ᐃᓛᒃᑯᑦ 5

ᐃᓚᖓ 1

ᐃᓘᓐᓇᐃᓐᓅᖓᔪᑦ

5.1.1 - Definitions

ᐅᕙᓂ ᐃᓛᒃᑰᖅᑐᒥ:

“ᐋᖅᑭᒋᐊᖅᑕᐅᓂᖏᑦ ᐆᒪᔪᐃᑦ ᐊᓐᓇᐅᒪᔾᔪᑎᒋᒐᓱᐊᕐᓗᒋᑦ ᓈᒻᒪᓐᓂᕋᖅᑕᐅᓂᖏᑦ” ᑐᑭᓕᒃ ᖁᑦᓯᓐᓂᖏᓐᓂᒃ ᐊᖑᓇᓱᓐᓂᐅᔪᑦ ᐃᓄᓐᓄᑦ ᓇᓗᓇᐃᖅᑕᐅᓯᒪᔪᑦ 5.6.26-ᒥ ᑎᑭᓪᓗᒍ 5.6.30;

”ᐊᓐᓇᐅᒪᔾᔪᑎᒋᒐᓱᐊᕐᓗᒋᑦ ᓈᒻᒪᓐᓂᕋᖅᑕᐅᓂᖏᑦ” ᑐᑭᓕᒃ ᖁᑦᓯᓂᖏᑦ ᐊᖑᓇᓱᓐᓂᖏᑦᑕ ᐃᓄᐃᑦ ᓇᓗᓇᐃᖅᑕᐅᔪᑦ 5.6.19-ᒥ ᑎᑭᓪᓗᒍ 5.6.25;

“ᐆᒪᔪᐸᐅᔭᐃᑦ” ᑐᑭᓕᒃ ᑕᐃᒃᑯᐊ ᐆᒪᔪᐃᑦ ᑎᑎᕋᖅᑕᐅᓯᒪᔪᑦ ᐅᐃᒍᓂ 5-1;

“ᒥᖅᑯᓖᑦ” ᑐᑭᓕᒃ ᑕᐃᒃᑯᐊ ᐆᒪᔪᐃᑦ ᑎᑎᕋᖅᑕᐅᓯᒪᔪᑦ ᐅᐃᒍᓂ 5-2;

“ᓄᓇᕐᔪᐊᕐᒥ ᐊᖏᖃᑎᒌᒍᑕᐅᓯᒪᔪᑦ” ᑐᑭᓕᒃ ᐆᒪᔪᓕᕆᓂᕐᒧᑦ ᐊᖏᖃᑎᒌᒍᑕᐅᔪᖅ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐊᒻᒪᓗ ᓄᓇᓕᕐᔪᐊᑦ ᐊᑕᐅᓯᐅᓐᖏᑦᑐᕐᓘᓐᓃᑦ ᓄᓇᓕᕐᔪᐊᑦ ᑲᑐᔾᔨᖃᑎᒌᓪᓘᓐᓃᑦ ᑲᓇᑕᐅᑉ ᓯᓚᑖᓂ;

“ᓂᐅᕕᐊᑦᓴᖃᕐᓂ” ᑐᑭᓕ ᓂᐅᕕᐊᑦᓴᖃᕐᓂ ᐊᓯᖏᓪᓗ ᖃᓄᐃᑦᑐᑐᐃᓐᓇᐃᑦ ᑮᓇᐅᔭᓕᐅᕋᓱᐊᕐᓂᕐᒨᖓᔪᑦ ᒥᑭᒐᐅᑎᓪᓗᒋᑦ ᓴᓇᒪᒌᖅᑎᓪᓗᒋᓪᓘᓐᓃᑦ, ᑭᓯᐊᓂ ᐱᖃᓯᐅᔾᔨᖏᑦᑐᖅ ᓂᕆᕕᐅᔪᓂ ᓂᐅᕕᖅᑕᐅᕙᖅᑐᓂᒃ;

“ᑐᓛᔪᑦ ᑎᒻᒥᐊᑦ” ᑐᑭᓕᒃ ᑎᒻᒥᐊᓂᒃ ᐅᖃᐅᓯᐅᔪᓂᒃ ᐃᓚᒍᑕᖅ 5-3-ᒥ;

“ᐆᒪᔪᓂᒃ ᑕᑯᓐᓈᕆᐊᖅᓯᒪᔪᑦ ᓇᔪᒐᖏᑦ” ᑐᑭᓕᒃ ᐃᓪᓗ ᐱᔨᑦᓯᓗᐊᓐᖑᐊᖅᑐᖅ ᕿᒥᕐᕈᓂᐅᔪᓄᑦ ᖃᐅᔨᓴᕐᓂᐅᔪᓄᓪᓘᓐᓃᑦ ᖁᕕᐊᒋᓗᒍ ᐅᕝᕙᓗ ᐱᖅᑯᓯᕐᒨᖓᔪᓅᖓᔪᓄᑦ;

“ᑰᑕᖃᕆᐊᖃᓐᖏᑦᑐᓄᑦ ᑭᓪᓕᒋᔭᐅᔪᑦ” ᑐᑭᓕᒃ ᑭᓪᓕᒋᔭᐅᔪᑦ ᑲᓄᐃᑦᑐᑐᐃᓐᓇᕐᓄᑦ, ᐋᒡᒐᐅᒐᓗᐊ ᑲᑎᓪᓗᒋᑦ ᐊᖑᓇᓱᑦᑕᐅᒍᓐᓇᖅᑐᑦ, ᐱᖃᓯᐅᑎᑐᐃᓐᓇᕆᐊᖃᖅᓱᑎᓪᓗ ᒪᑐᐃᖓᓂᖏᓐᓄᑦ ᐃᓱᓕᕝᕕᖃᖅᑎᑕᐅᓂ, ᐊᕐᓇᐅᓂᖓ/ᐊᖑᑕᐅᓂᖓ ᐆᒪᔫᑉ, ᐊᖏᓂᖏᑦ, ᐊᕐᕌᒍᖏᑦ ᐅᒪᔪᐃᑦ ᐅᕝᕙᓗ ᖃᓄ ᐊᖑᓇᓱᑦᑕᐅᕙᓐᓂᖏᑦ;

“ᓄᓇᕗᒻᒥ ᐆᒪᔪᓕᕆᓂᕐᒧᑦ ᖃᐅᔨᓴᕐᓂ” ᑐᑭᓕ ᐆᒪᔪᖅᑕᐅᕙᑦᑐᓂ ᖃᐅᔨᓴᕐᓂ ᓇᓗᓇᐃᖅᑕᐅᔪᓂ ᐃᓚᖓ 4-ᒥ;

“ᐊᓯᖏᑦ ᓄᓇᖃᖃᑕᐅᔪᑦ” ᑐᑭᓕᒃ ᓄᓇᖃᖃᑕᐅᔪᑦ ᓄᓇᕗᒻᒥ ᐊᓯᖏᑦ ᐃᓄᐃᑦ;

“ᐊᕕᑦᑐᖅᓯᒪᓂᖅ” ᑐᑭᓕᒃ ᕿᑭᖅᑖᓗᒃ, ᑭᕙᓪᓕᖅ ᐅᕝᕙᓗ ᕿᑎᕐᒥᐅᑦ;

“ᐆᒪᔪᐃᑦ ᐊᔾᔨᒌᓐᖏᑦᑐᑦ” ᑐᑭᓕᒃ ᓇᐅᑐᐃᓐᓇᖅ ᐅᒪᔪᖅ ᐅᕝᕙᓘᓐᓃᑦ ᓇᓗᓇᐃᖅᑕᐅᓯᒪᔪᑦ ᐆᒪᔪᐃᑦ ᐊᑯᕐᖓᓐᓂ ᓲᕐᓗ ᑲᑎᒪᐅᖅᑐᑦ;

“ᖁᕕᐊᓲᑎᒋᓗᒍ ᐊᖑᓇᓱᑦᑎᐅᔪᓄᑦ ᓇᔪᒐᖅ” ᑐᑭᓕᒃ ᐃᓪᓗ ᑐᕌᖓᓗᐊᓐᖑᐊᖅᑐᖅ ᖁᕕᐊᓲᑎᒋᓗᒍ ᐊᖑᓇᓱᑦᑎᓄᑦ ᐆᒪᔪᕐᓂᒃ; “ᖃᐅᔨᓴᕐᓂᖅ” ᑐᑭᓕᒃ ᓄᓇᕗᒻᒥ ᐆᒪᔪᖅᑕᐅᕙᑦᑐᓂᒃ ᖃᐅᔨᕐᓴᕐᓂᖅ.

“ᐊᒥᐊᒃᑯᐃᑦ” ᑐᑭᓕᒃ ᐊᒥᐊᒃᑯᖏᑦ ᐋᖅᑭᒋᐊᖅᑕᐅᓯᒪᔪᑦ ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᓐᓂᕋᖅᑕᐅᔪᑦ ᐊᒻᒪᓗ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᐊᒻᒪᓗ, ᐋᖅᑭᒋᐊᖅᑕᐅᓯᒪᔪᖃᓐᖏᑉᐸᑦ ᐊᓐᓇᐅᒪᔾᔪᑎᒋᒐᓱᐊᕆᐊᓕᓐᓂᒃ, ᐊᒥᐊᒃᑯᖏᑦ ᐊᓐᓇᐅᒪᔾᔪᑎᒋᒐᓱᐊᕆᐊᓖᑦ ᐊᒻᒪᓗ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ.

“ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ” ᐆᒪᔪᕐᓄᑦ ᑲᑎᒪᐅᖅᑐᓄᑦ ᑐᑭᓕᒃ ᖃᑦᓯᐅᓂᖏᑦ ᐆᒪᔪᖅᑕᐅᒍᓐᓇᖅᑐᑦ ᒪᓕᒐᖅᑎᒍᑦ ᑐᓐᖓᕕᒋᑦᓱᒋᑦ ᓴᖅᑭᖅᓯᒪᔭᖏᑦ ᓄᓇᕗᒻᒥ ᐆᒪᔪᓕᕆᔩᑦ ᑲᑎᒪᔨᖏᑦᑕ ᑐᓐᖓᕕᒋᑦᓱᒋᑦ 5.6.16 ᑎᑭᑦᓱᒍ 5.6.18.

5.1.2 - ᑐᓐᖓᕕᐅᔪᑦ

ᐅᓇ ᐃᓛᒃᑰᖅᑐᖅ ᐃᓕᑕᖅᓯᔪᖅ ᑕᑯᑦᓴᐅᑎᑦᓯᑦᓱᓂᓗ ᐅᑯᓇᓐᖓᑦ ᑐᓐᖓᕕᐅᔪᓂᒃ:

(a)

ᐃᓄᐃᑦ ᐱᖅᑯᓯᑐᖃᓖᑦ ᐊᑐᖅᐸᑦᓱᑎᓪᓗ ᐆᒪᔪᕐᓂᒃ;

(b)

ᒪᓕᒐᖅᑎᒍᑦ ᐱᔪᓐᓇᐅᑎᖏᑦ ᐃᓄᐃᑦ ᐆᒪᔪᖃᑦᑕᕐᓂᕐᒧᑦ ᐱᓯᒪᔪᑦ ᐱᖅᑯᓯᖏᓐᓂᒃ ᒫᓐᓇᓗ ᐊᑐᖃᑦᑕᕐᓂᖏᓐᓂᒃ;

(c)

ᐃᓄᐃᑦ ᐊᒥᓱᓐᖑᐸᓪᓕᐊᖏᓐᓇᖅᑐᑦ;

(d)

ᐊᑯᓃᖅᑐᓄᑦ, ᖃᓄᐃᑦᑐᒥᒃ, ᓄᓇᒥᐅᑕᓄᑦ ᖃᑭᒪᓇᓱᐊᕐᓂᖅ ᑲᔪᓯᓂᖃᕈᓐᓇᖅᑐᖅ ᐱᔪᒥᓇᖅᓱᓂᓗ;

(e)

ᑭᓐᖒᒪᓇᕐᒪᑦ ᑲᔪᓯᓂᖃᑦᓯᐊᖅᑐᒥᒃ ᐆᒪᔪᕐᓂᒃ ᐊᐅᓚᑦᓯᓂᐅᔪᒥᒃ ᐃᑲᔪᖅᓯᔪᒥᒃ ᐃᓄᐃᑦ ᐆᒪᔪᕈᓐᓇᕐᓂᕐᒧᑦ ᓯᕗᓪᓕᐅᑎᔭᖏᓐᓂᒃ ᐃᓕᑕᖅᓯᓂᖃᖅᓱᓂᓗ ᐃᓄᐃᑦ ᐊᐅᓚᓂᕆᓲᖏᓐᓂᒃ ᐆᒪᔪᕐᓅᖓᔪᓄᑦ ᐃᑲᔪᖅᓯᓂᖃᖅᑐᓄᑦ ᓴᐳᑎᔭᐅᓂᖏᓐᓄᑦ ᐆᒪᔪᐃᑦ ᓴᐳᔾᔭᐅᓂᖏᓐᓄᓪᓗ ᐆᒪᔪᖃᕐᕖᑦ;

(f)

ᑭᓐᖒᒪᓇᕐᒪᑦ ᐊᐅᓚᓂᐅᔪᓂᒃ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᓄᓇᒥᒃ ᐊᐅᓚᑦᓯᓂᕐᒧᑦ ᐱᕕᖃᖅᑎᑦᓯᒍᑕᐅᔪᓄᑦ ᐱᕕᓕᒫᒃᑯᑦ ᓴᐳᔾᔨᓂᐅᔪᓂᒃ ᓄᓇᒥᐅᑕᐃᑦ ᖃᑭᒪᓇᓱᐊᕈᑕᐅᓂᖏᓐᓂᒃ;

(g)

ᐆᒪᔪᕐᓂᒃ ᐊᐅᓚᑦᓯᓂᐅᔪᖅ ᐊᒻᒪᓗ ᐃᖏᕐᕋᓂᖓᑦ ᐃᓄᐃᑦ ᐆᒪᔪᕋᓱᐊᕐᓂᕐᒧᑦ ᐱᔪᓐᓇᐅᑎᖏᑦᑕ ᐊᐅᓚᑕᐅᔪᑦ ᑐᓐᖓᕕᖃᖅᓱᑎᓪᓗ ᑐᓐᖓᕕᐅᔪᓂᒃ ᓴᐳᔾᔨᓂᕐᒧᑦ;

(h)

ᑭᓐᖒᒪᓇᕐᒪᑦ ᑲᔪᓯᓂᖃᑦᓯᐊᖅᑐᒥᒃ ᑲᒪᓂᖃᕐᓗᑎᒃ ᐃᓄᐃᑦ ᐃᓘᓐᓈᒍᑦ ᐊᑦᑐᐊᔪᓄᑦ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ, ᐱᖃᓯᐅᑎᑦᓱᑎᒃ ᖃᐅᔨᕐᓴᓂᖅ; ᐊᒻᒪᓗ

(i)

ᒐᕙᒪᒃᑯᑦ ᑎᒍᒥᐊᓪᓗᐊᑕᖅᑐᑦ ᐆᒪᔪᐃᑦ ᐊᐅᓚᑕᐅᓂᖏᓐᓂᒃ.

5.1.3 - ᑐᕌᒐᐃᑦ

ᐅᓇ ᐃᓛᒃᑰᖅᑐᖅ ᐅᑯᓇᓐᖓᑦ ᓯᕗᒧᐊᑦᑎᑦᓯᒍᒪᔪᖅ:

(a)

ᓴᖅᑭᖅᑕᐅᓂᖓᓂᒃ ᐆᒪᔪᕈᓐᓇᕐᓂᕐᒧᑦ ᐱᔪᓐᓇᐅᑏᑦ, ᓯᕗᓪᓕᐅᑎᔭᐅᔪᑦ ᐱᔪᓐᓇᕐᓂᐅᔪᓪᓗ ᐃᒪᐃᑦᑐᑦ:

(i)

ᑕᑯᑦᓴᐅᑎᑦᓯᔪᒥᒃ ᐱᖅᑯᓯᖅᑎᒍᑦ ᐅᓪᓗᒥᒨᖓᔪᓄᓪᓗ ᖃᓄᐃᑦᑑᓂᖏᓐᓂᓪᓗ ᐃᓄᐃᑦ ᐆᒪᔪᕋᓱᐊᕐᓂᕆᕙᑦᑕᖏᑦᑕ.

(ii)

ᑐᓐᖓᕕᒋᓗᒍ ᐊᑐᐃᓐᓇᖃᕐᓂᖅ, ᓇᓗᓇᐃᖅᑕᐅᓂᖓᒍᑦ ᐊᑑᑎᓂᖏᑦᑕ ᑐᓐᖓᕕᖏᓐᓄᑦ ᓴᐳᔾᔨᓂᐅᑉ, ᐃᓱᒪᒋᖃᓯᐅᑎᑦᓱᒍᓗ ᐊᒥᓱᓐᖑᐸᓪᓕᐊᓂᖏᑦ ᐃᓄᐃᑦ, ᐅᖃᐅᓯᖃᖅᑐᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐆᒪᔪᕈᓐᓇᕐᓂᕐᒧᑦ ᓈᒻᒪᑦᑐᓂᒃ ᑎᑭᐅᒪᔪᓂᒃ ᐊᓐᓇᐅᒪᔾᔪᑎᑦᓴᖏᓐᓄᑦ ᓈᒻᒪᓐᓂᕋᖅᑕᐅᔪᓄᑦ, ᐋᖅᑭᒋᐊᖅᓯᒪᓂᐅᔪᑦ ᑕᑯᑦᓴᐅᑎᑦᓯᓂᖏᑦ ᒪᓕᓪᓗᒋᑦ,

(iii)

ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᓯᕗᓪᓕᐅᔾᔨᑎᑦᓯᔪᖅ ᓴᖅᑮᓂᕐᒧᑦ ᐊᐅᓚᑦᓯᓂᕐᒧᓪᓗ ᖃᑭᒪᓇᓱᐊᕈᑎᑦᓴᓄᑦ ᐊᑦᑐᐊᔪᓄᑦ ᐆᒪᔪᕋᓱᐊᕐᓂᕐᒧᑦ, ᐱᖃᓯᐅᑎᑦᓱᑎᒃ ᖁᕕᐊᒋᑦᓱᒍ ᐊᖑᓇᓱᑦᑏᑦ ᐊᓯᖏᓪᓗ ᑮᓇᐅᔭᓕᐅᕋᓱᐊᕈᑎᑦᓴᐅᔪᑦ,

(iv)

ᐱᕕᖃᖅᑎᑦᓯᒍᑕᐅᔪᖅ ᐆᒪᔪᕋᕐᓂᐅᔪᓂᒃ ᐱᕕᖃᖅᑎᑦᓯᑦᓱᓂᓗ ᐊᑐᐃᓐᓇᖃᐃᓐᓇᕐᓂᕐᒥᒃ ᐃᓄᓐᓄᑦ ᐃᓄᓪᓚᕇᑦ ᐊᓯᖏᓐᓄᑦ, ᐱᓗᐊᖅᑐᒥᒃ ᐊᑯᓂ ᓄᓇᖃᖃᑕᐅᔪᓄᑦ, ᐊᒻᒪᓗ

(v)

ᐊᑲᐅᓐᖏᓪᓕᐅᑦᑕᐃᓕᒪᓂᓕᒃ ᑲᔪᓯᑎᑕᐅᓂᖏᓐᓄᑦ ᐱᔪᓐᓇᐅᑏᑦ, ᓯᕗᓪᓕᐅᔾᔭᐅᔪᑦ ᐆᒪᔪᕈᓐᓇᕐᓂᐅᔪᓪᓗ;

(b)

ᓴᖅᑭᖅᑕᐅᓂᖏᑦ ᐆᒪᔪᕐᓂᒃ ᐊᐅᓚᑦᓯᒍᑕᐅᔪᑦ ᐃᒪᐃᑦᑐᑦ:

(i)

ᐊᐅᓚᑕᐅᔪᖅ, ᐊᑐᓕᖅᑎᑦᓯᑦᓱᓂᓗ, ᑐᓐᖓᕕᐅᔪᓂᒃ ᓴᐳᔾᔨᓂᕐᒧᑦ,

(ii)

ᐊᑕᖏᖅᑐᒥᒃ ᓇᓗᓇᐃᖅᓯᑦᓯᐊᖅᑐᖅ ᑕᑯᑦᓴᐅᑎᑦᓯᑦᓱᓂᓗ ᑲᒪᒋᒋᐊᓕᓪᓗᐊᑕᖏᓐᓂᒃ ᐃᓄᐃᑦ ᐆᒪᔪᕋᓱᐊᕐᓂᕐᒨᖓᔪᓄᑦ,

(iii)

ᐊᑕᖏᖅᑐᒥᒃ ᓇᓗᓇᐃᖅᓯᑦᓯᐊᖅᑐᖅ ᑕᑯᑦᓴᐅᑎᑦᓯᑦᓱᓂᓗ ᑲᒪᒋᒋᐊᓕᓪᓗᐊᑕᖏᓐᓂᒃ ᐃᓄᐃᑦ ᐆᒪᔪᕋᓱᐊᕐᓂᕐᒨᖓᔪᓄᑦ,

(iv)

ᐱᔪᓐᓇᕐᓂᓕᒫᒥᓄᑦ, ᐃᓚᒍᑦᓯᐅᔾᔨᔪᑦ ᐊᐅᓚᑕᐅᓂᖏᓐᓂᒃ ᖃᓄᐃᑦᑐᑐᐃᓐᓇᐃᑦ ᐆᒪᔪᐃᑦ,

(v)

ᑭᓇᒃᑯᑐᐃᓐᓇᕐᓂᒃ ᐃᓚᐅᑎᑦᓯᓂᖃᖅᑐᑦ ᑭᓇᒃᑯᑐᐃᓐᓇᕐᓂᓪᓗ ᐃᓚᐅᑎᓐᓂᖃᖁᔨᑦᓱᑎᒃ, ᐱᓗᐊᖅᑐᒥᒃ ᐃᓄᓐᓂᒃ, ᐊᒻᒪᓗ

(vi)

ᐱᕕᖃᖅᑎᑦᓯᔪᑦ ᓴᓐᖏᓂᖃᖅᑎᑦᓯᑦᓱᑎᓪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ ᐆᒪᔪᓂᒃ ᐊᐅᓚᑦᓯᓂᕐᒧᑦ ᖃᓄᖅᑑᕈᑕᐅᔪᓂᒃ ᐊᑦᑐᐊᔪᓂᒃ ᑖᒃᑯᓄᖓ.

5.1.4 - ᓴᐳᔾᔨᓂᖅ

ᑐᓐᖓᕕᐅᔪᑦ ᓴᐳᔾᔨᓂᕐᒧᑦ ᑐᑭᓕᐅᖅᑕᐅᓂᐊᖅᑐᑦ ᐊᑐᖅᑕᐅᓗᑦᑎᓪᓗ ᐊᑕᖏᖅᑐᒥᒃ ᐃᑉᐱᒋᓗᒋᑦ ᑐᓐᖓᕕᐅᔪᑦ ᑐᕌᒐᕆᔭᐅᔪᓪᓗ ᓇᓗᓇᐃᖅᑕᐅᔪᑦ 5.1.2-ᒥ ᐊᒻᒪᓗ 5.1.3 ᐊᒻᒪᓗ ᐱᔪᓐᓇᐅᒋᔭᐅᔪᓪᓗ ᑲᒪᒋᔭᕆᐊᓖᓪᓗ ᓇᓗᓇᐃᖅᑕᐅᓯᒪᔪᑦ ᐅᕙᓂ ᐃᓛᒃᑰᖅᑐᒥ

5.1.5

ᓐᖓᕕᐅᔪᑦ ᓴᐳᔾᔨᓂᕐᒧᑦ ᐅᑯᐊ:

(a)

ᒥᐊᓂᕆᔭᐅᑦᓯᐊᖁᓪᓗᒋᑦ ᐆᒪᔪᐃᑦ ᓂᕿᑦᓴᕆᔭᖏᑦ ᓄᓇᕗᑦ ᓄᓇᖁᑎᖓᑕ ᐃᓗᐊᓂ;

(b)

ᓴᐳᔾᔭᐅᓂᖏᑦ ᐆᒪᔪᖃᕐᕖᑦ;

(c)

ᒥᐊᓂᕆᔭᐅᑦᓯᐊᖁᓪᓗᒋᑦ ᐊᑑᑎᓖᑦ, ᖃᓄᐃᓐᖏᑦᓯᐊᖅᑐᑦ ᐆᒪᔪᐃᑦ ᐃᓅᔾᔪᑕᐅᒍᓐᓇᖁᓪᓗᒋᑦ ᓂᕿᑦᓴᕆᔭᐅᑦᓯᐊᕐᓗᑎᒃ ᑕᐃᒫᒃ ᓇᓗᓇᐃᔭᖅᑕᐅᒻᒪᑕ ᐅᕙᓂ ᐃᓛᒃᑰᖅᑐᒥ; ᐊᒻᒪᓗ

(d)

ᐊᒥᓱᓐᖑᐸᓪᓕᐊᑲᓐᓂᖁᓪᓗᒋᑦ ᐆᒻᒪᕆᐊᒃᑲᓂᕐᓗᑎᓪᓗ ᐃᓄᐃᓴᓪᓕᓯᒪᔪᑦ ᐆᒪᔪᐃᑦ ᐆᒪᔪᖃᕐᕖᓪᓗ.

5.1.6 - ᐃᓘᓐᓇᐃᓐᓅᖓᔪᑦ

ᒐᕙᒪᒃᑯᑦ ᑲᓇᑕᒥ ᐃᓄᐃᓪᓗ ᐃᓕᑕᖅᓯᒪᒻᒪᑕ ᑭᓐᖒᒪᓇᖅᑐᖃᕆᐊᖓ ᑲᒪᒋᔭᖏᓐᓂᒃ ᐃᓄᐃᑦ ᐃᓘᓐᓇᖏᓐᓄᑦ ᐆᒪᔪᐃᑦ ᐊᐅᓚᑕᐅᓂᖏᓐᓅᖓᔪᓄᑦ.

5.1.7 - ᐊᑑᑎᕕᖏᑦ

ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐱᔪᓐᓇᐅᑏᑦ ᐅᕙᓃᑦᑐᑦ ᐃᓛᒃᑰᖅᑐᒥ ᐊᑑᑎᓐᖏᑦᑐᑦ ᐆᒪᔪᖅᑕᐅᔪᓄᑦ ᓄᓇᕗᑦ ᓄᓇᖁᑎᖓᑕ ᓯᓚᑖᓂᒃ.

ᐃᓚᖓ 2

ᓴᖅᑭᖅᑕᐅᓂᖓ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ

5.2.1 - ᐃᓚᐅᒍᓐᓇᖅᑐᑦ

ᓴᖅᑭᖅᑕᐅᔪᖃᕐᒪᑦ ᐅᓪᓗᖓᓂ ᐊᖏᕐᓂᐅᑉ ᐊᖏᕈᑎᒥᒃ ᑎᒥᐅᔪᒥᒃ ᑭᓇᒃᑯᑐᐃᓐᓇᕐᓄᑦ ᒐᕙᒪᐅᔪᒥᒃ ᖃᐅᔨᒪᔭᐅᓂᐊᖅᑐᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ ᖁᓕᐅᓐᖏᒐᕐᓗᑎᒃ ᑲᑎᒪᔩᑦ ᑎᓕᔭᐅᓂᐊᖅᑐᑦ ᐅᑯᓇᓐᖓᑦ:

(a)

ᐊᑐᓂᑦ ᓯᑕᒪᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᓕᓯᓗᑎᒃ ᐊᑕᐅᓯᕐᒥᒃ ᑲᑎᒪᔨᒥᒃ;

(b)

ᒥᓂᔅᑕᐅᖃᑎᒌᑦ ᑲᑎᒪᔩᑦ

(i)

ᑎᓕᔭᐅᓯᒪᓂᓂ ᒪᓕᓪᓗᒍ ᒥᓂᔅᑕ ᑎᒍᒥᐊᖅᑐᖅ ᐃᖃᓗᓕᕆᓂᕐᒥᒃ ᑕᕆᐅᕐᒥᐅᑕᕐᓂᓪᓗ ᑎᓕᓯᓂᐊᖅᑐᖅ ᐊᑕᐅᓯᕐᒥᒃ ᑲᑎᒪᔨᒥᒃ ᑭᒡᒐᖅᑐᐃᓂᐊᖅᑎᓪᓗᒍ ᑭᓇᒃᑯᑐᐃᓐᓇᕐᓂᒃ,

(ii)

ᑎᓕᔭᐅᓯᒪᓂᓂ ᒪᓕᓪᓗᒍ ᒥᓂᔅᑕ ᑎᒍᒥᐊᖅᑐᖅ ᑲᓇᑕᒥ ᐆᒪᔪᓕᕆᓂᕐᒥᒃ ᑎᓕᓯᓂᐊᖅᑐᖅ ᐊᑕᐅᓯᕐᒥᒃ ᑲᑎᒪᔨᒥᒃ;

(iii)

ᑎᓕᔭᐅᓯᒪᓂᓂ ᒪᓕᓪᓗᒍ ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐅᖃᖃᑎᖃᕐᓗᓂ ᐊᐅᓚᑦᓯᔩᑦ ᑭᒡᒐᖅᑐᖅᑎᖓᓐᓂᒃ ᑎᓕᓯᓂᐊᖅᑐᖅ ᐱᖓᔪᒋᔭᐅᔪᒥᒃ ᑲᑎᒪᔨᒥᒃ ᓄᓇᖃᖃᑕᐅᔪᒥᒃ ᓄᓇᕗᒻᒥ;

(c)

ᐊᐅᓚᑦᓯᔩᑦ ᑭᒡᒐᖅᑐᖅᑎᖓᑦ ᑎᓕᓯᓂᐊᖅᑐᖅ ᐊᑕᐅᓯᕐᒥᒃ ᑲᑎᒪᔨᒥᒃ; ᐊᒻᒪᓗ

(d)

ᓂᕈᐊᕋᑦᓴᓕᐊᖑᔪᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ, ᒥᓂᔅᑕᐅᖃᑎᒌᑦ ᑲᑎᒪᔨᖏᑦ ᑎᓕᓯᓂᐊᖅᑐᑦ ᐃᑦᓯᕙᐅᑕᓕᒻᒥᒃ.

5.2.2

ᒥᓂᔅᑕᒥᒃ ᓂᕈᐊᕋᑦᓴᓕᐅᖅᑐᖃᖅᐸᑦ ᑲᑎᒪᔨᖏᓐᓄᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᒐᕙᒪᓂ ᐃᖅᑲᓇᐃᔭᓐᖏᑦᑐᒥᒃ, ᑕᐃᓐᓇ ᒥᓂᔅᑕ ᐱᔪᓐᓇᕐᓂᓕᒃ ᓯᕗᓕᖅᑐᒥᒃ ᒥᓂᔅᑕᐅᕕᒻᒦᓐᖔᖅᑐᒥᒃ ᓇᔫᑎᑎᑦᓯᓂᕐᒥᒃ ᑲᑎᒪᓂᓕᒫᖏᓐᓄᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓂᕈᐊᕈᓐᓇᕐᓇᓂ ᑕᑯᓐᓇᖅᑎᐅᓗᓂ.

5.2.3

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᓕᓯᑉᐸᑕ ᑲᑎᒪᔨᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᖏᓐᓄᑦ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᓖᑦ ᐃᑲᔪᖅᑎᖃᖃᑦᑕᕐᓂᕐᒥᒃ ᓇᔫᑎᕙᓪᓗᓂ ᑲᑎᒪᓂᓕᒫᓄᑦ ᓂᕈᐊᕈᓐᓇᕐᓇᓂ ᑕᑯᓐᓇᖅᑎᐅᓗᓂ.

5.2.4

ᐊᑐᓂᑦ ᑲᑎᒪᔩᑦ ᑎᓕᔭᐅᓂᐊᖅᑐᑦ ᑲᑎᒪᔨᐅᓂᐊᕐᓗᑎᒃ ᐱᑦᓯᐊᕐᓂᓕᒫᒥᓂ ᐊᕐᕌᒍᓂᒃ ᓯᑕᒪᓂᒃ. ᑲᑎᒪᔨ ᑎᓕᔭᐅᒃᑲᓐᓂᕈᓐᓇᖅᑐᖅ ᑲᑎᒪᔨᐅᓂᕐᒧᑦ.

5.2.5

ᑲᑎᒪᔩᑦ ᐲᖅᑕᐅᒍᓐᓇᖅᑐᑦ ᑲᑎᒪᔨᐅᓂᕐᒥᒃ ᖃᖓᑐᐃᓐᓇᑦᓯᐊᖅ ᐱᔾᔪᑎᖃᕐᓗᑎᒃ ᐃᓄᒻᒧᑦ ᑎᓕᓯᓯᒪᔪᒧᑦ.

5.2.6

ᐊᑐᓂᑦ ᑲᑎᒪᔩᑦ. ᑲᒪᒋᔭᑦᓴᒥᓂᒃ ᑲᒪᒋᐊᓐᖏᓂᕐᒥᓂ, ᓯᕗᓕᖅᑎᐅᑉ ᐱᔪᓐᓇᕐᓂᖃᖅᑎᑕᐅᔫᑉ ᒪᓕᒐᖅᑎᒍᑦ ᐊᐅᓚᑦᓯᓂᕐᒥ ᐊᖏᕈᑎᒥᒃ ᐊᖏᖅᑎᑕᐅᒋᐊᓕᒃ ᐊᑐᕐᓗᓂ ᑎᑎᕋᕐᕕᑦᓴᒥᒃ ᓇᓗᓇᐃᔭᖅᑕᐅᔪᒥᒃ ᐅᐃᒍ 5-4-ᒥ.

5.2.7

ᒪᓕᒐᐃᑦ ᐊᑦᑐᐊᔪᑦ ᐊᐳᖅᓯᒪᓂᕐᒧᑦ ᓇᓗᓇᐃᔭᖅᑕᐅᔪᑦ ᒐᕙᒪᑐᖃᒃᑯᑦ ᐊᕕᑦᑐᖅᓯᒪᔪᓂᓗ ᒪᓕᒐᐃᑦ ᐊᑑᑎᓂᐊᖅᑐᖅ ᑲᑎᒪᔨᓄᑦ, ᑭᓯᐊᓂ ᑲᑎᒪᔨᒥᒃ ᐃᓄᒻᒥᒃ ᑕᑯᓐᓇᖅᑕᐅᔪᖃᕆᐊᖃᓐᖏᑦᑐᖅ ᐊᑲᐅᓐᖏᓪᓕᐅᕈᑕᐅᓗᓂ ᐃᓅᓂᖓ.

5.2.8

ᐃᓐᓄᑦᑐᖃᕆᐊᖃᖅᐸᑦ ᐃᓇᖏᖅᑕᐅᔪᖃᕐᓗᓂ ᑲᑎᒪᔨᒥᒃ ᑎᓕᔭᐅᔪᖃᕈᓐᓇᖅᑐᖅ ᑎᒥᐅᔪᒧᑦ ᑎᓕᓯᓯᒪᔪᒧᑦ ᐲᖅᓯᕕᐅᔪᒥᒃ ᐊᑖᓂ 5.2.1.

5.2.9

ᑲᑎᒪᔨᓕᒫᖏᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐋᒡᒐᐅᒐᓗᐊᖅ ᐃᑦᓯᕙᐅᑕᓕᖓᑦ ᓂᕈᐊᕈᓐᓇᖅᑐᑦ ᐊᑕᐅᓯᐊᕐᓗᑎᒃ, ᐃᑦᓯᕙᐅᑕᓕᓪᓗ ᓂᕈᐊᕆᐊᖃᖅᓱᓂ ᑭᓯᐊᓂ ᐊᔾᔨᒌᑦᑐᖅᑕᖃᖅᐸᑦ ᓂᕈᐊᕈᑎᓂᒃ.

5.2.10

ᐋᖅᑭᑦᑕᐅᔪᓕᒫᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐋᖅᑭᖅᑕᐅᕙᓐᓂᐊᖅᐳᑦ ᐊᒥᓲᓂᖅᓴᓄᑦ ᓂᕈᐊᖅᑐᓄᑦ.

5.2.11

ᐊᑐᓂᑦ ᑲᑎᒪᔩᑦ ᑲᔪᓯᑎᑦᓯᒍᓐᓇᖅᑐᑦ ᐃᓘᓐᓇᐃᓐᓅᖓᔪᒥᒃ ᓂᕈᐊᕐᓂᕐᒥᒃ ᓂᕈᐊᖅᑎᑦᓯᓗᓂᓘᓐᓃᑦ ᐊᓯᒥᓂᒃ ᑲᑎᒪᔨᒥᒃ.

5.2.12 - ᑲᑎᒪᓃᑦ

ᐃᓐᓄᒋᐊᓕᑦᑕᖃᖅᐸᑦ ᑲᑎᒪᔨᖏᓐᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂ ᑲᔪᓯᒍᓐᓇᐃᓪᓕᒍᑕᐅᓐᖏᑦᑐᖅ ᑲᑎᒪᔨᓄᑦ ᑲᑎᒪᓂᖓᓐᓄᑦ.

5.2.13

ᐊᓪᓚᕕᒻᒪᕆᖓᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓄᓇᕗᒻᒦᓐᓂᐊᖅᑐᖅ.

5.2.14

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑲᑎᒪᕙᓐᓂᐊᖅᑐᑦ ᐊᕐᕌᒍᒥ ᒪᕐᕉᒃ ᐊᑖᓂᐅᓐᖏᑦᑐᖅ, ᑲᑎᒪᖃᑦᑕᕈᓐᓇᖅᓱᑎᓪᓗ ᑲᑎᒪᒋᐊᖃᖅᑐᕆᑐᐊᕋᐃᒍᑎᒃ.

5.2.15

ᐃᑦᓯᕙᐅᑕᓕᒃ ᖃᐅᔨᒃᑲᐃᖃᑦᑕᕐᓂᐊᖅᑐᖅ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ ᐅᓪᓗᐃᑦ 21 ᒥᑦᓯᑎᓐᓂ ᑲᑎᒪᒍᒪᔪᖃᖅᐸᑦ ᓇᓪᓕᑐᐃᓐᓇᖏᓐᓂᒃ ᓯᑕᒪᑦ ᑲᑎᒪᔩᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂ ᑎᑎᕋᖅᓯᒪᓗᑎᒃ ᑲᑎᒪᒍᒪᓗᑎᒃ ᓇᓗᓇᐃᖅᓯᓗᑎᒃ ᓱᒻᒪᑦ ᑲᑎᒪᒋᐊᖃᕐᒪᖔᑕ.

5.2.16

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᔪᕐᓇᓐᖏᑐᐊᕋᐃᑉᐸᑦ, ᑲᑎᒪᕙᓐᓂᐊᖅᑐᑦ ᓄᓇᕗᒻᒥ.

5.2.17

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐱᓇᓱᐊᕐᓂᖓᑦ ᐊᐅᓚᓂᖃᕐᓂᐊᖅᑐᖅ ᐃᓄᑦᑎᑐᑦ ᐊᒻᒪᓗ, ᐱᔭᕆᐊᖃᕐᓂᓂ ᒪᓕᒐᖅᑎᒍᑦ ᐊᑐᐊᒐᖅᑎᒍᓪᓘᓐᓃᑦ ᒪᓕᓪᓗᒍ, ᑲᓇᑕᒥ ᐅᖃᐅᓯᕐᓂ ᐃᓕᑕᕆᔭᐅᓯᒪᔪᓂ.

5.2.18

ᑕᓪᓕᒪᑦ ᓇᔫᑎᔪᑦ ᓈᒻᒪᑦᑐᑦ ᑲᑎᒪᑉᐸᑕ, ᐋᒡᒐᐅᒐᓗᐊᖅ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐋᖅᑭᒋᐊᕆᑉᐸᑕ ᐱᔭᕆᐊᓕᓐᓂᒃ ᓇᔫᑎᓗᑎᒃ ᒪᓕᒐᕋᓛᖅᑎᒍᑦ ᐊᑐᕈᓐᓇᑎᑦᓯᓗᑎᒃ ᐅᕐᑳᓚᐅᑎᒃᑯᑦ ᑲᑎᒪᖃᑕᐅᓂᕐᒥᒃ ᐃᓪᓗᒥᓘᓐᓃᑦ ᑐᐊᕕᕐᓇᖅᑐᖃᖅᑎᓪᓗᒍ.

5.2.19 - ᐊᑭᖏᑦ

ᐊᑭᖏᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑎᒍᒥᐊᖅᑕᐅᓂᐊᖅᑐᑦ ᒐᕙᒪᒃᑯᓐᓄᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐸᕐᓇᐃᕐᓂᐊᖅᑐᑦ ᐊᕐᕌᒍᒧᑦ ᑮᓇᐅᔭᖅᑑᑎᑦᓴᓂᒃ ᕿᒥᕐᕈᔭᐅᒋᐊᓕᓐᓂᒃ ᐊᖏᖅᑕᐅᒋᐊᓕᓐᓂᓪᓗ ᒐᕙᒪᒃᑯᓐᓄᑦ.

5.2.20

ᐊᑐᓂᑦ ᑲᑎᒪᔩᑦ ᐊᑭᓕᖅᑕᐅᕙᓐᓂᐊᖅᑐᑦ ᓈᒻᒪᑦᑐᓂᒃ ᐃᖅᑲᓇᐃᔭᐅᔾᔨᓂᖏᓐᓄᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ.

5.2.21

ᐊᑐᓂᑦ ᑲᑎᒪᔩᑦ ᐱᔪᓐᓇᕐᓂᐊᖅᑐᑦ ᐊᑭᓕᖅᑕᐅᓂᕐᒥᒃ ᐊᐅᓪᓚᕆᐊᖃᕐᓂᖏᓐᓄᑦ ᐃᓅᔾᔪᑎᑦᓴᖏᓐᓄᓪᓗ ᐱᓕᕆᐅᔾᔨᓗᓂ ᑕᐃᒪᐃᑦᓴᕆᐊᓕᓐᓂᒃ ᒪᓕᓪᓗᑎᒃ ᑮᓇᐅᔭᓕᕆᓂᕐᒧᑦ ᑲᑎᒪᔨᓂ ᖃᐅᔨᒪᓕᑕᐅᔪᓂᒃ ᐊᐅᓪᓚᕆᐊᖃᕐᓂᕐᒧᑦ ᐃᓅᓇᓱᐊᕆᐊᖃᕐᓂᕐᒧᓪᓗ ᒐᕙᒪᒃᑯᓐᓂ ᐃᖅᑲᓇᐃᔭᖅᑏᑦ.

5.2.22

ᐊᑭᒋᔭᐅᔪᑦ ᐊᑐᓂᑦ ᓂᕈᐊᕈᓐᓇᕋᑎᒃ ᑕᑯᓐᓇᕆᐊᖅᓯᒪᔪᓄᑦ ᑎᒍᒥᐊᖅᑕᐅᓂᐊᖅᑐᑦ ᐃᓄᒻᒧᑦ ᑎᒥᐅᔪᒧᓪᓘᓐᓃᑦ ᑕᐃᑲᓃᑎᑦᓯᔪᒧᑦ.

5.2.23 - ᒪᓕᒐᕋᓛᑦ

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᒪᓕᒐᕋᓛᓕᐅᕈᓐᓇᖅᑐᑦ ᒪᓕᒐᕐᓂᓪᓗ ᐅᑯᓄᖓ ᐊᑦᑐᐊᔪᓂᒃ:

(a)

ᖃᖓᒃᑯᑦ ᑲᑎᒪᕙᓐᓂᐊᕐᒪᖔᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ;

(b)

ᐊᐅᓚᓂᖏᓐᓂᒃ ᑲᑎᒪᓂᖏᑦᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓴᖅᑭᖅᑕᐅᓂᖏᓐᓂᓪᓗ ᑲᑎᒪᔨᕋᓛᖏᑦᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᖃᑦᓯᓪᓗ ᑲᑎᒪᒋᐊᖅᐸᑕ ᓈᒻᒪᒻᒪᖔᑕ;

(c)

ᑲᔪᓯᑎᑕᐅᓂᖏᓐᓂᒃ ᐃᖅᑲᓇᐃᔮᖏᑦᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ, ᐊᐅᓚᑕᐅᓂᖏᓐᓂᒃ ᐃᓗᐊᓂᒃ, ᑲᒪᒋᔭᕆᐊᓕᖏᓐᓂᓪᓗ ᓯᕗᓕᖅᑎᖏᑦᑕ ᐃᖅᑲᓇᐃᔭᖅᑎᖏᑦᑕᓗ;

(d)

ᐊᐅᓚᓂᖏᓐᓂᒃ ᑐᑦᓯᕋᐅᑎᓕᐅᕐᓃᑦ, ᑭᒡᒐᖅᑐᐃᓃᑦ ᐅᓐᓂᕐᓗᓐᓂᐅᔪᓪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ;

(e)

ᐊᐅᓚᓂᐅᔪᑦ ᓄᐊᑦᓯᓂᕐᒧᑦ ᑐᓴᕋᑦᓴᓂᒃ ᐃᓱᒪᒋᔭᐅᔪᓂᓪᓗ, ᐱᖃᓯᐅᑎᑦᓱᑎᒃ ᐊᐅᓚᓂᖏᑦ ᑭᓇᒃᑯᑐᐃᓐᓇᕐᓂᒃ ᓈᓚᓐᓂᖃᖅᑎᑦᓯᓂᐅᔪᓂᑦ; ᐊᒻᒪᓗ

(f)

ᐃᓘᓐᓈᒍᑦ, ᐊᐅᓚᓂᖏᑦ ᐱᓇᓱᐊᕐᓂᐅᔪᑦ ᓵᖓᓐᓃᑦᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ.

5.2.24 - ᓯᕗᓕᖅᑏᑦ ᐃᖅᑲᓇᐃᔭᖅᑏᓪᓗ

ᓯᕗᓕᖅᑏᑦ ᐃᖅᑲᓇᐃᔭᖅᑎᐅᒋᐊᓖᓪᓗ ᐊᐅᓚᓂᖃᑦᓯᐊᖁᓪᓗᒍ ᐱᓇᓱᐊᕐᓂᖓᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑎᓕᔭᐅᒍᓐᓇᖅᑐᖅ ᐊᑭᓕᖅᑐᖅᑕᐅᒋᐊᖃᖅᓱᑎᓪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.2.25

ᓯᕗᓕᖅᑏᑦ ᐃᖅᑲᓇᐃᔭᖅᑏᓪᓗ ᐊᖓᔪᖅᑳᖃᕐᓂᐊᖅᑐᑦ ᑐᑭᒧᐊᑦᑎᑕᐅᓂᐊᖅᓱᑎᓪᓗ ᐊᐅᓚᑕᐅᓗᑎᓪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.2.26 - ᓈᓚᓐᓂᖃᕐᓃᑦ

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑭᓇᒃᑯᑐᐃᓐᓇᕐᓂᒃ ᓈᓚᓐᓂᖃᖅᑎᑦᓯᖃᑦᑲᕐᓂᐊᑦᑐᑦ ᐃᓱᒫᓘᑕᐅᔪᓄᑦ ᖃᓄᖅᑑᕈᑕᐅᒋᐊᓕᓐᓄᑦ.

5.2.27

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᒪᓕᒐᓕᐅᕈᓐᓇᖅᑐᖅ ᑕᑯᑦᓴᐅᑎᑦᓯᔪᓂᒃ ᑲᒪᒋᔭᐅᒋᐊᓕᓐᓂᒃ ᐊᑕᖏᖅᑐᓄᑦ ᐊᒻᒪᓗ ᑲᒪᒋᔭᐅᒋᐊᓕᓐᓂᒃ ᐊᓯᖏᓐᓄᑦ ᐃᒥᒃᑰᖅᑐᓄᑦ ᐃᓄᓐᓄᑦ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᐅᔪᓂ.

5.2.28

ᓇᐅᑐᐃᓐᓇᖅ ᑭᒡᒐᖅᑐᐃᔨᖓᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᕝᕙᓗ ᐊᕕᑦᑐᖅᓯᒪᔪᓂ ᒐᕙᒪᒃᑯᑦ, ᓇᐅᑐᐃᓐᓇᖅ ᐃᓄᒃ ᐅᕝᕙᓗ ᓇᐅᑐᐃᓐᓇᖅ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐅᕝᕙᓗ ᐊᕕᑦᑐᖅᓯᒪᔪᓂ ᐆᒪᔪᓕᕆᔩᑦ ᑲᑐᔾᔨᖃᑎᒌᖏᓐᓂ ᐱᕕᖃᖅᑎᑕᐅᓂᐊᖅᑐᑦ ᐊᑕᖏᖅᑐᒥᒃ ᐃᓚᐅᑎᑕᐅᓂᕐᒥᒃ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᐅᔪᓄᑦ ᐊᒻᒪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ, ᐃᓱᒪᖅᓲᑎᒍᓗ ᒪᓕᓪᓗᑎᒃ ᒪᓕᒐᕐᒥᒃ, ᓇᓗᓇᐃᖅᓯᓂᐊᖅᑐᑦ ᓇᐅᑐᐃᓐᓇᖅ ᐃᓄᒃ ᐱᕕᖃᖅᑎᑕᐅᒻᒪᖔᖅ ᐊᑕᖏᖅᑐᒥᒃ ᐃᓚᐅᓂᕐᒥᒃ ᐱᔾᔪᑕᐅᓪᓗᓂ ᓇᐅᑐᐃᓐᓇᖅ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᐅᔪᖅ.

5.2.29

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ, ᑐᑦᓯᕋᐅᓯᐅᖅᐸᑕ ᐊᐅᓚᓂᐅᔪᒧᑦ ᐱᒻᒪᕆᐹᓗᒻᒧᑦ ᓵᖓᓃᑦᑐᒧᑦ, ᑕᑯᓐᓇᖅᑕᖏᑦᑎᒍᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᒪᓕᒐᓕᕆᔨᖃᕆᐊᖃᖅᐸᑦ ᐊᐅᓚᑦᓯᓂᐊᖅᑐᒥᒃ ᐊᐃᕙᐅᔾᔨᓂᐊᖅᑐᒥᓪᓘᓐᓃᑦ ᐅᖃᐅᓯᐅᔪᒧᑦ ᐱᓯᒪᔪᒧᑦ ᑐᑦᓯᕋᐅᑎᒥᒃ ᐊᐅᓚᓂᐅᔪᒥᓪᓘᓐᓃᑦ.

5.2.30

ᓄᓇᕗᒻᒥ ᐆᒪᔪᓕᕆᓂᒧᑦ ᑲᑎᒪᔩᑦ ᑕᐃᒫᑦᓴᐃᓐᓇᖅ ᓴᓐᖏᓂᖃᕐᓂᐊᖅᑐᑦ ᑲᒥᓯᓇᑎᑐᑦ ᑎᓕᔭᐅᓯᒪᔪᑎᑐᑦ ᑐᓐᖓᕕᒋᑦᓱᒍ ᐃᓚᖓ 1 ᐊᐱᖅᑯᑎᓄᑦ ᒪᓕᒐᕐᔪᐊᕐᒥ, R.S.C. 1970 c.1-13, ᑭᓯᐊᓂᓕ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᖅᑲᖅᑐᐃᕕᒃᑯᑦ ᑎᓕᓯᒋᐊᖃᓐᖏᑦᑐᑦ ᒥᓂᔅᑕᖏᓐᓂᒃ ᑲᓇᑕᒥ ᒐᕙᒪᒃᑯᑦ.

5.2.31 - ᑕᖅᑲᐅᖓ ᑐᓴᖅᑕᐅᒋᐊᖃᓐᖏᑦᑐᑦᓂ

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓴᕋᓱᐊᓕᕈᑎᒃ ᑐᓴᖅᑎᑦᓯᓕᕈᑎᓘᓐᓃᑦ ᑐᓐᖓᕕᖃᖅᑐᓂᒃ ᒪᓕᒐᖏᓐᓂᒃ ᐃᓘᓐᓇᐃᓐᓄᑦ ᐊᑦᑐᐊᔪᑦ ᑲᓐᖑᓇᖅᑐᓅᖓᔪᓄᑦ ᐊᒻᒪᓗ ᐊᑐᐃᓐᓇᖃᕐᓂᕐᒧᑦ ᑐᓴᕋᑦᓴᓂᒃ ᓲᕐᓗ ᒐᕙᒪᒃᑯᓐᓄᑦ ᒥᓂᔅᑕᐅᕕᐅᑎᓪᓗᒍ.

5.2.32

ᒐᕙᒪᒃᑯᑦ ᐃᓱᒪᖅᓲᑎᖃᖅᐸᑕ ᑐᓴᖅᑕᐅᒃᑲᐃᓂᕐᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ, ᐅᕝᕙᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᓱᒪᖅᓲᑎᖃᖅᐸᑕ ᑐᓴᖅᑎᑦᓯᓂᕐᒥᒃ ᑕᖅᑲᐅᖓ ᑭᓇᑐᐃᓐᓇᕐᒧᑦ, ᐃᓱᒪᒋᔭᖃᖃᓯᐅᑎᓂᐊᖅᑐᖅ ᐃᓗᓕᖏᓐᓂᒃ ᐊᖏᕈᑎᐅᑉ ᐃᓱᒪᑦᓴᖅᓯᐅᓕᕈᑎᒃ.

5.2.33 - ᓴᓐᖏᓂᐅᔪᑦ, ᐃᖅᑲᓇᐃᔮᑦ ᐊᐅᓚᓂᐅᔪᓪᓗ

ᐃᓕᑕᕆᓪᓗᒍ ᒐᕙᒪᒃᑯᑦ ᑎᒍᒥᐊᖅᑎᓪᓗᐊᑕᐅᒋᐊᖏᑦ ᐆᒪᔪᐃᑦ ᐊᐅᓚᑕᐅᓂᖏᓐᓂᒃ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᖅᑯᑎᓪᓗᐊᑕᐅᓂᐊᖅᑐᑦ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᓄᓇᕗᑦ ᓄᓇᖁᑎᖓᓂ ᐊᒻᒪᓗ ᐊᐅᓚᑦᓯᔨᓪᓗᐊᑕᐅᓗᑎᒃ ᐊᑐᐃᓐᓇᖃᕐᓂᕐᒥᒃ ᐆᒪᔪᕐᓂᒃ ᐊᒻᒪᓗ ᑎᒍᒥᐊᖅᑎᓪᓗᐊᑕᐅᑦᓱᑎᒃ ᐊᑦᑐᐊᔪᓂᒃ ᑖᒃᑯᓄᖓ ᓇᓗᓇᐃᔭᖅᑕᐅᔪᓄᑦ ᐊᖏᕈᑎᒥ. ᑕᐃᒪᐃᓐᓂᖓᓄᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐅᑯᓇᓐᖓᑦ ᐊᐅᓚᓂᖃᕐᓂᐊᖅᐳᑦ:

(a)

ᐃᓚᐅᑎᓐᓂᖅ ᖃᐅᔨᓴᕐᓂᐅᔪᓂ (5.2.37 ᑎᑭᓪᓗᒍ 5.2.38);

(b)

ᐊᐅᓚᑦᓯᓂᖅ ᓄᓇᕗᒻᒥ ᐆᒪᔪᖅᑕᐅᕙᓐᓂᒃ ᖃᐅᔨᕐᓴᓂᕐᒥᒃ (ᐃᓚᖓ 4);

(c)

ᐋᖅᑭᒋᐊᕆᖃᑦᑕᕐᓂᖅ ᑕᐃᒪᐃᔾᔭᓐᖒᕆᔭᐅᔪᓂᒃ ᑭᓐᖒᒪᖏᔭᐅᔪᓄᑦ (5.6.5 ᑎᑭᓪᓗᒍ 5.6.11);

(d)

ᓴᖅᑮᓂᖅ, ᐋᖅᑭᒋᐊᕆᓂᖅ ᐲᖅᓯᓂᕐᓘᓐᓃᑦ ᖃᑦᓯᐅᓂᖏᓐᓂᒃ ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ (5.6.16 ᑎᑭᓪᓗᒍ 5.6.18);

(e)

ᓇᓗᓇᐃᖅᓯᓂᖅ ᐊᓐᓇᐅᒪᔾᔪᑎᒋᒐᓱᐊᕐᓗᒋᑦ ᓈᒻᒪᓐᓂᕋᖅᑕᐅᔪᓂᒃ (5.6.19 ᑎᑭᓪᓗᒍ 5.6.25); (f) ᐋᖅᑭᒋᐊᕆᓂᖅ ᐊᓐᓇᐅᒪᔾᔪᑎᒋᒐᓱᐊᕐᓗᒋᑦ ᓈᒻᒪᓐᓂᕋᖅᑕᐅᔪᓂᒃ (5.6.26 ᑎᑭᓪᓗᒍ 5.6.30);

(g)

ᑐᓂᐅᖅᑲᐃᓂᖅ ᐆᒪᔪᕐᓂᒃ ᓄᓇᖃᖃᑕᐅᔪᓄᑦ (5.6.32 ᑎᑭᓪᓗᒍ 5.6.37);

(h)

ᑐᓂᐅᖅᑲᐃᓂᖅ ᐆᒪᔪᕐᓂᒃ ᑕᕝᕙᐅᔪᓄᑦ ᐊᐅᓚᓂᐅᔪᓄᑦ (5.6.38);

(i)

ᑲᒪᒋᔭᖃᕐᓂᖅ ᓯᕗᓪᓕᐅᑎᒋᐊᓕᓐᓂᒃ ᑐᑦᓯᕋᐅᑎᓂᒃ (5.6.39);

(j)

ᐃᓱᒪᓕᐅᕆᓂᖅ ᑐᓂᔭᐅᓂᐊᖅᑐᓄᑦ ᐊᒥᐊᒃᑯᓄᑦ (5.6.40);

(k)

ᓴᖅᑮᓂᖅ, ᐋᖅᑭᒋᐊᕆᓂᖅ ᐲᖅᓯᓂᕐᓘᓐᓃᑦ ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᓂᒃ (5.6.48 ᑎᑭᓪᓗᒍ 5.6.51);

(l)

ᐋᖅᑮᓂᖅ ᖁᕕᐊᓲᑎᖃᖅᓱᑎᒃ ᐊᖑᓇᓱᑦᑎᓄᑦ ᐊᑭᓕᖅᑕᐅᒋᐊᓕᓐᓂᒃ (5.7.41); ᐊᒻᒪᓗ

(m)

ᓇᐅᑐᐃᓐᓇᐃᑦ ᐊᓯᖏᑦ ᐊᐅᓚᓂᖏᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑲᒪᒋᔭᕆᐊᓖᑦ ᐊᖏᕈᑎᒃᑯᑦ ᐅᖃᐅᓯᐅᓐᖏᒃᑲᓗᐊᖅᓱᑎᒃ ᐅᕙᓂ.

5.2.34

ᕐᑳᖓᒍᒃᑲᓐᓂᖅ ᐊᐅᓚᓂᓪᓗᐊᑕᐅᔪᑦ ᓇᓗᓇᐃᔭᖅᑕᐅᔪᑦ 5.2.33-ᒥ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᓱᒪᖅᓲᑎᖃᕐᓗᑎᒃ ᐊᐅᓚᓂᖃᕐᓂᐊᖅᑐᑦ ᐅᑯᓇᓐᖓᑦ ᐊᐅᓚᓂᐅᔪᓂᒃ ᐊᑦᑐᐊᔪᓂᒃ ᐊᐅᓚᑦᓯᓂᕐᒧᑦ ᓴᐳᔾᔨᓂᕐᒧᓪᓗ ᐆᒪᔪᕐᓂᒃ ᐆᒪᔪᖃᕐᕕᐅᔪᓂᓪᓗ:

(a)

ᐊᖏᕐᓗᑎᒃ ᓴᖅᑭᖅᑕᐅᓂᖓᓂᒃ, ᐲᖅᑕᐅᓂᖓᓂᒃ, ᐊᓯᔾᔨᕐᓂᐅᔪᓂᓪᓗ ᑭᓪᓕᒋᔭᐅᔪᓄᑦ ᓴᐳᔾᔨᕕᐅᓯᒪᔪᓄᑦ, ᐊᑦᑐᐊᔪᓄᑦ ᐊᐅᓚᑕᐅᓂᖏᓐᓄᑦ ᓴᐳᑎᔭᐅᓂᖏᓐᓄᓪᓗ ᐆᒪᔪᐃᑦ ᐆᒪᔪᖃᕐᕖᓪᓗ;

(b)

ᓇᓗᓇᐃᔭᐃᓗᑎᒃ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᑭᓪᓕᒋᔭᐅᔪᓂᒃ ᐃᓂᒋᔭᐅᔪᓂᓪᓗ ᕿᑐᕐᖏᐅᕐᕕᐅᕙᑦᓱᑎᒃ ᐃᓱᒪᓕᐅᕆᕙᓪᓗᑎᓪᓗ ᓄᓇᕗᒻᒥ ᐸᕐᓇᐃᔨᓄᑦ ᐊᑦᑐᐊᔪᓄᑦ ᐸᕐᓇᑕᐅᒋᐊᖃᕐᓂᖏᓐᓄᑦ ᑕᐃᒃᑯᐊ ᐃᓂᐅᔪᑦ;

(c)

ᐊᖏᖅᐸᓪᓗᑎᒃ ᐸᕐᓇᐅᑎᓂᒃ ᐊᐅᓚᑦᓯᓂᕐᒧᑦ ᓴᐳᔾᔭᐅᓂᖏᓐᓄᓪᓗ ᓇᓗᓇᐃᖅᑕᐅᓯᒪᔪᑦ ᐆᒪᔪᖃᕐᕖᑦ ᐱᖃᓯᐅᑦᓱᑎᒃ ᐃᓗᐊᓃᑦᑐᑦ ᓴᐳᑎᔭᐅᓯᒪᔪᑦ ᓄᓇᐃᑦ, ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ ᐊᒻᒪᓗ ᑲᓇᑕᒥ ᒥᓐᖑᐃᕐᓯᕐᕖᑦ;

(d)

ᐊᖏᖅᐸᓪᓗᑎᒃ ᐸᕐᓇᐅᑎᓂᒃ ᐅᑯᓄᖓ

(i)

ᐊᐅᓚᑦᓯᓂᕐᒥᒃ, ᓇᓗᓇᐃᖅᓯᓂᕐᒥᒃ, ᓴᐳᔾᔨᓂᕐᒥᒃ, ᐊᒥᓱᓐᖑᑎᑦᓯᑲᓐᓂᕐᓂᕐᒥᒃ, ᐱᕈᖅᓰᕕᑦᓴᓂᒃ ᐆᒪᔪᕐᓂᒃ, ᐱᖃᓯᐅᑦᓱᑎᒃ ᐊᑦᑕᓇᖅᑐᒦᑦᑐᑦ ᐆᒪᔪᐃᑦ,

(ii)

ᒪᓕᒐᕐᓂᒃ ᑎᑭᑎᑕᐅᓯᒪᔪᓄᑦ ᓄᓇᕗᒻᒥᐅᑕᐅᖏᑦᑐᑦ ᐆᒪᔪᐃᑦ ᐊᐅᓚᑕᐅᓂᖏᓐᓄᓪᓗ ᑎᑭᑎᑕᐅᓯᒪᔪᑦ ᐆᒪᔪᐃᑦ.

(e)

ᖃᐅᔨᒪᓕᑕᐅᕙᓪᓗᑎᒃ ᒥᓂᔅᑕᐅᕕᐅᔪᓄᑦ, ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ ᐊᓯᖏᓐᓄᓪᓗ ᐃᓱᒫᓗᑦᑐᓄᑦ ᑎᒥᐅᔪᓄᑦ ᐊᒻᒪᓗ ᑖᒃᑯᓄᖓᓪᓗᐊᖅ ᐃᓄᓐᓄᑦ ᐱᔾᔪᑕᐅᓗᑎᒃ ᐱᓗᐊᑦᑕᐃᓕᒪᓂᕐᒧᑦ ᐊᐅᓚᓂᐅᔪᑦ ᐊᑭᓕᖅᑕᐅᒋᐊᓖᓪᓗ ᑮᓇᐅᔭᓕᐊᕋᓱᐊᕈᑕᐅᔪᓂᒃ ᓴᓇᕕᖃᖅᑐᓄᓪᓗ ᓱᕋᐃᔪᓄᑦ ᐆᒪᔪᖃᕐᕕᓐᓂᒃ;

(f)

ᐊᖏᖅᐸᓪᓗᑎᒃ ᓇᓗᓇᐃᖅᑕᐅᓂᖏᓐᓂᒃ ᐱᑕᖃᕋᔪᐃᑦᑐᑦ, ᐅᓗᕈᐊᓇᖅᑐᒦᑦᑐᑦ, ᐊᑦᑕᓇᖅᑐᒦᑦᑐᓪᓗ ᐆᒪᔪᐃᑦ;

(g)

ᖃᐅᔨᒪᓕᑕᐅᕙᓪᓗᑎᒃ ᐱᔭᕆᐊᓕᓐᓄᑦ ᖃᐅᔨᒪᔭᐅᑎᑦᓯᑦᓯᐊᕐᓂᕐᒧᑦ ᐆᒪᔪᕐᓂᒃ ᐃᓕᓐᓂᐊᑎᑦᓯᓗᑎᒃ, ᑐᓴᐅᒪᑎᑦᓯᓗᑎᒃ ᐃᓕᓐᓂᐊᕆᐊᒃᑲᓂᖅᑎᑦᓯᓗᑎᓪᓗ ᐃᓄᓐᓂᒃ ᐆᒪᔪᐃᑦ ᐊᐅᓚᑕᐅᓂᖏᓐᓅᖓᔪᓄᑦ;

(h)

ᓴᖅᑮᓗᑎᒃ ᐱᔪᓐᓇᕐᓂᐅᒋᐊᓕᓐᓂᒃ ᐊᑦᑐᐊᔪᓄᑦ ᖃᐅᔨᒪᓕᑕᐅᔪᓄᑦ (5.6.41); ᐊᒻᒪᓗ

(i)

ᓇᐅᑐᐃᓐᓇᐃᑦ ᐊᓯᖏᑦ ᐊᐅᓚᓂᐅᔪᑦ ᑎᓕᓯᔾᔪᑕᐅᔪᓄᑦ ᐊᖏᕈᑎᒃᑯᑦ ᐅᖃᐅᓯᐅᓐᖏᑦᑐᑦ 5.2.33-ᒥ.

5.2.35

ᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᖏᑦ ᐊᐅᓚᑦᓯᒍᓐᓇᖅᑐᑦ ᐊᓯᖏᓐᓂᒃ ᐊᐅᓚᓂᐅᔪᓂᒃ ᐊᑦᑐᐊᔪᓂᒃ ᐊᐅᓚᑦᓯᓂᕐᒧᑦ ᐆᒪᔪᕐᓂᒃ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᓂ ᐊᒻᒪᓗ ᒪᓕᒐᕐᓄᑦ ᐊᑐᐃᓐᓇᖃᕐᓂᒧᕐᑦ ᐅᒪᔪᕐᓂᒃ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᓂ ᐊᖏᕈᑕᐅᓯᒪᓂᖓ ᒪᓕᓪᓗᒍ ᓄᓇᕗᒻᒥ ᐆᒪᔪᓕᕆᔩᑦ ᑲᑎᒪᔨᖏᓐᓄᑦ ᒐᕙᒪᒃᑯᓄᓪᓗ.

5.2.36

ᐆᒪᔪᖃᕐᕕᐅᔪᓂᒃ ᐊᐅᓚᑦᓯᓂᖅ ᓴᐳᔾᔨᓂᕐᓗ ᐃᓚᒋᔭᐅᓪᓗᐊᑕᕋᓗᐊᖅᑎᓪᓗᒍ ᐊᐅᓚᓂᖏᓐᓄᑦ ᐆᒪᔪᐃᑦ ᐊᐅᓚᑕᐅᓂᖏᑦᑕ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐆᒪᔪᓕᕆᔩᑦ ᑲᑎᒪᔨᖏᑦᑕ ᑎᒍᒥᐊᖅᑕᖏᑦ ᐆᒪᔪᓕᕆᓂᕐᒨᖓᔪᓄᑦ, ᑎᒍᒥᐊᖅᑎᓪᓗᐊᑕᐅᔪᑦ ᐊᐅᓚᑕᐅᓂᖏᓐᓄᑦ ᓄᓇᐃᑦ, ᐱᖃᓯᐅᑎᑦᓱᑎᒃ ᐱᕈᖅᑐᐃᑦ, ᑲᒪᒋᔭᐅᓂᐊᖅᓱᑎᒃ ᑖᒃᑯᓄᖓᓪᓗᐊᖅ ᒐᕙᒪᒃᑯᓐᓂ ᑎᒥᐅᔪᓄᑦ ᐊᒻᒪᓗ ᐊᓯᖏᓐᓄᑦ ᐊᑦᑐᐊᔪᓄᑦ ᑎᒥᐅᔪᓄᑦ ᓴᖅᑭᖅᑕᐅᒐᔭᕐᓂᖅᐸᑕ ᐊᖏᕈᑎᒃᑯᑦ.

5.2.37 - ᖃᐅᔨᓴᕐᓂᖅ

ᑭᓐᖒᒪᓇᖅᑐᒻᒪᑦ ᑲᔪᓯᓂᖃᑦᓯᐊᖅᑐᒥᒃ ᐆᒪᔪᐃᑦ ᐊᐅᓚᑕᐅᓂᖏᓐᓂᒃ, ᑲᔪᓯᑦᓯᐊᕐᓂᐊᕈᑎᓪᓗ, ᐊᐅᓚᑕᐅᓂᖏᑦ ᐊᐅᓚᓂᐅᔪᑦ ᑲᔪᓯᓂᖃᑦᓯᐊᖅᑐᓂᒃ, ᑐᑭᒧᐊᑦᑎᑕᐅᔪᓂᒃ ᖃᐅᔨᓴᕐᓂᖃᕆᐊᓖᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑲᔪᓯᑎᑦᓯᑦᓯᐊᕐᓂᐊᕈᑎᒃ ᐊᐅᓚᑦᓯᓂᕆᔭᒥᓐᓂᒃ ᐊᐅᓚᓂᐅᔪᓄᑦ ᑐᓴᐅᒪᑦᓯᐊᕆᐊᖃᕐᒪᑕ ᑲᔪᓯᓂᖃᑦᓯᐊᕐᓗᑎᓪᓗ ᐆᒪᔪᐃᑦ ᖃᐅᔨᓴᒻᑕᐅᓂᖏᓐᓄᑦ ᑐᑭᒧᐊᑦᑎᑕᐅᓂᖏᓐᓄᓪᓗ. ᐱᔪᓐᓇᕐᓂᕆᔭᖏᑦ ᒐᕙᒪᒃᑯᑦ ᑲᓇᑕᒥ ᐊᕕᑦᑐᖅᓯᒪᔪᓂᓗ ᒐᕙᒪᐃᑦ ᑲᔪᓯᑎᑦᓯᓂᖅ ᓇᒻᒥᓂᖅ ᖃᐅᔨᓴᕐᓂᕐᒧᑦ ᐊᐅᓚᓂᕆᔭᒥᓐᓂᒃ ᐊᔾᔨᐅᓐᖏᑎᑕᐅᔾᔮᖏᑦᑐᑦ ᐆᒧᖓ ᑎᑎᕋᖅᓯᒪᔪᒧᑦ. ᑕᐃᒪᐃᓐᓂᖓᓄᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᒪᐃᓐᓂᐊᖅᐳᑦ:

(a)

ᓇᓗᓇᐃᔭᐃᓗᑎᒃ ᖃᐅᔨᓴᖅᑕᐅᒋᐊᓕᓐᓂᒃ ᐊᑲᐅᓈᖅᓯᒪᓐᖏᑦᑐᓂᓪᓗ ᐊᑦᑐᐊᔪᓂᒃ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᐊᑐᖅᑕᐅᑦᓯᐊᕐᓂᖏᓐᓂᒃ ᐆᒪᔪᐃᑦ, ᖃᐅᔨᒪᑎᑦᓯᓕᐅᒥᔮᖅᐸᓪᓗᑎᓪᓗ ᐃᓇᑦᓯᕙᓪᓗᑎᓪᓗ, ᖃᐅᔨᓴᕐᓂᐅᔪᓂᒃ ᑐᕌᒐᖃᖅᑐᓂᒃ ᑎᑭᐅᑎᓂᕐᒧᑦ ᐱᔭᕆᐊᓕᓐᓄᑦ ᐊᓂᒍᐃᒍᑕᐅᓗᑎᓪᓗ ᐊᑲᐃᓪᓕᐅᕈᑕᐅᔪᓂᒃ;

(b)

ᓇᓗᓇᐃᔭᐃᓗᑎᒃ ᑖᒃᑯᓇᓐᖓᓪᓗᐊᖅ ᐃᓄᓐᓂᒃ ᑎᒥᐅᔪᓂᓪᓗ ᑎᒍᒥᐊᕐᓂᐊᖅᑎᓪᓗᒋᑦ ᐆᒪᔪᐃᑦ ᖃᐅᔨᓴᖅᑕᐅᓂᖏᓐᓂᒃ;

(c)

ᕿᒥᕐᕈᓗᑎᒃ ᖃᐅᔨᓴᕐᓂᕐᒧᑦ ᑐᑦᓯᕋᐅᑎᓂᒃ, ᐊᑲᐅᓈᕐᓂᖏᑦᑎᒍᓪᓗ ᐊᖏᖅᑕᐅᔪᑦᓴᒫᓕᐅᖅᐸᓪᓗᑎᒃ ᕿᐱᓗᑉᐸᓪᓗᑎᓪᓗ ᑐᑦᓯᕋᐅᑎᓂᒃ ᑖᒃᑯᓄᖓᓪᓗᐊ ᒐᕙᒪᒃᑯᓐᓂ ᑎᒥᐅᔪᓄᑦ;

(d)

ᓄᐊᑦᓯᓗᑎᒃ, ᐃᒻᒥᒃᑯᐊᖅᑎᑎᑦᓯᓗᑎᒃ, ᓯᐊᒻᒪᖅᑎᕆᕙᓪᓗᑎᓪᓗ ᐆᒪᔪᐃᑦ ᑭᓪᓕᓯᓂᐊᖅᑕᐅᓂᖏᓐᓂᒃ ᑐᓴᕋᑦᓴᓂᓪᓗ ᐸᐸᑦᓯᓗᑎᓪᓗ ᑲᑎᖅᓱᖅᑕᐅᓯᒪᔪᓂᒃ ᓈᒻᒪᑦᑐᓂᒃ ᑕᐃᒪᐃᑦᑐᓄᑦ ᐱᔾᔪᑕᐅᔪᓄᑦ; ᐊᒻᒪᓗ

(e)

ᑲᔪᓯᑎᑦᓯᓗᑎᒃ ᐊᓯᓕᒫᖏᓐᓂᒃ ᖃᐅᔨᓴᕐᓂᕐᒧᑦ ᐊᐅᓚᓂᐅᔪᓂᒃ ᐊᑦᑐᐊᔪᓂᒃ ᑎᒍᒥᐊᖅᑕᖏᓐᓄᑦ.

5.2.38

ᓱᓕᒃᑲᓐᓂᖅ ᑎᒍᒥᐊᖅᑕᖏᑦᑕ ᕐᑳᖓᒍᑦ 5.2.37-ᒥ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᒪᐃᓐᓂᐊᖅᑐᑦ:

(a)

ᓴᖅᑮᓗᑎᒃ ᐸᐸᑦᓯᓗᑎᓪᓗ ᒪᑐᐃᖅᖔᖅᑐᓂᒃ ᑐᖅᑯᖅᓯᒪᔪᓂᒃ ᐃᓘᓐᓇᖏᓐᓄᑦ ᓄᐊᑕᐅᓯᒪᔪᓄᑦ ᑐᑭᓕᐅᖅᑕᐅᓯᒪᔪᓄᓪᓗ ᑲᑎᖅᓱᖅᓯᒪᔪᓄᑦ ᑐᓴᐅᒪᔭᑦᓴᓄᓪᓗ ᓇᑭᓐᖔᖅᓯᒪᒐᓗᐊᖅᐸᑕ;

(b)

ᖃᐅᔨᒪᔭᐅᒃᑲᐃᓗᑎᒃ ᐃᓇᑦᓯᓗᑎᓪᓗ ᐃᓕᓐᓂᐊᕆᐊᒃᑲᓂᕐᓂᖏᓐᓂᒃ ᐃᓄᐃᑦ ᐊᔾᔨᒌᓐᖏᑦᑐᓄᑦ ᐆᒪᔪᐃᑦ ᖃᐅᔨᓴᖅᑕᐅᓂᖏᓐᓄᑦ ᐊᐅᓚᑕᐅᓂᖏᓐᓄᓪᓗ;

(c)

ᖃᐅᔨᒪᔭᐅᒃᑲᐃᓗᑎᒃ ᐃᓇᑦᓯᓗᑎᓪᓗ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓂᒃ ᐊᒻᒪᓗ ᐃᓄᐃᑦ ᑎᒥᖁᑎᖏᓐᓂᒃ ᖃᐅᔨᓴᕐᓂᐅᔪᓄᑦ ᖃᐅᔨᒪᓂᖃᕆᐊᓕᓐᓄᓪᓗ ᐃᖅᑲᓇᐃᔮᓄᑦ ᐊᑐᐃᓐᓇᐅᑎᑕᐅᔪᓄᑦ ᒐᕙᒪᒃᑯᓐᓄᑦ ᐊᒻᒪᓗ ᐃᒻᒥᒃᑯᑦ ᖃᐅᔨᓴᕐᓂᕐᒧᑦ ᑳᑦᑐᓛᑦᑎᓄᑦ; ᐊᒻᒪᓗ

(d)

ᖃᐅᔨᓴᕐᓂᖅ ᐱᒋᐊᓚᐅᖅᑎᓐᓇᒍ, ᑐᓴᐅᒪᑎᑦᓯᓂᖅ ᐃᓱᒪᓯᐅᕆᓂᕐᓗ ᑲᑐᔾᔨᖃᑎᖃᕐᓂᕐᓗ ᓄᓇᖃᖃᑕᐅᔪᓂᒃ ᓄᓇᕗᒻᒥ ᐊᒻᒪᓗ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐊᑦᑐᖅᑕᐅᑐᐃᓐᓇᕆᐊᓕᓐᓂᒃ.

5.2.39 - ᐸᓯᔭᑦᓴᕈᖅᑎᑕᐅᒐᔭᕐᓂᖅᐸᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ

ᐊᐅᓚᑦᓯᔨᐅᑎᓪᓗᒋᑦ ᐊᔪᓐᖏᓐᓂᓕᒫᕐᒥᒍᑦ ᓱᓕᑦᓯᐊᖅᑐᒥᒃ ᐊᐅᓚᑦᓯᒋᐊᓖᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐸᓯᔭᑦᓴᕈᖅᑎᑕᐅᒍᓐᓇᖏᑦᑐᑦ ᑭᓇᑐᐃᓐᓇᕐᒧᑦ, ᐃᓄᒻᒧᑦ ᓇᒻᒥᓂᖅᓱᕐᓗᓂ, ᔭᒐᑦᑐᓄᑦ ᓱᕋᑦᑕᐅᔪᓄᓪᓘᓐᓃᑦ ᖃᓄᑐᐃᓐᓇᖅ.

ᐃᓚᖓ 3

ᐋᖅᑭᑦᑕᐅᔪᑦ

5.3.1 - ᐃᖅᑲᖅᑐᐃᕕᒃᑯᑦ ᕿᒥᕐᕈᓂᖅ

ᐃᖅᑲᖅᑐᐃᕕᒃᑯᑦ ᕿᒥᕐᕈᓂᖅ ᐋᖅᑭᑦᑕᐅᔪᒧᑦ ᓄᓇᕗᑦ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᑐᐃᓐᓇᐅᒋᐊᓖᑦ ᑐᓐᖓᕕᖃᕐᓗᑎᒃ ᓇᓗᓇᐃᔭᖅᑕᐅᓯᒪᔪᓂᒃ 28(1)(a) ᐅᕝᕙᓗ (b)-ᒥ ᑲᓇᑕᐅᑉ ᒐᕙᒪᖓᑕ ᐃᖅᑲᖅᑐᐃᕕᓕᕆᓂᕐᒧᑦ ᒪᓕᒐᕐᔪᐊᖓᓂ, RSC 1985, c.F-7, ᐱᒋᐊᖅᑎᑕᐅᑎᓪᓗᒍ ᐃᓄᒻᒧᑦ ᓇᒻᒥᓂᖅ ᐋᓐᓂᖅᑕᐅᓯᒪᔪᒧᑦ ᐅᕝᕙᓗ ᓱᓇᒃᑯᑎᒥᑎᒍᑦ ᐊᑦᑐᖅᑕᐅᔪᒧᑦ ᐋᖅᑭᖅᑕᐅᔪᒧᑦ.

5.3.2

ᐋᒡᒐᐅᒐᓗᐊᖅ ᐱᕕᖃᖅᑎᑕᐅᓂᖓᒍᑦ 5.3.1-ᒥ, ᓇᐅᑐᐃᓐᓇᖅ ᐋᖅᑭᑦᑕᐅᔪᖅ, ᑎᓕᓯᔾᔪᑕᐅᔪᓪᓘᓐᓃᑦ ᓄᓇᕗᒻᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓄᑦ ᐅᓇᒻᒥᒋᔭᐅᔾᔮᖏᑦᑐᖅ ᕿᒥᕐᕈᔭᐅᔾᔮᒐᓂᓗ ᓇᓪᓕᑐᐃᓐᓇᖏᓐᓂ ᐃᖅᑲᖅᑐᐃᕖᑦ ᓄᖅᑲᖓᑎᑕᐅᓂᒃᑯᑦ, ᓇᓗᓇᐃᖅᓯᓂᒃᑯᑦ ᐃᖅᑲᖅᑐᐃᔾᔪᑕᐅᔪᒥᒃ, ᖁᑦᓯᓂᖅᓴᓂᒃ ᐊᑉᐸᓯᓐᓂᖅᓴᒨᖅᑕᐅᔾᔮᖏᑦᑐᖅ ᐃᖅᑲᖅᑐᐃᔨᓄᑦ, ᑎᓕᓯᔾᔪᑕᐅᔾᔮᒐᓂᓪᓗ ᖁᑦᓯᓂᖅᓴᓂᒃ ᐊᑉᐸᓯᓐᓂᖅᓴᓄᑦ, ᓄᖅᑲᖓᑎᑕᐅᔾᔮᖏᑦᑐᖅ ᐊᐱᖅᑯᑕᐅᔾᔮᒐᓂᓗ, ᕿᒥᕐᕈᔭᐅᔾᔮᖏᑦᑐᖅ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓇᓪᓕᑐᐃᓐᓇᖏᓐᓄᑦ ᐊᐅᓚᓂᖏᑦᑕ.

5.3.3 - ᐃᓗᓕᖏᑦ ᐋᖅᑭᑦᑕᖏᑦᑕ ᓄᓇᕗᒻᒥ ᐆᒪᔪᓕᕆᔩᑦ ᑲᑎᒪᔨᖏᑦᑕ ᒥᓂᔅᑕᐅᓪᓗ

ᐋᖅᑭᑦᑕᐅᔪᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᒥᓂᔅᑕᒧᓪᓘᓐᓃᑦ ᐊᑦᑐᐊᔪᑦ ᐃᓚᖓ 6-ᒧᑦ ᐊᐳᖅᓯᒪᒍᐅᑐᐃᓐᓇᕆᐊᓖᑦ ᑭᓪᓕᖃᖅᑎᑕᐅᓗᑎᓪᓘᓐᓃᑦ ᐃᓄᐃᑦ ᐊᖑᓇᓱᓐᓂᖏᑦ ᑕᐃᒪᐃᑦᓴᕆᐊᖃᕐᓂᖓᓄᑦ ᑭᓯᐊᓂ ᑎᑭᐅᒪᓗᓂ:

(a)

ᓄᖑᕈᑎᓗᐊᑦᑕᐃᓕᒪᓂᕐᒧᑦ ᐱᔾᔪᑎᖃᕐᓗᑎᒃ;

(b)

ᐊᑑᑎᖃᖅᑎᑦᓯᓗᑎᒃ ᐱᔭᐅᒍᓐᓇᖅᑐᓂᒃ ᓇᓗᓇᐃᔭᖅᑕᐅᔪᓂᒃ ᐅᕙᓂ ᐃᓛᒃᑰᖅᑐᒥ, ᐊᓯᖏᓐᓄᑦ ᐱᕕᖃᖅᑎᑦᓯᓂᐅᔪᓄᑦ ᐅᕙᓂ ᐃᓛᒃᑰᖅᑐᒥ ᐊᒻᒪᓗ ᐃᓛᒃᑯᑦ 40-ᒥ; ᐅᕝᕙᓗ

(c)

ᑭᓇᒃᑯᑐᐃᓐᓇᐃᑦ ᖃᓄᐃᑦᑕᐃᓕᒪᖁᓪᓗᒋᑦ ᐊᑦᑕᓇᑦᑕᐃᓕᒪᖁᓪᓗᒋᓪᓗ.

5.3.4

ᐆᒪᔪᕐᓄᑦ ᑲᑎᒪᐅᕐᕖᑦ ᓇᓂᔭᐅᔪᑦ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᓂ ᐊᕕᑦᑐᖅᓯᒪᔪᑦ ᑭᓪᓕᖏᓐᓂ ᐆᒪᔪᖅᐸᑦᓱᑎᓪᓗ ᓯᓚᑖᓂ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᑕ ᐃᓄᓐᓄᑦ ᓄᓇᖃᖃᑕᐅᔪᓄᑦ ᓄᓇᕗᑦ ᓯᓚᑖᓂ. ᑕᐃᒪᐃᓐᓂᖓᓄᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᒥᓂᔅᑕᓗ ᑲᔪᓯᑎᑦᓗᑎᒃ ᑎᒍᒥᐊᖅᑕᒥᓐᓂᒃ ᐊᑦᑐᐊᔪᓂᒃ ᐃᓚᖓ 6-ᒧᑦ ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐊᖑᓇᓱᓐᓂᐅᕙᑦᑐᓂᒃ ᓯᓚᑖᓂ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᑕ ᐊᒻᒪᓗ ᖃᓄᐃᓕᖓᓂᖏᑦ ᐊᕕᑦᑐᖅᓯᒪᔪᓂ ᓄᔪᐃᑦᑐᓂᒃ ᐆᒪᔪᕐᓂᒃ ᐊᐅᓚᑦᓯᓂᕐᒧᑦ ᐊᖏᖃᑎᒌᒍᑏᑦ ᐅᕝᕙᓗ ᓄᓇᕐᔪᐊᕐᒥ ᐊᖏᕈᑎᓂ ᐊᑦᑐᐊᔪᓂᒃ ᐆᒪᔪᕐᓄᑦ.

5.3.5

ᐋᖅᑭᑦᑕᐅᔪᖅ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᑦᑐᐊᓂᖃᖅᐸᑦ ᑭᓐᖒᒪᒋᔭᐅᔾᔭᓐᖒᕆᔭᐅᔪᓄᑦ, ᐋᖅᑭᒋᐊᖅᓯᒪᔪᑦ ᐊᓐᓇᐅᒪᔾᔪᑎᒋᒐᓱᐊᕐᓗᒋᑦ ᐋᖅᑭᒋᐊᖅᑕᐅᓯᒪᔪᑦ ᐅᕝᕙᓗ ᑎᑎᕋᖅᓯᒪᔪᖅ 5.6.39, ᒥᓂᔅᑕ ᕿᐱᓗᒍᓐᓇᖅᑐᖅ ᑲᔪᓯᑎᑦᓯᖏᓪᓗᓂᓘᓐᓃᑦ ᐋᖅᑭᑦᑕᐅᔪᒥᒃ ᑭᓯᐊᓂ ᒥᓂᔅᑕ ᓇᓗᓇᐃᖅᓯᑉᐸᑦ ᐋᖅᑭᑦᑕᐅᔪᖅ ᐃᑲᔪᖅᓯᔭᐅᓐᖏᒋᐊᖓ ᐊᑲᐅᓈᖅᓯᒪᓐᖏᒋᐊᖓᓘᓐᓃᑦ ᐱᔾᔪᑕᐅᓂᕋᖅᑕᐅᔪᓄᑦ ᓄᓇᕗᑦ ᐆᒪᔪᓕᕆᓂᕐᒧᑦ ᑲᑎᒪᔨᖏᑦᑕ ᓵᖓᓐᓃᑦᓯᒪᔪᒧᑦ ᐅᕝᕙᓗ ᐊᑐᐃᓐᓇᕆᓯᒪᔭᖓᓐᓄᑦ.

5.3.6

ᐋᖅᑭᑦᓱᐃᓕᕈᑎᒃ ᐊᑦᑐᐃᔪᓂᒃ ᒥᓐᖑᐃᕐᓯᕐᕕᓐᓄᑦ, ᐆᒪᔪᖃᕐᕕᐅᔪᓄᑦ ᐸᕝᕕᓴᑦᑕᐅᒋᐊᖃᓐᖏᑦᑐᓄᑦ ᓴᐳᑎᔭᐅᓯᒪᔪᓄᓪᓗ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᒥᓂᔅᑕᓗ ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐊᔾᔨᐅᓐᖏᑦᑐᓂᒃ ᐱᔾᔪᑕᐅᔪᓂᒃ ᐊᑐᐊᒐᕐᓂᓪᓗ ᐊᑦᑐᐊᔪᓂᒃ ᑖᒃᑯᓄᖓ.

5.3.7 - ᒪᓕᒐᖅᑎᒍᑦ ᐊᑦᑐᐃᓂᖓ ᐋᖅᑭᖅᑕᐅᔪᖅ (ᐊᕕᑦᑐᖅᓯᒪᔪᓂ ᒐᕙᒪᒃᑯᑦ ᑎᒍᒥᐊᖅᑕᖏᓐᓄᑦ)

ᐋᖅᑭᑦᑕᐅᔪᓕᒫᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᑦᑐᐊᔪᑦ ᑎᑎᕋᖅᓯᒪᔪᒧᑦ 5.2.34(a), (c), (d), ᐅᕝᕙᓗ (f) ᐅᕝᕙᓗ ᓇᓪᓕᑐᐃᓐᓇᖏᑦ ᐃᓚᖓ 4-ᒦᑦᑐᑦ 6-ᒧᓄᑦ ᐅᕝᕙᓗ ᐃᓛᒃᑯᑦ 40-ᒧᑦ ᐊᑦᑐᐊᓂᖃᖅᓱᑎᓪᓗ ᐊᕕᑦᑐᖅᓯᒪᔪᓂ ᒐᕙᒪᒃᑯᑦ ᑎᒍᒥᐊᖅᑕᖏᓐᓄᑦ ᐋᖅᑭᑦᓯᒪᓂᖏᑦ ᓇᓗᓇᐃᔭᖅᓯᒪᓂᐊᖅᑐᑦ 5.3.8 ᑎᑭᓪᓗᒍ 5.3.15.

5.3.8

ᐋᖅᑮᔪᖃᓚᐅᖅᑎᓪᓗᒍ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ, ᐋᖅᑭᑦᑕᒥᓂᒃ ᓯᕗᒧᑦᑎᑦᓯᒋᐊᓖᑦ ᒥᓂᔅᑕᒧᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓴᖅᑕᐅᑎᑦᓯᒋᐊᖃᓐᖏᑦᑐᑦ ᐋᖅᑭᖅᑕᐅᔪᒥᒃ ᑕᖅᑲᐅᖓ.

5.3.9

ᐋᖅᑭᑦᑕᐅᔪᒥᒃ ᑐᓴᖅᓯᒪᓕᕈᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ ᑐᓐᖓᕕᒋᑦᓱᒍ 5.3.8, ᒥᓂᔅᑕ ᐃᒪᐃᑦᓱᓐᓇᖅᑐᖅ:

(a)

ᐊᖏᕐᓗᓂ ᐋᖅᑭᑦᑕᐅᔪᒥᒃ; ᐅᕝᕙᓗ

(b)

ᑲᔪᓯᑎᓐᖏᓪᓗᓂᐅᒃ ᐋᖅᑭᖅᑕᐅᔪᖅ ᑐᓐᖓᕕᒋᓗᒍ 5.3.11.

5.3.10

ᒥᓂᔅᑕ ᐊᖏᖅᐸᑦ ᐋᖅᑭᑦᑕᖓᓂ ᓄᓇᕗᒻᒥ ᐆᒪᔪᓕᕆᔩᑦ ᑲᑎᒪᔨᖏᑦᑕ ᑐᓐᖓᕕᒋᑦᓱᒍ 5.3.11, ᒥᓂᔅᑕ ᑲᔪᓯᐅᔾᔨᒋᐊᕐᓂᐊᖅᑐᖅ ᑲᒪᒋᔭᓕᕆᐊᓕᓕᒫᓂᒃ ᐊᑐᓕᖅᑎᓪᓗᒍ ᐋᖅᑭᑦᑕᐅᔪᖅ;

5.3.11

ᒥᓂᔅᑕ ᑲᔪᓯᑎᑦᓯᖏᑉᐸᑦ ᐋᖅᑭᑦᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ:

(a)

ᒥᓂᔅᑕ ᐅᓪᓗᐃᑦ 30 ᐃᓗᐊᓐᓂ ᑐᓴᖅᑎᑕᐅᕕᒋᔭᒥᓂ ᐅᓪᓗᕐᒥᒃ ᐋᖅᑭᑦᑕᐅᔪᒥ ᐅᕝᕙ ᐅᕙᑦᓯᐊᕈᕈᕋᓗᐊᖅᐸᑦ ᐊᖏᕈᑎᒋᓯᒪᓗᑎᐅᒃ ᒥᓂᔅᑕᒃᑯᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᓪᓗ; ᐊᒻᒪᓗ

(b)

ᒥᓂᔅᑕ ᑐᓴᖅᑎᑦᓯᒋᐊᓕᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᖏᓐᓂᒃ ᐱᔾᔪᑎᒋᔭᒥᓂᒃ ᑎᑎᕋᖅᓯᒪᑎᓪᓗᒋᑦ ᓱᒻᒪᑦ ᕿᐱᓗᒻᒪᖔᕐᒥᒃ ᐋᖅᑭᑦᑕᐅᔪᒥᒃ.

5.3.12

ᒥᓂᔅᑕ ᑲᔪᓯᑎᑦᓯᖏᑉᐸᑦ ᐋᖅᑭᑦᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓄᑦ ᑐᓐᖓᕕᒋᑦᓱᒋᑦ 5.3.11, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᓱᒪᑦᓴᖅᓯᐅᕈᑎᖃᒃᑲᓐᓂᕐᓂᐊᖅᑐᑦ ᐋᖅᑭᑦᑕᐅᓯᒪᔪᒥᒃ ᕿᒥᕐᕈᓗᑎᒃ ᕿᐱᓗᑦᑕᐅᔾᔪᑎᒋᔭᖏᓐᓂᒃ ᒥᓂᔅᑕᒧᑦ ᑭᖑᓪᓕᖅᐹᒥᓗ ᐋᖅᑮᓗᑎᒃ, ᓯᕗᒧᑦᑎᒋᐊᓕᒻᒥᓂᒃ ᒥᓂᔅᑕᒧᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑭᖑᓪᓕᖅᐹᒥ ᐋᖅᑭᖅᑕᒥᓂᒃ ᑐᓴᖅᑕᐅᑎᑦᓯᒍᓐᓇᖅᑐᑦ ᑕᖅᑲᐅᖓ.

5.3.13

ᑐᓐᖓᕕᒋᑦᓱᒍ 5.3.14, ᑭᖑᓪᓕᖅᐹᒥ ᐋᖅᑮᑦᑕᐅᔪᒥᒃ ᐱᓚᐅᖅᑎᓪᓗᒍ ᑲᑎᒪᔨᓄᑦ ᑐᓐᖓᕕᒋᑦᓱᒍ 5.3.12, ᒥᓂᔅᑕ ᐃᒪᐃᑦᓱᓐᓇᖅᑐᖅ:

(a)

ᐊᖏᕐᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ;

(b)

ᕿᐱᓗᓪᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ; ᐅᕝᕙᓗ

(c)

ᐊᓯᔾᔩᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ.

5.3.14

ᑭᖑᓪᓕᖅᐹᒥ ᐋᖅᑭᑦᑕᐅᔪᖃᖅᐸᑦ ᓄᓇᕗᒻᒥ ᐆᒪᔪᓕᕆᓂᒧᑦ ᑲᑎᒪᔨᓄᑦ ᐊᑦᑐᐊᔪᓄᑦ ᑭᓐᖒᒪᒋᔭᐅᔾᔭᓐᖒᕆᔭᐅᔪᓄᑦ, ᐋᖅᑭᒋᐊᖅᓯᒪᔪᑦ ᐊᓐᓇᐅᒪᔾᔪᑎᒋᒐᓱᐊᕐᓗᒋᑦ ᓈᒻᒪᓐᓂᕋᖅᑕᐅᓂᖏᑦ ᐅᕝᕙᓗ ᑎᑎᕋᖅᓯᒪᔪᖅ 5.6.39 ᐊᒻᒪᓗ ᒥᓂᔅᑕ ᕿᐱᓗᓐᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ, ᒥᓂᔅᑕ ᐅᖃᐅᓯᖃᕆᐊᓕᒃ ᑭᖑᓪᓕᖅᐹᒥ ᐋᖅᑭᑦᑕᒥᒃ ᐊᐅᓚᑦᓯᔩᑦ ᑭᒡᒐᖅᑐᖅᑎᖓᓐᓄᑦ, ᐃᒪᐃᑦᓱᓐᓇᖅᓱᑎᒃ:

(a)

ᐊᖏᕐᓗᑎᒃ ᑭᖑᓪᓕᖅᐹᒥ ᐋᖅᑭᑦᑕᒥᒃ;

(b)

ᕿᐱᓗᓪᓗᑎᒃ ᑭᖑᓪᓕᖅᐹᒥ ᐋᖅᑭᑦᑕᒥᒃ;

(c)

ᐊᓯᔾᔩᒋᐊᕐᓗᑎᒃ ᑭᖑᓪᓕᖅᐹᒥ ᐋᖅᑭᑦᑕᒥᒃ.

5.3.15

ᑭᖑᓪᓕᖅᐹᒥ ᐋᖅᑭᑦᑕᐅᔪᖅ ᐱᔭᐅᓯᒪᓕᖅᐸᑦ ᒥᓂᔅᑕᒧᑦ ᑐᓐᖓᕕᒋᑦᓱᒍ 5.3.12 ᒥᓂᔅᑕᓗ ᐅᕝᕙᓗ, ᐊᑑᑎᕕᖃᖅᐸᑦ, ᐊᐅᓚᑦᓯᔩᑦ ᑭᒡᒐᖅᑐᖅᑎᖓᑦ, ᐊᖏᓚᖓᑉᐸᑦ ᐋᖅᑭᒋᐊᕆᓚᖓᑉᐸᓪᓘᓐᓃᑦ ᑭᖑᓪᓕᖅᐹᒥ ᐋᖅᑭᑦᑕᐅᔪᒥᒃ, ᒥᓂᔅᑕ ᑲᔪᓯᐅᔾᔨᒋᐊᕐᓂᐊᖅᑐᖅ ᑲᒪᒋᔭᓕᕆᐊᓕᓕᒫᓂᒃ ᐊᑐᓕᖅᑎᓪᓗᒍ ᐋᖅᑭᑦᑕᐅᔪᖅ ᑭᖑᓪᓕᖅᐹᒥ ᐅᕝᕙᓗ ᐋᖅᑭᒋᐊᖅᓯᒪᓕᖅᑎᓪᓗᒍ ᑭᖑᓪᓕᖅᐹᒥ ᐋᖅᑭᑦᑕᐅᔪᖅ.

5.3.16 - ᐱᖁᔭᖅᑎᒍᑦ ᐊᑦᑐᐃᓂᕆᔭᖏᑦ ᐋᖅᑭᑦᑕᐅᔪᑦ

ᐋᖅᑭᑦᑕᐅᔪᓕᒫᑦ ᓄᓇᕗᑦ ᐆᒪᔪᓕᕆᓂᕐᒧᑦ ᑲᑎᒪᔨᖏᓐᓄᑦ ᐊᑦᑐᐊᔪᑦ 5.2.34(a), (c), (d), ᐅᕝᕙᓗ (f) ᐅᕝᕙᓗ ᓇᓪᓕᑐᐃᓐᓇᖏᑦ ᐃᓚᖓ 4-ᒥᒃ 6-ᒧᑦ ᐅᕝᕙᓗ ᐃᓛᒃᑯᑦ 40 ᐊᒻᒪᓗ ᑐᓐᖓᕕᒋᑦᓱᒋᑦ ᒐᕙᒪᒃᑯᖏᑦ ᑲᓇᑕᐅᑉ ᑎᒍᒥᐊᖅᑕᖏᑦ ᐋᖅᑭᑦᑕᐅᓂᐊᖅᑐᑦ ᒪᓕᓪᓗᒋᑦ 5.3.17 ᑎᑭᓪᓗᒍ 5.3.23.

5.3.17

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᖏᑦ ᐋᖅᑮᑉᐸᑕ, ᓯᕗᒧᑦᑎᑕᐅᓂᐊᖅᑐᖅ ᐋᖅᑭᑦᑕᖓᑦ ᒥᓂᔅᑕᒧᑦ. ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑕᖅᑲᐅᖓ ᑐᓴᖅᑕᐅᑎᑦᓯᔾᔮᖏᑦᑐᑦ.

5.3.18

ᑐᓴᖅᑎᑕᐅᓚᐅᕐᓗᓂ ᐋᖅᑭᑦᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᒋᑦᓱᒍ 5.3.17 ᒥᓂᔅᑕ ᐅᓪᓗᐃᑦ 60 ᐃᓗᐊᓐᓂ ᐅᕝᕙᓗ ᐅᕙᑦᓯᐊᕈᒋᐊᒃᑲᓐᓂᐅᒐᓗᐊᖅᐸᑦ ᐊᖏᕈᑕᐅᓯᒪᓗᓂ ᒥᓂᔅᑕᒧᑦ ᐊᒻᒪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓐᓄᑦ.

(a)

ᐊᖏᕐᓗᓂ ᐋᖅᑭᑦᑕᐅᔪᒥᒃ ᖃᐅᔨᒃᑲᐃᓗᓂᓗ ᓄᓇᕗᑦ ᐆᒪᔪᓕᕆᓂᕐᒧᑦ ᑲᑎᒪᔨᖏᓐᓂᒃ ᑎᑎᖅᑲᑎᒍᑦ; ᐅᕝᕙᓗ

(b)

ᐅᖃᐅᓯᖃᕐᓗᓂ ᐱᔾᔪᑎᒋᔭᒥᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᓱᒻᒪᑦ ᕿᐱᓗᑦᑕᐅᒻᒪᖔᖅ ᐋᖅᑭᑦᑕᐅᔪᖅ.

5.3.19

ᒥᓂᔅᑕ ᐊᖏᖅᓯᒪᔪᑎᑐᑦ ᑐᑭᓯᔭᐅᓂᐊᖅᑐᖅ ᐋᖅᑭᖅᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐃᒪᐃᓕᖅᐸᑦ:

(a)

ᒥᓂᔅᑕ ᑐᓴᖅᑎᑦᓯᓯᒪᓕᖅᐸᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ ᑎᑎᖅᑲᑎᒍᑦ; ᐅᕝᕙᓗ

(b)

ᒥᓂᔅᑕ ᕿᐱᓗᑦᓯᒪᓐᖏᑉᐸᑦ ᐋᖅᑭᑦᑕᐅᔪᒥᒃ ᐱᕕᑦᓴᖃᕐᓂᐅᑉ ᐃᓗᐊᓂ ᑐᓐᖓᕕᒋᑦᓱᒍ 5.3.18.

5.3.20

ᒥᓂᔅᑕ ᑐᑭᓯᔭᐅᑉᐸᑦ ᐊᖏᖅᓯᒪᒋᐊᖓ ᐋᖅᑭᑦᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᑐᐃᓐᓇᐅᑎᑕᐅᓂᖏᑦ ᒪᓕᓪᓗᒋᑦ 5.3.19, ᒥᓂᔅᑕ ᑲᔪᓯᒋᐊᕈᑎᖃᕐᓂᐊᖅᑐᖅ ᑲᒪᒋᔭᕆᐊᓕᓕᒫᒥᓂᒃ ᐊᑐᓕᖅᑎᓪᓗᒍ ᐋᖅᑭᑦᑕᐅᔪᖅ.

5.3.21

ᒥᓂᔅᑕ ᕿᐱᓗᑉᐸᑦ ᐋᖅᑭᑦᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᒋᑦᓱᒍ 5,3.18 ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᓱᒪᑦᓴᖅᓯᐅᕈᑎᖃᒃᑲᓐᓂᕐᓂᐊᖅᑐᑦ ᐋᖅᑭᑦᑕᐅᔪᒥᒃ ᑕᑯᓐᓇᕐᓗᒋᑦ ᑎᑎᕋᖅᓯᒪᔪᑦ ᐱᔾᔪᑕᐅᔪᑦ ᒥᓂᔅᑕᒧᑦ ᑭᖑᓪᓕᖅᐹᒥᓗ ᐋᖅᑮᓕᕐᓗᑎᒃ, ᓯᕗᒧᑦᑎᓪᓗᒍᓗ ᒥᓂᔅᑕᒧᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓴᖅᑕᐅᑎᑦᓯᒍᓐᓇᖅᑐᑦ ᑭᖑᓪᓕᖅᐹᒥ ᐋᖅᑭᑦᑕᐅᔪᒥᒃ ᑭᓇᒃᑯᑐᐃᓐᓇᕐᓄᑦ ᑕᖅᑲᐅᖓ.

5.3.22

ᐱᓚᐅᕐᓗᓂ ᑭᖑᓪᓕᖅᐹᒥ ᐋᖅᑭᑦᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᓂᒧᑦ ᑲᑎᒪᔨᓂᒃ ᑐᓐᖓᕕᒋᓗᒋᑦ 5.3.21, ᒥᓂᔅᑕ ᐃᒪᐃᑦᓱᓐᓇᖅᑐᖅ:

(a)

ᐊᖏᕐᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ;

(b)

ᕿᐱᓗᓪᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ;

(c)

ᐊᓯᔾᔩᒋᐊᕐᓗᓂ ᑭᖑᓪᓕᖅᐹᒥ ᐋᖅᑭᑦᑕᒥᒃ.

5.3.23

ᑭᖑᓪᓕᖅᐹᒥ ᐋᖅᑭᑦᑕᐅᔪᒥᒃ ᐱᓯᒪᓕᕈᓂ ᒥᓂᔅᑕ ᑐᓐᖓᕕᒋᑦᓱᒋᑦ 5.3.21 ᒥᓂᔅᑕᓗ ᐊᖏᕐᓂᐊᕈᓂ ᐋᖅᑭᒋᐊᕆᓂᐊᕈᓂᓘᓐᓃᑦ ᑭᖑᓪᓕᖅᐹᒥ ᐋᖅᑭᖅᑕᐅᔪᒥᒃ, ᒥᓂᔅᑕ ᑲᔪᓯᒋᐊᕈᔾᔨᓂᐊᖅᑐᖅ ᑲᒪᒋᔭᕆᐊᓕᓕᒫᒥᓂᒃ ᐊᑐᓕᖅᑎᓪᓗᒍ ᑭᖑᓪᓕᖅᐹᒥ ᐋᖅᑭᑦᑕᐅᔪᖅ ᐅᕝᕙᓘᓐᓃᑦ ᐊᓯᔾᔨᕆᐊᖅᑕᐅᑉᐸᑦ.

