ᐃᓘᓐᓈᒍᑦ ᐱᕕᖃᖅᑎᑦᓯᓂᐅᔪᑦ
ᐃᓚᖓ 1
ᑐᓐᖓᕕᐅᔪᑦ ᑐᕌᒐᐃᓪᓗ
2.1.1
ᐊᖏᕈᑕᐅᔪᖅ ᑐᓐᖓᕕᖃᖅᓱᓂ ᑕᑯᑦᓴᐅᑎᑦᓯᑦᓱᓂᓗ ᑐᓐᖓᕕᐅᔪᓂᒃ ᑐᕌᒐᖏᓐᓂᓪᓗ ᓇᓗᓇᐃᔭᖅᑕᐅᔪᓂ ᐱᔾᔪᑕᐅᔪᓂ.
ᐃᓚᖓ 2
ᖃᓄᐃᓕᖓᓂᖏᑦ ᓄᓇᑖᕐᓂᕐᒧᑦ ᐊᖏᕈᑎᐅ
2.2.1
ᐊᖏᕈᑎ ᓄᓇᑖᕐᓂᒧᕐᑦ ᐊᖏᕈᑕᐅᓂᐊᖅᑐᖅ ᐃᓗᐊᓂ ᑐᑭᖏᑦᑕ ᑎᑎᕋᖅᓯᒪᔪᖅ 35 ᑐᓐᖓᕕᔾᔪᐊᕐᓄᑦ ᒪᓕᒐᕐᔪᐊᖅ, 1982
ᐃᓚᖓ 3
ᑲᑎᑦᑎᑕᐅᓂᖅ
2.3.1
ᑐᕌᒐᕆᔭᐅᔪᖅ ᐊᖏᖃᑎᒌᑦᑑᓐᓄᑦ ᐱᔪᓐᓇᐅᑎᖏᑦ ᐃᓄᐃᑦ ᐊᖏᕈᑎᒦᑦᑐᑦ ᑲᑎᑦᑕᐅᓂᐊᖏᑦᑐᑦ ᓇᐅᑐᐃᓐᓇᕐᒧᑦ ᒪᓕᒐᕐᒧᑦ ᐊᐅᓚᔾᔭᑦᑕᐅᔪᒧᑦ ᐊᖏᕈᑕᐅᓗᓂ ᐊᑐᓕᖅᑎᑦᓯᒍᑕᐅᓗᓂᓘᓐᓃᑦ ᐊᖏᕈᑎᒥᒃ.
ᐃᓚᖓ 4
ᐊᖏᕈᑕᐅᓂᖓ
2.4.1
ᐊᖏᕈᑕᐅᓂᖓ ᐊᖏᕈᑎᐅᑉ ᑲᓇᑕᒧᑦ ᐃᓄᓐᓄᓪᓗ ᒪᓕᑦᓱᒋᑦ ᐃᓛᒃᑯᑦ 36-ᒦᑦᑐᑦ ᐃᒪᐃᓕᓂᐅᕗᖅ ᐊᑑᑎᖃᕐᓂᖓᓄᑦ ᐊᖏᕈᑎᐅᑉ ᐊᒻᒪᓗ, ᐊᖏᕈᑎᑕᖃᓐᖏᑉᐸᑦ, ᐊᖏᕈᑎ ᐊᑑᑎᖃᔾᔮᖏᑦᑐᖅ ᐊᑐᔾᔮᒐᓂᓗ ᓱᓇᒧᑦ.
ᐃᓚᖓ 5
ᐊᑑᑎᓕᕐᓂᖅ
2.5.1
ᐊᖏᕈᑎ ᐊᑐᓕᕐᓂᐊᖅᑐᖅ ᐊᖏᕈᑕᐅᓚᐅᖅᑎᓪᓗᒍ ᑕᒪᒃᑮᓐᓄᑦ ᐊᖏᖃᑎᒌᑦᑑᓐᓄᑦ.
ᐃᓚᖓ 6
ᐱᓕᕆᐊᖃᕐᓂᐊᕐᓂᕋᕐᓃᑦ ᒪᓕᒐᖅᑎᒍᑦ ᐊᐅᓚᔾᔭᒋᐊᒃᑲᓐᓂᖅᑐᖃᕆᐊᖃᖅᐸᑦ
2.6.1
ᒐᕙᒪᒃᑯᑦ ᑐᓴᐅᒪᖃᑎᖃᑦᓯᐊᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᒥᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐸᕐᓇᑕᐅᓂᖓᓄᑦ ᓇᐅᑐᐃᓐᓇᐅᑉ ᒪᓕᒐᐅᑉ ᑐᑦᓯᕌᖑᓯᒪᔫᑉ ᐊᑐᓕᖅᑎᑦᓯᓂᕐᒧᑦ ᐊᖏᕈᑎᒥᒃ, ᐱᖃᓯᐅᑎᑦᓱᑎᒃ ᓇᐅᑐᐃᓐᓇᐃᑦ ᐋᖅᑭᒋᐊᕈᑕᐅᔪᑦ ᐊᑐᓕᖅᑎᑦᓯᓂᕐᒧᑦ ᒪᓕᒐᕐᒧᑦ.
ᐃᓚᖓ 7
ᓇᓗᓇᐃᖅᓯᑦᓯᐊᕈᑎᖓ
2.7.1
ᐃᓱᒪᑦᓴᖅᓯᐅᕈᑕᐅᑎᓪᓗᒋᑦ ᐱᔪᓐᓇᐅᑏᑦ ᐱᕚᓪᓕᕈᑎᑦᓴᐃᓪᓗ ᐊᑐᐃᓐᓇᐅᑎᑕᐅᔪᑦ ᐃᓄᓐᓄᑦ ᐊᖏᕈᑎᒃᑯᑦ, ᐃᓄᐃᑦ ᐃᒪᐃᓐᓂᐊᖅᐳᑦ:
(a)
ᑐᓂᕐᕈᑎᓖᑦ, ᓴᒃᑯᐃᑦᓱᑎᒃ ᑐᓂᓪᓗᒋᑦ ᑯᐃᓐᒧᑦ ᑭᒡᒐᖅᑐᐃᔨᖓᓄᑦ ᑲᓇᑕᐅᑉ, ᓄᓇᖃᖅᑳᖅᓯᒪᓂᕐᒧᑦ ᑐᑦᓯᕋᐅᑎᓕᒫᑦ, ᐱᔪᓐᓇᐅᑏᑦ, ᑎᒍᒥᐊᕐᓃᑦ ᐱᔪᒪᔭᕆᔭᐃᓪᓗ, ᐱᑕᖃᖅᐸᑦ, ᓄᓇᓄᑦ ᐃᒪᕐᓄᓪᓗ ᓇᒥᑐᐃᓐᓈᖅᑐᓄᑦ ᐃᓗᐊᓂ ᑲᓇᑕᐅᑉ ᐊᑦᑐᐊᔪᓄᓪᓗ ᐃᑭᕐᒦᑦᑐᓄᑦ ᐃᓗᐊᓂ ᓇᐅᑦᓯᑐᖅᑕᐅᓂᖓᑕ ᑎᒍᒥᐊᖅᑕᐅᓂᖓᑕᓗ ᑲᓇᑕᐅᑉ; ᐊᒻᒪᓗ
(b)
ᐊᖏᖅᓯᒪᓂᐊᕐᓗᑎᒃ, ᐃᒻᒥᒃᑯᑦ, ᑭᒡᒐᖅᑐᐃᓗᑎᓪᓗ ᕿᑐᕐᖓᒥᓂᒃ ᑭᖑᕚᑦᓴᒥᓂᓪᓗ ᖃᓄᑐᐃᓐᓇᖅ ᐃᖅᑲᖅᑐᐃᕕᒃᑰᖅᑎᑦᓯᔾᔮᖏᓐᓂᕐᒥᓂᒃ, ᓇᓗᓇᐃᖅᓯᓗᑎᒃ, ᐱᖃᕐᓂᕋᕐᓗᑎᓪᓘᓐᓃᑦ ᐊᔪᐃᓐᓈᖃᕐᓗᑎᓪᓘᓐᓃᑦ ᖃᓄᐃᑦᑐᑐᐃᓐᓇᕐᓂᒃ ᐱᒋᓯᒪᔭᒥᓂᒃ, ᒫᓐᓇ ᐱᒋᔭᒥᓂᒃ ᐅᕝᕙᓗ
ᑭᖑᕐᖓᒍᑦ ᐱᒋᑐᐃᓐᓇᕆᐊᓕᒥᓂᒃ ᓵᓐᖓᑦᓯᒍᑎᒋᓗᒍ ᑯᐃᓐᒥᒃ ᑭᒡᒐᖅᑐᐃᔨᖓᓂᒃ ᑲᓇᑕᐅᑉ ᐅᕝᕙᓗ ᓇᐅᑐᐃᓐᓇᕐᒥᒃ ᐊᕕᑦᑐᖅᓯᒪᔪᒥᒃ, ᒐᕙᒪᒃᑯᓐᓂᒃ ᓇᓪᓕᑐᐃᓐᓇᖏᓐᓂ ᐊᕕᑦᑐᖅᓯᒪᔪᑦ ᐅᕝᕙᓘᓐᓃᑦ ᐃᓄᒻᒥᒃ ᑐᓐᖓᕕᖃᕐᓗᑎᒃ ᓇᐅᑐᐃᓐᓇᕐᓂᒃ ᓄᓇᖃᖅᑳᖅᓯᒪᓂᒃᑯᑦ ᐱᖃᕐᓂᕋᕐᓂᐅᔪᓂᒃ, ᐱᔪᓐᓇᐅᑎᓂᒃ, ᑎᒍᒥᐊᕐᓂᖅ, ᐱᔪᒪᔭᕆᔭᐅᔪᓂᓪᓘᓐᓃᑦ ᓄᓇᓄᑦ ᐃᒪᕐᓄᓪᓗ ᓇᓗᓇᔭᐃᖅᑕᐅᓯᒪᔪᓄᑦ ᑎᑎᕋᖅᓯᒪᔪᒥ (a).
2.7.2
ᓱᓇᑐᐃᓐᓇᖅ ᐊᖏᕈᑎᒦᑦᑐᑦ ᐃᓇᖐᓐᖏᑦᑐᖅ ᐊᖏᕐᓂᐅᔪᒥᒃ ᕿᐱᓗᓐᓂᐅᔪᒥᓪᓘᓐᓃᑦᒃ ᑲᓇᑕᒥ ᐃᓄᐃᑦ ᐱᒋᔭᖏᓐᓂᒃ ᓄᓇᖃᖅᑳᖅᓯᒪᓂᒃᑯᑦ ᐱᖃᕐᓂᕋᕐᓂᒃᑯᑦ, ᐱᔪᓐᓇᐅᑎᒃᕐᑯᑦ, ᑎᒍᒥᐊᕐᓂᒃᑯᑦ ᐱᔪᒪᔭᕆᔭᖏᑦᑎᒍᓪᓘᓐᓃᑦ ᓄᓇᓄᑦ ᐃᒪᕐᓄᓪᓗ ᓇᓗᓇᐃᔭᖅᑕᐅᓯᒪᔪᓄᑦ 2.7.1(a)-ᒥ ᓯᓚᑖᓂ ᓄᓇᕗᑦ ᓄᓇᖁᑎᖓᑕ.
2.7.3
ᐊᖏᕈᑎᒦᑦᑐᑦ ᐃᒪᐃᓐᓂᐊᓐᖏᓪᓚᑦ:
(a)
ᑐᑭᖃᖅᑎᑕᐅᔾᔮᖏᓪᓚᖅ ᐃᒫᒃ ᕿᐱᓗᓐᓂᐅᒋᐊᖓ ᐃᓄᐃᑦ ᓄᓇᖃᖅᑳᖅᓯᒪᔫᒋᐊᖏᑦ ᑲᓇᑕᒥ, ᐅᕝᕙᓗ, ᑐᓐᖓᕕᒋᑦᓱᒍ 2.7.1, ᐊᑦᑐᐃᔾᔮᖏᑦᑐᖅ ᐃᓚᐅᑎᕈᓐᓇᕐᓂᖏᓐᓂᒃ ᐅᕝᕙᓗ ᐱᕚᓪᓕᕈᑎᖃᕐᓂᖏᓐᓂᒃ ᑕᕝᕙᐅᒌᖅᑐᓂᒃ ᐅᕝᕙᓗ ᓯᕗᓂᑦᑎᓐᓂ ᑐᓐᖓᕕᔾᔪᐊᕐᓂᒃ ᐱᔪᓐᓇᐅᑎᓄᑦ ᓄᓇᖃᖅᑳᖅᓯᒪᔪᓄᑦ ᐊᑑᑎᕕᖃᑐᐃᓐᓇᕆᐊᖃᖅᑐᓄᑦ;
(b)
ᐊᑦᑐᐃᓂᖃᔾᔮᖏᑦᑐᖅ ᐃᓄᐃᑦ ᐃᓚᐅᑎᕈᓐᓇᕐᓂᖏᓐᓂᒃ ᐱᕚᓪᓕᕈᑎᖃᕈᓐᓇᕐᓂᖏᓐᓂᓪᓗ ᒐᕙᒪᒃᑯᓐᓂᒃ ᐊᐅᓚᓂᐅᔪᓂᒃ ᐃᓄᓐᓄᑦ ᐅᕝᕙᓗ ᓄᓇᖃᖅᑳᖅᓯᒪᔫᔪᓄᑦ ᐃᓄᓐᓄᑦ ᓇᓪᓕᑐᐃᓐᓇᖓᓄᑦ ᑐᕌᖓᒐᔭᕐᓂᖅᐸᑦ; ᐱᕚᓪᓕᕈᑎᑦᓴᐃᑦ ᐱᔭᐅᔪᑦ ᐊᑖᓂ ᐊᐅᓚᓂᐅᔪᑦ ᓇᓗᓇᐃᔭᖅᑕᐅᕙᓐᓂᐊᖅᑐᑦ ᐃᓘᓐᓇᐃᓐᓅᖓᔪᓄᑦ ᐃᓗᓕᖃᕐᓗᑎᒃ ᑕᒪᒃᑯᓄᖓ ᐊᐅᓚᓂᐅᔪᒧᑦ ᓴᖅᑭᖅᑕᐅᓕᐅᒥᔮᖅᐸᑦᑐᓄᑦ; ᐅᕝᕙᓗ
(c)
ᐊᑦᑐᐃᓂᖃᔾᔮᖏᑦᑐᑦ ᐱᔪᓐᓇᐅᑎᖏᓐᓂᒃ ᐃᓄᐃᑦ ᑲᓇᑕᒥᐅᑕᐅᓪᓗᑎᒃ ᑲᔪᓯᓂᐊᖅᓱᑎᓪᓗ ᐱᔪᓐᓇᐅᑎᓕᒫᖏᑦ ᐱᕚᓪᓕᕈᑎᑦᓴᖏᓪᓗ ᑕᐃᒫᑦ ᑲᓇᑕᒥᐅᑦ ᐱᓕᐅᒥᔮᖅᐸᒻᒪᑕ.
ᐃᓚᖓ 8
ᐅᖃᐅᓰᑦ ᐊᖏᕈᑎᒥ
2.8.1
ᐃᓄᑦᑎᑑᖅᑐᖃᕐᓂᐊᖅᑐᖅ, ᖃᓪᓗᓈᑎᑐᓪᓗ ᐅᐃᕖᑎᑐᓪᓗ ᐊᖏᕈᑎ. ᖃᓪᓗᓈᑎᑑᖅᑐᑦ ᐅᐃᕖᑎᑐᓪᓗ ᐱᔪᓐᓇᕐᓂᖃᕐᓂᖅᓴᐅᓂᐊᖅᑐᑦ.
ᐃᓚᖓ 9
ᑐᑭᓕᐅᕆᓂᖅ
2.9.1
ᖃᑦᓯᒐᓛᑦ ᐃᓛᒃᑰᖅᑐᑦ ᐅᖃᓕᒫᖅᑕᐅᓂᐊᖅᑐᑦ ᐊᑕᐅᑦᓯᒃᑯᑦ ᑐᑭᓕᐅᖅᑕᐅᓗᑎᓪᓗ ᐊᑕᐅᓯᐅᓗᓂ ᐊᖏᕈᑎ
2.9.2
ᐊᖏᕈᑎ ᐊᑕᖏᕐᓗᓂ ᐊᖏᕈᑎᐅᓂᐊᖅᑐᖅ ᑭᒡᒐᖅᑐᐃᓂᖅᑕᖃᕋᓂᓗ, ᓇᓪᓕᐅᒃᑯᒫᖅᑕᖃᕋᓂᓗ, ᐊᖏᕈᑎᒃᑯᓐᓂᕐᒥᒃ ᐅᕝᕙᓗ ᐃᒪᐃᓕᖓᓂᐅᔪᓂᒃ ᐊᑦᑐᐃᔪᓂᒃ ᐊᖏᕈᑎᒥᒃ ᑭᓯᐊᓂ ᑖᒃᑯᐊ ᐃᓗᐊᓃᑦᑐᑦ.
2.9.3
ᓂᕆᐅᓐᓂᖅᑕᖃᔾᔮᖏᑦᑐᖅ ᑲᖐᓇᖅᑐᑦ ᐊᖏᕈᑎᒥ ᐋᖅᑭᑦᑕᐅᖁᔭᐅᓗᑎᒃ ᐃᑲᔪᖅᑐᕐᓗᑎᒃ ᒐᕙᒪᒃᑯᓐᓂᒃ ᐃᓄᓐᓂᓘᓐᓃᑦ.
2.9.4
ᖃᑦᓯᒐᓛᑦ ᐃᓛᒃᑰᖅᑐᑦ ᐊᖏᕈᑎᒥ ᑐᑭᓕᐅᖅᑕᐅᓂᐊᖅᑐᑦ ᐋᖅᑭᒋᐊᕆᐊᖃᕐᓂᖏᑦ ᖃᓄᐃᓕᖓᓂᖏᓪᓗ ᒪᓕᓪᓗᒋᑦ, ᑐᓐᖓᕕᒋᓗᒋᑦ ᑐᑭᓕᐅᕆᓂᕐᒧᑦ ᒪᓕᒐᕐᔪᐊᖅ R.S.C. 1985, c.1-21.
ᐃᓚᖓ 10
ᒐᕙᒪᒃᑯᓐᓄᑦ ᓴᓐᖏᓂᐅᔪ
2.10.1 - ᐊᐅᓪᓛᖅᑎᑕᐅᓂᖏᑦ ᓴᓐᖏᓂᐅᔪᑦ ᐃᓗᐊᓂ ᐃᓚᖏᑦ ᑖᒃᑯᐊᓴᐃᓐᓇᐃᑦ ᒐᕙᒪ
ᓴᓐᖏᓂᖃᖅᑎᑦᓯᒍᑕᐅᔪᑦ ᒥᓂᔅᑕᖓᓐᓄᑦ ᒐᕙᒪᒃᑯᑦ ᑲᓇᑕᐅᑉ ᐅᕝᕙᓗ ᒥᓂᔅᑕᖓᓐᓄᑦ ᒥᓂᔅᑕᐅᖃᑎᒌᑦ ᐊᕕᑦᑐᖅᓯᒪᔪᓂ ᒐᕙᒪᓂ, ᑐᓐᖓᕕᒋᑦᓱᒋᑦ ᐱᕕᖃᖅᑎᑦᓯᓂᐅᔪᑦ ᐊᖏᕈᑎᒥ, ᐊᐅᓪᓛᖅᑎᑕᐅᒍᓐᓇᖅᑐᑦ ᐊᓯᐊᓄᑦ ᒥᓂᔅᑕᒧᑦ ᒐᕙᒪᒃᑯᖏᓐᓂ ᑲᓇᑕᐅᑉ, ᐅᕝᕙᓗ ᐊᓯᐊᓄᑦ ᒥᓂᔅᑕᖓᓐᓄᑦ ᒥᓂᔅᑕᐅᖃᑎᒌᑦ ᐊᕕᑦᑐᖅᓯᒪᔪᓂ ᒐᕙᒪᐅᔪᓂ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᖃᐅᔨᒃᑲᖅᑕᐅᓂᐊᖅᑐᑦ ᐊᐅᓪᓛᖅᑎᑕᐅᔪᖃᕐᓂᖅᐸᑦ.
2.10.2 - ᐊᐅᓪᓛᑎᑦᓯᓂᖅ ᓴᓐᖏᓂᐅᔪᓂᒃ ᒐᕙᒪᐅᖃᑎᒌᓂ
ᓇᐅᑐᐃᓐᓇᖅ ᐊᖏᕈᑎᒥ ᐊᐳᖅᓯᒪᒍᑕᐅᔾᔮᖏᑦᑐᖅ ᐱᔪᓐᓇᕐᓂᖏᓐᓄᑦ ᒐᕙᒪᒃᑯᑦ ᑲᓇᑕᒥ ᓄᖑᑎᕆᒍᒪᒍᑎᒃ ᐊᐅᓪᓛᑎᑦᓯᒍᒪᒍᑎᓪᓘᓐᓃᑦ ᓴᓐᖏᓂᐅᔪᓂᒃ ᑎᒍᒥᐊᖅᑕᒥᓂᓪᓘᓐᓃᑦ ᐊᕕᑦᑐᖅᓯᒪᔪᓂ ᒐᕙᒪᓄᑦ, ᓯᐊᒻᒪᖅᑎᕆᓂᐅᔪᖅ ᐊᐅᓪᓛᑎᑦᓯᓂᕐᓘᓐᓃᑦ ᐲᖅᓯᔾᔮᖏᑦᑐᑦ ᐃᓚᖓᐃᔾᔮᒐᑎᓪᓗ ᐱᔪᓐᓇᐅᑎᖏᓐᓂᒃ ᐃᓄᐃᑦ ᐊᖏᕈᑎᒥ.
2.10.3 - ᓴᖅᑭᖅᑕᐅᓂᖏᑦ ᐊᕕᑦᑐᖅᓯᒪᔪᑦ ᐲᖅᓯᔾᔮᖏᑦᑐᑦ ᐃᓚᓐᖓᐃᔾᔮᒐᑎᓪᓗ ᐱᔪᓐᓇᐅᑎᓂᒃ
ᒐᕙᒪᒃᑯᖏᑦ ᑲᓇᑕᐅᑉ ᑎᒍᓯᒻᒪᑕ ᓴᖅᑭᖅᑕᐅᓂᖓᓂᒃ ᐊᖏᓪᓕᒋᐊᖅᑕᐅᓂᖓᓂᓪᓘᓐᓃᑦ ᐊᕕᑦᑐᖅᓯᒪᔫᑉ ᐊᑕᖏᖅᓱᓂ ᐃᓚᒋᓪᓗᓂᐅᓪᓘᓐᓃᑦ ᓄᓇᑕᖑᔫᑉ ᐲᖅᓯᔾᔮᖏᑦᑐᑦ ᐃᓚᓐᖓᐃᔾᔮᒐᑎᓪᓗ ᐱᔪᓐᓇᐅᑎᖏᓐᓂᒃ ᐃᓄᐃᑦ ᐊᖏᕈᑎᒥ.
2.10.4 - ᓇᓗᓇᐃᖅᑕᐅᓂᖓ ᒐᕙᒪᒃᑯᓐᓂᒃ ᓯᕗᓕᖅᑎᐅᑉ
ᓄᖑᑎᕆᒍᑕᐅᒐᓂ ᐅᕝᕙᓗ ᐊᓯᔾᔩᒍᑕᐅᒐᓂ ᑎᒍᒥᐊᖅᑕᖏᓐᓂᒃ ᑯᐃᓐ ᑭᒡᒐᖅᑐᕐᐃᓪᓗᓂ ᑲᓇᑕᒥᒃ ᐊᑖᓂ ᐊᖏᕈᑎᐅᑉ, ᐊᖏᕈᑎᒥ ᓇᓗᓇᐃᖅᓯᓯᒪᓐᖏᑐᐊᖅᐸᑦ ᓇᓗᓇᐃᖅᑕᐅᓯᒪᔪᒥᒃ ᐃᓄᒻᒥᒃ ᑎᒥᐅᔪᒥᓪᓘᓐᓃᑦ ᑎᒍᒥᐊᖅᑐᒥᒃ ᐊᐅᓚᓂᐅᔪᒥᒃ ᒐᕙᒪᒃᑯᓐᓄᑦ, ᒥᓂᔅᑕᐅᖃᑎᒌᑦ ᑲᑎᒪᔨᖏᓐᓄᑦ, ᒐᕙᒪᒃᑯᖏᓐᓄᑦ ᑲᓇᑕᐅᑉ, ᐊᒻᒪᓗ ᐊᐅᓚᑦᓯᔩᑦ ᑭᒡᒐᖅᑐᖅᑎᖓᓐᓄᑦ, ᐊᕕᑦᑐᖅᓯᒪᔪᓂ ᒐᕙᒪᐅᔪᑦ, ᑎᓕᓯᒍᓐᓇᖅᑐᑦ ᐃᓄᒻᒥᒃ ᑎᒥᐅᔪᒥᓪᓘᓐᓃᑦ ᐊᐅᓚᑦᓯᓂᐊᖅᑐᒥᒃ ᐊᐅᓚᓂᐅᔪᒥᒃ ᑭᒡᒐᖅᑐᕐᓗᓂ ᐅᕝᕙᓘᓐᓃᑦ ᐱᔪᓐᓇᕐᓂᖃᖅᑎᑕᐅᓗᓂ ᒥᓂᔅᑕ ᑎᓕᓯᒍᓐᓇᖁᓪᓗᒍ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᖃᐅᔨᒃᑲᖅᑕᐅᓂᐊᖅᑐᑦ ᑎᓕᔭᐅᔪᒥᒃ
ᐃᓚᖓ 11
ᓴᓐᖏᓂᖃᓐᖏᓐᓂᖅ
2.11.1
ᐱᕕᖃᖅᑎᑦᓯᒍᑕᐅᔪᖅᑕᖃᖅᐸᑦ ᐊᖏᕈᑎᒥ ᖃᐅᔨᔭᐅᓗᓂ ᐃᖅᑲᖅᑐᐃᔨᓄᑦ ᑎᒍᒥᐊᖅᑐᓄᑦ ᓴᓐᖏᓂᖃᓐᖏᒋᐊᖓ, ᒐᕙᒪᒃᑯᑦ ᐃᓄᐃᓪᓗ ᐱᕕᓕᒫᕐᒥᒍᑦ ᐋᖅᑭᒋᐊᕆᒐᓱᐊᕆᐊᓖᑦ ᐊᖏᕈᑎᒥᒃ ᐋᖅᑭᒋᐊᕐᓗᒍ ᓴᓐᖏᓂᖃᓐᖏᓐᓂᖅ ᐅᕝᕙᓗ ᐃᓇᖏᖅᑕᐅᓗᓂ ᓴᓐᖏᓂᖃᓐᖏᑦᑐᖅ ᐱᕕᖃᖅᑎᑦᓯᓂᐅᔪᖅ.
2.11.2
ᓇᓪᓕᑐᐃᓐᓇᖏᒃ ᐊᖏᖃᑎᒌᑦᑑᒃ ᐱᖃᕐᓂᕋᕆᐊᖃᓐᖏᑦᑑᒃ ᐅᕝᕙᓗ ᐊᐅᓚᔾᔭᒃᑲᐃᓗᑎᒃ ᑐᓐᖓᕕᖃᕐᓗᑎᒃ ᖃᐅᔨᔭᐅᔪᓂᒃ ᓇᐅᑐᐃᓐᓇᕐᓂᒃ ᐱᕕᖃᖅᑎᑦᓯᓂᐅᔪᓂᒃ ᐊᖏᕈᑎᒥ ᓴᓐᖏᓂᖃᓐᖏᓐᓂᖏᓐᓂᒃ.
2.11.3
ᓇᓪᓕᑐᐃᓐᓇᖏᑦ ᒐᕙᒪᒃᑯᑦ ᐅᕝᕙᓗ ᓇᐅᑐᐃᓐᓇᖅ ᐃᓄᒃ ᐊᑎᓕᐅᖅᑕᐅᓯᒪᖃᑕᐅᒍᓐᓇᖅᑐᖅ ᐅᓇᒻᒥᑦᓯᓂᐊᓐᖏᑦᑐᖅ ᓴᓐᖏᓂᖃᕐᓂᖓᓂᒃ ᓇᐅᑐᐃᓐᓇᐅᑉ ᐱᕕᖃᖅᑎᑦᓯᒍᑕᐅᔫᑉ ᐊᖏᕈᑎᒥ.
ᐃᓚᖓ 12
ᐊᑑᑎᓂᖏᑦ ᒪᓕᒐᐃᑦ
2.12.1 - ᒪᓕᒐᓕᒫᑦ ᐊᑐᕐᓂᐊᖅᑐᑦ
ᑐᓐᖓᕕᒋᑦᓱᒋᑦ 2.12.2 ᐊᒻᒪᓗ 2.12.3, ᐃᓘᓐᓇᑎᒃ ᑲᓇᑕᐅᑉ ᒐᕙᒪᒃᑯᖏᑦ, ᐊᕕᑦᑐᖅᓯᒪᔪᑦ ᐊᒻᒪᓗ ᓄᓇᓕᓐᓂ ᒐᕙᒪᐃᑦ ᒪᓕᒐᖏᑦ ᐊᑑᑎᓂᐊᖅᑐᑦ ᐃᓄᓐᓄᑦ ᐃᓄᐃᓪᓗ ᓄᓇᖁᑎᖏᓐᓄᑦ.
2.12.2 - ᐊᖏᕈᑎ ᓴᓐᖏᓂᖅᐸᐅᓂᐊᖅᑐᖅ
ᑲᔪᓯᑦᓯᐊᖏᓐᓂᖅᑕᖃᖅᐸᑦ ᐊᐳᖅᓯᒪᓂᖅᑕᖃᖅᐸᓪᓘᓐᓃᑦ ᑲᓇᑕᐅᑉ ᒐᕙᒪᒃᑯᖏᓐᓂ, ᐊᕕᑦᑐᖅᓯᒪᔪᓂ ᐊᒻᒪᓗ ᓄᓇᓕᓐᓂ ᒐᕙᒪᒃᑯᑦ ᒪᓕᒐᖏᓐᓂᒃ, ᐊᖏᕈᑎᒥᓗ, ᐊᖏᕈᑎ ᓴᓐᖏᓂᖅᐹᖑᓂᐊᖅᑐᖅ ᑲᔪᓯᑦᓯᐊᓐᖏᒍᑕᐅᔪᒧᑦ ᐊᐳᖅᓯᒪᕕᒻᒧᓘᓐᓃᑦ.
2.12.3 - ᐊᖏᕈᑕᐅᓯᒪᓂᖓ ᐊᒻᒪᓗ ᐊᑐᓕᖅᑎᑕᐅᕙᓪᓕᐊᓂᖓᓄᑦ ᒪᓕᒐᑦᓴᖅ ᓈᓚᒐᐅᓂᐊᖅᐳᑦ
ᓈᖕᒪᖏᓪᓕᐅᕈᑎᖃᖅᑐᖃᖅᑲᑦ ᐅᕝᕙᓘᓐᓃᑦ ᐃᖕᒥᒨᖓᓗᐊᕐᓂᕐᒧᑦ ᐊᑲᐅᓐᖏᓪᓕᐅᕈᑎᑕᖃᖅᐸᑦ ᐊᖏᕈᑕᐅᓯᒪᓂᖓ ᐊᑐᓕᖅᑎᑕᐅᕙᓪᓕᐊᓂᖓᓗ ᒪᓕᒐᑦᓴᑦ ᐊᒻᒪᓗ ᐊᓯᓕᒫᖏᑦ ᒪᓕᒐᑦᓴᑦ, ᓈᖕᒪᖏᓪᓕᐅᕈᑕᐅᔪᖅ ᐊᒻᒪᓗ ᐊᑐᓕᖅᑎᑕᐅᕙᓪᓕᐊᓂᖓᓄᑦ ᒪᓕᒐᑦᓴᖅ ᓈᓚᒐᐅᓂᐊᖅᐳᖅ ᑎᑭᐅᑎᓯᒪᓗᓂ ᓈᖕᒪᖏᓪᓕᐅᕈᑕᐅᓂᖓᓄᑦ ᐅᕝᕙᓘᓐᓃᑦ ᐃᖕᒥᓅᖓᓗᐊᕐᓂᕐᒧᑦ ᓈᖕᒪᖏᓪᓕᐅᕈᑎᖃᕐᓂᕐᒧᑦ
2.12.4 - ᑐᑭᖏᑦ ᐊᐳᖅᓯᒪᓂᐅᑉ ᑲᔪᓯᑦᓯᐊᖏᓐᓂᐅᓪᓗ
ᑐᑭᓯᓇᕆᐊᒃᑲᓐᓂᕈᑎᒋᓗᒍ, ᐅᖃᐅᓰᑦ “ᑲᔪᓯᑦᓯᐊᖏᓐᓂᖅ” ᐊᒻᒪᓗ “ᐊᐳᖅᓯᒪᓂᖅ” ᐊᑐᖅᑕᐅᓂᖏᑦ ᒪᓕᓪᓗᒋᑦ 2.12.2 ᐊᒻᒪᓗ 2.12.3-ᒥ ᑐᑭᖃᖅᑎᑕᐅᓂᐊᖅᑐᑦ ᑕᑯᓐᓇᕐᓗᒋᑦ ᒪᓕᒐᐃᑦ ᐊᐅᓚᑦᓯᒍᑕᐅᔪᑦ ᑐᑭᖏᓐᓂ ᒪᓕᒐᐃᑦ ᐊᒻᒪᓗ ᑎᑎᖅᑲᐃᑦ ᐊᒻᒪᓗ ᑐᑭᓕᐅᕆᓂᕐᒧᑦ ᒪᓕᒐᕐᔪᐊᕐᒧᑦ.
ᐃᓚᖓ 13
ᐋᖅᑭᒋᐊᕆᓂᖅ ᐊᖏᕈᑎᒥ
2.13.1
ᐋᖅᑭᒋᐊᕈᑕᐅᔪᖅ ᐊᖏᕈᑎᒧᑦ ᐊᖏᖅᑕᐅᒋᐊᓕᒃ ᐊᖏᖃᑎᒌᑦᓯᒪᔫᓐᓄᑦ ᑕᑯᑦᓴᐅᑎᑕᐅᓗᓂ ᐃᒫᒃ,
(a)
ᑐᕌᖓᔪᓄᑦ ᑯᐃᓐᒧᑦ, ᑎᓕᓯᔾᔪᑕᐅᓗᓂ ᒥᓂᔅᑕᐅᖃᑎᒌᑦ ᑲᑎᒪᔨᖏᓐᓄᑦ, ᐊᒻᒪᓗ
(b)
ᑐᕌᖓᔪᓄᑦ ᐃᓄᓐᓄᑦ, ᐱᖁᔨᕗᖔᕈᑎᖃᕐᓗᑎᒃ ᑐᓐᖓᕕᒃᑯᑦ, ᐋᒡᒐᐅᒐᓗᐊᖅ ᐱᕕᖃᖅᑎᑕᐅᓂᒃᑯᑦ ᒪᓕᒐᕋᓛᖅᑎᒍᑦ ᐅᕝᕙᓗ ᑐᓐᖓᕕᒋᓗᒍ 35.9.1,
ᑭᓯᐊᓂ ᑎᒍᒥᐊᖅᑕᖏᑦ ᒪᓕᒐᓕᐅᕐᕕᐅᑉ ᐊᓯᔾᔨᖅᑕᐅᔾᔮᖏᑦᑐᑦ, ᐊᕕᑦᑐᑦᓯᒪᔪᓂᓗ ᒐᕙᒪᒃᑯᑦ ᑮᓇᐅᔭᑎᒍᑦ ᐊᑭᓖᒋᐊᖃᑦᑎᑕᐅᒋᐊᖃᓐᖏᑦᑐᑦ, ᓇᐅᒃᑯᑐᐃᓐᓇᖅ ᐋᖅᑭᒋᐊᕈᑕᐅᔪᒃᑯᑦ ᑎᑎᖅᑲᑎᒍᑦ ᐊᖏᖅᓯᒪᔪᖃᖅᑎᓐᓇ
ᐃᓚᖓ 14
ᐃᖅᑲᖅᑐᐃᕕᒃᑰᖅᑎᑦᓯᓂᖏᑦ ᐃᓄᐃᑦ
2.14.1
ᐃᓄᒻᒥᒃ ᐱᔪᓐᓇᐅᑎᖃᖅᑐᖃᖅᐸᑦ ᐊᐅᓚᔾᔭᒋᐊᕐᓂᕐᒧᑦ ᐊᑦᑐᐊᔪᓄᑦ ᐊᖏᕈᑎᒧᑦ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᐅᓚᔾᔭᒋᐊᕈᑎᖃᕈᓐᓇᖅᑐᑦ ᑭᒡᒐᖅᑐᐃᓗᑎᒃ ᐃᓄᒻᒥᒃ. ᐅᓇ ᑎᑎᕋᖅᓯᒪᔪᖅ ᐃᓚᐃᓐᓈᕈᑕᐅᔾᔮᖏᑦᑐᖅ ᐃᓄᒻᒥᒃ ᐊᐅᓚᔾᔭᒋᐊᕈᑎᖃᕈᒪᑎᓪᓗᒍ ᓇᒻᒥᓂᖅ
ᐃᓚᖓ 15
ᓇᓪᓕᐅᒃᑯᒫᖃᕐᓂᖅ
2.15.1
ᐃᓱᒪᒋᔭᐅᑎᓪᓗᒋᑦ ᐱᔪᓐᓇᐅᑏᑦ ᐱᕚᓪᓕᕈᑎᑦᓴᐃᓪᓗ ᐊᑐᐃᓐᓇᐅᑎᑕᐅᔪᑦ ᐊᖏᕈᑎᒃᑯᑦ, ᓄᓇᕗᒻᒥ ᑮᓇᐅᔭᓂ ᐸᐸᑦᓯᔩᑦ ᐊᒻᒪᓗ ᓇᒻᒥᓂᖃᖃᑕᐅᔪᑦ ᓇᓪᓕᐅᒃᑯᒫᖃᖅᑎᑦᓯᓂᐊᖅᐳᑦ ᓴᐳᔾᔨᓯᒪᓂᐊᖅᐳᓪᓗ ᑯᐃᓐᒥᒃ ᑲᓇᑕᐅᑉ ᒐᕙᒪᒃᑯᖏᑦᑎᒍᑦ ᐃᓘᓐᓇᖏᓐᓂᒃ ᐃᖅᑲᖅᑐᐃᕕᒃᑰᑎᑦᓯᒍᑕᐅᔪᓂᒃ, ᐃᖅᑲᖅᑐᐃᕕᒃᑯᓪᓗ ᐊᑭᓖᑎᑦᓯᒐᓱᐊᕐᓃᑦ, ᑭᓇᒃᑯᓕᒫᑦ ᓂᕈᐊᓚᐅᖅᑎᓪᓗᒋᑦ ᓄᓇᑖᕈᒪᓪᓗᑎ. ᐸᓯᔭᑦᓴᕈᖅᑎᑦᓯᓂᐊᓐᖏᓚᓪᓗ, ᑐᑦᓯᕋᐅᑎᖃᔾᔮᒐᑎᓪᓗ, ᓱᕋᐃᔾᔮᒐᑎ, ᐊᑭᓕᕋᑦᓴᓕᐅᔾᔮᒐᑎ, ᑮᓇᐅᔭᖅᑑᑎᓕᐅᔾᔮᒐᑎᒃ, ᐊᑭᓕᑦᓴᐅᑐᐃᓐᓇᕆᐊᓕᓐᓂ ᐱᒋᐊᖅᑎᑕᐅᔪᑦ, ᐋᖅᑭᑦᑕᐅᔪᑦ ᓴᖅᑭᖅᑕᐅᔪᓪᓘᓐᓃᑦ ᐊᖏᕈᑎᖃᓕᖅᑎᓪᓗᒍ, ᐱᔮᕆᔭᐅᓪᓗᑎᒃ ᐱᔮᖅᑯᑕᐅᓐᖏᑦᑐᒥᓪᓘᓐᓃᑦ ᓵᓐᖓᓕᕈᑕᐅᓗᑎᒃ ᑯᐃᓐᒥᒃ ᑲᓇᑕᐅᑉ ᑭᒡᒐᖅᑐᖅᑎᖓᓂᒃ ᑭᓇᑐᐃᓐᓇᕐᒧᑦ ᐊᖏᕈᒻᒥ ᐊᑎᖃᖃᑕᐅᒍᓐᓇᖅᑐᖅ, ᐱᖃᓯᐅᑎᑦᓱᑎᒃ ᕿᑐᕐᖓᕆᔭᐅᔪᑦ, ᑭᖑᕚᕆᔭᐅᔪᓪᓘᓐᓃᑦ ᐱᔪᓐᓇᕐᓂᑖᖅᑎᑕᐅᓯᒪᔪᕐᓘᓐᓃᑦ ᐊᒻᒪᓗ ᑎᓕᔭᐅᓯᒪᔪᖅ ᒫᓐᓇᒃᑯᑦ ᓯᕗᓂᑦᓴᒥᓘᓐᓃᑦ, ᑯᐃᓐᒥᒃ ᑭᒡᒐᖅᑐᖅᑎᖓᓂᒃ ᑲᓇᑕᐅᑉ, ᐊᑦᑐᐊᔪᓄᑦ ᐅᕝᕙᓗ ᖃᓄᑐᐃᓐᓇᖅ ᐱᓯᒪᔪᓂᒃ ᓄᓇᖃᖅᑳᖅᓯᒪᔪᑦ ᐱᖃᕐᓂᕋᕐᓂᖏᓐᓂᒃ, ᐱᔪᓐᓇᐅᑎᖏᓐᓂᒃ, ᑎᒍᒥᐊᖅᑕᖏᓐᓂᒃ ᐱᔪᒪᔭᕆᔭᐅᔪᓂᒃ ᓄᓇᓂ ᐃᒪᕐᓂᓪᓗ ᓇᓗᓇᐃᖅᑕᐅᓯᒪᔪᓂ 2.7.1(a).
2.15.2
ᑯᐃᓐ ᑭᒡᒐᖅᑐᖅᑎᖓ ᑲᓇᑕᐅᑉ ᐱᕕᓕᒫᕐᒥᒍᑦ ᓴᐳᔾᔨᓂᐊᖅᑐ ᐃᖅᑲᖅᑐᐃᔾᔪᑕᐅᔪᒥ ᐊᐅᓚᔾᔭᒋᐊᕈᑕᐅᔪᒥᓪᓘᓐᓃᑦ, ᐱᖃᕐᓂᕋᕐᓂᕐᒥᒃ ᐊᔪᐃᓐᓇᕐᓂᕐᒥᓘᓐᓃᑦ ᐅᖃᐅᓯᐅᔪᒥᒃ 2.15.1-ᒥ ᐋᖅᑭᒋᐊᕆᒋᐊᖃᕋᑎᓪᓗ ᐋᖅᑮᓗᑎᓪᓘᓐᓃᑦ ᐃᖅᑲᖅᑐᐃᓂᐅᔪᒥ ᐊᐅᓚᔾᔭᒋᐊᕐᓂᐅᔪᓂᓪᓘᓐᓃᑦ, ᐊᐅᓚᔾᔭᒍᑕᐅᔪᓂ, ᐱᖃᕐᓂᕋᕐᓂᐅᔪᓂᒃ ᐊᔪᐃᓐᓇᕐᓂᐅᔪᓂᓪᓘᓐᓃᑦ ᐊᖏᖅᑕᐅᓯᒪᑎᓐᓇᒍ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.
2.15.3
2.15.4
ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐱᔪᓐᓇᐅᑎᒋᔭᐅᔪᖅ ᓇᓪᓕᐅᒃᑯᒫᖃᕈᓐᓇᖅᑎᑕᐅᓂᕐᒧᑦ ᓇᓗᓇᐃᖅᑕᐅᔪᓄᑦ 2.15.1-ᒥ ᐊᑐᕆᐊᖃᓐᖏᑦᑐᖅ ᐃᖅᑲᖅᑐᖅᑕᐅᒃᑲᐃᓐᓂᐅᑉ ᐊᐅᓚᔾᔭᒋᐊᕐᓂᐅᔫᓪᓘᓐᓃᑦ, ᐊᐅᓚᔾᔭᒋᐊᕈᑕᐅᔪᓂ, ᐱᖃᕐᓂᕋᕐᓂᐅᔪᓂᒃ, ᐊᔪᐃᓐᓇᕐᓂᐅᔪᓂᒃ, ᓱᕋᑦᑎᕆᓂᕐᒥᒃ, ᐊᑭᒋᔭᐅᔪᓂᒃ ᐊᑭᓕᕆᐊᓕᓐᓂᓘᓐᓃᑦ, ᐊᑭᓖᑎᑕᐅᓂᖅ ᐊᑭᓕᖅᑕᐅᓂᕐᓘᓐᓃᑦ ᐊᑦᑐᐊᔪᓄᑦ ᖃᓄᑐᐃᓐᓇᑦᓯᐊᖅ ᐱᓯᒪᔪᓄᑦ ᑲᔪᓯᑦᓯᐊᖏᓐᓂᖓᓄᑦ ᑯᐃᓐ ᑭᒡᒐᖅᑐᐃᔨᖓᑕ ᑲᓇᑕᐅᑉ ᑲᔪᓯᑎᑦᓯᑎᓪᓗᒍ ᑲᒪᒋᔭᕆᐊᓕᒻᒥᓂᒃ ᐊᑖᓂ ᐊᖏᕈᑎᐅᑉ.
2.15.5
ᑯᐃᓐ ᑭᒡᒐᖅᑐᐃᔨ ᑲᓇᑕᒧᑦ ᓇᓪᓕᐅᒃᑯᒫᖃᖅᑎᑦᓯᓂᐊᖅᐳᖅ ᓴᐳᔾᔨᓯᒪᓂᐊᖅᐳᕐᓗ ᐃᓄᓐᓂᒃ ᐃᓘᓐᓇᖏᓐᓂᒃ ᐃᖅᑲᖅᑐᐃᔨᒃᑰᕈᑎᓕᐊᓄᑦ, ᐃᖅᑲᖅᑐᐃᔨᑎᒍᓪᓗ ᐊᑭᓖᑎᑦᓯᒐᓱᐊᕐᓃᑦ, ᐸᓯᔭᑦᓴᓐᖑᖅᑎᑦᓯᓂᐊᓐᖏᓚᕐᓗ, ᑐᑦᓯᕋᐅᑎᖃᕐᓂᐊᖏᓚᓪᓗ, ᓱᕋᑦᑎᕆᓂᐊᕋᓂᓗ, ᐊᑭᒋᔭᐅᔪᓂᒃ ᐊᑭᓕᕆᐊᓕᓐᓂᓘᓐᓃᑦ, ᐊᑭᓖᑎᑕᐅᓂᖅ ᐊᑭᓕᖅᑕᐅᓂᕐᓘᓐᓃᑦ, ᐊᐅᓚᔾᔭᒋᐊᖅᑕᐅᔪᑦ, ᐊᑭᕋᖅᑑᑕᐅᓗᑎᒃ ᐃᓄᓐᓄᑦ ᑭᓇᑐᐃᓐᓇᕐᒧᑦ ᐃᓄᒻᒧᑦ ᓇᓗᓇᐃᖅᑕᐅᓯᒪᔪᓂᓪᓘᓐᓃᑦ ᐃᓄᓐᓄᑦ ᑎᒥᖁᑕᐅᔪᓂᒃ ᐅᑯᓇᖓᑦ ᐱᔪᓂᒃ:
(a)
ᓴᖅᑭᖅᑕᐅᓂᖓᓂ ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᑦᑕ ᐃᓛᒃᑯᑦ 5-ᒥ ᑕᐃᑲᓂ ᐃᑲᖅᑐᖅᑕᐅᒃᑲᐃᓂ, ᐊᐅᓚᔾᔭᒋᐊᕈᑎᖃᕐᓂᖅ, ᐱᖃᕐᓂᕋᕐᓂᖅ, ᐊᔪᐃᓐᓇᕐᓂᖅ, ᓱᕋᑦᑎᕆᓂᖅ, ᐊᑭᒋᔭᐅᔪᓂᒃ ᐊᑭᓕᕆᐊᓕᓐᓂᓘᓐᓃᑦ, ᐊᑭᓖᑎᑕᐅᓂᖅ ᐊᑭᓕᖅᑕᐅᓂᕐᓘᓐᓃᑦ ᐊᑦᑐᐊᔪᓄᑦ ᓴᖅᑭᖅᑕᐅᓂᖏᓐᓄᑦ ᑖᒃᑯᐊ ᐱᔪᓐᓇᐅᑏᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑏᑦ ᐃᓄᒻᒧᑦ ᐊᐅᓚᔾᔭᒋᐊᖅᑕᐅᔪᑦ, ᓴᓇᔭᐅᔪᑦ ᐊᑑᑎᔪᓪᓘᓐᓃᑦ; ᐅᕝᕙ
(b)
ᑎᒍᒥᐊᖅᑕᐅᓂᖏᑦ ᐃᓄᐃᑦ ᓄᓇᖁᑎᖏᑦᑕ ᐃᓛᒃᑯᑦ 19-ᒥ ᐃᖅᑲᖅᑐᖅᑕᐅᒃᑲᐃᓂ, ᐊᐅᓚᔾᔭᒋᐊᕈᑎᖃᕐᓂᖅ, ᐱᖃᕐᓂᕋᕐᓂᖅ, ᐊᔪᐃᓐᓇᕐᓂᖅ, ᓱᕋᑦᑎᕆᓂᖅ, ᐊᑭᖓᓂᒃ ᐊᑭᓕᕆᐊᓕᒻᒥᓘᓐᓃᑦ ᐊᑦᑐᐊᔪᓄᑦ ᐊᐅᓚᓂᖓᓄᑦ ᑎᒍᒥᐊᖅᑕᐅᓂᖓᑕ ᐱᔪᓐᓇᐅᑎᖓᑕ ᐃᓅᑉ ᐊᐅᓚᔾᔭᒋᐊᖅᑑᑉ, ᓴᓇᔫᑉ, ᐊᑑᑎᔫᓪᓘᓐᓃᑦ ᐊᑦᑐᐊᔪᓄᑦ ᑕᐃᑯᓐᓄᖓ ᓄᓇᓄᑦ.
2.15.6
ᐃᓄᐃᑦ ᓇᓗᓇᐃᖅᑕᐅᓯᒪᔪᓪᓗ ᐃᓄᓐᓄᑦ ᑎᒥᖁᑕᐅᔪᑦ ᐱᕕᓕᒫᕐᒥᒍᑦ ᓴᐳᔾᔨᓂᐊᖅᑐ ᐃᖅᑲᖅᑐᐃᔾᔪᑕᐅᔪᒥ ᐊᐅᓚᔾᔭᒋᐊᕈᑕᐅᔪᒥᓪᓘᓐᓃᑦ, ᐱᖃᕐᓂᕋᕐᓂᕐᒥᒃ ᐊᔪᐃᓐᓇᕐᓂᕐᒥᓘᓐᓃᑦ ᐅᖃᐅᓯᐅᔪᒥᒃ 2.15.1-ᒥ ᐋᖅᑭᒋᐊᕆᒋᐊᖃᕋᑎᓪᓗ ᐋᖅᑮᓗᑎᓪᓘᓐᓃᑦ ᐃᖅᑲᖅᑐᐃᓂᐅᔪᒥ ᐊᐅᓚᔾᔭᒋᐊᕐᓂᐅᔪᓂᓪᓘᓐᓃᑦ, ᐊᐅᓚᔾᔭᒍᑕᐅᔪᓂ, ᐱᖃᕐᓂᕋᕐᓂᐅᔪᓂᒃ ᐊᔪᐃᓐᓇᕐᓂᐅᔪᓂᓪᓘᓐᓃᑦ ᐊᖏᖅᑕᐅᓯᒪᑎᓐᓇᒍ ᒐᕙᒪᒃᑯᓐᓄᑦ.
ᐃᓚᖓ 16
ᑐᓴᖅᑎᑦᓯᓂᖅ
2.16.1
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐱᕕᖃᖅᑎᑦᓯᓂᐅᔪᑦ ᐊᖏᕈᑎᒥ, ᐋᒡᒐᐅᒐᓗᐊᖅ 21.7.6-ᒥ, ᒐᕙᒪᒃᑯᑦ ᑐᓴᖅᑎᑦᓯᒋᐊᑐᓐᖏᑦᑐᑦ ᑐᓴᕋᑦᓴᓂᒃ ᐱᔭᐅᒋᐊᓕᓐᓂᒃ ᐅᕝᕙᓗ ᑐᓴᖅᑎᑦᓯᑦᑕᐃᓕᒍᓐᓇᖅᓱᑎᒃ ᓇᐅᑐᐃᓐᓇᕐᒥᒃ ᐱᖁᔭᕐᒥᒃ ᐊᑦᑐᐊᔪᒥᒃ ᐊᑐᐃᓐᓇᖃᕐᓂᕐᒧᑦ ᐃᒻᒥᓅᖓᔪᓄᓪᓗ ᑐᓴᕋᑦᓴᓄᑦ. ᒐᕙᒪᒃᑯᑦ ᐃᓱᒪᖅᓲᑎᖃᖅᐸᑕ ᑐᓴᖅᑎᑦᓯᓂᕐᒥᒃ, ᑕᑯᓐᓇᖃᓯᐅᑎᓂᐊᖅᑐᑦ ᐃᓗᓕᖏᓐᓂᒃ ᐊᖏᕈᑎᐅᑉ ᐃᓱᒪᑦᓴᖅᓯᐅᕈᑎᖃᓕᕈᑎᒃ.
ᐃᓚᖓ 17
ᐃᓄᐃᑦ ᓄᓇᖁᑎᖏᑦ
2.17.1
ᐃᓄᐃᑦ ᓄᓇᖁᑎᖏᑦ ᑕᑯᓐᓇᖅᑕᐅᔾᔮᖏᑦᑐᑦ ᓄᓇᐃᑦ ᖁᒥᐅᑕᐅᓯᒪᒋᐊᖏᑦ ᐊᓪᓚᓄᑦ ᐃᓗᐊᓂ ᑐᑭᖏᑦᑕ ᑐᓐᖓᕕᔾᔪᐊᖅ ᒪᓕᒐᕐᓄᑦ, 1867.
