ᑎᑎᕋᖅᑕᐅᓂᖅ
ᐃᓚᖓ 1
ᑐᓐᖓᕕᐅᔪᑦ ᑎᑭᑕᐅᒍᒪᔪᓪᓗ
35.1.1
ᐅᕙᓂ ᐃᓛᒃᑰᖅᑐᒥ:
(a)
ᐃᓕᑕᖅᓯᒪᔪᑦ ᐃᓄᐃᑦ ᐱᐅᓂᖅᐸᐅᒋᐊᖏᑦ ᓇᓗᓇᐃᔭᐃᓗᑎᒃ ᑭᓇᐅᒻᒪᖔᖅ ᐃᓄᒃ ᐱᔾᔪᑕᐅᓪᓗᓂ ᐅᓇ ᐊᖏᕈᑎ;
(b)
ᓇᓗᓇᐃᖅᓯᔪᖅ ᐃᓄᐃᑦ ᓄᓇᕗᒻᒥ ᐃᓕᑕᕆᔭᐅᓂᐊᕆᐊᖏᑦ ᑐᓐᖓᕕᐅᓗᑎᒃ ᓇᒻᒥᓂᖅ ᑐᑭᓯᓂᕆᔭᖏᑦ ᑭᓇᐅᓂᕐᒥᓂᒃ, ᐊᒻᒪᓗ ᐃᓄᐃᑦ ᓇᓗᓇᐃᖅᓯᓂᐊᖅᑐᑦ ᑭᓇ ᐃᓅᒻᒪᖔᖅ ᐱᔾᔪᑕᐅᓪᓗᓂ ᐅᓇ ᐊᖏᕈᑎ, ᐊᑎᓕᐅᖅᑕᐅᒍᓐᓇᕐᒪᖔᑕᓗ ᑭᓇᒃᑯᑦ ᐊᑖᓂ ᐆᒪ ᐊᖏᕈᑎᐅᑉ.
(c)
ᐋᖅᑭᑦᓯᓂᐊᖅᐳᖅ ᐋᖅᑭᑦᓯᒪᓂᕆᓂᐊᖅᑕᖓᓂ ᓈᖕᒪᑦᑐᒥᒃ ᓇᓕᒧᖃᕐᓗᓂᓗ ᓇᓗᓇᐃᖅᓯᓂᕐᒥᒃ ᑭᓇ ᐃᓄᓪᓚᑦᑖᖑᒻᒪᖔᖅ ᑖᑦᓱᒧᖓ ᐊᖏᖃᑎᒌᒍᑎᒧᑦ ᐃᓕᖓᔪᒥᒃ, ᐊᒻᒪᓗ ᐊᑎᖃᖃᑕᐅᔪᓐᓇᕐᒪᖔᖅ ᑕᕝᕙᓂ ᐊᖏᖃᑎᒌᒍᒻᒥ.
ᐃᓚᖓ 2
ᐃᓄᐃᑦ ᑎᑎᕋᖅᑕᐅᓯᒪᓂᖏᑦ
35.2.1
ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ ᓴᖅᑮᓂᐊᖅᑐᖅ ᐸᐸᑦᓯᓗᑎᓪᓗ ᑎᑎᕋᖅᓯᒪᔪᓂᒃ ᐃᓄᓐᓂᒃ (ᐃᓄᐃᑦ ᑎᑎᕋᖅᑕᐅᓯᒪᔪᑦ), ᑎᑎᕋᕐᓗᑎᓪᓗ ᑕᕝᕙᓂ ᐊᑎᖏᓐᓂᒃ ᐃᓄᓕᒫᑦ ᐊᑎᓕᐅᖅᑕᐅᔪᓐᓇᖅᑐᑦ ᑐᓐᖓᕕᒋᓗᒍ ᐅᓇ ᐃᓛᒃᑰᖅᑐᖅ.
35.2.2
ᐃᓄᒃ ᑎᑎᕋᖅᑕᐅᔪᖅ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂ ᐱᕚᓪᓕᕈᑎᖃᕈᓐᓇᕐᓂᐊᖅᑐᖅ ᐊᖏᕈᑎᒥᒃ ᐆᒪᓂᓕᒫᕐᒥᓂ ᐊᑎᖓᓗ ᑎᑎᕋᖅᑕᐅᓯᒪᖏᓐᓇᖅᐸᑦ ᑕᕝᕙᓂ.
