ᐃᓛᒃᑯᑦ 33

ᐃᓚᖓ 1

ᑐᑭᖏᑦ ᑐᑭᖏᑦ ᑐᑭᓯᓇᖅᓯᒋᐊᕈᑏᓪᓗ

33.1.1

ᐅᕙᓂ ᐃᓛᒃᑰᖅᑐᒥ:

“ᐃᑦᓴᕐᓂᑕᖅᑕᓕᒃ ᓄᓇ” ᑐᑭᓕᒃ ᓄᓇᒥ ᐃᖅᑲᓇᐃᔮᕐᓘᓐᓃᑦ ᐃᓗᐊᓂ ᓄᓇᕗᒻᒥ ᓄᓇᑖᖑᓯᒪᔫᑉ ᐃᑦᓴᕐᓂᑕᐅᓗᓂ, ᐃᓅᓂᕐᒨᖓᓗᓂ, ᐅᕝᕙᓗ ᐱᐅᓯᐅᒪᓂᖓ ᐱᒻᒪᕆᐅᓗᓂ, ᑕᑯᔪᒥᓇᕐᓗᓂ ᐊᓚᒡᒐᐃᑦᑑᓗᓂᓘᓐᓃᑦ ᐅᕝᕙᓘᓐᓃᑦ ᓄᓇ ᐃᑦᓴᕐᓂᑕᕐᒥᒃ ᓇᓂᓯᕕᐅᔪᖅ, ᐱᖃᓯᐅᑎᑦᓱᑎᒃ ᖃᓪᓗᓈᒋᐊᓐᖓᒥᓃᑦ ᕿᓐᓂᖏᑦ;

“ᐃᑦᓴᕐᓂᑕᖅ” ᑐᑭᓕᒃ ᓱᓇᑐᐃᓐᓇᖅ ᓇᐃᐱᑕᐅᔪᖅ ᐃᑦᓴᕐᓂᑕᖅᑕᓕᒻᒥ ᓄᓇᒥ ᐃᑦᓴᕐᓂᑕᐅᓗᓂ, ᐃᓅᓂᕐᒨᖓᓗᓂ ᐅᕝᕙᓗ ᐱᐅᓯᐅᓯᒪᓂᖓ ᐱᒻᒪᕆᐅᔪᖅ, ᑕᑯᔪᒥᓇᖅᑐᖅ ᐊᓚᒡᒐᐃᓪᓗᓂᓘᓐᓃᑦ ᐱᖃᓯᐅᑎᑦᓱᑎᒃ ᖃᓪᓗᓈᒋᐊᓐᖓᒥᓃᑦ ᑎᑎᖅᑲᖁᑎᖏᑦ;

“ᓄᓇᐃᑦ ᐊᐅᓚᑕᐅᔪᑦ ᑲᓇᑕᒥ ᒥᓐᖑᐃᕐᓯᕐᕕᓕᕆᔨᒃᑯᓐᓄᑦ” ᑐᑭᓕᒃ ᑲᓇᑕᒥ ᒥᓐᖑᐃᕐᓯᕐᕖᑦ, ᑲᓇᑕᒥ ᐃᒪᐃᑦ ᒥᓐᖑᐃᕐᓯᕐᕖᑦ, ᑲᓇᑕᒥ ᐃᑦᓴᕐᓂᑕᐃᑦ ᒥᓐᖑᐃᓯᕐᕖᑦ, ᑲᓇᑕᒥ ᓄᓇᒧᑦ ᐃᓕᑕᕐᓇᕈᑏᑦ, ᐊᒻᒪᓗ ᑲᓇᑕᒥ ᐃᑦᓴᕐᓂᑕᖅᑕᓖᑦ ᐊᐅᓚᑕᐅᔪᑦ ᑲᓇᑕᒥ ᒥᓐᖑᐃᓯᕐᕕᓕᕆᔨᒃᑯᓐᓄᑦ ᐊᑖᓂ ᐃᑦᓴᕐᓂᑕᐃᑦ ᐊᒻᒪᓗ ᓇᑉᐸᖅᑕᐅᓯᒪᔪᑦ ᒪᓕᒐᕐᔪᐊᖓᑕ;

“ᑎᓕᔭᐅᓯᒪᔪᑦ ᑎᒥᐅᔪᑦ” ᑐᑭᓕᒃ ᒐᕙᒪᒃᑯᓐᓂ ᑎᒥᐅᔪᑦ, ᒥᓂᔅᑕᐅᕕᐅᔪᓪᓗ, ᐅᕝᕙᓗ ᑭᖑᕝᕕᖅᑎᖏᑦ, ᓇᓗᓇᐃᔭᖅᑕᐅᓯᒪᔪᑦ ᐊᑐᐊᒐᖅ 33-1-ᒥ;

“ᐊᑯᓃᖅᑐᒥᒃ ᓅᑦᓯᓯᒪᓂᖅ” ᑐᑭᓕᒃ

(a)

ᓇᐅᑐᐃᓐᓇᖅ ᓂᐅᕕᖅᑕᐅᔪᖅ ᐊᐃᑦᑑᑕᐅᔪᕐᓘᓐᓃᑦ, ᐅᕝᕙᓗ

(b)

ᐊᑐᖅᑐᐊᖅᑕᐅᔪᑦ ᐅᕝᕙᓗ ᐊᓯᐊ ᐊᐅᓪᓛᖅᑎᑕᐅᔪᑦ ᑎᒍᒥᐊᕐᓂᐅᔪᑦ ᐱᔪᓐᓇᐅᑎᓂᒃ ᐅᕝᕙᓗ ᐃᑦᓴᕐᓂᑕᕐᒥᒃ,

(i)

ᑭᓪᓕᖃᖅᕕᖃᖅᑎᑕᐅᓐᖏᑦᑐᒧᑦ, ᐅᕝᕙᓗ

(ii)

ᐱᓯᒪᑲᐃᓐᓇᕐᓂᖅ, ᐱᖃᓯᐅᑎᑦᓱᓂ ᑭᖑᕙᕆᐊᖅᑕᐅᓂᖅ ᓄᑖᕈᕆᐊᕐᓂᖅᑕᖃᖅᑎᓪᓗᒍ, ᐊᕐᕌᒍᓄᑦ ᐱᖓᓱᓄᑦ ᐅᖓᑖᓄᓪᓘᓐᓃᑦ’

“ᓇᒻᒥᓂᖅ ᐱᖁᑎᒋᔭᐅᔪᖅ” ᑐᑭᓕᒃ ᓄᑦᑕᕋᑦᓴᐅᔪᑦ ᐱᖁᑕᐅᔪᑦ ᐃᓄᒻᒧᑦ ᑕᑯᑦᓴᐅᑎᑦᓯᒍᑕᐅᒍᓐᓇᖅᑐᑦ ᓇᒻᒥᓂᖃᕐᓂᕐᒥᓂᒃ ᒪᓕᒐᖅᑎᒍᑦ ᐊᓯᐊᒍᑦ ᓇᐃᐱᑦᓯᓂᐅᑉ ᐅᕝᕙᓗ ᓇᒻᒥᓂᖃᕐᓂᒃᑯᑦ ᑎᒍᒥᐊᕐᓂᒃᑯᓪᓘᓐᓃᑦ ᓄᓇᒥᒃ;

“ᑭᓇᒃᑯᑐᐃᓐᓇᕐᓅᖓᔪᑦ ᑎᑎᕋᖅᓯᒪᔪᑦ” ᑐᑭᓕᒃ ᑎᑎᕋᖅᓯᒪᔪᑦ ᐸᐸᑕᐅᔪᑦ ᓇᐅᑐᐃᓐᓇᕐᓄᑦ ᒥᓂᔅᑕᐅᕕᐅᔪᓄᑦ ᑎᒥᐅᔪᓄᓪᓘᓐᓃᑦ ᐅᕝᕙᓗ ᑭᓇᒃᑯᑐᐃᓐᓇᕐᓅᖓᔪᒥ ᐊᓪᓚᕕᒻᒥ ᓇᓪᓕᑐᐃᓐᓇᖏᓐᓂ ᖁᑦᓯᓕᕇᓐᓂᖏᓐᓂ ᒐᕙᒪᒃᑯᑦ ᐱᖃᓯᐅᑎᑦᓱᑎᒃ ᑎᑎᕋᖅᓯᒪᔪᑦ ᑎᒍᒥᐊᖅᑕᐅᓚᐅᖅᓯᒪᔪᑦ ᓇᓪᓕᑐᐃᓐᓇᖏᓐᓄᑦ ᒥᓂᔅᑕᐅᕕᐅᔪᑦ. ᑎᒥᐅᔪᑦ, ᐅᕝᕙᓗ ᑭᓇᒃᑯᑐᐃᓐᓇᕐᓅᖓᔪᓂ ᐊᓪᓚᕝᕕᓐᓂ.

33.1.2

ᐅᓇ ᐃᓛᒃᑰᖅᑐᖅ ᐊᑑᑎᓂᐊᖅᑐᖅ ᑕᕆᐅᕐᓄᑦ ᓄᓇᕗᒻᒦᑦᑐᓄᑦ.

ᐃᓚᖓ 2

ᐃᓘᓐᓈᒍᑦ ᑐᓐᖓᕕᐅᔪᑦ

33.2.1

ᐃᑦᓴᕐᓂᑕᐃᑦ ᑎᑎᕋᖅᓯᒪᔪᖁᑎᖏᑦ ᐃᓄᐃᑦ ᓄᓇᕗᒻᒥ ᑎᑎᕋᖅᑕᐅᓯᒪᔪᑦ ᐃᓄᓐᓄᑦ ᐊᑐᖅᑕᐅᕙᑦᑐᑦ ᐊᒻᒪᓗ ᓄᓇᖃᕐᓂᖅ ᓄᓇᓂᒃ ᓄᓇᒥᐅᑕᕐᓂᓪᓗ ᐊᑐᖃᑦᑕᕐᓂᖅ. ᑖᒃᑯᐊ ᑕᑯᑦᓴᐅᔪᑦ ᐊᑦᑐᐊᓂᖃᖅᑐᑦ ᐊᑐᖅᑕᐅᓂᖏᓐᓄᑦ ᓄᓇᖃᕐᓂᖓᓄᓪᓗ ᑕᑯᑦᓴᐅᑎᑦᓯᒻᒪᑕ ᐱᖅᑯᓯᕐᒥᒃ, ᐱᐅᓯᐅᓯᒪᔪᒥᒃ ᑭᓇᒃᑰᓂᖏᓐᓂᓪᓗ ᖃᓄᐃᓕᖓᓂᖏᓐᓂᓪᓗ ᐃᓄᐃᑦ ᐃᓅᓯᖏᑦ ᐊᒻᒪᓗ, ᑕᐃᒪᐃᓐᓂᖓᓄᑦ, ᒐᕙᒪᒃᑯᑦ ᐃᓕᑕᖅᓯᒪᒻᒪᑦ ᐃᓄᐃᑦ ᐊᔾᔨᐅᖏᑦᑐᒥᒃ ᑲᓲᒪᓂᖃᕐᒪᑕ ᑖᒃᑯᑎᒎᓇ ᑕᑯᑦᓴᐅᔪᒃᑯᑦ ᑕᑯᑦᓴᐅᑎᑕᐅᓂᐊᖅᓱᓂ ᑐᑭᖏᓐᓂ ᐊᔾᔨᐅᖏᑦᑐᑦ ᐱᔪᓐᓇᐅᑎᖏᑦᑕ ᑎᒍᒥᐊᖅᑕᖏᑦᑕᓗ.

33.2.2

ᐃᑦᓴᕐᓂᑕᐃᑦ ᑎᑎᕋᖅᓯᒪᔪᑦ ᓄᓇᕗᒻᒥ ᐃᓅᓯᐅᓯᒪᔪᓅᖓᕗᖅ, ᐱᖅᑯᓯᕐᒧᑦ, ᐅᑉᐱᕐᓂᖏᓐᓄᑦ ᐊᒻᒪᓗ ᐃᓕᓐᓂᐊᕐᓂᕐᒧᑦ ᐱᒻᒪᕆᐅᔪᓄᑦ ᐃᓄᓐᓄᑦ. ᑕᐃᒪᐃᓐᓂᖓᓄᑦ, ᓇᓗᓇᐃᖅᓯᓂᖅ, ᓴᐳᔾᔨᓂᖅ ᐊᑦᑐᐃᓗᐊᑦᑕᐃᓕᓂᕐᓗ ᐃᑦᓴᕐᓂᑕᕐᓂᒃ ᐊᒻᒪᓗ ᑐᑭᖏᑦ ᐃᑦᓴᕐᓂᑕᐃᑦ ᑎᑎᕋᖅᓯᒪᓂᖏᑦᑕ ᐱᒻᒪᕆᐅᓂᖅᐸᐅᕗᖅ ᐃᓄᓐᓄᑦ ᐊᒻᒪᓗ ᐃᓚᐅᑎᓐᓂᖓᑦ ᑕᑯᔪᒥᓇᖅᐳᖅ ᑕᐃᒪᐃᑦᓴᕆᐊᖃᖅᓱᓂᓗ.

33.2.3

ᒐᕙᒪᒃᑯᓐᓄᑦ ᑎᒍᒥᐊᖅᑕᐅᔪᑦ ᐊᐅᓚᑕᐅᓂᖏᓐᓄᑦ ᓴᐳᑎᔭᐅᓂᖏᓐᓄᓪᓗ ᐃᑦᓴᕐᓂᑕᐃᑦ ᓄᓇᐃᑦ ᓱᓇᒃᑯᑏᓪᓗ ᑕᐃᒫᑦᓴᐃᓐᓇᖅ ᑎᒍᒥᐊᖅᑕᐅᓂᖃᕐᓂᐊᖅᑐᑦ ᐃᓄᓐᓄᑦ ᐊᔾᔨᓪᓗᐊᖓᓂᒃ.

33.2.4

ᑐᐊᕐᕕᓐᓇᓪᓚᕆᒻᒪᑦ ᓴᖅᑮᓂᖅ ᐃᓪᓗᓂᒃ ᓄᓇᕗᒻᒥ ᓄᖑᑎᑕᐅᑦᑕᐃᓕᓂᖏᓐᓄᑦ ᐊᐅᓚᑕᐅᓂᖏᓐᓄᓪᓗ ᑭᒡᒐᖅᑐᐃᔪᑦ ᐃᓚᖏᑦ ᐃᑦᓴᕐᓂᑕᕐᓅᖓᔪᑦ ᑎᑎᕋᖅᓯᒪᔪᑦ. ᐱᔪᒥᓇᕐᒪᑦ ᐃᓚᖓ ᓄᓇᕗᒻᒥ ᐃᑦᓴᕐᓂᑕᐃᑦ ᑎᑎᖅᑲᖁᑎᖏᑦ ᐃᓂᖃᖁᓪᓗᒋᑦ ᐃᓂᒌᓐᓇᕐᓂᐊᓕᖅᑕᒥᓂ ᓄᓇᕗᒻᒥ ᐱᕙᓪᓕᐊᑐᐃᓐᓇᕐᒪᑦ.

33.2.5

ᐃᓕᑕᕆᓪᓗᒍ ᐆᒪᓂᒃᑯᑦ, ᐱᖅᑯᓯᒃᑯᑦ ᐅᑉᐱᕐᓂᒃᑯᓪᓗ ᐱᒻᒪᕆᐅᓂᖏᑦ ᓇᓗᓇᐃᖅᑕᐅᓯᒪᔪᑦ ᓄᓇᐃᑦ ᓄᓇᕗᒻᒥ ᐃᓄᓐᓄᑦ, ᐃᓄᐃᑦ ᐊᔾᔨᐅᖏᑦᑐᓂᒃ ᐱᔪᓐᓇᕐᓂᓖᑦ ᐱᔪᒪᔭᕆᔭᖃᖅᓱᑎᓪᓗ ᑖᒃᑯᓇᓂ ᓄᓇᓂ ᓇᓗᓇᐃᔭᖅᑕᐅᓯᒪᔪᓂ ᐅᕙᓂ ᐃᓛᒃᑰᖅᑐᒥ.

ᐃᓚᖓ 3

ᐃᓄᐃᑦ ᐃᓚᐅᑎᓐᓂᖓᑦ

33.3.1

ᐸᐸᑦᓯᔩᑦ ᐃᓇᑕᐅᓂᐊᖅᑐᑦ ᐃᓚᐅᑎᖁᔭᐅᓗᑎᒃ ᐱᕙᓪᓕᐊᑎᑕᐅᑎᓪᓗᒋᑦ ᒐᕙᒪᒃᑯᓐᓂ ᐊᑐᐊᒐᐃᑦ ᒪᓕᒐᐃᓪᓗ ᐃᑦᓴᕐᓂᑕᕐᓅᖓᔪᑦ ᓄᓇᕗᒻᒥ.

ᐃᓚᖓ 4

ᐃᓄᐃᑦ ᐱᑐᖃᓕᕆᔩᑦ

33.4.1

ᑐᓐᖓᕕᒃᑯᑦ ᓄᓇᕗᒻᒥ ᑭᖑᕝᕕᖅᑎᖏᓪᓘᓐᓃᑦ, ᓴᖅᑭᖅᑕᐅᑎᑕᐅᓂᐊᖅᑐᑦ ᐸᐸᑕᐅᔪᑎᒍᑦ ᐃᓄᐃᑦ ᐱᑐᖃᖁᑎᖏᓐᓄᑦ (“ᐸᐸᑦᓯᔩᑦ”) ᐊᕐᕌᒎᑉ ᐊᑕᐅᓯᐅᑉ ᐃᓗᐊᓂ ᐅᓪᓗᖓᓂᒃ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᕈᑎ.

33.4.2

ᐸᐸᑕᐅᔪᑦ ᑐᓐᖓᕕᖃᕐᓂᐊᖅᑐᑦ ᐊᐅᓚᑕᐅᓂᕐᒥᒃ ᐸᐸᑦᓯᔨᓄᑦ ᓂᕈᐊᕋᑦᓴᓕᐊᖑᓂᐊᖅᑐᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ. ᐸᐸᑦᓯᔩᑦ ᓈᒻᒪᑦᑐᒥᒃ ᓇᓕᒧᒌᑦᑐᒥᒃ ᐱᖅᑯᓯᕐᒥᒃ ᐅᔾᔨᕈᓱᓐᓂᖃᕐᓂᐊᖅᑐᑦ ᐊᒻᒪᓗ ᖃᐅᔨᒪᓂᖃᑦᓯᐊᕐᓗᑎᒃ.

33.4.3

ᐸᐸᑦᓯᔩᑦ ᑎᒍᓯᕙᓪᓕᐊᓂᐊᖅᑐᑦ ᐃᓚᕙᓪᓕᐊᑐᐃᓐᓇᖅᑐᓂᒃ ᐃᑲᔪᖅᓯᓂᕐᒧᑦ, ᐃᓇᑦᓯᓂᕐᒧᑦ, ᐊᒻᒪᓗ ᐊᐅᓚᑦᓯᓂᕐᒧᑦ ᔭᒐᑎᑕᐅᑦᑕᐃᓕᓂᖏᓐᓄᑦ, ᐊᐅᓚᑕᐅᓂᖏᓐᓄᑦ, ᐅᑎᖅᑎᑕᐅᓂᖏᓐᓄᑦ ᐊᒻᒪᓗ ᑕᑯᑦᓴᐅᑎᑕᐅᓂᖏᓐᓄᑦ ᐃᑦᓴᕐᓂᑕᐃᑦ ᓄᓇᐃᑦ ᓱᓇᒃᑯᑏᓪᓗ ᓄᓇᕗᒻᒥ, ᐊᒻᒪᓗ ᐊᓯᖏᓕᒫᖏᓐᓂᒃ ᐊᐅᓚᓂᐅᔪᓂᒃ ᓇᓗᓇᐃᔭᖅᑕᐅᓯᒪᔪᓂᒃ ᐊᖏᕈᑎᒥ.

33.4.4

ᐃᒪᐃᓕᖓᓂᖏᑦ ᐸᐸᑦᓯᔩᑦ ᖃᐅᔨᓴᑦᓯᐊᕈᑕᐅᓂᐊᖅᑐᑦ ᐃᑉᐱᒋᔭᐅᑦᓯᐊᕐᓂᖏᓐᓂᒃ ᐊᑦᑕᓇᖏᑦᑐᒃᑯᓪᓗ ᐊᑐᖅᑕᐅᓂᖏᓐᓂᒃ ᐱᖁᑎᒋᔭᐅᔪᑦ ᑲᒪᒋᔭᐅᑎᑕᐅᔪᑦ.

33.4.5

ᑎᓕᔭᐅᓯᒪᔪᑦ ᑎᒥᐅᔪᑦ ᐱᕕᖃᑦᑎᑦᓯᓂᐊᖅᑐᑦ ᐸᐸᑦᓯᔨᓂᒃ ᐊᑐᐃᓐᓇᖃᕈᓐᓇᕐᓂᕐᒥᒃ ᑐᓴᕋᑦᓴᓂᒃ ᐸᐸᑕᖏᓐᓅᖓᔪᓂᒃ ᐱᔾᔪᑎᖃᕐᓗᑎᒃ ᐃᑦᓴᕐᓂᑕᕐᓂᒃ ᐃᖅᑲᓇᐃᔮᖑᔪᓂᒃ ᓄᓇᕗᒻᒥ, ᑐᓐᖓᕕᐅᓗᓂ ᑭᓪᓕᖃᑦᓯᐊᖅᑎᑕᐅᓂᖅ ᐊᑐᐃᓐᓇᖃᕐᓂᕐᒥᒃ ᐸᐸᑕᐅᑦᓯᐊᕆᐊᖃᕐᓂᖅ ᐱᔾᔪᑕᐅᓪᓗᓂ ᑲᓐᖑᓇᖅᑑᓂᖏᓐᓄᓪᓗ ᐃᑉᐱᓇᓗᐊᖅᑐᑦ ᑐᓴᕋᑦᓴᐃᑦ.

ᐃᓚᖓ 5

ᐱᕕᖃᖅᑎᑦᓯᒍᑕᐅᔪᑦ

33.5.1

ᒪᓕᒐᖅ ᐊᒻᒪᓗ ᐊᑐᐊᒐᖅ ᐅᖃᐅᓯᐅᔪᖅ ᐃᓚᖓ 3-ᒥ ᓴᖅᑮᒍᑕᐅᓂᐊᖅᑐᖅ ᐱᕕᖃᖅᑎᑦᓯᓂᕐᒧᑦ ᐊᐅᓚᓂᐅᔪᓂᒃ ᐊᑦᑐᐊᔪᓂᒃ ᓴᐳᔾᔭᐅᓂᖏᓐᓄᑦ, ᓴᒡᒐᖅᑕᐅᓂᖏᓐᓄᑦ ᐊᒻᒪᓗ ᐅᑎᖅᑎᑦᓯᓂᖅ, ᑎᑎᕋᕐᓂᖅ ᐊᒻᒪᓗ ᐅᓂᒃᑳᓕᐅᕈᑎᖃᕐᓂᖅ ᐃᑦᓴᕐᓂᑕᕐᓂᒃ ᓄᓇᓂᒃ. ᖃᓄᐃᒋᐊᕈᑕᐅᔪᑦ ᐱᔪᓐᓇᐅᑎᖃᕋᑎᒃ ᐅᓚᕕᑦᑐᓂᒃ ᐃᑦᓴᕐᓂᑕᕐᓂᒃ ᓄᓇᓂᒃ ᓱᓇᒃᑯᑎᓂᓪᓗ ᐊᒻᒪᓗ ᐱᔪᓐᓇᕐᓂᖃᕋᑎᒃ ᑲᒪᔪᖃᖅᐸᑦ ᐃᑦᓴᕐᓂᑕᕐᓐᓂᒃ ᑲᒪᒋᔭᐅᔾᔪᑎᖏᑦ ᑖᒃᑯᓇᓂᓪᓗᐊᖅ ᒪᓕᒐᖃᕐᓂᐊᖅᑐᑦ.

33.5.2

ᒪᓕᒐᖅ ᐊᑐᐊᒐᕐᓗ ᐅᖃᓯᐅᔪᖅ ᐃᓚᖓᓂ 3-ᒥ ᐱᕕᖃᖅᑎᑦᓯᒍᑕᐅᓂᐊᖅᑐᖅ ᑎᒍᒥᐊᖅᑎᐅᔪᖅ ᐱᔪᓐᓇᐅᑎᓂᒃ ᕿᓐᖑᒻᒥᒐᕐᓂᐊᖏᑦᑐᖅ, ᖃᐅᔨᓴᕐᓂᐊᖏᑦᑐᖅ, ᓴᒡᒐᕐᓂᐊᖏᑦᑐᖅ, ᐊᓯᔾᔩᓂᐊᕋᓂᓗ ᐃᑦᓴᕐᓂᑕᕐᓂᒃ ᓄᓇᓂᒃ, ᐊᖏᖅᑕᐅᖅᑳᓚᐅᕋᓂ ᓄᓇᒥᒃ ᑎᒍᒥᐊᖅᑐᒧᑦ. ᐊᖏᖅᑕᐅᑦᑕᐃᓕᓂᖅᑕᖃᕆᐊᖃᓐᖏᑦᑐᖅ ᐱᔾᔪᑎᑦᓴᖃᑦᓯᐊᖏᓪᓗᓂ.

33.5.3

ᐱᔭᐅᑐᐊᖅᐸᑕ ᑐᑦᓯᕋᐅᑏᑦ ᐱᔪᓐᓇᐅᑎᒥᒃ ᐃᑦᓴᕐᓂᑕᕐᓄᑦ ᐊᐅᓚᓂᐅᔪᓄᑦ, ᐱᖃᓯᐅᑎᑦᓱᓂ ᖃᐅᔨᓴᖅᑕᐅᓂᖏᑦ ᐃᑦᓴᕐᓂᑕᐃᑦ ᓄᓇᐃᑦ, ᐅᕝᕙᓗ ᐲᖅᑕᐅᓂᖏᑦ ᐃᑦᓴᕐᓂᑕᐃᑦ ᓱᓇᒃᑯᑏᑦ, ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᐃᒪᐃᓐᓂᐊᖅᑐᖅ, ᑐᐊᕕᕐᓇᖅᑐᖃᓐᖏᑐᐊᖅᐸᑦ, ᓯᕗᒧᑦᑎᑦᓯᒋᐊᓖᑦ ᓇᓕᖅᑲᖏᓐᓂᒃ ᑐᑦᓯᕋᐅᑏᑦ ᐸᐸᑦᓯᔨᓄᑦ.

33.5.4

ᐱᔭᐅᑐᐊᖅᐸᑕ ᓇᓕᖅᑲᖏᑦ, ᐸᐸᑦᓯᔩᑦ ᐱᕕᑦᓴᖃᑦᓯᐊᕆᐊᓖᑦ ᐅᓪᓗᓂᒃ ᐅᓪᓗᖅᓯᐅᑎᑎᒍᑦ, ᓇᓗᓇᐃᖅᑕᐅᓯᒪᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᑎᒥᐅᔪᓄᑦ ᐅᖃᖃᑎᖃᕐᓗᑎᒃ ᐸᐸᑦᓯᔨᓂᒃ, ᕿᐱᓗᓪᓗᒍ ᑐᑦᓯᕋᐅᑎ ᑎᑎᖅᑲᑎᒍᑦ.

33.5.5

ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᓇᓕᖅᑲᓕᔭᖅᐸᑦ ᑎᑎᕋᖅᓯᒪᔪᓂᒃ ᕿᐱᓗᑦᑐᑦ ᐃᓗᐊᓂ ᓇᓗᓇᐃᖅᑕᐅᓯᒪᔪᑦ ᐅᓪᓗᐃᑦ ᐅᓪᓗᖅᓯᐅᑎᓂ, ᐃᒪᐃᓐᓂᐊᖅᑐᖅ:

(a)

ᑐᓂᓯᑦᑕᐃᓕᓗᑎᒃ ᐱᔪᓐᓇᐅᑎᒥᒃ;

(b)

ᕿᒥᕐᕈᓗᒋᑦ ᕿᐱᓗᒍᑕᐅᔪᑦ; ᐊᒻᒪᓗ

(c)

ᐱᕕᖃᖅᑎᑦᓯᓗᑎᒃ ᐸᐸᑦᓯᔨᓂᒃ ᓇᓕᖅᑲᖏᓐᓂᒃ ᐱᓗᑎᒃ ᐅᓂᒃᑳᑦ ᐸᕐᓇᑕᐅᓯᒪᔪᑦ ᑐᓐᖓᕕᖃᕐᓗᑎᒃ ᖃᐅᔨᓴᕐᓂᐅᓯᒪᔪᒥᒃ.

33.5.6

ᕿᐱᓗᒍᑕᐅᔪᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 33.5.5 ᐱᔾᔪᑎᑦᓴᖃᑦᓯᐊᖅᐸ ᐅᑯᓄᖓ

(a)

ᐊᑦᓱᕈᓐᖏᓗᐊᖅᑐᑦ ᐃᓄᓐᓂᒃ ᐃᓚᐅᑎᑦᓯᒐᓱᐊᕐᓂᕐᒥᒃ ᐱᕚᓪᓕᕈᑎᑦᓴᓂᓪᓗ ᐅᕝᕙᓗ ᓈᒻᒪᖏᑦᑐᒥᒃ ᐊᐅᓚᓂᖃᖅᓯᒪᔪᑦ ᑐᓂᒪᓂᖏᑦ ᐃᓚᐅᑎᑦᓯᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᑖᓂ ᐱᔪᓐᓇᐅᑏᑦ ᑐᓂᐅᔭᔪᑦ ᑕᐃᑲᓂ ᐅᓪᓗᕐᒥ ᐊᓂᒍᖅᓯᒪᔪᒥ, ᐅᕝᕙᓗ

(b)

ᐅᓚᕕᓐᓂᖅ ᓄᓇᓂᒃ ᐃᓄᐃᑦ ᐅᑉᐱᕆᔭᖃᕐᕕᒋᔭᖏᓐᓂᒃ ᐃᓅᓂᕐᒧᓪᓘᓐᓃᑦ ᐊᓚᒡᒐᐃᑦᑐᓂᒃ, ᐊᓚᒡᒐᐃᓐᓂᖅ ᓇᓗᓇᐃᔭᖅᑕᐅᓯᒪᓂᖓ ᑐᓐᖓᕕᒋᓗᒍ ᐸᐸᑦᓯᔨᒃᑯᓐᓄᑦ ᐅᖃᖃᑎᖃᕐᓗᑎᒃ ᓇᓗᓇᐃᖅᑕᐅᓯᒪᔪᓂᒃ ᑎᒥᐅᔪᓂᒃ, ᓇᓗᓇᐃᖅᑕᐅᓯᒪᔪᑦ ᑎᒥᐅᔪᑦ ᕿᐱᓗᓐᓂᐊᖅᑐᑦ ᑐᑦᓯᕋᐅᑎᓂᒃ.

ᑎᓕᔭᐅᓯᒪᔪᖅ ᑎᒥᐅᔪᖅ ᕿᐱᓘᑎᖃᕆᐊᓕᒃ ᑐᒃᓯᕋᐅᒻᒥᒃ ᐱᔪᓐᓇᐅᑎᒧᑦ.

33.5.7

ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᐃᒪᐃᓐᓂᐊᖅᑐᖅ, ᑐᓐᖓᕕᖃᑦᓯᐊᖅᑐᓂᒃ ᑐᑦᓯᕋᕐᕕᐅᒍᑎᒃ ᐸᐸᑦᓯᔨᓄᑦ, ᐊᑕᑎᑦᓯᓂᐊᖅᑐᑦ ᒪᓕᑦᑕᐅᒋᐊᓕᓐᓂᒃ ᐃᓚᒋᔭᐅᔪᓂᒃ ᐱᔪᓐᓇᐅᑎᒧᑦ, ᐱᔭᕆᐊᓕᑦᑕᖃᕐᓗᓂ ᐱᔭᕇᖅᐸᑕ ᓄᓇᒥ ᑲᒪᒋᔭᖏᑦ, ᐱᔪᓐᓇᐅᑎᒥᒃ ᑎᒍᒥᐊᖅᑐᖅ ᐃᒪᐃᓐᓂᐊᖅᑐᖅ, ᐱᕕᓕᒫᒃᑯᑦ:

(a)

ᓇᔫᑎᓗᑎᒃ ᓄᓇᒥ ᓇᓗᓇᐃᖅᑕᐅᔪᒥ ᐸᐸᑦᓯᔨᓄᑦ, ᓄᓇᓕᓐᓂ ᖃᓂᓐᓂᖅᐹᓄᑦ ᓄᓇᒧᑦ, ᑐᑭᓯᑎᑦᓯᒋᐊᖅᑐᕐᓗᑎᒃ ᐅᖃᖃᑎᒌᒍᑎᖃᕐᓗᑎᓪᓗ ᐃᖅᑲᓇᐃᔮᖑᓂᐊᖅᑐᒥᒃ; ᐊᒻᒪᓗ

(b)

ᐱᕕᖃᖅᑎᑦᓯᓗᑎᒃ ᓄᓇᓕᓕᓐᓂᒃ ᕿᒥᕐᕈᓗᑎᒃ ᓱᓇᒃᑯᑎᓕᒃ ᐲᖅᑕᐅᔪᓂᒃ ᓄᓇᒥᒃ.

33.5.8

ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 33.5.6 ᑐᑦᓯᕋᐅᑏᑦ ᓵᖓᓐᓃᑦᑐᑦ ᓇᓗᓇᐃᖅᑕᐅᓯᒪᔪᑦ ᑎᒥᐅᔪᑦ ᐊᑦᑐᐊᓂᖃᖅᐸᑕ ᑐᑦᓯᕌᖑᔪᒧᑦ ᓄᓇᒧᑦ ᐊᑐᖅᑕᐅᒍᒪᔪᒧᑦ ᓄᓇᒥᒃ ᐊᑐᕐᓂᕐᒧᑦ ᐱᔪᓐᓇᐅᑎᖃᕆᐊᓕᒻᒧᑦ, ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᐃᒪᐃᑦᓱᓐᓇᖅᑐᖅ, ᕿᐱᓗᓐᖏᖔᕐᓗᓂ ᑐᑦᓯᕋᐅᑎᒥᒃ, ᑐᓂᓯᒍᓐᓇᖅᑐᑦ ᐱᔪᓐᓇᐅᑎᒥᒃ ᒪᓕᒐᖃᕐᓗᓂ ᐊᑦᑐᐊᓂᖃᑦᓯᐊᖅᑐᓂᒃ ᕿᐱᓗᒍᑕᐅᓯᒪᔪᓄᑦ.

33.5.9

ᒪᓕᒐᖅ ᐊᒻᒪᓗ ᐊᑐᐊᒐᖅ ᐅᖃᐅᓯᐅᔪᖅ ᐃᓚᖓ 3-ᒥ ᐱᕕᖃᖅᑎᑦᓯᒍᑕᐅᓂᐊᖅᑐᖅ ᐊᑐᓂᑦ ᐱᔪᓐᓇᐅᑎᓕᔭᖅᑐᑦ ᑐᓂᓯᒋᐊᓖᑦ ᐅᓂᒃᑳᓂᒃ ᓇᓗᓇᐃᖅᑕᐅᓯᒪᔪᒧᑦ ᑎᒥᐅᔪᓄᑦ ᐸᐸᑦᓯᔨᓂᓪᓗ. ᑐᑦᓯᕋᕈᑎᑦᓴᖃᑦᓯᐊᖅᑐᖃᖅᑎᓪᓗᒍ, ᑎᒥᐅᔪᖅ ᑐᓂᓯᒋᐊᓕᒃ ᐸᐸᑦᓯᔨᓄᑦ ᐃᓄᑦᑎᑑᖅᑐᓂᒃ ᓇᐃᓪᓕᑎᖅᓯᒪᔪᓂᒃ ᐅᓂᒃᑲᓂᒃ.

33.5.10

ᓇᓗᓇᐃᖅᑕᐅᓯᒪᔪᑦ ᑎᒥᐅᔪᑦ ᐊᑐᐃᓐᓇᐅᑦᓯᒋᐊᓖᑦ ᐃᓄᑦᑎᑑᓕᖅᑎᓯᒪᔪᓂᒃ ᑎᑎᕋᖅᓯᒪᔪᓂᒃ ᑐᕌᖅᓯᒪᔪᓂᒃ ᑐᓴᐅᒪᑎᑦᓯᓂᕐᒧᑦ ᑲᓇᑕᒥ ᑭᓇᒃᑯᑐᐃᓐᓇᕐᓂᒃ ᐃᑦᓴᕐᓂᑕᐃᑦ ᒥᑦᓴᐃᓐᓄᑦ ᓄᓇᕗᒻᒥ.

33.5.11

ᐱᔪᓐᓇᐅᑎ ᓇᓗᓇᐃᖅᑕᐅᓯᒪᓐᖏᑐᐊᖅᐸᑦ ᐱᔪᓐᓇᐅᑎᓕᔭᖅᑐᑦ ᕿᒪᐃᖁᔭᐅᓗᓂ ᐃᑦᓴᕐᓂᑕᕐᒥᒃ ᐱᔾᔪᑕᐅᓪᓗᑎᒃ ᑐᑭᓯᓂᐊᕐᓂᐅᔪᓅᖓᔪᑦ ᐅᕝᕙᓗ ᐱᐅᓯᐅᓯᒪᔪᓄᑦ ᖃᐅᔨᒪᔭᕆᒍᒪᔭᐅᔪᑦ, ᓱᓇᒃᑯᑎᓕᒫᑦ ᓄᐊᑕᐅᔪᑦ ᐱᔪᓐᓇᐅᑎᓕᔭᖅᑐᒧᑦ ᑐᓂᔭᐅᓂᐊᖅᑐᑦ ᓇᓗᓇᐃᖅᑕᐅᓯᒪᔪᒧᑦ ᑎᒥᐅᔪᒧᑦ ᐅᕝᕙᓗ ᐸᐸᑦᓯᔨᓄᑦ ᓇᓗᓇᐃᖅᑕᐅᓯᒪᔪᒥ ᖃᑦᓯᒥᓗ ᑎᑎᖅᓯᒪᓗᑎᒃ ᐱᔪᓐᓇᐅᑎᓂ.

33.5.12

ᑐᑦᓯᕋᖅᑐᖃᖅᐸᑦ ᓄᓇᒥᒃ ᐊᑐᕈᒪᓗᑎᒃ ᐱᔪᓐᓇᐅᑎᒥᒃ ᓄᓇᕗᒻᒥ, ᐊᒻᒪᓗ ᓇᓗᓇᓐᖏᑉᐸᑦ ᓄᓇᑕᖃᑕᐃᓐᓇᕆᐊᖃᕆᐊᖓ ᐃᑦᓴᕐᓂᑕᕐᓂᒃ ᐱᒻᒪᕆᐅᔪᓂᒃ ᓄᓇᓂ ᐊᑦᑐᖅᑕᐅᔪᓂ, ᓄᓇᒥᒃ ᐊᑐᕈᓐᓇᐅᑎᒥᒃ ᑐᓂᔭᐅᔪᖃᕆᐊᖃᓐᖏᑦᑐᖅ ᑎᑎᖅᑲᑎᒍᑦ ᐊᖏᖅᑕᐅᓯᒪᓐᖏᑐᐊᕈᑎᒃ ᓇᓗᓇᐃᖅᑕᐅᓯᒪᔪᒧᑦ ᑎᒥᐅᔪᒧᑦ. ᐱᔾᔪᑎᑦᓴᖃᑦᓯᐊᖏᓪᓗᓂ ᕿᐱᓗᑦᑕᐅᒋᐊᖃᓐᖏᑦᑐᖅ.

33.5.13

ᐊᑐᓂᑦ ᓄᓇᒥᒃ ᐊᑐᓂᕐᒧᑦ ᐱᔪᓐᓇᐅᑏᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 33.5.12 ᓇᓗᓇᐃᔭᐃᓂᐊᖅᑐᑦ ᐸᕐᓇᐅᑎᓂᒃ ᐊᐅᓚᓂᐅᔪᓂᓪᓗ ᐃᑦᓴᕐᓂᑕᐃᑦ ᓄᓇᐃᑦ ᓴᐳᑎᔭᐅᔾᔪᑎᖏᓐᓂᒃ ᐅᑎᖅᑎᑕᐅᓂᖏᓐᓂᓪᓗ ᐊᑑᑎᔭᐅᒋᐊᓖᑦ ᐱᔪᓐᓇᐅᑎᓕᔭᖅᑐᒧᑦ, ᐊᒻᒪᓗ ᐊᓯᓕᒫᖏᑦ ᒪᓕᒋᐊᓕᐅᑎᑕᐅᔪᑦ ᓇᓗᓇᐃᖅᑕᐅᓯᒪᔪᒧᑦ ᑎᒥᐅᔪᒧᑦ.

ᐃᓚᖓ 6

ᐃᖅᑲᓇᐃᔭᖅᑎᖃᕐᓂᖅ ᑳᑦᑐᓛᑦᑎᑦᓯᓂᕐᓗ

33.6.1

ᑎᒥᐅᔪᖁᑎᖓᑦ ᒐᕙᒪᒃᑯᑦ ᑳᑦᑐᓛᑦᑎᑦᓯᓂᐊᖅᐸᑦ ᑲᔪᓯᑎᑦᓯᓗᑎᒃ ᐃᑦᓴᕐᓂᑕᓕᕆᔪᓂᒃ ᓄᓇᕗᒻᒥ ᑎᒥᐅᔪᑦ ᐃᒪᐃᓐᓂᐊᖅᑐᑦ:

(a)

ᓂᕈᐊᖅᑕᖃᓗᐊᓐᖑᐊᕐᓗᑎᒃ ᐱᔪᓐᓇᕐᓂᓕᓐᓂᒃ ᐃᓄᓐᓂᒃ ᑳᑦᑐᓛᑦᑎᓂᒃ ᑎᒥᐅᔪᑦ ᐊᑭᑦᑐᕋᐅᑎᒍᑕᐅᑎᑦᓯᓂᐊᖅᐸᑕ ᑳᑦᑐᓛᒻᒥᒃ; ᐊᒻᒪᓗ

(b)

ᖃᐅᔨᓴᑦᓯᐊᕐᓗᑎᒃ ᑳᑦᑐᓛᑦᑎᓕᒫᑦ ᐱᒐᓱᐊᖅᑳᕋᓗᐊᕐᒪᖔᑕ ᐱᔪᓐᓇᕐᓂᓕᓐᓂᒃ ᐃᓄᓐᓂᒃ.

33.6.2

ᐃᑦᓴᕐᓂᑕᓕᕆᓂᕐᒧᑦ ᐊᐅᓚᓂᐅᔪᑦ ᓄᓇᕗᒻᒥ ᐊᐅᓚᑕᐅᔪᑦ ᒐᕙᒪᒃᑯᓐᓄᑦ ᒪᓕᒋᐊᓖᑦ, ᐊᑦᓯᓂᖅᐹᖓᒍᑦ, ᐃᖅᑲᓇᐃᔭᖅᑎᑦᓯᓂᕐᒧᑦ ᐃᓕᓐᓂᐊᑎᑦᓯᓂᕐᒧᓪᓗ ᐱᕕᖃᖅᑎᑦᓯᒍᑕᐅᔪᓄᑦ ᓇᓗᓇᐃᔭᖅᑕᐅᔪᓄᑦ ᐃᓛᒃᑯᑦ 23-ᒥ.

ᐃᓚᖓ 7

ᑎᒍᒥᐊᕐᓂᖅ ᐃᑦᓴᕐᓂᑕᕐᓂᒃ ᓱᓇᒃᑯᑎᓂᒃ

33.7.1

ᒐᕙᒪᒃᑯᑦ ᐸᐸᑦᓯᔩᓪᓗ ᑲᑐᔾᔨᓪᓗᑎᒃ ᓇᒻᒥᓂᖃᕐᓂᐊᑦᑐᑦ ᐃᓘᓐᓇᖏᓐᓂᒃ ᐃᑦᓴᕐᓂᑕᕐᓂᒃ ᓱᓇᒃᑯᑎᓂᒃ ᓇᐃᐱᑕᐅᔪᓂᒃ ᓄᓇᕗᑦ ᐃᓗᐊᓂ ᐃᒪᐃᑦᑑᖏᑉᐸᑕ:

(a)

ᑭᓇᒃᑯᑐᐃᓐᓇᕐᓅᖓᔪᑦ ᑎᑎᖅᑲᖁᑏᑦ;

(b)

ᓇᒻᒥᓂᖅ ᐱᖁᑎᒋᔭᐅᔪᑦ ᑭᓇᑐᐃᓐᓇᕐᒧᑦ ᐃᓄᒻᒧᑦ; ᐅᕝᕙᓗ

(c)

ᐃᓗᐊᓂ ᓄᓇᐃᑦ ᐊᐅᓚᑕᐅᔪᑦ ᑲᓇᑕᒥ ᒥᓐᖑᐃᕐᓯᕐᕕᓕᕆᔨᒃᑯᓐᓄᑦ.

33.7.2

ᓱᓇᒃᑯᑏᑦ ᓇᐃᐱᑕᐅᔪᑦ ᐃᓗᐊᓂ ᓄᓇᕗᑦ ᐊᐅᓚᑕᐅᔪᓂ ᑲᓇᑕᒥ ᒥᓐᖑᐃᕐᓯᕐᕕᓕᕆᔨᒃᑯᓐᓄᑦ ᐊᐅᓚᑕᐅᓂᐊᖅᑐᑦ ᑐᓐᖓᕕᖃᕐᓗᑎᒃ ᐱᕕᖃᖅᑎᑦᓯᒍᑕᐅᔪᓂᒃ ᐊᖏᕈᑎᒥ.

33.7.3

ᖃᓄᑐᐃᓐᓇᖅ ᐅᓚᕕᓐᓂᐅᔪᑦ ᓴᒃᑯᐃᓂᐅᔪᓪᓘᓐᓃᑦ ᓱᓇᒃᑯᑎᓂᒃ ᐊᐅᓚᑕᐅᓂᐊᖅᑐᑦ ᑐᓐᖓᕕᖃᕐᓗᑎᒃ ᐆᒥᖓ ᐃᓛᒃᑰᖅᑐᒥ.

33.7.4

ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᐸᐸᑦᓯᔩᓪᓗ ᑲᑐᔾᔨᓗᑎᒃ ᐊᖏᕆᐊᓖᒃ, ᑎᑎᕋᖅᓯᒪᔪᖅᑎᒍᑦ, ᓯᕗᕐᖓᓂ ᐊᑯᓃᖅᑐᒨᖓᔪᓄᑦ ᓅᑕᐅᓯᒪᓂᖏᓐᓄᑦ ᓇᐅᑐᐃᓐᓇᐃᑦ ᐃᑦᓴᕐᓂᑕᐃᑦ ᓱᓇᒃᑯᑏᑦ ᓇᐃᐱᑕᐅᔪᑦ ᓄᓇᕗᒻᒥ.

33.7.5

ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᐸᐸᑦᓯᔩᓪᓗ ᐊᖏᖃᑎᒌᒍᓐᓇᖏᑉᐸᑕ ᑐᑦᓯᕋᐅᑎᒧᑦ ᐊᑯᓃᖅᑐᒥᒃ ᓅᑕᐅᓯᒪᔪᖃᓚᖓᑎᓪᓗᒍ, ᑕᐃᒫᒃ ᓇᓗᓇᐃᔭᖅᑕᐅᓯᒪᒻᒪᑦ ᑎᑎᕋᖅᓯᒪᔪᒥ 33.7.4, ᑲᒪᒋᔭᐅᔪᖅ ᓅᑕᐅᒐᔭᖅᑐᖅ ᖃᓄᖅᑑᕈᑕᐅᒐᔭᖅᑎᓪᓗᒍ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᓄᑦ ᐊᑖᓂ ᐃᓛᒃᑯᑦ 38 ᓇᓗᓇᐃᖅᑕᐅᓯᒪᔪᒧᑦ ᑎᒥᐅᔪᒧᑦ ᐸᐸᑦᓯᔨᓄᓪᓘᓐᓃᑦ. ᖃᓄᖅᑑᕈᑎᖃᓕᕈᑎᒃ, ᐋᖅᑭᑦᓱᐃᔩᑦ ᕿᒥᕐᕈᔩᑦ ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐃᓘᓐᓈᒍᑦ ᑐᕌᒐᖓᓂᒃ ᐊᖏᕈᑎᐅᑉ, ᐱᕕᖃᖅᑎᑦᓯᒍᑕᐅᔪᓂᒃ ᐅᕘᓇ ᐃᓛᒃᑰᖅᑐᒃᑯᑦ, ᐊᒻᒪᓗ ᐊᓯᓕᒫᖏᑦ ᐊᑦᑐᐊᓂᖃᖅᑐᑦ ᐃᓱᑦᒪᑦᓴᖅᓯᐅᕈᑕᐅᔪᒧᑦ.

33.7.6

ᐸᐸᑦᓯᔩᑦ ᓇᓗᓇᐃᖅᓯᓂᐊᖅᑐᑦ ᓴᒃᑯᑕᐅᓂᖏᓐᓂᒃ ᐃᓘᓐᓇᑎᒃ ᓱᓇᒃᑯᑏᑦ ᓇᐃᐱᑕᐅᔪᑦ ᐃᓄᐃᑦ ᓄᓇᖁᑎᖏᓐᓂ.

33.7.7

ᓇᓗᓇᐃᖅᑕᐅᓯᒪᔪᑦ ᑎᒥᐅᔪᑦ ᓇᓗᓇᐃᖅᓯᓂᐊᖅᑐᑦ ᓴᒃᑯᑕᐅᓂᖏᓐᓂᒃ ᐃᓘᓐᓇᑎᒃ ᓱᓇᒃᑯᑏᑦ ᓇᐃᐱᑕᐅᔪᑦ ᓄᓇᕗᒻᒥ ᐊᓯᖏᓐᓂ ᐃᓄᐃᑦ ᓄᓇᖁᑎᖏᑦᑕ ᐊᑦᑐᐊᔪᑦ ᐱᔪᓐᓇᐅᑎᖏᓐᓄᑦ ᐸᐸᑦᓯᔩᑦ ᑎᒍᓯᓂᕐᒧᑦ ᑕᐃᒪᐃᓕᖓᑎᑕᐅᒻᒪᑦ ᐅᕙᓂ ᐃᓛᒃᑰᖅᑐᒥ.

33.7.8

ᑭᓇᒃᑯᑐᐃᓐᓇᕐᓅᖓᔪᑦ ᑐᓴᕋᑦᓴᐃᑦ ᓇᒥᑐᐃᓐᓇᖅ ᓇᐃᐱᑕᐅᒍᑎᒃ ᓇᒻᒥᓂᕆᔭᐅᓂᐊᖅᑐᑦ ᐊᐅᓚᑕᐅᓪᓗᑎᓪᓗ ᒐᕙᒪᒃᑯᓐᓄᑦ ᓴᖅᑮᓯᒪᔪᓄᑦ ᑎᒍᒥᐊᖅᑐᓄᓪᓘᓐᓃᑦ.

ᐃᓚᖓ 8

ᐊᑐᕐᓂᖅ ᐃᑦᓴᕐᓂᑕᕐᓂᒃ ᓱᓇᒃᑯᑎᓂᒃ

33.8.1

ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᑎᒍᒥᐊᕐᓂᐊᖅᑐᖅ ᖃᖓᓕᒫᑦᓯᐊᖅ ᓴᒃᑯᐃᒍᓐᓇᕐᓂᕐᒥᒃ ᑭᓪᓕᓕᓐᓂᒃ ᖃᑦᓯᐅᓂᖏᓐᓄᑦ ᓱᓇᒃᑯᑏᑦ ᑎᒥᐅᔪᓄᑦ ᓄᓇᕗᒻᒥ ᓲᕐᓗ ᐸᐸᑦᓯᔨᒃᑯᓐᓄᑦ.

33.8.2

ᐸᐸᑦᓯᔩᑦ ᑐᑦᓯᕋᕈᓐᓇᖅᑐᑦ ᐸᐸᑕᐅᔪᓂᒃ ᓱᓇᒃᑯᑎᓂᒃ ᓇᐃᐱᑕᐅᔪᓂᒃ ᐃᓗᐊᓂ ᓄᓇᕗᑦ ᐅᕝᕙᓗ ᓇᓪᓕᑐᐃᓐᓇᖏᓐᓂᒃ ᒐᕙᒪᑐᖃᒃᑯᓐᓂᒃ ᐊᕕᑦᑐᖅᓯᒪᔪᕐᔪᐊᕐᓂᓘᓐᓃᑦ ᑎᒥᐅᔪᓂᒃ, ᐱᖃᓯᐅᑎᑦᓱᓂ ᑲᓇᑕᒥ ᑕᑯᔭᒐᖃᕐᕕᔾᔪᐊᖅ, ᐊᒻᒪᓗ ᓇᐅᑐᐃᓐᓇᐃᑦ ᐊᕕᑦᑐᖅᓯᒪᔪᕐᔪᐊᓂ ᐃᑦᓴᕐᓂᑕᕐᓄᑦ ᑎᒥᐅᔪᑦ. ᑕᐃᒪᐃᑦᑐᑦ ᑐᑦᓯᕋᐅᑏᑦ ᕿᐱᓗᑦᑕᐅᒋᐊᖃᓐᖏᑦᑐᑦ ᑎᒥᐅᔪᒧᑦ ᐃᒪᐃᓐᖏᑐᐊᖅᐸᑦ:

(a)

ᐸᐸᑦᓯᔩᑦ ᐸᐸᑦᓯᒍᓐᓇᖏᑐᐊᖅᐸᑕ ᓱᓇᒃᑯᑎᒥᒃ ᐅᓗᕆᐊᓇᖅᑐᒦᑦᑎᓐᓇᒍ;

(b)

ᐸᐸᑦᓯᔩᑦ ᐊᑐᐃᓐᓇᐅᑎᑦᓯᒍᓐᓇᖏᑐᐊᖅᐸᑕ ᓱᓇᒃᑯᑎᒥᒃ ᖃᐅᔨᒪᔪᕐᔪᐊᖅᑎᒍᑦ ᐅᕝᕙᓘᓐᓃᑦ ᑭᓇᒃᑯᑐᐃᓐᓇᐃᑦ ᐱᔪᒪᔭᕆᔭᖓᑦᑎᒍᑦ;

(c)

ᑎᒥᐅᔪᖅ ᓴᒃᑯᐃᒍᓐᓇᖏᑉᐸᑦ ᐱᔾᔪᑕᐅᓪᓗᓂ ᐃᒪᐃᓕᖓᓂᐅᔪᖅ ᒪᓕᒐᕐᓘᓐᓃᑦ ᐱᔭᐅᒋᐊᓐᖓᓕᖅᑎᓪᓗᒍ ᒐᕙᒪᐅᓐᖏᑦᑐᒥᒃ;

(d)

ᑲᓇᑕᒥ ᑕᑯᔭᒐᖃᕐᕕᔾᔪᐊᖅ, ᑲᓇᑕᒥ ᐃᑦᓴᕐᓂᑕᓕᕆᔩᑦ, ᑲᓇᑕᒥ ᒥᓐᖑᐃᕐᓯᕐᕕᓕᕆᔩᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓄᑦ ᑎᒥᐅᔪᑦ ᐱᔭᕆᐊᖃᖅᐸᑕ ᓱᓇᒃᑯᑎᒥᒃ,

(i)

ᓇᒻᒥᓂᖅ ᑕᑯᑦᓴᐅᑎᑦᓱᒪᓪᓗᒍ ᖃᐅᔨᒪᕈᒪᓗᒍᓘᓐᓃᑦ, ᐅᕝᕙᓗ

(ii)

ᐱᔾᔪᑕᐅᓪᓗᓂ ᐊᔾᔨᐅᖏᑦᑑᓂᖓ ᓱᓇᒃᑯᑎᐅᑉ;

(e)

ᖃᓄᐃᓕᖓᓂᕆᔭᖓ ᓱᓇᒃᑯᑎᐅᑉ ᓅᑕᑦᓴᐅᖏᔾᔪᑎᒋᑉᐸᐅᒃ; ᐅᕝᕙᓗ

(f)

ᓱᓇᒃᑯᑎ ᓯᕗᓂᖓᓂ ᐊᑐᐃᓐᓇᐅᑎᑕᐅᓯᒪᑉᐸᑦ, ᐱᓯᒪᔭᐅᓗᓂᓗ, ᐊᓯᖏᓐᓄᑦ ᒐᕙᒪᑐᖃᒃᑯᑦ ᐊᕕᑦᑐᖅᓯᒪᔪᕐᔪᐊᓂᓘᓐᓃᑦ ᒐᕙᒪᒃᑯᓐᓂ ᑎᒥᐅᔪᑦ.

33.8.3

ᑎᒥᐅᔪᖅ ᐅᑲᐅᓯᐅᔪᖅ ᑎᑎᕋᖅᓯᒪᔪᒥ 33.8.2 ᒪᓕᑦᓯᐊᖅᐸᑦ ᑐᑦᓯᕋᐅᑎᖓᓐᓂᒃ ᐸᐸᑦᓯᔩᑦ, ᑎᒥᐅᔪᖅ ᐊᑕᑎᑦᓯᒍᓐᓇᖅᑐᖅ ᐃᒪᐃᓕᖓᓂᐅᔪᓂᒃ ᒪᓕᒋᐊᓕᓐᓂᓪᓗ ᑐᓐᖓᕕᖃᕐᓗᑎᒃ ᖃᐅᔨᒪᔪᒻᒪᕆᐅᔪᓄᑦ ᑎᒥᐅᔪᓄᓪᓗ ᐊᐅᓚᓂᐅᔪᓄᑦ, ᐱᖃᓯᐅᑎᑦᓱᑎᒃ ᐃᒪᐃᓕᖓᓂᖏᑦ ᒪᓕᒋᐊᓕᖏᓪᓗ ᐊᑯᓂᐅᓂᖓᓅᖓᔪᑦ ᓴᒃᑯᑕᐅᓂᖓᓄᓪᓘᓐᓃᑦ.

33.8.4

ᐸᐸᑦᓯᔩᑦ ᑐᑦᓯᕋᖅᐸᑕ ᐸᐸᑦᓯᒍᒪᓪᓗᑎᒃ ᓱᓇᒃᑯᑎᒥᒃ ᑕᐃᔭᐅᔪᒥᒃ ᑎᑎᕋᖅᓯᒪᔪᒥ 33.8.2, ᑭᓯᐊᓂ ᓱᓇᒃᑯᑎᐅᔪᖅ ᐊᑐᖅᑐᐊᖅᑕᐅᓗᓂᓗ ᐊᓯᖏᓐᓄᑦ ᒐᕙᒪᑐᖃᒃᑯᑦ ᐊᕕᑦᑐᖅᓯᒪᔪᕐᔪᐊᓂᓪᓘᓐᓃᑦ ᒐᕙᒪᒃᑯᓐᓂ ᑎᒥᐅᔪᑦ, ᐸᐸᑦᓯᔩᑦ ᓯᕗᓕᐅᔾᔭᐅᒋᐊᓖᑦ ᑭᓇᒃᑯᓕᒫᑦ ᕐᑳᖏᕐᓗᒋᑦ ᐱᔭᐅᓗᓂ ᑕᐃᔭᐃᔪᖅ ᓱᓇᒃᑯᑎ, ᑐᓐᖓᕕᖃᕐᓗᑎᒃ ᒪᓕᒋᐊᓕᓐᓂᒃ ᐃᒪᐃᓕᖓᓂᐅᔪᓄᑦ ᓇᓗᓇᐃᔭᖅᑕᐅᓯᒪᔪᓄᑦ ᑎᑎᕋᖅᓯᒪᔪᓂ 33.8.2 ᐊᒻᒪᓗ 33.8.3.

33.8.5

ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᑐᑦᓯᕋᕈᓐᓇᖅᑐᖅ ᓇᐅᑐᐃᓐᓇᕐᒥᒃ ᓱᓇᒃᑯᑎᒥᒃ ᐸᐸᑕᐅᔪᒥᒃ ᐸᐸᑦᓯᔨᒃᑯᓐᓄᑦ ᐸᐸᑦᓯᔨᒃᑯᓪᓗ ᑐᓂᓯᒍᓐᓇᖅᓱᑎᒃ ᑐᓐᖓᕕᖃᕐᓗᑎᒃ ᐊᐃᕙᔾᔪᑕᐅᓯᒪᔪᒥᒃ ᓇᓗᓇᐃᖅᑕᐅᓯᒪᔪᓄᑦ ᑎᒥᐅᔪᓄᑦ ᐸᐸᑦᓯᔨᓄᓪᓗ.

ᐃᓚᖓ 9

ᓄᓇᐃᑦ ᐊᑎᖏᑦ

33.9.1

ᐃᓄᐃᑦ ᓄᓇᕗᒻᒥ ᐱᖅᑯᓯᑐᖃᖅᑎᒍᑦ ᐅᖃᐅᓯᖃᓲᖑᒻᒪᑕ ᓇᒥᑐᐃᓐᓇᖅ ᓄᓇᓂᒃ, ᓄᓇᐃᑦ ᖃᓄᐃᓕᖓᓂᖏᓐᓂᒃ ᐊᒻᒪᓗ ᓇᓗᓇᐃᒃᑯᑕᕐᓂᒃ ᐊᑐᖅᓱᑎᒃ ᐊᑎᑐᖃᖏᓐᓂᒃ ᐃᓄᑦᑎᑐᑦ. ᐊᑎᓪᓚᕆᖏᑦ ᓄᓇᐃᑦ ᕿᒥᕐᕈᔭᐅᓂᐊᖅᑐᑦ ᐸᐸᑦᓯᔨᓄᑦ ᐊᓯᔾᔨᖅᑕᐅᒍᓐᓇᖅᓱᑎᓪᓗ ᐊᑎᑐᖃᖏᓐᓄᑦ ᑐᓐᖓᕕᒋᓗᒍ ᐊᐅᓚᓂᐅᔪᖅ ᓇᓗᓇᐃᔭᖅᑕᐅᔪᖅ ᑎᑎᕋᖅᓯᒪᔪᒥ 33.9.2.

33.9.2

ᐊᐅᓚᓂᐅᔪᖅ ᕿᒥᕐᕈᓂᕐᒧᑦ ᓄᓇᐃᑦ ᐊᑎᖏᓐᓂᒃ ᓄᓇᕗᑦ ᐃᓗᐊᓂ ᕿᒥᕐᕈᔭᐅᖃᓯᐅᑎᒍᓐᓇᕐᓂᐊᖅᑐᑦ ᑕᐃᒃᑯᓄᖓ ᓇᓗᓇᐃᔭᖅᑕᐅᓯᒪᔪᓄᑦ ᐊᕕᑦᑐᖅᓯᒪᔪᕐᔪᐊᑦ ᒐᕙᒪᖏᑦᑕ ᑎᓕᓯᔾᔪᑎᖏᓐᓄᑦ 17.03 ᓄᓇᓐᖑᐊᖅᑎᒍᑦ ᐊᒻᒪᓗ ᓄᓇᓖᑦ ᐊᑎᖏᑦ, ᐅᓪᓗᖓ ᒪᐃ 28, 1990, ᑐᓐᖓᕕᒋᓗᒋᑦ ᐱᔭᕆᐊᖃᖅᑎᑕᐅᓯᒪᔪᑦ ᐸᐸᑦᓯᔩᑦ ᐅᖃᖃᑕᐅᖁᔭᐅᓪᓗᑎᒃ ᓇᐅᑐᐃᓐᓇᕐᓄᑦ ᓄᓇᐃᑦ ᐊᑎᖏᓐᓄᑦ ᐋᖅᑭᑦᑕᐅᔪᓄᑦ.

ᐅᐃᒍᖓ 33-1

ᑎᓕᔭᐅᓯᒪᔪᑦ ᑎᒥᐅᔪᑦ

(ᑎᑎᕋᖅᓯᒪᔪᖅ 33.1.1 "ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ")

ᐃᓚᖓ 1

ᒐᕙᒪᒃᑯᖏᑦ ᑲᓇᑕᐅᑉ

ᑲᓇᑕᒥ ᑕᑯᒐᔭᒐᖃᕐᕕᔾᔪᐊᖅ , ᑲᓇᑕᒥ ᐃᑦᓴᕐᓂᑕᓕᕆᔨᒃᑯᑦ, ᑲᓇᑕᒥ ᒥᓐᖑᐃᕐᓯᕐᕕᓕᕆᔨᒃᑯᑦ, ᒥᓂᔅᑕᐅᕕᖓᑦ ᐃᓄᓕᕆᔨᑐᖃᒃᑯᑦ, ᑲᓇᑕᒥ ᑲᑎᒪᔨᕋᓛᖑᐃᓐᓇᖅᑐᑦ ᓄᓇᐃᑦ ᐊᑎᖏᓐᓄᑦ, ᒥᓂᔅᑕᐅᕕᒃ ᑐᓴᐅᒪᖃᑦᑕᐅᑎᓂᕐᒧᑦ.

ᐃᓄᓕᕆᔨᑐᖃᒃᑯᑦ ᑲᓇᑕᒥ ᑲᑎᒪᔨᕋᓛᒻᒪᕆᖏᑦ ᓄᓇᐃᑦ ᐊᑎᖏᓐᓄᑦ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ

ᑲᑎᒪᔨᓂᒃ ᑮᓇᐅᔭᖃᖅᑎᑦᓯᔨᒃᑯᑦ

ᐃᓅᓯᕐᒨᖓᔪᓂᒃ ᑐᑭᓯᓂᐊᕐᓂᕐᒥᒃ ᐃᓄᓂᓪᓗ ᖃᐅᔨᓴᕐᓂᕐᒧᑦ ᑲᑎᒪᔨᖏᑦ ᑲᓇᑕᐅᑉ

ᐃᓚᖓ 2

ᒐᕙᒪᒃᑯᖏᑦ ᓄᓇᑦᓯᐊᑉ

ᐃᑦᑕᕐᓂᓴᖃᕐᕕᒃ ᔭᓗᓇᐃᕝᒥ