ᐃᓛᒃᑯᑦ 26

ᐃᓚᖓ 1

ᑐᑭᖏᑦ

26.1.1

ᐅᕙᓂ ᐃᓛᒃᑰᖅᑐᒥ:

“ᐱᒻᒪᕆᐅᑎᓄᑦ ᐊᑭᒋᔭᐅᔪᑦ” ᐅᑯᐊᖑᓂᐊᖅᐳᑦ ᐊᑭᓕᖅᑐᕆᐊᓖᑦ, ᐋᖅᑭᑦᓱᐃᓂᕐᒧᑦ, ᓂᐅᕕᕐᓂᕐᒧᑦ, ᓴᓇᓂᕐᒧᑦ ᐊᒻᒪᓗ ᐋᖅᑭᑦᓱᐃᓂᕐᒧᑦ ᐃᓪᓗᓕᒫᓂᒃ, ᐊᖏᕐᕋᕆᔭᐅᔪᓂᒃ, ᐊᐅᓚᐅᑎᓂᒃ ᓱᓇᒃᑯᑎᓂᓪᓗ ᐊᒻᒪᓗ ᐊᐅᓚᔾᔪᑎᓅᖓᔪᓄᑦ ᐊᑦᑐᐊᔪᓄᑦ ᐊᐅᓚᓂᐅᔪᒧᑦ, ᐱᖃᓯᐅᑎᑦᓱᑎᒃ ᐊᑭᒋᔭᐅᔪᑦ ᓯᓚᑖᓂ ᓄᓇᕗᑦ ᐊᑦᑐᐊᔪᑦ ᐊᐅᓚᓂᕐᒧᑦ; ᑭᓯᐊᓂ ᐱᖃᓯᐅᑎᔾᔮᖏᑦᑐᖅ ᑮᓇᐅᔭᖃᖅᑎᑦᓯᓂᖅ;

“ᒐᕙᒪᒃᑯᑦ ᑎᒥᖁᑎᖓᑦ” ᑐᑭᓕᒃ ᑕᐃᒃᑯᐊ ᒐᕙᒪᒃᑯᑦ ᑎᒥᖁᑎᖏᑦ ᑐᓐᖓᕕᖃᓐᖏᑦᑐᑦ ᐃᓛᒃᑯᑦ 24-ᒧᑦ;

“ᐊᐅᓚᔾᔪᑎᓅᖓᔪᑦ” ᐃᓱᒪᒋᔭᐅᓂᐊᖅᑐᑦ ᓇᐅᑐᐃᓐᓇᐃᑦ ᐃᖏᕐᕋᔾᑏᑦ ᐃᓪᓗᖏᑦ ᑐᕋᐃᓐᓇᖅᑐᓂᒃ ᐃᑲᔪᖅᓯᔪᑦ ᐊᐅᓚᓂᐅᔪᒥᒃ, ᓲᕐᓗ ᑐᓚᑦᑕᕐᕕᒃ, ᒥᑦᑕᕐᕕᕐᒃ, ᐊᑐᕆᐊᖅ, ᓄᓇᓯᐅᑎᑯᑖᒻᒧᑦ ᐊᖅᑯᑎ, ᓱᓪᓗᓕᒃ ᐅᕝᕙᓗ ᐅᐊᔭᐃᑦ;

“ᐱᒻᒪᕆᒃ ᓴᓇᔭᐅᕙᓪᓕᐊᔪᖅ” ᑐᑭᓕᒃ ᓇᐅᑐᐃᓐᓇᖅ ᒐᕙᒪᒃᑯᑦ ᑎᒥᖁᑎᖓᑦᑕ ᐅᕝᕙᓗ ᓇᒻᒥᓂᓕᐅᑉ ᐊᐅᓚᓂᖓ ᐃᒪᐃᑦᑐᖅ

(a)

ᐃᒪᕐᒧᑦ ᐊᐅᓚᑕᐅᓗᓂ ᐊᐅᒪᓕᐅᕈᑕᐅᑉᐸᑦ ᐅᕝᕙᓗ ᐃᒪᕐᒥᒃ ᑮᓇᐅᔭᓕᐅᕋᓱᐊᖅᓱᑎᒃ ᐊᐅᓚᓂᐅᔪᖅ ᓄᓇᕗᒻᒥ, ᐅᕝᕙᓗ

(b)

ᐊᐅᓚᓂᐅᔪᖅ ᐱᖃᓯᐅᔾᔨᔪᖅ ᓴᓇᓂᕐᒥᒃ ᐅᕝᕙᓗ ᑮᓇᐅᔭᓕᐅᕈᑎᖃᕐᓂᒥᒃ, ᑭᓯᐊᓂ ᕿᓂᕐᓂᐅᖏᑦᑐᒥᒃ, ᓄᓇᒥᐅᑕᕐᓂᒃ ᐃᓄᐃᑦ ᓄᓇᖁᑎᖏᓐᓃᑦᑐᓂᒃ ᐃᓚᖓᓂᓘᓐᓃᑦ,

ᐊᒻᒪᓗ ᑭᓪᓕᖃᕐᓗᓂ, ᐃᓗᐊᓂ ᓄᓴᕗᑦ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓂ, 200 ᐅᖓᑖᓃᑦᑐᑦ ᐃᖅᑲᓇᐃᔮᖑᒍᓐᓇᕋᔭᖅᑐᑦ ᐃᓄᓐᓄᑦ, ᐅᕝᕙᓗ ᑭᓪᓕᖃᕐᓗᑎᒃ ᐱᒻᒪᕆᐅᑎᓄᑦ ᐊᑭᒋᔭᐅᔪᑦ ᐅᖓᑖᓃᑦᑐᑦ $35-ᒥᓕᐊᓐ, 1986-ᒥ ᑮᓇᐅᔭᓪᓗᐊᖑᔪᓂ, ᐱᖃᓯᐅᑎᑦᓱᑎᒃ, ᒐᕙᒪᒃᑯᑦ ᑐᑦᓯᕋᖅᑎᐅᑉᐸᑕ ᐃᓚᖓᓂᒃ ᐱᕙᓪᓕᐊᓂᕐᒧᑦ ᐊᐅᓚᓂᐅᔫᑉ ᐅᕝᕙᓗ ᑐᕋᐃᓐᓇᖅᑐᒥᒃ ᐊᑦᑐᐊᔪᒥᒃ ᐊᐅᓪᓚᔾᔪᑎᒥᒃ, ᐱᒻᒪᕆᐅᑎᓄᑦ ᐊᑭᒋᔭᐅᔪᑦ ᐃᖅᑲᓇᐃᔭᕋᔭᖅᑐᓂᓪᓗ ᒥᑦᓴᐅᓯᔪᑦ ᒐᕙᒪᒃᑯᓐᓄᑦ ᐊᐅᓚᓂᐅᔪᒧᑦ;

“ᐊᖏᖃᑎᒌᑦᑐᑦ” ᑐᑭᓕᒃ ᐊᖏᖃᑎᒌᑦᑐᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓄᑦ ᐅᕝᕙᓗ ᐊᐃᕙᓂᖓᓐᓄᑦ ᑕᐃᑯᖓᖅᐸᓪᓕᐊᔪᒧᑦ.

ᐃᓚᖓ 2

ᑐᓂᒪᓂᖃᕐᓂᖅ ᐱᔭᕇᔭᕐᓂᕐᒧᑦ

26.2.1

ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 26.11.1 - 26.11.3ᒧᑦ, ᐱᒻᒪᕆᒻᒥᒃ ᐊᐅᓚᓂᐅᔪᒥᒃ ᐱᒋᐊᖅᑐᖃᕆᐊᖃᓐᖏᑦᑐᖅ ᑭᓯᐊᓂ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᐱᔭᕇᖅᑕᐅᑉᐸᑦ ᑐᓐᖓᕕᒋᓗᒍ ᐅᓇ ᐃᓛᒃᑰᖅᑐᖅ.

ᐃᓚᖓ 3

ᑭᓪᓕᒋᔭᐅᔪᑦ ᐊᐃᕙᓂᕐᒧᑦ ᐋᖅᑭᑦᓱᐃᓂᕐᒧᓪᓗ ᑐᑭᒧᐊᒍᑏᑦ

26.3.1

ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᐱᖃᓯᐅᔾᔨᒍᓐᓇᖅᑐᑦ ᐊᐅᓚᓂᐅᔪᒥᒃ ᐊᑦᑐᐊᔪᒥᒃ ᐊᐅᓚᓂᒻᒪᕆᐅᔪᒧᑦ ᐊᑦᑐᐃᓂᕐᓗᓐᓂᖃᕈᓐᓇᖅᑐᒧᑦ ᐃᓄᓐᓂᒃ ᐅᕝᕙᓗ ᐱᕚᓪᓕᕈᑕᐅᒍᓐᓇᖅᑐᓂᒃ ᐃᓄᓐᓄᑦ, ᓄᓇᕗᓕᒫᒥ, ᐊᕕᑦᑐᖅᓯᒪᔪᓂ ᐅᕝᕙᓘᓐᓃᑦ ᓄᓇᓕᓐᓂ. ᑭᓪᓕᖃᖅᑎᖏᒃᑲᓗᐊᖅᓱᒍ ᐅᑯᐊᖑᓂᐊᖅᑐᑦ, ᐊᐅᓚᓂᐅᔪᑦ ᓇᓗᓇᐃᖅᑕᐅᔪᑦ ᐅᐃᒍ 26-1-ᒥ ᐃᓱᒪᒋᔭᐅᓂᐊᖅᑐᑦ ᓈᒻᒪᑦᑑᒋᐊᖏᑦ ᐊᐃᕙᓂᕐᒧᑦ ᐊᒻᒪᓗ ᐃᓚᒍᑦᓯᐅᔾᔭᐅᓂᕐᒧᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓄᑦ.

26.3.2

ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᑐᓐᖓᕕᖃᕐᓂᐊᖅᑐᑦ ᐃᒪᐃᓕᖓᓂᖏᓐᓂᒃ ᒪᓕᒋᐊᓕᖏᓐᓂᓪᓗ ᐊᐅᓚᓂᐅᑉ ᐊᖏᖅᑕᐅᔫᑉ, ᐱᖃᓯᐅᑎᑦᓱᑎᒃ ᑕᐃᒃᑯᐊ ᐃᒪᐃᓕᖓᓂᖏᑦ ᒪᓕᒋᐊᓖᓪᓗ ᓴᖅᑭᖅᑕᐅᔪᑦ ᑐᓐᖓᕕᖃᖅᓱᑎᒃ ᓇᐅᑐᐃᓐᓇᕐᓂᒃ ᓯᓚᒥᒃ ᐃᓅᓯᕐᒥᓗ ᖃᑭᒪᓇᓱᐊᕐᓂᒃᑯᑦ ᐊᑐᖅᑕᐅᓂᕐᒧᑦ ᕿᒥᕐᕈᓂᐅᔪᑦ.

26.3.3

ᐊᐃᕙᓂᖅ ᐋᖅᑮᒐᓱᐊᕐᓂᕐᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖏᓐᓂᒃ ᐊᐅᓚᑕᐅᓂᐊᖅᑐᑦ ᐅᑯᓄᖓ ᑐᓐᖓᕕᐅᔪᓄᑦ:

(a)

ᐱᕚᓪᓕᕈᑕᐅᔪᑦ ᑐᓐᖓᕕᖃᕐᓂᐊᑦᑐᑦ ᖃᐅᔨᒪᔭᐅᑎᑦᓯᓗᑎᓪᓗ ᐱᖅᑯᓯᖅᑎᒍᑦ ᑐᕌᒐᖏᓐᓂᒃ;

(b)

ᐱᕚᓪᓕᕈᑕᐅᔪᑦ ᐃᑲᔪᖅᓯᓂᖃᕐᓂᐊᖅᑐᑦ ᑎᑭᐅᑎᓂᕐᒧᑦ ᑲᔪᓯᑎᑦᓯᓂᕐᒧᓪᓗ ᐃᓅᓇᓱᐊᕐᓂᖏᓐᓂᒃ ᐃᓄᐃᑦ ᐊᔾᔨᖃᕐᓗᑎᒃ ᐃᓄᓐᓂᒃ ᐊᓯᖏᓐᓂᒃ ᐃᓄᑐᐃᓐᓇᐃᑦ ᐆᒪᔪᑦ ᐃᖅᑲᓇᐃᔭᖅᑐᓪᓗ ᓄᓇᕗᒻᒥ, ᐊᒻᒪᓗ ᑲᓇᑕᒥᐅᓕᒫᓄᑦ ᐃᓘᓐᓈᒍᑦ;

(c)

ᐱᕚᓪᓕᕈᑕᐅᔪᑦ ᐊᑦᑐᐊᓂᖃᕆᐊᓖᑦ ᐊᑑᑎᔪᒧᑦ, ᐊᖏᓂᖓᓄᑦ ᐊᑭᖓᓄᓪᓗ ᐊᐅᓚᓂᐅᔫᑉ ᐊᒻᒪᓗ ᑐᕋᐃᓐᓇᖅᑐᒥᒃ ᑐᕋᐃᓐᓇᖏᑦᑐᓂᓪᓗ ᐊᑦᑐᖅᑕᐅᓂᖏᓐᓂᒃ ᐃᓄᐃᑦ;

(d)

ᐱᕚᓪᓕᕈᑕᐅᔪᑦ ᐅᖁᒪᐃᓪᓕᐅᕈᑕᐅᓚᕿᔾᔮᖏᑦᑐᑦ ᑐᑦᓯᕋᖅᑐᒧᑦ ᐊᖏᓪᓕᑎᓗᐊᕐᓗᒍ ᑲᔪᓯᒍᓐᓇᑉᓂᖓ ᐊᐅᓚᓂᐅᔫᑉ; ᐊᒻᒪᓗ

(e)

ᐱᕚᓪᓕᕈᑎᑦᓴᓄᑦ ᐊᖏᕈᑕᐅᔪᑦ ᐊᔾᔨᐅᖏᑦᑑᑎᑦᓯᔾᔮᖏᑦᑐᑦ ᐱᔪᓐᓇᕐᓂᖏᓐᓂᒃ ᐊᓯᖏᑦᑕ ᓄᓇᓕᓖᑦ ᓄᓇᕗᒻᒥ ᐱᕚᓪᓕᕈᑎᖃᕐᓂᐊᖅᑎᓪᓗᒋᑦ ᐱᒻᒪᕆᐅᑎᓂᒃ ᐊᐅᓚᓂᐅᔪᓂᒃ ᓄᓇᕗᒻᒥ.

ᐃᓚᖓ 4

ᐊᐃᕙᓂᐅᔪᑦ

26.4.1 - ᐊᐅᓚᔾᔭᒋᐊᕐᓂᖅ

ᐅᓪᓗᐃᑦ 180 ᐊᑖᓂᐅᓐᖏᑦᑐᖅ ᓯᕗᕐᖓᓂ ᐱᒋᐊᖅᕕᑦᓴᐅᔫᑉ ᐅᓪᓘᑉ ᓇᐅᑐᐃᓐᓇᕐᓄᑦ ᐱᒻᒪᕆᓐᓄᑦ ᐊᐅᓚᓂᐅᔪᓄᑦ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᑐᑦᓯᕋᖅᑐᖅ, ᐊᖏᖃᑎᒌᓐᖏᑐᐊᖅᐸᑎᒃ ᐊᓯᐊᒍᑦ, ᐊᐃᕙᖃᑎᒌᓕᕐᓂᐊᖅᑐᑦ, ᑲᔪᓯᓂᖃᑦᓯᐊᕐᓗᑎᒃ, ᐱᔾᔪᑕᐅᓗᓂ ᐱᔭᕇᕐᓂᖅ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖏᓐᓂᒃ.

26.4.2 - ᑎᑎᕋᖅᓯᒪᔪᖅ ᑳᑦᑐᓛ

ᑐᑦᓯᕋᖅᑐᖅ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖃᑎᒌᑉᐸᑕ ᐃᓗᓕᖏᓐᓄᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᖃᑎᒌᒍᑎᐅᑉ, ᐊᖏᖃᑎᒌᒍᑕᐅᔪᖅ ᑎᑎᕋᖅᓯᒪᓂᐊᖅᑐᖅ ᑳᑦᑐᓛᑦᑎᑐᑦ. ᐊᖏᖃᑎᒌᑐᐊᖅᐸᑕ, ᐊᖏᖃᑎᒌᑦᑯᑦ ᐊᐅᓪᓚᑎᑦᓯᓂᐊᖅᑐᑦ ᓇᓕᖅᑲᖏᓐᓂᒃ ᒥᓂᔅᑕᒧᑦ.

ᐃᓚᖓ 5

ᐃᓱᒪᖅᓱᖅᓱᑎᒃ ᐋᖅᑭᑦᓱᐃᒃᑲᐃᔨᒃᑰᕐᓂᖅ

26.5.1

ᖃᖓᑐᐃᓐᓇᑦᓯᐊᖅ ᐊᐃᕙᓂᖅᑕᖃᖅᑎᓪᓗᒍ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᑐᑦᓯᕋᖅᑐᖅ ᑐᓂᓯᒍᓐᓇᖅᑐᖅ ᐃᓘᓐᓇᖏᓐᓂᒃ ᐃᓚᖏᓐᓂᓘᓐᓃᑦ ᐊᐱᖅᑯᑕᐅᔪᑦ ᐊᑦᑐᐊᔪᑦ ᐃᓗᓕᖏᓐᓄᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓄᑦ ᐋᖅᑭᑦᓱᐃᔨᒧᑦ, ᑕᐃᒪᐃᑦᑎᓪᓗᒋᑦ ᐊᖏᖃᑎᒌᒍᓐᓇᖅᑐᑦ ᐃᓗᓕᖏᓐᓄᑦ ᐊᐱᖅᑯᑕᐅᔪᑦ ᑐᓂᔭᐅᓂᐊᖅᑐᑦ ᐊᒻᒪᓗ ᑭᓇᐅᓂᖓ ᐋᖅᑭᑦᓱᐃᔨ.

26.5.2

ᐊᖏᖃᑎᒌᑦᑑᒃ ᐊᖏᖃᑎᒌᑉᐸᑎᒃ ᐃᓱᒪᖅᓱᕐᓗᑎᒃ ᐋᖅᑭᑦᓱᐃᒃᑲᐃᔨᒃᑰᕐᓗᑎᒃ, ᐊᖏᖃᑎᒌᓐᓂᐅᔪᖅ ᑎᑎᕋᖅᓯᒪᓂᐊᖅᑐᖅ ᑳᑦᑐᓛᑦᑎᑐᑦ ᓇᓕᖅᑲᖏᓐᓂᒃ ᐊᐅᓪᓚᑎᑦᓯᔪᖃᕐᓗᓂ ᒥᓂᔅᑕᒧᑦ.

ᐃᓚᖓ 6

ᒪᓕᒐᖅᑎᒍᑦ ᐋᖅᑭᑦᓱᐃᒃᑲᐃᔨᒃᑰᖅᑎᑕᐅᓂᖅ

26.6.1 - ᑐᑦᓯᕋᐅᑎ ᒥᓂᔅᑕᒧᑦ

ᐊᖏᖃᑎᒌᓐᓂᖅᑕᖃᓪᓚᕆᑦᓯᒪᑎᓐᓇᒍ, ᐅᓪᓗᐃᑦ 60 ᐃᓗᐊᓐᓂ ᐊᐃᕙᓂᖅ ᐱᒋᐊᖅᓯᒪᓕᖅᑎᓪᓗᒍ, ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑐᑦᓯᕋᖅᑐᕐᓗ ᐃᓚᐅᓐᖏᑉᐸᑕ ᐃᓱᒪᖅᓱᕐᓗᑎᒃ ᐋᖅᑭᑦᓱᐃᔨᒃᑰᕐᓂᕐᒧᑦ, ᓇᓪᓕᑐᐃᓐᓇᖏᑦ ᑐᑦᓯᕋᕈᓐᓇᖅᑐᑦ ᒥᓂᔅᑕᒧᑦ ᑎᓕᔭᐅᖁᔨᓗᑎᒃ ᐋᖅᑭᑦᓱᐃᒃᑲᐃᔨᒥᒃ. ᐃᓗᓕᖏᑦ ᐋᖅᑭᑦᓱᐃᒃᑲᐃᓂᐅᑉ ᐱᖃᓯᐅᔾᔨᓂᐊᖅᑐᑦ ᐊᑕᖏᖅᑐᓂᒃ ᐱᕚᓪᓕᕈᑎᑦᓴᓂᒃ ᐱᔭᐅᒍᓐᓇᖅᑐᓂᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓄᑦ, ᐊᖏᖃᑎᒌᑦᑑᒃ ᐊᖏᖃᑎᒌᓐᖏᑐᐊᖅᐸᑎᒃ ᐃᓗᓕᖏᑦ ᐊᐳᖅᕕᖃᕆᐊᖃᕆᐊᖏᑦ.

26.6.2 - ᑐᓂᒪᓂᖅ ᐊᐃᕙᓂᖃᕐᓂᕐᒧᑦ ᐱᑦᓯᐊᕐᓂᒃᑯᑦ

ᑐᑦᓯᕋᖅᓯᒪᔪᖅ ᐅᕝᕙᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐃᓱᒪᒋᔭᖃᖅᐸᑕ ᐊᐃᑉᐸᐃᖏᑦ ᐊᐃᕙᑦᓯᐊᓐᖏᒋᐊᖏᑦ ᐅᓪᓗᐃᑦ ᐱᒋᐊᓐᖓᓕᖅᑎᓪᓗᒋᑦ 60 ᐃᓗᐊᓐᓂ ᐊᐃᕙᓂᐅᑉ ᐅᖃᐅᓯᐅᔫᑉ ᑎᑎᕋᖅᓯᒪᔪᒥ 26.6.1, ᑕᐃᒃᑯᐊ ᑐᑦᓯᕋᑦᓴᐅᑎᒋᒍᓐᓇᖅᑐᑦ ᒥᓂᔅᑕᒧᑦ ᑎᓕᔭᐅᖁᔨᓗᑎᒃ ᐋᖅᑭᑦᓱᐃᒃᑲᐃᔨᒥᒃ. ᐋᖅᑭᑦᓱᐃᒃᑲᐃᔨ, ᐅᓪᓗᐃᑦ 7 ᐃᓗᐊᓂ ᑎᓕᔭᐅᓚᐅᕐᓗᓂ, ᓇᓗᓇᐃᖅᓯᒋᐊᓕᒃ ᐊᑑᑎᖃᕐᓂᖓᓂᒃ ᐱᑦᓯᐊᖏᓐᓂᕋᐃᓂᐅᔫᑉ. ᐋᖅᑭᑦᓱᐃᒃᑲᐃᔨ ᑕᐃᒪᐃᓕᖓᓂᕋᐃᑉᐸᑦ, ᐋᖅᑭᑦᓱᐃᒃᑲᐃᔨ ᑕᕝᕙᓴᐃᓐᓇᖅ ᑲᔪᓯᓂᐊᖅᑐᖅ ᑐᓐᖓᕕᖃᕐᓗᓂ ᑎᑎᕋᖅᓯᒪᔪᒥᒃ 26.6.4.

26.6.3 - ᑎᓕᔭᐅᓂᖓ ᐋᖅᑭᑦᓱᐃᒃᑲᐃᔨᐅᑉ

ᐅᓪᓗᐃᑦ 15 ᐃᓗᐊᓐᓂ ᑐᑦᓯᕋᐅᓯᐅᖅᑐᖃᓚᐅᖅᑎᓪᓗᒍ ᒥᓂᔅᑕᒧᑦ ᑎᓕᔭᐅᓂᖓᓄᑦ ᐋᖅᑭᑦᓱᐃᒃᑲᐃᔨᐅᑉ, ᐋᖅᑭᑦᓱᐃᒃᑲᐃᔨ ᑎᓕᔭᐅᓂᐊᖅᑐᖅ ᐊᖏᓚᐅᖅᑎᓪᓗᒋᒃ ᐊᐃᕙᖃᑎᒌᑦᑑᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓂᒃ. ᐊᐃᕙᖃᑎᒌᑦᑑᒃ ᐊᖏᖃᑎᒌᒍᑎᖃᕈᓐᓇᖏᑉᐸᑎᒃ ᐋᖅᑭᑦᓱᐃᒃᑲᐃᔨᒥᒃ, ᐋᖅᑭᑦᓱᐃᒃᑲᐃᔨ ᑎᓕᔭᐅᓂᐊᖅᑐᖅ ᒥᓂᔅᑕᒧᑦ ᐱᔭᐅᓗᓂ ᑎᑎᕋᖅᓯᒪᔪᓂᒃ ᐋᖅᑭᑦᓱᐃᒃᑲᐃᔨᓂᒃ ᐊᖏᖅᑕᐅᓯᒪᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᒻᒪᓗ ᓴᓐᓇᕕᐅᔪᓄᑦ ᑎᒥᐅᔪᓄᑦ ᓇᓗᓇᐃᖅᑕᐅᔪᓄᑦ ᒐᕙᒪᒃᑯᓐᓄᑦ ᐊᑑᑎᖃᕆᐊᖏᑦ.

26.6.4 - ᐋᖅᑭᑦᑕᖓ ᐋᖅᑭᑦᓱᐃᒃᑲᐃᔨᐅᑉ

ᐋᖅᑭᑦᓱᐃᒃᑲᐃᔨ, ᐅᓪᓗᐃᑦ 60 ᐃᓗᐊᓐᓂ ᑎᓕᔭᐅᓚᐅᕐᓗᓂ, ᐅᕝᕙᓗ ᐅᓪᓗᐃᑦ 60 ᐃᓗᐊᓐᓂ ᓇᓗᓇᐃᖅᓯᓯᒪᓗᓂ ᐱᑦᐊᓯᖏᑦᑐᖃᖅᑐᒥᓂᐅᒋᐊᖓ, ᐃᒪᐃᓐᓂᐊᖅᑐᖅ:

(a)

ᐊᐱᖅᑯᑎᒋᓗᒋᑦ ᐃᓱᒪᒋᔭᖏᑦ ᑐᑦᓯᕋᐅᑎᒋᔭᖏᓪᓗ ᑕᒪᕐᒥᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᑐᑦᓯᕋᖅᑐᖅ;

(b)

ᑐᓂᓯᓗᑎᒃ ᐋᖅᑭᑦᑕᐅᔪᒥᒃ ᐋᖅᑭᑦᓯᒪᑎᓪᓗᒍ ᑳᑦᑐᓛᑦᑎᑐᑦ ᐊᖏᖃᑎᒌᑦᑑᓐᓄᑦ; ᐊᒻᒪᓗ

(c)

ᓇᓕᖅᑲᖏᓐᓂᒃ ᐋᖅᑭᑦᑕᐅᔪᑦ ᐊᐅᓪᓚᑎᑦᓯᕕᐅᓗᓂ ᒥᓂᔅᑕ.

26.6.5

ᐊᑭᒋᔭᐅᔪᑦ ᐋᖅᑭᑦᓱᐃᒃᑲᐃᔨᒧᑦ ᐊᖏᖃᑎᒌᑦᑐᓄᓪᓗ ᐊᑭᓕᖅᑕᐅᓄᐊᖅᑐᖅ ᐊᕕᑦᑕᐅᓗᓂ ᐊᖏᖃᑎᒌᑦᑑᓐᓄᑦ, ᐋᒡᒐᐅᒐᓗᐊᖅ ᐊᓯᐊᒍᑦ ᐋᖅᑭᑦᑕᐅᑉᐸᑦ ᐋᖅᑭᑦᓱᐃᒃᑲᐃᔨᒧᑦ. ᐊᑭᒋᔭᐅᔪᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᑦ ᑕᕝᕙᕈᖅᑐᑦ ᐋᖅᑭᑦᓱᐃᒃᑲᐃᔨ ᑲᒪᑎᓪᓗᒍ ᐊᑭᒋᔭᐅᔪᓂᒃ ᑐᓐᖓᕕᖃᖅᑐᓂᒃ ᑎᑎᕋᖅᓯᒪᔪᒥᒃ 26.11.4 ᐊᑭᓕᖅᑕᐅᓂᐊᖅᑐᑦ ᑐᑦᓯᕋᖅᑐᒧᑦ ᐱᒻᒪᕆᒻᒥᒃ ᐊᐅᓚᓂᕐᒧᑦ, ᐋᒡᒐᐅᒐᓗᐊᖅ ᐊᓯᐊᒍᑦ ᐋᖅᑭᑦᑕᐅᑉᐸᑦ ᐋᖅᑭᑦᓱᐃᒃᑲᐃᔨᒧᑦ.

ᐃᓚᖓ 7

ᑭᖑᕙᕆᐊᖅᑕᐅᓂᖅ

26.7.1

ᑎᒥᐅᔫᒃ ᐊᐃᕙᐅᑎᓖᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓂᒃ ᐊᖏᖃᑎᒌᒍᓐᓇᖅᑑᒃ ᐱᕕᑦᓴᖃᕐᓂᐅᔪᓂᒃ ᕐᑳᖏᖅᑎᑦᓯᒍᒪᓗᑎᒃ ᐅᖃᐅᓯᐅᔪᓂᒃ ᐃᓚᖓᓂ 4 ᐊᒻᒪᓗ 6, ᐋᖅᑭᒃᓱᐃᒃᑲᐃᔨᓗ ᑐᑦᓯᕋᕈᓐᓇᖅᓱᓂ ᒥᓂᔅᑕᒧᑦ ᑭᖑᕙᕆᐊᖅᑕᐅᔨᓗᓂ ᐱᕕᑦᓴᖃᕐᓂᐅᔪᒥᒃ ᑎᑎᕋᖅᓯᒪᔪᒥ 26.6.4.

