ᐃᓛᒃᑯᑦ 21

ᐃᓚᖓ 1

ᑐᑭᖏᑦ

21.1.1

ᐅᕙᓂ ᐃᓛᒃᑰᖅᑐᒥ:

"ᓯᔾᔭ" ᑐᑭᓕᒃ ᐊᑯᕐᖓᓐᓃᑦᑐᖅ ᓄᓇ ᓯᓈᖓᑕ ᐃᒪᐅᑉ ᐊᒻᒪᓗ ᐅᓕᓐᓂᐅᒐᔪᑦᑑᑉ;

“ᐅᒥᐊᖅᑐᕈᓐᓇᕐᓂᖅ” ᑐᑭᓕᒃ ᐅᒥᐊᖅᑐᕈᓐᓇᕐᓂᖅ ᐅᒥᐊᒃᑯᑦ ᐊᓯᐊᒍᓪᓘᓐᓃᑦ ᐃᖏᕐᕋᔾᔪᑎᒃᑯᑦ ᑮᓇᐅᔭᓕᐅᕋᓱᐊᕐᓂᖅ ᐅᕝᕙᓗ ᑮᓇᐅᔭᓕᐅᕋᓱᐊᕐᓂᕐᒨᖓᓐᖏᑦᑐᖅ ᐱᔾᔪᑕᐅᓗᓂ;

"ᕐᑳᖓᓄᑦ ᐱᔪᓐᓇᐅᑏᑦ" ᑐᑭᓕᒃ, ᐱᔾᔪᑕᐅᓪᓗᓂ ᑎᑎᕋᖅᖅᓯᒪᔪᖅ 21.7.11,

(a)

ᐱᔪᓐᓇᐅᑏᑦ ᐊᑦᑐᐊᓂᓖᑦ ᓄᓇᒧᑦ ᐊᓯᐊᓄᑦ ᐱᔪᒪᓂᖃᕐᓂᐅᑉ ᐅᔭᕋᑦᓯᐊᕙᓐᓂᒃ, ᐅᕝᕙᓗ,

(b)

ᐱᔪᓐᓇᐅᑏᑦ ᐊᑦᑐᐊᔪᑦ ᓇᓗᓇᐃᖅᑕᐅᓯᒪᔪᓄᑦ;

"ᑕᖅᑳᓐᖓᑦ ᐱᔪᒪᔭᕆᔭᐅᔪᖅ" ᑐᑭᓕᒃ, ᐱᔾᔪᑕᐅᓪᓗᑎᒃ ᑎᑎᕋᖅᓯᒪᔪᑦ 21.7.1 ᑎᑭᑦᓱᒍ 21.7.6, ᐱᔪᓐᓇᐅᑎᐅᑎᑕᐅᔪᖅ ᐊᑖᓂ ᐊᕕᑦᑐᖅᓯᒪᔪᓂ ᓄᓇᓄᑦ ᒪᓕᒐᕐᔪᐊᑉ ᐅᕝᕙᓗ ᑭᓇᒃᑯᑐᐃᓐᓇᕐᓄᑦ ᓄᓇᑖᖅᑎᑦᓯᓂᕐᒧᑦ ᒪᓕᒐᕐᔪᐊᑉ ᐊᑑᑎᔭᐅᒍᓐᓇᖅᑑᑉ ᐊᑭᕋᖅᑐᖅᑕᐅᓗᑎᒃ ᒐᕙᒪᒃᑯᑦ, ᑭᓯᐊᓂ ᐱᖃᓯᐅᔾᔨᖏᑦᑐᖅ ᕿᓂᕐᓂᕐᒧᑦ ᓚᐃᓴᓇᓯᒥᒃ ᐊᑦᑐᐊᔪᒥᒃ ᐃᓄᐃᑦ ᓄᓇᖁᑎᖏᓐᓄᑦ ᑎᒍᒥᐊᖅᑕᐅᔪᓄᑦ ᐅᖃᐅᓯᐅᓯᒪᔪᑎᒍᑦ ᑎᑎᕋᖅᓯᒪᔪᒥ 19.2.1 (a). ᑐᑭᓯᓇᖅᑎᒋᐊᒃᑲᓐᓂᕐᓗᒍ, “ᑕᖅᑳᓐᖓᑦ ᐱᔪᒪᔭᕆᔭᐅᔪᖅ” ᐱᖃᓯᐅᔾᔨᔪᖅ ᓄᓇᒥᒃ ᐊᑐᕐᓂᒧᕐᑦ ᐱᔪᓐᓇᐅᑎᒥᒃ ᐊᒻᒪᓗ ᐅᔭᕋᓐᓂᐊᕈᓐᓇᐅᑎᒥᒃ;

ᐊᑐᕐᓂᒃ ᐃᒪᕐᒥᒃ ᐱᖃᓯᐅᔾᔨᔪᖅ ᐃᒪᕐᒥᒃ ᐆᒻᒪᖅᑯᑎᖃᕐᓂᕐᒥᒃ.

ᐃᓚᖓ 2

ᐊᑐᐃᓐᓇᖃᕈᓐᓇᕐᓂᖅ ᑭᓯᐊᓂ ᐊᖏᖅᑕᐅᓂᒃᑯᑦ

21.2.1

ᐋᒡᒐᐅᒐᓗᐊᖅ ᐱᕕᖃᖅᑎᑕᐅᓂᖏᑦᑎᒍᑦ ᐊᖏᕈᑎᒥ ᐃᓄᐃᑦ ᐊᓯᖏᓐᓂ ᐃᓄᑐᐃᓐᓇᐃᑦ ᐃᑎᕆᐊᖃᓐᖏᑦᑐᑦ, ᐃᑳᕆᐊᖃᕋᑎᒃ ᓇᔫᑎᒋᐊᖃᕋᑎᓪᓗ ᐃᓄᐃᑦ ᓄᓇᖁᑎᖏᓐᓂ ᐊᖏᖅᑕᐅᖅᑳᖅᓯᒪᓐᖏᓪᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.

ᐃᓚᖓ 3

ᑭᓇᒃᑯᑐᐃᓐᓇᕐᓄᑦ ᐊᑐᖅᑕᐅᓂᖅ

21.3.1

ᑭᓇᒃᑯᑐᐃᓐᓇᐃᑦ ᐊᑐᕈᓐᓇᕆᐊᓖᑦ ᐱᔾᔪᑕᐅᓗᓂ ᐃᖏᕐᕋᓂᖅ ᐃᒪᒃᑯᑦ, ᐱᖃᓯᐅᑎᑦᓱᓂ ᐃᖏᕐᕋᓂᖅ ᐊᑦᑐᐊᔪᖅ ᐱᕙᓪᓕᐊᑎᑕᐅᓂᕐᒧᑦ ᐊᐅᓚᓂᐅᔪᓄᑦ ᐊᑐᕐᓗᑎᒃ ᐊᖅᑯᒻᒥᒃ ᐃᖏᕐᕋᒍᑕᐅᓗᓂ ᐃᒪᒃᑯᑦ, ᐊᒻᒪᓗ 100-ᓂᒃ ᐃᑎᒐᓂᒃ ᑕᑭᓂᓪᓗᐊᓕᒥᒃ (ᒥᑦᓵᓃᑦᑐᑦ 30.5 ᒦᑕᐃᑦ) ᒥᑦᑕᕐᕕᒃ ᐃᓄᐃᑦ ᓄᓇᖁᑎᖏᓐᓂ ᑕᕆᐅᑉ ᓯᓈᓃᓪᓗᓂ, ᐃᖏᕐᕋᕕᑦᓴᐃᑦ ᑰᑦ, ᐃᖏᕐᕋᕕᑦᓴᐃᑦ ᑕᓰᑦ ᐃᑎᖅᑕᐅᒍᓐᓇᖅᑐᑦ ᑰᑦ ᐹᖏᑦᑎᒍᑦ. ᒥᕝᕕᐅᔪᖅ ᐆᑦᑐᖅᑕᐅᓯᒪᓂᐊᖅᑐᑦ ᐱᒋᐊᕐᓗᓂ ᐅᓕᓐᓂᕐᒥᒃ ᑕᕆᐅᑉ ᓯᓈᖓᓂᒃ ᐊᒻᒪᓗ ᐃᖏᕐᕋᕕᑦᓴᐅᔪᓂᒃ ᑰᓐᓂᒃ, ᑕᓯᕐᓂᒃ ᐃᒪᕐᒥᓐᓗ. ᐊᑐᖅᑕᐅᒍᓐᓇᕐᓂᖏᓐᓄᑦ ᐃᓚᒋᔭᐅᔪᖅ ᐱᔪᓐᓇᐅᑎᓄᑦ ᑎᓂᓐᓂᕐᒥᒃ ᐊᑐᕈᓐᓇᕐᓂᖅ ᐊᑦᑐᐊᔪᒥᒃ ᑕᕝᕗᖓ ᒥᕝᕕᒻᒧᑦ ᑕᐃᔭᐅᔪᒧᑦ.

173

21.3.2

ᑭᓇᑐᐃᓐᓇᖅ ᑕᖅᑳᓐᖔᖅᑐᖅ ᐱᔪᓐᓇᐅᑎᒥᓂᒃ ᐊᑐᖅᑐᖅ ᐅᖃᐅᓯᐅᔪᒥᒃ ᑎᑎᕋᖅᓯᒪᔪᒥ 21.3.1 ᐊᖑᓇᓱᒍᓐᓇᖅᑐᖅ ᐆᒪᔪᕐᓂᒃ ᐊᓯᖏᓐᓂᒃ ᑮᓇᐅᔭᓕᐅᕋᓱᐊᕐᓂᐅᑉ ᐱᔾᔪᑎᖃᕐᓗᓂ, ᑭᓯᐊᓂ ᑐᓐᖓᕕᖃᐃᓐᓇᕆᐊᓕᒃ ᒪᓕᒐᖏᓐᓂᒃ ᐃᓘᓐᓇᐃᓐᓄᑦ ᐊᑑᑎᔪᑦ ᐊᒻᒪᓗ ᐃᓛᒃᑰᖅᑐᖅ 5.

21.3.3

ᑭᓇᑐᐃᓐᓇᖅ ᑕᖅᑳᓐᖔᖅᑐᖅ ᐊᖑᓇᓱᒍᓐᓇᖅᑐᖅ ᐆᒪᔪᕐᓂᒃ ᐃᒪᕐᒦᑦᑐᓂᒃ ᐅᖃᐅᓯᐅᔪᓂᒃ ᑎᑎᕋᖅᓯᒪᔪᒥ 21.3.1, ᑭᓯᐊᓂ ᑐᓐᖓᕕᖃᐃᓐᓇᕆᐊᓕᒃ ᒪᓕᒐᖏᓐᓂᒃ ᐃᓘᓐᓇᐃᓐᓄᑦ ᐊᑑᑎᔪᑦ ᐊᒻᒪᓗ ᐃᓛᒃᑰᖅᑐᖅ 5.

21.3.4

ᑭᓇᑐᐃᓐᓇᖅ ᐃᒪᐃᒋᐊᖃᓐᖏᓚᖅ

(a)

ᓇᐅᑐᐃᓐᓇᖅ ᐃᓄᒃ ᐊᑑᑎᔪᖅ ᐱᔪᓐᓇᕐᓂᕐᒥᒃ ᐅᖃᐅᓯᐅᔪᒥᒃ ᑎᑎᕋᖅᓯᒪᔪᒥ 21.3.1; ᐅᕝᕙᓗ

(b)

ᐊᖑᓇᓱᑦᑐᖅ ᐆᒪᔪᕐᓂᒃ ᑐᓐᖓᕕᖃᖅᓱᓂ ᑎᑎᕋᖅᓯᒪᔪᒥᒃ 21.3.2.

ᐃᓚᒋᔭᐅᒍᓐᓇᖅᑐᖅ ᐱᕙᓪᓕᐊᓂᕐᒧᑦ ᐊᐅᓚᓂᐅᔪᒧᑦ, ᓴᖅᑮᓗᓂᓘᓐᓃᑦ ᓄᓇᓕᓐᓂᒃ ᓇᐸᔪᓂᓪᓘᓐᓃᑦ ᐊᓯᖏᓐᓂᒃ ᐊᑐᑲᐃᓐᓇᑐᐃᓐᓇᖓᔪᑦ, ᑕᐃᔭᐅᔪᒥ ᒥᕝᕕᒻᒥ.

21.3.5

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔭᕆᐊᖃᖅᐸᑕ ᑎᒍᒥᐊᓪᓗᐊᑕᕐᓂᕐᒥᒃ, ᐱᔪᓐᓇᕐᓂᖅ ᐊᑐᕈᓐᓇᕐᓂᕐᒧᑦ ᐅᖃᐅᓯᐅᔪᖅ ᑎᑎᕋᖅᓯᒪᔪᒥ 21.3.1, ᐱᔪᓐᓇᕐᓂᖅ ᐊᖑᓇᓱᒍᓐᓇᕐᓂᕐᒧᑦ ᐅᖃᐅᓯᐅᔪᖅ ᑎᑎᕋᖅᓯᒪᔪᒥ 21.3.2, ᐊᒻᒪᓗ ᐱᔪᓐᓇᕐᓂᖅ ᐃᑳᕈᓐᓇᕐᓂᕐᒧᑦ ᐃᓄᐃᑦ ᓄᓇᖁᑎᖏᑦᑎᒍᑦ ᐅᖃᐅᓯᐅᔪᖅ ᑎᑎᕋᖅᓯᒪᔪᒥ 21.3.9 ᐲᖅᑕᐅᒍᓐᓇᖅᑐᖅ ᐲᖅᑕᐅᒍᓐᓇᖅᑐᖅ ᐊᖏᖃᑎᒌᒍᑕᐅᑎᓪᓗᒍ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᒐᕙᒪᒃᑯᓄᓪᓗ.

21.3.6

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᒐᕙᒪᒃᑯᓪᓗ ᐊᖏᖃᑎᒌᑉᐸᑎᒃ, ᐊᖑᓇᓱᒍᓐᓇᕐᓂᖅ ᐅᖃᐅᓯᐅᔪᖅ 21.3.3-ᒥ ᐲᖅᑕᐅᒍᓐᓇᖅᑐᖅ.

21.3.7

ᐱᖁᔭᓕᐅᖅᑎᕐᔪᐊᖅ, ᒪᓕᒐᓕᐅᖅᑎ, ᐅᕝᕙᓗ ᑭᓇᑐᐃᓐᓇᖅ ᓄᓇᓕᓐᓂ ᑲᑎᒪᔨᓄᑦ ᐅᕝᕙᓗ ᐊᕕᑦᑐᖅᓯᒪᔪᓂ ᒐᕙᒪᓄᑦ, ᓂᕈᐊᕋᑦᓴᕐᓘᓐᓃᑦ ᓂᕈᐊᕐᓇᐅᓕᖅᐸᑦ ᓇᓪᓕᑐᐃᓐᓇᖏᓐᓄᑦ ᑎᒥᐅᔪᑦ, ᐅᕝᕙᓘᓐᓃᑦ ᐃᓄᒃ ᐊᐃᑉᐸᖃᖅᑐᖅ ᐃᑲᔪᖅᑐᕐᓘᓐᓃᑦ ᑲᑎᒪᔨᒥᒃ ᓂᕈᐊᕋᑦᓴᒥᓪᓘᓐᓃᑦ, ᐃᑎᕈᓐᓇᖅᑐᖅ ᐃᓄᐃᑦ ᓄᓇᖁᑎᖏᓐᓄᑦ ᐱᔾᔪᑕᐅᓪᓗᓂ ᓂᕈᐊᕋᑦᓴᐅᓂᖅ ᓂᕈᐊᕐᓂᐅᓂᐊᖅᑐᒧᑦ.

21.3.8

ᑭᓇᑐᐃᓐᓇᖅ ᑕᖅᑳᓐᖔᖅᑐᖅ ᐃᑎᕈᓐᓇᖅᑐᖅ ᓇᔫᑎᓗᓂᓗ ᐃᓄᐃᑦ ᓄᓇᖁᑎᖏᓐᓂ ᑐᐊᕕᕐᓇᖅᑐᖅ ᐱᔾᔪᑎᒋᓪᓗᒍ.