ᐃᓚᖓ 3
ᑎᑎᕋᖅᑕᐅᓯᒪᓂᕐᒨᖓᒋᐊᓖᑦ
35.3.1
(a)
ᐆᒪᔪᖅ,
(b)
ᑲᓇᑕᒥᐅᑕᖅ,
(c)
ᐃᓅᔪᖅ ᑐᓐᖓᕕᒋᑦᓱᒋᑦ ᐃᓄᐃᑦ ᐱᖅᑯᓯᖏᑦ ᐊᑐᖅᐸᑦᑕᖏᓪᓗ;
(d)
ᓇᓗᓇᐃᖅᓯᒪᔪᖅ ᐃᒻᒥᓂᒃ ᐃᓅᒋᐊᑦᓴᒥᓂᒃ;
(e)
ᐊᑦᑐᐊᓂᖃᖅᑐᖅ ᐅᑯᓄᖓ
(i)
ᓄᓇᓕᓐᓄᑦ ᓄᓇᕗᒻᒥ, ᐅᕝᕙᓗ
(ii)
ᓄᓇᕗᒻᒥ, ᐊᑎᖃᖃᑕᐅᒍᓐᓇᕈᓂ ᑎᑎᕋᖅᑕᐅᓗᓂ ᐃᓄᐃᑦ ᐊᑎᖃᕐᕕᖓᓐᓂ.
35.3.2
ᐱᔾᔪᑕᐅᓪᓗᓂ ᑎᑎᕋᖅᓯᒪᔪᖅ 35.3.1 (d), ᐸᐸᑦᓯᔨ ᐃᓄᒻᒧᑦ ᒪᓕᒐᖅᑎᒍᑦ ᐊᔪᕈᑎᓕᒻᒧᑦ ᓇᒻᒥᓂᖅ ᓇᓗᓇᐃᕈᓐᓇᖏᑉᐸᑦ ᐃᓅᓂᕐᒥᓂᒃ ᓇᓗᓇᐃᖅᓯᒍᓐᓇᖅᑐᖅ ᑕᐃᑦᓱᒪᓐᖓᑦ ᐃᓄᒻᒥᒃ ᐃᓅᓂᖓᓂᒃ.
35.3.3
ᓇᐅᑐᐃᓐᓇᖅ ᐃᓄᒃ ᑎᑎᕋᖅᓯᒪᒋᐊᖃᓐᖏᑦᑐᖅ ᐊᖏᕈᑎᐅᑉ ᐊᑖᓂ ᐊᒻᒪᓗ ᐊᓯᐊᓂ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᓄᓇᑖᕈᑎᒧᑦ ᐊᖏᕈᑎᒧᑦ ᐊᑕᐅᓯᒃᑰᖅᓯᒪᓗᓂ.
35.3.4
ᐃᓄᒃ ᑎᑎᕋᖅᑕᐅᓯᒪᒍᓐᓇᖅᑐᖅ ᐊᐅᓪᓛᖅᑎᑦᓯᒍᓐᓇᖅᑐᖅ ᐊᖏᕈᑎᒧᑦ ᑕᐃᓐᓇ ᐃᓄᒃ ᓴᒃᑯᐃᓚᐅᑐᐊᕈᓂ, ᐊᐅᓪᓛᖅᑎᑕᐅᓯᒪᓂᖓᓂ, ᐱᕚᓪᓕᕈᑎᑦᓴᓂᒃ ᐃᓚᐅᑎᓐᓂᕐᒥᓘᓐᓃᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᖓᓐᓄᑦ ᑕᐃᑲᓐᖓᑦ ᐊᐅᓪᓛᕐᕕᒋᔭᒥᓂᒃ. ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ ᓇᓗᓇᐃᖅᓯᓂᐊᖅᑐᖅ ᐅᓪᓗᓂᒃ ᖃᖓᒃᑯᑦ ᐱᕕᑦᓴᖃᕐᓂᐅᔪᖅ ᐊᑑᑎᓕᕐᓂᐊᕐᒪᖔᖅ ᐊᑦᑐᐊᔪᓄᑦ ᐊᑎᖃᖃᑕᐅᔪᑦ ᐃᓚᐅᖃᑕᐅᔪᓄᓪᓘᓐᓃᑦ ᐊᓯᖏᓐᓄᑦ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᓄᓇᑖᕐᓂᕐᒧᑦ ᐊᖏᕈᑎᒧᑦ.
35.3.5
ᓇᐅᑐᐃᓐᓇᖅ ᐃᓄᒃ ᒪᓕᒐᖅᑎᒍᑦ ᑐᓂᒪᓂᖃᕆᐊᓐᖏᑦᑐᖅ ᑐᑦᓯᕋᕐᓂᕐᒧᑦ ᑎᑎᕋᖅᑕᐅᒍᒪᓂᕐᒧᑦ ᐊᑖᓂ ᐊᖏᕈᑎᐅᑉ.
35.3.6
ᓇᐅᑐᐃᓐᓇᖅ ᐃᓄᒃ ᑎᑎᕋᖅᑕᐅᓯᒪᔪᖅ ᐊᑖᓂ ᐊᖏᕈᑎᐅᑉ, ᑎᑎᕋᖅᑕᐅᓯᒪᒍᒪᒍᓐᓃᕐᓂᕈᓂ, ᑕᐃᓐᓇ ᐃᓄᒃ ᑎᑎᕋᖅᓯᒪᔪᑎᒍᑦ ᑎᓕᓯᔾᔪᑎᖃᕐᓗᓂ ᑕᐃᒪᐃᓕᖓᖁᔨᓗᓂ, ᑕᐃᑦᓱᒪ ᐃᓅᑉ ᐊᑎᖓ ᐲᖅᑕᐅᓂᐊᖅᑐᖅ ᑎᑎᕋᖅᑕᐅᓯᒪᔪᓂᒃ.