ᐃᓚᖓ 8

ᐊᑑᑎᓕᕐᕕᖓ

26.8.1

ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᐊᑐᓕᕐᓂᐊᖅᑐᖅ ᐅᓪᓗᐃᑦ 30 ᑭᖑᕐᖓᓐᓂ ᓇᓕᖅᑲᖅᑖᓚᐅᖅᑎᓪᓗᒍ ᒥᓂᔅᑕ ᐋᒡᒐᐅᒐᓗᐊᖅ ᒥᓂᔅᑕ ᓇᓗᓇᐃᖅᓯᓯᒪᑉᐸᑦ ᑕᐃᑲᓂ ᐱᕕᑦᓴᖃᕐᓂᐅᔪᒥ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᒪᓕᓐᓂᖏᒋᐊᖓ ᐱᕕᑦᓴᖃᕐᓂᐅᔪᓂᒃ ᑎᑎᕋᖅᓯᒪᔪᒥ 26.3.2 ᐅᕝᕙᓗ ᑐᓐᖓᕕᐅᔪᑦ ᑎᑎᕋᖅᓯᒪᔪᒥ 26.3.3 (a) ᑎᑭᑦᓱᒍ (e), ᐅᕝᕙᓗ, ᐊᑦᑐᐊᔪᓄᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓄᑦ ᑐᓐᖓᕕᒋᑦᓱᒍ ᐃᓚᖓ 5 ᐅᕝᕙᓗ 6, ᐋᖅᑭᑦᓱᐃᒃᑲᐃᔨ ᐅᖓᑖᓅᖅᑐᖅ ᐋᖅᑭᑦᓱᐃᒃᑲᐃᔨᐅᑉ ᑲᒪᒋᒍᓐᓇᖏᑦᑕ.

26.8.2

ᒥᓂᔅᑕ ᓇᓗᓇᐃᖅᓯᑉᐸᑦ ᑐᓐᖓᕕᖃᕐᓗᓂ ᑎᑎᕋᖅᓯᒪᔪᒥᒃ 26.8.1, ᒥᓂᔅᑕ ᐱᕕᖃᖅᑎᑦᓯᓂᐊᖅᑐᖅ ᑐᓂᓯᓗᓂ ᑎᑎᕋᖅᓯᒪᔪᓂᒃ ᐱᔾᔪᑕᐅᔪᓂᒃ ᑐᑭᒧᐊᑦᑎᑦᓯᓂᖃᑐᐃᓐᓇᕆᐊᖃᖅᓱᓂᓗ ᑎᑭᐅᑎᓂᕐᒧᑦ ᒪᓕᒋᐊᓕᓐᓄᑦ ᐅᕝᕙᓗ ᐋᖅᑭᒋᐊᕆᓗᓂ ᐅᖓᑖᓅᕈᑕᐅᓯᒪᔪᓂᒃ ᑲᒪᒍᓐᓇᖅᑐᓄᑦ.

26.8.3

ᑎᒥᐅᔫᑉ ᐊᑦᑐᐊᔪᓄᑦ ᐊᐃᕙᔾᔪᑕᐅᓯᒪᔪᒧᑦ ᐊᖏᕈᑎᒧᑦ, ᐊᒻᒪᓗ ᐋᖅᑭᑦᓱᐃᒃᑲᐃᔨ ᐊᑦᑐᐊᔪᓄᑦ ᐋᖅᑭᑦᓱᖅᑕᐅᔪᓄᑦ ᐊᖏᕈᑎᓄᑦ, ᐃᓱᒪᒋᔭᖃᖃᓯᐅᑎᓂᐊᖅᑐᖅ ᒥᓂᔅᑕᐅᑉ ᐱᔾᔪᑎᖏᓐᓂᒃ ᐋᖅᑭᒋᐊᕐᓗᒍᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᐊᑐᓕᖅᑎᑦᓯᓗᑎᒃ ᑎᓕᓯᔾᔪᑎᖏᓐᓂᒃ ᒥᓂᔅᑕᐅᑉ ᑎᑭᐅᑎᖁᓪᓗᒋᑦ ᒪᒪᓕᓐᓂᕐᒧᑦ ᐅᕝᕙᓗ ᐋᖅᑭᒋᐊᕆᓗᑎᒃ ᐅᖓᑖᓅᕈᑕᐅᓯᒪᔪᒥᒃ ᑲᒪᔪᓐᓇᖅᑐᑦ.

26.8.4

ᑎᒥᐅᔫᒃ ᐊᑦᑐᐊᔪᓄᑦ ᐊᐃᕙᔾᔪᑕᐅᓯᒪᔪᓄᑦ ᐊᖏᖃᑎᒌᒍᑎᓄᑦ, ᐋᖅᑭᑦᓱᐃᒃᑲᐃᔨᓗ ᐊᑦᑐᐊᔪᓄᑦ ᐋᖅᑭᑦᑕᐅᔪᓄᑦ, ᑐᓂᓯᓂᐊᖅᑐᑦ ᐋᖅᑭᒋᐊᖅᓯᒪᔪᓂᒃ ᐃᓄᐃᑦ ᐊᑦᑐᖅᑕᐃᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓂᒃ ᒥᓂᔅᑕᒧᑦ ᑎᒥᐅᔫᓐᓄᓪᓗ ᐅᓪᓗᐃᑦ 7 ᐃᓗᐊᓐᓂ ᓇᓕᖅᑲᖃᓚᐅᖅᑎᓪᓗᒍ ᒥᓂᔅᑕᒥᒃ ᑎᑎᖅᑲᑎᒍᑦ ᐱᔾᔪᑕᐅᔪᓂᒃ.

26.8.5

ᐋᖅᑭᒋᐊᖅᓯᒪᔪᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᐊᑐᓕᕐᓂᐊᖅᑐᖅ ᐅᓪᓗᐃᑦ 7 ᑭᖑᕐᖓᓐᓂ ᓇᓕᖅᑲᖅᑖᓚᐅᖅᑎᓪᓗᒍ ᒥᓂᔅᑕᒥᒃ.

ᐃᓚᖓ 9

ᑲᔪᓯᑎᑦᓯᓂᖅ

26.9.1

ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᑲᔪᓯᑎᑕᐅᒍᓐᓇᖅᑐᖅ ᓇᓪᓕᑐᐃᓐᓇᖏᓐᓄᑦ ᑐᓐᖓᕕᖃᕐᓗᑎᒃ ᒪᓕᒐᖓᓐᓂᒃ ᑳᑦᑐᓛᑉ. ᑎᒥᐅᔫᒃ ᐅᖃᖃᑎᒌᒍᑎᖃᕈᓐᓇᖅᑑᒃ ᑲᑎᓯᒪᔪᓄᑦ ᓱᕋᑦᑐᓅᖓᔪᓄᑦ ᑎᑭᐅᑎᔪᖃᕐᓂᖅᐸᑦ ᑕᐃᒪᐃᑦᑐᓄᑦ, ᖃᓄᑐᐃᓐᓇᖅ ᐅᖃᖅᑕᐅᓯᒪᓗᓂ, ᐃᓇᖐᔪᖅᑎᑐᑦ ᑕᑯᓐᓇᖅᑕᐅᔾᔮᑦᑐᖅ ᖃᓄᐃᒋᐊᕈᑎᒥᒃ. ᖃᓄᖅᑑᕈᑕᐅᔪᖃᖅᑎᓪᓗᒍ ᓇᓗᓇᐃᖅᑕᐅᓯᒪᔪᒥᒃ ᐊᐅᓚᓂᐅᔪᒥᒃ, ᐃᓱᒪᒋᔭᐅᖃᓯᐅᑎᓂᐊᖅᑐᖅ ᖃᖓᓕᒫᖅ ᓴᐳᔾᔨᒍᒪᓂᖅ ᐃᓄᐃᑦ ᐃᓅᓯᖏᓐᓂᒃ ᐱᖅᑯᓯᖏᓐᓂᓪᓗ ᐊᑐᐃᓐᓇᐅᑎᑦᓯᓗᑎᓪᓗ ᐃᓄᓐᓄᑦ ᐱᕕᑦᓴᖃᕐᓂᐅᔪᓂᒃ ᖃᕿᒪᓇᓱᐊᕐᓂᒃᑯᑦ ᓯᕗᕙᖅᐸᓕᐊᓂᕐᒥᒃ.

26.9.2

ᐊᐃᕙᔾᔪᑕᐅᓂᖓ ᐃᓱᓕᓐᓂᖓᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦᑕ ᐊᔾᔨᐅᖏᑦᑑᑎᑕᐅᔾᔮᖏᑦᑐᖅ ᐃᓚᐅᑎᓐᓂᖏᓐᓄᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᐊᓯᖏᓪᓗ ᐃᓄᓐᓄᑦ ᑎᒥᖁᑕᐅᔪᑦ, ᐊᒻᒪᓗ ᓇᐅᑐᐃᓐᓇᐃᑦ ᐃᓄᐃᑦ ᓇᐅᑐᐃᓐᓇᕐᓂ ᓈᓚᓐᓂᐅᔪᓂ ᐅᕝᕙᓗ ᐊᓯᖏᓐᓂᒃ ᐊᐅᓚᓂᖏᓐᓂ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔨᖏᑦᑕ, ᑲᓇᑕᒥ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ, ᐅᕝᕙᓗ ᓇᐅᓕᒫᑦ ᐊᓯᖏᑦ ᐊᓪᓚᕝᕕᐅᔪᑦ, ᐅᕝᕙᓗ ᑲᔪᓯᑎᑕᐅᓂᖓᓄᑦ ᐅᓇᒻᒥᓱᓐᓂᐅᓪᓘᓐᓃᑦ ᐋᖅᑭᑦᑕᐅᔪᒥᒃ ᐅᕝᕙᓗ ᑎᓕᓯᔾᔪᑕᐅᔪᒥᒃ ᑕᐃᒪᐃᑦᑐᒧᑦ ᑎᒥᐅᔪᒧᑦ.

ᐃᓚᖓ 10

ᐊᐃᕙᔾᔪᑎᖃᒃᑲᓂᕐᓂᖅ

26.10.1

ᐊᓯᐊᒍᑦ ᐊᖏᕈᑕᐅᓯᒪᓐᖏᑐᐊᖅᐸᑦ ᑐᑦᓯᕋᖅᑐᒧᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᐱᕕᖃᖅᑎᑦᓯᓂᐊᖅᑐᖅ ᐊᐃᕙᔾᔪᑕᐅᒃᑲᓐᓂᕈᓐᓇᕐᓂᕐᒥᒃ.

ᐃᓚᖓ 11

ᐊᓯᖏᓐᓅᖓᔪᑦ

26.11.1 - ᐊᖏᖃᑎᒌᒍᑎᖃᕆᐊᑐᓐᖏᑦᑐᑦ

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑐᑦᓯᕋᖅᑐᕐᓗ ᐱᒻᒪᕆᒻᒥᒃ ᐱᕙᓪᓕᐊᓂᐅᔪᒥᒃ ᐊᖏᖃᑎᒌᑐᐃᓐᓇᕆᐊᓖᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓂᒃ ᐱᑕᖃᕆᐊᑐᓐᖏᒋᐊᖓᓂᒃ.

26.11.2 - ᐅᓇᑕᖅᑐᑦᓴᐃᑦ ᐅᕝᕙᓗ ᑲᓇᑕᒥ ᑐᐊᕕᕐᓇᖅᑐᖅ

ᐅᓇᖅᑕᖅᑐᑦᓴᓃᖓᔪᓂᒃ ᐅᕝᕙᓗ ᑲᓇᑕᒥ ᑐᐊᕕᕐᓇᖅᑐᖃᖅᐸᑦ, ᒥᓂᔅᑕ ᐱᕕᖃᖅᑎᑦᓯᒍᓐᓇᖅᑐᖅ ᑲᔪᓯᑎᑦᓯᓗᓂ ᐱᒻᒪᕆᒻᒥᒃ ᐊᐅᓚᓂᐅᔪᒥᒃ ᓯᕗᕐᖓᓂ ᐱᔭᕇᖅᑕᐅᓚᐅᖅᑎᓐᓇᒍ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ.

26.11.3 - ᐊᐅᓚᓂᐅᔪᒧᑦ ᐱᒋᐊᑦᓴᐅᑎᒋᓂᖅ

ᐊᐃᕙᓃᑦ ᐱᒋᐊᖅᐸᓪᓕᐊᓯᓕᖅᐸᑕ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓄᑦ, ᑐᑦᓯᕋᖅᑐᖅ ᐊᐅᓚᓂᕐᒥᒃ ᐱᒋᐊᑦᓴᐅᑎᒋᒋᐊᖃᖅᑐᕆᑦᓯᑉᐸᑦ ᐱᒋᐊᕐᕕᒋᓚᖓᔭᒥᓂᖓᑕ ᒥᑦᓯᖓᓐᓂ, ᒥᓂᔅᑕ ᐃᒪᐃᑦᓱᓐᓇᖅᑐᖅ, ᐊᐅᓚᓂᐅᔪᖅ ᐊᖏᖅᑕᐅᓯᒪᑉᐸᑦ ᑖᒃᑯᓇᓐᖓᓪᓗᐊᖅ ᑎᒥᐅᔪᓂᒃ, ᐱᕕᖃᖅᑎᑦᓯᒍᓐᓇᖅᑐᖅ ᐊᐅᓚᔾᔭᒋᐊᖅᑎᑦᓯᓂᕐᒥᒃ ᐊᐅᓚᓂᐅᔪᒥᒃ:

(a)

ᑎᒥᐅᔫᒃ ᐊᖏᖃᑎᒌᑉᐸᑎᒃ; ᐅᕝᕙᓗ

(b)

ᑭᖑᕙᕆᐊᕐᓂᖅ ᐊᑲᐅᓈᕈᓐᓃᑎᑦᓯᒐᔭᖅᐸᑦ ᐊᐅᓚᓂᐅᔪᒥᒃ.

ᒥᓂᔅᑕ ᐊᑐᕈᒪᑉᐸᑦ ᑕᒪᑦᓱᒥᖓ ᐱᔪᓐᓇᕐᓂᕐᒥᒃ, ᒥᓂᔅᑕ ᐅᖃᖃᑎᖃᕐᓂᐊᖅᑐᖅ ᑎᒥᐅᔫᓐᓂᒃ ᐊᒻᒪᓗ, ᑎᓕᔭᐅᓯᒪᔪᖃᖅᐸᑦ, ᐋᖅᑭᑦᓱᐃᒃᑲᐃᔨᒥᒃ.

26.11.4

ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 26.11.2 ᐅᕝᕙᓗ 26.11.3, ᐱᒻᒪᕆᒃ ᐊᐅᓚᓂᐅᔪᖅ ᐱᒋᐊᖅᐸᑦ ᓯᕗᕐᖓᓂ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎ ᐱᔭᕇᖅᑕᐅᓚᐅᖅᑎᓐᓇᒍ, ᐋᖅᑭᑦᓱᐃᒃᑲᐃᔨ ᖃᐅᔨᑦᓴᓯᐊᕐᓂᐊᖅᑐᖅ ᐱᕚᓪᓕᕈᑕᐅᔪᑦ ᐱᔭᐅᔪᓄᑦ ᐃᓄᓐᓄᑦ ᐱᖃᓯᐅᔾᔨᓂᐊᖅᑐᑦ ᐊᑭᓕᖅᑕᐅᓂᕐᒥᒃ, ᐊᓯᔾᔨᕐᓂᐅᑐᐃᓐᓇᕆᐊᓖᑦ ᐱᕚᓪᓕᕈᑕᐅᔪᓄᑦ, ᐊᓐᓇᐃᔭᐅᔪᓄᑦ ᐱᒋᐊᓴᕋᐃᓐᓂᖓᓄᑦ ᐱᒻᒪᕆᐅᑉ ᐊᐅᓚᓂᐅᔫᑉ.

26.11.5 - ᐊᓯᖏᑦ ᒐᕙᒪᒃᑯᓐᓂ ᐱᔭᕆᐊᓖᑦ:

ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕙᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᑦ ᐱᔭᕇᖅᑕᐅᑉᐸᑦ ᐊᔾᔨᒐᓚᒋᓗᓂᐅᑉ ᒐᕙᒪᒃᑯᓐᓂ ᐱᔭᕆᐊᓖᑦ ᐊᑦᑐᐊᔪᑦ ᒥᑭᓪᓕᑎᕆᓂᕐᒧᑦ ᐊᑦᑐᖅᑕᐅᓂᐅᔪᓂᒃ ᐅᕝᕙᓗ ᐱᕚᓪᓕᕈᑎᑦᓴᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ, ᒐᕙᒪᒃᑯᑦ ᐊᖏᕈᓐᓇᖅᑐᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕙᓪᓕᕈᑎᑦᓴᓄᓪᓗ ᐊᖏᖃᑎᒌᒍᑎᖓᓐᓂᒃ ᓈᒻᒪᒋᓗᒍ ᑖᒃᑯᓄᖓ ᐱᔭᕆᐊᓕᓐᓄᑦ.

ᐅᐃᒍᖓ 26-1

ᐊᐅᓚᓂᐅᔪᑦ ᐃᓱᒪᒋᔭᐅᔪᑦ ᓈᒻᒪᑦᑑᒋᐊᖏᑦ ᐃᓄᓐᓄᑦ ᐱᕚᓪᓕᕈᑕᐅᒋᐊᖏᑦ

(ᑎᑎᕋᖅᓯᒪᔪᖅ26.3.1)

(Inuinnaqtun) (a)

(a) ᐊᑐᐃᓐᓇᖃᖅᑎᑦᓯᓂᖅ ᐱᒋᐊᕈᑎᑦᓴᓂᒃ;

(Inuinnaqtun) (b)

(b) ᐊᑐᐃᓐᓇᐅᑎᑦᓯᓂᖅ ᖃᐅᔨᒪᔪᒻᒪᕆᓐᓄᑦ ᐅᖃᐅᔾᔭᐅᒋᐊᕐᓂᕐᒥᒃ;

(Inuinnaqtun) (c)

(c) ᖃᐅᔨᒃᑲᐃᓂᖅ ᐱᓇᓱᐊᕐᕕᖃᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ;

(Inuinnaqtun) (d)

(d) ᑳᑦᑐᓛᓄᑦ ᐊᐅᓚᓂᐅᔪᓂᒃ ᓂᕈᐊᕈᓐᓇᓗᐊᓐᖑᐊᕐᓂᖅ.