21.3.9

ᑭᓇᒃᑯᑐᐃᓐᓇᐃᑦ ᑕᖅᑳᓐᖔᖅᑐᑦ ᐃᑳᕈᓐᓇᖅᑐᑦ ᐃᓄᐃᑦ ᓄᓇᖁᑎᖏᓐᓂᒃ ᐃᒻᒥᓂᒃ ᐱᔾᔪᑎᒋᓪᓗᓂ ᐃᖏᕐᕋᑐᐃᓐᓇᕈᓂᓘᓐᓃᑦ, ᓲᕐᓗ ᐃᖅᑲᓇᐃᔭᕐᕕᒻᒥᓅᖅᐸᓪᓕᐊᓗᓂ ᐅᑎᒧᓪᓗ ᐅᕝᕙᓗ ᖃᓄᐃᓕᐅᕆᐊᖅᑐᕐᕕᒋᓯᒪᔭᒥᓂᒃ. ᐊᔪᕐᓇᓐᖏᑐᐊᕋᐃᑉᐸᑦ, ᐃᑳᕐᓂᐅᔪᑦ ᐊᑑᑎᕙᓐᓂᐊᖅᑐᑦ ᐊᖅᑯᑎᑎᒍᑦ ᓇᓗᓇᐃᖅᑕᐅᓯᒪᔪᑎᒍᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ. ᐃᑳᕈᓐᓇᕐᓂᖅ ᐱᖃᓯᐅᔾᔨᓂᐊᖅᑐᖅ ᓄᖅᑲᑲᐃᓐᓇᕆᐊᖃᕈᑎᒃ ᓄᖅᑲᑲᐃᓐᓇᖃᑦᑕᕐᓂᕐᒥᒃ.

21.3.10

ᑭᓇᒃᑯᑐᐃᓐᓇᕐᓄᑦ ᐃᑎᖅᑕᐅᒍᓐᓇᖅᑐᖃᕐᓂᐊᖅᑐᖅ, ᓇᓗᓇᐃᔭᖅᑕᐅᓯᒪᓂᖓ ᒪᓕᓪᓗᒍ ᐃᓚᒍᑕᖅ 21-1, ᐃᓄᐃᑦ ᓄᓇᖁᑎᖏᓐᓂᒃ ᓇᓗᓇᐃᖅᑕᐅᓯᒪᔪᓂ ᑕᐃᑲᓂ ᐃᓚᒍᑕᕐᒥ.

21.3.11

ᐊᖏᑐᐊᖅᐸᑕ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᐃᓄᐃᑦ ᖃᐅᔨᓴᖅᑐᑦ ᑭᓇᒃᑯᑐᐃᓐᓇᕐᓄᑦ ᑐᓴᕋᑦᓴᓂᒃ ᐃᒪᐃᓐᓂᐊᖅᑐᑦ:

(a)

ᑕᐃᒫᑦᓴᐃᓐᓇᖅ ᐱᔪᓐᓇᕐᓂᖃᕐᓗᑎᒃ ᐃᑎᕈᓐᓇᕐᓂᕐᒥᒃ ᐃᓄᐃᑦ ᓄᓇᖁᑎᖏᓐᓄᒃ ᑭᒡᒐᖅᑐᐃᔨᐅᓗᑎᒃ, ᐃᖅᑲᓇᐃᔭᖅᑎᐅᓗᑎᒃ ᑳᑦᑐᓛᑦᑎᐅᓗᑎᓪᓗ ᒐᕙᒪᒃᑯᓐᓄᑦ; ᐅᕝᕙᓗ

(b)

ᐃᑎᕈᓐᓇᕐᓗᑎᒃ ᐃᓄᐃᑦ ᓄᓇᖁᑎᖏᓐᓄᑦ ᑐᓐᖓᕕᖃᕐᓗᑎᒃ ᐃᒪᐃᓕᖓᓂᖏᓐᓂᒃ ᒪᓕᒋᐊᓕᓐᓂᓪᓗ ᐋᖅᑭᑦᑕᐅᓯᒪᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐊᓯᖏᓐᓄᑦ ᐊᑭᓕᖅᑕᐅᓂᖏᑦᑕ ᐊᑭᓕᕆᐊᓖᑦ.

21.3.12

ᐃᑎᕈᓐᓇᕐᓂᖅ ᐃᓄᐃᑦ ᓄᓇᖁᑎᖏᓐᓄᑦ ᓇᓗᓇᐃᔭᖅᑕᐅᓯᒪᔪᓂ ᐅᕙᓂ ᐃᓚᖓ 1-ᒥ ᑐᓐᖓᕕᐅᔪᑦ ᐃᒪᐃᓕᖓᓂᖏᓐᓄᑦ ᐃᒪᐃᑦᓴᕆᐊᖃᕆᐊᖓ:

(a)

ᓱᕋᑦᑕᐅᔪᖃᕆᐊᖃᓐᖏᑦᑐᖅ;

(b)

ᐸᕝᕕᓴᑦᑕᐅᔪᖃᓐᖏᓪᓗᓂ; ᐊᒻᒪᓗ

(c)

ᐊᓚᒡᒐᐃᑦᑐᒥᒃ ᐅᓚᕕᓐᓂᖅᑕᖃᕆᐊᖃᓐᖏᑦᑐᖅ ᐃᓄᐃᑦ ᐊᑐᖃᑦᑕᕐᓂᖏᓐᓄᑦ ᑲᔾᔮᕆᔭᖃᕐᓂᖏᓐᓂᓪᓗ ᓄᓇᓂᒃ.

21.3.13

ᐃᓄᐃᑦ ᐊᑐᖅᑐᑦ ᐱᔪᓐᓇᐅᑎᓂᒃ ᐊᑖᓂ ᑖᑦᓱᒪ ᐃᓚᖓᑕ ᐃᒪᐃᓐᓂᐊᖅᑐᑦ:

(a)

ᐊᑭᓖᒋᐊᖃᕐᓗᑎᒃ ᓱᕋᑦᑕᐅᔪᓂᒃ ᓄᓇᓂᒃ; ᐊᒻᒪᓗ

(b)

ᑕᑯᓐᓇᖅᑕᐅᓂᐊᖅᑐᑦ ᐅᓚᕕᑦᑎᐅᒋᐊᖏᑦ ᐊᓂᑎᑕᐅᓗᑎᓪᓗ ᓄᓇᒥᒃ, ᒪᓕᓐᖏᑐᐊᕈᑎᒃ ᒪᓕᑦᓴᕆᐊᓕᓐᓂᒃ ᑕᕝᕙᓃᑦᑐᓂᒃ ᐃᓛᒃᑰᖅᑐᒥ.

21.3.14

ᐃᑎᕈᓐᓇᕐᓂᐅᔪᑦ ᐃᓄᐃᑦ ᓄᓇᖁᑎᖏᓐᓂᒃ ᐆᒪ ᐃᓚᖓᑕ ᐊᑖᓂ ᑐᓐᖓᕕᖃᓐᖏᑦᑐᑦ ᐊᑭᓕᖅᑕᐅᓂᖏᓐᓂᒃ ᓇᐅᑐᐃᓐᓇᐃᑦ ᐊᑭᓕᕆᐊᓖᑦ, ᐅᕝᕙᓗ ᐃᒪᐃᓕᖓᓂᐅᔪᓂᒃ ᒪᓕᑦᓴᕆᐊᓕᓐᓂᒃ, ᐋᒡᒐᐅᒐᓗᐊᖅ ᐃᓚᒋᔭᐅᑎᑕᐅᔪᓂᒃ ᐅᕙᓂ ᐃᓚᖓᓂ.

ᐃᓚᖓ 4

ᐃᐱᐅᑕᓕᒻᒥᒃ ᓴᕖᒻᒥᓗ ᐊᖅᑯᑎᐅᑉ ᑭᒃᑯᑐᐃᓐᓇᕐᓄᑦ ᐃᑎᖅᑕᐅᔪᓐᓇᕐᓂᖓ

21.4.1

ᑭᓇᒃᑯᑐᐃᓐᓇᕐᓄᑦ ᐃᑎᕋᑦᓴᐅᓂᐊᖅᑐᖅ, ᓇᓗᓇᐃᔭᖅᑕᐅᓯᒪᓂᖓ ᒪᓕᓪᓗᒍ ᐃᓚᒍᑕᖅ 21-2-ᒥ, ᐃᓄᐃᑦ ᓄᓇᖁᑎᖏᓐᓂ ᓇᓗᓇᐃᔭᖅᑕᐅᓯᒪᔪᓂ ᑕᐃᑲᓂ ᐃᓚᒍᑕᕐᒥ.

ᐃᓚᖓ 5

ᒐᕙᒪᒃᑯᑦ ᐃᑎᕈᓐᓇᕐᓂᖓᑦ

21.5.1

ᑭᒡᒐᖅᑐᐃᔩᑦ, ᐃᖅᑲᓇᐃᔭᖅᑏᑦ ᑳᑦᑐᓛᑦᑏᓪᓗ ᒐᕙᒪᒃᑯᓐᓄᑦ ᐊᒻᒪᓗ ᐅᓇᓕᑦᓴᖁᑎᖏᑦ ᑲᓇᑕᐅᑉ ᐅᓇᑕᖅᑎᖁᑎᖏᑦᑕ ᐊᒻᒪᓗ ᐸᓖᓰᑦ, ᐱᔪᓐᓇᕐᓂᖃᕐᓂᐊᖅᑐᑦ, ᑐᓐᖓᕕᖃᕐᓗᑎᒃ ᐃᓛᒃᑰᖅᑐᒥᒃ, ᐃᑎᕐᓂᕐᒥᒃ, ᐃᑳᕐᓂᕐᒥᒃ ᓇᔫᑎᓂᕐᒥᓪᓘᓐᓃᑦ ᐃᓄᐃᑦ ᓄᓇᖁᑎᖏᓐᓂ ᐃᒪᖃᑎᖏᓐᓂᓗ ᑲᔪᓯᑎᑦᓯᓗᑎᒃ ᒐᕙᒪᒃᑯᓐᓂᒃ ᐱᔾᔪᑕᐅᔪᓂᒃ ᐊᑦᑐᐊᔪᓂᒃ ᒪᓕᒐᖅᑎᒍᑦ ᑲᔪᓯᑎᑕᐅᓂᖏᑦᑕ ᐊᐅᓚᑕᐅᓂᖏᑦᑕᓗ ᐊᐅᓚᓂᖏᑦᑕ ᑲᔪᓯᑎᑦᓯᓂᖏᑦᑕᓗ ᒪᓕᒐᕐᓂᒃ.

21.5.2

ᒐᕙᒪᒃᑯᑦ, ᐅᓇᑕᖅᑐᑦᓴᐃᑦ ᐸᓖᓯᒃᑯᓘᓐᓃᑦ, ᐊᑐᖏᓐᓇᕆᐊᖃᖅᐸᑕ ᐃᓄᐃᑦ ᓄᓇᖁᑎᖏᓐᓂᒃ ᐊᕐᕌᒎᒃ ᒪᕐᕉᒃ ᐅᖓᑖᓄᑦ, ᐱᖃᓯᐅᑎᑦᓱᓂ ᐊᑐᕐᓂᖅ ᐃᓄᖃᓐᖏᒃᑲᓗᐊᕐᓗᑎᒃ ᐃᓪᓗᖁᑎᖏᑦ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔭᕆᐊᖃᖅᑎᑦᓯᑐᐃᓐᓇᕆᐊᓖᑦ ᒐᕙᒪᒃᑯᓐᓂᒃ ᑎᒍᒥᐊᖅᑎᑦᓯᔪᓐᓇᖅᐳᑦ ᐊᑐᖅᑕᐅᑎᑦᓯᓗᑎᓪᓗ ᓄᓇᒥᒃ.;

21.5.3

ᑭᒡᒐᖅᑐᐃᔩᑦ, ᐃᖅᑲᓇᐃᔭᖅᑏᑦ, ᑳᑦᑐᓛᑦᑏᓪᓗ ᐊᑐᖅᑐᑦ ᓇᓗᓇᐃᔭᖅᑕᐅᓯᒪᔪᒥ ᐃᓗᐊᓂ ᐃᓚᒍᑕᖅ 21-3 ᐃᑎᕈᓐᓇᕐᓂᐊᖅᑐᑦ, ᐃᑳᕐᓗᑎᒃ ᓇᔫᑎᓗᑎᓪᓘᓐᓃᑦ ᓄᓇᒥ ᓇᓗᓇᐃᖅᑕᐅᓯᒪᔪᒥ ᐊᑦᑐᐊᔪᓂ ᓄᓇᖁᑎᖏᓐᓂ ᐃᓄᐃᑦ ᑎᑎᕋᖅᑕᐅᓯᒪᔪᑦ ᑕᐃᑲᓂ, ᐱᔾᔪᑕᐅᔪᒧᑦ ᓇᓗᓇᐃᖅᑕᐅᓯᒪᔪᒧᑦ ᑕᐃᑯᖓᖓᔪᒧᑦ, ᐱᖃᓯᐅᑎᑦᓱᓂ ᐊᑑᑎᒋᐊᓖᑦ ᑕᐃᓐᓇ ᐱᔾᔪᑕᐅᔪᖅ ᐱᔾᔪᑕᐅᓗᓂ.

21.5.4

ᐱᔪᓐᓇᐅᑎᐅᔪᖅ ᑎᑎᕋᖅᓯᒪᔪᓂ 21.5.1 ᐊᒻᒪᓗ 21.5.3 ᑐᓐᖓᕕᖃᕐᓂᐊᖅᑐᑦ ᑎᑎᕋᖅᓯᒪᔪᒥᒃ 21.3.12 (b) ᐊᒻᒪᓗ ᑎᑎᕋᖅᓯᒪᔪᖅ 21.3.13.

21.5.5

ᐊᓚᒡᒐᐃᑦᑐᒻᒪᕆᒻᒥᒃ ᓱᕋᑦᑎᖅᑕᐅᓂᐊᖅᐸᑦ ᓄᓇ, ᐅᕝᕙᓗ ᐅᓚᕕᑦᑕᐅᓂᖃᒻᒪᕆᓐᓂᐊᖅᐸᑕ ᐃᓄᐃᑦ ᐊᑐᐊᑕᕐᓂᖓᑦ ᑲᔾᔮᕐᓂᖓᓪᓗ ᓄᓇᒥᒃ, ᒐᕙᒪᒃᑯᑦ ᐅᖃᖃᑎᖃᕆᐊᓖᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᒥᒃ ᐊᖏᖃᑎᒋᒐᓱᐊᕐᓗᒋᑦ ᐊᐅᓚᓂᐅᓂᐊᖅᑐᓄᑦ ᒐᕙᒪᒃᑯᑦ ᐃᑎᖅᓯᒪᓂᖓᓐᓄᑦ ᐊᑖᓂ 21.5.1 ᐊᒻᒪᓗ 21.5.3. ᐊᖏᖃᑎᒌᓐᓂᖅᑕᖃᕈᓐᓇᖏᑉᐸᑦ, ᐊᐅᓚᓂᐅᔪᖅ ᑐᓂᔭᐅᓂᐊᖅᑐᑦ ᐋᔩᖃᑎᒌᑎᑦᓯᔨᓄᑦ ᓇᓗᓇᐃᖅᓯᓂᐊᖅᑎᓪᓗᒋᑦ ᐊᐅᓚᓂᐅᒋᐊᓕᓐᓂᒃ ᑐᓐᖓᕕᖃᕐᓗᑎᒃ ᐃᓛᒃᑰᖅᑐᒥᒃ 38. ᐊᐅᓚᓂᐅᔪᑦ ᓇᓗᓇᐃᖅᑕᐅᓯᒪᒧᑦ ᐃᓚᒍᑕᖅ 21-4-ᒥ ᐱᔭᕆᐊᖃᔾᔮᖏᑦᑐᖅ ᐱᔭᕆᐊᓕᓐᓂᒃ ᐅᕙᓂ ᑎᑎᕋᖅᓯᒪᔪᓂ.

21.5.6

ᑭᓪᓕᖃᖅᑎᖏᒃᑲᓗᐊᕐᓗᒋᑦ ᐃᓘᓐᓇᐃᓐᓅᖓᔪᑦ ᐅᕙᓂ ᑎᑎᕋᖅᓯᒪᔪᒥ, ᐊᐅᓚᓂᐅᒋᐊᓖᑦ ᐊᑖᓂ ᑎᑎᕋᖅᓯᒪᔪᖅ 21.5.5 ᑲᔪᓯᑎᑦᓯᓂᕐᒧᑦ ᒐᕙᒪᒃᑯᑦ ᐃᑎᕈᓐᓇᕐᓂᖓᓂᒃ ᖃᐅᔨᓴᑦᓯᐊᕐᓂᐊᖅᑐᑦ ᐅᑯᓇᓐᖓᑦ:

(a)

ᐊᕙᑎᒥᒃ ᓴᐳᔾᔨᓂᕐᒧᑦ ᐊᐅᓚᓂᐅᔪᑦ ᐊᑕᐅᓯᒃᑰᖃᑕᐅᔪᑦ ᐱᕕᖃᖅᑎᑦᓯᓂᐅᔪᓄᑦ ᐅᕙᓂ ᐊᖏᖃᑎᒌᒍᑎᒥ;

(b)

ᑐᓴᕋᑦᓴᐃᑦ ᐊᑐᐃᓐᓇᐅᑎᑕᐅᓗᑎᒃ; ᐊᒻᒪᓗ

(c)

ᐃᓂᖓ, ᖃᑦᓯᒥ ᐊᒻᒪᓗ ᐊᑯᓂᐅᓂᖓ ᐊᑐᕐᓂᐅᒋᐊᓕᐅᑉ.