ᐃᓚᖓ 4
ᓄᓇᓕᓐᓂ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᑦ
35.4.1
ᓄᓇᓕᓐᓂ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᑦ (ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᑦ) ᓴᖅᑭᖅᑕᐅᓂᐊᖅᑐᑦ ᐊᑐᓂᑦ ᓄᓇᓕᓐᓂ ᓄᓇᕗᒻᒥ.
35.4.2
ᐊᐅᓚᓂᖏᑦ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᑦ ᐃᒫᒃ ᖃᓄᖅᑑᕈᑎᖃᕆᐊᓖᑦ:
(a)
ᐃᓄᒃ ᑐᑦᓯᕋᖅᑐᖅ ᑎᑎᕋᖅᑕᐅᒍᒪᓪᓗᓂ ᐊᑖᓂ ᐊᖏᕈᑎᐅᑉ (ᑐᑦᓯᕋᖅᑐᖅ) ᑎᑎᕋᖅᑕᐅᒍᓐᓇᕈᓂ ᐱᔭᕆᐊᓖᑦ ᒪᓕᓪᓗᒋᑦ ᐃᓚᖓ 3-ᒥ (ᑎᑎᕋᖅᑕᐅᓂᕐᒧᑦ ᐊᑑᑎᒋᐊᓖᑦ);
(b)
ᓇᒻᒥᓂᖅ ᐊᐅᓚᔾᔭᒋᐊᕐᓗᓂ, ᐅᕝᕙᓗ ᑐᑦᓯᕌᖑᑉᐸᑦ ᐊᓯᐊᓄᑦ ᑎᑎᕋᖅᑕᐅᓯᒪᔪᒧᑦ ᐃᓄᒻᒧᑦ, ᑕᐃᓐᓇ ᐃᓄᒃ ᑎᑎᕋᖅᑕᐅᓯᒪᔪᖅ ᐲᖅᑕᐅᒋᐊᖃᕐᒪᖔᖅ ᑎᑎᕋᖅᑕᐅᓯᒪᔪᓂᒃ ᓈᒻᒪᓈᖅᓯᒪᓐᖏᓕᕐᓂᖅᐸᑕ ᑎᑎᕋᖅᑕᐅᓯᒪᔾᔪᑎᒋᒋᐊᓕᖏᑦ.
35.4.3
ᐊᑯᓐᓂᖅᓯᐅᑎᓂᒃ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᓂᒃ ᓴᖅᑭᖅᑕᐅᔪᖃᕐᓂᐊᖅᑐᖅ ᐊᑐᓂᑦ ᓄᓇᓕᓐᓂ ᐱᓯᒪᓗᑎᒃ ᐱᖓᓱᑦ ᐊᑖᓂᐅᓐᖏᑦᑐᖅ ᐊᒻᒪᓗ ᐅᖓᑖᓂᐅᓐᖏᑦᑐᖅ ᐱᖓᓲᔪᖅᑐᑦ ᐃᓄᐃᑦ ᓂᕈᐊᖅᑕᐅᒧᑦ ᐃᓄᓐᓄᑦ ᐃᓐᓇᑐᖃᕆᔭᐅᔪᓄᑦ ᑕᐃᑲᓂ ᓄᓇᓕᓐᓂ.
35.4.4
ᓇᓪᓕᐅᓂᖅᓯᐅᕐᓂᖓᓂ ᓯᕗᓪᓕᖅᐹᒥ ᓯᕗᕐᖓᓂᓘᓐᓃᑦ ᐅᓪᓗᖅ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᕈᑎ, ᐊᑯᓐᓂᖅᓯᐅᑏᑦ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᑦ ᐱᔭᕇᕆᐊᓖᑦ ᐱᓕᕆᐊᑦᓴᒥᓂᒃ ᓇᓪᓕᖏᑦ ᑐᑦᓯᕋᖅᑐᑦ ᑎᑎᕋᖅᑕᐅᔪᑦᓴᐅᒻᒪᖔᑕ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂ, ᐊᒻᒪᓗ ᑕᐃᒃᑯᐊ ᑐᑦᓯᕋᖅᑐᑦ ᑎᑎᕋᖅᑕᐅᓯᒪᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂ.
35.4.5
ᐱᔭᕇᓚᐅᖅᑎᓪᓗᒋᑦ ᑲᒪᒋᒋᐊᓕᒻᒥᓂᒃ ᐊᑯᓐᓂᖅᓯᐅᑏᑦ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᑦ ᐊᑖᓂ ᑎᑎᕋᖅᓯᒪᔪᖅ 35.4.4, ᐃᓄᐃᑦ ᑕᐃᑲᓐᖓᑦ ᓄᓇᓕᓐᓂᒃ ᑎᑎᕋᖅᑕᐅᔪᑦ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂᒃ ᐋᖅᑭᑦᓱᐃᓂᐊᖅᑐᑦ, ᓈᒻᒪᒋᔭᕐᒥᑎᒍᑦ, ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᓂᒃ ᑕᐃᑯᖓ ᓄᓇᓕᓐᓄᑦ ᐊᐅᓚᓂᐊᓕᖅᑎᓪᓗᒋᑦ ᑭᖑᕐᖓᓂ.
ᐃᓚᖓ 5
ᐊᔪᐃᓐᓇᕆᐊᒃᑲᓐᓂᕐᓃᑦ
35.5.1
ᓄᓇᕗᒻᒥ ᑎᑎᕋᖅᑕᐅᓂᕐᒧᑦ ᐊᔪᐃᓐᓇᕆᐊᒃᑲᓐᓂᕐᕖᑦ ᑲᑎᒪᔨᕋᓛᑦ (ᐊᔪᐃᓐᓇᕆᐊᒃᑲᓐᓂᕐᕖᑦ ᑲᑎᒪᔨᕋᓛᑦ) ᓴᖅᑭᖅᑕᐅᓂᐊᖅᑐᑦ ᓈᓚᑉᐸᓐᓂᐊᖅᑎᓪᓗᒋᑦ ᖃᓄᖅᑑᕐᓗᑎᓪᓗ:
(a)
ᐊᔪᐃᓐᓇᕆᐊᒃᑲᓐᓂᕐᓃᑦ, ᐱᒋᐊᖅᑎᑕᐅᔪᑦ ᑐᑦᓯᕋᖅᑐᒧᑦ ᑎᑎᕋᖅᑕᐅᒍᒪᓪᓗᓂ ᐅᕝᕙᓘᓐᓃᑦ ᐊᓯᐊ ᑎᑎᕋᖅᑕᐅᓯᒪᔪᖅ ᐃᓄᒃ, ᐋᖅᑭᑦᑕᐅᔪᒧᑦ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᓄᑦ ᑐᑦᓯᕋᖅᑐᖅ ᑎᑎᕋᖅᑕᐅᔪᑦᓴᐅᒻᒪᖔᖅ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓄᑦ;
(b)
ᐊᔪᐃᓐᓇᕆᐊᒃᑲᓐᓂᕐᓂᐅᔪᑦ, ᐱᒋᐊᖅᑎᑕᐅᔪᑦ ᐃᓄᒻᒧᑦ ᐊᑎᖓ ᐲᖅᑕᐅᒐᔭᖅᑐᒧᑦ ᐅᕝᕙᓗ ᐊᓯᐊᓄᑦ ᑎᑎᕋᖅᑕᐅᓯᒪᔪᒧᑦ ᐃᓄᒻᒧᑦ, ᐋᖅᑭᑦᑕᐅᔪᒧᑦ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᓄᑦ ᐊᑎᖅ ᐲᖅᑕᐅᒋᐊᖃᕐᒪᖔᖅ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂᒃ; ᐊᒻᒪᓗ
(c)
ᑐᑦᓯᕋᐅᑏᑦ ᑎᑎᕋᖅᑕᐅᒍᒪᓂᕐᒧᑦ ᐃᓄᓐᓄᑦ ᐅᑉᐱᕈᓱᑦᑐᓄᑦ ᐱᔪᓐᓇᕆᐊᑦᓴᓯᓂᒃ ᑎᑎᕋᖅᑕᐅᒍᓐᓇᐅᑎᐅᒋᐊᓕᓐᓂᒃ ᑎᑎᕋᖅᓯᒪᔪᒥ 35.3.1(e)(ii) ᐋᒡᒐᐅᒐᓗᐊᖅ ᑎᑎᕋᖅᓯᒪᔪᖅ 35.3.1(e)(i).
35.5.2
ᕿᑭᖅᑖᓗᒻᒥ ᐃᓄᐃᑦ ᑲᑐᔾᔨᖃᑎᒌᖏᑦ, ᕿᑎᕐᒥᐅᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ, ᑭᖑᕝᕕᖅᑎᖏᓪᓘᓐᓃᑦ, ᐊᑐᓂᑦ ᑎᓕᓯᓂᐊᖅᑐᑦ ᐊᑕᐅᓯᕐᒥᒃ ᐃᓄᒻᒥᒃ ᐊᑐᓂᑦ ᓄᓇᓕᓐᓂᒃ ᐊᕕᑦᑐᖅᓯᒪᕕᒻᒥᓂ ᑭᒡᒐᖅᑐᐃᓂᐊᖅᑎᓪᓗᒋᑦ ᐊᕕᑦᑐᖅᓯᒪᓂᕐᒥᓂ.
35.5.3
ᐊᔪᐃᓐᓇᕆᐊᒃᑲᓂᕐᓂᕐᒧᑦ ᑲᑎᒪᔨᕋᓛᑦ ᐱᓯᒪᓂᐊᖅᑐᖅ ᐱᖓᓱᓂᒃ ᑭᒡᒐᖅᑐᐃᔪᓂᒃ ᑲᑎᒪᔨᓂᒃ ᓴᖅᑭᖅᑕᐅᔪᓂᒃ ᐊᑖᓂ ᑎᑎᕋᖅᓯᒪᔪᖅ 35.5.2.
35.5.4
ᐃᓚᒋᔭᐅᔪᑦ ᑭᒡᒐᖅᑐᐃᔪᓄᑦ ᐊᑐᓂᑦ ᐊᕕᑦᑐᖅᓯᒪᓂᐅᔪᓂᒃ ᓂᕈᐊᕐᓂᐊᖅᑐᑦ ᐃᒻᒥᓐᓂᒃ ᐃᑦᓯᕙᐅᑕᐅᖃᑕᐅᓂᐊᖅᑐᒥᒃ ᐊᔪᐃᓐᓇᕆᐊᒃᑲᓂᕐᓂᕐᒧᑦ ᑲᑎᒪᔨᕋᓛᓄᑦ.
35.5.5
ᐃᑦᓯᕙᐅᑕᐅᖃᑕᐅᔪᖅ ᐊᕕᑦᑐᖅᓯᒪᓂᐅᔪᒥᒃ ᐊᔪᐃᓐᓇᕆᐊᒃᑲᓐᓂᖅᑐᖃᖅᑐᓂ ᓂᕈᐊᕐᓂᐊᑦᑐᑦ ᐊᓯᖏᓐᓂᒃ ᐊᔪᐃᓐᓇᕆᐊᒃᑲᓐᓂᕐᒧᑦ ᑲᑎᒪᔨᕋᓛᒥᒃ ᑕᐃᑲᓐᖓᑦ ᐊᕕᑦᑐᖅᓯᒪᓂᐅᔪᒥᒃ, ᐃᑦᓯᕙᐅᑕᐅᖃᑕᐅᔪᑦᓴᒥᓪᓗ ᐊᓯᖏᓐᓂᒃ ᐊᕕᑦᑐᖅᓯᒪᓂᐅᔪᓂᒃ, ᐅᖃᐅᓯᐅᔪᑦ ᐃᑦᓯᕙᐅᑕᐅᖃᑎᒌᒃ ᑕᐃᓐᓇᓗ ᑲᑎᒪᔨᕋᓛᖑᖃᑕᐅᔪᖅ ᓈᓚᓐᓂᐊᖅᑐᑦ ᓇᓗᓇᐃᖅᓯᓗᑎᓪᓗ ᐊᔪᐃᓐᓇᕆᐊᒃᑲᓐᓂᕈᑕᐅᔪᒧᑦ.
35.5.6
ᐊᔪᐃᓐᓇᕆᐊᒃᑲᓐᓂᕐᓂᐅᔪᖅ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᓄᑦ ᐊᑑᑎᓂᐊᖅᑐᖅ ᓈᓚᓐᓂᖅᑕᖃᒃᑲᓐᓂᕐᓗᓂ, ᐊᒻᒪᓗ ᓇᓗᓇᐃᕈᑎᑦᓴᒋᐊᒃᑲᓐᓃᑦ ᓴᖅᑭᖅᑕᐅᒍᓐᓇᖅᑐᑦ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᓄᑦ.
35.5.7
ᐃᓄᒃ ᐊᔪᐃᓐᓇᕆᐊᒃᑲᓐᓂᖅᐸᑦ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᓄᑦ ᖃᓄᖅᑑᕈᑕᐅᓯᒪᓕᖅᑎᓪᓗᒍ ᐊᑯᓐᓂᖅᓯᐅᑎᓄᑦ ᑎᑎᕋᖅᑕᐅᓂᕐᒧᑦ ᑲᑎᒪᔨᕋᓛᓄᑦ, ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᑦ ᓈᓚᓐᓂᖃᕐᓂᐊᖅᑐᑦ ᖃᓄᖅᑑᕈᑎᖃᕐᓗᑎᓪᓗ ᐊᔪᐃᓐᓇᕆᐊᒃᑲᓐᓂᕈᑕᐅᔪᒥᒃ ᐅᓪᓗᖓᓂ ᓯᕗᕐᖓᓂᓘᓐᓃᑦ ᐊᐃᑉᐸᖓᓂ ᓇᓪᓕᐅᓂᖅᓯᐅᕐᓂᖓᑦᑕ ᒪᓕᒐᓐᖑᖅᑎᑕᐅᓂᖓᑕ ᐊᖏᕈᑎᐅᑉ.
35.5.7
ᐋᖅᑭᒋᐊᖅᑕᐅᔪᖅ P.C. 1996-1462 ᓯᑦᑕᕝᕙ 17, 1996
ᐃᓄᒃ ᐊᔪᐃᓐᓇᕆᐊᒃᑲᓐᓂᖅᐸᑦ ᐊᔪᐃᓐᓇᕆᐊᒃᑲᓐᓂᕐᒧᑦ ᑲᑎᒪᔨᕋᓛᓄᑦ ᐋᖅᑭᑦᑕᐅᔪᒧᑦ ᐊᑯᓐᓂᖅᓯᐅᑎᓄᑦ ᑎᑎᕋᖅᑕᐅᓯᒪᔪᓄᑦ ᑲᑎᒪᔨᕋᓛᓄᑦ, ᐊᔪᐃᓐᓇᕆᐊᒃᑲᓂᕐᓂᕐᒧᑦ ᑲᑎᒪᔨᕋᓛᑦ ᓈᓚᓐᓂᖃᕐᓂᐊᖅᑐᑦ ᓇᓗᓇᐃᖅᓯᓗᑎᓪᓗ ᐊᔪᐃᓐᓇᕆᐊᒃᑲᓐᓂᕈᑕᐅᔪᓂᒃ ᔪᓚᐃ 9, 1996-ᒧᑦ.
35.5.8
ᑎᓕᓯᔾᔪᑕᐅᔪᓕᒫᑦ, ᐋᖅᑭᑦᑕᐅᔪᓪᓘᓐᓃᑦ ᐊᔪᐃᓐᓇᕆᐊᒃᑲᓐᓂᕐᒧᑦ ᑲᑎᒪᔨᕋᓛᓄᑦ ᑭᖑᓪᓕᖅᐹᖑᕗᖅ ᐊᑦᓱᖐᑦᓱᓂᓗ ᐊᔪᐃᓐᓇᕆᐊᒃᑲᓐᓂᕋᑦᓴᐅᒍᓐᓃᖅᓱᓂ, ᑭᓯᐊᓂᓕ ᑎᓕᓯᔾᔪᑕᐅᔪᖅ ᐋᖅᑭᑦᑕᐅᔪᕐᓘᓐᓃᑦ ᕿᒥᕐᕈᔭᐅᒍᓐᓇᖅᑐᖅ ᖁᑦᓯᓂᖅᓴᓄᑦ ᐃᖅᑲᖅᑐᐃᔨᓄᑦ ᑎᒍᒥᐊᖅᑐᓄᑦ ᓄᓇᕗᒻᒥᒃ ᖃᐅᔨᓐᓂᖏᑉᐸᑕ ᑐᓐᖓᕕᐅᔪᓂᒃ ᐃᖏᕐᕋᑦᓯᐊᕐᓂᕐᒧᑦ ᐅᕝᕙᓗ ᐱᐅᓯᖃᕈᑎᒃ ᕿᐱᓗᒃᑯᑎᓪᓘᓐᓃᑦ ᑲᔪᓯᑎᑦᓯᓂᕐᒥᒃ ᐊᕕᑦᑐᖅᓯᒪᓂᕆᔭᒥᓂᒃ.
35.5.9
ᖃᖓᓕᒫᑦᓯᐊᖅ ᑲᑎᒪᔨᕋᓛᖑᔪᖅ ᑎᑎᕋᖅᑕᐅᓯᒪᔪᓄᑦ ᑲᑎᒪᔨᕋᓛᓄᑦ, ᐊᑯᓐᓂᖅᓯᐅᑎᐅᒍᓂ ᐊᓯᐊᒍᓪᓘᓐᓃᑦ, ᑲᑎᒪᔨᕋᓛᖑᒋᐊᖃᓐᖏᑦᑐᖅ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᓄᑦ.
35.5.10
ᐃᓚᖓ 6
ᐊᐅᓚᓂᖏᑦ ᑲᑎᒪᔨᕋᓛᑦ
35.6.1
ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 35.6.2, ᑎᑎᕋᖅᑕᐅᓯᒪᓂᕐᒧᑦ ᑲᑎᒪᔨᕋᓛᑦ, ᐊᑯᓐᓂᖅᓯᐅᑕᐅᒍᑎᒃ ᐊᓯᐊᒍᓪᓘᓐᓃᑦ, ᐊᒻᒪᓗ ᐊᔪᐃᓐᓇᕆᐊᒃᑲᓐᓂᕐᓂᒧᑦ ᑲᑎᒪᕋᓛᑦ ᓴᖅᑮᒍᓐᓇᖅᑐᑦ ᒪᓕᒐᕐᓂᒃ ᐊᐅᓚᓂᕐᓅᖓᔪᓂᒃ, ᐱᖃᓯᐅᑎᑦᓱᑎᒃ ᒪᓕᒐᐃᑦ ᐊᑐᖅᑕᐅᓂᖏᓐᓄᑦ ᐅᕐᑳᓚᐅᑎᒃᑯᑦ ᑲᑎᒪᓃᑦ, ᑎᑎᕋᖅᓯᒪᔪᓂᒃ ᐊᐃᑦᑐᖅᑕᐅᓃᑦ ᐊᒻᒪᓗ ᐱᕕᑦᓴᖃᕐᓂᕐᒧᑦ ᑭᓪᓕᒋᔭᐅᔪᑦ.
35.6.2
ᖃᓄᖅᑑᕈᑕᐅᔪᓄᑦ ᓇᓗᓇᐃᖅᓯᔾᔪᑕᐅᔪᓄᑦ, ᕿᐱᓗᒍᑕᐅᔪᓄᑦ ᐲᖅᓯᒍᑕᐅᔪᓄᓪᓘᓐᓃᑦ ᑎᑎᕋᖅᑕᐅᓯᒪᓂᕐᒥᒃ, ᑎᑎᕋᖅᑕᐅᓯᒪᓂᕐᒧᑦ ᑲᑎᒪᔨᕋᓛᑦ, ᐊᑯᓐᓂᖅᓯᐅᑏᑦ ᐊᓯᐊᒍᓪᓘᓐᓃᑦ, ᐃᒪᐃᓐᓂᐊᖅᑐᑦ:
(a)
ᓈᒻᒪᓈᖅᓯᒪᔪᓂᒃ ᖃᐅᔨᒪᑎᑦᓯᑦᓯᐊᕐᓗᑎᒃ ᑐᑦᓯᕋᖅᑐᓂᒃ, ᐊᔪᐃᓐᓇᕆᐊᒃᑲᓐᓂᖅᑐᓂᒃ ᐊᒻᒪᓗ ᐊᓯᖏᓐᓂᒃ ᑐᕋᐃᓐᓇᖅᑐᓂᒃ ᐱᔪᒪᓂᖃᖅᑐᓂᒃ; ᐊᒻᒪᓗ
(b)
ᐱᕕᖃᖅᑎᑦᓯᓗᑎᒃ ᑐᑦᓯᕋᖅᑐᓂᒃ, ᐊᔪᐃᓐᓇᕆᐊᒃᑲᓐᓂᖅᑐᓂᒃ, ᐊᓯᖏᓐᓂᓪᓗ ᐱᔪᒪᓂᖃᖅᑐᓂᒃ ᐅᓂᒃᑳᕈᓐᓇᖅᓯᖁᓪᓗᒋᑦ.
35.6.3
ᑎᑎᕋᖅᑕᐅᓯᒪᓂᕐᒧᑦ ᑲᑎᒪᔨᕋᓛᑦ, ᐊᑯᓐᓂᖅᓯᐅᑏᑦ ᐊᓯᐊᒍᓪᓘᓐᓃᑦ, ᐊᒻᒪᓗ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᑦ ᐃᓄᑦᑎᑐᑦ ᐊᐅᓚᓂᖃᕐᓂᐊᖅᑐᑦ ᐊᒻᒪᓗ, ᑐᑦᓯᕋᖅᑐᖃᕐᐸᑦ ᑲᑎᒪᔨᕋᓛᒥᒃ, ᑐᑦᓯᕋᖅᑐᖅ ᐅᕝᕙᓗ ᐊᔪᐃᓐᓇᕆᐊᒃᑲᓐᓂᖅᑐᖅ, ᐊᑐᕐᓗᑎᒃ ᓇᓪᓕᑐᐃᓐᓇᖏᓐᓂᒃ ᐃᓕᑕᕆᔭᐅᓯᒪᔫᓐᓂᒃ ᐅᖃᐅᓰᓐᓂᒃ ᑲᓇᑕᒥ.
35.6.4
ᐊᐅᓚᑦᓯᓂᓕᒫᖏᑦ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓛᑦ, ᑲᑎᒪᔨᕋᓛᖑᓚᐅᐱᓪᓚᑦᑐᑦ ᐊᓯᐊᖏᑎᒍᓪᓘᓐᓃᑦ, ᐊᒻᒪᓗ ᐅᓐᓂᓗᕝᕖᑦ ᑲᑎᒪᔨᕋᓛᖏᑦ ᐃᓄᒃᑎᑑᕆᐊᓖᑦ ᐊᒻᒪᓗ, ᑐᒃᓯᕋᕈᑕᐅᑉᐸᑕ ᑲᑎᒪᔨᕋᓛᓄᑦ ᐃᓚᒋᔭᐅᔪᒧᑦ, ᑐᒃᓯᕋᖅᑐᖅ ᐅᕝᕙᓘᓐᓃᑦ ᐅᓐᓂᕐᓗᑦᑐᖅ, ᐃᓚᖓᒍᑦ ᑕᒪᒃᑮᓄᓪᓘᓐᓃᑦ ᑲᓇᑕᒥ ᐃᓕᓴᕆᔭᐅᓯᒪᔪᓂ ᐅᖃᐅᓯᕐᓂ.
ᐃᓚᖓ 7
ᑎᑎᕋᖅᑕᐅᓂᖏᑦ ᐃᓄᐃᑦ ᑎᑎᕋᖅᑕᐅᓯᒪᓂᖏᑦᑕ
35.7.1
ᐊᑐᓂᑦ ᑎᑎᕋᖅᑕᐅᓯᒪᔪᓄᑦ ᑲᑎᒪᔨᕋᓛᑦ, ᐊᑯᓐᓂᖅᓯᐅᑕᐅᒍᑎᒃ ᐊᓯᐊᒍᓪᓘᓐᓃᑦ, ᐊᑐᐃᓐᓇᐅᑎᑦᓯᓂᐊᖅᑐᑦ ᑭᓇᒃᑯᑐᐃᓐᓇᕐᓄᑦ ᐊᑭᖃᖅᑎᓐᓇᒋᑦ ᐊᑎᕐᓂᒃ ᐃᓗᓕᖃᖅᑐᓂᒃ ᐃᓄᓐᓂᒃ ᑎᑎᕋᖅᑕᐅᓯᒪᔪᓂᒃ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂ.
35.7.2
ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᕐᕌᒍᑕᒫᑦ ᐊᑐᐃᓐᓇᐅᑎᑦᓯᕙᓐᓂᐊᖅᑐᑦ ᐊᑭᖃᓐᖏᑦᑐᓂᒃ ᓇᓕᖅᑲᖏᓐᓂᒃ ᐃᓄᐃᑦ ᑎᑎᕋᖅᑕᐅᓯᒪᕕᖏᑦᑕ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓄᑦ, ᐊᒻᒪᓗ ᐃᓄᐃᑦ ᑎᑎᕋᖅᑕᐅᓯᒪᕕᖏᓐᓂᒃ ᐊᑐᐃᓐᓇᐅᑎᑦᓯᓂᐊᖅᑐᑦ ᑭᓇᑐᐃᓐᓇᕐᒧᑦ ᑕᖅᑲᐅᖓ ᑐᑦᓯᕋᖅᑐᖃᖅᐸᑦ.
ᐃᓚᖓ 8
ᐊᑐᓕᖅᑎᑦᓯᓂᖅ
35.8.1
ᒐᕙᒪᒃᑯᖏᑦ ᑲᓇᑕᐅᑉ ᐊᑭᓖᓂᐊᖅᑐᑦ ᐊᑭᓕᕆᐊᓕᓕᒫᓂᒃ ᓴᖅᑭᖅᑕᐅᓂᖓᓄᑦ ᐃᖅᑲᓇᐃᔭᕐᓂᖏᓐᓄᓪᓗ ᐊᑯᓐᓂᖅᓯᐅᑏᑦ ᑎᑎᕋᖅᑕᐅᓯᒪᔪᓄᑦ ᑲᑎᒪᔨᕋᓛᑦ, ᐃᖅᑲᓇᐃᔮᖏᓐᓄᑦ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᕋᓛᑦ, ᑎᑭᓪᓗᒍ ᐊᐃᑉᐸᖓᓂ ᓇᓪᓕᐅᓂᖅᓯᐅᕐᓂᖅ ᐅᓪᓗᖓ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᕈᑎ.
35.8.2
ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᒍᒥᐊᖅᑐᑦ ᑐᑭᒧᐊᑦᑎᑕᐅᓂᖏᓐᓂᒃ ᑎᑎᕋᖅᑕᐅᓂᕐᒧᑦ ᐊᐅᓚᓂᐅᔪᑦ ᓇᓗᓇᐃᖅᑕᐅᔪᑦ ᑖᒃᑯᓇᓂ ᐱᕕᖃᖅᑎᑦᓯᒍᑕᐅᔪᓂ ᐊᒻᒪᓗ ᐸᐸᑦᓯᖏᓐᓇᕐᓂᕐᒧᑦ ᐊᑕᖏᖅᑐᓂᒃ ᐅᓪᓗᒥᒧᑦ ᑎᑭᐅᒪᑦᓯᐊᖅᑐᓂᒃ ᐃᓄᐃᑦ ᑎᑎᕋᖅᑕᐅᓯᒪᓂᖏᓐᓂᒃ.
ᐃᓚᖓ 9
ᐋᖅᑭᒋᐊᕈᑏᑦ
35.9.1
ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 2.13.1, ᑐᓐᖓᕕᒃᑯᑦ ᐊᖏᕆᐊᖃᓐᖏᑦᑐᑦ ᐋᖅᑭᒋᐊᕈᑕᐅᔪᓂᒃ ᑖᒃᑯᓄᖓ ᐱᕕᖃᖅᑎᑦᓯᒍᑕᐅᔪᓄᑦ ᐊᖏᖅᑕᐅᓚᐅᖅᑳᑎᓐᓇᒋᑦ ᐊᑕᖏᕐᓗᑎᒃ ᑎᑎᕋᖅᑕᐅᓯᒪᓂᕐᒧᑦ ᑲᑎᒪᔨᕋᓛᑦ.