5.3.24 - ᐊᑯᓐᓂᖅᓯᐅᑏᑦ ᐋᖅᑭᑦᑕᐅᔪᑦ

ᑐᐊᕕᕐᓇᖅᐸᑦ ᐊᑑᑎᒐᔪᐃᑦᑐᓂᓪᓗ ᐊᑑᑎᔪᖃᖅᐸᑦ ᑕᕝᕙᓴᐃᓐᓇᖅ ᐋᖅᑭᒋᐊᕈᑕᐅᒋᐊᖃᕐᓗᓂ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᓂ, ᒥᓂᔅᑕ ᒥᓂᔅᑕᐅᓪᓘᓐᓃᑦ ᑎᓕᓯᒪᔭᖓ ᑭᒡᒐᖅᑐᐃᔨᒋᓪᓗᒍ ᐋᖅᑮᒍᓐᓇᖅᑐᖅ ᐊᑐᓕᖅᑎᑦᓯᓗᓂᓗ ᐱᔾᔪᑎᑦᓴᖃᑦᓯᐊᖅᓱᑎᒃ ᐊᑯᓐᓂᖅᓯᐅᒻᒥᒃ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᑕᖏᖅᑐᒥᒃ ᕿᒥᕐᕈᓂᖃᕐᓂᐊᖅᑐᑦ ᑭᖑᓂᖓᒍᑦ ᐱᔪᓐᓇᖅᓯᑐᐊᕈᑎᒃ.

5.3.25 - ᒥᓂᔅᑕᐃᑦ ᐊᐅᓚᑦᓯᓂᕐᒧᑦ ᐊᐅᓚᔾᔭᒋᐊᕈᑎᖏᑦ

ᓇᐅᓕᒫᑦᓯᐊ ᐅᕙᓂ ᐃᓛᒃᑰᖅᑐᒥ ᓄᖅᑲᖓᒍᑕᐅᔾᔮᖏᑦᑐ ᒥᓂᔅᑕᒧᑦ, ᒥᓂᔅᑕᐅᑉ ᓇᒻᒥᓂ ᐊᐅᓚᔾᔭᑦᓯᒪᔭᖓᓄᑦ, ᐅᖃᐅᓯᖃᕐᓂᕐᒧᑦ ᐊᐅᓚᑦᓯᓂᕐᒨᖓᔪᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ. ᐱᔾᔪᑎᒥᒃ ᐅᖃᐅᓯᐅᔪᖃᖅᐸᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑕᕝᕙᓴᐃᓐᓇᖅ ᑲᒪᒋᐊᕐᓂᐊᖅᑐᑦ ᑖᑦᓱᒪᓐᖓᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᐅᓚᔾᔭᒋᐊᕈᑎᖃᕐᓂᐊᖅᑐᑦ ᒥᓂᔅᑕᓄᑦ ᐊᐅᓚᔾᔭᒋᐊᖅᑕᐅᔪᓂᒃ ᐋᖅᑭᖅᑕᐅᔪᓄᑦ ᐱᕕᖃᖅᑎᓪᓗᒋᑦ ᒥᓂᔅᑕᐃᑦ ᑎᑭᐅᒪᓂᕐᒥᒃ ᑲᓇᑕᒥ ᓄᓇᕐᔪᐊᕐᒥᓗ ᑲᒪᒋᒋᐊᓕᒻᒥᓄᑦ.

ᐃᓚᖓ 4

ᓄᓇᕗᒻᒥ ᐆᒪᔪᖅᑕᐅᕙᑦᑐᓂᒃ ᖃᐅᔨᓴᕐᓂᖅ

5.4.1

ᓄᓇᕗᒻᒥ ᐆᒪᔪᖅᑕᐅᕙᑦᑐᓂ ᖃᐅᔨᓴᕐᓂᖅᑕᖃᕐᓂᐊᖅᑐ. ᐃᓘᓐᓇᖏᓐᓂ, ᐱᖓᓱᓂ ᐊᕕᑦᑐᖅᓯᒪᔪᓂ ᓄᓇᕗᑦ ᓇᓗᓇᐃᖅᑕᐅᓯᒪᓂᖓᓂ. ᐅᖃᐅᓯᖅᑕᖏᑦᑕ ᑐᑭᖏᑦ ᖃᐅᔨᓴᕐᓂᕐᒧᑦ ᓇᓗᓇᐃᔭᖅᑕᐅᔪᑦ ᐅᐃᒍ 5-5-ᒥ.

5.4.2

ᖃᐅᔨᓴᕐᓂᖅ ᐱᒋᐊᕋᔭᖅᑐᖅ ᐊᑐᓂᑦ ᐱᖓᓱᓂ ᐊᕕᑦᑐᖅᓯᒪᔪᓂ ᓯᕗᓪᓕᖅᐹᒥ ᐊᕐᕌᒍᒥᒃ ᓇᓪᓕᐅᓂᖅᓯᐅᓕᖅᐸᑕ ᒥᑦᓯᑎᓐᓂᓘᓐᓃᑦ ᐅᓪᓗᖓᑕ ᐊᖏᕈᑕᐅᓚᐅᖅᑎᓪᓗᒍ ᐅᓇ ᐊᖏᕈᑎ. ᖃᐅᔨᕐᓴᓂᐅᔪᖅ ᑲᔪᓯᑎᑕᐅᓂᐊᖅᑐᖅ ᑐᑭᒧᐊᑦᑎᑕᐅᓗᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ

5.4.2

ᐋᖅᑭᒋᐊᖅᑕᐅᔪᑦ P.C. 1995-2/700 ᐄᑉᐳᓘ 26 1995

ᖃᐅᔨᓴᕐᓂᖅ ᐱᒋᐊᕋᔭᖅᑐᖅ ᐊᑐᓂᑦ ᐱᖓᓱᓂᒃ ᐊᕕᑦᑐᖅᓯᒪᔪᓂ ᔮᓐᓄᐊᕆ 1, 1996 ᒥᑦᓯᑎᓐᓂᓘᓐᓃᑦ. ᖃᐅᔨᓴᕐᓂᖅ ᑲᔪᓯᑎᑕᐅᓂᐊᖅᑐᖅ ᑐᑭᒧᐊᑦᑎᑕᐅᓗᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.4.3

ᖃᐅᔨᓴᕐᓂᖅ, ᑲᑎᖅᓱᖅᑕᐃᑦ, ᐃᖅᑲᓇᐃᔮᖑᓂᖏᑦ ᐊᑦᑐᐊᔪᑦ ᖃᐅᔨᓴᕐᓂᒧᑦ ᐋᖅᑭᑦᑕᐅᓯᒪᓂᐊᖅᑐᑦ ᖃᐅᔨᒪᔭᐅᑎᑦᓯᑲᓐᓂᕈᑕᐅᓗᑎᒃ ᐱᕕᓕᒫᒃᑯᑦ ᐊᖑᓇᓱᑦᑏᑦ ᐃᓚᐅᑎᑕᐅᓗᑎᒃ ᑳᑦᑐᓛᑦᓯᒍᑕᐅᓂᐊᖅᓱᓂᓗ ᑖᒃᑯᓇᓐᖓᓪᓗᐊᖅ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ, ᖃᐅᔨᓴᖅᑕᐅᓗᑎᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.4.4

ᖃᐅᔨᓴᕐᓂᖅ ᐃᖏᕐᕋᓂᐊᖅᑐᖅ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓂ, ᐊᑕᖏᖅᑐᓂᒃ ᑮᓇᐅᔭᖃᖅᑎᑕᐅᓂᐊᖅᓱᑎᒃ ᒐᕙᒪᒃᑯᓐᓄᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐸᕐᓇᐃᕐᓂᐊᖅᑐᖅ ᑮᓇᐅᔭᖅᑑᑎᑦᓴᓂᒃ ᖃᐅᔨᓴᕐᓂᕐᒧᑦ ᕿᒥᕐᕈᔭᐅᒍᒫᕐᓂᐊᖅᓱᓂᓗ ᒐᕙᒪᒃᑯᓐᓄᑦ.

5.4.5

ᐱᔾᔪᑕᐅᔪ ᖃᐅᔨᓴᕐᓂᕐᒧᑦ ᑲᑎᖅᓱᐃᒍᒪᓪᓗᑎᒃ, ᓴᖅᑮᓗᑎᒃ ᒫᓐᓇ ᐊᖑᓇᓱᓐᓂᐅᕙᑦᑐᑦ ᖃᓄᐃᓕᖓᓂᖏᓐᓂ, ᐃᑲᔪᕈᑕᐅᓗᑎᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂ ᓴᖅᑮᑎᓪᓗᒋᑦ ᑲᑎᑦᓱᑎᒃ ᐆᒪᔪᖅᑕᐅᒍᓐᓇᖅᑐᓂ ᐊᒻᒪ, ᐃᓘᓐᓈᒍᑦ, ᐃᑲᔪᖅᓯᒍᑕᐅᓗᓂ ᐊᐅᓚᑦᓯᓂᑦᓯᐊᒧᑦ ᐊᒻᒪ ᐊᑐᕐᓂᑦᓯᐊᒧᑦ ᐆᒪᔪᕐᓂ ᓄᓇᕗᑦ ᐃᓗᐊᓂ. ᒫᓐᓇᒧᓄᑦ, ᖃᐅᔨᓴᕐᓂᖅ ᐃᒪᐃᓐᓂᐊᖅᐳᖅ:

(a)

ᑎᑎᕋᖅᑕᐅᓗᑎᒃ ᖃᓄᐃᓕᖓᓂᖏᑦᖏ ᐊᐅᓚᓂᖏᓪᓗ ᐃᓄᐃᑦ ᐊᑐᕐᓂᖏᑦᑕ ᐆᒪᔪᕐᓂᒃ ᐱᔾᔪᑕᐅᓪᓗᓂ ᓇᓗᓇᐃᖅᑕᐅᓂᖏᑦᑕ ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᓐᓂᕋᖅᑕᐅᓂᖏᑦ; ᐊᒻᒪᓗ

(b)

ᑲᑎᖅᓱᐃᓗᑎᒃ, ᖃᐅᔨᓴᖃᑦᑕᕐᓗᑎᒃ ᐆᒪᔪᐃᑦ ᖃᐅᔨᓴᖅᑕᐅᓂᖏᓐᓂᒃ, ᓄᓇᒥᒃ, ᐆᒪᔪᖅᑕᐅᕙᓪᓕᐊᔪᓂᓪᓗ ᑎᑎᕋᖅᐸᓪᓕᐊᓗᒋᑦ ᐊᐅᓚᑕᐅᓂᖏᑦ ᓄᓇᕗᒻᒥ.

5.4.6

ᐋᖅᑭᑦᓯᒪᓐᖏᑦᑐᑦ ᑐᑭᓕᐅᖅᑕᐅᓯᒪᔪᓪᓗ ᑲᑎᖅᓱᖅᑕᐅᔪᑦ ᐱᓯᒪᔪᑦ ᖃᐅᔨᓴᕐᓂᕐᒥᒃ ᐊᑕᖏᕐᓗᑎᒃ ᐊᑐᐃᓐᓇᑦᓯᐊᕆᐊᓖᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ, ᐊᕕᑦᑐᖅᓯᒪᔪᓂ ᒐᕙᒪᓄᑦ ᐃᓄᓐᓄᓪᓗ.

5.4.7

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᖃᐅᔨᓴᑦᓯᐊᕐᓂᐊᖅᑐᑦ ᐊᑎᖏᑦ ᐊᖑᓇᓱᑦᑏᑦ ᖃᐅᔨᔭᐅᑎᑦᑕᐃᓕᓗᒋᑦ ᐊᑐᐃᓐᓇᕈᖅᓴᐃᓕᕈᑎᒃ ᑲᑎᖅᓱᖅᑕᐅᓯᒪᔪᓂᒃ ᑐᓐᖓᕕᒋᑦᓱᒋᑦ 5.4.6-.

5.4.8

ᑎᑎᖅᑲᑎᒍᑦ ᐱᒍᓐᓇᕐᓂᖃᖅᑎᑕᐅᓚᐅᓐᖏᓪᓗᓂ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐊᑦᑐᖅᑕᐅᔪᓂᓪᓗ ᐃᓄᓐᓂᒃ, ᓇᓗᓇᐃᕈᑎᑦᓴᐅᔪᑦ ᐱᔭᐅᔪᑦ ᖃᐅᔨᓴᕐᓂᒃᑯᑦ ᐊᑦᑐᐊᔪᑦ ᐃᓄᒻᒧᑦ ᐊᑐᖅᑕᐅᒍᓐᓇᔾᔮᖏᑦᑐᑦ ᐃᓄᒻᒥᒃ ᐸᓯᔭᑦᓴᐅᔪᖃᕋᔭᕐᓂᖅᐸᑦ ᐱᕋᔭᓐᓂᒃᑯᑦ.

5.4.9

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐅᓂᒃᑲᓕᐅᖅᐸᓐᓂᐊᖅᑐᑦ ᐊᕐᕌᒍᑕᒫᑦ ᐱᕙᓪᓕᐊᓂᖓᓂᒃ ᖃᐅᔨᓴᕐᓂᐅᑉ. ᐱᔭᕇᖅᑕᐅᓚᐅᖅᑎᓪᓗᒍ ᖃᐅᔨᕐᓴᓂᖅ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓴᖅᑮᓂᐊᖅᑐᑦ ᐃᓗᓕᖅᑐᔪᒥᒃ ᓇᐃᓪᓕᑎᖅᓯᒪᔪᒥᒃ ᖃᐅᔨᔭᐅᔪᓄᑦ ᖃᐅᔨᓴᕐᓂᕐᒥᒃ.

ᐃᓚᖓ 5

ᐃᓄᐃᑦ ᐊᕐᕕᓂᒃ ᖃᐅᔨᒪᓂᖏᓐᓂᒃ ᖃᐅᔨᓴᕐᓂᖅ

5.5.1

ᑮᓇᐅᔭᓕᐅᕈᑕᐅᑦᓱᑎᒃ ᐊᖑᔭᐅᖃᑦᑕᖅᓯᒪᓂᖏᑦ ᐊᕐᕖᑦ ᑖᕙᓂ 1900-ᖏᑦ ᐱᒋᐊᓕᕋᑖᖅᑎᓪᓗᒋᑦ ᐃᓄᓪᓚᕆᐅᓐᖏᑦᑐᓄᑦ ᐃᓄᐃᓴᓪᓕᒍᑕᐅᓪᓚᕆᑦᓯᒪᒻᒪᑕ ᑲᑎᒪᐅᖅᑐᓄᑦ ᐊᕐᕕᓐᓄᑦ ᓄᓇᕗᒻᒥ. ᒐᕙᒪᒃᑯᑦ ᓇᓗᓇᐃᖅᓯᔪᑦ ᐃᓄᐃᑦ, ᑭᖑᓂᖓᓂ ᓄᖅᑲᖓᑎᑕᐅᓚᐅᖅᑎᓪᓗᒍ ᐊᕐᕕᓐᓂ ᑮᓇᐅᔭᓕᐅᕋᓱᐊᕈᑎᖃᕐᓂ, ᑲᑎᒪᐅᖅᑐᑦ ᐊᕐᕖᑦ ᓄᓇᕗᒻᒥ ᐊᒥᓱᓐᖑᐹᓪᓕᖅᓯᒪᔪᑦ ᐊᕐᕌᒍᓂ ᐊᕙᑎᓂᓪᓗᑭᐊᖅ ᐅᖓᑖᓂ, ᐃᓚᖓᓂ, ᐃᓄᐃᑦ ᐃᓱᒪᖅᓱᖅᓱᑎ ᐊᖑᓇᓱᒍᓐᓇᕐᓂᕐᒥᓂ ᓄᖅᑲᐅᒥᖓᑎᑦᓯᓚᐅᖅᑎᓪᓗᒋᑦ ᐅᑎᖅᐸᓪᓕᐊᒍᓐᓇᖁᓪᓗᒋᑦ ᐊᕐᕖᑦ.

5.5.2

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᖃᐅᔨᓴᕐᓂᖃᕐᓂᐊᖅᑐᑦ ᐃᓄᐃᑦ ᖃᐅᔨᒪᓂᖏᓐᓂᒃ ᑎᑎᕋᕐᓗᑎᒃ ᑕᑯᔭᐅᕙᑦᑐᓂᒃ, ᐃᓂᖏᓐᓂᒃ ᐊᒻᒪᓗ ᖃᑦᓯᐅᓂᖏᓐᓂᒃ ᐊᕐᕖᑦ ᓄᓇᕗᒻᒥ. ᖃᐅᔨᓴᕐᓂᖅ ᐊᑑᑎᓂᐊᖅᑐᖅ ᐃᓗᐊᓂ ᐊᕐᕌᒍᐃᑦ ᑕᓪᓕᒪᑦ ᐅᓪᓗᖓᓂ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ. $500,000.00 ᐃᓚᒍᑦᓯᐅᑎᔭᐅᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑮᓇᐅᔭᖅᑑᑎᑦᓴᖏᓐᓄᑦ ᑖᓐᓇ ᐱᓪᓗᒍ.

ᐃᓚᖓ 6

ᐊ

5.6.1 - ᐃᓄᐃᑦ ᐱᔪᓐᓇᐅᑎᖏᑦ ᐊᖑᓇᓱᓐᓂᕐᒧᑦ

ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᑲᑎᒪᐅᖅᑐᑦ ᐆᒪᔪᐃᑦ ᓴᖅᑭᖅᑕᐅᓯᒪᓐᖏᑉᐸᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᖃᕐᓗᑎᒃ 5.6.16 ᐊᒻᒪ 5.6.17-ᒥᒃ, ᐃᓄᒃ ᐱᔪᓐᓇᕐᓂᓕᒃ ᐊᖑᓇᓱᓐᓂᕐᒧᑦ ᑕᐃᑲᓐᖓᑦ ᑲᑎᒪᐅᖅᑐᓂᒃ ᓄᓇᕗᒻᒥ ᑎᑭᐅᑎᑦᓱᒍ ᐊᑕᖏᖅᑐᒥᒃ ᖃᑭᒪᓇᓱᐊᕐᓂᕐᒧᑦ, ᐃᓅᓯᕐᒧᑦ, ᐱᖅᑯᓯᕐᒧᓪᓗ ᑭᓐᖒᒪᒋᔭᖏᑦ, ᑐᓐᖓᕕᒋᓪᓗᒋᑦ ᑐᑭᖏᑦ ᐆᒪ ᐃᓛᒃᑰᖅᑑᑉ.

5.6.2

ᐱᔾᔪᑕᐅᓪᓗᓂ 5.6.1, ᐊᑕᖏᖅᑐᑦ ᐊᓐᓇᐅᒪᔾᔪᑕᐅᔭᕆᐊᓖᑦ ᑐᑭᓕᒃ ᐊᑕᖏᖅᑐᒥ ᐊᖑᓇᓱᓐᓂ.

5.6.3

ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᑲᑎᒪᐅᖅᑐᓂ ᐆᒪᔪᕐᓂ ᓴᖅᑭᖅᑕᐅᓯᒪᓕᖅᐸᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᒋᑦᓱᒍ 5.6.16 ᑎᑭᑦᓱᒍ 5.6.18, ᐃᓄᓪᓚᕆᒃ ᐱᔪᓐᓇᕐᓂᖃᕐᓂᐊᖅᑐᖅ ᐊᖑᓇᓱᐊᕐᓂᕐᒥᒃ ᑕᐃᒃᑯᓇᓐᖓᑦ ᐆᒪᔪᕐᓂᒃ ᑐᓐᖓᕕᖃᕐᓗᑎᒃ ᑐᑭᖏᓐᓂᒃ ᐆᒪ ᐃᓛᒃᑰᖅᑑᑉ.

5.6.4

ᐱᔭᐅᒋᐊᖃᓐᖏᑦᑐᑦ ᐅᕝᕙᓘᓐᓃᑦ ᑰᑕᕆᔭᐅᔪᑦ ᖃᑦᓯᐅᓂᖏᓐᓄᑦ ᐆᒪᔪᐃᑦ ᐊᖑᔭᐅᒍᓐᓇᖅᑐᑦ ᐊᑑᑎᔪᑦ ᑕᕝᕙᓴᐃᓐᓇᖅ ᓯᕗᕐᖓᓂ ᐅᓪᓗᖓᑕ ᐊᖏᖅᑕᐅᓂᖓᑕ ᐊᖏᕈᑎᐅᑉ ᑕᑯᓐᓇᖅᑕᐅᓂᐊᖅᑐᑦ ᓴᖅᑭᖅᑕᐅᓯᒪᔪᑎᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ, ᐊᑑᑎᓂᐊᖅᓱᑎᓪᓗ ᐲᖅᑕᐅᖏᓐᓂᖏᓐᓂ ᐅᕝᕙᓘᓐᓃᑦ ᐊᓯᐊᒍᑦ ᐋᖅᑭᒋᐊᖅᑕᐅᑉᐸᑕ ᑲᑎᒪᔨᓄᑦ ᒪᓕᓪᓗᑎᒃ ᐆᒥᖓ ᐃᓛᒃᑰᖅᑐᒥᒃ.

5.6.5 - ᓇᓚᐅᑦᓵᖅᓯᒪᓂᖅ ᐆᒪᔪᖅᑕᐅᒍᓐᓇᖅᑐᓂᒃ

ᑐᓐᖓᕕᒋᑦᓱᒋᑦ 5.6.6, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓱᓕᔫᑎᓪᓗᒍ ᒪᓕᖃᑦᑕᕐᓂᐊᖅᐳᑦ ᑕᑯᑦᓴᐅᑎᑦᓯᓗᑎᓪᓗ ᐃᓄᐃᑦ ᐃᓅᔾᔪᑎᒋᔭᕆᐊᖃᖅᑕᖏᓐᓂᒃ ᐱᔭᕆᐊᖃᕐᓂᕆᔭᖏᓐᓂᒃ ᒪᓕᓪᓗᒋᑦ ᐋᖅᑭᑦᑕᐅᓯᒪᓪᓗᑎᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐅᑯᐊ:

(a)

ᓇᓄᓕᒫᑦ;

(b)

ᐅᒥᒻᒪᐃᑦ;

(c)

ᐊᕐᕖᑦ;

(d)

ᑎᒻᒥᐊᑦ ᑐᓛᔪᓕᒫᑦ ᒪᓐᓂᖏᓪᓗ ᐋ’ᒐᐅᒐᓗᐊᖅ ᑐᓛᔪᑦ ᓂᕿᑦᓴᕆᔭᐅᓪᓗᑎᒃ ᑎᒻᒥᐊᖅᑕᐅᕙᑦᑐᑦ, ᑎᑎᕋᖅᑕᐅᓯᒪᔪᑦ ᐃᓚᖓ 1-ᒥ ᐅᐃᒍᒥ 5-3, ᐅᑭᐊᒃᑯᑦ, ᐱᒋᐊᖅᓱᓂ ᓯᑦᑕᕝᕙ 1-ᑕᒫᑦ;

(e)

ᓇᑦᑐᕋᓖᑦ ᐊᓯᖏᓪᓗ ᐅᑉᐲᓪᓗ; ᐊᒻᒪᓗ

(f)

ᒥᑏᑦ ᖁᓂᕈᖏᑦ ᒥᑏᑦ ᐅᓪᓗᖏᓐᓂᒃ.

5.6.6

ᓂᕆᐅᓇᓐᖏᑦᑑᔪᖃᓐᖏᑐᐊᖅᐸᑦ ᐊᒥᓱᓐᖑᖅᑐᐊᓘᓐᖏᑉᐸᑕᓗ ᐅᒪᔪᐃᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ

5.6.7

ᕿᒥᕐᕈᔾᔮᖏᑦᑐᑦ ᐊᓐᓇᐅᒪᔾᔪᑕᐅᒋᐊᖃᖅᑐᕆᔭᐅᔪᓂᒃ ᓇᓗᓇᐃᔭᖅᑕᐅᔪᓂᒃ 5.6.5-ᒥ ᐱᔾᔪᑕᐅᓪᓗᓂ ᓈᒻᒪᒋᔭᐅᓐᖏᓐᓂ ᑭᓯᐊᓂ ᐅᓪᓗᐃᑦ ᐊᕙᑎᑦ ᐊᓂᒍᖅᐸᑕ ᐅᓪᓗᖓᓂ ᐊᖏᖅᑕᐅᓚᐅᖅᑎᓪᓗᒍ ᐊᖏᕈᑎ.

5.6.8

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᕿᒥᕐᕈᒍᓐᓇᖅᑐᑦ ᓇᓚᐅᑦᓵᖅᑕᐅᓯᒪᔪᒥᒃ ᐱᔾᔪᑎᖃᕐᓗᑎᒃ ᐊᑭᕋᖅᑐᕐᓂᕐᒥᒃ ᐊᕐᕌᒍᐃᑦ ᐊᕙᑎᑦ ᐊᓂᒍᖅᐸᑕ ᐊᑯᓐᓂᖃᖅᐸᓪᓗᑎᓪᓗ ᑭᖑᓂᖓᓂ ᐊᕐᕌᒍᐃᑦ ᑕᓪᓕᒪᑦ ᐊᑖᓂᐅᓐᖏᑦᑐᖅ.

5.6.9

ᕿᒥᕐᕈᔭᐅᓕᖅᐸᑕ ᖃᑭᒪᓇᓱᐊᕐᓂᖅ, ᐃᓅᓯᕐᒨᖓᔪᑦ ᐱᖅᑯᓯᖏᓐᓄᓪᓗ ᐃᓄᐃᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐅᑯᓇᓐᖓᑦ ᐃᓱᒪᑦᓴᖅᓯᐅᕈᑎᖃᕐᓂᐊᖅᑐᑦ:

(a)

ᐊᖑᔭᐅᓪᓚᕆᑉᐸᑦᑐᓂᒃ;

(b)

ᐊᑐᐃᓐᓇᐅᓂᖏᓐᓂᒃ ᐆᒪᔪᐃᑦ; ᐊᒻᒪᓗ

(c)

ᐃᓘᓐᓈᒍᑦ ᖃᑭᒪᓇᓱᐊᕐᓂᖅ, ᐃᓅᓯᕐᒨᖓᔪᑦ ᐱᖅᑯᓯᕐᒨᖓᔪᓪᓗ ᖃᓄᐃᓕᖓᓂᖏᑦ ᐊᒻᒪᓗ ᐃᓄᐃᑦ.

5.6.10

ᕿᒥᕐᕈᔭᐅᔪᖃᓕᖅᐸᑦ ᓇᓚᐅᑦᓵᖅᑕᐅᓯᒪᔪᓂᒃ ᐱᔾᔪᑕᐅᓪᓗᓂ ᐊᑭᕋᖅᑐᖅᑕᐅᓂᖅ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑲᒪᓂᐊᖅᑐᑦ ᐃᒥᒃᑯᑦ ᐆᒪᔪᖃᐅᖅᑐᓂᒃ ᓴᖅᑭᐸᐅᓪᓕᐊᓂᖏᑦ ᒪᓕᓪᓗᒋᑦ.

5.6.11

ᓇᓚᐅᑦᓵᕐᓂᐅᔪᑦ ᐊᓐᓇᐅᒪᔾᔪᑕᐅᔭᕆᐊᓕᓐᓂᒃ ᐊᑐᓕᖅᑎᑕᐅᒍᓐᓇᖏᑦᑐᑦ, ᓇᒻᒥᓂᖅ, ᐆᒪᔪᖅᑎᑦᓯᑦᑕᐃᓕᒍᑕᐅᓗᑎᒃ ᒐᕙᒪᒃᑯᓐᓂ ᐆᒪᔪᓕᕆᔨᓂᒃ ᖃᐅᔨᓴᖅᑎᓂᓪᓗ ᐱᔾᔪᑕᐅᓪᓗᓂ ᖃᐅᔨᕐᓴᓂᖅ ᐅᕝᕙᓗ ᐃᖅᓯᓇᕿᔪᓂᒃ ᐋᓐᓂᐊᔪᓂᒃ ᐊᐅᓚᑦᓯᒍᑕᐅᓗᓂ, ᐊᖏᖅᑕᐅᓯᒪᓂᖓ ᒪᓕᓪᓗᒍ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.6.12 - ᒥᖅᑯᓖᑦ

ᓇᐅᑐᐃᓐᓇ ᐃᓄᒃ ᐊᓯᐊ ᑕᐃᔭᐅᓯᒪᔫᑉ 5.6.13-ᒥ ᐆᒪᔪᕆᐊᖃᓐᖏᑦᑐᖅ ᒥᖅᑯᓕᓐᓂᒃ ᓄᓇᕗᒻᒥ.

5.6.13

ᑐᓐᖓᕕᒋᑦᓱᒋᑦ ᑐᑭᖏᑦ ᐆᒪ ᐃᓛᒃᑰᖅᑑᑉ, ᐅᑯᐊ ᐃᓄᐃᑦ, ᐊᖑᓇᓱᒍᓐᓇᖅᑐᑦ ᒥᖅᑯᓕᓐᓂᒃ ᓄᓇᕗᒻᒥ, ᐱᓗᐊᖅᑐᒥᒃ:

(a)

ᐃᓄᓪᓚᕆᒃ;

(b)

ᐃᓄᒃ ᐅᑦᑑᕝᕙ 27, 1981-ᖑᑎᓪᓗᒍ, ᐸᐸᑦᓯᔪᒥᓂᖅ ᐊᖑᓇᓱᓐᓂᕐᒧᑦ ᓚᐃᓴᓐᓯᒥᒃ, ᐊᖑᓇᓱᑉᐸᑦᓱᓂᓗ ᒥᖅᑯᓕᓐᓂᒃ ᓄᓇᕗᒻᒥ, ᑕᐃᓐᓇ ᐃᓄᒃ ᑲᔪᓯᒍᒪᑉᐸᑦ ᐊᖑᓇᓱᖃᑦᑕᕐᓂᕐᒧᑦ ᒥᖅᑯᓕᓐᓂᒃ ᑭᖑᓂᖓᓂ ᐅᓪᓗᖅ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ, ᓇᒻᒥᓂᕐᓗ ᓇᓗᓇᐃᖅᓯᒍᓐᓇᕐᓗᓂ ᐱᔪᓐᓇᕐᓂᕆᔭᒥᓂᒃ ᐊᑖᓂ ᐆᒪ ᑎᑎᕋᖅᓯᒪᔫᑉ; ᐊᒻᒪᓗ

(c)

ᐃᓄᒃ ᑐᑦᓯᕋᐅᑎᖏᑦ ᐊᖏᖅᑕᐅᓯᒪᔪᑦ ᐃᓱᒪᓕᐅᕈᑕᐅᓯᒪᑦᓱᑎᓪᓗ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᓄᓇᒥ ᑐᑦᓯᕋᖅᑑᑉ ᐊᖑᓇᓱᕝᕕᒋᖃᑦᑕᕈᒪᔭᖓᓂ ᒥᖅᑯᓕᓐᓂᒃ, ᐊᒻᒪᓗ ᑐᓐᖓᕕᐅᓗᑎᒃ ᑐᑭᖏᑦ ᐃᒪᐃᓕᖓᓂᐅᔪᓪᓗ ᐋᖅᑭᖅᑕᐅᔪᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓄᑦ.

5.6.14

ᐃᓄᐃᑦ ᐅᖃᐅᓯᐅᔪᑦ 5.6.13(b)-ᒥ ᐊᒻᒪᓗ (c) ᑐᓐᖓᕕᖃᕐᓂᐊᖅᑐᑦ ᒪᓕᒐᕐᓂᒃ ᐃᓘᓐᓇᖏᓐᓅᖓᔪᓂᒃ.

5.6.15

ᐱᔾᔪᑕᐅᓪᓗᑎᒃ ᑎᑎᕋᖅᓯᒪᔪᑦ 5.6.13-ᒥ, ᐊᖑᓇᓱᓐᓂᕐᒧᑦ ᓚᐃᓴᓐᓯ ᐱᓯᒪᔭᐅᔪᖅ ᐃᓄᒻᒧᑦ ᐃᓄᓪᓚᕆᐅᓐᖏᑦᑐᒧᑦ ᓇᒻᒥᓂᖅ ᓚᐃᓴᓐᓯᑐᐃᓐᓇᐅᒋᐊᖓ ᑕᑯᓐᓇᖅᑕᐅᔪᖅ, ᐊᐅᓪᓛᖅᑎᒐᑦᓴᐅᖏᑦᑐᖅ ᑭᖑᕚᖅᓯᐅᑕᐅᒍᓐᓇᕋᓂ.

5.6.16 - ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ

ᑐᓐᖓᕕᒋᓗᒋᑦ ᑐᑭᖏᑦ ᐆᒪ ᐃᓛᒃᑰᖅᑑᑉ, ᓄᓇᕗᒻᒥ ᐆᒪᔪᓕᕆᓂᑦ ᑲᑎᒪᔩᑦ ᐱᔪᓐᓇᕐᓂᓕᓪᓗᐊᑕᐅᓂᐊᖅᑐᑦ ᓴᖅᑮᓂᕐᒧᑦ, ᐋᖅᑭᒋᐊᕆᓂᕐᒧᑦ ᐲᖅᓯᓂᕐᒧᓪᓘᓐᓃᑦ, ᑕᐃᒪᐃᑦᓴᕆᐊᖃᕋᐃᒍᑎᒃ, ᖃᑦᓯᐅᓂᖏᓐᓂᒃ ᑲᑎᓪᓗᑎᒃ ᐊᖑᔭᐅᖑᓐᓇᖅᑐᑦ ᐅᕝᕙᓘᓐᓃᑦ ᐊᖑᓇᓱᐊᕐᓂᕐᒥᒃ ᓄᓇᕗᒻᒥ.

5.6.17

ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᑲᑎᒪᐅᖅᑐᑦ ᐆᒪᔪᐃᑦ ᐅᖃᐅᓯᐅᒍᓐᓇᖅᑐᑦ ᖃᑦᓯᐅᓂᖏᑦᑎᒍᑦ, ᐅᖁᒪᐃᓐᓂᖏᑦᑎᒍᑦ ᐊᓯᐊᒍᓪᓘᓐᓃᑦ ᓈᒻᒪᒋᔭᐅᔪᒃᑯᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐅᖃᐅᓯᐅᓂᐊᖅᓱᑎᓪᓗ:

(a)

ᐆᒪᔪᕐᓅᖓᔪᑦ ᐊᖑᔭᐅᒐᔪᑉᐸᑦᑐᓄᑦ ᑲᑎᒪᔨᖏᓐᓄᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ, ᑕᑯᓐᓇᕐᓗᒋᑦ ᓄᓇᓕᓐᓂ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ, ᐊᒻᒪᓗ

(b)

ᐆᒪᔪᕐᓅᖓᔪᑦ ᐊᖑᔭᐅᒐᔪᑉᐸᑦᑐᓄᑦ ᐊᑕᐅᓯᐅᓐᖏᑦᑐᓄᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓄᑦ, ᑐᑭᖏᑦ ᐊᕕᑦᑐᖅᓯᒪᔪᓂ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ.

5.6.18

ᓯᕗᓪᓕᖅᐹᒥ ᓇᓪᓕᐅᑎᑉᐸᑦ ᐱᒋᐊᖅᓯᒪᓕᖅᑎᓪᓗᒍ ᖃᐅᔨᓴᕐᓂᐅᔪᖅ ᑐᓐᖓᕕᒋᑦᓱᒍ ᐃᓚᖓ 5, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓴᖅᑮᓂᐊᖅᑐᑦ ᑲᑎᓪᓗᑎᒃ ᐊᖑᔭᐅᒍᓐᓇᖅᑐᓂᒃ ᐃᓄᓐᓄᑦ ᓄᓇᕗᒻᒥ ᐊᑕᐅᓯᕐᒥᒃ, ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 5.3.3 ᑎᑭᓪᓗᒍ 5.3.6 ᐃᓱᒪᑦᓴᖅᓯᐅᕈᑕᐅᓗᓂᓗ ᖃᐅᔨᔭᐅᔪᑦ ᖃᐅᔨᓴᕐᓂᒥᒃ ᐅᓪᓗᒥᒨᖓᔪᑦ ᐊᓯᖏᓪᓗ ᑐᓴᕋᑦᓴᐃᑦ ᐊᑐᐃᓐᓇᕆᔭᐅᔪᑦ. ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐋᖅᑭᖅᑕᐅᔪᖅ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᑦᑐᐊᔪᑦ ᑲᑎᑦᓱᑎᒃ ᐊᖑᔭᐅᓐᓇᖅᑐᓄᑦ ᑐᓐᖓᕕᖃᖅᑐᑦ 5.3.16-5.3.23. ᑭᖑᓂᖓᒍᑦ, ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᑲᒪᒋᔭᐅᓕᐅᒥᔮᖅᐸᓐᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᑖᓂ 5.6.16 ᐊᒻᒪ 5.6.17, ᐃᓱᒪᑦᓴᖅᓯᐅᕈᑎᖃᕐᓗᑎᒃ ᖃᐅᔨᔭᐅᔪᓂᒃ ᖃᐅᔨᓴᕐᓂᕐᒥᒃ ᐊᓯᖏᓐᓂᓪᓗ ᑐᓴᕋᑦᓴᓂᒃ ᐊᑐᐃᓐᓇᕈᖅᐸᓪᓕᐊᓂᖏᑦ ᒪᓕᓪᓗᒋᑦ.

5.6.19 - ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᓐᓂᕋᖅᑕᐅᔪᑦ

ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ ᓇᓗᓇᐃᖅᑕᐅᑉᐸᑕ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᖃᕐᓗᑎᒃ 5.6.16 ᐊᒻᒪᓗ 5.6.17, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐋᖅᑮᓂᐊᖅᑐᑦ ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᑦᑐᓂᒃ ᑐᓐᖓᕕᒋᓗᒍ ᐅᓇ ᐃᓚᖓ.

5.6.20

ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᓐᓂᕋᖅᑕᐅᔪᑦ ᓯᕗᓪᓕᐅᔾᔭᐅᒋᐊᓖᑦ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᓂ. ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᐊᔾᔨᓗᐊᖃᖅᐸᑕ ᐃᓄᐃᓴᓐᓂᖅᓴᐅᑉᐸᑕᓘᓐᓃᑦ ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᓐᓂᕋᖅᑕᐅᔪᓂᒃ, ᐃᓄᐃᑦ ᐱᔪᓐᓇᕐᓂᖃᖅᑐᑦ ᐊᑕᖏᖅᑐᓂᒃ ᐊᖑᔭᐅᒍᓐᓇᖅᑐᓂᒃ.

5.6.21

ᐊᑐᓂᑦ ᑲᑎᒪᐅᖅᑐᓄᑦ ᐊᑦᑐᐊᔪᓄᑦ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᓄᑦ ᐱᒋᐊᓕᖅᑎᓪᓗᒍ ᖃᐅᔨᕐᓴᓂᖅ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐋᖅᑮᓂᐊᖅᑐᑦ ᐊᓐᓇᐅᒪᔾᔪᑎᒋᓇᓱᐊᕐᓗᒋᑦ ᓈᒻᒪᑦᑐᓂᒃ ᑐᓐᖓᕕᖃᕐᓗᑎᒃ ᐅᑯᐊ ᓇᓕᐊᓐᓂᒃ:

(a)

ᑲᑎᑦᓱᑎᒃ ᐊᒥᓲᓂᖅᐸᐅᓂᖏᑦ ᐊᕐᕌᒎᑉ ᐃᓗᐊᓂ ᐊᖑᔭᐅᔪᑦ ᖃᐅᔨᓴᕐᓂᖅᑕᖃᖅᑎᓪᓗᒍ, ᐊᒻᒪᓗ ᖃᑦᓯᐅᒐᔪᓐᓂᖏᑦ ᐊᕐᕌᒍᒥ ᐊᖑᔭᐅᕙᑦᑐᑦ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓐᓂ ᖃᐅᔨᓴᕐᓂᕐᒥ, ᑲᑎᑦᑐᑦ ᒪᕐᕉᓕᖅᑎᑕᐅᑦᑕᖅᑯᑦ; ᐅᕝᕙᓗ

(b)

ᖃᑦᓯᐅᓂᖏᑦ ᐊᖑᔭᐅᔪᑦ ᐊᕐᕌᒎᑉ ᐃᓗᐊᓂ ᖃᐅᔨᓴᕐᓂᖅᑕᖃᖅᑎᓪᓗᒍ ᐅᖃᐅᓯᐅᔪᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐱᔭᕇᖅᑕᐅᑎᓪᓗᒍ ᖃᐅᔨᓴᕐᓂᖅ, ᐅᖃᐅᓯᐅᔪᕐᓗ ᐊᕐᕌᒍ ᐊᑑᑎᓂᐊᖅᑐᑦ ᐃᓗᓐᓇᖏᓐᓄᑦ ᐆᒪᔪᕐᓄᑦ ᐊᑦᑐᐊᔪᓄᑦ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᓄᑦ ᐱᒋᐊᓕᖅᑎᓪᓗᒍ ᖃᐅᔨᓴᕐᓂᖅ.

5.6.22

ᐋᖅᑮᓕᕈᑎᒃ ᖃᑦᓯᐅᖏᓐᓂᒃ ᐊᑖᓂ 5.6.21, ᐊᐅᓚᓂᐅᔪᖅ ᓇᓗᓇᐃᔭᖅᑕᐅᔪᖅ 5.6.21(a)-ᒥ ᐊᑐᖅᑕᐅᓂᐊᖅᑐᖅ ᐋᒡᒐᐅᒐᓗᐊᖅ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᓂᕈᐊᖅᐸᑕ ᑕᖅᑮᑦ 6 ᐃᓗᐊᓐᓂ ᐱᒋᐊᓚᐅᖅᑎᓪᓗᒍ ᖃᐅᔨᓴᕐᓂᐅᔪᖅ ᐊᑐᖅᑕᐅᓗᓂ ᐊᐅᓚᓂᐅᔪᖅ ᓇᓗᓇᐃᔭᖅᑕᐅᔪᖅ 5.6.21(b)-ᒥ.

5.6.23

ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᓴᖅᑭᖅᑕᐅᑉᐸᑕ ᐊᑦᑐᐊᔪᓄᑦ ᑲᑎᒪᐅᖅᑐᓄᑦ ᐊᑑᑎᓯᒪᓐᖏᑦᑐᒧᑦ ᑲᑎᑦᓱᑎᒃ ᐊᖑᔭᐅᒋᐊᓕᓐᓄᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐋᖅᑮᓂᐊᖅᑐᑦ ᐊᓐᓇᐅᒪᔾᔪᑕᐅᒋᐊᓕᓐᓂᒃ ᖁᑦᓯᓂᖅᓴᐅᔪᓂᒃ ᐅᑯᐊ ᓇᓪᓕᖏᓐᓂᒃ:

(a)

ᖃᑦᓯᐅᓂᖏᑦ ᑐᓐᖓᕕᖃᖅᓱᑎ ᑲᑎᖅᓱᖅᑕᐅᓯᒪᔪᓂᒃ ᐊᕐᕌᒍᓂ ᑕᓪᓕᒪᓂ ᖃᐅᔨᓴᕐᓂᐅᒋᐊᓐᖓᖅᓯᒪᔪᓂ, ᐋᖅᑭᑦᑕᐅᑦᓱᑎᒃ ᑐᓐᖓᕕᖃᖅᓱᑎᒃ ᐊᐅᓚᓂᐅᖁᔭᐅᔪᓂᒃ ᓇᓗᓇᔭᐃᖅᑕᐅᔪᒥᒃ 5.6.31(a)-ᒥ, ᐅᕝᕙᓗ, ᐊᖑᓇᓱᑦᑎᓄᑦ ᒥᑭᒋᐊᕐᓂᐊᖅᑎᓄᓪᓗ ᑲᑎᒪᔩᑦ ᓂᕈᐊᖅᓯᒪᑐᐊᖅᐸᑕ ᐊᐅᓚᓂᐅᔪᒥᒃ ᓇᓗᓇᐃᔭᖅᑕᐅᔪᒥᒃ 5.6.21(b)-ᒥ, ᐊᖑᔭᐅᒍᓐᓇᖅᑐᑦ ᖃᑦᓯᐅᓂᖏᓐᓂᒃ ᑲᑎᒪᐅᖅᑐᓂ ᓇᓗᓇᐃᖅᑕᐅᓯᒪᔪᒥ ᐊᕐᕌᒍᒥ; ᐅᕝᕙᓗ

(b)

ᐊᒥᓲᓂᖅᓴᐃᑦ ᐊᒥᓲᓂᖅᐹᓂᒃ ᐊᖑᔭᐅᓯᒪᔪᓂᒃ ᓇᓪᓕᑐᐃᓐᓇᖏᓐᓂ ᐊᕐᕌᒍᐃᑦ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓂ ᓯᕗᕐᖓᓂ ᐅᖃᐅᓯᐅᓯᒪᓂᖓᑕ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᐊᒻᒪᓗ ᖃᑦᓯᐅᓂᖏᓐᓂᒃ ᐆᒪᔪᖅᑕᐅᒐᔪᖃᑦᑕᖅᓯᒪᔪᖅ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓂ ᖃᐅᔨᓴᖅᑕᐅᑎᓪᓗᒋᑦ, ᐊᒥᓲᓂᖅᓴᐃᑦ ᒪᕐᕈᐊᑎᓪᓗᐊᖅᑕᐅᑕᖅᑯᑦ.

5.6.24

ᐋᖅᑭᑦᓱᐃᓕᕈᑎᒃ 5.6.23(b) ᐊᑖᓂ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓱᖏᖅᑑᑎᖃᕐᓂᐊᖅᑐᑦ ᓇᓗᓇᐃᕈᑎᑦᓴᑦᓯᐊᕙᐅᓂᖅᐹᓂᒃ ᖃᑦᓯᐅᓂᖏᓐᓄᑦ ᐊᖑᔭᐅᒍᓐᓇᖅᑐᑦ ᐃᓄᓐᓄᑦ ᐊᕐᕌᒍᐃᑦ ᑕᓪᓕᒪᑦ ᓯᕗᕐᖓᓂ ᓴᖅᑭᖅᑕᐅᓂᖏᑦᑕ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ.

5.6.25

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓴᖅᑮᓂᐊᖅᑐᑦ ᐊᓐᓇᐅᒪᔾᔪᑕᐅᒋᐊᓕᓐᓂᒃ ᕿᓚᓗᒐᕐᓄᑦ, ᑑᒑᓕᓐᓄᑦ ᐊᐃᕕᕐᓄᓪᓗ ᑕᖅᑮᑦ 12 ᐃᓗᐊᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᑦ ᓴᖅᑭᖅᑕᐅᓚᐅᖅᑎᓪᓗᒋᑦ ᐃᓱᒪᒋᔭᐅᖃᓯᐅᑎᓗᑎᒃ ᐊᒥᒐᖅᓯᒋᐊᒥᒃ ᐃᓚᖏᓐᓂ ᑕᐃᒪᐃᓐᓂᖓᓄᓪᓗ ᐊᖑᔭᐅᔪᑦ ᐃᓄᓐᓄᑦ ᐃᓄᐃᓴᑦᑑᖃᑦᑕᖅᓯᒪᒻᒪᑕ ᐊᑦᑐᐊᓂᖏᓐᓄᑦ ᐊᓐᓇᐅᒪᔾᔪᑎᒋᒋᐊᓕᖏᓐᓄᑦ ᑕᑯᑦᓴᐅᑎᑦᓯᖏᑦᑐᖅ ᐊᖏᖅᑐᓂᒃ ᐱᒋᐊᓕᒐᓗᐊᖏᓐᓂᒃ.

5.6.25

ᐋᖅᑭᒋᐊᖅᑕᐅᔪᑦ P.C. 1996-1462 ᓯᑦᑕᕝᕙ 17, 1996

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓴᖅᑮᓂᐊᖅᑐᑦ ᐊᓐᓇᐅᒪᔾᔪᑕᐅᒋᐊᓕᓐᓂᒃ ᕿᓚᓗᒐᕐᓄᑦ, ᑑᒑᓕᓐᓄᑦ, ᐊᐃᕕᕐᓄᓪᓗ ᒫᑦᓯ 31, 1997; ᐃᓱᒪᒋᔭᖃᓯᐅᑎᓪᓗᑎᒃ ᐊᒥᒐᖅᓯᒋᐊᒥᒃ ᐃᓚᖏᓐᓂ ᑕᐃᒪᐃᓂᖓᓐᓄᓪᓗ ᐊᖑᔭᐅᔪᑦ ᐃᓄᓐᓄᑦ ᐃᓄᐃᓴᑦᑑᖃᑦᑕᖅᓯᒪᒻᒪᑕ ᐊᑦᑐᐊᓂᖏᓐᓄᑦ ᐊᓐᓇᐅᒪᔾᔪᑎᒋᒋᐊᓕᖏᓐᓄᑦ ᑕᑯᑦᓴᐅᑎᑦᓯᒍᑕᐅᖏᑦᑐᑦ ᐊᑕᖏᖅᑐᓂᒃ ᐱᒋᐊᓕᒐᓗᐊᖏᓐᓂᒃ.

5.6.26 - ᐋᖅᑭᐊᖅᓯᒪᔪᑦ ᐊᓐᓇᐅᒪᔾᔪᑕᐅᒋᐊᓕᓐᓄᑦ ᓈᒻᒪᑦᑐᕆᔭᐅᔪᑦ

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᕿᒥᕐᕈᓕᐅᒥᔮᖅᐸᓐᓂᐊᖅᑐᑦ ᐊᓐᓇᐅᒪᔾᔪᑕᐅᒋᐊᓕᓐᓂᒃ ᐊᑐᓂᑦ ᑲᑎᒪᐅᖅᑐᓄᑦ ᓇᓗᓇᐃᖅᓯᓗᑎᓪᓗ ᕐᑳᖓᒍᑦ ᐃᓚᒋᐊᒃᑲᓐᓂᕆᐊᖃᕐᒪᖔᑕ ᓈᒻᒪᑦᓯᖁᓪᓗᒋᑦ ᐅᑯᐊ:

(a)

ᐊᒥᓱᓐᖑᐹᓪᓕᖅᐸᑕ ᓂᕆᔭᐅᕙᓐᓂᖏᑦ ᐊᑐᖅᑕᐅᕙᓐᓂᖏᓪᓗ ᐃᓄᓐᓄᑦ;

(b)

ᓄᓇᓕᓐᓄᑦ ᑕᐅᖅᓰᖃᑦᑕᐅᑎᓂᖅ; ᐊᒻᒪᓗ

(c)

ᓂᐅᕕᐊᑦᓴᖃᕐᓂᖅ ᓂᕿᐅᓂᐊᖅᑎᓪᓗᒋᑦ ᐊᑐᖅᑕᐅᓂᐊᖅᑎᓪᓗᒋᓪᓘᓐᓃᑦ ᓄᓇᕗᒻᒥ.

5.6.27

ᑎᑭᐅᑎᒍᑎᒃ ᐋᖅᑭᑦᑕᒥᓐᓄᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐃᓱᒪᖃᖃᓯᐅᑎᓂᐊᖅᑐᑦ ᐅᑯᓇᓐᖓᑦ:

(a)

ᐊᒥᓱᓐᖑᐸᓪᓕᐊᓂᖏᓐᓂᒃ ᓄᑦᑕᕐᓂᖏᓐᓂᓪᓗ ᓄᓇᓕᓐᓂ ᐊᕕᑦᑐᖅᓯᒪᔪᓂᓗ, ᐱᖃᓯᐅᑎᑦᓱᑎᒃ ᓴᖅᑭᖅᑕᐅᓂᖏᑦ ᓄᓇᓕᑦᑖᖅᑲᐅᑦ;

(b)

ᐊᓯᔾᔨᐸᓪᓕᐊᓂᖏᑦ ᓂᕆᔭᐅᓂᕆᕙᑦᑕᖏᑦᑕ, ᑐᓂᔭᐅᓂᖏᑦᑕ ᐊᓯᐊᒍᓪᓗ ᐊᑐᖅᑕᐅᓂᖏᑦᑎᒍᑦ ᐱᖃᓯᐅᑎᑦᓱᑎᒃ ᐋᖅᑭᒋᐊᖅᑕᐅᓂᐅᔪᑦ ᓄᓇᓕᓐᓄᑦ ᑕᐅᖅᓰᖃᑦᑕᐅᑎᓂᕐᒨᖓᔪᑦ ᓂᐅᕕᐊᑦᓴᖃᕐᓂᕐᒧᓪᓗ ᓄᓇᕗᒻᒥ.

(c)

ᓂᕿᐅᓂᖏᓐᓄᑦ ᐱᖅᑯᓯᕐᒧᓪᓗ ᐱᒻᒪᕆᐅᓂᖏᓐᓄᑦ ᐆᒪᔪᐃᑦ ᐃᓄᓐᓄᑦ;

(d)

ᐊᔾᔨᒌᓐᖏᓐᓂᖏᓂᒃ ᐊᑐᐃᓐᓇᐅᓂᖏᑦᑕ ᐆᒪᔪᐃᑦ ᐊᓯᖏᑦ ᐆᒪᔪᐃᑦ ᐃᓱᒪᑦᓴᖅᓯᐅᕈᑕᐅᔪᑦ; ᐊᒻᒪᓗ

(e)

ᒫᓐᓇ ᐊᑐᖅᑕᐅᓂᕆᕙᑦᑕᖏᑦ ᐆᒪᔪᐃᑦ ᓇᒻᒥᓂᖅ ᓂᕆᔭᐅᕙᓐᓂᖏᓐᓄᑦ ᐊᓯᖏᓐᓄᑦ ᓄᓇᖃᖃᑕᐅᔪᓄᑦ ᑕᑯᓐᓇᕐᓗᒋᑦ ᖃᓄᑎᒋ ᓄᓇᖃᖃᑕᐅᓯᒪᓂᕆᓕᖅᑕᖏᑦ.

5.6.28

ᕿᒥᕐᕈᓂᖓᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓇᓗᓇᐃᖅᓯᒍᑕᐅᑉᐸᑦ ᐋᖅᑭᒋᐊᖅᑐᖃᕆᐊᖃᕆᐊᖓ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐋᖅᑮᓂᐊᖅᑐᑦ ᐋᖅᑭᒋᐊᖅᓯᒪᔪᓂᒃ ᐊᓐᓇᐅᒪᔾᔪᑕᐅᒋᐊᓕᓐᓂᒃ.

5.6.29

ᐋᖅᑭᒋᐊᖅᓯᒪᔪᑦ ᐊᓐᓇᐅᒪᔾᔪᑕᐅᒋᐊᓖᑦ ᐊᖏᓪᓕᒋᐊᑐᐃᓐᓇᕆᐊᓖᑦ ᐊᑕᖏᕐᓗᑎᒃ ᑲᑎᓪᓗᑎᒃ ᐊᖑᔭᐅᒍᓐᓇᖅᑐᓄᑦ. ᓇᓪᓕᑐᐃᓐᓇᖏᓐᓂᒃ ᐊᕐᕌᒍᐃᑦ ᐋᖅᑭᒋᐊᖅᓯᒪᔪᑦ ᐊᓐᓇᐅᒪᔾᔪᑕᐅᒋᐊᓖᑦ ᖁᒻᒧᐊᑐᐃᓐᓇᕆᐊᓕᒃ ᐊᒻᒧᐊᓪᓗᓂᓘᓐᓃᑦ, ᑭᓯᐊᓂ ᐊᑖᓅᓚᐅᖅᓯᒪᔾᔮᖏᑦᑐᑦ ᐊᓐᓇᐅᒪᔾᔪᑕᐅᒋᐊᓖᑦ.

5.6.30

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᕿᒥᕐᕈᓕᐅᒥᔮᖃᑦᑕᕐᓂᐊᖅᑐᑦ ᑲᑎᒪᐅᖅᑐᓂᒃ ᑕᐃᒪᐃᖁᔭᐅᒐᐃᒍᑎᒃ ᒥᓂᔅᑕᒧᑦ, ᐊᖑᓇᓱᑦᑏᑦ ᒥᑭᒋᐊᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐅᕝᕙᓘᓃᑦ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ, ᐅᕝᕙᓗ ᑲᑎᒪᔨᐅᖃᑕᐅᔪᒧᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.6.31 - ᐊᒥᐊᒃᑯᐃᑦ

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓇᓗᓇᐃᖅᓯᓂᐊᖅᑐᑦ ᑐᓂᐅᖅᑲᖅᑕᐅᓂᖏᓐᓂᒃ ᐊᒥᐊᒃᑯᐃᑦ ᐃᒪᐃᓕᖓᑎᓪᓗᒋᑦ ᓯᕗᓪᓕᐅᑎᔭᐅᓂᖏᑦ:

(a)

ᐊᑐᐃᓐᓇᐅᑎᑦᓯᓗᑎᒃ ᐃᒻᒥᓄᑦ ᓂᕆᔭᑦᓴᐅᑎᓪᓗᒋᑦ ᐊᓯᖏᓐᓄᑦ ᓄᓇᖃᖃᑕᐅᔪᓄᑦ ᓇᓗᓇᐃᔭᖅᓯᒪᓂᖏᑦ ᒪᓕᓪᓗᒋᑦ 5.6.32-ᒥ ᑎᑭᓪᓗᒍ 5.6.37;

(b)

ᑲᔪᓯᑎᑦᓯᓗᑎᒃ ᖁᕕᐊᒋᓪᓗᒍ ᐊᖑᓇᓱᑉᐸᑦᑐᓂᒃ ᐊᓯᖏᓐᓂᓪᓗ ᑮᓇᐅᔭᓕᐅᕐᓂᕐᒧᑦ ᐊᐅᓚᓂᐅᔪᓂᒃ ᓇᓗᓇᐃᔭᖅᑕᐅᓯᒪᓂᖏᑦ ᒪᓕᓪᓗᒋᑦ 5.6.38-ᒥ;

(c)

ᖃᑭᒪᓇᓱᐊᕐᓂᒧᑦ ᐊᐅᓚᓂᖃᖅᑎᑦᓯᓗᑎᒃ ᑎᒍᒥᐊᖅᑕᐅᓗᑎᒃ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ ᓇᓗᓇᐃᔭᖅᑕᐅᓯᒪᓂᖏᑦ 5.6.39 ᒪᓕᓪᓗᒋᑦ; ᐊᒻᒪᓗ

(d)

ᐱᕕᖃᖅᑎᑦᓯᓗᑎᒃ ᐊᓯᐊᒍᑦ ᐊᑐᖅᑕᐅᓂᖏᓐᓂᒃ ᓇᓗᓇᐃᔭᖅᑕᐅᓯᒪᓂᖏᑦ ᒪᓕᓪᓗᒋᑦ 5.6.40-ᒥ.

5.6.32 - ᐊᓯᖏᑦ ᓄᓇᖃᖃᑕᐅᔪᑦ

ᐊᒥᐊᒃᑯᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓂᓯᖅᑳᓂᐊᖅᑐᑦ ᐃᓚᖓᓂᒃ ᓂᕿᒋᔭᐅᓂᐊᖅᑎᓪᓗᒋᑦ ᐊᓯᖏᓐᓄᑦ ᓄᓇᖃᖃᑕᐅᔪᑦ.

5.6.33

ᓇᒻᒥᓂᖅ ᓂᕿᖃᕐᓂᖅ ᐊᓯᖏᓐᓄᑦ ᓄᓇᖃᖃᑕᐅᒧᑦ ᑐᑭᓕᒃ ᓂᕆᔭᐅᕙᑦᑐᑦ ᐊᓯᖏᓐᓄᑦ ᓄᓇᖃᖃᑕᐅᔪᓄᑦ ᓄᓇᕗᒻᒥ ᒪᑭᒪᔭᖏᓐᓄᓘᓐᓃᑦ.

5.6.34

ᑐᓂᐅᖅᑲᖅᑕᐅᔪᑦ ᓄᓇᖃᖃᑕᐅᔪᓄᑦ ᑎᑭᐅᒪᓂᐊᖅᑐᑦ 14%-ᖏᓐᓄᑦ ᖃᑦᓯᐅᓂᖏᑦᑕ ᐊᒥᐊᒃᑯᐃᑦ ᑐᓂᐅᖅᑲᖅᑕᐅᓚᐅᖅᑎᓪᓗᒋᑦ ᐊᓐᓇᐅᒪᔾᔪᑕᐅᒋᐊᓖᑦ.

5.6.35

ᓇᓪᓕᑐᐃᓐᓇᖏᓐᓂᒃ ᐊᕐᕌᒍᐃᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᖏᓪᓕᒋᐊᕆᒍᓐᓇᖅᑐᑦ ᑐᓂᔭᐅᔪᓂᒃ ᓄᓇᖃᖃᑕᐅᔪᓄᑦ ᓂᕆᔭᑦᓴᕆᓂᐊᖅᑕᖏᓐᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓯᕗᓪᓕᐅᑎᒋᐊᓕᓐᓂᒃ ᑲᒪᓚᐅᖅᑎᓪᓗᒋᑦ ᖃᑭᒪᓇᓱᐊᕐᓂᕐᒨᖓᔪᓂᒃ ᑎᒍᒥᐊᖅᑕᐅᔪᓂᒃ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ ᓇᓗᓇᐃᔭᖅᑕᐅᓯᒪᓂᖏᑦ ᒪᓕᓪᓗᒋᑦ 5.6.39-ᒥ.

5.6.36

ᑐᓂᐅᖅᑲᕋᑦᓴᐃᑦ ᐊᓯᖏᓐᓄᑦ ᓄᓇᖃᖃᑕᐅᔪᑦ ᐋᖅᑭᑦᑕᐅᓯᒪᓕᖅᐸᑕ, ᑐᑭᖏᑦ ᐊᑐᐃᓐᓇᖃᕐᓂᐅᑉ ᑐᓂᔭᐅᔪᓂᒃ ᓇᓗᓇᐃᔭᖅᑕᐅᓂᐊᖅᑐᑦ ᐊᐅᓚᑕᐅᓂᐊᖅᓱᑎᓪᓗ ᑖᒃᑯᓄᖓᓪᓗᐊᖅ ᒐᕙᒪᒃᑯᑦ ᑎᒥᖁᑎᖏᓐᓄᑦ.

5.6.37

ᐊᖑᓇᓱᓐᓂᖅ ᐃᓄᒻᒧᑦ ᐊᓯᐊᓄᑦ ᐃᓄᓪᓚᕆᐅᑉ ᑐᓐᖓᕕᖃᕐᓂᐊᖅᑐᖅ ᐆᒪᓐᖓᑦ ᐃᓛᒃᑰᖅᑐᒥᒃ ᒪᓕᒐᓕᒫᓂᓪᓗ ᐊᑦᑐᐊᔪᓂᒃ ᐃᓘᓐᓇᐃᓐᓄᑦ ᐊᑦᑐᐊᔪᓄᑦ.

5.6.38 - ᑕᕝᕙᐅᒌᖅᑐᑦ ᐊᖑᓇᓱᑦᑎᓄᑦ ᖁᕕᐊᒋᓪᓗᒍ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐊᐅᓚᓂᐅᔪᑦ

ᐃᓚᖓᓂᒃ, ᐱᑕᖃᖅᐸᑦ, ᐊᒥᐊᒃᑯᒋᔭᐅᔪᓂᒃ ᑐᓂᐅᖅᑲᖅᑕᐅᓚᐅᖅᑎᓪᓗᒋᑦ ᑕᕝᕙᐅᒌᖅᑐᓄᑦ ᖁᕕᐊᒋᓪᓗᒍ ᐊᓯᕙᖅᓯᓄᖅ ᐊᓯᖏᓐᓄᓪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᓂᐅᔪᓄᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓂᓯᓂᐊᖅᑐᑦ ᐃᓚᖓᓂᒃ ᓈᒻᒪᑦᑐᓂᒃ ᑲᔪᓯᒍᑎᑦᓴᐅᓗᓂ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᐊᓯᖏᓐᓄᓪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᓂᐅᔪᓄᑦ ᒪᓕᒐᖅᑎᒍᑦ ᐱᔪᓐᓇᕐᓂᖃᖅᑎᑕᐅᒋᐊᓕᓐᓄᑦ ᐊᒥᐊᒃᑯᐃᑦ ᑐᓂᐅᖅᑲᖅᑕᐅᑎᓪᓗᒋᑦ.

5.6.39 - ᓯᕗᓪᓕᐅᔾᔭᐅᔪᑦ ᐊᖑᓇᓱᑦᑕᐅᒍᓐᓇᖅᑐᑦ ᐃᓄᐃᑦ ᑎᒥᖁᑎᖏᓐᓄᑦ

ᐃᓚᖓᓂᒃ ᐊᒥᐊᒃᑯᐃᑦ ᑐᓂᐅᖅᑲᖅᑕᐅᓚᐅᖅᑎᓪᓗᒋᑦ ᑕᕝᕙᐅᔪᓄᑦ ᐊᖑᓇᓱᑦᑎᓄᑦ ᖁᕕᐊᒋᓪᓗᒍ ᐊᓯᖏᓐᓄᓪᓗ ᑮᓇᐅᔭᓕᐅᓂᕐᒧᑦ ᐊᐅᓚᓂᐅᔪᓄᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓂᓯᓂᐊᖅᑐᖅ ᐆᒪᔪᕐᓂᒃ ᐃᑲᔪᖅᓯᒍᑕᐅᓗᑎᒃ ᓴᖅᑭᖅᑕᐅᓂᖏᓐᓄᑦ ᑲᔪᓯᓂᖏᓐᓄᓪᓗ ᐊᐅᓚᓂᖏᑦᑕ ᖃᑭᒪᓇᓱᐊᕈᑕᐅᔪᑦ, ᐱᖃᓯᐅᑎᑦᓱᑎᒃ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᐊᓯᓕᒫᖏᓪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᓂᐅᔪᑦ, ᐊᖅᑭᑦᑕᐅᓯᒪᔪᑦ ᐱᕚᓪᓕᕈᑕᐅᓂᐊᖅᑎᓪᓗᒋᑦ ᐃᓄᓐᓄᑦ. ᑖᒃᑯᐊ ᐊᐅᓚᓂᐅᔪᑦ ᑎᒍᒥᐊᖅᑕᐅᒋᐊᓖᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑎᓪᓗ ᑲᑐᔾᔨᖃᑎᒌᖏᓐᓂᒃ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓂᒃ.

5.6.40 - ᑐᓂᐅᔭᐅᓂᖏᑦ ᐊᒥᐊᒃᑯᐃᑦ

ᓱᓕ ᐊᒥᐊᒃᑯᐃᑦ ᐊᒥᐊᒃᑯᖃᖅᐸᑕ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑐᓂᓯᓂᐊᖅᑐᑦ ᐊᒥᐊᒃᑯᓂᒃ ᑮᓇᐅᔭᓕᐅᕈᑎᓄᑦ, ᑮᓇᐅᔭᓕᐅᕈᑎᓄᑦ ᐊᖑᓇᓱᑦᑎᓄᑦ, ᐱᓐᖑᐊᕐᓂᕐᒧᑦ, ᐊᓯᖏᓐᓄᓪᓗ ᐊᑐᕐᓂᖏᓐᓄᑦ, ᐃᓱᒪᒋᓗᒋᑦ ᐊᔾᔨᒌᓐᖏᑦᑐᑦ ᑭᓐᖒᒪᒋᔭᐅᔪᑦ ᓂᕿᓅᖓᔪᑦ ᐱᕚᓪᓕᕈᑕᐅᔪᓪᓗ ᓄᐊᑦᓱᓐᓇᖅᑐᑦ ᓄᓇᓕᓐᓂ ᖃᑭᒪᓇᓱᐊᕐᓂᕐᒧᑦ. ᐊᒥᐊᒃᑯᐃᑦ ᑐᓂᔭᐅᔪᑦ ᑮᓇᐅᔭᓕᐅᕈᑕᐅᓂᐊᖅᑎᓪᓗᒋᑦ ᐊᐅᓚᑕᐅᓂᐊᖅᑐᑦ ᑭᓪᓕᖃᕐᓗᑎᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖑᓇᓱᓐᓂᐅᔪᑦ ᓇᓗᓇᐃᔭᖅᑕᐅᓯᒪᔪᑦ 5.6.45-ᒥᒃ 5.6.47-ᒧᑦ.

5.6.41 - ᐃᓄᐃᑦ ᖃᐅᔨᒪᓕᑕᐃᑦ

ᐃᓄᒃ ᐊᓯᐊ ᐃᓄᓪᓚᕆᐅᑉ ᐊᖑᓇᓱᐊᖅᑐᑦ ᐆᒪᔪᐸᐅᔭᕐᓂᒃ ᐃᒪᐃᑦᓴᕆᐊᓖᑦ:

(a)

ᐊᑐᖅᑐᒥᒃ ᓚᐃᓴᓐᓯᖃᕐᓗᓂ ᑐᓂᔭᐅᓯᒪᓗᓂ ᑖᒃᑯᓄᖓᓪᓗᐊᖅ ᒐᕙᒪᒃᑯᑦ ᑎᒥᖓᓐᓄᑦ; ᐊᒻᒪᓗ

(b)

ᐊᕐᕌᒎᒃ ᒪᕐᕉᒃ ᐊᑖᓂᐅᓐᖏᑦᑐᖅ ᑭᖑᓂᖓᓂ ᓚᐃᓴᓐᓯᑖᓚᐅᕐᓗᓂ, ᐊᐃᑉᐸᖃᕐᓗᓂ ᐃᓄᒻᒥᒃ ᐊᖏᑦᑕᐅᓯᒪᔪᒥᒃ ᖃᐅᔨᒪᓕᑕᐅᓂᐊᖅᑎᓪᓗᒍ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᒪᓕᓪᓗᑎᒃ ᐱᔪᓐᓇᕐᓂᐅᒋᐊᓕᓐᓂᒃ ᓴᖅᑭᖅᑕᐅᓯᒪᔪᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.6.42

ᖃᐅᔨᒪᓕᑕᖃᕆᐊᖃᕐᓂᖅ ᐅᖃᐅᓯᐅᔪᖅ 5.6.4(b)-ᒥ ᐊᑑᑎᔾᔮᖏᑦᑐᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑕᐃᒪᐃᑦᓴᕆᐊᖃᓐᖏᓐᓂᕋᐃᑉᐸᑕ ᐅᕝᕙᓗ ᖃᐅᔨᒪᓕᑕᑦᓴᓂᒃ ᐊᖏᖅᑕᐅᓯᒪᔪᖃᓐᖏᑉᐸᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓄᑦ.

5.6.43 - ᓄᑦᑎᕐᓂᖅ ᓄᓇᕗᒻᒧᑦ

ᑲᓇᑕᒥᐅᓕᒫᑦ ᐊᒻᒪᓗ ᓄᓇᖃᖃᑕᐅᔪᑐᖃᐅᔪᑦ ᑐᑭᖓᑕ ᐃᓗᐊᓂ ᓄᑦᑎᐸᑦᑐᓄᑦ ᓄᓇᖃᕆᐊᖅᑐᓕᖅᑐᓄᑦ ᒪᓕᒐᕐᔪᐊᕐᒥ ᐃᒪᐃᑦᑐᑦ:

(a)

ᓄᓇᖃᖃᑕᐅᓯᒪᓗᑎᒃ ᓄᓇᕗᒻᒥ ᑕᖅᑭᓂᒃ 18-ᓂᒃ ᓯᕗᕐᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᐅᕝᕙᓗ

(b)

ᓄᓇᖃᖃᑕᐅᓯᒪᒍᓂ ᐊᓯᖏᓐᓂ ᓄᓇᑦᓯᐊᕐᒥ ᑕᖅᑭᓂᒃ 18-ᓂᒃ ᓯᕗᕐᖓᓂ ᐅᓪᓗᖅ ᐊᖏᕈᑕᐅᓂᖓᑕ ᐊᖏᕈᑎᐅᑉ ᓄᓇᖃᖃᑕᐅᓕᖅᓯᒪᓗᓂᓗ ᓄᓇᕗᒻᒥ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓐᓂ ᐅᓪᓗᖓᓂᒃ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᐊᖑᓇᓱᒍᓐᓇᖅᑐᑦ ᐃᖃᓗᒐᓱᐊᕈᓐᓇᖅᓱᑎᓪᓗ ᓄᓇᕗᒻᒥ ᓄᓇᖃᖃᑕᐅᓯᒪᒋᐊᒃᑲᓐᓂᕆᐊᑐᓐᖏᓪᓗᓂ ᐋᒡᒐᐅᒐᓗᐊᖅ ᐱᔪᓐᓇᐃᓪᓕᑎᑕᐅᒐᔭᕐᓂᖅᐸᑦ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓅᖓᔪᑦ.

