ᐃᓛᒃᑯᑦ 40

ᐊᓯᖏᑦ ᓄᓇᖃᖅᑳᖅᓯᒪᔫᔪᑦ

ᐃᓚᖓ 1
ᐃᓘᓐᓇᐃᓐᓅᖓᔪᖅ
40.1.1
ᓇᐅᑐᐃᓐᓇᖅ ᐅᕙᓃᑦᑐᖅ ᐊᖏᖃᑎᒌᒍᑎᒥ ᑕᑯᓐᓇᖅᑕᐅᓂᐊᖏᑦᑐᖅ, ᐃᓕᑕᕆᔭᐅᓂᐊᓐᖏᑦᑐᖅ ᐅᕝᕙᓗ ᐱᔪᓐᓇᕐᓂᖃᕈᑕᐅᓂᐊᓐᖏᑦᑐᖅ ᐊᑖᓂ ᑎᑎᕋᖅᓯᒪᔪᖅ 35 ᐱᖁᔭᕐᔪᐊᑦ ᐊᑖᓂ, 1982, ᓄᓇᖃᖅᑳᖅᓯᒪᔪᓄᑦ ᐊᓯᖏᓐᓄᑦ ᐃᓄᐃᑦ.
40.1.2
ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐊᐳᖅᓯᒪᒍᑕᐅᒐᓂᓗ ᑎᑎᕋᖅᓯᒪᔪᖅ 40.1.1-ᒧᑦ, ᓇᐅᑐᐃᓐᓇᖅ ᐅᕙᓂ ᐊᖏᖃᑎᒌᒍᑎᒥ, ᐅᕝᕙᓗ ᒪᓕᒐᓐᖑᖅᑎᑦᓯᓂᕐᒨᖓᔪᓂ, ᐅᕝᕙᓗ ᐊᑐᓕᖅᑎᑦᓯᓂᕐᒧᑦ ᐃᒪᐃᓕᖓᔪᓂᒃ, ᐃᒪᐃᔾᔪᑕᐅᓂᐊᓐᖏᑦᑐᖅ:
(a)
ᓴᒃᑯᐃᓂᖅ ᐊᓯᒥᓄᑦ, ᑐᓂᓯᑐᐃᓐᓇᕐᓂᒃ ᐊᓯᐊᒍᓪᓘᓐᓃᑦ ᐱᔪᓐᓇᕐᓂᐅᔪᖅᑎᒍᑦ ᑭᓪᓕᖃᖅᑎᑦᓯᓂᕐᒧᓪᓘᓐᓃᑦ ᓇᐅᑐᐃᓐᓇᕐᒧᑦ ᓄᓇᖃᖅᑳᖅᓯᒪᔪᓄᑦ ᐅᕝᕙᓗ ᐊᓪᓚᓄᑦ ᐱᔪᓐᓇᐅᑎᔪᓄᑦ ᐊᑖᓂ ᒪᓕᒐᕐᔪᐊᖅ, 1982 ᓇᐅᑐᐃᓐᓇᕐᓄᑦ ᓄᓇᖃᖅᑳᖅᓯᒪᔪᓄᑦ ᐊᓯᖏᓐᓄᑦ ᐃᓄᐃᑦ; ᐅᕝᕙᓗ
(b)
ᑐᑭᓕᐅᖅᑕᐅᒋᐊᖃᓐᖏᑦᑐᑦ ᒥᑭᓪᓕᒋᐊᕆᔪᖅᑎᒍᑦ ᐅᕝᕙᓗ ᐊᐳᖅᓯᒪᔪᖅᑎᒍᑦ ᐅᕝᕙᓗ ᐊᑲᐅᓈᓐᖏᑦᑐᖅᑎᑐᑦ, ᓇᐅᑐᐃᓐᓇᕐᓄᑦ ᓄᓇᖃᖅᑳᖅᓯᒪᔪᓄᑦ ᐊᓪᓚᐃᓪᓘᓐᓃᑦ ᐱᔪᓐᓇᐅᑎᖏᓐᓄᑦ ᐊᑖᓂ ᒪᓕᒐᕐᔪᐊᑉ, 1982 ᓇᐅᑐᐃᓐᓇᕐᓄᑦ ᓄᓇᖃᖅᑳᖅᓯᒪᔪᓄᑦ ᐊᓯᖏᓐᓄᑦ ᐃᓄᐃᑦ.
40.1.3
ᓇᐅᑐᐃᓐᓇᖅ ᐅᕙᓃᑦᑐᖅ ᐊᖏᖃᑎᒌᒍᑎᒥ ᐊᐳᖅᓯᒪᒍᑕᐅᔾᔮᖏᑦᑐᖅ ᐊᐃᕙᔾᔪᑕᐅᓂᖏᓐᓄᑦ ᐊᖏᖃᑎᒌᒍᑏᑦ ᐃᓄᓐᓄᑦ ᐊᒻᒪᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐊᑦᑐᐊᔪᑦ ᐊᑐᖃᑎᒌᒍᒪᓂᕐᒧᑦ ᓄᓇᓂᒃ, ᐋᒡᒐᐅᒐᓗᐊᖅ ᐱᕕᖃᖅᑎᑦᓯᒍᑕᐅᔪᑦ ᑕᐃᒪᐃᑦᑐᓂᒃ ᐊᖏᖃᑎᒌᒍᑎᓂᒃ ᐊᑦᓱᖐᔾᔮᖏᑦᑐᑦ ᒐᕙᒪᒃᑯᓐᓂᒃ ᐊᓯᖏᓐᓂᓘᓐᓃᑦ ᓇᐅᑐᐃᓐᓇᕐᒥᓘᓐᓃᑦ ᐃᓄᒻᒥᒃ ᐊᓯᐊᓂᒃ ᐃᓄᑐᐃᓐᓇᐃᑦ ᐊᒻᒪᓗ ᑕᐃᒃᑯᐊ ᓄᓇᖃᖅᑳᖅᓯᒪᔪᑦ ᐊᖏᖅᑕᐅᖅᑳᓚᐅᕋᑎᒃ ᒐᕙᒪᒃᑯᓐᓄᑦ.
ᐃᓚᖓ 2
ᐃᓄᐃᑦ ᑯᐸᐃ ᑕᕐᕋᖓᓂᒥᐅᑦ
40.2.1 - ᐃᓘᓐᓈᒍᑦ ᐱᕕᖃᖅᑎᑦᓯᒍᑕᐅᔪᑦ
ᑐᕌᒐᐅᔪᑦ ᐆᒧᖓ ᐃᓚᖓᓄᑦ ᐃᒪᐃᓕᖓᔪᖅ:
(a)
ᐱᕕᖃᖅᑎᑦᓯᓗᑎᒃ ᑲᔪᓯᓂᕐᒥᒃ ᐊᖑᓇᓱᓐᓂᖏᓐᓂᒃ ᑕᒪᕐᒥᒃ ᓄᓇᓂ ᐊᑐᖅᑕᐅᖃᑦᑕᖅᓯᒪᔪᑐᖃᕐᓂ ᐊᒻᒪᓗ ᓄᓇᒋᔭᐅᓯᒪᔪᓂ, ᑖᒃᑯᐊᖑᒐᓗᐊᖅᑎᓪᓗᒋᑦ ᓄᓇᑖᕐᓂᕐᒧᑦ ᐊᖏᖃᑎᒌᓐᓂᕐᒧᑦ ᑭᓪᓕᒋᔭᐅᔪᑦ;
(b)
ᓇᓗᓇᐃᖅᓯᓗᑎᒃ ᓄᓇᓂᒃ ᐊᔾᔨᒌᑦᑐᒥᒃ ᐊᑐᖅᑕᐅᓂᐊᖅᑐᓂᒃ ᓇᔪᖅᑕᐅᓂᐊᖅᑐᓂᓪᓗ ᑖᒃᑯᓄᖔ ᐃᒻᒥᒃᑯᐊᖅᑐᓄᑦ ᒪᕐᕉᓐᓄᑦ ᐊᒻᒪᓗ ᐊᑦᑐᐊᔪᓄᑦ ᓄᓇᓄᑦ; ᐱᕕᖃᖅᑎᑕᐅᓗᑎᒃ:
(i)
ᓇᒻᒥᓂᖃᖃᑎᒌᓪᓗᑎᒃ ᓄᓇᓂᒃ ᒪᕐᕉᒃ ᐃᒻᒥᒃᑯᐊᖅᑑᒃ;
(ii)
ᐆᒪᔪᖃᖃᑎᒌᓐᓂᖅ ᐊᒻᒪᓗ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᐱᕚᓪᓕᕈᑎᑦᓴᖏᓐᓂᒃ ᒪᕐᕉᓕᖅᑲᖓᔫᒃ ᐃᒻᒥᒃᑰᖅᑑᒃ;
(iii)
ᐃᓚᐅᑎᓐᓂᖃᕐᓗᑎᒃ ᒪᕐᕉᓕᖅᑲᖓᔫᒃ ᐸᕐᓇᐅᑎᓂ ᐆᒪᔪᐃᑦ ᐊᐅᓚᑕᐅᓂᖏᓐᓂᒃ, ᓄᓇᒥᒃ ᐊᑐᕐᓂᒧᑦ ᐸᕐᓇᐅᑎᓂ, ᐊᑦᑐᖅᑕᐃᓂᕐᒧᑦ ᕿᒥᕐᕈᓂᕐᓂ ᐊᒻᒪᓗ ᐃᒪᕐᒥᒃ ᐊᐅᓚᑦᓯᓂᕐᒧᑦ ᑖᒃᑯᓇᓂ ᓄᓇᓂ; ᐊᒻᒪᓗ
(c)
ᐃᑲᔪᖅᓯᓗᑎᒃ ᑲᑐᔾᔨᖃᑎᒌᓐᓂᕐᒥᒃ ᐱᓕᕆᖃᑎᒌᑦᓯᐊᕐᓂᖓᓐᓂᓪᓗ ᑖᒃᑯᐊ ᒪᕐᕉᓕᖅᑲᖓᔫᒃ ᐊᑯᕐᖓᓐᓂ ᒪᕐᕉᓕᖅᑲᖓᔫᒃ ᐃᒻᒥᖅᑯᐊᖅᑐᑦ ᒐᕙᒪᒃᑯᓐᓗ.
40.2.2 - ᑐᑭᖏᑦ ᑐᑭᓯᒋᐊᕈᑏᓪᓗ
ᐅᕙᓂ ᐃᓚᖓᓂ:
ᓄᓇᐃᑦ ᐊᔾᔨᒌᑦᑐᒥᒃ ᐊᑐᖅᑕᐅᔪᑦ ᓇᔫᑎᓂᕐᓗ ᑐᑭᓕᒃ ᑕᐃᒃᑯᐊ ᓄᓇᐃᑦ ᓇᓗᓇᐃᔭᖅᑕᐅᔪᑦ ᐅᐃᒍ 40-1-ᒥ
ᑕᑯᑦᓴᐅᑎᑕᐅᑦᓱᑎᓪᓗ ᖃᐅᔨᒪᔾᔪᑕᐅᓂᐊᖅᑎᓪᓗᒋᑦ ᓄᓇᓐᖑᐊᓂ ᐊᑕᔪᓂ ᑕᕝᕙᓂ; ᐃᒻᒥᒃᑯᐊᖅᑐᖅ ᑐᑭᓕᒃ ᐃᓄᐃᑦ
ᓄᓇᕗᒻᒥ ᐅᕝᕙᓗ ᐃᓄᐃᑦ ᓄᓇᕕᒻᒥ ᐊᒻᒪᓗ
“ᒪᕐᕉᒃ ᐃᒻᒥᒃᑰᖅᑑᒃ” ᑐᑭᓕᒃ ᑕᒪᒃᑮᓐᓂᒃ;
ᐃᓄᐃᑦ ᓄᓇᕕᒻᒥᐅᑦ, ᑐᑭᓕᒃ ᐃᓄᐃᑦ ᑕᐃᒫᒃ ᓇᓗᓇᐃᔭᖅᑕᐅᓯᒪᒻᒪᑕ ᔭᐃᒻᔅ ᕙᐃ ᐊᒻᒪᓗ ᐅᑭᐅᖅᑕᖅᑐᖓᑕ ᑯᐸᐃ
ᐊᖏᖃᑎᒌᒍᑎᖓᑦ;
ᐃᓄᐃᑦ ᓄᓇᕗᒻᒥᐅᑦ ᑐᑭᓕᒃ ᐃᓄᐃᑦ ᑕᐃᒫᒃ ᓇᓗᓇᐃᔭᖅᑕᐅᒻᒪᑕ ᑎᑎᕋᖅᓯᒪᙵ 1.1.1-ᒥ;
ᒪᑭᕕᒃ ᑐᑭᓕᒃ ᑯᐊᐳᕇᓴᐅᔪᖅ ᑭᒡᒐᖅᑐᐃᔪᖅ ᐃᓄᖏᓐᓂᒃ ᓄᓇᕕᐅᑉ ᓴᖅᑭᖅᑎᑕᐅᓯᒪᑦᓱᑎᓪᓗ ᒪᓕᒐᖅᔪᐊᖅᑎᒍᑦ ᐊᑦᑐᐊᔪᖅᑎᒍ ᒪᑭᕕᒃ ᑯᐊᐳᕇᓴᖓᓐᓄᑦ, S.Q. 1978, c. 91; R.S.Q. c. S-18.1;
ᐃᒫᒃ ᑐᑭᓕᒃ ᑲᓇᑕᐅᑉ ᐃᓗᐊᓃᑦᑐᑦ ᐃᒪᐃᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᖅ ᑕᕆᐅᖓᑦ, ᐃᒪᐅᒍᓂ ᓯᑰᒍᓂᓘᓐᓃᑦ, ᑭᓯᐊᓂ ᐱᖃᓯᐅᔾᔨᖏᑦᑐᖅ ᐃᒪᕐᓂᒃ ᑯᐸᐃ ᐃᓗᐊᓃᑦᑐᓂᒃ. ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐅᖃᐅᓯᐅᔪᖅ ᐃᒪᐃᑦ ᐃᓗᐊᓃᑦᑐᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᑦ ᑕᕆᐅᖓ ᐱᖃᓯᐅᔾᔪᖅ ᐃᖅᑳᓂᒃ ᐊᒻᒪᓗ ᐃᖅᑳᑕ ᐃᑭᐊᖓᓂ ᐊᑖᓃᑦᑐᓂᒃ ᐃᓗᐊᓃᑦᑐᑦ ᐃᒪᐃᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᑕᕆᐅᑉ;
ᑯᐸᐃ ᑕᕐᕋᖓᓂ ᐃᓄᐃᑦ ᐃᑭᕐᒧᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖓᓐᓂ ᑐᑭᓕᒃ ᓇᐅᑐᐃᓐᓇᕐᓄᖅ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᐊᑯᕐᖓᓐᓂ ᑯᐸᐃ ᑕᕐᕋᖓᓂᒥᐅᑦ ᐃᓄᖏᑦᑕ ᐊᒻᒪᓗ ᒐᕙᒪᒃᑯᑦ ᐱᔾᔪᑎᖃᖅᑐᑦ ᕿᑭᖅᑕᓂᒃ ᑕᕆᐅᕐᒦᑦᑐᓂᓪᓗ ᓯᓚᑖᓂ ᑯᐸᐃ;
ᓄᓇᒥᐅᑕᐃᑦ ᐱᖃᓯᐅᑎᔪᑦ ᓄᓇᐃᑦ, ᐅᔭᕋᑦᓯᐊᕙᐃᑦ, ᐆᒪᔪᐃᑦ, ᐃᒪᐃᑦ ᐊᒻᒪᓗ ᐊᕙᑎ ᐃᓘᓐᓈᒍᑦ;
ᐆᒪᔪᐃᑦ ᑕᐃᒫᑦᓴᐃᓐᓇᖅ ᑐᑭᓖᑦ ᑎᑎᕋᖅᑕᐅᓯᒪᒻᒪᑦ 1.1.1.-ᒥ ᑭᓯᐊᓂ ᐱᖃᓯᐅᔾᔨᖏᑦᑐᑦ ᑐᑦᑐᕙᓐᓂᒃ.
40.2.3
ᐅᐃᒍᐃᑦ ᓄᓇᓐᖑᐊᓪᓗ ᐊᑕᔪᑦ ᐆᒧᖓ ᐃᓛᒃᑰᖅᑐᒧᑦ ᐃᓚᒍᑦᓯᐅᑎᓯᒪᔪᑦ.
40.2.4 - ᐆᒪᔪᕐᓂᒃ ᐊᖑᓇᓱᓐᓂᖅ
ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 40.2.5 402.6 ᐃᓄᖏᑦ ᓄᓇᕕᐅᑉ ᑕᐃᒫᑦᓴᐃᓐᓇᖅ ᐱᔪᓐᓇᕐᓂᓖᑦ ᐊᑦᑐᐊᔪᓄᑦ ᐊᖑᓇᓱᑦᑕᐅᓂᖏᓐᓄᑦ ᐆᒪᔪᐃᑦ ᑕᕆᐅᕐᒥ ᐊᒻᒪᓗ ᕿᑭᖅᑕᖏᓐᓂ ᓄᓇᕗᑦ ᐊᑐᖅᑕᐅᖃᑦᑕᖅᓯᒪᔪᑐᖃᐃᑦ ᓇᔪᖅᑕᐅᖃᑦᑕᖅᓯᒪᑎᓱᑦᑎᓪᓗ ᑕᐃᒫᑦᓴᐃᓐᓇᖅ ᐃᓄᖏᑦᑎᑐᑦ ᓄᓇᕗᑦ ᐊᑖᓂ ᐃᓛᒃᑯᑦ 5 ᐋᒡᒐᐅᒐᓗᐊᖅ ᐱᔪᓐᓇᐅᑎᖃᓐᖏᑦᑐᑦ ᐊᑖᓂ ᐃᓚᖓ 2, 4 ᐊᒻᒪᓗ 5. ᑎᑎᕋᖅᓯᒪᔪᑦ 5.6.18 ᐊᒻᒪᓗ 5.6.39, ᐃᓚᖓ 8 ᐊᒻᒪᓗ ᑎᑎᕋᖅᓯᒪᔪᑦ 5.9.2 ᐊᒻᒪᓗ 5.9.3.
40.2.5
ᐆᒪᓇᓱᐊᕈᑕᐅᔭᕆᐊᓖᑦ ᐃᓄᖏᓐᓄᑦ ᓄᓇᕕᐅᑉ ᓇᓗᓇᐃᖅᑕᐅᕙᓐᓂᐊᖅᑐᑦ ᑐᓐᖓᕕᖃᕐᓗᑎᒃ ᐊᑐᐃᓐᓇᐅᔪᓂᒃ ᑐᓴᕋᑦᓴᓂᒃ. ᐆᒪᓇᓱᐊᕈᑕᐅᒋᐊᓖᑦ ᒪᕐᕉᓕᖅᑲᖓᔫᓐᓄᑦ ᐃᒻᒥᒃᑯᐊᖅᑑᓐᓄᑦ ᐅᖓᑖᓅᕈᑎᑉᐸᑕ ᐊᖑᔭᐅᒍᓐᓇᖅᑐᑦ ᑲᑎᓪᓗᑎᒃ, ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ ᐃᓕᐅᖅᑲᖅᑕᐅᓂᐊᖅᑐᑦ ᐊᑯᕐᖓᓐᓂ ᒪᕐᕉᓕᖅᑲᖓᔪᑦ ᐊᑲᐅᓈᖅᓯᒪᖁᓪᓗᒋᑦ ᐆᒪᓇᓱᐊᕈᑎᖏᓐᓄᑦ.
40.2.6
ᒪᑭᕕᒃᑯᑦ ᐊᑐᕐᓂᐊᖅᑐᑦ ᓴᓐᖏᓂᖏᓐᓂᒃ ᓄᓇᓕᓐᓂ ᐊᖑᓇᓱᑦᑏᑦ ᑲᑎᒪᔨᖏᑦᑕ ᐅᕝᕙᓗ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑎᒪᔨᖏᑦᑕ ᑭᒡᒐᖅᑐᕐᓗᑎᒃ ᐃᓄᖏᓐᓂᒃ ᓄᓇᕕᐅᑉ.
40.2.7
ᐃᓄᐃᑦ ᓄᓇᕗᒻᒥ ᐊᖑᓇᓱᒍᓐᓇᖅᑐᑦ ᐆᒪᔪᕐᓂᒃ ᑕᕆᐅᒦᑦᑐᓂᒃ ᕿᑭᖅᑕᓂᓗ ᐊᑯᕐᖓᓐᓂ ᓄᓇᕗᑦ ᐊᒻᒪᓗ ᑯᐸᐃ ᐊᑐᖅᑕᐅᖃᑦᑕᖅᑐᑐᖃᐅᔪᑦ ᓇᔪᖅᑕᐅᖃᑦᑕᖅᑐᑐᖃᐃᓪᓗ ᑖᒃᑯᓄᖓ ᑕᐃᒫᑦᓴᐃᓐᓇᖅ ᐃᓄᖏᑦᑎᑐᑦ ᓄᓇᕕᐅᑉ.
40.2.8 – ᓄᓇᐃᑦ ᐊᔾᔨᒌᒥᒃ ᐊᑐᖅᑕᐅᔪᑦ ᓇᔪᖅᑕᐅᔪᓪᓗ: ᓄᓇᒥᒃ ᓇᒻᒥᓂᖃᕐᓂᖅ
ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ, ᑕᐃᒃᑯᐊ ᓄᓇᐃᑦ ᓇᓗᓇᐃᔭᖅᑕᐅᓯᒪᔪᑦ ᐅᐃᒍ 40-2, ᑎᒍᒥᐊᖅᑕᐅᓂᐊᖅᑐᖅ ᓇᓗᓇᐃᖅᑕᐅᓯᒪᔪᓂ ᓄᓇᓐᖑᐊᓂ ᐅᖃᐅᓯᐅᔪᓂ ᑕᐃᑲᓂ ᐅᐃᒍᒥ, ᓇᓗᓇᐃᖅᑕᐅᓯᒪᔪᓂ ᐃᓄᓐᓄᑦ ᑎᒥᖁᑕᐅᔪᓂᒃ ᑭᒡᒐᖅᑐᕐᓗᑎᒃ ᐊᒻᒪᓗ ᐱᕚᓪᓕᕈᑎᑦᓴᖏᓐᓄᑦ ᐃᓄᐃᑦ ᓄᓇᕗᒻᒥᐅᑦ ᐊᒻᒪᓗ ᒪᑭᕕᒻᒥ ᑭᒡᒐᖅᑐᕐᓗᑎᒃ ᐱᕚᓪᓕᕈᑎᑦᓴᖏᓐᓄᓪᓗ ᐃᓄᐃᑦ ᑯᐸᐃ ᑕᕐᕋᖓᓂᒥᐅᑦ, ᓇᒻᒥᖃᖃᑎᒌᓪᓗᑎᒃ ᑲᑐᔾᔨᓗᑎᒃ ᓇᒻᒥᓂᖃᖃᑎᒌᑐᐃᓐᓇᖏᓪᓗᑎᒃ.
40.2.9
ᐱᕕᖃᖅᑎᑦᓯᒍᑕᐅᔪᓕᒫᑦ ᐊᖏᖃᒌᒍᑎᒥ ᐊᑦᑐᐊᔪᑦ ᐃᓄᐃᑦ ᓄᓇᖁᑎᖏᓐᓄᑦ ᐋᒡᒐᐅᒐᓗᐊᖅ ᐃᓚᖓ 3 ᑕᐃᑲᓂ ᐃᓛᒃᑯᑦ 19-ᒥ ᑭᓯᐊᓂ ᐱᖃᓯᐅᑎᑦᓱᑎᒃ ᐱᕕᖃᖅᑎᑦᓯᒍᑕᐅᔪᑦ ᐊᑦᑐᐊᔪᑦ ᐱᖁᑎᓂᒃ ᓇᓗᓇᐃᔭᐃᓂᕐᓄᑦ, ᕿᓐᖑᒻᒥᒐᕐᓃᑦ ᑭᓪᓕᒋᔭᐅᔪᓪᓗ, ᐊᑑᑎᓂᐊᖅᑐᑦ ᑲᑐᔾᔨᓪᓗᑎᒃ ᓄᓇᖁᑎᒋᔭᐅᔪᓄᑦ ᐅᖃᐅᓯᐅᔪᓄᑦ ᑎᑎᕋᖅᓯᒪᔪᒥ 40.2.8. ᓇᐅᑐᐃᓐᓇᖅ ᓴᓐᖏᓂᕆᔭᖓᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᑖᓂ ᐊᖏᖃᑎᒌᒍᑎᐅᑉ ᐊᑦᑐᐊᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ ᐊᑐᖅᑕᐅᖃᑎᒌᑦᑐᓂ ᓇᔪᖅᑕᐅᖃᑎᒌᑦᑐᓂᓗ ᐊᑑᑎᔭᐅᓂᐊᖅᑐᖅ ᖁᕕᐊᒋᔭᐅᔪᓗᓂᓗ ᑕᒪᒃᑮᓐᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᒪᑭᕕᒃᑯᓐᓄᓪᓗ ᑕᐃᒃᑯᐊ ᐊᑦᑐᐊᔪᑦ ᑲᑐᔾᔨᓪᓗᑎᒃ ᓄᓇᖁᑎᒋᔭᐅᔪᓄᑦ.
40.2.10
ᐊᑦᑐᐊᔪᑦ ᓄᓇᓄᑦ ᓇᓗᓇᐃᔭᖅᑕᐅᔪᓄᑦ ᐅᐃᒍ 40-2-ᒥ ᐊᒻᒪᓗ ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐊᓯᖏᑦ ᒪᓕᒐᐃᑦ ᐊᐅᓚᓂᐅᔪᓪᓗ ᒪᓕᒐᖅᑎᒍᑦ, ᒪᓕᒐᐅᓗᓂ ᐱᖁᑎᒋᔭᐅᓗᓂᓘᓐᓃᑦ, ᓇᓪᓕᖏᒃ ᐃᒻᒥᒃᑰᖅᑐᑦ ᐃᒪᐊᒋᐊᖃᓐᖏᑦᑐᑦ:
(a)
ᓴᖅᑮᓗᑎᒃ ᓴᒃᑯᐃᓗᑎᓪᓘᓐᓃᑦ ᒪᓕᒐᐅᓯᒪᔪᒥᒃ ᐊᔾᔨᒌᒥᓪᓘᓐᓃᑦ ᓇᒻᒥᓂᖃᕐᓂᐅᔪᓂᒃ ᓄᓇᓂᒃ;
(b)
ᕿᓂᕐᓗᑎᒃ ᑐᓂᓯᓗᑎᓪᓘᓐᓃᑦ ᐃᓚᓐᖓᐃᓗᑎᓪᓘᓐᓃᑦ ᐃᒻᒥᒃᑰᓕᖅᑎᑦᓯᓗᑎᓪᓘᓐᓃᑦ ᓄᓇᓂᒃ
(c)
ᓴᖅᑮᓗᑎᒃ ᐊᐅᓚᑦᓯᓗᑎᓪᓘᓐᓃᑦ ᐃᓪᓗᓂᒃ ᐊᑦᑐᐊᔪᓂᒃ ᐱᓐᖑᐊᕐᓂᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓘᓐᓃᑦ ᐊᑐᕐᓗᑎᒃ ᐆᒪᔪᕐᓂᒃ ᐅᕝᕙᓗ ᐃᓪᓗᓂᒃ ᐊᑦᑐᐊᔪᓂᒃ ᕿᒥᕐᕈᓂᕐᒧᑦ, ᖃᐅᔨᓴᕐᓂᕐᒧᑦ, ᑲᔾᔮᕆᔭᖃᕐᓂᕐᒧᓪᓘᓐᓃᑦ ᓄᓇᒥᒃ ᐱᖅᑯᓯᖅᑎᒍᓪᓘᓐᓃᑦ ᑕᑯᑦᓴᐅᓂᖏᓐᓂᒃ ᓄᓇᐃᑦ; ᐅᕝᕙᓗ
(d)
ᐊᑐᕐᓗᑎᒃ ᓄᓇᓂᒃ ᑕᐅᑦᑐᖏᑦ ᐊᓯᔾᔨᓚᕿᓗᑎᒃ ᐅᕝᕙᓗ ᖃᓄᑐᐃᓐᓇᖅ ᐱᐅᓂᖓᓂᒃ ᒥᑭᓪᓕᑎᕆᑉᐸᑕ; ᑎᑎᖅᑲᑎᒍᑦ ᐊᖏᖅᑕᐅᓯᒪᓐᖏᓪᓗᑎᒃ ᐃᒻᒥᒃᑯᐊᖅᑐᓄᑦ ᐊᒻᒪᓗ ᓇᐅᑐᐃᓐᓇᖅ ᐊᐅᓚᓂᐅᔪᓂᖅ ᓱᓇᒃᑐᑎᓘᓐᓃᑦ ᑕᐃᒪᐃᒐᓱᐊᖅᑐᖅ ᐊᑑᑎᖃᕐᓂᐊᖏᓚᖅ ᐊᑦᑐᐃᓂᖃᓐᖏᓪᓗᓂᓗ.
ᓯᕗᓂᐊᒍᑦ ᑎᑎᕋᖅᓯᒪᔪᒃᑯᑦ ᐊᖏᖃᑎᒌᒍᑎᑕᖃᓐᖏᑉᐸᑦ ᐊᓯᖏᓐᓂᒃ ᑲᑐᔾᔨᖃᑎᒌᓂᒃ ᐊᒻᒪᓗ ᐱᖁᔭᓂᒃ ᐅᕝᕙᓘᓐᓃᑦ ᐃᓐᓂᑕᐅᓯᒪᓂᕋᖅᑕᐅᔪᒥᒃ ᓇᓗᓇᐃᖅᓯᒪᔭᐅᔪᖅ ᐱᑕᖃᕆᐊᖃᓐᖏᓚᖅ, ᐊᑐᖅᑎᑕᐅᓐᖏᓪᓗᓂ ᐊᒻᒪᓗ ᐊᑑᑎᖃᓐᖏᓪᓗᓂᓗ.
40.2.11
ᓇᐅᑐᐃᓐᓇᖅ ᐊᐅᓚᓂᐅᔪᖅ ᐊᐅᓚᓐᖏᓐᓂᐅᔪᕐᓘᓐᓃᑦ ᓇᓪᓕᑐᐃᓐᓇᖏᓐᓄᑦ ᐃᒻᒥᒃᑯᖅᑑᒃ ᐊᑦᑐᐊᔪᑦ ᑎᑎᕋᖅᓯᒪᔪᑦ 40.2.10 ᐊᑭᓖᑎᑦᓯᒍᑕᐅᔾᔮᖏᑦᑐᖅ ᒐᕙᒪᒃᑯᓐᓂᒃ.
40.2.12 - ᓄᓇᐃᑦ ᐊᔾᔨᒌᒥᒃ ᐊᑐᖅᑕᐅᔪᑦ ᓇᔫᑎᕕᐅᔪᓪᓗ: ᐊᓯᖏᑦ ᐱᕚᓪᓕᕈᑕᐅᔪᑦ
ᑕᐃᒪᐃᓕᖓᒐᓗᐊᖅᑎᓪᓗᒍ 40.2.4 ᐊᒻᒪᓗ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 40.2.13, ᓄᓇᓂᒃ ᐊᔾᔨᒌᒥᒃ ᐊᑐᖅᑕᐅᔪᓂ ᓇᔪᖅᑕᐅᔪᓂᓪᓗ, ᐱᔪᓐᓇᐅᑎᖏᑦ ᐃᓄᐃᑦ ᓄᓇᕗᒻᒥᐅᑦ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 5.6.39, ᐊᒻᒪᓗ ᐃᓚᖓ 8 ᐃᓛᒃᑯᑦ 5-ᒥ ᐊᒻᒪᓗ ᐃᓛᒃᑯᑦ 8, 9, 26, 33, 24 ᐊᑑᑎᓂᐊᖅᑐᑦ ᐊᔾᔨᒌᑦᑐᒥᒃ ᐃᓄᖏᓐᓄᑦ ᓄᓇᕕᐅᑉ ᐊᒻᒪᓗ ᐊᐅᓚᓂᖏᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑐᓐᖓᕕᖏᑦᓱᒋᑦ ᑕᐃᒃᑯᐊ ᐃᓛᒃᑰᖅᑐᑦ ᐊᑑᑎᔭᐅᓂᐊᖅᑐᖅ ᑎᒥᐅᔪᒧᑦ ᑲᑐᔾᔨᓪᓗᑎᒃ ᑎᓕᔭᐅᓯᒪᔪᓄᑦ ᑐᓐᖓᕕᒃᑯᓐᓄᑦ ᒪᑭᕕᒃᑯᓐᓄᓪᓗ ᐊᐅᓚᑦᓯᖁᔭᐅᑦᓱᑎᒃ ᑕᐃᒃᑯᓇᓐᖓᑦ ᐊᐅᓚᓂᐅᔪᓂᒃ ᐅᕝᕙᓗ, ᓇᓗᓇᐃᖅᑕᐅᓯᒪᔪᖃᓐᖏᑉᐸᑦ ᑕᐃᒪᐃᑦᑐᓂᒃ, ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.
40.2.13
ᑎᑎᕋᖅᓯᒪᔪᖅ 40.2.12 ᐊᑑᑎᓐᖏᑦᑐᖅ ᐱᔪᓐᓇᐅᑎᖏᓐᓄᑦ ᐃᓄᐃᑦ ᓄᓇᕗᒻᒥᐅᑦ ᐊᑖᓂ ᑎᑎᕋᖅᓯᒪᔪᖅ 5.8.9 ᐊᑦᑐᐊᔪᓄᑦ ᖁᓂᕈᕐᓂᐊᕐᓂᕐᒧᑦ ᐊᐅᓚᑕᐅᔪᒧᑦ ᓴᓐᓃᑦ ᑯᐊᐸᖓᓐᓄᑦ.
40.2.14 - ᓄᓇᐃᑦ ᐊᑐᖅᑕᐅᖃᑎᒌᑦᑐᑦ ᓇᔪᖅᑕᐅᖃᑎᒌᓪᓗ: ᐊᐅᓚᑕᐅᓂᖅ
ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 40.2.4, ᑭᖑᕐᖓᓐᓂ ᐊᖏᖃᑎᒌᒍᑎᐅᑉ ᒪᓕᒐᓐᖑᖅᑎᑕᐅᓂᖓᑕ ᐊᒻᒪᓗ ᓯᕗᕐᖓᓂ ᓄᓇᕕᐅᑉ ᐃᓄᖏᑦᑕ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖓᑦᑕ ᒪᓕᒐᓐᖑᖅᑎᑕᐅᓚᐅᓐᖏᓐᓂᖓᓂ, ᒪᑭᕕᒃ, ᑭᒡᒐᖅᑐᕐᓗᑎᒃ ᐃᓄᖏᓐᓂᒃ ᑯᐸᐃ ᑕᕐᕋᖓᑕ, ᑎᓕᓯᓂᐊᖅᑐᑦ ᓄᓇᕗᒻᒥ ᐅᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐊᒻᒪᓗ ᓂᕈᐊᕋᑦᓴᓕᐅᕐᓂᐊᖅᓱᑎᒃ ᐊᑐᓂᑦ ᓄᓇᕗᒻᒥ ᐸᕐᓇᐃᔨᒃᑯᓐᓄᑦ, ᓄᓇᕗᒻᒥ ᐱᓕᒻᒪᑦᓴᐃᔨᓄᑦ ᐊᒻᒪᓗ ᓄᓇᕗᒻᒥ ᐃᒪᓕᕆᔨᓄᑦ, ᑲᑎᒪᔩᑦ ᐊᕝᕙᓪᓗᐊᖏᑦ ᑕᐃᒃᑯᐊ ᑎᓕᔭᐅᔪᑦ ᓂᕈᐊᕋᑦᓴᓕᐊᖑᔪᓪᓘᓐᓃᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᑲᑎᒪᔨᖏᑦ ᑕᐃᒫᑦᓴᐃᓐᓇᖅ ᑎᓕᔭᐅᓂᐊᖅᓱᑎᒃ ᐊᐅᓚᓂᖏᑦᑎᑐᑦ ᑲᑎᒪᔩᑦ ᓂᕈᐊᕋᑦᓴᓕᐊᖑᔪᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ. ᓇᐅᑐᐃᓐᓇᖅ ᑲᑎᒪᔨ ᑎᓕᔭᐅᔪᖅ ᐃᓇᖐᓂᐊᖅᑐᖅ ᑕᐃᒫᓪᓗᐊᖅ ᖃᑦᓯᐅᓂᖏᓐᓂᒃ ᑲᑎᒪᔩᑦ ᑎᓕᔭᐅᔪᑦ ᓂᕈᐊᕋᑦᓴᓕᐊᖑᔪᓪᓘᓐᓃᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐋᖅᑭᑦᑕᐅᔪᓄᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ, ᓄᓇᕗᒻᒥ ᐸᕐᓇᐃᔨᓄᑦ, ᓄᓇᕗᒻᒥ ᐱᓕᒻᒪᑦᓴᐃᔨᓄᑦ ᐊᑑᑎᔪᓄᑦ ᐊᐅᓚᓂᐅᔪᓄᑦ ᓄᓇᓂ ᐊᔾᔨᒌᑦᑐᒥᒃ ᐊᑐᖅᑕᐅᕙᑦᑐᓂ ᓇᔪᖅᑕᐅᕙᑦᑐᓂᓗ, ᑭᓯᐊᓂ ᐃᓱᒪᒋᔭᐅᓂᐊᓐᖏᑦᑐᖅ ᑲᑎᒪᔨᐅᒋᐊᖓ ᑖᒃᑯᓄᖓ ᑎᒥᐅᔪᓄᑦ.
40.2.15
ᐊᑦᑐᐊᔪᓄᑦ ᐃᓱᓕᓐᓂᖓᓄᑦ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕈᑎᖓᑦ, ᒐᕙᒪᒃᑯᑦ, ᐃᓄᐃᑦ ᓄᓇᕗᒻᒥᐅᑦ ᐊᒻᒪᓗ ᐃᓄᐃᑦ ᓄᓇᕕᒻᒥᐅᑦ ᖃᓄᖅᑑᕐᓂᐊᖅᑐᑦ ᓈᒻᒪᓈᖅᓯᒪᔪᓄᑦ ᑕᐃᒪᓐᖓᓕᒫᖅᑐᓄᑦ ᐆᒪᔪᐃᑦ ᓄᓇᐃᓪᓗ ᐃᒪᓪᓗ ᐊᐅᓚᑕᐅᓂᖏᓐᓄᑦ ᐸᕐᓇᐅᑎᓂᒃ ᓄᓇᓄᑦ ᐊᑐᖅᑕᐅᖃᑎᒌᑦᑐᓄᑦ ᓇᔪᖅᑕᐅᖃᑎᒌᑦᑐᓄᓪᓗ.
40.2.16
ᓄᓇᕗᒻᒥ ᐆᒪᔪᓕᕆᔨᕐᔪᐊᑦ, ᓄᓇᕗᒻᒥ ᐸᕐᓇᐃᔩᑦ, ᓄᓇᕗᒻᒥ ᐱᓕᒻᒪᖅᓴᐃᔩᑦ ᐊᒻᒪᓗ ᓄᓇᕗᒻᒥ ᐃᒪᓕᕆᔨᒃᑯᑦ, ᐊᐅᓚᓂᖃᕐᓗᑎᒃ ᐊᐅᓚᓂᕐᒥᓂ ᐊᑦᑐᐊᔪᓂ ᓄᓇᓄᑦ ᐃᒪᕐᓄᓪᓗ ᓄᓇᕗᒻᒥ ᐊᑐᖅᑕᐅᖃᑦᑕᖅᓯᒪᔪᓄᑦ ᓇᔪᒐᐅᓯᒪᔪᓄᓪᓗ ᐃᓄᖏᓐᓄᑦ ᓄᓇᕕᒃ ᐱᕕᖃᖅᑎᑦᓯᓂᐊᖅᑐᑦ ᐊᑕᖏᖅᑐᒥᒃ ᒪᑭᕕᒃᑯᓐᓄᑦ ᐅᓂᒃᑳᓕᐅᖅᐸᓪᓗᑎᒃ ᐊᑦᑐᐊᔪᓄᑦ ᐱᔪᒪᔭᕆᔭᖏᓐᓄᑦ ᐃᓄᐃᑦ ᓄᓇᕕᒻᒥ ᐊᒻᒪᓗ ᑭᒡᒐᖅᑑᑎᖏᑦ ᐃᓱᒪᒋᔭᐅᖃᑎᓯᐅᑎᓂᐊᖅᑐᑦ.
40.2.17 - ᑲᑐᔾᔨᓪᓗᑎᒃ ᓴᐳᔾᔨᓂᖅ ᐱᔪᓐᓇᐅᑎᓂᒃ ᐱᔪᒪᔭᕆᔭᐅᔪᓂᓪᓗ, ᐊᑯᕐᖓᓐᓂ ᒪᕐᕉᓕᖅᑲᖓᔪᑦ ᐃᒻᒥᒃᑰᖅᑐᑦ
ᐱᖃᓯᐅᑎᑦᓱᑎᒃ ᐱᔪᓐᓇᐅᑏᑦ ᐱᓯᒪᔪᑦ ᐅᕙᓂᖓ ᐊᖏᖃᑎᒌᒍᑎᒥᒃ, ᑯᐊᐱᒥ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖓᓐᓂᒃ ᐊᒻᒪᓗ ᔭᐃᒻᔅ ᕙᐃ ᐊᒻᒪᓗ ᑯᐸᐃ ᑕᕐᕋᖓᓄᑦ ᐊᖏᖃᑎᒌᒍᑎ, ᑐᓐᖓᕕᖃᕐᓗᓂ ