕᖓᓂᖏᓐᓂᓪᓗ ᐃᓗᐊᓃᑦᑐᓂᒃ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᓇᓕᖅᑲᖏᑦᑕ ᓴᖅᑭᖅᑕᐅᑉᐸᑦ ᐃᒫᒃ:
(a)
ᑐᑭᖏᑦ ᐃᒪᐃᓕᖓᓂᖏᓪᓗ ᑎᑭᐅᑎᕙᓪᓕᐊᖏᑉᐸᑕ ᐱᔾᔪᑎᒥᓄᑦ;
(b)
ᖃᓄᐃᓕᖓᓂᐅᔪᑦ ᐊᑦᑐᐊᔪᑦ ᐊᐅᓚᓂᐅᔪᒧᑦ ᐊᑑᑎᓂᖏᓪᓘᓐᓃᑦ ᑐᑭᖏᑦᑕ ᐃᒪᐃᓕᖓᓂᖏᑦᑕᓗ ᐊᔾᔨᒋᓐᖏᑕᐹᓗᒋᑉᐸᒋᑦ ᑕᐃᒃᑯᐊ ᓂᕆᐅᒋᔭᐅᓯᒪᔪᑦ ᑕᐃᑦᓱᒨᓇ ᓇᓕᖅᑲᖅᑖᖅᑎᑕᐅᑎᓪᓗᒋᑦ; ᐅᕝᕙ
(c)
ᖃᐅᔨᒪᔭᕆᐊᓕᓐᓂᒃ ᐱᕙᓪᓕᐊᓯᒪᔪᖃᓕᖅᐸᑦ ᐅᕝᕙᓗ ᑐᓴᕋᑦᓴᓂᒃ ᓄᑖᓂᒃ ᑲᔪᓯᓂᖃᑦᓯᐊᓂᖅᓴᐅᒍᓐᓇᖅᑐᓂᒃ ᐱᔾᔪᑕᐅᔪᓄᑦ ᑐᑭᖏᓐᓄᑦ ᐃᒪᐃᓕᖓᓂᐅᔪᓄᓪᓗ.
12.8.3
ᒥᓂᔅᑕ ᓇᓗᓇᐃᖅᓯᑉᐸᑦ ᓇᓪᓕᑐᐃᓐᓇᖏᑦ ᐃᒪᐃᓕᖓᓂᐅᔪᑦ 12.8.2(a), (b), ᐅᕝᕙᓗ (c) ᓴᖅᑭᖅᑕᐅᓯᒪᑉᐸᑕ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐃᓱᒪᑦᓴᖅᓯᐅᕈᑎᖃᒃᑲᓐᓂᕐᓂᐊᖅᑐᑦ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐃᓗᐊᓃᑦᑐᓂᒃ ᓇᓕᖅᑲᐅᑉ, ᐊᒻᒪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐅᓂᒃᑳᓕᐅᕐᓂᐊᖅᑐᑦ ᐃᓱᒪᑦᓴᖅᓯᐅᕈᑎᒋᒃᑲᓐᓂᖅᑕᒥᓂᒃ. ᒥᓂᔅᑕ ᐊᖏᑐᐃᓐᓇᕆᐊᓕᒃ, ᕿᐱᓗᓪᓗᓂ ᐊᓯᔾᔩᓗᓂᓘᓐᓃᑦ ᐅᓂᒃᑲᓂᒃ ᐱᔾᔪᑎᖃᕐᓗᓂ ᑭᓯᐊᓂ ᓇᓗᓇᐃᖅᑕᐅᓯᒪᔪᓂᒃ 12.6.13-ᒥ. ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐋᖅᑭᒋᐊᕆᓂᐊᑦᑐᑦ ᓇᓕᖅᑲᒥᓂᒃ ᑕᑯᑦᓴᐅᑎᑦᓯᓗᑎᒃ ᐊᓯᔾᔨᕐᓂᐅᔪᓂᒃ ᐊᖏᖅᑕᐅᔪᓂᒃ, ᕿᐱᓗᑦᑕᐅᔪᓂᒃ ᐊᓯᔾᔨᖅᑕᐅᔪᓂᓪᓘᓐᓃᑦ ᒥᓂᔅᑕᒧᑦ.
12.8.4
ᑐᑭᓯᓇᖅᑎᒋᐊᒃᑲᓐᓂᕐᓗᒍ 12.5.4 ᐊᑑᑎᔪᖅ ᐃᓱᒪᑦᓴᖅᓯᐅᕈᑕᐅᒃᑲᓐᓂᕆᐊᓕᓐᓄᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᑐᓐᖓᕕᒋᑦᓱᒋᑦ 12.8.2 ᐅᕝᕙᓗ 12.8.3.
ᐃᓚᖓ 9
ᐊᑐᓕᖅᑎᑦᓯᓂᖅ
12.9.1
ᑐᓐᖓᕕᒋᑦᓱᒋᑦ 12.9.3, ᑐᑭᖏᑦ ᐃᒪᐃᓕᖓᓂᖏᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᐊᐅᓚᓂᕐᒧᑦ ᓇᓕᖅᑲᖏᑦ ᐊᑐᓕᖅᑎᑕᐅᓂᐊᖅᑐᑦ ᐃᓘᓐᓇᖏᓐᓄᑦ ᒐᕙᒪᒃᑯᓐᓂ ᒥᓂᔅᑕᐅᕕᐅᔪᓄᑦ ᑎᒥᐅᔪᓄᓪᓗ ᑐᓐᖓᕕᒋᓗᒋᑦ ᐱᔪᓐᓇᕐᓂᒃᑯᑦ ᑎᒍᒥᐊᕐᓂᒃᑯᓪᓗ.
12.9.2
ᐊᐳᖅᓯᒪᑎᓐᖏᓪᓗᒋᑦ ᐃᓘᓐᓈᒎᖓᓂᖏᑦ 12.9.1, ᑐᑭᖏᑦ ᐃᒪᐃᓕᖓᓂᖏᓪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖏᑦ ᐃᒪᐃᓐᓂᐊᖅᑐᑦ, ᑐᓐᖓᕕᖃᕐᓗᑎᒃ ᐱᔪᓐᓇᓂᐅᔪᓂᒃ ᑎᒍᒥᐊᕐᓂᐅᔪᓂᓪᓗ ᒐᕙᒪᒃᑯᓐᓂ ᒥᓂᔅᑕᐅᕕᐅᔪᓂ ᑎᒥᐅᔪᓂᓗ, ᐊᑕᐅᓯᕈᖅᓯᒪᓕᕐᓕᑦ ᐊᑦᑐᐊᔪᓄᑦ ᐱᔪᓐᓇᐅᑎᓄᑦ, ᓇᓕᖅᑲᓄᑦ, ᓚᐃᓴᓐᓯᓄᑦ ᐅᕝᕙᓗ ᐊᓯᖏᓐᓄᑦ ᒐᕙᒪᒃᑯᓐᓂ ᐊᖏᕐᓂᐅᔪᓄᑦ ᑐᑦᓯᕋᖅᑑᑉ ᑐᑦᓯᕌᕆᑐᐃᓐᓇᕆᐊᓕᖏᓐᓄᑦ. ᒐᕙᒪᒃᑯᓐᓂ ᒥᓂᔅᑕᐅᕕᐅᔪᑦ ᑎᒥᐅᔪᓪᓗ ᐅᖃᖃᑎᖃᕆᐊᓖᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ ᖃᓄᖅ ᐊᑲᐅᓂᖅᐸᐅᒻᒪᖔᖅ ᐊᑐᓕᖅᑎᑦᓯᓂᖅ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖏᑦ ᐊᑐᐃᓐᓇᐅᑎᑦᓯᑐᐃᓐᓇᕆᐊᖃᖅᓱᑎᓪᓗ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᓄᑦ ᑎᑎᕋᕆᐊᓐᖓᖅᓯᒪᔪᓂᒃ ᐱᔪᓐᓇᐅᑎᓂᒃ, ᓇᓕᖅᑲᓂᒃ, ᓚᐃᓴᓐᓯᓂᒃ ᐊᓯᖏᓐᓂᓪᓗ ᒐᕙᒪᒃᑯᓐᓂᒃ ᐊᖏᕈᑎᐅᔪᓂᒃ.
12.9.3
ᐃᒻᒥᒃᑯᑦ ᐋᖅᑭᑦᑕᐅᔪᖃᖅᐸᑦ ᒪᓕᒐᓕᕆᓂᕐᒧᑦ ᑲᑎᒪᔨᓄᑦ ᐃᓗᓕᕐᓗᓂ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᐊᔾᔨᒋᓐᖏᑕᖏᓐᓂᒃ ᑐᑭᖏᑦᑕ ᐃᒪᐃᓕᖓᓂᖏᑦᑕᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦᑕ, ᒪᓕᒐᓕᕆᓂᕐᒧᑦ ᑲᑎᒪᔩᑦ ᓇᓗᓇᐃᖅᓯᓂᐊᖅᑐᑦ ᐱᔾᔪᑎᒥᓂᒃ ᒐᕙᒪᒃᑯᓐᓄᑦ ᐊᒻᒪᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔾᔪᑎᒥᒃ ᐊᓯᔾᔨᕐᓂᖓᓄᑦ. ᒥᓂᔅᑕᐅᖃᑎᒌᑦ ᑲᑎᒪᔨᖏᑦ
ᐃᒻᒥᒃᑯᑦ ᐋᖅᑭᑦᑕᖓᓐᓂᒃ ᒪᓕᒐᓕᕆᓂᕐᒧᑦ ᑲᑎᒪᔩᑦ ᐊᒻᒪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ. ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᓴᓐᖏᓂᖅᓴᐅᓂᐊᖅᑐᖅ ᐃᒪᐃᑦᑐᖃᓐᖏᑐᐊᖅᐸᑦ:
(a)
ᐃᒻᒥᒃᑯᑦ ᐋᖅᑮᑉᐸᑕ ᒪᓕᒐᓕᕆᓂᕐᒧᑦ ᑲᑎᒪᔩᑦ ᒐᕙᒪᒃᑯᑦ ᐱᔪᓐᓇᕐᓂᖃᕐᕕᒋᓐᖏᑕᖓᓐᓄᑦ ᐊᓯᔾᔩᓂᕐᒥᒃ ᐋᖅᑭᑦᑕᐅᔪᒥᒃ, ᑲᓇᑕᒥ ᐊᕕᑦᑐᑦᓯᒪᔪᓂᓗ ᐱᔪᒪᔭᕆᔭᐅᔪᖅ ᐊᐅᓚᓂᖅ ᑲᔪᓯᖁᔭᐅᑦᓱᓂ; ᐅᕝᕙᓗ
(b)
ᐊᓯᖏᓐᓄᑦ ᐃᒻᒥᒃᑯᑦ ᐋᖅᑭᑦᑕᐅᔪᓄᑦ ᒪᓕᒐᓕᕆᓂᕐᒧᑦ ᑲᑎᒪᔨᓄᑦ, ᐊᐅᓚᓂᐅᔪᖅ ᐃᓱᒪᒋᔭᐅᔪᖅ ᑲᓇᑕᒥ ᐊᕕᑦᑐᖅᓯᒪᔪᓂᓘᓐᓃᑦ ᐱᔪᒪᔭᕆᔭᐅᔪᖅ ᐊᒻᒪᓗ ᐊᖏᖅᑕᐅᓂᖏᑦ ᑐᑭᖏᑦᑕ ᐃᒪᐃᓕᖓᓂᖏᑦᑕᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ ᐊᐅᓚᓂᕐᒧᑦ ᓇᓕᖅᑲᖅ ᒥᑭᓪᓕᑎᕆᒐᔭᖅᐸᑦ ᐊᐅᓚᓂᕐᒥᒃ; ᐅᕝᕙ
(c)
ᐋᖅᑭᒋᐊᖅᑕᐅᓂᖓ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᐊᖏᖅᑕᐅᑉᐸᑦ ᑐᓐᖓᕕᒋᑦᓱᒍ 12.8.3.
ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᓴᓐᖏᓂᖅᓴᐅᖏᑉᐸᑦ, ᑖᒃᑯᐊᓪᓗᐊᑦ ᑐᑭᖏᑦ ᐃᒪᐃᓕᖓᓂᖏᓪᓗ ᐃᓗᐊᓃᑦᑐᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦᑕ ᐋᖅᑭᒋᐊᖅᑕᐅᑦᓯᐊᕐᓂᐊᖅᑐᑦ.
12.9.4
ᐅᕙᓂ ᐃᓚᖓᓂ, “ᐃᒻᒥᒃᑯᑦ ᐋᖅᑭᑦᑕᐅᔪᑦ ᒪᓕᒐᓕᕆᓂᒧᑦ ᑲᑎᒪᔨᓄᑦ” ᑐᑭᓕᒃ ᐋᖅᑭᑦᑕᐅᔪᖅ ᒪᓕᒐᖅᑭᒍᑦ ᑎᒥᐅᔪᒧᑦ ᒪᓕᒐᖃᕐᑎᑦᓯᓂᕐᒧᑦ ᐅᕝᕙᓗ ᓚᐃᓴᓐᓯᑖᖅᑎᑦᓯᓂᕐᒧᑦ ᓴᓐᖏᓂᐅᔪᓂᒃ ᐊᐅᓚᓂᐅᔪᒥ ᑎᒥᐅᔪᖅ ᓇᓗᓇᐃᖅᓯᒪᔪᓂᒃ ᑎᓕᔭᐅᓯᒪᓐᖏᑦᑐᐊᖅᐸᑦ ᐊᐅᓚᑕᐅᓗᑎᓪᓘᓐᓃᑦ ᒐᕙᒪᒃᑯᓐᓄ; ᐋᖅᑭᑦᑕᐅᔪᖅ ᐃᒻᒥᒃᑯᑦ ᐋᖅᑭᑦᑕᐅᔫᒍᓐᓃᖏᑦᑐᖅ ᒪᓕᒐᓕᕆᓂᕐᒧᕐᑦ ᑲᑎᒪᔨᓄᑦ ᐱᔾᔪᑎᑑᓗᓂ ᐋᖅᑭᑦᑕᐅᔪᖅ ᐊᑦᑐᐊᑉᐳᑦ ᐃᓘᓐᓈᒍᑦ ᑎᓕᓯᔾᔪᑕᐅᔪᒧᑦ ᖃᐅᔨᒪᓕᑕᖅᑎᒍᑦ, ᒪᓕᒐᖅᑎᒍᑦ ᐅᕝᕙᓗ ᑎᓕᓯᔾᔪᑕᐅᔪᖅᑎᒍᑦ ᐊᖏᖅᑕᐅᓂᒃᑯᓪᓘᓐᓃᑦ, ᐊᔾᔨᖅᑕᐅᓂᒃᑯᑦ ᐅᕝᕙᓗ ᐃᓇᖏᖅᑕᐅᑉᐸᑦ ᒐᕙᒪᒃᑯᓐᓄᑦ.
12.9.5
ᐋᖅᑭᑦᑕᐅᔪᖅ ᐃᒻᒥᒃᑯᑦ ᐋᖅᑭᑦᑕᐅᓂᖓ ᐊᑐᕈᓐᓃᓲᖑᕗᖅ ᒪᓕᒐᓕᕆᓂᕐᒧᑦ ᑲᑎᒪᔨᓄᑦ ᐱᔾᔪᑕᐅᓪᓗᓂ ᐅᓇ ᐃᓚᖓ ᒐᕙᒪᒃᑯᑦ ᐊᓯᔾᓪᔨᕆᐊᖅᓯᒪᔪᖓᑦ ᐋᖅᑭᑦᑕᐅᔪᖅ ᓯᕗᕐᖓᓂ ᐃᓱᒪᑦᓴᖅᓯᐅᕈᑕᐅᓂᖓᑕ ᐊᐳᖅᓯᒪᓂᖓ ᐋᖅᑭᑦᑕᐅᔫᑉ ᐊᒻᒪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᓇᓕᖅᑲᖓᑕ.
12.9.6
ᐊᐳᖅᓯᒪᓂᖃᖅᐸᑕ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᐋᖅᑭᑦᑕᖓᓪᓗ ᒪᓕᒐᓕᕆᓂᕐᒧᑦ ᑲᑎᒪᔩᑦ ᐃᓗᐊᓃᓐᖏᓪᓗᓂ 12.9.3, ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᓴᓐᖏᓂᖅᓴᐅᓂᐊᖅᑐᖅ.
12.9.7
ᓚᐃᓴᓐᓯ, ᐱᔪᓐᓇᐅᑎ, ᓇᓕᖅᑲᖅ ᐅᕝᕙᓘᓐᓃᑦ ᐊᓯᐊ ᒐᕙᒪᒃᑯᓐᓂᒃ ᐊᖏᖅᑕᐅᓂᖅ ᐊᑐᓕᖅᑎᑦᓯᒍᑕᐅᔪᖅ ᑎᒥᓐᖑᕈᑕᐅᔪᕐᓘᓐᓃᑦ ᓇᐅᑐᐃᓐᓴᕐᓄᑦ ᑐᑭᖏᓐᓄᑦ ᐃᒪᐃᓕᖓᓂᖏᓐᓄᓪᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᐅᓚᓂᕐᒧᑦ ᓇᓕᖅᑲᖓᑦ ᐊᐱᖅᑯᑕᐅᒍᓐᓇᖏᑦᑐᖅ ᐃᖅᑲᖅᑐᐃᕕᒻᒥ ᑐᓐᖓᕕᖃᕐᓗᑎᒃ ᑐᓂᓯᓯᒪᔪᑦ ᑎᒥᐅᔪᑦ ᐊᑦᓱᖐᓐᓂᖅᐸᑕ ᐋᖅᑭᑦᑕᒥᓐᓂᒃ ᐅᕝᕙᓗ ᐊᐅᓚᓂᖃᕐᓂᖅᐸᑕ ᑎᒍᒥᐊᕐᕕᖃᓐᖏᑕᒥᓂᒃ, ᐊᑐᓕᖅᑎᑦᓯᓕᕈᑎᒃ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦᑕ.
12.9.8
ᑕᐃᒪᐃᓕᖓᒐᓗᐊᖅᑎᓪᓗᒋᑦ 12.9.1 ᑎᑭᑦᓱᒍ 12.9.7 ᐃᓚᒍᑦᓯᐅᔾᔨᓂᐊᖅᑐᑦ ᓇᐅᑐᐃᓐᓇᕐᓂᒃ ᒪᓕᒐᕐᓂᒃ ᐅᕝᕙᓗ ᒐᕙᒪᒃᑯᓐᓂᒃ ᑎᒥᐅᔪᓂᒃ ᕿᒥᕐᕈᔭᐅᓂᖏᓐᓄᑦ ᐊᐅᓚᓂᐅᔫᑉ ᐃᓚᓯᒃᑲᓐᓂᕈᒪᓗᑎᓪᓗ ᐱᔭᕆᐊᑐᓂᖅᓴᓂᒃ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ, ᐅᕝᕙᓗ ᕿᐱᓗᓐᓂᖅ ᑐᓂᓯᓂᕐᒥᒃ ᓚᐃᓴᓐᓯᒥᒃ ᐊᖏᕐᓂᕐᒥᓪᓘᓐᓃᑦ ᐱᔭᐅᒋᐊᖃᕋᔭᖅᑐᒥᒃ ᑐᑦᓯᕌᖑᓯᒪᔪᖅ ᐊᐅᓚᓂᖅ ᑲᔪᓯᓂᐊᖅᐸᑦ.
12.9.9
ᐊᑐᓕᖅᑎᑦᓯᓂᖅ ᐅᖃᐅᓯᐅᔪᖅ 12.9.1-ᒥ ᐱᖃᓯᐅᔾᔨᖏᑦᑐᖅ ᑐᓂᒪᓂᖓᓐᓂᒃ ᒐᕙᒪᒃᑯᑦ ᐋᖅᑭᒋᐊᕆᓂᕐᒧᑦ ᐱᖁᔭᕐᒥᒃ.
12.9.10
ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᒻᒪᓗ ᓄᓇᕗᒻᒥ ᐸᕐᓇᐃᔩᑦ ᐃᒪᐃᓐᓂᐊᖅᑐᑦ, ᐊᓯᐊᒍᑦ ᓇᓗᓇᐃᖅᑕᐅᓐᖏᑐᐊᖅᐸᑦ, ᐱᓂᐊᖅᑐᑦ ᐊᔾᔨᖏᓐᓂᒃ ᐃᓘᓐᓇᑎᒃ ᐊᖏᖅᑕᐅᓃᑦ, ᒪᓕᒐᐃᑦ ᐊᓯᖏᑦᑕᓘᓐᓃᑦ, ᐊᐅᓚᓂᐅᔪᓄᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᑐᓂᓯᓯᒪᔭᖏᑦ ᓇᓕᖅᑲᓂᒃ.
ᐃᓚᖓ 10
ᑲᔪᓯᑎᑦᓯᓂᖅ
12.10.1 - ᐊᐅᓚᓂᐅᔪᑦ ᑲᔪᓯᒋᐊᖃᓐᖏᑦᑐᑦ
ᓚᐃᓴᓐᓯ ᐊᖏᕐᓂᐅᔪᕐᓘᓐᓃᑦ ᐱᔭᐅᔭᕆᐊᓕᒃ ᐱᕕᖃᖅᑎᑦᓯᒍᑕᐅᓗᓂ ᑐᑦᓯᕌᖑᓯᒪᔪᒥᒃ ᐊᐅᓚᓂᕐᒥᒃ ᑲᔪᓯᒍᑎᒋᓂᐊᖅᑕᖑᑦ ᑐᓂᔭᐅᒋᐊᖃᓐᖏᑦᑐᑦ ᐊᑦᑐᐊᔪᓄᑦ ᐊᐅᓚᓂᕐᒧᑦ ᕿᒥᕐᕈᔭᐅᒋᐊᓕᒻᒧᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ ᕿᒥᕐᕈᔭᐅᒌᖅᓯᒪᓕᓐᖏᓐᓂᖏᓐᓂ ᐊᒻᒪᓗ, ᕿᒥᕐᕈᓂᖅᑕᖃᕐᓂᐊᖅᐸᑦ ᐊᑖᓂ ᐃᓚᖓ 5 ᐅᕝᕙᓗ 6, ᑕᐃᓐᓇ ᑭᓯᐊᓂ ᕿᒥᕐᕈᓂᖅ ᐱᔭᕇᖅᓯᒪᓕᖅᐸᑦ ᐊᒻᒪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᑐᓂᔭᐅᓯᒪᓕᖅᐸᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᐅᑦᓱᑎᒃ ᐅᑯᐊ ᐱᕕᖃᖅᑎᑦᓯᒍᑕᐅᔪᑦ.
12.10.2 - ᐊᑑᑎᕕᐅᒋᐊᑐᓐᖏᑦᑐᑦ
ᑕᐃᒪᐃᓕᖓᒐᓗᐊᖅᑎᓪᓗᒍ 12.10.1, ᐊᐅᓚᓂᕐᒧᑦ ᑐᑦᓯᕋᐅᑎ ᐅᖃᐅᓯᐅᓯᒻᒪᑉᐸᑦ ᕿᒥᕐᕈᔭᐅᖁᔭᐅᓗᓂ ᑐᓐᖓᕕᒋᑦᓱᒍ ᐃᓚᖓ 5 ᐅᕝᕙᓗ 6, ᐊᖏᖅᑕᐅᓃᑦ ᓚᐃᓴᓐᓰᓪᓘᓐᓃᑦ ᕿᓂᕐᓂᕐᒧᑦ ᐅᕝᕙᓗ ᐱᕙᓪᓕᐊᑎᑦᓯᕐᓂᒧᑦ ᐊᐅᓚᓂᐅᔪᓄᑦ ᐊᑦᑐᐊᔪᓄᑦ ᑕᐃᑯᖓ ᐊᐅᓚᓂᕐᒧᑦ ᑐᓂᔭᐅᒍᓐᓇᖅᑐᑦ ᐃᒪᐃᑉᐸᑦ
(a)
ᐊᐅᓚᓂᖅ ᐃᓗᐊᓃᑉᐸᑦ ᐃᓚᒍᑕᖅ 12-1; ᐅᕝᕙᓗ
(b)
ᐊᐅᓚᓂᖅ, ᑕᑯᓐᓇᖅᑕᖓᑦᑎᒍᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ, ᑲᔪᓯᒍᓐᓇᖅᐊᑦ ᕿᒥᕐᕈᔭᐅᓐᖏᓪᓗᓂ.
12.10.3 - ᑲᔪᓯᔪᑦ ᑎᒍᒥᐊᖅᑕᐅᔪᑦ
ᐱᔪᓐᓇᐅᑏᑦ, ᓇᓕᖅᑲᐃᑦ, ᓚᐃᓴᓐᓰᑦ ᐅᕝᕙᓗ ᐊᓯᖏᑦ ᒐᕙᒪᒃᑯᓐᓂᒃ ᐊᖏᖅᑕᐅᔪᑦ ᐊᑐᓕᖅᑎᑦᓯᒍᑕᐅᒍᔪᑦ ᐊᑕᐅᓯᓐᖑᕈᑕᐅᔪᓪᓘᓐᓃᑦ ᑐᑭᖏᓐᓄᑦ ᐃᒪᐃᓕᖓᓂᖏᓐᓄᓪᓗ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑦ ᑐᓂᔭᐅᓯᒪᑉᐸᑦ, ᑎᒍᒥᐊᖅᑐᑦ ᒐᕙᒪᒃᑯᓐᓂ ᒥᓂᔅᑕᐅᕕᐅᔪᑦ ᑎᒥᐅᔪᓪᓘᓐᓃᑦ ᑎᒍᒥᐊᖏᓐᓇᕐᓂᐊᖅᑐᑦ ᑲᔪᓯᑎᑦᓯᓂᕐᒥᒃ ᐱᔪᓐᓇᐅᑎᒥᒃ, ᓇᓕᖅᑲᒥᒃ, ᓚᐃᓴᓐᓯᒥᒃ ᐅᕝᕙᓗ ᐊᓯᖏᓐᓂᒃ ᒐᕙᒪᒃᑯᓐᓂ ᐊᖏᖅᑕᐅᔪᒥᒃ.
12.10.4
ᑎᒍᒥᐊᖅᑐᑦ ᒐᕙᒪᒃᑯᓐᓂ ᒥᓂᔅᑕᐅᕕᐅᔪᑦ ᑎᒥᐅᔪᓪᓗ ᐊᑑᑎᓂᐊᖅᑐᑦ ᑲᒧᓯᓂᑦᓯᐊᖑᔪᓂᒃ ᐊᑐᕈᓐᓇᖅᑕᒥᓐᓂᒃ ᑲᔪᓯᑎᑦᓯᓂᕐᒧᑦ ᐊᑖᓂ 12.10.3 ᐊᑑᑎᓂᕐᒧᓪᓗ ᑕᐃᒪᐃᑦᑐᓂᒃ, ᑕᐃᒪᐃᑦᑎᓪᓗᒋᓪᓗ ᐃᖅᑲᖅᑐᕋᑦᓴᕈᕈᓐᓇᔾᔮᖏᑦᑐᑦ ᓄᖅᑲᖓᑎᑕᐅᓂᖏᓐᓄᓘᓐᓃᑦ ᓇᐅᑐᐃᓐᓇᐃᑦ ᐱᔪᓐᓇᐅᑏᑦ, ᓇᓕᖅᑲᐃᑦ, ᓚᐃᓴᓐᓰᑦ ᐅᕝᕙᓗ ᐊᓯᖏᑦ ᒐᕙᒪᒃᑯᓐᓄᑦ ᐊᖏᖅᑕᐅᓯᒪᔪᑦ.
12.10.5 - ᐃᓕᑕᕆᔭᐅᓯᒪᓂᖃᕐᓂᖅ ᒪᓕᒐᖅᑎᒍᑦ
ᕐᑳᖓᒍᒃᑲᓐᓂᖅ ᓇᐅᑐᐃᓐᓇᕐᒧᑦ ᐃᓄᒻᒧᑦ ᑎᒥᐅᔪᒧᓪᓘᓐᓃᑦ ᐃᓕᑕᕆᔭᐅᓯᒪᓴᔪᒧᑦ ᒪᓕᒐᖅᑎᒍᑦ ᐃᓘᓐᓈᒍᑦ ᐊᑑᑎᓂᖓᓄᑦ ᐃᖅᑲᖅᑐᐃᕕᒃᑰᑎᑦᓯᒍᓐᓇᕐᓂᕐᒥᒃ ᑎᒍᒥᐊᖅᑑᑉ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᐊᖅᑐᑦ ᑖᒃᑯᐊᓪᓗᐊᑦ ᐃᖅᑲᖅᑐᐃᔩᑦ ᓵᖓᓐᓄᑦ:
(a)
ᓇᓗᓇᐃᖅᓯᑎᑦᓯᓗᑎᒃ ᑐᑭᒋᔭᐅᔪᑦ ᐃᒪᐃᓕᖓᓂᐅᔪᓪᓘᓐᓃᑦ ᐃᓗᐊᓃᑦᑐᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᓇᓕᖅᑲᖓᑦ ᐊᑐᓕᖅᑎᑕᐅᓯᑉᐸᑦ, ᐊᒻᒪᓗ ᐋᖅᑭᒋᐊᕈᑕᐅᔪᖅ ᓈᒻᒪᒋᔭᐅᔪᖅ ᐃᖅᑲᖅᑐᐃᔨᓂᓄᑦ ᑎᑭᖏᑦ ᐃᒪᐃᓕᖓᓂᖏᓪᓗ ᐊᑐᓕᖅᑎᑕᐅᓯᒪᓐᖏᑉᐸᑕ;
(b)
ᐃᖅᑲᖅᑐᐃᕕᒻᒥᒃ ᑎᓕᔭᐅᔾᔪᑎᑖᕐᓂᕐᒥᒃ ᐃᓄᒻᒥᒃ ᓄᖅᑲᖓᑎᑦᓯᔾᔪᑎᒥᒃ ᑕᐃᑦᓱᒪ ᐃᓅᑉ, ᓚᐃᓴᓐᓯᑎᒍᑦ, ᐊᖏᖅᑕᐅᓂᒃᑯᑦ, ᐱᔪᓐᓴᐅᑎᒃᑯᑦ, ᐅᕝᕙᓘᓐᓃᑦ ᑳᑦᑐᓛᖅᑎᒍᑦ ᐊᑐᓕᖅᑎᑦᓯᔪᖅ ᓇᐅᑐᐃᓐᓴᕐᓂᒃ ᑐᑭᒋᔭᐅᔪᓂᒃ ᐃᒪᐃᓕᖓᓂᐅᔪᓂᓪᓗ ᓄᓇᕗᒻᒥ ᐊᕙᑐᓕᕆᔨᒃᑯᑦ ᑲᑎᒪᔨᖏᑦᑕ ᓇᓕᖅᑕᖓᓐᓂ, ᐱᔭᐅᒋᐊᓕᒻᒥᒃ ᑲᔪᓯᑎᑦᓯᓂᕐᒧᑦ ᑲᔪᓯᓐᖏᑎᑦᓯᓂᕐᒧᓘᓐᓃᑦ; ᐅᕝᕙᓗ
(c)
ᐊᕕᑦᑐᖅᓯᒪᔪᓂ ᕿᒥᕐᕈᓂᕐᒧᑦ ᐋᖅᑭᖅᑕᐅᖁᔨᓗᑎᒃ ᑎᓕᓯᔾᔪᑎᓂᓪᓗ, ᐊᑯᓐᓂᖅᓯᐅᑕᐅᑉᐸᑕ ᑭᖑᓪᓕᖅᐹᖅᓯᐅᑕᐅᑉᐸᑕᓘᓐᓃᑦ, ᐋᖅᑭᑦᑕᐅᔪᑦ ᐅᕘᓇ ᐃᓛᒃᑰᖅᑐᒃᑯᑦ.
ᐃᓚᖓ 11
ᓯᓚᑖᓃᑦᑐᓂᒃ ᐊᑦᑐᐃᓂᐅᔪᑦ
12.11.1 - ᓯᓚᑖᓃᑦᑐᓂᒃ ᐊᑦᑐᐃᓂᐅᔪᑦ
ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᑐᑦᓯᕋᖅᐸᑕ ᒐᕙᒪᒃᑯᑦ ᐅᕝᕙᓗ, ᐊᖏᖅᑎᓪᓗᒋᑦ ᒐᕙᒪᒃᑯᑦ, ᑐᑦᓯᕋᖅᐸᑕ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᕿᒥᕐᖁᓂᖅ ᐊᐅᓚᓂᕐᒧᑦ ᑐᑦᓯᕋᐅᑎᒥᒃ ᓯᓚᑖᓃᑦᑐᒥᒃ ᓄᓇᕗᑦ ᐊᑦᑐᐃᓂᖃᓪᓚᕆᑐᐃᓐᓇᕆᐊᓕᒃ ᐊᕙᑎᒥᒃ ᐃᓅᓯᒃᑯᓪᓗ ᖃᑭᒪᓇᓱᐊᕐᓂᕐᒥᒃ ᓄᓇᕗᒻᒥ.
12.11.2
ᐊᐳᖅᓯᒪᑎᓐᖏᓪᓗᒍ ᑎᒍᒥᐊᕐᓂᖏᑦ ᓄᓇᕗᒻᒥ ᐊᕙᑎᓕᕿᓂᕐᒧᑦ ᑲᑎᔩᑦ ᐅᕝᕙᓗ EARP-ᑯᑦ ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑕ ᐅᕙᓂ ᐃᓛᒃᑰᖅᑐᒥ, ᒐᕙᒪᒃᑯᖏᑦ ᑲᓇᑕᐅᑉ ᐊᕕᑦᑐᖅᓯᒪᔪᓂᓗ ᒐᕙᒪᒃᑯᑦ, ᐃᑲᔪᖅᑕᐅᓗᑎᒃ ᓄᓇᕗᒻᒥ ᐊᕙᑎᓕᕿᓂᕐᒧᑦ ᑲᑎᒪᔨᓄᑦ, ᐊᑐᕐᓂᐊᖅᑐᑦ ᐱᔪᓐᓇᕐᓂᓕᒫᒥᓂᒃ ᐊᐃᕙᒍᑎᖃᕐᓗᑎᒃ ᐊᖏᕈᑎᓂᒃ ᐊᓯᖏᓐᓂᒃ ᐊᕕᑦᑐᖅᓯᒪᔪᓂᒃ ᑲᑐᔾᔨᖃᑎᒌᒍᑎᖃᕐᓗᑎᒃ ᕿᒥᕐᕈᔭᐅᓂᖓᓂᒃ ᐊᐅᓚᓂᕐᒧᑦ ᑐᑦᓯᕋᐅᑏᑦ ᐊᑦᑐᐃᓂᖃᑐᐃᓐᓇᕆᐊᓖᑦ ᓯᓚᑖᓃᑦᑐᓂᒃ ᐊᕙᑎᒥᒃ ᐃᓅᓯᕆᔭᐅᔪᓂᓪᓘᓐᓃᑦ.
ᐃᓚᖓ 12
ᐊᑑᑎᕕᖏᑦ
12.12.1 - ᐃᓘᓐᓈᒍᑦ ᐊᑑᑎᕕᖏᑦ
ᐅᓇ ᐃᓛᒃᑰᖅᑐᖅ ᐊᑑᑎᓂᐊᖅᑐᖅ ᐃᓄᐃᑦ ᓄᓇᖁᑎᖏᓐᓄᑦ.
12.12.2
ᐅᓇ ᐃᓛᒃᑰᖅᑐᖅ ᐊᑑᑎᓂᐊᖅᑐᖅ ᑕᒪᒃᑮᓐᓄᑦ ᓄᓇᒧᑦ ᑕᕆᐅᕐᒧᓪᓗ ᐃᓗᐊᓐᓂ ᓄᓇᕗᑦ ᐊᒻᒪᓗ ᐃᖏᕐᕋᓂᐅᔪᒥᓗ. ᐅᒥᐊᕐᔪᐊᑦ ᐊᑦᑐᐊᓂᖃᖅᑐᑦ ᐊᐅᓚᓂᕐᒧᑦ ᑐᑦᓯᕋᐅᑎᓄᑦ ᓄᓇᕗᒻᒥ ᐊᑦᑐᐊᓂᐊᖅᑐᑦ ᐆᒧᖓ ᐃᓛᒃᑰᖅᑐᒧᑦ. ᑭᓯᐊᓂᓕ, ᐅᒥᐊᕐᔪᐊᖅᑕᐅᓂᐅᖏᓐᓇᓲᑦ ᓄᓇᓕᓐᓄᑦ ᐃᒻᒥᒃᑯᓪᓘᓐᓃᑦ ᐅᒥᐊᕐᔪᐊᑦ ᓄᑦᑕᕐᒃᓂᖏᑦ ᐊᑦᑐᐊᖏᑦᑐᑦ ᐊᐅᓚᓂᕐᒧᑦ ᑐᑦᓯᕋᐅᑎᓄᑦ ᐊᑦᑐᐊᓂᐊᓐᖏᑦᑐᑦ ᐃᓚᖓ 4, 5, ᐊᒻᒪᓗ 6-ᒧᑦ.
12.12.3
ᐅᓇ ᐃᓛᒃᑰᖅᑐᖅ ᐊᑑᑎᔪᖅ ᐋᖅᑭᑦᑕᐅᔪᓄᑦ, ᐃᓪᓗᓄᑦ, ᐊᐅᓚᓂᐅᒋᐊᓕᓐᓄᓪᓗ ᐃᔾᔪᑕᐅᓪᓗᑎᒃ ᑲᓇᑕᒥ ᐅᓇᑕᖅᑐᑦᓴᐃᑦ, ᑭᓯᐊᓂ, ᐋᖅᑮᓂᐅᔪᑦ, ᐃᓪᓗᐃᑦ, ᐊᐅᓚᓂᐅᔪᓪᓗ ᐊᑑᑎᑎᑕᐅᔾᔮᖏᑦᑐᑦ ᐅᑯᓇᓐᖓᑦ ᐱᕕᖃᖅᑎᑦᓯᒍᑕᐅᔪᓂᒃ ᐊᔾᔨᐅᓐᖏᑦᑐᒥᒃ ᑐᓐᖓᕕᖃᕐᓗᑎᒃ ᓇᓕᖅᑳᖅᑖᓚᐅᖅᑎᓪᓗᒋᑦ ᒥᓂᔅᑕᖓᓐᓂᒃ ᐅᓇᑕᖅᑐᑦᓴᒃᑯᑦ ᐊᑑᑎᒋᐊᓕᓐᓂᒃ ᐊᑑᑎᒋᐊᖃᓐᖏᒋᐊᖏᑦ ᑐᓐᖓᕕᒋᓗᒋᑦ ᑲᓇᑕᒥ ᐊᑦᓱᖏᖅᓯᒪᒋᐊᓖᑦ ᐱᔾᔪᓴᐅᓪᓗᓂ ᑲᓐᖑᓇᖅᑐᓕᕆᓂᖅ ᑐᐊᕕᕐᓇᖅᑐᓕᕆᓂᕐᓘᓐᓃᑦ.
12.12.4 - ᑭᓪᓕᒋᔭᐅᔪᑦ
ᑐᑭᒋᔭᐅᔪᑦ ᐃᒪᐃᓕᖓᓂᐅᔪᓪᓘᓐᓃᑦ ᐊᐳᖅᓯᒪᓂᖃᖅᑐᑦ ᑎᑭᐅᒪᔭᕆᐊᓕᓐᓄᑦ ᓴᖅᑭᖅᑕᐅᔪᓄᑦ ᓇᐅᑐᐃᓐᓇᕐᓄᑦ ᒐᕙᒪᑐᖃᒃᑯᓐᓂ ᐊᕕᑦᑐᖅᓯᒪᔪᓂᓘᓐᓃᑦ ᐊᕙᑎᓕᕆᓂᕐᒧᑦ ᐃᓅᓯᒃᑯᓪᓗ ᖃᑭᒪᓇᓱᐊᓂᕐᒧᑦ ᒪᓕᒐᕐᓄᑦ ᐃᓘᓐᓈᒍᑦ ᐊᑑᑎᔪᓄᑦ, ᐊᑐᖅᑎᑕᐅᒍᓐᓇᖅᑐᑦ ᐅᕘᓇ ᐃᓛᒃᑰᖅᑐᒃᑯᑦ.
12.12.5
ᐋᖅᑭᑦᑕᐅᔪᑦ ᑐᓐᖓᕕᐅᓗᑎᒃ ᐅᑯᐊ ᐱᕕᖃᖅᑎᑦᓯᓂᐅᔪᑦ ᐋᖅᑭᑦᑕᐅᓂᐊᖅᑐᑦ ᐊᑐᓕᖅᑎᑕᐅᓗᑎᒃ ᑐᑭᓕᐅᖅᑕᐅᓗᑎᓪᓗ ᑐᓐᖓᕕᖃᕐᓗᑎᒃ ᐃᓛᒃᑯᑦ 5 ᐊᒻᒪᓗ 7.
12.12.6 - ᒪᓕᒐᖅᑎᒍᑦ ᓴᐳᔾᔭᓯᒪᓂᖃᓐᖏᓐᓂᖅ
ᑐᓂᔭᐅᓂᖓ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ ᐊᐅᓚᓂᕐᒧᑦ ᓇᓕᖅᑲᖓᑕ ᓴᐳᔾᔨᒍᑕᐅᒍᓐᓇᖏᑦᑐᖅ ᒪᓕᒐᖅᑎᒍᑦ ᐱᔪᓐᓇᕐᓂᖃᖅᖅᑕᐅᓂᕐᒧᑦ ᐊᐅᓚᔾᔭᒋᐊᕈᑕᐅᓗᓂ.
12.12.7 - ᑲᓇᑕᒥ ᐊᕙᑖᓄᑦ ᖃᐅᔨᓴᕐᓂᕐᒧᑦ ᐱᖁᔭᖅ
(ᐋᖅᑭᒋᐊᖅᑕᐅᔪᖅ P.C. 2008-977 ᒪᐃ 29, 2008)
ᑲᓇᑕᒥ ᐊᕙᑖᓄᑦ ᖃᐅᔨᓴᕐᓂᕐᒧᑦ ᐱᖁᔭᖅ, ᐊᒻᒪᓗ ᑭᖑᕝᕕᖅᑎᖏᑦ ᒪᓕᒐᑦᓴᑦ ᐃᓇᖐᒍᑕᐅᔪᑦ ᐱᖁᔭᒥᒃ, ᐊᑐᕈᓐᓃᓂᐊᖅᑐᑦ ᓄᓇᖓᓅᖓᔪᓄᑦ ᐃᓛᒃᑰᖓᓂᖓᓅᖓᔪᓂ.
12.12.8
(ᐋᖅᑭᒋᐊᖅᑕᐅᔪᖅ P.C. 2008-977 ᒪᐃ 29, 2008)
ᒪᓕᒐᑦᓴᖅ ᐅᖃᐅᓯᕆᔭᐅᔪᖅ ᐊᕕᑦᑐᖅᓯᒪᓂᖓᓂ 10.2.1 ᐊᐅᓚᑦᓯᒍᑕᐅᔪᒧᑦ ᑐᕌᖓᔪᖅ ᓇᓗᓇᐃᖅᑕᐅᓯᒪᓪᓗᓂ ᑕᕝᕙᓂ ᐃᓛᒃᑰᖓᓂᖓᓂ ᑐᑭᓕᐅᖅᓯᒪᓂᐊᓐᖏᓚᖅ ᑭᖑᕝᕕᕈᑕᐅᓯᒪᓂᖓᓂᒃ ᒪᓕᒐᑦᓴᒧᑦ ᐱᔾᔪᑎᒋᓪᓗᒍ ᐊᕕᑦᑐᖅᓯᒪᓂᖓᓃᑦᑐᖅ 12.12.7.
ᐅᐃᒍᖓ 12-1
ᐊᐅᓚᓂᕐᒧᑦ ᑐᑦᓯᕋᐅᑏᑦ ᕿᒥᕐᕈᔭᐅᒋᐊᑐᓐᖏᑦᑐᑦ
1
ᓄᓇᒥᒃ ᐊᑐᕐᓂᒧᑦ ᐊᐅᓚᓃᑦ ᐱᔪᓐᓇᐅᑎᖃᕆᐊᑐᓐᖏᑦᑐᑦ ᐊᖏᖅᑕᐅᒋᐊᑐᒐᑎᓪᓗ ᒐᕙᒪᒃᑯᖏᓐᓂᒃ ᑲᓇᑕᐅᑉ ᐊᕕᑦᑐᖅᓯᒪᔪᓂᓗ ᒐᕙᒪᐃᑦ.
2
ᓄᓇᒥᒃ ᐊᑐᕐᓂᕐᒧᑦ ᐊᐅᓚᓂᐅᔪᑦ ᐱᔭᕆᐊᓖᑦ ᑭᓯᐊᓂ ᓇᓗᓇᐃᒃᑯᑕᖅ B-ᒥᒃ ᐱᔪᓐᓇᐅᑎᒥᒃ ᐊᑖᓂ ᐊᕕᑦᑐᖅᓯᒪᔪᓂ ᓄᓇᒥᒃ ᐊᑐᕐᓂᕐᒧᑦ ᒪᓕᒐᐃᑦ (SOR/770210 ᒫᑦᓯ 4 1977).
3
ᓴᓇᓂᐅᔪᓕᒫᑦ, ᐊᐅᓚᓂᐅᔪᑦ ᒪᑭᒪᔭᐅᓂᖏᓪᓗ ᐃᓪᓗᓕᒫᑦ ᐱᔨᑦᓯᕋᐅᑏᓪᓗ ᐃᓗᐊᓂ ᓄᓇᓕᓐᖑᖅᓯᒪᔪᑦ, ᐋᒡᒐᐅᒐᓗᐊᖅ ᐊᖏᓈᖅᑐᒥᒃ ᑐᖅᑯᐃᓯᒪᓂᖅ ᐅᖅᓱᐊᓗᒻᒥᒃ, ᐊᐅᓚᓕᐅᕈᑎᓂᓪᓗ ᓄᖑᔪᐃᑦᑐᑦᓴᓂᒃ ᐅᖅᓱᐊᓗᓐᓂᒃ, ᐅᕝᕙᓗ ᐃᒪᕐᒧᑦ ᐊᐅᓚᓕᓐᓂᒃ ᐊᒻᒪᓗ ᐊᓯᖏᓐᓂᒃ ᓴᓇᓂᕐᒧᑦ ᐊᐅᓚᓂᐅᔪᓂᒃ.
4
ᑐᔪᕐᒥᕕᓕᒫᑦ, ᓯᓂᑦᑕᕐᕖᑦ ᐳᓚᕋᑦᑐᓕᕆᕖᓪᓗ 20-ᓂᒃ ᐃᓪᓕᓖᑦ ᐊᑖᓃᓘᓐᓃᑦ ᓯᓚᑖᓃᑦᑎᑐᑦ ᑭᓪᓕᖏᑦᑕ ᓄᓇᓖᑦ.
5
ᐃᒪᕐᒥᒃ ᐊᑐᕐᓂᐅᔪᑦ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᖃᕈᑕᐅᒋᐊᑐᓐᖏᑦᑐᑦ ᐊᑖᓂ 13.7.3.
6
ᐅᔭᕋᓐᓂᐊᕐᓂᖅ, ᓇᓗᓇᐃᖅᓯᓂᖅ ᓇᐃᐱᑦᓯᓂᕐᓘᓐᓃᑦ ᐅᔭᕋᑦᓯᐊᕙᓐᓂᒃ ᐋᒡᒐᐅᒐᓗᐊᒻ ᐱᔭᕆᐊᖃᖅᐸᑦ ᖁᑦᓯᓂᖅᓴᒥᒃ ᓇᓗᓇᐃᒃᑯᑕᓕᒻᒥᒃ B-ᒥᒃ ᐱᔪᓐᓇᐅᑎᒥᒃ ᐅᖃᐅᓯᐅᔪᒥᒃ 2-ᒥ.
7
ᐊᓯᖏᑦ ᐃᒻᒥᒃᑯᐊᖅᑎᖅᓯᒪᔪᑦ ᐊᐅᓚᓂᐅᔪᑦ ᐊᖏᖃᑎᒌᒍᑕᐅᑐᐃᓐᓇᕆᐊᓖᑦ ᓄᓇᕗᒻᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ ᑖᑦᓱᒧᖓᓪᓗᐊᕐᓗ ᒥᓂᔅᑕᒧᑦ.