21.5.7

ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐊᑐᐃᓐᓇᖃᕆᐊᖃᖅᐸᑕ ᐃᓄᐃᑦ ᓄᓇᖁᑎᖏᓐᓂᒃ ᐱᔾᔪᑕᐅᓪᓗᓂ ᐆᒪᔪᐃᑦ ᐊᐅᓚᑕᐅᓂᖏᑦ ᖃᐅᔨᓴᖅᑕᐅᓂᖏᓪᓗ. ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 21.5.1, ᐊᑐᕈᓐᓇᕐᓂᖅ ᐃᓄᐃᑦ ᓄᓇᖁᑎᖏᓐᓂᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐱᔾᔪᑕᐅᓪᓗᓂ ᐆᒪᔪᐃᑦ ᐊᐅᓚᑕᐅᓂᖏᑦ ᖃᐅᔨᓴᖅᑕᐅᓂᖏᓪᓗ ᑐᓐᖓᕕᖃᕐᓂᐊᖅᑐᑦ ᐊᖏᖅᑕᐅᓂᕐᒥᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐅᖃᖃᑎᖃᓚᐅᕐᓗᑎᒃ ᑖᒃᑯᓇᓐᖓᓪᓗᐊᖅ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑎᒥᐅᔪᓂᒃ.

21.5.8

ᐊᑑᑎᓂᖅ ᐱᔪᓐᓇᕐᓂᐅᔪᒥᒃ ᑎᑎᕋᖅᓯᒪᔪᒥ 21.5.1ᕝᒥ ᑐᓐᖓᕕᖃᕐᓂᐊᖏᑦᑐᖅ ᐱᕕᖃᖅᑎᑦᓯᒍᑕᐅᔪᓂᒃ ᐃᓕᔭᐅᓯᒪᔪᓂᒃ, ᑭᓯᐊᓂ ᑐᓐᖓᕕᖃᕐᓂᐊᖅᑐᑦ ᐊᑭᓖᒋᐊᖃᕐᓂᕐᒥᒃ ᑕᐃᒪᐃᓕᖓᑎᑕᐅᑉᐸᑦ ᒪᓕᒐᖅᑎᒍᑦ.

21.5.9

ᓇᐅᑐᐃᓐᓇᖅ ᐃᓄᒃ ᐊᑐᖅᑐᖅ ᐱᔪᓐᓇᐅᑎᒥᓂᒃ ᐊᑖᓂ ᑎᑎᕋᖅᓯᒪᔪᖅ 21.5.1 ᓱᕋᐃᑉᐸᑦ ᐃᓄᐃᑦ ᓄᓇᖁᑎᖏᓐᓂᒃ, ᒐᕙᓚᒃᑯᓪᓗ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖃᑎᒌᒍᓐᓇᐃᓪᓕᑉᐸᑕ ᐊᑭᓕᖅᑕᐅᒋᐊᖃᕐᓂᕐᒥᒃ ᓱᕋᑦᑕᐅᔪᓄᑦ, ᐊᐅᓚᓂᐅᔪᖅ ᑐᓂᔭᐅᓂᐊᖅᑐᖅ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔨᒃᑯᓐᓄᑦ, ᓇᓗᓇᐃᖅᓯᓂᐊᖅᑎᓪᓗᒋᑦ ᐊᑭᓖᒋᐊᓕᓐᓂᒃ ᖃᑦᓯᐅᒋᐊᖃᕐᓂᖏᓐᓂᓪᓗ ᐊᑭᓕᐅᑕᐅᔪᑦ ᑐᓐᖓᕕᒋᑦᓱᖑ ᐃᓛᒃᑰᖅᑐᖅ 38.

21.5.10

ᒥᓂᔅᑕᐅᕕᖓᑦ ᐅᓇᑕᖅᑐᑦᓴᓕᕆᔨᒃᑯᑦ ᐱᔪᓐᓇᕐᓂᖃᕐᓂᖅᓴᐅᔾᔮᖏᑦᑐᑦ ᐊᐅᓚᓂᖃᕐᓂᖏᓐᓂᒃ ᐅᓇᑕᕐᓂᕐᒨᖓᔪᑦ, ᐱᖃᓯᐅᑎᑦᓱᑎᒃ ᐃᓕᓐᓂᐊᕐᓂᐅᔪᑦ ᓄᑦᑕᕐᓂᐅᔪᓪᓗ, ᐃᓄᐃᑦ ᓄᓇᖁᑎᖏᓐᓂ ᑕᐃᒫᑦᑕᐅᖅ ᐱᐅᓯᖃᖅᐸᒻᒪᑦ ᑭᓇᒃᑯᑐᐃᓐᓇᕐᓅᖓᓐᖏᑦᑐᓄᑦ ᓄᓇᓄᑦ ᐊᑖᓂ ᐃᓘᓐᓇᐃᓐᓄᑦ ᐊᑑᑎᒐᔪᑦᑐᑦ ᒪᓕᒐᐃᑦ. ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐅᓇ ᑎᑎᕋᖅᓯᒪᔪᖅ ᓴᓐᖏᓂᖅᓴᐅᓂᐊᖅᑐᖅ ᑎᑎᕋᖅᓯᒪᔪᓂᒃ 21.5.11 ᐊᒻᒪᓗ 21.5.12.

21.5.11

ᒥᓂᔅᑕᐅᕕᖓᑦ ᐅᓇᑕᖅᑐᑦᓴᓕᕆᔨᒃᑯᑦ ᐱᔪᓐᓇᕐᓂᖃᖅᑎᑦᓯᒍᓐᓇᖅᑐᖅ ᐃᑎᕈᓐᓇᕐᓂᕐᒥᒃ ᐃᓄᐃᑦ ᓄᓇᖁᑎᖏᓐᓄᑦ ᐃᒪᖁᑎᖏᓐᓄᓪᓗ ᐃᓄᐃᑦ ᓄᓇᖁᑎᖏᓐᓃᑦᑐᓄᑦ ᑲᔪᓯᑎᑦᓯᓂᐊᖅᑎᓪᓗᖏᑦ ᐊᐅᓚᓂᖏᓐᓂᒃ ᑲᓇᑕᒥ ᐅᓇᑕᖅᑐᑦᓴᐃᑦ ᑐᓐᖓᕕᖃᕐᓗᑎᒃ ᑎᑎᕋᖅᓯᒪᔪᒥᒃ 257 ᑲᓇᑕᒥ ᐅᓇᑕᖅᑐᑦᓴᐃᑦ ᒪᓕᒐᕐᔪᐊᖓᓐᓂᒃ ᐊᒻᒪᓗ ᑕᐃᒪᐃᓕᖓᒐᓪᓗᐊᖅᑎᓪᓗᒍ 21.5.10, ᓱᓇᓕᒫᑦ ᐅᕙᓃᑦᑐᑦ ᐃᓛᒃᑰᖅᑐᒥ ᐊᑦᑐᐊᓂᖃᖅᑐᑦ ᐊᑑᑎᓂᖃᖅᑎᓪᓘᓐᓃᑦ ᐱᔪᓐᓇᕐᓂᖃᖅᑎᑕᐅᓂᖓᓄᑦ ᒥᓂᔅᑕᖓᑦᑕ ᐅᓇᑕᖅᑐᑦᓴᓕᕆᔨᒃᑯᑦ.

21.5.12

ᐊᓯᖏᑦ ᐃᑎᕈᓐᓇᕐᓂᐅᔪᑦ ᐊᐅᓚᓂᐅᔪᓄᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 21.5.11-ᒥ, ᐃᑎᕈᓐᓇᕐᓂᖅ ᐃᑳᕈᓐᓇᕐᓂᕐᓗ ᐃᓄᐃᑦ ᓄᓇᖁᑎᖏᓐᓂᒃ ᐃᒪᕐᓂᓪᓗ ᐃᓄᐃᑦ ᓄᓇᖁᑎᖏᓐᓃᑦᑐᓂᒃ ᐊᑐᓂᑦ ᐊᐅᓚᓂᐅᔪᓄᑦ ᐊᑑᑎᒍᓐᓇᖅᑐᑦ ᑭᓯᐊᓂ ᐅᖃᖃᑎᒌᒍᑕᐅᓚᐅᖅᑎᓪᓗᒋᑦ ᐊᖏᕈᑎᒥᓪᓗ ᐱᔭᕇᖅᑐᖃᕐᓗᓂ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᑲᒪᒋᔭᖃᖅᑐᓄᑦ ᐃᓄᓐᓂᒃ ᑐᑦᑕᕐᕕᐅᔪᓂᒃ, ᐅᖃᖃᑎᖃᕐᓂᕐᒧᑦ ᐊᐅᓚᓂᐅᔪᓂᒃ ᐊᒻᒪᓗ ᑭᓪᓕᒋᔭᖏᓐᓂᒃ ᐊᒻᒪᓗ ᐊᑭᓕᖅᑕᐅᓂᖏᓐᓂᒃ ᓱᕋᑦᑕᐅᔪᑦ, ᐊᖏᕈᑎᓗ ᐋᖅᑭᒋᐊᓕᐅᒥᔮᖅᑕᐅᒍᓐᓇᖅᓱᓂ. ᓄᓇᒥᒃ ᐊᑐᕈᑎᓂᒃ ᐊᑭᓖᑎᑦᓯᔪᖃᔾᔮᖏᑦᑐᖅ.

21.5.13

ᓯᕗᕐᖓᓂ ᑐᓴᐅᒪᑎᑦᓯᑦᓯᐊᕐᓂᖅ, ᐃᓄᑦᑎᑑᕐᓗᑎᒃ, ᐅᓇᑕᖅᑐᑦᓴᐃᑦ ᐊᐅᓚᓂᖏᓐᓅᖓᔪᑦ ᑐᓂᔭᐅᓂᐊᖅᑐᑦ ᒥᓂᔅᑕᐅᕕᖓᓐᓄᑦ ᐅᓇᑕᖅᑐᑦᓴᓕᕆᔨᒃᑯᑦ ᓄᓇᓕᖃᖅᑐᓄᑦ ᐊᑦᑐᖅᑕᐅᓯᒪᔪᓄᑦ.

21.5.14

ᐃᑎᕈᓐᓇᕐᓂᖅ ᐃᓄᐃᑦ ᓄᓇᖁᑎᖏᓐᓄᑦ ᐅᕙᓂ ᐃᓚᖓᓂ, ᐋᒡᒐᐅᒐᓗᐊᖅ ᐊᑖᑎ 21.5.2, ᐊᑭᓖᒍᑕᐅᒋᐊᖃᓐᖏᑦᑐᑦ ᐊᑭᓕᕆᐊᓕᓐᓂᒃ, ᐃᒪᐃᓕᖓᓂᐅᔪᓂᓪᓘᓐᓃᑦ, ᐋᒡᒐᐅᒐᓗᐊᖅ ᑕᐃᒪᐃᓕᖓᑎᑕᐅᑉᐸᑕ ᐅᕙᓂ ᐃᓚᖓᓂ.

21.5.15

ᐅᕙᓂ ᐃᓚᖓᓂ, “ᒐᕙᒪᒃᑯᑦ” ᐱᖃᓯᐅᔾᔨᔪᑦ ᓄᓇᓕᓐᓂ ᑎᒥᐅᔪᓂᒃ.

ᐃᓚᖓ 6

ᓯᐅᕋᖅ ᑐᐊᐸᓗ

21.6.1

ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐃᓘᓐᓇᑎᒃ ᑎᑎᕋᖅᓯᒪᔪᒥ 19.2.1 (b), ᒐᕙᒪᒃᑯᑦ ᐱᔭᕆᐊᖃᖅᐸᑕ ᓯᐅᕋᕐᒥᒃ ᑐᐊᐸᒥᓪᓗ ᐊᒻᒪᓗ ᐊᓯᖏᓐᓂᒃ ᓴᓇᓂᕐᒨᖓᔪᓂᒃ ᐃᓄᐃᑦ ᓄᓇᖁᑎᖏᓐᓂᒃ ᑭᓇᒃᑯᑐᐃᓐᓇᐃᑦ ᐱᔾᔪᑕᐅᓪᓗᑎᒃ, ᑭᓯᐊᓂ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᕿᐱᓕᑉᐸᑕ ᐱᔪᓐᑎᑦᓯᒋᐊᒥᒃ ᒐᕙᒪᒃᑯᓐᓂᒃ ᓯᐅᕋᕐᑕᕐᓂᕐᒥᒃ, ᒐᕙᒪᒃᑯᑦ ᑐᑦᓯᕋᕈᓐᓇᖅᑐᑦ ᐋᖅᑭᒋᐊᒃᑲᐃᔨᒃᑯᓐᓄᑦ ᐃᑎᕈᓐᓇᕈᒪᓗᑎᒃ ᐲᖅᓯᒍᓐᓇᕐᓗᑎᓪᓗ ᓯᐅᕋᕐᓂᒃ.

21.6.2

ᐋᖅᑭᒋᐊᒃᑲᐃᔨᒃᑯᑦ ᑐᓂᓯᒋᐊᓖᑦ ᐃᑎᕈᓐᓇᐅᑎᒥᒃ ᐃᒪᐃᑦᑐᖃᖅᐸᑦ, ᑕᐃᒪᐃᑦᑐᖃᖅᐸᓪᓗ ᑭᓯᐊᓂ, ᓇᓗᓇᐃᖅᓯᒍᑕᐅᑉᐸᑦ ᐃᒫᒃ:

(a)

ᓴᓇᔭᑦᓴᐃᑦ ᐱᔭᕆᐊᖃᖅᐸᑕ ᑭᓇᒃᑯᑐᐃᓐᓇᐃᑦ ᐱᔾᔪᑕᐅᓪᓗᑎᒃ; ᐊᒻᒪᓗ

(b)

ᐊᓯᐊᓂᒃ ᐊᑐᐃᓐᓇᖅᑕᖃᓐᖏᑉᐸᑦ.

21.6.3

ᐃᑎᕈᓐᓇᐅᑎᑖᖅᑎᑕᐅᔪᖃᖅᐸᑦ, ᒐᕙᒪᒃᑯᑦ ᐊᑭᓖᒋᐊᓖᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᓴᓇᔭᑦᓴᐃᑦ ᐲᖅᑕᐅᓂᖏᓐᓂᒃ, ᓇᓪᓕᑐᐃᓐᓇᖏᑦ ᐅᑯᓇᓐᖓᑦ ᐊᖏᓂᖅᓴᐃᑦ:

(a)

$1.00 ᐊᑐᓂᑦ ᑭᑉᐹᕆᑦᑐᖅ ᒦᑕ, ᐊᑭᖃᓪᓗᐊᖅᑐᖅ ᐅᓪᓗᖓᓂ ᒪᓕᒐᓐᖑᖅᑎᑕᐅᓚᐅᕐᓂᖓᑕ ᐱᒋᐊᕐᓗᓂ ᐊᖏᕈᑎᐅᑉ ᓇᓗᓇᐃᔭᖅᓯᒪᑦᓱᓂᓗ ᑭᖑᓪᓕᖅᐹᒥ ᐊᑭᖏᑦ ᐋᖅᑭᑦᑕᐅᓯᒪᑎᒃ ᑲᓇᑕᒥ ᒐᕙᒪᒃᑯᑦ ᐊᑭᒋᔭᐅᔪᓄᑦ ᓇᓗᓇᐃᖅᓯᕙᓐᓂᖏᑦ ᒪᓕᓪᓗᒋᑦ; ᐅᕝᕙᓘᓐᓃᑦ

(b)

ᓂᖏᖅᑕᕐᓂᐅᖁᔭᐅᔪᑦ ᒐᕙᒪᒃᑯᓐᓄᑦ, ᐋᖅᑭᒋᐊᖅᑕᐅᓕᒥᔮᖅᐸᓐᓂᐊᖅᑐᑦ, ᐲᔭᖅᑕᐅᓂᖏᓐᓄᑦ ᓴᓇᔭᑦᓴᐃᑦ ᒐᕙᒪᒃᑯᑦ ᓄᓇᖁᑎᖏᓐᓂᒃ.

21.6.4

ᓄᓇᓕᕆᓂᕐᒧᑦ ᐋᖅᑭᒋᐊᒃᑲᐃᔩᑦ ᓇᓗᓇᐃᖅᓯᓂᐊᖅᑐᑦ ᐃᒪᐃᓕᖓᓂᐅᔪᓂᒃ ᒪᓕᒋᐊᓕᓐᓂᓪᓗ ᐊᑐᕐᓂᕐᒧᑦ ᐊᑭᓕᖅᑕᐅᓂᖏᓐᓄᓪᓗ ᐊᑐᕐᓂᐅᑉ. ᐊᑭᓖᓂᕐᓪᓗ ᓇᓗᓇᐃᖅᑕᐅᓂᐊᖅᑐᖅ ᑐᓐᖓᕕᖃᕐᓗᑎᒃ ᑎᑎᕋᖅᓯᒪᔪᒥᒃ 21.8.3. ᐋᖅᑭᑦᑕᐅᓂᖓ ᐊᑭᓕᖅᑕᐅᒋᐊᓕᐅᑉ ᐱᖃᓯᐅᔾᔨᒋᐊᖃᓐᖏᑦᑐᖅ ᖃᑦᓯᐅᓂᖏᓐᓂᒃ ᐅᖃᐅᓯᐅᔪᓂᒃ ᑎᑎᕋᖅᓯᒪᔪᒥ 21.6.3, ᐅᕝᕙᓗ ᐊᑭᓕᖅᑕᐅᓂᖏᓐᓄᑦ ᐃᑎᕈᑕᐅᔭᕆᐊᓖᑦ ᒪᓕᒐᖅᑎᒍᑦ.

21.6.5

ᐃᑎᕈᓐᓇᕐᓂᕐᒧᑦ ᑎᓕᓯᔾᔪᑕᐅᔪᑦ ᐱᖃᓯᐅᔾᔨᓂᐊᖅᑐᑦ ᐃᒪᐃᓕᖓᓂᐅᔪᓂᒃ ᒪᓕᒋᐊᓕᓐᓂᓪᓗ ᒥᑭᓪᓕᑎᒃᑲᓐᓂᖁᓪᓗᒍ ᓱᕋᑦᑎᑕᐅᑐᐃᓐᓇᕆᐊᖃᕐᓂᖅ ᐅᓚᕕᑦᑕᐅᓂᐅᓴᓂᖏᓪᓗ ᐃᓄᐃᑦ ᐊᑐᕐᓂᕆᕙᑦᑕᖏᑦᑕ, ᐊᒻᒪᓗ ᐅᖃᕐᓯᒪᓗᓂ ᒐᕙᒪᒃᑯᑦ ᓄᓇᒥᒃ ᐅᑎᖅᑎᑦᓯᓂᐊᕆᐊᖏᑦ ᐱᐅᓯᕐᒥᓄᑦ.

ᐃᓚᖓ 7

ᑕᖅᑳᓐᖓᑦ ᐃᑎᖅᑕᐅᒍᓐᓇᕐᓂᖅ

21.7.1 - ᑕᕝᕙᐅᔪᑦ ᐱᔪᒪᓂᓖᑦ

ᐃᓄᐃᑦ ᓄᓇᖁᑎᖏᑦ ᐃᒪᐃᑕᐅᑐᐃᓐᓇᕆᐊᖃᖅᐸᑕ,

(a)

ᑕᖅᑳᓐᖓᑦ ᐱᔪᒪᔭᖃᖅᑐᑦ ᐊᓯᖏᓐᓂᒃ ᐅᔭᕋᓐᓂᐊᕐᓂᐅᑉ, ᐅᕝᕙᓗ

(b)

ᑕᖅᑳᓐᖓᑦ ᐱᔪᒪᓂᖅᑕᖃᖅᐸᑦ ᐊᑦᑐᐊᔪᓄᑦ ᓇᓗᓇᐃᖅᑕᐅᓯᒪᔪᓄᑦ,

ᑕᕝᕙᐅᑦᓴᐅᑎᒋᔪᓄᑦ ᑎᒍᔭᐅᓚᐅᖅᑎᓐᓇᒋᑦ ᐃᓄᐃᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᑕᖅᑳᓐᖔᖅᑐᑦ ᐱᔪᒪᔭᕆᔭᓖᑦ ᑲᔪᓯᒍᓐᓇᖅᑐᑦ ᑐᓐᖓᕕᖃᕐᓗᑎᒃ ᐃᒪᐃᓕᖓᓂᐅᔪᓂᒃ ᒪᓕᒋᐊᓕᓐᓂᓪᓗ, ᑭᓯᐊᓂ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᒍᒥᐊᖏᓐᓇᕐᓂᐊᖅᑐᑦ ᐱᔪᓐᓇᐅᑎᓂᒃ ᑲᔪᓯᑎᒋᐊᓕᓐᓂᓪᓗ ᒐᕙᒪᒃᑯᓐᓄᑦ ᐊᑦᑐᐊᔪᓂᒃ ᓇᐅᑐᐃᓐᓇᕐᒧᑦ ᐱᔪᒪᔭᕆᐊᖃᕐᓂᐅᔪᒧᑦ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᒃ ᐃᓱᒪᑦᓴᖅᓯᐅᕈᑎᖃᕐᒃᓂᐊᖅᑐᑦ ᐊᑭᓕᐅᑕᐅᔪᓂᒃ ᐊᑭᓕᕆᐊᓕᖏᓐᓂᓘᓐᓃᑦ ᐱᔪᒪᔭᕆᔭᖃᖅᓯᒪᔫᑉ ᐊᑐᕐᓂᕐᒧᑦ ᐅᓚᕕᓐᓂᕐᒧᓪᓘᓐᓃᑦ ᑖᒃᑯᓇᓐᖓᑦ ᓄᓇᐅᔪᓂᒃ ᓇᓗᓇᐃᖅᑕᐅᓯᒪᔪᓂᓪᓗ ᐊᑦᑐᐊᔪᓂᒃ ᖃᖓᑐᐃᓐᓇᕐᒨᖓᔪᓄᑦ ᑭᖑᕐᖓᓂ ᐅᓪᓘᑉ ᑎᒍᔭᐅᓚᐅᖅᑎᓪᓗᒋᑦ.

21.7.2

ᐃᓄᐃᑦ ᓄᓇᖁᑎᖏᑦ ᑎᒍᒥᐊᖅᑕᐅᔪᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 19.2.1(a)-ᒥ ᑐᓐᖓᕕᖃᖅᐸᑕ ᑕᖅᑳᓐᖓᑦ ᐱᔪᒪᓂᖃᕐᓂᐅᔪᓂᒃ ᐅᔭᕋᓐᓂᐊᕐᓂᕐᒧᑦ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᒧᑦ, ᑕᕝᕙᐅᒌᖅᑐᑦ ᓯᕗᕐᖓᓂ ᑎᒍᔭᐅᓂᖏᑦᑕ ᐃᓄᐃᑦ ᓄᓇᖁᑎᖏᑦᑕ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᑕᐃᓐᓇ ᐱᔪᒪᓂᖃᕐᓂᐅᔪᖅ ᑲᔪᓯᓂᐊᖅᑐᖅ ᐃᒪᐃᓕᖓᓂᖏᑦ ᑐᑭᖏᓪᓗ ᐱᖃᓯᐅᑎᑦᓱᓂ ᐱᔪᓐᓇᕐᓂᐅᔪᖅ ᑐᓂᔭᐅᓯᒪᔪᖅ ᐱᔪᒪᔭᕆᔭᖃᖅᑐᒧᑦ ᐊᑖᓂ ᒪᓕᒐᐅᑉ ᐊᑑᑎᔫᑉ ᑕᐃᑲᓂ ᐅᓪᓗᖓᓂ ᑎᒍᔭᐅᑎᓪᓗᒋᑦ ᑐᓐᖓᕕᒋᑦᓱᒍ ᐱᔪᒪᔭᕆᔭᐅᔪᖅ, ᐅᕝᕙᓗ ᐃᓇᖏᖅᑕᖓᓂᒃ ᒪᓕᒐᕐᒥᒃ ᐊᑑᑎᔪᒥᒃ ᐊᔾᔨᒐᓚᖏᓐᓄᑦ ᐱᔪᒪᔭᕿᔭᐅᔪᓄᑦ ᒐᕙᒪᒃᑯᑦ ᓄᓇᖁᑎᖏᓐᓂ. ᓇᐅᑐᐃᓐᓇᐃᑦ ᐱᕕᖃᖅᑎᑦᓯᓂᐅᔪᑦ ᐃᓇᖏᖅᓯᓂᕐᒧᑦ ᒪᓕᒐᕐᒧᑦ ᐊᑦᑐᐃᓂᖃᕋᔭᖅᑐᑦ ᓄᖑᑎᕆᓗᑎᒃ ᐱᔪᓐᓇᐅᑎᖏᓐᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᑑᑎᓂᐊᖅᑐᑦ ᑭᓯᐊᓂ ᐃᓄᐃᑦ ᓄᓇᖁᑎᖏᓐᓄᑦ ᐊᖏᖅᑕᐅᓯᒪᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᓂᐊᖅᑐᑦ ᐊᑭᓕᐅᑕᐅᔪᓂᒃ ᐊᑭᓕᕆᐊᓕᖏᓐᓂᓘᓐᓃᑦ ᐱᔪᒪᔭᕆᔭᖃᖅᓯᒪᔫᑉ ᐊᑐᕐᓂᕐᒧᑦ ᐅᓚᕕᓐᓂᒧᓪᓘᓐᓃᑦ ᐅᔭᕋᑦᓯᐊᕙᓐᓂᒃ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᑦ ᐊᑦᑐᐊᓂᖃᖅᑐᑦ ᑭᖑᕐᖓᓐᓂ ᐅᓪᓘᑉ ᑎᒍᔭᐅᓚᐅᖅᑎᓪᓗᒋᑦ.

21.7.3

ᐊᑐᓂᑦ ᑕᖅᑳᓐᖓᑦ ᐱᔪᒪᔭᕆᔭᖃᕐᓂᐅᔪᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 21.7.2 ᑲᔪᓯᓂᐊᖅᑐᑦ ᐊᐅᓚᑕᐅᓗᑎᒃ ᒐᕙᒪᒃᑯᓐᓄᑦ ᑐᓐᖓᕕᖃᕐᓗᑎᒃ ᒪᓕᒐᕐᔪᐊᕐᒥᒃ ᐊᑑᑎᔪᒥᒃ ᐊᔾᔨᒐᓚᖏᓐᓄᑦ ᐱᔪᒪᔭᕆᔭᐅᔪᑦ ᒐᕙᒪᒃᑯᑦ ᓄᓇᖁᑎᖏᓐᓂ. ᑐᓐᖓᕕᒋᓗᒍ ᐊᖏᖅᑕᐅᓂᖅ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᑕᐃᒪᐃᑦᓴᕆᐊᖃᕐᒪᑦ ᐊᑖᓂ 21.7.2, ᑕᐃᒪᐃᑦᑐᖅ ᒪᓕᒐᕐᔪᐊᖅ, ᐱᖃᓯᐅᑎᑦᓱᑎᒃ ᓇᐅᑐᐃᓐᓇᐃᑦ ᑭᖑᕐᖓᒍᑦ ᒪᓕᒐᕐᔪᐊᖑᖅᑐᑦ, ᑕᑯᓐᓇᖅᑕᐅᓂᐊᖅᑐᑦ ᐊᑑᑎᒋᐊᖏᑦ ᑕᖅᑳᓐᖓᑦ ᐱᔪᒪᔭᕆᔭᖃᖅᑐᓄᑦ ᐋᒡᒐᐅᒐᓗᐊᖅ ᑎᒍᒥᐊᖅᑐᖅ ᐱᔪᒪᔭᕆᔭᐅᔪᒥᒃ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖃᑎᒌᑉᐸᑎᒃ ᐊᐅᓚᑕᐅᓂᖏᓐᓄᑦ ᐱᔪᒪᔭᕆᔭᐅᔫᑉ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ. ᖃᐅᔨᒃᑲᖅᑕᐅᓚᐅᖅᑎᓪᓗᒍ ᐱᔪᒪᔭᕆᔭᖃᖅᑐᖅ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑕᐃᒪᐃᑦᑐᒧᑦ ᐊᖏᕈᑎᒧᑦ, ᒪᓕᒐᕐᔪᐊᖅ ᑕᑯᓐᓇᖅᑕᐅᒍᓐᓃᕐᓂᐊᖅᑐᖅ ᐊᑑᑎᒋᐊᖓ ᑕᐃᑯᖓ ᐱᔪᒪᔭᕆᔭᐅᔪᒧᑦ ᐊᒻᒪᓗ ᒐᕙᒪᒃᑯᑦ ᐱᔭᕆᐊᓕᓕᒫᓂᒃ ᑲᒪᓗᑎᒃ ᐊᐅᓪᓛᑎᑦᓯᓗᑎᒃ ᐊᐅᓚᑕᐅᓂᕐᒥᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.

21.7.4

ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 21.7.5, ᓴᓐᖏᓂᓕᒫᑦ, ᐅᔾᔨᖅᑐᕐᓂᓕᒫᑦ, ᐱᔪᓐᓇᕐᓂᐅᔪᓪᓗ ᐊᑦᑐᐊᔪᑦ ᑕᖅᑳᓐᖔᖅᑐᓄᑦ ᐱᔪᒪᔭᕆᔭᐅᔪᓄᑦ ᐅᖃᐅᓯᐅᔪᓄᑦ 21.7.2-ᒥ, ᐊᑦᑐᐊᔪᑦ ᐱᔪᒪᔭᕆᔭᖏᓐᓄᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᒍᒥᐊᖅᑎᐅᓪᓗᒋᑦ, ᑲᔪᓯᑎᑕᐅᓂᐊᖅᑐᑦ ᒐᕙᒪᒃᑯᓐᓄᑦ ᐅᖃᖃᑎᖃᓚᐅᕐᓗᑎᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ.

21.7.5

ᒐᕙᒪᒃᑯᑦ ᐃᓱᒪᖅᓲᑎᖃᖅᐸᑕ ᒥᑭᓪᓕᑎᕆᓂᕐᒥᒃ ᑲᔪᓯᓐᖏᑎᑦᓯᓗᑎᓪᓘᓐᓃᑦ ᓂᖏᕈᑕᐅᔪᓂᒃ ᐊᑭᓖᓂᕐᒥᒃ ᑕᖅᑳᓐᖔᖅᑐᓂᒃ ᐱᔪᒪᔭᕆᔭᖃᖅᑐᓂᒃ ᐅᖃᐅᓯᐅᔪᓂᒃ 21.7.2-ᒥ, ᑕᐃᒫᒃ ᑲᔪᓯᑎᑦᓯᔪᖃᕆᐊᖃᓐᖏᑦᑐᖅ ᐊᖏᖅᓯᒪᔪᓂᒃ ᑎᑎᖅᑲᖅᑕᖃᓐᖏᑐᐊᖅᐸᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ.

21.7.6

ᒐᕙᒪᒃᑯᑦ ᑐᓴᖃᑎᖃᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᑐᓴᕋᑦᓴᓕᒫᓂᒃ ᐱᔭᐅᔪᓂᒃ ᑕᖅᑳᓐᖓᑦ ᐱᔪᒪᔭᕆᔭᖃᖅᑐᓂᒃ ᐅᖃᐅᓯᐅᔪᓂᒃ ᑎᑎᕋᖅᓯᒪᔪᒥ 21.7.2-ᒥ ᑕᖅᑳᓐᖔᖅᑐᑦ ᐊᑐᐃᓐᓇᐅᑎᑦᓯᒋᐊᓖᑦ, ᒪᓕᒐᖅᑎᒍᑦ ᑐᓴᕋᑦᓴᐃᑦ ᐱᔭᕆᐊᖃᖅᐸᑕ ᐊᖏᕐᓂᖓᓐᓄᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ:

(a)

ᓇᓗᓇᐃᖅᓯᓗᑎᒃ ᐃᓱᒪᑦᓴᖅᓯᐅᕈᑕᐅᓂᖓᑕ ᐊᑭᓕᖅᑕᐅᓂᖓᓂᒃ ᐅᕝᕙᓗ ᐊᑭᓕᕆᐊᓕᖏᓐᓂᒃ ᒐᕙᒪᒃᑯᓐᓄᑦ ᐱᔪᒪᔭᕆᔭᖃᖅᑑᑉ ᐊᑐᕐᓂᕐᒧᑦ ᐅᔭᕋᓐᓂᐊᕐᓂᕐᒧᓪᓘᓐᓃᑦ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᑦ; ᐅᕝᕙᓗ

(b)

ᐃᓚᐅᑎᓐᓂᖅ ᐅᖃᖃᑎᒋᔭᐅᑎᓪᓗᒋᑦ ᒐᕙᒪᒃᑯᑦ ᐱᔾᔪᑕᐅᓪᓗᑎᒃ ᑕᖅᑳᓐᖔᖅᑐᑦ ᐱᔪᒪᔭᕆᔭᓖᑦ ᐱᕕᖃᖅᑎᑕᐅᓂᖏᑦ ᑐᓐᖓᕕᒋᑦᓱᒋᑦ ᐅᕙᓂ ᐃᓛᒃᑰᖅᑐᒥ.

21.7.7

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑐᓴᕋᑦᓴᖃᖅᑎᑕᐅᔪᑦ ᐅᕝᕙᓘᓐᓃᑦ ᑎᑎᖅᑲᑖᖅᑐᑦ ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 21.7.6 ᑐᓴᖅᑕᐅᑎᑦᓯᔾᔮᖏᑦᑐᑦ ᑐᓴᖅᑕᒥᓂᒃ ᑎᑎᖅᑲᐅᓯᐊᕐᒥᓂᓪᓘᓐᓃᑦ.

21.7.8 - ᐊᑐᕐᓂᖅ ᐱᔪᓐᓇᐅᑎᓂᒃ ᐅᔭᕋᓐᓂᐊᕐᓂᕐᒨᖓᔪᓂᒃ

ᐊᐅᓚᑦᓯᔪᖅ ᐊᑐᕈᓐᓇᖅᑐᖅ ᐱᔪᓐᓇᐅᑎᐅᒥᓂᒃ ᕿᓂᕐᓂᕐᒧᑦ, ᐱᕙᓪᓕᐊᑎᑦᓯᓂᕐᒧᑦ, ᓴᓇᓂᕐᒧᑦ ᐊᐅᓪᓛᑎᑦᓯᓂᕐᒧᓪᓘᓐᓃᑦ ᐅᔭᕋᑦᓯᐊᕙᓐᓂᒃ, ᐃᓗᐊᓂ, ᕐᑳᖓᓂ ᐅᕝᕙᓗ ᐊᑖᓂ ᐃᓄᐃᑦ ᓄᓇᖁᑎᖏᑦᑕ ᒪᓕᓪᓗᑎᒃ ᑭᓯᐊᓂ ᐊᖏᕈᑎᒥᒃ.

21.7.9

ᐃᓄᒃ ᕿᓂᕈᓐᓇᐅᑎᓂᒃ ᐅᔭᕋᑦᓯᐊᕙᓐᓂᒃ ᐊᐅᓚᓂᖏᓪᓗ ᓄᓇᒥᒃ ᐊᑐᕐᓂᕐᒧᑦ ᐱᔪᓐᓇᐅᑎᖃᕆᐊᖃᓐᖏᑉᐸᑕ ᐊᑖᓂ ᐊᕕᑦᑐᖅᓯᒪᔪᓂ ᓄᓇᒥᒃ ᐊᑐᕐᓂᕐᒧᑦ ᒪᓕᒐᐃᑦ (SOR/77-210, ᒫᑦᓯ 4, 1977) ᐊᐅᓚᓂᖃᕐᓂᖅᐸᑕ ᒐᕙᒪᑐᖃᒃᑯᑦ ᓄᓇᖁᑎᖏᓐᓂ, ᐃᑎᕈᓐᓇᖅᑐᑦ ᐃᓄᐃᑦ ᓄᓇᖁᑎᖏᓐᓂᒃ, ᐱᔾᔪᑎᖃᕐᓗᓂ ᑖᒃᑯᓇᓐᖓᑦ ᐊᐅᓚᓂᐅᔪᓂᒃ ᑐᓐᖓᕕᖃᕐᓗᓂ ᒪᓕᑦᑕᐅᒋᐊᓕᓐᓂᒃ ᐅᔭᕋᓐᓂᐊᕐᓂᕐᒨᖓᔪᓂᒃ ᐊᖏᖅᑕᐅᓯᒪᔪᓂᒃ ᐊᑖᓂ ᑎᑎᕋᖅᓯᒪᔪᖅ 21.7.10.

21.7.10

ᐱᔾᔪᑕᐅᓪᓗᓂ ᑎᑎᕋᖅᓯᒪᔪᖅ 21.7.9, ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ ᑐᑦᓯᕋᕐᓂᐊᖅᑐᖅ, ᕿᒥᕐᕈᖃᑎᖃᕈᒪᓗᓂ ᒐᕙᒪᒃᑯᓐᓂᒃ ᐊᑦᑐᐊᔪᓂᓗ ᓴᓇᔨᓂᒃ ᑎᒥᐅᔪᓂᒃ, ᓇᓗᓇᐃᒃᑯᑕᕐᒥᒃ ᕿᓂᕈᓐᓇᖁᓪᓗᒋᑦ ᐃᑎᕐᓗᑎᒃ ᐃᓄᐃᑦ ᓄᓇᖁᑎᖏᓐᓄᑦ, ᓇᓗᓇᐃᒃᑯᑕᕐᓗ ᐊᑐᕐᓂᐊᕐᓱᓂ ᐊᖏᖅᑕᐅᑐᐊᖅᐸᑦ ᒐᕙᒪᑦᑐᓐᓄᑦ ᓇᓗᓇᐃᖅᑕᐅᓯᒪᔪᓄᓪᓗ ᐃᓄᓐᓄᑦ ᑎᒥᖁᑕᐅᔪᓄᑦ. ᓇᓗᓇᐃᒃᑐᑕᖅ ᑕᑯᑦᓴᐅᑎᑦᓯᓂᐊᖅᑐᖅ ᑭᓐᖒᒪᒋᔭᐅᔪᓂᒃ ᐱᕕᖃᖅᑎᑦᓯᓗᓂ ᑲᓐᖑᓇᖅᑑᓂᕐᒥᒃ ᐅᔭᕋᓐᓂᐊᖅᑎᓄᑦ.

21.7.11

ᐊᐅᓚᑦᓯᔪᖅ ᐊᑐᓐᖏᑐᐊᖅᐸᑦ ᐱᔪᓐᓇᐅᑎᒥᒃ ᐊᑖᓂ ᑎᑎᕋᖅᓯᒪᔪᖅ 21.7.1 ᐅᕝᕙᓗ 21.7.9, ᓇᐅᑐᐃᓐᓇᖅ ᐊᐅᓚᑦᓯᔪᖅ ᐱᔪᓐᓇᐅᑎᓂᒃ ᐊᑐᕆᐊᖃᓐᖏᑦᑐᖅ ᐅᖃᐅᓯᐅᔪᓂᒃ ᑎᑎᕋᖅᓯᒪᔪᒥ 21.7.8 ᐊᖏᖅᑕᐅᖅᑳᓚᐅᓐᖏᑐᐊᕈᓂ ᓇᓗᓇᐃᖅᑕᐅᓯᒪᔪᒧᑦ ᐃᓄᓐᓄᑦ ᑎᒥᖁᑕᐅᔪᒧᑦ ᐊᑐᕐᓂᕐᒧᑦ ᕐᑳᖓᓄᑦ ᐱᔪᓐᓇᐅᑎᓂᒃ ᐃᓄᐃᑦ ᓄᓇᖁᑎᖏᓐᓂ. ᐊᐅᓯᑦᔨ ᐊᖏᖅᑕᐅᒍᓐᓇᖏᑉᐸᑦ ᓇᓗᓇᐃᖅᑕᐅᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᑐᑦᓯᕋᕈᓐᓇᖅᑐᖅ Tribunal-ᑯᓐᓄᑦ ᐃᑎᕈᓐᓇᐅᑎᑖᕈᒪᓗᓂ ᐱᔾᔪᑎᓂ ᐱᓪᓗᒍ.

21.7.12

ᐃᓄᒃ ᐱᔪᓐᓇᐅᑎᓕᒃ ᐅᔭᕋᓐᓂᐊᕈᓐᓇᕐᓂᕐᒧᑦ, ᑐᑦᓯᕋᓕᕈᓂ ᐋᖅᑭᒋᐊᒃᑲᐃᔨᒃᑯᓐᓄᑦ, ᐃᒻᒥᒃᑰᖓᔪᒥᒃ ᑐᑦᓯᕋᐅᑎᓕᐅᕆᐊᓕᒃ ᐊᑐᓂᑦ ᐃᒻᒥᒃᑰᖅᑐᓄᑦ ᐃᓄᐃᑦ ᓄᓇᖁᑎᖏᓐᓄᑦ, ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑦ ᐃᒻᒥᒃᑯᐊᖅᑎᖅᑐᓂᒃ ᓇᓗᓇᐃᔭᐃᔨᒧᑦ, ᑕᐃᑦᓱᒪ ᐃᓅᑉ ᐱᔪᓐᓇᐅᑎᒥᒃ ᐊᑐᕐᕕᒋᒍᒪᔭᖓ. ᐋᖅᑭᒋᐊᒃᑲᐃᔨᒃᑯᑦ ᐃᓱᒪᒋᔭᖃᖃᓯᐅᑎᓂᐊᖅᑐᑦ ᑲᖑᓇᖅᑑᒋᐊᖃᕐᓂᖓᓂᒃ ᐅᔭᕋᓐᓂᐊᖅᑎᓄᑦ.

21.7.13

ᐃᓄᒃ ᐱᔪᓐᓇᐅᑎᖃᓐᖏᑦᑐᑦ ᐃᑎᕈᓐᓇᕐᓂᕐᒧᑦ ᐆᒪ ᐊᑖᓂ ᐊᖏᕈᑎᐅᑉ, ᐃᑎᕈᓐᓇᕆᐊᓕᒃ ᐃᓄᐃᑦ ᓄᓇᖁᑎᖏᓐᓄᑦ ᐊᑐᕐᓗᓂ ᐱᔪᓐᓇᐅᑎᒥᒃ ᒪᓕᒐᕐᔪᐊᑉ ᐊᑖᓂ ᕿᓂᕐᓂᕐᒧᑦ, ᐱᕙᓪᓕᐊᑎᑦᓯᓂᕐᒧᑦ, ᓴᖅᑮᓂᕐᒧᑦ ᐅᕝᕙᓗ ᐊᐅᓪᓛᑎᑦᓯᓂᕐᒧᑦ ᐅᔭᕋᑦᓯᐊᕙᓐᓂᒃ ᓄᓇᒥ ᐊᓯᖏᓐᓂᒃ ᐃᓄᐃᑦ ᓄᓇᖁᑎᖏᑦᑕ, ᐱᕕᖃᖅᑎᑕᐅᒍᑕᐅᔪᑦ ᐃᓚᖓ 8-ᒥ ᐊᑑᑎᓂᐊᖅᑐᑦ ᓴᖅᑭᑦᑕᐅᖅᐸᑕ ᐋᖅᑭᒋᐊᒃᑲᐃᔨᒃᑯᑦ ᓵᖓᓐᓂ ᑕᐃᒫᒃ ᐃᑎᕈᓐᓇᐅᑎᑕᖃᕆᐊᖃᕆᐊᖓ.

21.7.14 - ᐊᓯᖏᑦ ᑮᓇᐅᔭᓕᐅᕋᓱᐊᕈᑕᐅᔪᑦ

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖅᓯᒪᑐᐊᖅᐸᑕ ᐱᔪᓐᓇᐅᑎᒥᒃ ᑕᖅᑳᓐᖔᖅᑐᓄᑦ ᐃᑳᕈᓐᓇᑎᑦᓯᓪᓗᑎᒃ ᐃᓄᐃᑦ ᓄᓇᖁᑎᖏᑦᑎᒍᑦ ᑮᓇᐅᔭᓕᐅᕋᓱᐊᕐᓂᖅ ᐱᔾᔪᑕᐅᓪᓗᓂ ᑭᓯᐊᓂ ᐊᖏᖃᑎᒌᒍᓐᓇᐃᓕᖅᑲᑉᐸᑕ ᐊᑭᓕᐅᑎᓪᓗᐊᓂᒃ, ᖃᓄᐃᔾᔪᑕᐅᔪᖅ ᑐᓂᔭᐅᒋᐊᓕᒃ Tribunal-ᑯᓐᓄᑦ ᖃᓄᖅᑑᕈᑕᐅᓂᐊᖅᑎᓪᓗᒍ.

21.7.15

ᐃᓄᒃ ᐃᑎᕈᓐᓇᕆᐊᖃᑐᐊᖅᐸᑦ ᐃᑳᕐᓗᓂ ᐃᓄᐃᑦ ᓄᓇᖁᑎᖏᓐᓂ ᑮᓇᐅᔭᓕᐅᕋᓱᐊᕐᓂᖅ ᐱᔾᔪᑕᐅᓪᓗᓂ, ᐅᖃᐅᓯᐅᓯᒪᓐᖏᑉᐸᓪᓗ ᐅᕙᓂ ᐃᓛᒃᑰᖅᑐᒥ, ᑕᐃᓐᓇ ᐃᓄᒃ ᐃᑎᕈᓐᓇᖅᑎᑕᐅᓂᐊᖅᑐᖅ, ᐱᖃᓯᐅᑎᑦᓱᑎᒃ ᐊᕐᕌᒍ ᐃᓚᖓᓂ ᐊᑲᐅᓈᕋᐃᑉᐸᑦ, ᐊᖏᖅᑕᐅᓯᒪᓗ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐅᕝᕙᓗ, ᐊᖏᖅᑕᐅᔪᖃᖅᐸᓪᓕᐊᓐᖏᑐᐊᖅᐸᑦ ᐋᔩᖃᑎᒌᑦ ᓵᖓᓐᓃᓚᐅᖅᑎᓪᓗᒋᑦ, ᑐᓐᖓᕕᒋᑦᓱᒍ ᐃᓛᒃᑯᑦ 38 ᐅᓪᓗᐃᑦ 30 ᐃᓗᐊᓐᓂ ᑐᑦᓯᕌᖑᓚᐅᖅᑎᓪᓗᒋᑦ,

(a)

ᓴᖅᑭᖅᑕᐅᑉᐳᑦ ᑕᐃᓐᓇ ᐃᓄᒃ ᐆᑦᑐᖅᓯᒪᒋᐊᖓ ᐅᓪᓗᐃᑦ 60 ᐊᑖᓂᐅᓐᖏᑦᑐᖅ, ᐅᖃᖃᑎᖃᕐᓂᕐᒥᒃ ᐃᑎᕈᓐᓇᕐᓂᕐᒥᒃ ᐱᑦᓯᐊᖅᓱᓂ,

(b)

ᓇᓗᓇᐃᖅᑕᐅᑉᐸᑦ ᐃᑎᓪᓚᕆᒋᐊᖃᕐᓂᖓ ᑮᓇᐅᔭᓕᐅᕋᓱᐊᕐᓂᖅ ᐱᔾᔪᑕᐅᓪᓗᓂ ᐊᒻᒪᓗ ᐃᑎᕈᓐᓇᕐᓂᖅ ᐊᓯᐊᒍᑦ ᑎᒥᒃᑯᑦ ᑮᓇᐅᔭᑎᒍᓪᓘᓐᓃᑦ ᐊᔪᕐᓇᖅᐸᑦ, ᐊᒻᒪᓗ

(c)

ᓇᓗᓇᐃᖅᑕᐅᓗᓂ ᐊᖅᑯᑎᓂᐊᖅᑐᖅ ᒥᑭᓪᓕᑎᒃᑲᓐᓂᖁᓪᓗᒋᑦ ᓱᕋᓐᓂᐅᑐᐃᓐᓇᕆᐊᓖᑦ ᐅᓚᕕᑕᐅᓂᖏᓪᓗ ᐃᓄᐃᑦ ᐊᑐᖅᐸᑦᑕᖏᑦᑕ,

ᐊᒻᒪᓗ ᑐᓐᖓᕕᒋᑦᓱᒋᑦ ᐋᔩᖃᑎᒌᑦ ᑲᑎᒪᔨᖏᑦᑕ ᖃᐅᔨᔭᖏᑦ, ᐋᖅᑭᒋᐊᒃᑲᐃᔨᒃᑯᑦ, ᑐᓐᖓᕕᒋᓗᒍ ᐃᓚᖓ 8, ᑐᓂᓯᓯᒪᑉᐸᑕ ᐃᑎᕈᓐᓇᐅᑎᒥᒃ. ᐃᑎᕈᓐᓇᐅᑎᐅᑎᑕᐅᔪᖅ ᐱᖃᓯᐅᔾᔨᓂᐊᖅᑐᖅ ᐃᒪᐃᓕᖓᓂᐅᔪᓂᒃ ᒪᓕᒋᐊᓕᓐᓂᓪᓗ ᒥᑭᓪᓕᑎᒃᑲᓐᓂᖁᓪᓗᒍ ᓱᕋᓐᓂᐅᒍᓐᓇᖅᑐᖅ ᐅᓚᕕᑕᐅᓂᖓᓪᓗ ᐃᓄᐃᑦ ᐊᑐᖃᑦᑕᖅᑕᖏᑦᑕ.

ᐃᓚᖓ 8

ᓄᓇᐅᑉ ᕐᑳᖓᓄᑦ ᐋᖅᑭᒋᐊᒃᑲᐃᔩᑦ

21.8.1 - ᓴᖅᑮᓂᖅ ᐱᔪᓐᓇᕐᓂᖃᕐᓂᕐᓗ

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᓖᑦ ᐱᔭᕆᐊᖃᖅᑎᑦᓯᓗᑎᒃ ᒐᕙᒪᒃᑯᓐᓂᒃ ᓴᖅᑮᓂᕐᒥᒃ ᑲᔪᓯᑎᑦᓯᓂᕐᒥᓪᓗ ᐃᒻᒥᒃᑯᑦ ᓄᓇᐅᑉ ᕐᑳᖓᒍᑦ ᐋᖅᑭᒋᐊᒃᑲᐃᔨᒃᑯᓐᓂᒃ (“ᐋᖅᑭᒋᐊᒃᑲᐃᔨᒃᑯᑦ”) ᐃᒪᐃᓐᓂᐊᖅᑐᑦ, ᐃᓗᐊᓂ ᓄᓇᕗᑦ:

(a)

ᑐᓂᓯᕙᓪᓗᑎᒃ ᐃᑎᕈᓐᓇᐅᑎᓂᒃ ᐊᐅᓚᑦᓯᔨᓄᑦ ᐊᑐᕐᓂᐊᕐᓗᑎᒃ ᓇᔫᑎᓂᐊᕐᓗᑎᓪᓗ ᓄᓇᓂ ᐱᔭᕆᐊᖃᕐᓂᓂ ᒪᓕᓪᓗᖑ ᐊᐅᓚᓂᖏᓐᓄᑦ ᐊᒻᒪᓗ ᑐᓐᖓᕕᒋᑦᓱᒍ ᐊᑭᓖᓂᖅ ᐃᑎᕈᓐᓇᐅᑎᒥᒃ ᓇᒻᒥᓂᓕᓐᓄᑦ ᓇᔪᒐᓕᒻᒧᓘᓐᓃᑦ ᐃᓕᑕᖅᓯᔾᔪᑎᒋᓪᓗᒍ ᐊᑑᑎᒋᐊᖃᕐᓂᕐᒥᒃ ᑎᒍᓯᔪᒧᑦ, ᐊᑭᖓ ᐋᖅᑭᑦᓯᒪᓂᐊᖅᓱᓂ ᒪᓕᒐᖅᑎᒍᑦ ᑕᕝᕘᓇᓪᓗᐊᖅ;

(b)

ᓇᓚᓐᓂᖅᑕᖃᕐᓗᓂ ᓇᓗᓇᐃᖅᓯᓗᑎᒃ ᐊᑭᓕᕆᐊᖃᓕᓐᓂᒃ ᓄᓇᐅᕐ ᕐᑳᖓᓂᒃ ᑎᒍᒥᐊᖅᑎᓄᑦ;

(c)

ᕿᒥᕐᕈᓕᐅᒥᔮᖅᐸᓪᓗᑎᒃ ᖃᓄᐃᓪᓗᐊᕐᓂᖏᓐᓂᒃ ᐊᑭᓕᐅᑕᐅᔪᑦ ᐊᑖᓂ ᐃᑎᕈᓐᓇᐅᑎᐅᑉ;

(d)

ᓄᖅᑲᑎᖅᓯᓂᖅ ᓇᐅᑐᐃᓐᓇᕐᒥᒃ ᐃᑎᕈᓐᓇᐅᑎᒥᒃ, ᓈᓚᓐᓂᖅᑕᖃᓚᐅᖅᑎᓪᓗᒍ ᓄᓇᐃᑦ ᐊᑐᖅᑕᐅᒍᓐᓃᖅᐸᑕ ᐱᔾᔪᐅᑕᐅᑎᑕᐅᓯᒪᔪᓄᑦ; ᐊᒻᒪᓗ

(e)

ᐊᓯᖏᑦ ᐊᐅᓚᓂᐅᑎᑕᐅᓯᒪᑐᐃᓐᓇᕆᐊᓖᑦ ᐊᖏᕈᑎᒥᒃ ᒪᓕᒐᖅᑎᒍᓪᓘᓐᓃᑦ.

21.8.2

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᕐᑳᖓᓂᒃ ᑎᒍᒥᐊᖅᑎᐅᑉᐸᑕ, ᐊᑭᓖᒋᐊᖃᔾᔮᖏᑦᑐᑦ ᐊᑭᒋᔭᐅᔪᓂᒃ ᓴᖅᑮᓂᕐᒧᑦ ᐊᐅᓚᓂᖓᓐᓄᓪᓘᓐᓃᑦ ᐋᖅᑭᒋᐊᒃᑲᐃᔨᒃᑯᑦ. ᒐᕙᒪᒃᑯᑦ ᓴᖅᑮᒍᓐᓇᖅᑐᑦ ᑲᔪᓯᑎᑦᓯᓗᑎᓪᓗ ᐋᖅᑭᒋᐊᒃᑲᐃᔨᒃᑯᓐᓄᑦ ᑕᐃᒪᐃᓕᖓᒐᓗᐊᖅᑎᓪᓗᒍ ᑕᕝᕙᐅᖏᓐᓂ ᑐᑦᓯᕌᖑᓂᖓᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐋᖅᑭᒋᐊᒃᑲᐃᔨᒃᑯᑦ ᑲᔪᓯᑎᑦᓯᑐᐊᖅᐸᑕ ᐊᐅᓚᓂᒋᐊᓕᓐᓂᒃ ᓇᓗᓇᐃᔭᖅᑕᐅᓯᒪᔪᓂᒃ 21.8.1-ᒥ.

21.8.3

ᓇᓗᓇᐃᔭᖅᑕᐅᑎᓪᓗᒍ ᐊᑭᓕᐅᑕᐅᒋᐊᓕᒃ ᓇᓗᓇᐃᔭᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᑦᑐᐊᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ, ᐋᖅᑭᒋᐊᒃᑲᐃᔨᒃᑯᑦ ᐃᓱᒪᖃᕆᐊᓖᑦ ᐅᑯᓇᓐᖓᑦ,

(a)

ᓂᐅᕕᐊᑦᓴᐅᒍᓂ ᐊᑭᓪᓗᐊᖓᓂᒃ ᓄᓇᐅᑉ

(b)

ᐊᑐᖅᑕᐅᒍᓐᓃᕐᓂᖓ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐃᓄᓐᓄᓪᓗ,

(c)

ᐊᑦᑐᖅᑕᐅᓂᖏᑦ ᐆᒪᔪᕋᓱᐊᕐᓂᕆᕙᑦᑕᖏᑦᑕ ᐃᓄᐃᑦ,

(d)

ᐊᑦᑐᖅᑕᐅᓂᕐᓗᓐᓂᖅ ᐊᑐᖅᑕᐅᓂᕐᒧᑦ ᓇᔪᖅᑕᐅᓂᕐᒧᓪᓘᓐᓃᑦ, ᐊᓯᖏᑦᑕ ᐃᓄᐃᑦ ᓄᓇᖁᑎᖏᑦᑕ ᐊᑐᖅᑕᐅᖏᑦᑐᑦ ᐅᕝᕙᓗ ᓇᔪᖅᑕᐅᖏᑦᑐᑦ,

(e)

ᓱᕋᑦᑕᐅᓂᕆᑐᐃᓐᓇᕆᐊᓕᖓ ᓄᓇᐅᑉ ᐊᑐᖅᑕᐅᔫᑉ ᓇᔪᖅᑕᐅᔫᓪᓘᓐᓃᑦ,

(f)

ᐸᕝᕕᓴᓐᓂᖅ, ᐊᑲᕐᕆᑎᑦᓯᖏᓐᓂᒃ ᓂᐱᖃᖅᑎᑦᓯᓂᕐᓗ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐃᓄᓐᓄᓪᓗ,

(g)

ᐱᖅᑯᓯᖅᑎᒍᑦ ᐊᑦᑐᐊᓂᖓ ᐃᓄᐃᑦ ᓄᓇᒧᑦ,

(h)

ᐊᔾᔨᐅᖏᑦᑐᒥᒃ ᐊᑑᑎᖃᕐᓂᖓ ᓄᓇᐅᑉ ᐃᓄᓐᓄᑦ,

(i)

ᖃᑦᓯᐅᓂᖏᑦ ᐊᑭᓖᓪᓗᐊᕈᓐᓇᕐᓗᑎᒃ ᐊᑭᓕᕆᐊᓕᓐᓂᒃ ᐊᑦᑐᐊᔪᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᕿᒥᕐᕈᓂᖏᓐᓄᑦ ᑕᐃᒪᐃᑦᓴᕆᐊᖃᕐᓂᕋᖅᑕᐅᑉᐸᑕ ᐋᖅᑭᒋᐊᒃᑲᐃᔨᒃᑯᓐᓄᑦ,

(j)

ᖃᑦᓱᐅᓂᖏᑦ ᐊᑭᓕᐅᑕᐅᓪᓗᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᑐᑦᓯᕋᐅᑎᓅᖓᔪᑦ ᐃᑎᕈᓐᓇᐅᑎᓄᑦ ᑲᒪᒋᔭᐅᓂᖏᓐᓄᓪᓗ, ᐊᒻᒪᓗ

(k)

ᐊᓯᖏᑦ ᐃᓗᓕᕆᔭᐅᑎᑕᐅᑐᐃᓐᓇᕆᐊᓖᑦ ᒪᓕᒐᖅᑎᒍᑦ, ᑭᓯᐊᓂ ᐃᓱᒪᒋᔭᐅᔾᔮᖏᑦᑐᖅ ᐅᑎᖅᑎᑦᓯᓂᕐᒧᑦ ᐊᑭᖓ ᐅᕝᕙᓘᓐᓃᑦ ᐃᑎᕈᑎ ᐊᑭᓕᕆᐊᓕᒃ.

21.8.4

ᓯᕗᕐᖓᓂ ᑐᓂᓯᓂᐅᑉ ᐃᑎᕈᓐᓇᐅᑎᒥᒃ ᐃᓄᐃᑦ ᓄᓇᖁᑎᖏᓐᓄᑦ, ᑐᑦᓯᕋᖅᑐᖅ ᐊᑭᓖᖅᑳᕆᐊᓕᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐃᑎᕈᑎᐅᑉ ᐊᑭᖓᓂᒃ ᐊᒻᒪᓗ 80%-ᖓᓂᒃ ᑭᖑᓪᓕᖅᐹᒥ ᐊᑭᓖᔾᔪᑎᒋᒍᒪᓯᒪᔭᒥ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᒧᑦ ᑐᓂᔭᐅᓐᖏᓐᓂᖓᓂ ᐋᖅᑭᒋᐊᒃᑲᐃᔨᒃᑯᓐᓄᑦ.

21.8.5

ᐅᖃᐅᓯᐅᔪᖅ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᑐᖅᑕᐅᓂᖏᑦ ᑎᑎᕋᖅᓯᒪᔪᓂ 21.8.3- ᐊᒻᒪᓗ 21.8.4-ᐱᖃᓯᐅᔾᔨᓂᐊᖅᑐᑦ, ᐊᑲᐅᓈᑐᐊᕋᐃᑉᐸᑦ, ᓇᐅᑐᐃᓐᓇᕐᒥᒃ ᓇᔪᒐᖃᖅᑐᒥᒃ ᓄᓇᒥᒃ ᐅᖃᐅᓯᐅᔪᒥᒃ, ᐊᒻᒪᓗ ᐋᖅᑭᒋᐊᒃᑲᐃᔨᒃᑯᑦ ᐋᖅᑭᑦᓱᐃᒍᓐᓇᖅᑐᑦ ᐊᑭᓕᕆᐊᓕᓐᓂᒃ ᐊᑯᕐᖓᓐᓂ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᓇᔪᒐᓖᑦ.

21.8.6

ᐃᓄᐃᑦ ᓄᓇᖁᑎᖏᓐᓅᖓᔪᓄᑦ, ᕿᒥᕐᕈᓂᐅᔪᖅ ᐊᑖᓂ ᑎᑎᕋᖅᓯᒪᔪᖅ 21.8.1(c) ᐊᑖᓃᓐᓂᐊᖅᑐᑦ ᐊᕐᕌᒍᐃᑦ ᑕᓪᓕᒪᑦ ᐅᕝᕙᓗ ᐱᕕᖃᖅᑎᑕᐅᓂᐅᔪᖅ ᐊᑐᕐᓗᒍ ᒪᓕᒐᕐᒥ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑐᑦᓯᕋᖅᑐᕐᓗ ᕐᑳᖐᓐᓈᑎᑦᓯᒍᓐᓇᖅᑐᑦ ᕿᒥᕐᕈᓂᐅᔭᕆᐊᓕᒻᒥᒃ.

21.8.7

ᒪᓕᒐᖅ ᐱᕕᖃᖅᑎᑦᓯᓂᐊᖅᑐᖅ ᐊᕝᕙᓪᓗᐊᖏᑦ ᕿᒥᕐᕈᔩᑦ ᓇᐅᑐᐃᓐᓇᕐᒥᒃ ᑲᒪᔪᑦ ᐃᓄᐃᑦ ᓄᓇᖁᑎᖏᓐᓂᒃ ᓄᓇᓕᐅᒋᐊᓖᑦ ᓄᓇᕗᒻᒥ.

21.8.8

ᐋᖅᑭᒋᐊᒃᑲᐃᔩᑦ ᐊᐅᓚᓂᖃᕆᐊᓖᑦ ᐊᑐᕐᓗᑎᒃ ᑲᓇᑕᒥ ᐃᓕᑕᕆᔭᐅᓯᒪᔪᓂᒃ ᐅᖃᐅᓯᕐᓂᒃ ᑕᐃᒪᐃᑦᓴᕆᐊᖃᕐᓂᖅ ᒪᓕᓪᓗᒍ ᒪᓕᒐᖅᑎᒍᑦ ᐊᑐᐊᒐᖅᑎᒍᓪᓘᓐᓃᑦ, ᐊᒻᒪᓗ ᑐᑦᓯᕌᖑᑐᐊᖅᐸᑕ ᓇᐅᑐᐃᓐᓇᕐᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐃᓄᑦᑎᑐᑦ.

ᐃᓚᖓ 9

ᐊᖅᓵᖅᓯᓂᖅ

21.9.1

ᓇᐅᑐᐃᓐᓇᖅ ᐃᓄᒃ ᐅᕝᕙᓘᓐᓃᑦ ᐱᔪᓐᓇᕐᓂᖃᖅᑎᑕᐅᑦᓱᓂ ᑭᒡᒐᖅᑐᐃᔨ ᓇᐅᑐᐃᓐᓇᕐᒥᒃ ᐃᓄᒻᒥᒃ, ᐱᔪᓐᓇᕐᓂᖃᖅᑐᖅ ᐊᖅᓵᖅᓯᓂᕐᒥᒃ ᐊᑖᓂ ᒐᕙᒪᑐᖃᒃᑯᑦ ᐊᕕᑦᑐᖅᓯᒪᔪᓪᓘᓐᓃᑦ ᒪᓕᒐᖓᑦᑕ (ᐊᖅᓵᖅᓯᓂᕐᒧᑦ ᐱᔪᓐᓇᕐᓂᖅ), ᐊᑑᑎᒍᓐᓇᖅᑐᖅ ᐱᔪᓐᓇᕐᓂᕐᒥᒃ ᐊᖅᓵᖅᓯᓂᕐᒧᑦ ᑐᓐᖓᕕᒋᑦᓱᒋᑦ ᒪᓕᒐᐃᑦ ᐃᓘᓐᓇᐃᓐᓅᖓᔪᑦ ᐱᔪᓐᓇᕐᓂᖃᖅᑎᑕᐅᔪᑦ ᐊᖏᕈᑎᒃᑯᑦ.

21.9.2

ᐃᓘᓐᓇᑦᓯᐊᑎᒃ ᐅᕙᓃᑦᑐᑦ ᐃᓚᖓᓂ ᑐᑭᖃᖅᑎᑕᐅᓂᐊᓐᖏᑦᑐᑦ ᐊᕕᑦᑐᖅᓯᒪᔪᓂ ᒐᕙᒪᓂ ᓴᓐᖏᓂᖃᕐᓂᖅᓴᐅᓂᕐᒥᒃ ᐊᖅᓵᕐᓂᕐᒧᑦ ᐊᖓᑖᓄᑦ ᒪᓕᒐᖅᑎᒎᖅᑐᑦ ᐊᕕᑦᑐᖅᓯᒪᔪᕐᔪᐊᓂ.

21.9.3

ᐊᖅᓵᖅᓯᔪᖃᖅᐸᑦ ᐊᓯᐊᒍᑦ ᐊᖅᓵᖅᓯᓂᐅᑉ ᐅᖃᐅᓯᐅᔫᑉ ᑎᑎᕋᖅᓯᒪᔪᒥ 21.9.4-ᒥ, ᐊᖏᖅᑕᐅᒋᐊᓖᑦ ᑲᓇᑕᐅᑉ ᐊᐅᓚᑦᓯᔨᖏᑦᑕ ᑭᒡᒐᖅᑐᖅᑎᖓᓐᓄᑦ.

21.9.4

ᐊᖅᓵᕐᓂᕐᒧᑦ ᒪᓕᒐᖅ ᐊᑐᓕᖅᓯᒪᔪᖅ ᑭᓐᖑᕐᖓᓂ ᐅᓪᓘᑉ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᐊᑑᑎᖏᓐᓄᑦ ᐃᓄᐃᑦ ᓄᓇᖁᑎᖏᓐᓄᑦ, ᐃᒪᐃᓕᖓᓂᐊᖅᑐᑦ ᐊᑦᓯᓂᖅᐹᑦ ᐊᐅᓚᓂᕆᒋᐊᓕᖏᑦ: 0

(a)

ᖃᐅᔨᒃᑲᐃᓂᖅ ᐊᖅᓵᖅᓯᒐᔭᕆᐊᒥᒃ ᑐᓂᔭᐅᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ;

(b)

ᐱᕕᑦᓴᖃᕐᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᕿᐱᓗᓐᓂᕐᒥᒃ ᐊᖅᓵᖅᑕᐅᓂᕐᒥᒃ ᑐᓐᖓᕕᖃᕐᓗᑎᒃ ᐊᖅᓵᖅᓯᒍᓐᓇᕐᓂᐅᔪᑦ ᒪᓕᑦᓯᒪᓐᖏᓐᓂᖏᓐᓂᒃ ᐊᖅᓵᕐᓂᕐᒧᑦ ᒪᓕᒐᕐᒥᒃ, ᐱᕕᑦᓴᖃᕐᓂᐅᑦᓱᓂᓗ ᑐᓴᖅᑕᐅᓂᕐᒥᒃ ᕿᐱᓗᓐᓂᖓᑦᑕ; ᐊᒻᒪᓗ

(c)

ᐊᑭᓕᖅᑕᐅᓂᐅᒐᔭᖅᑐᖅ ᐅᖃᖃᑎᒌᓐᓂᒃᑯᑦ ᐊᒻᒪᓗ, ᑲᔪᓯᒍᓐᓇᖏᑉᐸᑦ, ᐅᖃᐅᓯᕆᓗᒋᑦ arbitration panel-ᓄᑦ ᐅᕝᕙᓗ ᑲᑎᒪᔨᕋᓛᓄᑦ ᐅᖃᐅᓯᐅᔪᓄᑦ ᑎᑎᕋᖅᓯᒪᔪᒥ 21.9.8-ᒥ.

21.9.5

ᐊᖅᓵᖅᓯᒍᓐᓇᕐᓂᓖᑦ ᑎᒍᓯᑉᐸᑕ ᐱᖁᑎᒋᔭᐅᔪᒥᒃ ᐊᑭᓖᓗᑎᒃ, ᑕᐃᒃᑯᐊ ᓄᓇᐃᑦ ᐃᓄᓐᓄᑦ ᓄᓇᖁᑎᒋᔭᐅᒍᓐᓃᕐᓂᐊᖅᑐᑦ. ᓄᓇᐃᑦ ᐱᔭᐅᔪᑦ ᐊᑭᓕᐅᑕᐅᓪᓗᑎᒃ ᐊᖅᓵᖅᓯᓂᕐᒧᑦ ᐃᓄᐃᑦ ᓄᓇᖁᑎᒋᓂᐊᖅᑕᖑᑦ. ᓄᓇᐃᑦ ᐊᖅᓵᖅᓯᔾᔪᑕᐅᓯᒪᔪᑦ ᐱᒋᐊᑐᒍᓐᓃᖅᐸᑕ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᓇᓖᕌᕋᑦᓴᖃᕐᓂᐊᖅᑐᑦ ᑕᖅᑭᓂᒃ 6-ᓂᒃ ᑭᖑᕐᖓᓐᓂ ᓇᓗᓇᐃᖅᑕᐅᔪᖃᓚᐅᖅᑎᓪᓗᒍ ᑎᒍᓯᒃᑲᓂᕐᓂᕐᒥᒃ ᑕᐃᒃᑯᓇᓐᖓᑦ ᓄᓇᓂᒃ ᐃᓄᓐᓄᑦ ᓄᓇᖁᑕᐅᓂᐊᖅᑎᓪᓗᒋᑦ. ᐊᖏᖃᑎᒌᒐᓱᐊᖅᑑᒃ ᐊᖏᖃᑎᒌᒍᓐᓇᖏᑉᐸᑕ ᐊᑭᖓᓂᒃ, ᑐᓂᔭᐅᓂᐊᖅᑐᖅ ᐊᖏᖃᑎᒌᑦᑐᖃᕈᓐᓇᐃᓪᓕᑎᓪᓗᒍ ᐋᖅᑭᑦᓱᐃᔨᒃᑯᓐᓄᑦ ᑲᑎᒪᔨᕋᓛᓄᓪᓘᓐᓃᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 21.9.8.

21.9.6

ᐃᓄᐃᑦ ᓄᓇᖁᑎᖏᑦ ᐊᖅᓵᖅᓯᔾᔪᑕᐅᑉᐸᑕ, ᐊᖅᓵᖅᓯᔪᖅ, ᐊᔪᓐᖏᑐᐊᖅᐸᑦ, ᐊᑭᓕᐅᑕᐅᓚᐅᖅᑎᓪᓗᒋᑦ ᐊᓯᖏᑦ ᓄᓇᐃᑦ ᐊᔾᔨᒐᓚᖏᑦ ᐊᑭᖃᑎᓪᓗᐊᖏᓪᓗ ᓄᓇᕗᒻᒥ, ᐅᕝᕙᓗ ᑕᒪᒃᑮᒃ ᓄᓇᐃᑦ ᑮᓇᐅᔭᐃᓪᓗ.

21.9.7

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᑭᓕᖅᑕᐅᒋᐊᑐᓐᖏᑦᑐᑦ ᐃᓇᖐᔪᑦᓴᓂᒃ ᓄᓇᓂᒃ.

21.9.8

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖅᓵᖅᓯᔪᓪᓗ ᓱᓕ ᐊᖏᖃᑎᒌᒍᓐᓇᖏᑉᐸᑕ ᐊᑭᒋᔭᐅᒋᐊᓕᓐᓂᒃ, ᐱᕕᖃᖅᑎᑕᐅᒍᑎᒃ, ᑲᔪᓯᓐᖏᑉᐸᑕ, ᑭᖑᓪᓕᖅᐹᒥ ᐋᖅᑭᑦᑕᐅᓂᐊᖅᑐᖅ ᐊᑭᓕᕆᐊᓕᒃ ᐊᖏᖃᑎᒌᑦᑐᖃᕈᓐᓇᐃᓪᓕᑎᓪᓗᒍ ᐋᖅᑭᑦᓱᐃᔨᒃᑯᓐᓄᑦ ;

(a)

ᑕᐃᒪᐃᓕᖓᑎᑕᐅᒻᒪᑦ ᐃᓛᒃᑯᑦ 38-ᒥ, ᐋᒡᒐᐅᒐᓗᐊᖅ ᐊᖅᓵᖅᑕᐅᓂᖅ ᐊᑖᓃᖅᓱᒻ ᑕᓇᑕᒥ ᐆᒻᒪᖅᑯᓯᕆᔩᑦ ᑲᑎᒪᔨᖏᑦᑕ ᒪᓕᒐᕐᔪᐊᖓᓐᓂ; ᐅᕝᕙᓗ

(b)

ᐊᖅᓵᖅᓯᓂᕐᒧᑦ ᐊᑖᓂ ᑲᓇᑕᒥ ᐆᒪᖅᑯᓯᕆᔨᒃᑯᑦ ᑲᑎᒪᔨᖏᑦᑕ ᒪᓕᒐᕐᔪᐊᖓᓐᓂ, ᐊᖏᖃᑎᒌᑦᑐᖃᕈᓐᓇᐃᓪᓕᑎᓪᓗᒍ ᐋᖅᑭᑦᓱᐃᔨᒃᑯᓐᓄᑦ ᑎᓕᔭᐅᓯᒪᔪᓄᑦ ᐊᑖᓂ ᒪᓕᒐᕐᔪᐊᑉ ᐱᖃᓯᐅᑎᓗᓂ ᐊᑕᐅᓯᓂᖅ ᐱᓯᒪᔪᖅ ᓇᓗᓇᐃᖅᑕᐅᓯᒪᔪᓂ ᐃᓄᓐᓄᑦ ᑎᒥᖁᑕᐅᔪᓂᒃ. ᒥᓂᔅᑕ ᓴᖅᑮᓗᓂ ᐊᖏᖃᑎᒌᑦᑐᖃᕈᓐᓇᐃᓪᓕᑎᓪᓗᒍ ᐋᖅᑭᑦᓱᐃᔨᒃᑯᓐᓂᒃ ᓂᕈᐊᕐᓂᐊᖅᑐᖅ ᑲᑎᒪᔨᓂᒃ ᐊᔾᔨᒌᑦᑐᒥᒃ ᖃᐅᔨᒪᓂᓕᓐᓂᒃ, ᐊᒻᒪᓗ ᐊᑑᑎᓯᒪᔪᓂᒃ ᐊᑦᑐᐊᔪᓄᑦ, ᐃᓗᓕᕆᔭᐅᑎᑕᐅᔪᓄᑦ 21.9.9-ᒥ.

21.9.9

ᓇᓗᓇᐃᖅᑕᐅᑎᓪᓗᒍ ᖃᑦᓯᐅᓂᖓ ᐊᑭᓕᖅᑕᐅᒋᐊᓕᐅᑉ ᓇᓗᓇᐃᖅᑕᐅᓯᒪᔪᓄᑦ ᐃᓐᓄᑦ ᑎᒥᖁᑕᐅᔪᓄᑦ ᐊᖏᖃᑎᒌᑦᑐᖃᕈᓐᓇᐃᓪᓕᑎᓪᓗᒍ ᐋᖅᑭᑦᓱᐃᔨᒃᑯᓐᓄᑦ ᐅᕝᕙᓗ ᑲᑎᒪᔨᕋ?ᓛᓄᑦ ᐊᐅᓚᑕᐅᓂᐊᖅᑐᑦ ᐅᑯᓄᖓ:

(a)

ᓂᐅᕕᐊᖑᒍᓂ ᐊᑭᓪᓗᐊᖓ ᓄᓇᐅᑉ;

(b)

ᐊᑐᖅᑕᐅᒍᓐᓃᕐᓂᖓ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐃᓄᓐᓄᓪᓗ;

(c)

ᐊᑦᑐᖅᑕᐅᓂᖏᑦ ᐊᖑᓇᓱᓐᓂᖏᑦᑕ ᐃᓄᐃᑦ;

(d)

ᐊᑦᑐᖅᑕᐅᓂᕐᓗᓐᓂᐅᔪᑦ ᑎᒍᓯᓯᒪᔪᓄᑦ, ᓄᓇᓂᒃ ᑎᒍᒥᐊᖅᑕᐅᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ;

(e)

ᓱᕋᑦᑎᖅᑕᐅᓯᒪᑐᐃᓐᓇᕆᐊᓕᒃ ᓄᓇ ᑎᒍᔭᐅᓯᒪᔪᖅ;

(f)

ᐸᕝᕕᓴᓐᓂᖅ, ᐊᑲᐅᓈᓐᖏᓐᓂᖅ ᓂᐱᖃᓗᕐᓂᕐᓗ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐃᓄᓐᓄᓪᓗ;

(g)

ᐱᖅᑯᓯᖅᑎᒍᑦ ᐊᑕᓂᖓ ᐃᓄᐃᑦ ᓄᓇᒧᑦ;

(h)

ᐊᔾᔨᐅᖏᓐᓂᖓ ᐊᔾᔨᐅᖏᑦᑐᒥᓪᓗ ᐊᓐᓂᓇᕐᓂᖓ ᓄᓇᐅᑉ ᐃᓄᓐᓄᑦ;

(i)

ᐊᑭᓕᐅᑎᒃᓴᐅᓂᐊᖅᑐᒥᒃ ᓈᖕᒪᑦᑐᒥᒃ ᐊᑭᖃᕐᓗᓂ ᑖᒃᑯᓄᓐᖓᖓᔪᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᑦ ᖃᐅᔨᓴᕐᓂᖓᓄᑦ ᓈᖕᒪᒋᔭᖓᓂᒃ ᐊᖏᖃᑎᒌᒍᑕᐅᒐᓱᐊᖅᑐᒧᑦ ᐋᖅᑭᒋᐊᒃᑲᐃᔨᓄᑦ ᐅᕝᕙᓘᓐᓃᑦ ᑲᑎᒪᔨᕋᓛᓄᑦ

(j)

ᖃᑦᓯᐅᓂᖏᑦ ᐊᑭᓕᐅᑎᑦᓴᐃᑦ ᓈᒻᒪᓈᖅᓯᒪᑉᐸᑕ ᐊᑭᒋᔭᐅᔪᑦ ᐊᑦᑐᐊᔪᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᕿᒥᕐᖁᓂᖏᑦ ᓈᒻᒪᒋᔭᐅᓂᖏᑦ ᑐᓐᖓᕕᒋᓗᒋᑦ ᐊᖏᖃᑎᒌᑦᑐᖃᕈᓐᓇᐃᓪᓕᑎᓪᓗᒍ ᐋᖅᑭᑦᓱᐃᔨᒃᑯᓐᓄᑦ ᑲᑎᒪᔨᕋᓛᓄᓪᓘᓐᓃᑦ;

(k)

ᐊᓯᖏᑦ ᐃᓗᓕᖏᑦ ᐱᕕᖃᖅᑎᑦᓯᒍᑕᐅᔪᑦ ᒪᓕᒐᖅᑎᒍᑦ.

21.9.10

ᐊᖅᓵᖅᓯᒍᓐᓇᖅᑐᑦ ᓴᓐᖏᓂᖃᕋᔭᖅᑐᑦ ᐊᖅᓵᖅᓯᓂᕐᒥᒃ ᐃᓄᐃᑦ ᓄᓇᖁᑎᖏᓐᓂᒃ, ᐅᕝᕙᓗ ᐱᔪᒪᔭᕆᔭᐅᔪᓂᒃ ᐃᓗᐊᓂ ᐊᑖᓂ ᑎᑎᕋᖅᓯᒪᔪᖅ 21.9.1, ᑕᐃᓐᓇ ᐱᔪᓐᓇᕐᓂᐅᔪᖅ ᑲᔪᓯᑎᑕᐅᒋᐊᖃᓐᖏᑦᑐᖅ ᐃᒪᐃᑉᐸᑦ: ᐊᖅᓵᖅᓯᓂᖅ

(a)

12%-ᖓ ᐃᓄᐃᑦ ᓄᓇᖁᑎᖏᑦᑕ ᑎᒍᔭᐅᔪᑦ ᐅᓪᓗᖓᓂ ᐊᖏᕈᑕᐅᑎᓪᓗᒍ ᐊᖏᕈᑎ ᐅᕝᕙᓗ ᐱᔪᒪᔭᕆᔭᐅᔪᑦ ᐃᓗᐊᓂ ᐊᖅᓵᖅᓯᒍᑕᐅᒌᕐᓂᖅᐸᑦ ᐊᖅᓵᖅᓯᓯᒪᐃᓐᓇᕈᑕᐅᑉᐸᓪᓗ; ᐅᕝᕙᓗ

(b)

ᐃᓗᐊᓂ ᓄᓇᒥᒃ ᐊᑐᕐᓂᐅᑉ ᐅᖃᐅᓯᐅᔫᑉ ᓇᓪᓕᑐᐃᓐᓇᖏᓐᓂ ᐅᐃᒍᓂ 19-2 ᑎᑭᓪᓗᒍ 19-7, 12%-ᖓ ᐃᓄᐃᑦ ᓄᓇᖁᖏᑦᑕ

21.9.11

ᐋᖅᑭᓱᖅᑕᐅᑎᓪᓗᒋᑦ ᓄᓇᐃᑦ ᐊᖅᓵᖅᓯᔾᔪᑕᐅᔪᑦ ᑎᑎᕋᖅᓯᒪᔪᖅ 21.9.10-ᒥ, ᐃᓱᒪᒋᔭᐅᖃᓯᐅᑎᒋᐊᖃᓐᖏᑦᑐᑦ ᑕᐃᒃᑯᐊ ᖃᓄᐃᓕᖓᓂᐅᔪᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᖏᕈᑕᐅᓯᒪᔪᑦ ᐃᓇᖐᑎᓪᓗᒋᑦ ᓄᓇᐃᑦ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 21.9.6.

21.9.12

ᒐᕙᒪᒃᑯᑦ ᐱᔪᓐᓇᕐᓂᖃᖅᐸᑕ ᐊᑖᓂ ᑎᑎᕋᖅᓯᒪᔪᖅ 21.9.1, ᐱᔪᓐᓇᕐᓂᖃᖅᑎᑕᐅᓂᒃᑯᑦ ᐅᕘᓇ ᐃᓛᒃᑰᖅᑐᒃᑯᑦ, ᐊᖅᓵᓯᓗᑎᒃ ᐃᓄᐃᑦ ᓄᓇᖁᑎᖏᓐᓂᒃ ᐱᔭᕆᐊᖃᕈᓂᐅᑉ ᐱᔾᔪᑕᐅᓪᓗᓂ ᑭᓇᒃᑯᑐᐃᓐᓇᕐᓄᑦ ᐃᖏᕐᕋᔾᔪᑎᓄᑦ ᐊᖅᑯᑏᑦ, ᒐᕙᒪᒃᑯᑦ ᐊᑭᓖᒋᐊᑐᓐᖏᑦᑐᑦ ᓄᓇᓄᑦ ᑎᒍᔭᒥᓐᓄᑦ, ᐋᒡᒐᐅᒐᓗᐊᖅ ᐋᖅᑭᒋᐊᕈᑕᐅᔪᓄᑦ, ᑎᑭᐅᑎᓗᑎᒃ ᐅᖓᑖᓅᓐᖏᑦᑐᖅ,

(a)

ᐊᑐᓂᑦ ᐃᓄᐃᑦ ᓄᓇᖁᑎᖏᓐᓄᑦ, 5%-ᖓ ᑕᐃᑦᓱᒪ ᓄᓇᐅᑉ, ᐅᕝᕙᓗ

(b)

2%-ᖓ ᐃᓄᐃᑦ ᓄᓇᖁᑎᖏᑦᑕ ᑕᐃᑲᓂ ᐊᕕᑦᑐᖅᓯᒪᓂᕐᒥ ᓄᓇᒥᒃ ᐊᑐᕐᕕᐅᔪᒥ, ᐅᖃᐅᓯᐅᔪᒥ ᓇᓪᓕᑐᐃᓐᓇᖏᓐᓂᒃ ᐃᓚᒍᑕᐃᑦ 19-2 ᑎᑭᑦᓱᒍ 19-7, ᓄᓇᐃᑦ ᐃᓂᖃᕐᕕᒋᔭᖏᑦ.

ᓄᓇᐃᑦ ᑎᒍᔭᐅᔪᑦ ᐊᑖᓂ ᑖᒃᑯᐊ ᑎᑎᕋᖅᓯᒪᔪᑦ ᐱᔭᕆᐊᖃᕈᓐᓃᖅᐸᑕ ᐱᔾᔪᑕᐅᒍᑎᒋᓯᒪᔭᒥᓄᑦ, ᐅᑎᖅᑎᑕᐅᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᑭᖃᖅᑎᓐᓇᒋᑦ.

21.9.13

ᐋᖅᑭᓱᖅᑕᐅᑎᓪᓗᒋᑦ ᓄᓇᐃᑦ ᐊᖅᓵᖅᓯᔾᔪᑕᐅᔪᑦ ᐊᑖᓂ ᑎᑎᕋᖅᓯᒪᔪᖅ 21.9.10, ᓄᓇᐃᑦ ᑎᒍᔭᐅᔪᑦ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 21.9.12 ᐃᓱᒪᒋᔭᐅᖃᓯᐅᑎᓂᐊᖅᑐᑦ.

21.9.14

ᐊᖅᓵᖅᓯᓂᖅ ᐃᓄᐃᑦ ᓄᓇᖁᑎᖏᓐᓂᒃ ᐃᓗᐊᓐᓂ ᕼᐋᒻᒪᓚᒃᑯᑦ ᓄᓇᖁᑎᖏᑦᑕ ᕼᐋᒻᒪᓚᒃᑯᑦ ᐱᔾᔪᑕᐅᓪᓗᑎᒃ ᐊᖏᖅᑕᐅᖅᑳᕆᐊᓖᑦ ᐃᖏᕐᕋᓂᕆᒋᐊᓕᒻᒥᑎᒍᑦ ᐊᐅᓚᑦᓯᔩᑦ ᑭᒡᒐᖅᑐᖅᑎᖓᓐᓄᑦ ᐃᓄᐃᑦ ᓄᓇᖁᑎᖏᑦ ᐊᖅᓵᖅᓯᔾᔪᑕᐅᔪᑦ ᕼᐋᒻᒪᓚᒃᑯᑦ ᐱᔾᔪᑕᐅᓪᓗᑎᒃ ᐃᓱᒪᒋᔭᐅᖃᓯᐅᑎᓂᐊᖅᑐᖅ ᐋᖅᑭᓱᖅᑕᐅᓕᖅᐸᑕ ᐊᑖᓂ ᑎᑎᕋᖅᓯᒪᔪᑦ 21.9.10 ᑎᑭᓪᓗᒍ 21.9.12.

ᐃᓚᖓ 10

ᒪᓕᒐᕐᓂᒃ ᐊᑐᖅᑎᑦᓯᓂᖅ ᓴᐳᒻᒥᔭᕐᓂᕐᓗ

21.10.1 - ᐊᐅᓚᑦᓯᓂᖅ

ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᓇᐅᑐᐃᓐᓇᖅ ᐃᓄᒃ ᐃᑎᕈᓐᓇᕐᓂᕐᒧᑦ ᐱᔪᓐᓇᐅᑎᒥᓂᒃ ᐊᑐᖅᑐᖅ ᐊᑖᓂ ᐆᒪ ᐃᓛᒃᑰᖅᑑᑉ, ᐋᒡᒐᐅᒐᓗᐊᖅ ᐱᔪᓐᓇᐅᑏᑦ ᐅᖃᐅᓯᐅᔪᑦ ᐊᑖᓂ ᐃᓚᖓ 3 ᐊᒻᒪᓗ ᑎᑎᕋᖅᓯᒪᔪᓂ 21.5.10 ᑎᑭᑦᓱᖑ 21.5.12 ᐃᒪᐃᓐᓂᐊᖅᑐᑦ, ᑕᐃᒪᐃᑦᓴᕆᐊᖃᕈᑎᒃ, ᐱᓗᑎᒃ ᑖᒃᑯᓇᓐᖓᓪᓗᐊᖅ ᐱᔪᓐᓇᑎᑦᓯᒍᑕᐅᔪᓂᒃ ᐱᔭᕆᐊᓕᓐᓂᒃ ᐊᑖᓂ ᐃᓛᒃᑯᑦ 12 ᐊᒻᒪᓗ 13 ᓯᕗᕐᖓᓂ ᐊᑐᓚᐅᓐᖏᓂᕐᒥᓂ ᑕᐃᒃᑯᓇᓐᖓᑦ ᐱᔪᓐᓇᐅᑎᓂᒃ.

21.10.2 - ᐊᓯᖏᑦ

ᓇᐅᑐᐃᓐᓇᖅ ᐃᓄᒃ ᐱᔭᕆᐊᖃᓐᖏᑦᑐᖅ ᐱᖁᑎᒋᔭᐅᔪᒥᒃ ᐱᔪᒪᓂᖃᕐᓂᕐᒥᓪᓘᓐᓃᑦ ᐃᓄᐃᑦ ᓄᓇᖁᑎᖏᓐᓂᒃ.

21.10.3

ᐃᓄᐃᑦ ᐊᑐᖅᑐᑦ ᐱᔪᓐᓇᐅᑎᒥᒃ ᐊᑖᓂ ᐆᒪ ᐃᓛᒃᑰᖅᑑᑉ ᐊᐅᓚᔾᔭᒋᐊᕈᑎᑦᓴᖃᓐᖏᑦᑐᑦ ᐊᑭᕋᖅᑐᕐᓗᑎᒃ ᓇᓗᓇᐃᖅᑕᐅᓯᒪᔪᒥᒃ ᐃᓄᓐᓄᑦ ᑎᒥᐅᔪᓂᒃ ᔭᒐᐃᓂᕋᕐᓂᕐᒧᑦ ᓱᕋᑦᑐᓄᓪᓘᓐᓃᑦ ᐱᓯᒪᔪᓄᑦ ᐊᐅᓚᑕᐅᓂᖏᓐᓄᑦ ᑕᐃᒃᑯᐊ ᐱᔪᓐᓇᐅᑏᑦ.

21.10.4

ᑐᑭᓯᓇᖅᑎᒋᐊᒃᑲᓐᓂᕐᓗᒍ ᐃᓄᒃ ᑎᒍᒥᐊᖅᑎᐅᒍᓐᓇᖅᑐᖅ ᑕᖅᑳᓐᖓᑦ ᐱᔪᒪᓂᖃᕐᓂᐅᔪᒥᒃ.

ᐃᓚᖓ 11

ᐃᑎᕈᓐᓇᕐᓂᖅ ᑯᐃᓐ ᓄᓇᖁᑎᖏᓐᓄᑦ

21.11.1

ᐊᑲᐅᓈᖅᓯᒪᔪᒥᒃ ᑭᓇᒃᑯᑐᐃᓐᓇᕐᓅᖓᔪᒥᒃ ᐊᖅᑯᑎᑕᖃᓐᖏᑐᐊᖅᐸᑦ, ᒐᕙᒪᒃᑯᑦ ᐃᒪᐃᑦᓴᕆᐊᖃᓐᖏᑦᑐᑦ, ᐊᐅᓚᔾᔭᐃᓂᒃᑯᑦ ᐊᐅᓚᑦᓯᓂᒃᑯᓪᓘᓐᓃᑦ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑦᑐᐊᔪᓂᒃ, ᐅᕝᕙᓗ ᐊᐅᓚᑕᐅᓂᖏᑦᑎᒍᑦ ᓴᒃᑯᑕᐅᓂᖏᑦᑎᒍᓪᓘᓐᓃᑦ ᑯᐃᓐ ᓄᓇᖁᑎᖏᑦᑕ, ᐃᑎᖅᑎᑦᓯᑦᑕᐃᓕᒋᐊᖃᓐᖏᑦᑐᑦ ᐃᓄᓐᓂᒃ ᐃᓄᐃᑦ ᓄᓇᖁᑎᖏᓐᓄᑦ ᐊᖅᑯᑎᖃᕐᓗᑎᒃ ᑯᐃᓐ ᓄᓇᖁᑎᖏᓐᓂᒃ ᐊᑐᖃᑦᑕᕐᓂᖏᓐᓂᒃ ᑲᔾᔮᕆᔭᖃᕐᓂᖏᓐᓄᓪᓗ ᑕᐃᒃᑯᓇᓐᖓᑦ ᐃᓄᐃᑦ ᓄᓇᖁᑎᖏᓐᓂᒃ. ᐊᐅᓚᓂᕆᔭᖓ ᐃᑎᕈᓐᓇᕐᓂᐅᑉ ᑐᓐᖓᕕᖃᕐᓂᐊᖅᑐᖅ ᒪᓕᒐᖏᓐᓂᒃ ᐃᓘᓐᓇᐃᓐᓄᑦ ᐊᑦᑐᐊᔪᑦ.

ᐅᐃᒍᖓ 21-1

ᑭᓐᖓᕐᓂ ᑭᓇᒃᑯᑐᐃᓐᓇᕐᓄᑦ ᐃᑎᕐᕕᐅᒍᓐᓇᖅᑐᑦ ᓄᓇᐃᑦ

(ᑎᑎᕋᖅᓯᒪᔪᖅ 21.3.10)

ᐃᑎᕐᕕᐅᒍᓐᓇᖅᑐᓂᒃ ᓇᓗᓇᐃᔭᐃᔾᔪᑎ

ᑭᓇᒃᑯᑐᐃᓐᓇᕐᓄᑦ ᐃᑎᖅᑕᐅᒍᓐᓇᖅᑐᖅ ᓅᕙᐃᕝᕙ 1-ᒥᒃ ᒫᑦᓯ 31-ᒧᓄᑦ ᐊᕐᕌᒍᑕᒫᑦ, ᐃᖏᕐᕋᓂᖅ ᐱᔾᔪᑕᐅᓪᓗᓂ

ᐃᓂᖓ

30.5 ᒦᑕᐃᑦ (100-ᓗᐊᑦ ᐃᑎᒐᐃᑦ) ᒥᑦᑕᕐᕕᒃ ᐃᓄᐃᑦ ᓄᓇᖁᑎᖏᓐᓂ:

(a)

ᐆᑦᑐᖅᑕᐅᓯᒪᔪᖅ ᐅᓕᓐᓂᐅᒐᔪᑦᑐᒥᒃ ᐃᒪᖃᕐᕕᖏᓐᓂᒃ ᑭᓐᖓᐃᑦ ᐊᖅᑯᑎᖓᑦᑕ ᐊᑯᕐᖓᓐᓂ ᐹᖓᑕ ᑭᓐᖓᐃᑦ ᑲᖏᖅᓱᖓᑕ ᐊᒻᒪᓗ Padle fiord:

(i)

Padle Lake and Padle River

(ii)

Tundra Lake,

(iii)

Circle Lake,

(iv)

Terrace Lake,

(v)

Island Lake,

(vi)

ᐊᑎᖃᓐᖏᑦᑐᖅ ᑰᒃ ᑰᑦᑐᖅ ᕿᑭᖅᑕᐅᑉ ᑕᓯᖓᓂᒃ ᑭᓐᖓᐃᑦ ᑲᖏᖅᓱᖓᓄᑦ, ᐊᒻᒪᓗ

(vii)

ᑰᑦ ᑕᓰᓪᓗ ᑲᓱᖅᑎᕆᓯᒪᔪᑦ ᐃᒪᐃᑦ ᐊᖅᑯᑎᖏᓐᓂᒃ ᑎᑎᕋᖅᓯᒪᔪᓂᒃ (i) ᐊᒻᒪᓗ (vi) ᑐᕋᐃᓐᓇᕐᓗᓂ; ᐊᒻᒪᓗ

(b)

ᐃᓂᖃᕐᓗᓂ ᑲᓱᕐᕕᒋᓯᒪᔭᖏᓐᓂᒃ Terrace ᑕᓯᖅ ᐊᒻᒪᓗ Circle ᑕᓯᖅ ᑕᐃᒫᒃ ᑎᑎᖅᑐᖅᓯᒪᒻᒪᑦ ᐱᖁᑎᒋᔭᐅᔪᓂ ᓇᓗᓇᐃᔭᖅᑕᐅᓯᒪᔪᓂ ᐃᓄᐃᑦ ᓄᓇᖁᑎᖏᓐᓄᑦ ᐃᓂᐅᔪᑦ BI-10/16L,M,26I.

ᐅᐃᒍᖓ 21-2

ᐃᐱᐅᑕᓕᒻᒥ ᓴᕖᒻᒥᓪᓗ ᐊᖅᑯᑎᐅᑉ ᑭᒃᑯᑐᐃᓐᓇᕐᓄᑦ ᐊᑐᖅᑕᐅᔪᓐᓇᕐᓂᖓ

(ᑎᑎᕋᖅᓯᒪᔪᖅ 21.4.1)

ᐅᐃᒍᖓ 21-3

ᐃᑎᕐᕕᐅᒍᓐᓇᖅᑐᑦ ᕼᐋᒻᒪᓚᒃᑯᑦ ᐃᓗᐊᓐᓂ

(ᑎᑎᕋᖅᓯᒪᔪᖅ 21.5.3)

ᐅᐃᒍᖓ 21-4

ᒐᕙᒪᒃᑯᓐᓂ ᐊᐅᓚᓂᐅᔪᑦ ᐊᑦᑐᐊᓐᖏᑦᑐᑦ ᑎᑎᕋᖅᓯᒪᔪᒧᑦ 21.5.5

(ᑎᑎᕋᖅᓯᒪᔪᖅ21.5.5)

1

ᐃᓂᐅᔪᓂ ᖃᐅᔨᓴᕐᓂᕐᒧᑦ ᐊᐅᓚᓃᑦ,

2

ᐊᑑᑎᑎᑕᐅᓂᖏᑦ ᒪᓕᒐᐃᑦ.

3

ᐊᐅᓚᓂᐅᔪᑦ ᐊᑦᑐᐊᓐᖏᑦᑐᑦ ᓴᓇᔭᐅᓂᕐᒧᑦ.