5.6.44 - ᐊᖑᓇᓱᒍᓐᓇᐅᑎᓂᒃ ᓚᐃᓴᓐᓯᓖᑦ

ᐱᕕᖃᖅᑎᑕᐅᒍᓐᓇᖅᓯᒋᐊᖃᑐᐃᓐᓇᕆᐊᓖᑦ ᐃᓄᐃᑦ ᑕᐃᔭᐅᔪᑦ 5.6.13(b)-ᒥ ᐊᓯᓂ ᓄᓇᖃᕆᐊᖃᑐᐃᓐᓇᕆᐊᓖᑦ ᐊᖑᓇᓱᓐᓂᕐᒥᓂ ᒥᖅᑯᓕᓐᓂᒃ. ᑕᐃᒪᐃᓐᓂᖓᓄᑦ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐱᕕᓕᒫᕐᒥᒍᑦ ᐊᑲᕐᕆᑎᑦᓯᒋᐊᕆᐊᓖᑦ ᑕᒪᑦᓱᒧᖓ.

5.6.45 - ᑭᓪᓕᖃᖅᑎᑕᐅᓂᖏᑦ ᐃᑎᕈᓐᓇᕐᓂᕐᒧᑦ ᐊᐅᓚᓂᖅ

ᓂᐅᖅᑲᖅᑕᐅᓂᖏᓐᓄᑦ ᑮᓇᐅᔭᓕᐅᕋᓱᐊᕈᑎᑦᓴᓄᑦ ᓚᐃᓴᓐᓰᑦ, ᐅᑯᐊ ᓂᕈᐊᖅᑕᐅᓂᐅᓴᓂᖅᓴᐅᓂᐊᖅᑐᑦ:

(a)

ᑐᑦᓯᕋᖅᑐᖅ ᓄᓇᓕᓪᓗᐊᑕᐅᔪᖅ ᓄᓇᕗᒻᒥ ᑕᖅᑭᓂᒃ 18-ᓂᒃ ᑲᔪᓯᓚᐃᓐᓇᖅᑐᓂᒃ ᓯᕗᕐᖓᓂ ᑐᑦᓯᕋᐅᑎᖓᑕ ᓄᓇᖃᓪᓚᕆᒋᐊᓕᒃ ᐃᓱᒪᒃᑯᑐᐃᓐᓇᐅᓐᖏᑦᑐᖅ; ᐊᒻᒪᓗ

(b)

ᑐᑦᓯᕋᖅᑐᑦ ᑐᕋᐃᓐᓇᖅᑐᓂᒃ ᐱᕚᓪᓕᕈᑎᖃᖅᑎᑦᓯᓂᐅᓴᑐᐃᓐᓇᖅᑐᑦ ᓄᓇᕗᒻᒥ ᖃᑭᒪᓇᓱᐊᓂᕐᒧᑦ, ᐱᓗᐊᖅᑐᒥᒃ ᐃᖅᑲᓇᐃᔭᖅᑎᑕᐅᓂᖏᑦᑎᒍᑦ ᓄᓇᓕᓪᓚᕇᑦ ᐊᒻᒪᓗ ᖃᑭᒪᓇᓱᐊᕈᑎᑦᓴᑎᒍᑦ.

5.6.46

ᑭᓪᓕᖃᖅᑎᑕᐅᓂᖏᑦ ᐃᑎᕈᓐᓇᕐᓂᕐᒧᑦ ᐊᐅᓚᓃᑦ ᑐᕌᒐᖃᓐᖏᑦᑐᖅ ᐃᓚᐃᓐᓈᓂᕐᒥᒃ ᐃᓄᓐᓂᒃ ᑐᑦᓯᕋᕐᓂᕐᒧᑦ ᑮᓇᐅᔭᓕᐅᕋᓱᐊᕈᑎᑦᓴᓂᒃ, ᑭᓯᐊᓂ ᐃᓄᐃᑦ ᑕᐃᒫᑦᓴᐃᓐᓇᖅ ᐱᔪᓐᓇᕐᓂᖃᕐᓂᐊᖅᑐᑦ ᑐᑦᓯᕋᕈᓐᓇᕐᓂᕐᒥᒃ ᑭᓇᓕᒫᖅᑎᑐᑦ ᐱᔪᓐᓇᑐᐊᕈᑎᒃ ᑐᑦᓯᕋᐅᑎᖏᓪᓗ ᐃᓱᒪᑦᓴᖅᓯᐅᕈᑕᐅᓂᐊᖅᑐᑦ ᐱᔪᑦᓴᐅᓂᕆᔭᖏᑦ ᑐᓐᖓᕕᐅᓗᑎᒃ.

5.6.47

ᑮᓇᐅᔭᓕᐅᕋᓱᐊᕐᓂᕐᒧᑦ ᓚᐃᓴᓐᓯ ᑐᓂᔭᐅᔪᖅ ᐊᑖᓂ ᑭᓪᓕᖃᖅᑎᑕᐅᓂᖏᑦ ᐃᑎᕈᓐᓇᕐᓂᕐᒧᑦ ᐊᐅᓚᓂᐅᔪᑦ ᐅᖓᑖᓅᕆᐊᖃᓐᖏᑦᑐᖅ ᐊᕐᕌᒍᐃᑦ ᐱᖓᓱᑦ.

5.6.48 - ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᑦ

ᑐᓐᖓᕕᒋᓗᒋᑦ ᖃᓄᐃᓕᖓᓂᐅᔪᑦ ᐅᕙᓂ ᐃᓛᒃᑰᖅᑐᒥ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐱᔪᓐᓇᕐᓂᓕᑑᕐᓂᐊᖅᑐᑦ ᓴᖅᑮᓂᕐᒧᑦ, ᐋᖅᑭᒋᐊᕆᓂᕐᒧᑦ ᐲᖅᓯᓂᕐᒧᓪᓘᓐᓃᑦ, ᑕᐃᒪᐃᑦᓴᕆᐊᖃᕋᐃᒍᑎᒃ, ᑰᑕᖃᓐᖏᑦᑐᓂᒃ ᑭᓪᓕᓕᐅᕆᓂᖅ ᐊᖑᓇᓱᑦᑕᐅᔪᓄᑦ ᓄᓇᕗᒻᒥᒃ.

5.6.49

ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᔾᔨᒌᓐᖏᑎᑦᓯᒍᓐᓇᖅᑐᑦ ᐃᓄᓐᓂᒃ ᐊᖑᓱᓇᑦᑎᓐᓂᒃ ᐊᓯᖏᓐᓂᓪᓗ ᐊᖑᓇᓱᑦᑎᓂᒃ ᓴᖅᑮᓕᕈᑎᒃ ᐲᖅᓯᓕᕈᑎᓪᓘᓐᓃᑦ ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᓂᒃ, ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᑦ ᐃᓄᓐᓄᑦ ᐊᖑᓇᓱᑦᑐᓄᑦ ᐱᓂᖅᓴᐅᔾᔮᖏᑦᑐᑦ ᑭᓪᓕᒋᔭᖏᓐᓂᒃ ᐊᓯᖏᑦᑕ ᐊᖑᓇᓱᑦᑏᑦ.

5.6.50

ᑰᑕᑲᓐᖏᑦᑐᓄᑦ ᑭᓪᓕᒋᔭᐅᔪᑦ ᓴᖅᑭᖅᑕᐅᔪᑦ ᐃᓄᓐᓄᑦ ᐱᔾᔪᑎᖃᑦᓯᐊᖏᓪᓗᑎᒃ ᓄᖅᑲᖓᑎᑦᓯᒋᐊᖃᓐᖏᑦᑐᑦ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᓂᒃ.

5.6.51

ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᑦ ᐊᖑᓇᓱᓐᓂᕐᒨᖓᔪᑦ ᐊᑑᑎᔪᑦ ᐅᓪᓗᖓᓗᓂ ᐊᖏᕈᑕᐅᓂᖓᑕ ᐊᖏᕈᑎᐅᑉ ᓴᖅᑭᖅᑕᐅᓯᒪᔪᑎᑐᑦ ᑕᑯᓐᓇᖅᑕᐅᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ, ᐊᑐᖏᓐᓇᕐᓂᐊᖅᓱᑎᓪᓗ ᐲᖅᑕᐅᖏᓐᓂᖏᓐᓂ ᐅᕝᕙᓗ ᐋᖅᑭᒋᐊᖅᑕᐅᖏᓐᓂᖏᓐᓂ ᑐᓐᖓᕕᖃᕐᓗᑎᒃ ᐆᒥᖓ ᐃᓛᒃᑰᖅᑐᒥᒃ.

5.6.52 - ᐅᐸᓗᕐᓇᖅᑐᖃᖅᑎᓪᓗᒍ ᑐᖁᑦᓯᓂᖅ

ᑖᒃᑯᐊᖑᒐᓗᐊᖅᑎᓪᓗᒋᑦ ᐃᓛᒃᑰᖅᑐᒥ, ᐃᓄᒃ ᑐᖁᑦᓯᒍᓐᓇᖅᑐᖅ ᐆᒪᔪᕐᒥᒃ ᑕᐃᒪᐃᑦᓴᕆᐊᖃᕈᓂ ᐃᓄᒻᒥᒃ ᓴᐳᒻᒥᔾᔪᑎᒋᓗᒍ ᐅᕝᕙᓗ ᐃᓄᒻᒧᑦ ᐱᖁᑎᒋᔭᐅᔪᓂᒃ.

5.6.53

ᑖᒃᑯᐊᖑᒐᓗᐊᖅᑎᓪᓗᒋᑦ ᐃᓛᒃᑰᖅᑐᒥ, ᐃᓄᒃ ᑐᖁᑦᓯᒍᓐᓇᖅᑐᖅ ᓂᕆᓗᓂᓗ ᐱᕐᓕᖅᑐᖃᕐᓂᐅᓴᑎᓪᓗᒍ.

5.6.54

5.6.52-ᒥ ᐊᒻᒪᓗ 5.6.53 ᕿᒥᕐᕈᔭᐅᒋᐊᖃᓐᖏᑦᑐᑦ ᐱᔾᔪᑕᐅᒐᓱᐊᕐᓗᑎᒃ ᐸᑦᓯᑎᒋᔭᐅᓗᑎᒃ ᐊᑖᓂ ᓇᐅᑐᐃᓐᓇᐅᑉ ᒪᓕᒐᐃᑦ ᐊᑑᑎᕕᖏᓐᓄᑦ ᐃᓄᒻᒧᑦ ᑐᖁᑦᓯᔪᒧᑦ ᐆᒪᔪᕐᒥᒃ ᐊᐅᓚᑦᓯᓂᕐᓗᓐᓂᓂ ᐱᔾᔪᑎᒋᓗᒍ.

5.6.55

ᓱᑯᑦᓯᖏᑦ ᐆᒪᔪᐃᑦ ᑐᖁᑕᐅᔪᑦ ᐊᑖᓂ 5.6.52 ᐊᒻᒪᓗ 5.6.53 ᓴᒃᑯᑕᐅᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑖᒃᑯᓄᖓᓪᓗᐊᖅ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ.

ᐃᓚᖓ 7

ᐊᔾᔨᐅᖏᑦᑑᓂᖏᑦ ᐃᓄᐃᑦ ᐊᖑᓇᓱᓐᓂᖏᑦᑕ

ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ

5.7.1

ᓱᓕᒃᑲᓐᓂᖅ ᕐᑳᖓᒍᑦ ᐊᐅᓚᓂᐅᑎᑕᐅᔪᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ, ᐊᖑᓇᓱᓐᓂᕆᔭᖏᑦ ᐃᓄᐃᑦ ᑲᒪᒋᔭᐅᓂᐊᖅᑐᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ

5.7.2

ᐊᑐᓂᑦ ᓄᓇᓖᑦ, ᐊᑐᓂᓪᓗ ᓄᓇᓕᕋᓛᑦ ᐃᒥᒃᑯᑦ ᑎᒥᖃᕈᒪᔪᑦ, ᐊᖑᓇᓱᑦᑎᓄᑦ ᒥᑭᒋᐊᕐᓂᐊᖅᑎᓄᓪᓗ ᑲᑐᔾᔨᖃᑎᒌᖃᕐᓂᐊᖅᑐᑦ. ᑲᑎᒪᔨᐅᓂᖅ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓄᑦ ᑭᓇᒃᑯᓕᒫᓄᑦ ᒪᑐᐃᖓᓂᐊᖅᑐᖅ ᐃᓄᓐᓄᑦ ᓄᓇᖃᖃᑕᐅᔪᓄᑦ ᓄᓇᓕᓐᓂ. ᐊᑐᓂᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᑦ, ᒪᓕᒐᕋᓛᖅᑎᒍᑦ, ᐃᓕᓐᓂᐊᕐᓂᖃᖅᑎᑦᓯᒍᓐᓇᖅᑐᑦ ᓂᕈᐊᕈᓐᓇᖏᑦᑐᓂᒃ ᓄᓇᖃᖃᑕᐅᔪᓂᒃ ᐱᕕᑦᓴᖃᕐᓂᖏᓐᓂᓪᓗ ᑕᕝᕙᓐᖔᖅᑐᓂᒃ, ᐊᔾᔨᒌᓐᖏᑎᑦᓯᒍᓐᓇᖅᓱᑎᓪᓗ ᐃᓄᓐᓂᒃ ᐃᓄᓪᓚᕆᓐᓂᒃ ᓯᕗᓕᖃᕐᓂᒃᑯᑦ ᐱᖅᑯᓯᒃᑯᓘᓐᓃᑦ, ᑭᓯᐊᓂ ᑎᑎᕋᖅᑕᐅᓯᒪᒐᑎᒃ ᐊᑖᓂ ᐃᓛᒃᑯᑦ 35 ᐊᓯᖏᓪᓗ ᐃᓄᐃᑦ. ᑕᕝᕙᐅᔪᑦ ᓄᓇᓕᓐᓂ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ, ᑐᓐᖓᕕᖃᕐᓗᑎᒃ ᓱᖏᐅᑎᓯᒪᔭᒥᓂᒃ ᐱᕕᖃᖅᑎᑦᓯᒍᑕᐅᔪᓂ ᐅᕙᓂ ᐃᓛᒃᑰᖅᑐᒥ, ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᒋᑲᐃᓐᓇᕈᖅᑕᖏᑦ. ᒪᕐᕉᒃ ᐅᖓᑖᓄᓪᓘᓐᓃᑦ ᑲᑎᒪᔩᑦ ᑲᓱᖃᑎᖐᒍᓐᓇᖅᑐᑦ ᑲᔪᓯᑎᑦᓯᓂᐊᕐᓗᑎᒃ ᐊᐅᓚᓂᐅᔪᓂᒃ ᐆᒪᔪᕐᓄᑦ ᐆᒪᔪᓕᒫᓄᓪᓘᓐᓃᑦ ᑲᑐᔾᔨᖃᑎᒌᓪᓗᑎᒃ.

5.7.3

ᓴᓐᖏᓂᕆᔭᖏᑦ ᐊᐅᓚᓂᖏᓪᓗ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦᑕ ᐱᖃᓯᐅᔾᔨᓂᐊᖅᑐᑦ:

(a)

ᒪᓕᒐᖃᕐᓗᑎᒃ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᑦ ᓄᓇᖃᖃᑕᐅᔪᒧᑦ ᐱᖃᓯᐅᑎᑦᓱᑎᒃ ᐊᑐᖅᑕᐅᓂᖏᑦ ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᑦ;

(b)

ᑐᓂᐅᖅᑲᖅᑕᐅᓂᖏᑦ ᑲᔪᓯᑎᑕᐅᓂᖏᓪᓗ ᓄᓇᓕᓐᓂ ᐊᓐᓇᐅᒪᔾᔪᑕᐅᒋᐊᓖᑦ ᐋᖅᑭᒋᐊᖅᓯᒪᔪᓪᓗ ᐊᓐᓇᐅᒪᔾᔪᑕᐅᒋᐊᓖᑦ ᓄᓇᖃᖃᑕᐅᔪᓄᑦ;

(c)

ᑐᓂᔭᐅᓂᖏᑦ ᓄᓇᖃᖃᑕᐅᓐᖏᑦᑐᓄᑦ, ᐃᓱᒪᑦᓴᖅᓯᐅᕈᑎᒋᓗᒍ ᐃᓱᒪᑦᓴᖅᓯᐅᕈᑎᒋᓐᖏᓪᓗᒍᓘᓐᓃᑦ ᒪᓕᒐᖃᓐᖏᓪᓗᑎᓪᓘᓐᓃᑦ ᒪᓕᒐᖃᕐᓗᑎᓪᓘᓐᓃᑦ, ᐃᒪᖓᓂᒃ ᓄᓇᓕᓐᓂ ᐊᓇᐅᒪᔾᔪᑕᐅᒋᐊᓕᓐᓄᑦ ᐋᖅᑭᒋᐊᖅᓯᒪᔪᓄᓪᓗ ᐊᓐᓇᐅᒪᔾᔪᑕᐅᒋᐊᓕᓐᓄᑦ; ᐊᒻᒪᓗ

(d)

ᐃᓘᓐᓈᒍᑦ, ᐊᐅᓚᑕᐅᓂᖏᑦ ᐊᖑᓇᓱᓐᓂᐅᔪᑦ ᓄᓇᖃᖃᑕᐅᔪᓄᑦ.

5.7.4

ᐊᑐᓂᑦ ᐊᕕᑦᑐᖅᓯᒪᔪᑦ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᖃᕐᓂᐊᖅᑐᑦ. ᕿᑎᕐᒥᐅᓂ ᐆᒪᔪᓕᕆᓂᕐᒧᑦ ᑐᓐᖓᕕᐅᔪᑦ, ᐊᒻᒪᓗ ᕿᑭᖅᑖᓗᒻᒥ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ, ᑐᓐᖓᕕᖃᕐᓗᑎᒃ ᓱᖏᐅᑎᓯᒪᓂᕐᒥᓂᒃ ᐱᕕᖃᖅᑎᑦᓯᒍᑕᐅᔪᓄᑦ ᐅᕙᓂ ᐃᓛᒃᑰᖅᑐᒥ, ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᖑᒍᓐᓇᖅᑐᑦ.

5.7.5

ᑲᑎᒪᔨᖏᑦ ᐊᑐᓂᑦ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᑭᒡᒐᖅᑐᐃᔨᖃᕐᓂᐊᖅᑐᑦ ᐊᑐᓂᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓂᒃ ᐊᕕᑦᑐᖅᓯᒪᔪᓂ.

5.7.6

ᓴᓐᖏᓂᖏᑦ ᐊᐅᓚᓂᖏᓪᓗ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐅᑯᓇᓐᖓᑦ ᐱᖃᓯᐅᔾᔨᓂᐊᕐᑐᑦ:

(a)

ᒪᓕᒐᐃᑦ ᐊᖑᓇᓱᓐᓂᐅᑉ ᐊᐅᓚᓂᖏᓐᓅᖓᔪᑦ ᑲᑎᒪᔨᐅᖃᑕᐅᔪᓄᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᔪᓂ, ᐱᖃᓯᐅᑎᑦᓱᑎᒃ ᐊᑐᖅᑕᐅᓂᖏᑦ ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᑦ;

(b)

ᑐᓂᐅᖅᑲᖅᑕᐅᓂᖏᑦ ᑲᔪᓯᑎᑕᐅᓂᖏᓪᓗ ᐊᕕᑦᑐᖅᓯᒪᔪᓂ ᐊᓐᓇᐅᒪᔾᔪᑕᐅᒋᐊᓖᑦ ᐋᖅᑭᒋᐊᖅᓯᒪᔪᓪᓗ ᐊᓐᓇᐅᒪᔾᔪᑕᐅᒋᐊᓖᑦ ᐊᑯᕐᖓᓐᓂ ᐊᖑᓇᓱᓐᓂᕐᒧᑦ ᒥᑭᒋᐊᕐᓂᐊᕐᓂᒧᓪᓗ ᑲᑐᔾᔨᖃᑎᒌᑦ ᐊᕕᑦᑐᖅᓯᒪᔪᓂ;

(c)

ᑐᓂᔭᐅᓂᖓ ᑭᓇᑐᐃᓐᓇᐅᑉ ᐃᓅᑉ ᑎᒥᐅᔫᓪᓘᓐᓃᑦ ᐊᓯᐊ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦᑕ, ᐃᓱᒪᑦᓴᖅᓯᐅᕈᑕᐅᓯᒪᓗᑎᒃ ᒪᓕᒐᖃᕐᓗᑎᓪᓗ ᐃᓱᒪᑦᓴᖅᓯᐅᕈᑕᐅᓯᒪᖏᓪᓗᑎᒃ ᒪᓕᒐᖃᓐᖏᓪᓗᑎᓪᓗ, ᓇᐅᑐᐃᓐᓇᕐᒧᑦ ᐃᓚᖓᓄᑦ ᐊᕕᑦᑐᖅᓯᒪᔪᓂ ᐊᓇᐅᒪᔾᔪᑕᐅᒋᐊᓖᑦ ᐋᖅᑭᒋᐊᖅᓯᒪᔪᓪᓗ ᐊᓐᓇᐅᒪᔾᔪᑕᐅᒋᐊᓖᑦ; ᐊᒻᒪᓗ

(d)

ᐊᐅᓚᑕᐅᓂᓕᒫᖏᑦ ᐊᖑᓇᓱᓐᓃᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐊᕕᑦᑐᖅᓯᒪᔪᓂ.

5.7.7

ᒪᕐᕉᒃ ᐅᖓᑖᓂᓘᓐᓃᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᑲᓱᕈᓐᓇᖅᑐᖅ ᐱᔾᔪᑎᖃᕐᓗᑎᒃ ᑲᔪᓯᑎᑦᓯᓂᕐᒥᒃ ᐊᐅᓚᓂᕆᔭᒥᓂᒃ ᐆᒪᔪᓕᒫᓄᑦ ᐃᓚᖏᓐᓄᓘᓐᓃᑦ ᑲᑐᔾᔨᖃᑎᒌᓪᓗᑎᒃ.

5.7.8

ᒪᓕᓪᓗᒍ ᐅᓇ ᐃᓛᒃᑰᖅᑐᖅ, ᐊᑐᓂᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᓴᖅᑮᓂᐊᖅᑐᑦ ᐊᑐᕐᓗᒋᓪᓗ ᒪᓕᒐᕋᓛᕐᓂᒃ ᖃᐅᔨᒪᓕᑕᕆᓗᒋᑦ ᐊᐅᓚᓂᕐᒥᓄᑦ.

5.7.9

ᑐᓐᖓᕕᒋᓗᒍ 5.7.10, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ, ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ, ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᑦ ᓴᑦᑭᓂᐊᖅᑐᑦ ᒪᓕᒐᕐᓂᒃ ᓇᓗᓇᐃᔭᐃᔪᓂᒃ ᓇᓪᓕᖏᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᒪᓕᒋᐊᖃᕐᒪᖔᑕ ᒪᓕᒐᕋᓛᖏᓐᓂᒃ ᐋᖅᑭᑦᑕᖏᓐᓂᓪᓗ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ.

5.7.10

ᐊᑐᓂᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᒪᓕᒋᐊᖃᕐᓂᐊᖅᑐᑦ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᒪᓕᒐᕋᓛᖏᓐᓂᒃ ᐋᖅᑭᑦᑕᖏᓐᓂᓪᓗ ᐊᑦᑐᐊᔪᓄᑦ ᑐᓂᔭᐅᔪᓄᑦ ᐊᕕᑦᑐᖅᓯᒪᔪᓂ ᐊᓐᓇᐅᒪᔾᔪᑕᐅᒋᐊᓕᓐᓄᑦ ᐋᖅᑭᒋᐊᖅᓯᒪᔪᓄᓪᓗ ᐊᓐᓇᐅᒪᔾᔪᑕᐅᒋᐊᓕᓐᓄᑦ.

5.7.11

ᓇᐅᑐᐃᓐᓇᖅ ᒪᓕᒐᕋᓛᖅ ᐋᖅᑭᑦᑕᐅᔪᕐᓘᓐᓃᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐅᕝᕙᓘᓐᓃᑦ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐱᔾᔪᑎᑦᓴᖃᑦᓯᐊᖏᓪᓗᑎᒃ ᓄᖅᑲᖓᑎᑦᓯᒋᐊᖃᓐᖏᑦᑐᑦ ᐃᓄᒻᒥᒃ ᐊᖑᓇᓱᓐᓂᕐᒥᒃ ᐱᔾᔪᑕᐅᓪᓗᓂ ᓂᕿᖃᕆᐊᖃᕐᓂᖅ ᐃᒻᒥᓄᑦ ᐃᓚᒥᓄᓪᓗ.

5.7.12

ᑲᑎᒪᔨᓕᒫᑦᓯᐊᖏᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᒪᓕᒋᐊᖃᕐᓂᐊᖅᑐᑦ ᒪᓕᒐᕋᓛᖏᓐᓂᒃ ᑎᒥᐅᔫᑉ. ᐊᑐᓂᑦ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᖑᓇᓱᑦᑏᓪᓗ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᓴᖅᑮᓂᐊᖅᑐᑦ ᓇᒻᒥᓂᖅ ᒪᓕᒐᕋᓛᕐᒥᓂ, ᒪᓕᒐᕋᓛᖅᑕᖃᕐᓗᓂᓗ ᐃᓂᖅᑎᕆᒋᐊᕈᑎᓂᒃ ᑲᑎᒪᔨᒥᓂᒃ ᓯᖁᒥᑦᓯᑉᐸᑕ ᒪᓕᒐᕋᓛᒥᓐᓂᒃ.

5.7.13

ᓈᒻᒪᑦᑐᓂᒃ ᑮᓇᐅᔭᖃᖅᑎᑕᐅᓂᐊᖅᑐᑦ ᐊᐅᓚᓂᖏᓐᓄᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.7.14

ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐊᕕᑦᑐᖅᓯᒪᔪᓂᓗ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐱᔪᓐᓇᕐᓂᕐᒥᓂᒃ ᐊᑐᕆᐊᖃᓐᖏᑦᑐᑦ ᒪᓕᑦᓱᒍ 5.7.3(a) ᐅᕝᕙᓗ 5.7.6(a) ᐊᐳᖅᓯᒪᓂᖃᕐᓗᑎᒃ ᓇᐅᑐᐃᓐᓇᕐᓄᑦ ᒪᓕᒐᕐᓄᑦ ᐊᐅᓚᑦᓯᔾᔪᑕᐅᔪᓄᑦ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᓄᑦ.

5.7.15 - ᐃᖅᑲᖅᑐᖅᑕᐅᒃᑲᐃᓃᑦ ᓴᐳᔾᔨᒍᑕᐅᓪᓗᑎᒃ ᐃᓅᑉ ᐱᔪᒪᔭᖓᓂᒃ

ᐊᐅᓚᔾᔭᒋᐊᕈᑎᑦᓴᖃᑐᐊᖅᐸᑦ ᐃᓄᒃ, ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐃᓄᒻᒧᑦ ᑲᑎᒪᕕᐅᖃᑕᐅᕕᐅᔪᑦ, ᐊᖏᖅᐸᑦ ᐃᓄᒃ, ᐃᖅᑲᖅᑐᖅᑕᐅᒃᑲᐃᒍᓐᓇᖅᑐᑦ ᑭᒡᒐᖅᑐᕐᓗᑎᒃ ᐃᓄᒻᒥᒃ.

5.7.16 - ᐱᔪᓐᓇᐅᑎᑎᒍᑦ ᐊᖑᓇᓱᒍᓐᓇᕐᓂᖏᑦ ᐃᓄᐃᑦ

ᑐᓐᖓᕕᒋᓗᒍ 5.7.18, ᐃᓄᓕᒫᑦ ᐃᓱᒪᖅᓱᓂᐊᖅᑐᑦ ᐊᐳᖅᓯᒪᕕᖃᓐᖏᓪᓗᑎᓪᓗ ᐱᔪᓐᓇᕐᓂᖏᑦ ᐊᖑᓇᓱᓐᓂᕐᒥᒃ ᓄᓇᓕᒫᓂ, ᐃᒪᕐᓂ ᑕᕆᐅᕐᒥᓗ ᓄᓇᕗᑦ ᐃᓗᐊᓂ, ᐋᒡᒐᐅᒐᓗᐊᖅ ᓄᓇᓂ ᓇᓗᓇᐃᔭᖅᑕᐅᔪᓂ 5.7.17-ᒥ, ᐊᒻᒪᓗ ᑭᓪᓕᖃᓐᖏᓪᓗᑎᒃ ᐃᓘᓐᓈᒍᑦ ᐅᑯᐊ, ᐅᖃᐅᓯᐅᔪᑦ ᐱᔪᓐᓇᐅᑎ ᐊᑐᐃᓐᓇᖃᕈᓐᓇᕐᓂᕐᒧᑦ ᐊᑑᑎᓂᐊᖅᑐᑦ ᒐᕙᒪᒃᑯᑦ ᓄᓇᖁᑎᓕᒫᖏᓐᓂ, ᐱᖃᓯᐅᑎᑦᓱᑎᒃ ᑐᑭᓯᓇᖅᑎᒃᑲᓐᓂᕐᓗᒍ, ᒥᓐᖑᐃᕐᓯᕐᕖᑦ ᓴᐳᑎᔭᐅᓯᒪᔪᓪᓗ, ᐊᒻᒪᓗ, ᓄᓇᓕᒫᑦ ᑎᒍᒥᐊᖅᑕᐅᔪᑦ ᓄᓇᓕᓕᓐᓄᑦ.

5.7.17 - ᓄᓇᐃᑦ ᐱᔪᓐᓇᐅᑎᖃᕐᕕᐅᓐᖏᑦᑐᑦ ᐊᖑᓇᓱᒍᓐᓇᕐᓂᕐᒧᑦ

ᐱᔪᓐᓇᐅᑎᐅᑎᑕᐅᔪᑦ ᐊᖑᓇᓱᒍᓐᓇᕐᓂᕐᒧᑦ 5.7.16-ᒥ ᐅᑯᓇᓐᖓᑦ ᐱᖃᓯᐅᔾᔨᔮᖏᑦᑐᑦ;

(a)

ᓄᓇᐃᑦ ᐃᒪᐃᑦᑐᑦ

(i)

ᑐᓂᒪᓂᖃᖅᑐᑦ ᐅᓇᓕᑦᓴᓄᑦ ᐅᕝᕙᓗ ᑲᓇᑕᒥ ᐅᐊᑦᓯᔭᐅᓂᖅ ᐱᔾᔪᑕᐅᓪᓗᓂ ᐅᕝᕙᓗ ᐊᑐᖅᑕᐅᑲᐃᓐᓇᖅᑐᑦ ᑕᒪᓐᓇ ᐱᔾᔪᑕᐅᓪᓗᓂ ᐊᑖᓂ ᑲᓇᑕᒥ ᐅᓇᑕᖅᑐᑦᓴᐃᑦ ᒪᓕᒐᕐᔪᐊᖓᑦᑕ,

(ii)

ᓇᒻᒥᓂᕆᔭᐅᔪᑦ ᓄᓇᖁᑎᒥᓂᒃ ᐃᓱᒪᖅᓴᓲᑎᖃᕈᓐᓇᕐᓂᒃᑯᑦ, ᐊᓯᖏᑦ ᓄᓇᓖᑦ ᑎᒥᖁᑎᖏᑦᑕ, ᐅᓪᓗᖓᓂᒃ ᐊᖏᕈᑕᐅᑎᓪᓗᒍ ᐊᖏᕈᑎ,

(iii)

ᓄᓇᒥᒃ ᐃᓱᒪᖅᓲᑎᖃᕈᓐᓇᖅᑎᑕᐅᔪᑦ ᑭᖑᓂᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᓄᓇ ᒥᑭᓂᖅᓴᐅᑉᐸᑦ ᑭᑉᐹᕆᑦᑐᓪᓗᐊᒥᒃ ᐊᑕᐅᓯᕐᒥᒃ ᒪᐃᓕᒥᒃ,

(iv)

ᑐᓐᖓᕕᒋᑦᓱᒍ ᐊᖏᕈᑕᐅᔪᖅ ᓂᐅᕕᐊᑦᓴᖃᕐᓂᕐᒧᑦ ᐅᓪᓗᖓᓂ ᐊᖏᕈᑕᐅᓂᖓᑕ ᐊᖏᕈᑎᐅᑉ; ᐅᕝᕙᓗ

(v)

ᑐᓐᖓᕕᒋᑦᓱᒍ ᕐᑳᖓᓄᑦ ᐊᑐᖅᑐᐊᕈᑎ ᐊᑑᑎᔪᖅ ᐅᑦᑑᕝᕙ 27, 1981-ᒥ, ᐊᑐᖅᑐᐊᕐᓂᐅᔪᕐᓗ ᐋᔩᕋᒃᑲᓐᓂᕈᑕᐅᓯᒪᓐᖏᑉᐸᑦ ᐱᕕᖃᖅᑎᑦᓯᒍᑕᐅᓗᓂ ᐱᔪᓐᓇᕐᓂᕐᒥᒃ ᐊᑐᐃᓐᓇᖃᕐᓂᕐᒧᑦ ᓂᕆᐅᒋᔭᐅᓯᒪᔪᖅ ᑐᕌᒐᕆᔭᐅᑦᓱᓂᓗ 5.7.21-ᒥ; ᐅᕝᕙᓗ

(b)

ᓇᐅᑐᐃᓐᓇᖅ ᓄᓇ ᐃᓂᖃᖅᑐᖅ 1-ᒪᐃᓕᐅᑉ ᐃᓗᐊᓂ ᐃᓪᓗᒥᒃ, ᓇᐸᔪᒥᒃ ᐅᕝᕙᓘᓐᓃᑦ ᐊᓯᐊᓂᒃ ᐃᓪᓗᒥᒃ ᓄᓇᓂ ᐊᑖᓃᑦᑐᓂ ᕐᑳᖓᓄᑦ ᐊᑐᖅᑐᐊᕈᑏᑦ, ᐊᖏᕈᑎ ᓂᐅᕕᐊᑦᓴᖃᕐᓂᕐᒧᑦ ᓇᒻᒥᓂᕆᔭᐅᔪᒧᓪᓘᓐᓃᑦ ᐃᓱᒪᖅᓲᑕᐅᓪᓗᓂ.

5.7.18

ᐊᖑᓇᓱᒍᓐᓇᕐᓂᐅᑎᑕᐅᔪᖅ 5.7.16-ᒥ ᑐᓐᖓᕕᓕᒃ ᐅᑯᓇᓐᖓᑦ:

(a)

ᒪᓕᒐᐃᑦ ᐃᓘᓐᓇᐃᓐᓄᑦ ᐊᑦᑐᐊᔪᑦ ᐊᐅᓚᔾᔭᒋᐊᖅᑕᐅᔪᑦ ᐱᔾᔪᑕᐅᓪᓗᓂ ᑭᓇᒃᑯᑐᐃᓐᓇᐃᑦ ᐊᑦᑕᓇᖅᑐᒦᑦᑕᐃᓕᓂᖓᑦ;

(b)

ᐊᐳᖅᓯᒪᕕᐅᑎᑕᐅᔪᑦ ᓴᖅᑭᖅᑕᐅᔪᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ ᓴᐳᔾᔨᓂᖅ ᐱᔾᔪᑕᐅᓗᓐᓂ;

(c)

ᒥᓐᖑᐃᓯᕐᕕᓐᓄᑦ ᓴᐳᑎᔭᐅᓯᒪᔪᓄᓪᓗ ᓄᓇᓄᑦ, ᓇᐅᑐᐃᓐᓇᖅ ᑕᒪᒃᑮᓐᓄᑦ ᐊᖏᕈᑕᐅᓯᒪᔪᖅ ᐃᓄᓐᓄᑦ ᐊᑦᑐᖅᑕᐅᔪᓄᑦ ᐊᐅᓚᑦᓯᔪᓄᓪᓗ ᑎᒥᐅᔪᓄᑦ ᒥᓐᖑᐃᕐᓯᕐᕕᓐᓄᑦ ᓴᐳᔾᔭᐅᓯᒪᔪᓄᓪᓗ ᓄᓇᓄᑦ; ᐊᒻᒪᓗ

(d)

ᓄᓇᒥᒃ ᐊᑐᕐᓗᑎᒃ ᐊᐅᓚᓂᐅᔪᑦ ᐱᔪᓐᓇᕐᓂᖃᖅᑎᑕᐅᓯᒪᔪᖅ ᐊᑖᓂ ᒪᓕᓪᓗᑎᒃ ᐊᑑᑎᒋᐊᓕᓐᓂᒃ, ᐱᖃᓯᐅᑎᑦᓱᑎᒃ ᐃᓛᒃᑰᖅᑐᖅ 11 ᐊᒻᒪᓗ 12, ᑎᑭᐅᑎᓗᒍ ᐊᖑᓇᓱᒍᓐᓇᕐᓂᖅ ᓈᒻᒪᖏᑦᑑᒋᐊᖓ ᑕᐃᑯᖓ ᓄᓇᒥᒃ ᐊᑐᕐᓂᕐᒧᑦ ᐊᐅᓚᓂᕐᒧᑦ ᐊᒻᒪᓗ ᐊᑐᕆᐊᖃᕐᓂᖓᓄᑦ ᑭᓯᐊᓂ ᑎᑭᐅᒪᓗᓂ ᑕᐃᓐᓇ ᓄᓇᐅᑉ ᐊᑐᖅᑕᐅᒍᓐᓇᕐᓂᖓᓄᑦ.

5.7.19

ᐃᓄᒻᒥᒃ ᓇᓗᓇᐃᖅᑕᐅᓯᒪᔪᒥᓪᓘᓐᓃᑦ ᐃᓄᓐᓄᑦ ᑎᒥᖁᑕᐅᔪᒥᒃ ᐊᖏᖃᑎᖃᓐᖏᑦᑐᖃᖅᐸᑦ ᐱᔪᒪᔭᖃᖅᑐᓂᒃ ᑲᔪᓯᒍᓐᓇᖏᑦᑐᓂᒃ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᓂᒃ ᓄᓇᒥᒃ ᐊᑐᕈᓐᓇᖅᑎᑕᐅᓯᒪᓗᓂ ᑐᓐᖓᕕᒋᓗᒍ 5.7.18(d), ᖃᓄᐃᓐᓂᐅᔪᖅ ᑲᒪᒋᔭᐅᓂᐊᖅᑐᑦ ᑐᓐᖓᕕᖃᕐᓗᑎᒃ ᐃᓛᒃᑯᑦ 38-ᒥᒃ.

5.7.20

ᐊᑲᐅᓈᓐᖏᑦᑐᖃᖅᐸᑦ ᐊᐳᖅᓯᒪᓂᖅᑕᖃᖅᐸᓪᓘᓐᓃᑦ ᐊᐅᓚᔾᔭᒋᐊᕈᑕᐅᓯᒪᔪᓄᑦ ᑐᓐᖓᕕᒋᑦᓱᒋᑦ 5.7.18(b) ᐊᒻᒪᓗ (c), ᐊᐅᓚᔾᔭᒋᐊᕈᑕᐅᔪᑦ ᐊᑖᓂ (c) ᒪᓕᑦᑕᐅᓂᐊᖅᑐᑦ ᐊᑲᐅᓈᓐᖏᑦᑐᖃᖅᐸᑦ ᐊᐳᖅᓯᒪᔪᖃᖅᐸᓪᓗ.

5.7.21 - ᒐᕙᒪᒃᑯᑦ ᐊᐅᓚᓂᖏᑦ ᐊᑦᑐᐊᔪᑦ ᕐᑳᖏᓐᓂᒃ ᐊᑐᖅᑐᐊᕈᑎᓄᑦ

ᐊᑐᖅᑐᐊᖅᑕᐅᓂᖓ ᓄᓇᐅᑉ ᓄᓇᕗᒻᒥ ᑕᕝᕙᐅᒌᖅᑐᒥᓂᖅ ᓯᕗᕐᖓᓂ ᐅᓪᓗᖓᓂᓘᓐᓃᑦ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᑭᖑᓂᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ,

(a)

ᓄᑖᕈᕆᐊᖅᑕᐅᓗᓂ, ᐅᕝᕙᓗ

(b)

ᐊᐅᓪᓛᖅᑎᑕᐅᓗᓂ ᐊᖏᖅᑕᐅᒋᐊᖃᖅᓱᓂᓗ ᒐᕙᒪᒃᑯᓐᓄᑦ,

ᒐᕙᒪᒃᑯᑦ ᐃᓚᒍᑦᓯᐅᔾᔨᓂᐊᖅᑐᑦ ᓄᑖᕈᕆᐊᖅᓯᒪᔪᒥᒃ ᐊᐅᓪᓛᖅᑎᑕᐅᔪᒥᓪᓘᓐᓃᑦ ᐊᑐᖅᑐᐊᕈᑎᒥᒃ ᒪᓕᒐᕐᒥᒃ ᐃᒪᐃᓕᖓᔪᒥᒃ:

“ᐅᓇ ᐊᑐᖅᑐᐊᕈᑎ ᑐᓐᖓᕕᖃᖅᑐᑦ ᓇᐅᑐᐃᓐᓇᕐᓂᒃ ᐱᔪᓐᓇᕐᓂᕆᔭᖏᓐᓂᒃ ᐃᓄᐃᑦ ᐊᑖᓂ ᑭᖑᓪᓕᖅᐹᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐃᑎᕈᓐᓇᕐᓂᕐᒧᑦ ᓄᓇᒧᑦ ᓄᓇᑦᓯᐊᕐᒥ, ᕿᓂᕐᓗᑎᒃ, ᐱᓗᑎᒃ, ᑐᖁᑦᓯᓗᑎᒃ, ᐅᕝᕙᓗ ᓅᑦᑎᓯᓗᑎᒃ ᐆᒪᔪᕐᓂᒃ, ᓱᑯᑦᓯᖏᓐᓂᒃ ᐆᒪᔪᐃᑦ, ᐆᒪᔪᕐᓃᓐᖔᖅᑐᓂᓪᓘᓐᓃᑦ ᓴᓇᓯᒪᔪᓂᒃ; ᐊᒻᒪᓗ ᐱᕕᖃᖅᑎᑕᐅᓂᖅ ᑕᐃᒪᐃᑦᑐᒥᒃ ᐊᖏᕈᑎᒥᒃ ᐊᑦᑐᐊᔪᒥᒃ ᐊᖑᓇᓱᕝᕕᖃᕐᓂᖓᓄᑦ ᐃᓚᒋᓂᐊᖅᑕᖓ ᐆᒪ ᐊᑐᖅᑐᐊᕈᑎᐅᑉ ᐃᓗᐊᓃᑦᑐᑦ.”

5.7.22

ᑲᒪᒋᒋᐊᓖᑦ ᓇᓗᓇᐃᔭᖅᑕᐅᓯᒪᔪᑦ 5.7.21-ᒥ ᐊᑑᑎᔾᔮᖏᑦᑐᑦ ᓇᐅᑐᐃᓐᓇᕐᒧᑦ ᐊᑐᖅᑐᐊᕐᓂᐅᔪᒧᑦ ᓄᓇᒧᑦ ᒥᑭᓂᖅᓴᒧᑦ 1-ᒪᐃᓕᒥ, ᐅᕝᕙᓗ ᒐᕙᒪᒃᑯᑦ ᐃᖅᑲᖅᑐᕋᑦᓴᕈᐃᒐᔭᖅᐸᑕ ᒪᓕᒐᕐᓂᒃ ᐃᓚᒍᑦᓯᐅᔾᔭᐅᔪᖃᕐᓂᖅᐸᑦ, ᐸᐃᑉᐹᖁᑎᖃᕐᓗᓂ ᐱᓯᒪᔪᒥᒃ ᒥᓂᔅᑕᐅᑉ ᑐᖏᓕᖓᓂᒃ ᒪᓕᒐᓕᕆᓂᕐᒧᑦ ᓈᒻᒪᒋᔭ.ᐅᓂᐊᖅᑐᖅ ᓇᓗᓇᐃᕈᑕᐅᑎᓪᓗᒍ ᑕᐃᒪᐃᑦᑐᒥᒃ. ᒐᕙᒪᒃᑯᑦ ᖃᐅᔨᒃᑲᐃᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᑐᑦᓯᕋᐅᑎᓕᒫᓄᑦ ᑐᓂᔭᐅᓂᖏᓄᓪᓗ ᓄᓇᐅᑉ ᕐᑳᖓᓂᒃ ᐊᑐᖅᑐᐊᕈᑏᑦ.

5.7.23 - ᐊᐳᖅᓯᒪᕕᐅᔪᑦ ᐱᔪᓐᓇᐅᑎᒧᑦ ᐊᖑᓇᓱᒍᓐᓇᕐᓂᕐᒧᑦ

ᓇᐅᑐᐃᓐᓇᖅ ᖃᓄᐃᓕᖓᓂᐅᔪᖅ ᑳᑦᑐᓛᒧᑦ ᑭᓪᓕᖃᖅᑎᑦᓯᒐᓱᐊᖅᑐᖅ ᐱᔪᓐᓇᐅᑎᓂᒃ ᐊᖑᓇᓱᒍᓐᓇᕐᓂᕐᒧᑦ ᐃᓄᒻᒧᑦ ᐃᓱᒪᖅᓱᕐᓂᖓᓂ ᐃᑲᕐᕋᓂ ᐃᖅᑲᓇᐃᔭᖅᑎ ᐊᑑᑎᖃᔾᔮᖏᑦᑐᖅ ᐃᓄᓐᓄᑦ.

5.7.24

ᐊᐳᖅᕕᐅᔪᑦ, ᐊᐅᓚᔾᔭᒋᐊᖅᑕᐅᓯᒪᔪᑦ ᐱᔾᔪᑕᐅᓪᓗᓂ ᓴᐳᔾᔨᓂᖅ, ᐊᐅᓚᑦᓯᒍᓐᓇᕐᓂᖏᑦ ᐃᓄᐃᑦ ᒥᓐᖑᐃᓯᕐᕕᓐᓂᒃ ᓴᐳᑎᔭᐅᓯᒪᔪᓂᓪᓗ ᓄᓇᓂᒃ ᐊᑑᑎᔪᓂᒃ ᐊᖏᕈᑕᐅᑎᓪᓗᒍ ᐊᖏᕈᑎ ᐊᑑᑎᓂᐊᖅᑐᑦ ᐲᖅᑕᐅᖏᓐᓂᖏᓐᓂ ᐃᓇᖏᖅᑕᐅᖏᓐᓂᖏᓐᓂᓘᓐᓃᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᒋᑦᓱᒍ ᐃᓚᖓ 3, ᐅᕝᕙᓗ ᐊᖏᖃᑎᒌᓐᓂᖓᒍᑦ ᐊᐅᓚᑦᓯᔩᑦ ᑎᒥᐅᔪᑦ ᐊᑦᑐᖅᑕᐅᔪᓪᓗ ᐃᓄᐃᑦ.

5.7.25 - ᐅᒥᐊᒃᑰᖃᑦᑕᕈᓐᓇᕐᓂᖅ

ᐱᕕᖃᖅᑎᑦᓯᒍᑕᐅᔪᖅ 5.7.16-ᒥ ᐊᕝᕕᕋᔾᔮᖏᑦᑐᖅ ᐅᒥᐊᒃᑰᖃᑦᑕᕈᓐᓇᕐᓂᕐᒥᒃ.

5.7.26 - ᓚᐃᓴᓐᓯᑖᕐᓂᖅ

ᑐᓐᖓᕕᒋᑦᓱᒋᑦ ᐃᒪᐃᓕᖓᓂᖏᑦ ᐆᒪ ᐃᓛᒃᑰᖅᑑᑉ, ᐃᓄᒃ ᓇᓗᓇᐃᒃᑯᑕᖃᑦᓯᐊᖅᑐᖅ ᐊᖑᓇᓱᒍᓐᓇᖅᑐᖅ ᐋᖅᑭᒋᐊᖅᓯᒪᔪᓂᒃ ᐊᓐᓇᐅᒪᔾᔪᑎᓂᒃ ᓚᐃᓴᓐᓯᖃᓐᖏᓪᓗᓂ ᐱᔪᓐᓇᐅᑎᖃᓐᖏᓪᓗᓂᓘᓐᓃᑦ ᐊᑭᓖᒋᐊᖃᓐᖏᓪᓗᓂᓗ ᐊᑭᓕᕆᐊᓕᓐᓂᒃ ᑖᒃᓰᔭᕆᐊᖃᕋᓂᓗ.

5.7.27

ᑐᓐᖓᕕᒋᑦᓱᒋᑦ ᒪᓕᒐᐃᑦ ᐊᐅᓚᑦᓯᔾᔪᑕᐅᔪᑦ ᑮᓇᐅᔭᓕᐅᕋᓱᐊᕐᓗᑎᒃ ᐃᖃᓗᒐᓱᐊᕐᓂᕐᒧᑦ, ᐃᓄᐃᑦ ᐱᔭᕆᐊᖃᑐᐃᓐᓇᕆᐊᓖᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᓚᐃᓴᓐᓯᒥᒃ ᑖᒃᑯᓇᓐᖓᓪᓗᐊᖅ ᐊᐅᓚᑦᓯᓂᕐᒧᑦ ᑎᒥᐅᔪᓂᒃ ᑮᓇᐅᔭᓕᐅᕋᓱᐊᓂᕐᒧᑦ ᐊᖑᓇᓱᓐᓂᕐᒧᑦ ᐆᒪᔪᕐᓂᒃ ᑕᕆᐅᕐᒥᐅᑕᕐᓂᒃ ᐃᖃᓗᓐᓂᒃ ᐊᒻᒨᒪᔪᕐᓂᓪᓗ ᐊᖑᔭᐅᒐᔪᓐᖏᑦᑐᓂᒃ ᑕᖅᑭᓂᒃ 12-ᓂᒃ ᑭᖑᓂᖓᓂ ᐅᑦᑑᕝᕙ 27, 1981. ᑕᐃᒪᐃᑦᑐᐃᑦ ᓚᐃᓴᓐᓰᑦ ᐱᔾᔪᑎᖃᑦᓯᐊᖏᓪᓗᑎᒃ ᓄᖅᑲᖓᑎᑕᐅᔾᔮᖏᑦᑐᑦ ᐅᕝᕙᓗ ᐱᔾᔪᑎᖃᑦᓯᐊᖏᑦᑐᓂᒃ ᐊᑭᓖᑎᑦᓯᒍᑕᐅᓗᑎᒃ.

5.7.28

ᖃᑭᒪᓇᓱᐊᕐᓂᕐᒧᑦ ᐊᐅᓚᓂᐅᔪᒧᑦ ᐅᖃᐅᓯᐅᔪᑦ 5.6.39-ᒥ ᐊᖏᖅᑕᐅᓯᒪᔪᑦ ᒪᓕᑦᓱᑎᒃ ᑐᑭᖏᓐᓂᒃ ᐆᒪ ᐃᓛᒃᑰᖅᑑᑉ, ᓚᐃᓯᓐᓯᑖᖅᑎᑕᐅᔪᖃᕐᓂᐊᖅᑐᖅ ᑕᑦᓱᒧᖓᓪᓗᐊᖅ ᒥᓂᔅᑕᒧᑦ ᓈᒻᒪᑦᑐᒥᒃ ᐊᑭᓖᑎᑕᐅᓗᓂ ᒪᓕᓪᓗᑎᒃ ᒪᓕᒐᕐᓂᒃ ᐃᓘᓐᓇᐃᓐᓅᖓᔪᓂᒃ.

5.7.29

ᐃᓄᐃᑦ ᓚᐃᓴᓐᓯᑖᕆᐊᖃᑐᐃᓐᓇᕆᐊᓖᑦ ᑎᒍᒥᐊᖅᑐᓂᒃ ᐊᐅᓚᑦᓯᓂᕐᒧᑦ ᑎᒥᐅᔪᓂᒃ ᐊᖑᓇᓱᐊᕐᓂᕐᒧᑦ ᐆᒪᔪᕐᓂᒃ ᐃᖅᑲᕐᒥᐅᑕᕐᓂᒃ ᐊᖑᔭᐅᒐᔪᓐᖏᑦᑐᓂᒃ ᑕᖅᑭᓂ 12-ᓂ ᑭᖑᓂᖓᓂ ᐅᑦᑑᕝᕙ 27, 1981. ᑕᐃᒪᐃᑦᑐᑦ ᓚᐃᓴᓐᓰᑦ ᐱᔾᔪᑎᖃᑦᓯᐊᖏᓪᓗᑎ ᓄᖅᑲᖓᑎᑕᐅᔾᔮᖏᑦᑐᑦ ᐊᑭᓖᑎᑕᐅᓗᑎᓪᓘᓐᓃᑦ.

5.7.30 - ᑐᓂᐅᖅᑲᐃᓂᖅ ᐊᖑᔭᐅᔪᕕᓂᕐᓂᒃ

ᑐᓐᖓᕕᒋᑦᓱᒋᑦ 5.6.26 ᑎᑭᑦᓱᒍ 5.6.30 ᐊᒻᒪᓗ 5.7.31 ᑎᑭᑦᓱᒍ 5.7.33, ᐃᓄᒃ ᑐᓂᓯᒍᓐᓇᖅᑐᖅ ᐃᓱᒪᖅᓱᕐᓗᓂ ᑭᓇᑐᐃᓐᓇᕐᒧᑦ ᐃᓄᒻᒧᑦ ᒪᓕᒐᖅᑎᒍᑦ ᒪᓕᑦᓱᑎᒃ ᐊᖑᔭᐅᔪᒥᒃ. ᑐᓂᓯᒍᓐᓇᕐᓂᖅ ᐱᖃᓯᐅᔾᔨᓂᐊᖅᑐᖅ ᓂᐅᕕᐊᑦᓴᖃᕈᓐᓇᕐᓂᒥᒃ, ᑕᐅᖅᓰᓂᕐᒥᒃ ᐊᐃᑦᑐᐃᓂᕐᒥᓪᓗ, ᓄᓇᕗᒻᒥ ᓯᓚᑖᓂᓘᓐᓃᑦ.

5.7.31

ᐃᓄᒃ ᐱᔭᕆᐊᖃᑐᐃᓐᓇᕆᐊᓕᒃ ᑖᒃᑯᓇᓐᖓᓪᓗᐊᖅ ᒐᕙᒪᒃᑯᓐᓂᒃ ᑎᒥᐅᔪᓂᒃ ᐊᐅᓪᓚᑎᑦᓯᒍᓐᓇᐅᑎᑖᕐᓗᓂ ᐆᒪᔪᕐᓂᒃ ᓯᓚᑖᓄᑦ ᓄᓇᕗᑦ. ᐱᔪᓐᓇᐅᑎᑖᕆᐊᖃᖅᐸᑦ. ᑲᓇᑕᐅᑉ ᒐᕙᒃᑯᖏᑦ ᐊᕕᑦᑐᖅᓯᒪᔪᓪᓘᓐᓃᑦ ᑐᓂᓯᓂᐊᖅᑐᑦ ᐱᔪᓐᓇᐅᑎᒥᒃ ᑐᑦᓯᕌᖑᑐᐊᖅᐸᑦ, ᕿᐱᓗᔾᔪᑎᑦᓴᖃᑦᓯᐊᓐᖏᑐᐊᕈᑎᒃ, ᐱᔪᓐᓇᐅᑎᓗ ᐃᓗᓕᖃᑐᐃᓐᓇᕆᐊᓕᒃ ᐃᒪᐃᓕᖓᓂᐅᒋᐊᓕᓐᓂᒃ ᓴᖅᑭᖅᑕᐅᓯᒪᓂᖏᑦ ᒪᓕᓪᓗᒋᑦ ᒪᓕᒐᖅᑎᒍᑦ ᐃᓘᓐᓇᐃᓄᑦ ᐊᑑᑎᔪᑦ. ᐆᒪᔪᖅᑕᐅᓯᒪᔪᖅ ᐱᓯᒪᓐᖏᑐᐊᖅᐸᑦ, ᐊᒥᐊᒃᑯᓂᒃ, ᐊᑭᓖᒋᐊᖃᕐᓂᖅ ᐱᔪᓐᓇᐅᑎᖃᕆᐊᖃᕐᓂᕐᓗ ᐊᑐᖅᑎᑕᐅᔾᔮᖏᑦᑐᑦ.

5.7.32

ᑖᒃᑯᐊᖑᒐᓗᐊᖅᑎᓪᓗᒋᑦ ᐃᓱᒪᖅᓱᕐᓗᓂ ᑐᓂᓯᒍᓐᓇᕐᓂᐅᔪᑦ 5.7.30-ᒥ, ᐃᖃᓗᑐᐃᓐᓇᐃᑦ ᓂᐅᕕᐊᑦᓴᐅᓂᖏᓐᓄᑦ ᑯᐊᐳᕇᓴᒃᑯᑦ ᑎᒍᒥᐊᑕᑐᐃᓐᓇᕆᐊᓖᑦ ᓂᐅᕕᐊᑦᓴᖃᕐᓂᕐᒥᒃ ᐃᖃᓗᑐᐃᓐᓇᕐᓂᒃ ᓯᓚᑖᓄᑦ ᓄᓇᕗᑦ. ᐃᓄᐃᑦ ᓈᒻᒪᑦᓴᖏᑦᑐᑦ ᒫᓐᓇ ᐊᐅᓚᓂᖏᓐᓂᒃ ᑎᒥᐅᔫᑉ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑎᒍᒥᐊᕐᓂᐊᖅᑐᑦ ᖃᐅᔨᕐᓴᓂᕐᒥᒃ ᐃᓱᒫᓘᑕᐅᔪᓂᒃ ᐃᓄᓐᓄᑦ ᖃᐅᔨᒃᑲᐃᓐᓂᐊᖅᓱᑎᓪᓗ ᒥᓂᔅᑕᒥᒃ ᐊᐅᓚᔾᔭᒍᑕᐅᒋᐊᓕᓐᓄᑦ.

5.7.33

ᐃᓄᐃᑦ ᒪᓕᒋᐊᓖᑦ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑦᑐᐊᔪᓂᒃ ᓂᐅᕕᖅᑎᑦᓯᓂᕐᒧᑦ ᒪᓂᒪᑎᑦᓯᓂᕐᒧᓪᓘᓐᓃᑦ ᓂᐅᕕᐊᑦᓴᐅᓂᖏᓐᓄᑦ ᓇᐅᑐᐃᓐᓇᐃᑦ ᑎᒻᒥᐊᑦ ᑐᓛᔪᑦ, ᑐᓛᔪᑦ ᒪᓐᓂᖏᑦ, ᓱᑯᑦᓯᖏᓪᓘᓐᓃᑦ.

5.7.34 - ᑐᓂᕐᕈᑎᖃᕐᓂᖅ

ᑐᓐᖓᕕᒋᑦᓱᒋᑦ 5.7.3 ᐃᓄᓪᓚᕆᒃ, ᐊᒻᒪᓗ ᑐᓐᖓᕕᒋᑦᓱᒋᑦ 5.7.6, ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐅᕝᕙᓗ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᑦ ᐃᒪᐃᑦᓱᓐᓇᖅᑐᑦ, ᐋᒡᒐᐅᒐᓗᐊᖅ ᐱᕕᖃᑦᑎᑐᐅᓂᒃᑯᑦ 5.7.35-ᒥ:

(a)

ᑐᓂᕐᕈᑎᖃᕈᓐᓇᖅᑐᑦ ᐊᖑᓇᓱᒍᓐᓇᕐᓂᒥᒃ ᐅᑯᓄᖓ

(i)

ᐃᓄᓪᓚᕆᒻᒧᑦ, ᐅᕝᕙᓗ

(ii)

ᐊᐃᑉᐸᖓᓄᑦ ᐃᓪᓗᒥᐅᖃᑎᖓᓘᓐᓃᑦ ᐃᓄᓪᓚᕆᐅᑉ,

ᐊᒻᒪᓗ ᐃᓘᓐᓇᖏᓐᓂ ᑐᓂᕐᕈᑕᐅᔪᓂᒃ ᐊᖑᓇᓱᒍᓐᓇᕐᓂᕐᒥᒃ ᐱᖃᓯᐅᑎᓂᐊᕐᒥᔪᖅ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᓂᒃ ᑕᐃᒫᒃ ᐅᖃᖅᑕᐅᓯᒪᒻᒪᑕ ᑐᓂᕐᕈᑕᐅᔪᒥ; ᐊᒻᒪᓗ

(b)

ᑐᓂᕐᕈᑎᖃᕐᓗᓂ ᐃᓚᖓᓂᒃ ᐃᓘᓐᓇᖓᓂᓪᓘᓐᓃᑦ, ᐱᔭᑦᓴᒫᒥᓂᒃ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᓂᒃ ᐃᓄᓐᓄᑦ ᐊᖑᓇᓱᒍᓐᓇᖅᑐᒧᑦ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓅᖓᔪᑦ.

5.7.35

ᑕᐃᒪᐃᓕᖓᒐᓗᐊᖅᑎᓪᓗᒋᑦ 5.7.34,

(a)

ᓇᐅᑐᐃᓐᓇᖅ ᓯᕗᓂᕐᒥ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᑐᓛᔪᓂᒃ ᑎᒻᒥᐊᓂᒃ ᒪᓐᓂᖏᓐᓂᓪᓗ ᐊᑯᕐᖓᓐᓂ ᒫᑦᓯ 10 ᐊᒻᒪᓗ ᓯᑦᑕᕝᕙ 1 ᓇᓪᓕᑐᐃᓐᓇᖏᓐᓂ ᐊᕐᕌᒍᐃᑦ, ᐊᒻᒪᓗ

(b)

ᐊᖑᓇᓱᒍᓐᓇᕐᓂᐅᑎᑕᐅᔪᖅ ᐃᓛᒃᑯᑦ 11-ᒥ, ᑎᑎᕋᖅᓯᒪᔪᖅ 3 ᐅᐃᒍᖓᓂ ᑐᓛᔪᓄᑦ ᑎᒻᒥᐊᓄᑦ ᒪᓕᒐᕐᔪᐊᓂ, R.S.C 1985, c.M-7, ᑐᓂᕐᕈᑕᐅᒍᓐᓇᖏᑦᑐᑦ ᐃᓄᓐᓄᑦ ᐅᖃᐅᓯᐅᔪᓄᑦ 5.7.34(b)-ᒥ, ᐋᒡᒐᐅᒐᓗᐊᖅ ᐱᕕᖃᖅᑎᑕᐅᒍᑎᒃ ᒪᓕᒐᕐᓄᑦ ᐃᓘᓐᓇᐃᓐᓅᖓᔪᓄᑦ.

5.7.36

ᓱᓕᓪᓚᕆᓐᓂᕋᓚᐅᖅᑎᓪᓗᒍ ᑐᓂᕐᕈᑎᖃᕐᓂᕐᒧᑦ ᐊᑖᓂ 5.7.34(b), ᓚᐃᓴᓐᓯ ᐱᔾᔪᑎᑦᓴᖃᑦᓯᐊᖏᑦᑐᓄᑦ ᓄᖅᑲᖓᑎᑕᐅᔾᔮᖏᑦᑐᖅ ᓱᓕᓪᓚᕆᓐᓂᕋᖅᓱᓂ ᑐᓂᕐᕈᑎᖃᖅᓯᒪᔪᒧᑦ ᐃᓄᓪᓚᕆᒻᒧᑦ, ᑭᖑᕚᖑᓂᒃᑯᑦ ᐱᖅᑯᓯᒃᑯᓘᓐᓃᑦ. ᑕᐃᒪᐃᑦᑐᐃᑦ ᓚᐃᓴᓐᓰᑦ ᑐᓂᔭᐅᓂᐊᖅᑐᑦ ᐊᑭᖃᖅᑎᓐᓇᒋᑦ.

5.7.37

ᐊᐃᑦᑐᖅᑕᖅ ᐅᖃᐅᓯᐅᔪᖅ 5.7.34(a)-ᒥ ᑐᓐᖓᕕᖃᕐᓂᐊᑦᑐᑦ ᑖᒃᑯᓇᓐᖓᑦᓴᐃᓐᓇᖅ ᐊᐳᖅᑕᕐᕕᖏᓐᓂᒃ ᐊᐃᑦᑐᐃᔫᑉ.

5.7.38

ᑐᓂᔭᐅᓂᖓ ᐃᓚᖓᑕ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᐱᔭᐅᔪᑦ ᐊᑖᓂ 5.6.39 ᐅᕝᕙᓗ 5.6.45 ᑐᓐᖓᕕᖃᕐᓂᐊᑦᑐᑦ ᑐᑭᖏᓐᓂᒃ ᐃᒪᐃᓕᖓᓂᐅᔪᓂᓪᓘᓐᓃᑦ ᐊᑖᓂ ᐊᖑᓇᓱᒍᓐᓇᕐᓂᖅ ᐱᔭᐅᕕᖓᑕ.

5.7.39

ᑐᓂᕐᕈᑕᐅᔪᖅ ᐃᓄᒻᒧᑦ ᐊᖑᓇᓱᒍᓐᓇᕐᓂᕐᒧᑦ ᐊᑯᓐᓂᖃᔾᔮᖏᑦᑐᖅ, ᐱᖃᓯᐅᑎᑦᓱᓂ ᓄᑖᕈᕆᐊᕆᒍᓐᓇᕐᓂᖅ, ᐅᖓᑖᓄᑦ ᐊᕐᕌᒍᓪᓗᐊᑉ. ᑐᓂᕐᕈᑕᐅᔪᖅ ᐊᕐᕌᒍᓕᒫᑉ ᐅᖓᑖᓅᖓᔪᖅ ᐊᑑᑎᖃᔾᔮᖏᑦᑐᖅ.

5.7.40

ᑐᓂᕐᕈᑕᐅᔪᖅ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐅᕝᕙᓗ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᑦ ᐊᖑᓇᓱᒍᓐᓇᕐᓂᖓ ᐊᑯᓐᓂᖃᔾᔮᖏᑦᑐᖅ, ᐱᖃᓯᐅᑎᑦᓱᓂ ᓄᑖᕈᕆᐊᕆᓂᖅ, ᐊᕐᕌᒎᑉ ᐅᖓᑖᓄᑦ. ᑐᓂᓯᓂᐅᔪᖅ ᐊᕐᕌᒍᓕᒫᑉ ᐅᖓᑖᓄᑦ ᐊᑑᑎᖃᔾᔮᖏᑦᑐᖅ.

5.7.41

ᖃᓄᐃᑦᑐᑐᐃᓐᓇᐃᑦ ᓵᓚᖃᐅᓯᐊᖑᔪᑦ ᐊᑭᖏᑦ ᐆᒪᔪᖅᑕᐅᔪᓄᑦ ᓄᓇᕗᒻᒥ ᐋᖅᑭᑦᑕᐅᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.

5.7.42 - ᐃᓕᖅᑯᓯᕆᔭᐅᒍᓐᓇᖅᑐᑦ ᐊᖑᓇᓱᓂᕐᒧᑦ ᐆᒪᔪᕐᓂᒃ

ᐃᓄᓪᓚᕆᒃ ᑐᓂᕐᕈᓯᐊᖅᑐᕐᓘᓐᓃᑦ ᑐᓐᖓᕕᖃᖅᓱᓂ 5.7.34(a) ᐃᖅᑲᓇᐃᔭᖅᑎᑦᓯᒍᓐᓇᖅᑐᑦ ᖃᓄᐃᑦᑐᑐᐃᓐᓇᕐᒧᑦ ᐊᐅᓚᓂᐅᔪᒧᑦ ᐊᖑᓇᓱᓪᓗᓂ ᑐᓐᖓᕕᒋᑦᓱᒋᑦ ᑐᑭᖏᑦ ᐆᒪ ᐃᓛᒃᑰᖅᑑᑉ ᐃᒪᐃᓐᖏᑦᑐᖅ:

(a)

ᐊᐳᖅᓯᒪᓂᖃᓐᖏᓪᓗᓂ ᑰᑕᖃᓐᖏᑦᑐᓄᑦ ᑭᓪᓕᒋᔭᐅᔪᓄᑦ, ᖃᓄᐃᑦᑐᓂᖏᓐᓄᑦ ᐊᐅᓚᓂᖏᓐᓄᓪᓗ ᐊᖑᓇᓱᓐᓂᐅᔪᑦ ᓴᖅᑭᖅᑕᐅᔪᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐱᔾᔪᑎᖃᑦᓯᐊᕐᓗᑎᒃ ᓴᐳᔾᔨᓂᕐᒥᒃ ᐊᑖᓂ 5.6.48 ᑎᑭᑦᓱᒍ 5.6.51;

(b)

ᐊᐳᖅᓯᒪᓂᖃᓐᖏᓪᓗᓂ ᒪᓕᒐᕐᓄᑦ ᐃᓘᓐᓈᒍᑦ ᐊᑦᑐᐊᔪᓄᑦ ᐱᔾᔪᑎᖃᖅᑐᓄᑦ ᓇᓪᓕᒍᓱᑦᑎᐅᔪᑦ ᐆᒪᔪᕐᓂᒃ, ᑭᓇᒃᑯᑐᐃᓐᓇᐃᑦ ᐊᑦᑕᓇᑦᑕᐃᓕᒪᓂᖏᓐᓂᒃ ᖁᑭᐅᑏᓪᓗ ᐊᐅᓚᑕᐅᓂᖏᓐᓂᒃ; ᐅᕝᕙᓗ

(c)

ᓱᕋᐃᒍᑕᐅᓂᐊᓐᖏᑐᐊᖅᐸᑦ ᐊᕙᑎᒥᒃ.

5.7.43 - ᖃᐅᔨᒪᔭᐅᒋᐊᓕᓐᓂᒃ ᑐᓴᐅᒪᔭᐅᑎᑦᓯᓂᖅ

ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐊᓯᓕᒫᖏᑦ ᐊᖏᕈᑎᒥ, ᓇᐅᑐᐃᓐᓇᖅ ᐃᓄᓪᓚᕆᒃ ᑐᑦᓯᕋᕐᕕᐅᑐᐃᓐᓇᕆᐊᓕᒃ ᒐᕙᒪᒃᑯᓐᓂ ᑎᒥᐅᔪᓂᒃ ᑐᓴᕋᑦᓴᓂᒃ ᐊᑐᐃᓐᓇᐅᑎᑦᓯᖁᔭᐅᓗᓂ ᐱᔾᔪᑎᖃᖅᑐᓂᒃ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᓂᒃ ᐅᕝᕙᓗ ᐊᖑᓇᓱᓐᓂᕐᒧᑦ ᐊᑦᑐᐊᔪᓂᒃ ᐊᐅᓚᓂᐅᔪᓂᒃ ᒪᓕᒐᐃᑦ ᐃᓘᓐᓇᐃᓐᓅᖓᔪᑦ ᐱᔭᕆᐊᖃᖅᑎᑦᓯᒻᒪᑕ ᐊᖑᓇᓱᑦᑎᓂᒃ ᐃᓄᓪᓚᕇᑦ ᐊᓯᖏᓐᓄᑦ ᑕᐃᒫᑦᓴᐃᓐᓇᖅ ᐊᑐᐃᓐᓇᐅᑎᑦᓯᖁᓪᓗᒋᑦ ᐊᔾᔨᒐᓚᖏᓐᓂᒃ.

5.7.44 - ᑲᔪᓯᑎᑦᓯᓂᖅ

ᐊᑭᓕᕆᐊᖃᖅᑎᑦᓯᒍᑕᐅᔪᑦ ᐃᓄᓐᓄᑦ ᐊᑦᑐᐊᔪᑦ ᐊᖑᓇᓱᓐᓂᕐᒧᑦ ᐊᐅᓚᓂᖃᕐᓗᓂ ᓈᒻᒪᓈᓐᖏᑦᑐᓄᑦ ᐊᖏᕈᑎᒧᑦ, ᑐᓐᖓᕕᓪᓗᐊᑕᐅᔪᓗᓂ, ᓈᒻᒪᓈᖅᓯᒪᒋᐊᓕᒃ ᐊᔾᔨᐅᓗᓂ, ᐱᔭᐅᓂᖅᓴᐅᒋᐊᖃᓐᖏᑦᑐᖅ ᐊᑦᑐᐊᔪᓄᑦ ᐊᖑᓇᓱᑦᑎᓄᑦ ᐃᓄᓪᓚᕇᑦ ᐊᓯᖏᓐᓄᑦ ᑕᐃᒫᓐᓴᐃᓐᓇᖅ ᐊᑐᐃᓐᓇᐅᑎᑦᓯᖁᓪᓗᒋᑦ ᐊᔾᔨᒐᓚᖏᓐᓂᒃ.

ᐃᓚᖓ 8

ᐱᔪᓐᓇᐅᑏᑦ ᓯᕗᓪᓕᖅᐹᒥ ᕿᐱᓗᓐᓂᕐᒧᑦ ᐊᑐᕐᓂᕐᒧᓪᓗ ᒐᕙᒪᒃᑯᑦ ᓄᓇᖁᑎᖏᓐᓂᒃ

5.8.1 - ᖁᕕᐊᒋᓪᓗᒍ ᐊᖑᓇᓱᑦᑏᑦ ᑲᔾᔮᖅᑏᓪᓘ ᓇᔪᒐᖏᑦ

ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑎᒥᖁᑎᖏᑦ ᐱᔪᓐᓇᕐᓂᓖᑦ ᓯᕗᓪᓕᖅᐹᒥ ᕿᐱᓗᒍᓐᓇᖅᓱᑎᒃ ᓴᖅᑮᓂᕐᒥᒃ ᓄᑖᓂᒃ ᑲᔾᔮᕆᐊᖅᓯᒪᔪᓄᑦ ᖁᕕᐊᒋᔭᓕᓐᓄᓪᓗ ᓇᔪᒐᕐᓂᒃ ᓄᓇᕗᒻᒥ ᑐᓐᖓᕕᖃᕈᓐᓇᖅᓱᑎᒃ ᑭᓯᐊᓂ ᐅᑯᓇᓐᖓᑦ:

(a)

ᒐᕙᒪᒃᑯᑦ ᐅᖃᐅᓯᖃᕆᐊᑐᓐᖏᑦᑐᑦ ᓱᓇᑐᐃᓐᓇᕐᓂᒃ ᑐᑦᓯᕋᐅᑎᓃᑦᑐᓂᒃ ᑐᓂᔭᐅᓯᒪᔪᓂᒃ ᓱᓕᔪᕐᓇᖅᑐᖁᑎᒋᔭᐅᑦᓱᑎᒃ ᑲᓐᖑᓇᖅᑑᑎᑕᐅᓂᐊᕆᐊᖏᑦ;

(b)

ᓱᓇᓕᒫᓂᒃ ᐊᕙᑎᒨᖓᔪᓂᒃ ᖃᑭᒪᓇᓱᐊᕈᑕᐅᔪᓅᖓᔪᓂᓪᓗ ᐊᑐᐃᓐᓇᐅᔪᓂᒃ ᓇᓪᓕᑐᐃᓐᓇᖏᓐᓄᑦ ᒐᕙᒪᒃᑯᓐᓂ ᑎᒥᐅᔪᑦ ᐃᒻᒥᒃᑰᖓᔪᑦ ᑐᑦᓯᕋᐅᒻᒥᒃ ᑭᓯᐊᓂ ᐊᑑᑎᔪᑦ ᑕᕝᕙᓂ ᐊᑐᐃᓐᓇᐅᑎᑕᐅᓂᐊᑦᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐱᔪᓐᓇᐅᑎᓕᓐᓄᑦ ᓯᕗᓪᓕᖅᐹᒥ ᕿᐱᓗᓐᓂᕐᒥᒃ;

(c)

ᐃᓘᓐᓈᒍᑦ ᐱᕕᑦᓴᖃᕐᓂᐅᔪᑦ ᐊᐅᓚᓂᐅᒋᐊᓖᓪᓗ ᒪᓕᓪᓗᒋᑦ ᒫᓐᓇ ᐊᐅᓚᓂᐅᔪᑦ ᐊᒻᒪᓗ, ᓇᓗᓇᐃᕆᐊᕐᓗᒍ, ᐊᐅᓚᓂᖏᑦ ᓇᓗᓇᔭᐃᖅᑕᐅᔪᑦ ᐅᐃᒍᖏᓐᓂ 5-6 ᒪᓕᑦᑕᐅᒋᐊᖃᕐᓂᐊᖅᑐᑦ; ᐊᒻᒪᓗ

(d)

ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐱᔪᓐᓇᐅᑎᒥᓂᒃ ᐊᑐᕐᓗᑎᒃ ᓯᕗᓪᓕᖅᐹᒥ ᕿᐱᓗᑉᐸᑕ, ᑭᓯᐊᓂ ᓴᖅᑮᖏᒃᑯᑎᒃ ᓄᑖᕐᒥᒃ ᖁᕕᐊᒋᓗᒍ ᐊᖑᓇᓱᑦᑎᓄᑦ ᑲᔾᔮᖅᑎᓄᓪᓗ ᒪᓕᓪᓗᒋᑦ ᐅᐃᒍᐃᑦ 5-6 ᐱᔾᔪᑎᑦᓴᖃᑦᓯᐊᖏᓪᓗᑎᒃ, ᒥᓂᔅᑕ ᓇᓗᓇᐃᖅᓯᒍᓐᓇᖅᑐᖅ ᓯᕗᓪᓕᖅᐹᒥ ᕿᐱᓗᒍᓐᓇᕐᓂᐅᔪᖅ ᐊᓂᒍᖅᓯᒪᓕᕆᐊᖓ; ᑕᐃᒪᐃᒐᔭᕐᓂᖅᐸᑦ, ᓄᓇ ᐊᑐᐃᓐᓇᕈᖅᑎᑕᐅᒍᓐᓇᖅᑐᖅ ᐊᓯᖏᓐᓄᑦ ᑐᑦᓯᕋᖅᓯᒪᔪᓄᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᖃᔾᔮᒍᓐᓃᖅᑐᑦ ᕿᐱᓗᓐᓂᕐᒥᒃ ᑐᑦᓯᕋᖅᑐᓄᑦ, ᐋᒡᒐᐅᒐᓗᐊᖅ ᐃᓱᒪᖅᓲᑎᒋᔭᖓᓂ ᒥᓂᔅᑕᐅᑉ.

5.8.2

ᑐᑦᓯᕋᖅᑐᖃᖅᐸᑦ, ᒐᕙᒪᒃᑯᑦ ᐊᑐᖅᑐᐊᑎᑦᓯᓂᐊᖅᑐᑦ, ᐊᑭᖃᖅᑎᓪᓗᒍ ᐊᑐᖅᑐᐊᕈᑕᐅᒐᔪᑦᑐᒥᒃ, ᓈᒻᒪᑦᑐᓂᒃ ᓄᓇᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐱᔭᕆᐊᖃᕐᓂᖏᑦ ᒪᓕᓪᓗᒋᑦ ᓴᖅᑮᓂᕐᒧᑦ ᐊᒻᒪᓗ ᐊᐅᓚᑦᓯᓂᕐᒧᑦ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᑲᔾᔮᖅᑎᓄᓪᓗ ᓇᔪᒐᕐᓂᒃ.

5.8.3

ᐃᓘᓐᓇᑎᒃ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᑲᔾᔮᖅᑎᓄᓪᓗ ᓇᔪᒐᐃᑦ ᐅᖃᐅᓯᐅᔪᑦ 5.8.1-ᒥ ᐊᒻᒪᓗ 5.8.2-ᒥ ᒪᓕᒐᐅᓂᐊᖅᑐᑦ ᐃᓘᓐᓇᐃᓐᓄᑦ ᑐᑦᓯᕋᐅᑎᒧᑦ.

5.8.4 - ᐊᒥᓱᕈᖅᓰᓂᖅ ᐆᒪᔪᕐᓂᒃ, ᐱᕈᖅᓰᓂᖅ ᐱᕈᖅᓰᕕᖃᐅᓯᕆᓂᕐᓗ

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᐅᑎᓖᑦ ᓯᕗᓪᓕᖅᐹᒥ ᕿᐱᓗᓐᓂᕐᒥᒃ ᓴᖅᑮᓂᕐᒧᑦ ᐊᐅᓚᑦᓯᓂᕐᒧᓪᓗ ᓇᔪᒐᕐᓂᒃ, ᐊᓯᖏᓐᓂᒃ ᒐᕙᒪᒃᑯᑦ ᐃᓪᓗᖁᑎᖏᑦᑕ, ᐱᔾᔪᑕᐅᓪᓗᑎᒃ ᐆᒪᔪᐃᑦ ᑐᑦᑐᕙᐃᓪᓗ ᐱᕈᖅᓴᔭᐅᓂᖏᑦ. ᐃᒪᐃᓕᖓᓂᐅᔪᑦ ᐅᖃᐅᓯᐅᔪᑦ 5.8.1(a)-ᒥ, ᐊᒻᒪᓗ (b) ᐊᑦᑐᐊᔪᑦ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᑲᔾᔮᖅᑎᓄᓪᓗ ᓇᔪᒐᐃᑦ ᐊᑑᑎᓂᐊᖅᑐᑦ. ᐊᐅᓚᓂᐅᔪᑦ ᐱᕕᑦᓴᖃᕐᓂᐅᔪᓪᓗ ᒪᓕᑦᑐᑦ ᒫᓐᓇ ᐊᐅᓚᓂᐅᔪᓄᑦ ᐊᔾᔨᒐᓚᖏᑦ ᑕᐃᒃᑯᐊ ᓇᓗᓇᐃᖅᑕᐅᓯᒪᔪᑦ ᐅᐃᒍ 5-6-ᒥ ᐊᑐᕐᓂᐊᖅᑐᑦ.

5.8.5

ᑐᑦᓯᕋᖅᑐᖃᖅᐸᑦ, ᒐᕙᒪᒃᑯᑦ ᐊᑐᐃᓐᓇᐅᑦᓯᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐊᑭᑐᓗᐊᖅᑎᓐᓇᒋᑦ, ᓄᓇᓂᒃ ᓇᒻᒪᑦᑐᓂᒃ, ᐱᔭᕆᐊᓕᓐᓂᓪᓗ ᐱᔾᔪᑕᐅᓪᓗᓂ ᓴᖅᑮᓂᖅ ᐊᐅᓚᑦᓯᓂᕐᓗ ᐃᓪᓗᓂᒃ ᐱᕈᖅᓰᕕᑦᓴᓂᒃ ᐆᒪᔪᕐᓂᒃ ᑐᑦᑐᕙᓐᓂᓘᓐᓃᑦ. ᓄᓇᐃᑦ ᑐᓂᔭᐅᓂᐊᖅᑐᑦ ᐊᑐᖅᑐᐊᑕᐅᓗᑎᒃ ᓚᐃᓴᓐᓯᖃᕈᑕᐅᓗᑎᓪᓘᓐᓃᑦ ᐊᑐᓕᖅᑎᑦᓯᒍᑕᐅᓗᓂ ᑐᕌᒐᕆᔭᐅᔪᓂᒃ 5.8.4-ᒥ ᐅᕙᓂᓗ ᑎᑎᕋᖅᓯᒪᔪᒥ.

5.8.6

ᐊᐅᓚᓂᓕᒫᑦᓯᐊᑦ ᐱᕈᖅᓴᐃᓂᖅ ᐱᔾᔪᑕᐅᓗᓂ ᐆᒪᔪᕐᓂᒃ ᑐᑦᑐᕙᓐᓂᓪᓗ ᐅᖃᐅᓯᔪᓂᒃ 5.8.4-ᒥ 5.8.5-ᒥᓗ ᐊᑦᑐᐊᓂᐊᖅᑐᑦ ᒪᓕᒐᕐᓄᑦ ᐃᓘᓐᓇᐃᓐᓄᑦ ᐊᑦᑐᐊᔪᓄᑦ.

5.8.7 - ᓂᐅᕕᐊᑦᓴᖃᕐᓂᖅ ᐆᒪᔪᕐᓂᒃ ᓄᓇᕗᒻᒥ

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᓖᑦ ᓯᕗᓪᓕᖅᐹᒥ ᕿᐱᓗᓐᓂᕐᒥᒃ ᓂᐅᕕᐊᑦᓴᖃᕐᓂᕐᒧᑦ ᐆᒪᔪᕐᓂᒃ, ᐆᒪᔪᐃᑦ ᓱᑯᑦᓯᖏᓐᓂᒃ ᐆᒪᔪᒥᓂᕐᓂᓪᓗ ᓄᓇᕗᒻᒥ. ᐃᒪᐃᓕᖓᓂᐅᔪᑦ ᐅᖃᐅᓯᐅᔪᑦ 5.8.1(a) ᐊᒻᒪᓗ (b) ᐊᑦᑐᐊᔪᑦ ᖁᕕᐊᒋᓪᓗᒍ ᐊᖑᓇᓱᑦᑐᓄᑦ ᑲᔾᔮᖅᑎᓄᓪᓗ ᓇᔪᒐᕐᓄᑦ ᐊᑑᑎᓂᐊᖅᑐᑦ. ᐊᐅᓚᓂᐅᔪᑦ ᐱᕕᑦᓴᖃᕐᓂᐅᔪᓪᓗ ᒪᓕᑦᑐᑦ ᒫᓐᓇ ᐊᐅᓚᓂᐅᔪᓂᒃ ᐊᔾᔨᒐᓚᖏᓪᓗ ᐅᐃᒍᒥ 5-6-ᒥ ᐊᑑᑎᓂᐊᖅᑐᑦ.

5.8.8

ᐃᓪᓗᓕᒫᑦ ᓂᐅᕕᐊᑦᓴᖃᕐᕕᐅᔪᑦ ᐆᒪᔪᕐᓂᒃ, ᐆᒪᔪᐃᑦ ᓱᑯᑦᓯᖏᓐᓂᒃ ᐆᒪᔪᒥᓂᕐᓂᓪᓗ ᐅᖃᐅᓯᐅᔪᓂᒃ 5.8.7-ᒥ ᐊᑦᑐᐊᓂᖃᖅᑐᑦ ᒪᓕᒐᕐᓄᑦ ᐃᓘᓐᓇᐃᓐᓄᑦ ᐊᑦᑐᐊᔪᓄᑦ.

5.8.9 - ᐆᒪᔪᐃᑦ ᓱᑯᑦᓯᖏᑦ ᐆᒪᔪᒥᓃᓪᓗ

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᓖᑦ ᓯᕗᓪᓕᖅᐹᒥ ᕿᐱᓗᓐᓂᕐᒥᒃ ᑲᔪᓯᑎᑕᐅᒍᒪᔪᖃᖅᐸᑦ ᐱᓇᓱᐊᕐᓂᕐᒥᒃ ᑐᕌᒐᖃᖅᑐᒥᒃ ᑮᓇᐅᔭᓕᐅᕈᑕᐅᓂᖏᓐᓂᒃ ᓴᓇᔭᐅᓂᖏᓐᓂᓘᓐᓃᑦ ᓂᕆᔭᑦᓴᐅᓐᖏᑦᑐᑦ ᐆᒪᔪᐃᑦ ᓱᑯᑦᓯᖏᑦ ᐆᒪᔪᒥᓂᕐᓂᓪᓗ. ᐱᔪᓐᓇᐅᑎ ᓯᕗᓪᓕᖅᐹᒥ ᕿᐱᓗᓐᓂᕐᒧᑦ ᑎᑭᐅᒪᓂᐊᖅᑐᖅ ᓂᕆᔭᑦᓴᐅᓐᖏᑦᑐᓄᑦ ᐆᒪᔪᐃᑦ ᓱᑯᑦᓯᖏᓐᓄᑦ ᐊᑐᐃᓐᓇᐅᓚᕿᔪᓄᑦ ᑐᖁᑕᐅᔪᖃᓚᐅᖅᑎᓪᓗᒍ ᐅᕝᕙᓗ ᐅᑎᖅᑎᑕᐅᒍᓐᓇᑎᓪᓗᒋᑦ ᐆᒪᓐᖏᒃᑲᓗᐊᖅᑎᓪᓗᒋᑦ. ᐃᒪᐃᓕᖓᓂᐅᔪᑦ ᐅᖃᐅᓯᐅᔪᑦ 5.8.1(a)-ᒥ ᐊᒻᒪᓗ (b)-ᒥ ᐊᑦᑐᐊᔪᑦ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᑲᔾᔮᖅᑎᓄᓪᓗ ᓇᔪᒐᕐᓄᑦ ᐊᑑᑎᓂᐊᖅᑐᑦ. ᐊᐅᓚᓂᐅᔪᑦ ᐱᕕᑦᓴᖃᕐᓂᐅᔪᓪᓗ ᒪᓕᓐᓂᕐᒧᑦ ᒫᓐᓇ ᐊᐅᓚᓂᐅᔪᓂᒃ ᐊᔾᔨᒐᓚᖏᓐᓂᓪᓗ ᓇᓗᓇᐃᔭᖅᑕᐅᓯᒪᔪᑦ ᐅᐃᒍ 5-6-ᒥ ᐊᑑᑎᓂᐊᖅᑐᑦ.

5.8.10 - ᐊᓯᔾᔨᕐᓂᖏᑦ

ᐱᔪᓐᓇᐅᑏᑦ ᓯᕗᓪᓕᖅᐹᒥ ᕿᐱᓗᓐᓂᕐᒧᑦ ᐅᖃᐅᓯᐅᔪᑦ 5.8.4-ᒥ, 5.8.7-ᒥ 5.8.9-ᒥᓗ ᐊᑐᓐᖏᑦᑐᑦ ᑮᓇᐅᔭᓕᐅᕋᓱᐊᖅᑎᐅᕙᑦᑐᓄᑦ ᑕᕝᕙᐅᒌᖅᑐᓄᑦ ᐊᖏᕈᑕᐅᑎᓪᓗᒍ ᐊᖏᕈᑎ ᓄᑖᕈᕆᐊᖅᑕᐅᔪᓪᓘᓐᓃᑦ ᑕᐃᑲᓐᖔᖅᑐᑦ.

ᐃᓚᖓ 9

ᓄᓇᕐᔪᐊᕐᒥ ᐆᒪᔪᓕᕆᖃᑎᒌᓐᓂᕐᒧᓪᓗ ᐊᖏᕈᑏᑦ

5.9.1

ᓇᐅᑐᐃᓐᓇᖅ ᒪᓕᒐᖅ ᐊᑐᓕᖅᑎᑦᓯᒍᑕᐅᔪᖅ ᓄᓇᕐᔪᐊᕐᒥ ᐆᒪᔪᓕᕆᖃᑎᒌᓐᓂᕐᒧᓪᓘᓐᓃᑦ ᐊᖏᖃᑎᒌᒍᑏᑦ ᑐᑭᓕᐅᖅᑕᐅᓂᐊᖅᑐᑦ ᐊᐅᓚᑕᐅᓗᓂᓗ ᐱᐅᓯᖃᕐᕕᐅᓗᑎᒃ ᐃᓄᐃᑦ ᐃᑲᔪᖅᑐᖅᑕᐅᓗᑎᒃ ᑕᐃᒫᑦᓴᐃᓐᓇᖅ ᓄᓇᖃᖅᑳᖅᓯᒪᔫᔪᑎᑐᑦ ᑲᓇᑕᒥ.

5.9.2

ᒐᕙᒪᒃᑯᖏᑦ ᑲᓇᑕᐅᑉ ᐱᖃᓯᐅᔾᔨᓂᐊᖅᑐᑦ ᐃᓄᐃᑦ ᑭᒡᒐᖅᑐᐃᔨᖃᖅᑎᓪᓗᒋᑦ ᐅᖃᖃᑎᒌᓐᓂᐅᔪᓂ ᑎᑭᐅᑎᔪᓄᑦ ᓴᖅᑭᖅᑕᐅᓂᖏᓐᓄᑦ ᒐᕙᒪᒃᑯᓐᓂ ᐃᖅᑲᓇᐃᔮᑦ ᐊᑦᑐᐊᔪᑦ ᓄᓇᕐᔪᐊᕐᒥ ᐊᖏᖃᑎᒌᒍᑎᓄᑦ ᐊᑦᑐᐊᔪᓄᑦ ᐃᓄᐃᑦ ᐆᒪᔪᖏᓐᓂᒃ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᓄᑦ ᓄᓇᕗᒻᒥ, ᐅᖃᖃᑎᒌᓐᓂᐅᔪᑦ ᐅᖓᑖᓅᕐᓂᐊᖅᑐᑦ ᑖᒃᑯᐊ ᐅᖃᖃᑎᒌᓐᓂᐅᒐᔪᑉᐸᑦᑐᑦ ᒐᕙᒪᐅᓐᖏᑦᑐᓄᑦ ᑎᒥᐅᔪᓄᑦ.

5.9.3

ᐃᓄᐃᑦ ᑭᒡᒐᖅᑐᐃᔪᑦ ᐅᖃᐅᓯᐅᔪᑦ 5.9.2-ᒥ ᓂᕈᐊᕋᑦᓴᓕᐊᖑᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.

5.9.4

ᑐᓐᖓᕕᒋᑦᓱᒍ 5.9.1, ᐊᖑᓇᓯᓐᓂᓕᒫᑦ ᓄᓇᕗᒻᒥ ᐊᑦᑐᐊᓂᐊᖅᑐᑦ ᒪᓕᒐᕐᓄᑦ ᐊᑐᓕᖅᑎᑦᓯᒍᑕᐅᔪᓄᑦ ᐃᒪᐃᓕᖓᓂᖏᓐᓄᑦ ᓄᓇᕐᔪᐊᕐᒥ ᐊᖏᖃᑎᒌᒍᑎᒦᑦᑐᑦ ᑕᕝᕙᐅᒌᖅᓯᒪᔪᑦ ᐅᓪᓗᖓᓂ ᐊᖏᕈᑕᐅᑎᓪᓗᒍ ᐊᖏᕈᑎ.

5.9.5

ᒐᕙᒪᒃᑯᑦ ᐊᖏᖃᑎᖃᖅᐳᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑎᒍᒥᐊᕐᓂᐊᕐᒪᑕ ᐅᖃᖃᑎᖃᕈᓐᓇᕐᓂᕐᒥᒃ ᐋᖅᑭᒋᐊᕆᓂᕐᒥᓘᓐᓃᑦ ᐆᒪᔪᓕᕆᖃᑎᒌᓐᓂᕐᒧᑦ ᐊᖏᖃᑎᒌᒍᑎᓂ ᐱᒋᐊᕈᑎᖃᖅᑐᑦ ᐃᒪᐃᓕᖓᓂᕆᔭᖓᓐᓂᒃ ᑎᒍᒥᐊᕐᓂᖏᓐᓂᓪᓗ ᐊᐅᓚᑕᐅᓂᖏᓐᓂᒃ ᐆᒪᔪᐃᑦ ᓄᓇᕗᒻᒥ.

ᐅᐃᒍᖓ 5-1

ᐆᒪᔪᐸᐅᔭᐃᑦ

(ᑎᑎᕋᖅᓯᒪᔪᖅ 5.1.1 “ᐆᒪᔪᐸᐅᔭᐃᑦ”)

ᐅᐃᒍᖓ 5-2

ᒥᖅᑯᓖᑦ

(ᑎᑎᕋᖅᓯᒪᔪᑦ 5.1.1 “ᒥᖅᑯᓖᑦ”)

ᐅᐃᒍᖓ 5-3

ᑐᓛᔪᑦ ᑎᒻᒥᐊᑦ

(5.1.1 “ᑐᓛᔪᑦ ᑎᒻᒥᐊᑦ”, 5.6.5(d))

ᑐᓛᔪᑦ ᑎᒻᒥᐊᑦ ᐱᔾᔪᑕᐅᓪᓗᓂ ᐅᓇ ᐅᐃᒍ ᐱᖃᓯᐅᔾᔪᖅ ᑎᒻᒥᐊᓕᒫᓂᒃ ᑎᑎᕋᖅᑕᐅᓯᒪᔪᓂᒃ ᐃᓗᐊᓂ ᑐᓛᔪᓄᑦ

ᑎᒻᒥᐊᓄᑦ ᒪᓕᒐᕐᔪᐊᖅ, ᐊᑦᑐᐊᔪᑦ ᐊᑐᐊᒐᐃᑦ ᒪᓕᒐᐃᓪᓗ 1987-ᓂᑕᐃᑦ. ᑭᓯᐊᓂᓕ,

ᑕᐃᒃᑯᑐᐊᑦ ᑐᓛᔪᑦ ᑎᒻᒥᐊᑦ ᖃᐅᔨᒪᔭᐅᔪᑦ ᓄᓇᕗᒻᒦᖃᑦᑕᕆᐊᖏᑦ ᖃᓂᒋᔭᖓᓂᓘᓐᓃᑦ ᑎᑎᕋᖅᓯᒪᔪᑦ ᐊᑖᓂ.

ᐊᑎᖏᑦ ᑐᓛᔪᓕᒫᑦ ᑎᒻᒥᐊᑦ ᑎᑎᕋᖅᓯᒪᔪᑦ ᐊᑖᓂ ᓄᓇᕗᒻᒦᐸᑦᑐᑦ ᑕᐃᒪᐃᓐᓂᖓᓄᑦ ᑎᑎᕋᖅᑕᐅᓯᒪᔪᑦ ᐃᓕᑕᕆᑦᓱᖏᑦ ᐃᓚᖏᑦ ᐱᑕᓖᑦ ᓄᓇᕗᒻᒦᓲᖑᓐᖏᑦᑐᓂᒃ.

ᐃᓚᖓ I

ᑐᓛᔪᑦ ᑎᒻᒥᐊᑦ

ᐃᓚᖓ II

ᐊᓯᓕᒫᖏᑦ ᑐᓛᔪᑦ ᑎᒻᒥᐊᑦ ᓄᓇᕗᒻᒥ

ᐅᐃᒍᖓ 5-4

ᐊᖏᕈᑎ ᑲᑎᒪᔨᖏᓐᓄᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ

(5.2.6)

ᐅᕙᖓ, _________________________ ᓱᓕᓪᓗᖓ ᓇᓗᓇᐃᖅᓯᕗᖓ (ᓱᓕᓪᓚᕆᑉᐳᖓ) ᐊᖏᖅᐳᖓ ᓱᓕᓪᓗᖓ, ᐱᑦᓯᐊᕋᓱᐊᕐᓗᖓ ᐃᑲᔪᕈᓐᓇᕐᓂᕋᓗ ᐊᑐᕐᓗᒍ, ᐱᔪᓐᓇᕐᓂᕋ ᐊᔪᓐᖏᓐᓂᕋᓗ ᐊᑐᕐᓗᒍ, ᐱᓕᕆᐊᖃᕐᓂᐊᖅᐳᖓ ᑲᔪᓯᑎᑦᓯᓯᐊᖃᑕᐅᓂᐊᖅᐳᖓᓗ ᐱᓕᕆᐊᑦᓴᐅᔪᓂᒃ ᑲᑎᒪᔨᐅᖃᑕᐅᓂᕐᓂ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ. (ᒎᑎᐅᑉ ᐃᑲᔪᕐᓛᖓ.)

ᐅᐃᒍᖓ 5-5

ᐅᖃᐅᓯᖅᑕᖏᑦᑕ ᑐᑭᖏᑦ ᓄᓇᕗᒻᒥ ᐆᒪᔪᐃᑦ ᐊᖑᔭᐅᕙᓐᓂᖏᓐᓂᒃ ᖃᐅᔨᕐᓴᓂᕐᒧᑦ

(5.4.1)

ᖃᐅᔨᓴᓂᖅ, ᐊᐅᓚᓂᖅ, ᐋᖅᑭᑦᓯᒪᓂᖅ ᐅᓂᒃᑳᓕᐅᕐᓂᕐᓗ

ᖃᐅᔨᓴᕐᓂᐅᔪᖅ ᐊᐅᓚᓂᖃᕐᓂᐊᖅᑐᖅ ᐅᓪᓗᖅᓯᐅᑏᑦ ᑎᑎᕋᖅᑕᐅᓯᒪᖃᑦᑕᕐᓗᑎᒃ ᐊᖑᓇᓱᑦᑎᓕᒫᓄᑦ ᐆᒪᔪᓕᒫᓂᒃ ᖃᐅᑕᒫᑦ. ᑎᑎᕋᖅᑕᐅᓯᒪᔪᑦ ᐸᐸᑕᐅᓂᐊᖅᑐᑦ ᐸᕐᓇᑕᐅᓯᒪᔪᓂ ᐅᓪᓗᖅᓯᐅᑎᓂᒃ ᑐᓂᔭᐅᕙᓐᓂᐊᖅᑐᓂᒃ ᓄᓇᓕᓐᓂ ᐊᐱᖅᓱᖅᑎᐅᔪᓄᑦ. ᓄᓇᓕᓐᓂ ᐊᐱᖅᓱᖅᑏᑦ ᐊᐱᖅᓱᖃᑦᑕᕐᓂᐊᖅᑐᑦ ᑭᐅᔪᑦᓴᓂᒃ, ᑐᑭᓕᐅᕆᓗᑎᓪᓗ ᑎᑎᕋᖅᐸᓪᓗᑎᓪᓗ ᐊᖑᔭᐅᓯᒪᔪᓂᒃ ᑎᑎᕋᕐᕕᑦᓴᓄᑦ. ᖃᐅᔨᔭᐅᔪᑦ ᖃᐅᔨᓴᕐᓂᕐᒥᒃ ᐅᓂᒃᑲᖑᓂᐊᖅᑐᑦ ᑕᑯᓐᓇᖅᑕᐅᓗᑎᒃ ᓄᓇᓐᖑᐊᑎᒍᑦ. ᐱᓗᐊᖅᑐᒥᒃ, ᓇᓗᓇᐃᖅᑕᐅᓯᒪᓗᓂ ᐃᓂᖓ, ᐊᔪᕐᓇᓐᖏᒐᐃᑉᐸᑦ, ᐆᒪᔪᕐᓂᒃ ᐊᖑᔭᐅᓯᒪᔪᓂᒃ ᑎᑎᕋᖅᑕᐅᕙᓪᓗᑎᒃ. ᖃᐅᔨᓴᕐᓂᕐᒥᒃ ᑲᑎᖅᓱᐃᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᓄᓇᓕᓐᓂᒃ ᐱᕕᑦᓴᖃᖅᑎᑕᐅᓗᑎᒃ ᐊᑯᓐᓂᕐᒥᒃ.

ᐅᐃᒍᖓ 5-6

ᐱᔪᓐᓇᐅᑎ ᕿᐱᓗᓐᓂᕐᒧᑦ ᓯᕗᓪᓕᖅᐹᒥ ᖁᕕᐊᒋᓪᓗᒍ ᐊᖑᓇᓱᑦᑏᑦ ᑲᔾᔮᖅᑏᓪᓗ ᓇᔪᒐᖏᓐᓂᒃ

(5.8.1, 5.8.4, 5.8.7, 5.8.9)

ᐊᐅᓚᓂᐅᒋᐊᓖᑦ ᐊᑑᑎᔭᐅᓕᖅᐸᑦ ᐱᔪᓐᓇᕐᓂᖅ ᓯᕗᓪᓕᖅᐹᒥ ᕿᐱᓗᓐᓂᕐᒧᑦ ᑐᓐᖓᕕᒋᓗᒍ 5.8.1.

1

ᑎᑎᖅᑲᓂᒃ ᐱᔪᖃᓚᐅᖅᑎᓪᓗᒍ ᐃᓄᒻᒥᒃ ᐃᓄᓪᓚᕆᐅᑉ ᐊᓯᐊᓂᒃ ᑎᒥᐅᔪᒥᓪᓘᓐᓃᑦ ᐊᓯᐊᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᓴᖅᑮᓂᕐᒧᑦ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᑲᔾᔮᖅᑎᓄᓪᓗ ᓇᔪᒐᕐᒥᒃ, ᐊᕕᑦᑐᖅᓯᒪᔪᓂ ᒐᕙᒪᒃᑯᑦ ᖃᐅᔨᒃᑲᐃᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᑎᑎᖅᑲᑎᒍᑦ ᑕᐃᒪᐃᑦᑐᖃᕈᒪᒋᐊᖓ.

2

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐅᓪᓗᖃᕐᓂᐊᖅᑐᑦ 120-ᓂᒃ ᑎᑎᖅᑲᐅᓯᐊᕐᓚᐅᕐᓗᑎᒃ ᑎᑎᕋᖅᓯᒪᔪᖅ 1 ᐊᑖᓂ ᑐᓴᖅᑎᑦᓯᓗᑎᒃ ᐊᕕᑦᑐᖅᓯᒪᔪᓂᒃ ᒐᕙᒪᐅᔪᓂᒃ ᐱᔪᓐᓇᕐᓂᕐᒥᒍᑦ ᓯᕗᓪᓕᖅᐹᒥ ᕿᐱᓗᓐᓂᐊᕆᐊᒥᒃ.

3

ᐊᕕᑦᑐᖅᓯᒪᔪᓂ ᒐᕙᒪᐃᑦ ᐅᓪᓗᖃᕐᓂᐊᖅᑐᑦ 21-ᓂᒃ ᑎᑎᖅᑲᐅᓯᐊᓚᐅᕐᓗᑎᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᖃᐅᔨᒃᑲᐃᓪᓗᑎᒃ ᑐᑦᓯᕋᖅᓯᒪᔪᒥᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᖃᓄᐃᓕᐅᕐᓂᐊᕐᓂᖏᓐᓂᒃ.

4

ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐅᓪᓗᖃᕐᓂᐊᖅᑐᑦ 120-ᓂᒃ ᐱᔭᕇᔭᕐᕕᑦᓴᖃᕐᓗᑎᒃ ᓄᓇᓕᓐᓂ ᐃᓱᒪᓯᐅᕆᒋᐊᖃᕈᑎᒃ ᑎᑎᕋᖅᑕᐅᒃᑲᐃᓪᓗᑎᓪᓗ ᓇᓗᓇᐃᖅᑕᐅᓯᒪᔪᒥᒃ ᑐᑦᓯᕋᐅᑎᒥᒃ ᐊᕕᑦᑐᖅᓯᒪᔪᓂ ᒐᕙᒪᓄᑦ.

5

ᐊᕕᑦᑐᖅᓯᒪᔪᓂ ᒐᕙᒪᐃᑦ ᐅᓪᓗᖃᕐᓂᐊᖅᑐᑦ 60-ᓂᒃ ᐱᔭᕇᖅᑕᐅᓚᐅᖅᑎᓪᓗᒋᑦ ᑲᒪᒋᒋᐊᓖᑦ ᑎᑎᕋᖅᓯᒪᔪᒥ 4-ᒥ ᐊᖏᖅᑕᐅᓗᓂ ᑐᑦᓯᕋᐅᑎ, ᒪᓕᒐᖃᕐᓗᓂ ᒪᓕᒐᖃᓐᖏᓪᓗᓂᓘᓐᓃᑦ, ᐅᕝᕙᓗ ᕿᐱᓗᓪᓗᒍ ᑐᑦᓯᕋᐅᑎ.

6

ᑐᑦᓯᕋᐅᑎ ᐊᖏᖅᑕᐅᑉᐸᑦ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐅᓪᓗᖃᕐᓂᐊᑦᑐᑦ 230-ᓂᒃ ᐱᔭᕆᐊᓕᒻᒥᓂᒃ ᐱᓂᐊᕐᓗᑎᒃ ᓴᓇᓂᕐᒧᑦ ᐱᔪᓐᓇᐅᑎᓂᒃ ᐊᒻᒪᓗ ᑐᓂᓯᓗᑎᒃ ᐊᔾᔨᖏᓐᓂᒃ ᐃᓪᓗᓕᐅᕐᓂᕐᒧᑦ ᐸᕐᓇᐅᑏᑦ.

7

ᒪᓕᓚᐅᕐᓗᑎᒃ ᑲᒪᒋᔭᕆᐊᓕᓐᓂᒃ ᑎᑎᕋᖅᓯᒪᔪᒥ 6-ᒥ, ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᑦ ᐅᓪᓗᖃᕐᓂᐊᖅᑐᑦ 590-ᓂᒃ ᐱᔭᕇᕐᕕᒋᓗᒍ ᓴᓇᒋᐊᓕᓕᒫᓂᒃ ᐊᑦᓱᖐᓗᑎᓪᓗ ᐊᖏᖅᑕᐅᓂᕐᒥᒃ ᑖᒃᑯᓄᖓᓪᓗᐊᖅ ᐃᓪᓗᓂᒃ ᖃᐅᔨᓴᖅᑎᓂᒃ ᑎᒥᐅᔪᓂᒃ.

8

ᒥᓂᔅᑕ ᑭᖑᕙᕆᐊᕆᒍᓐᓇᖅᑐᖅ ᐱᕕᑦᓴᖃᕐᓂᐅᔪᓂᒃ ᑎᑎᕋᖅᑕᐅᓯᒪᔪᓂᒃ ᐅᕙᓂ ᐅᐃᒍᒥ ᑐᑦᓯᕋᑐᐊᖅᐸᑕ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ.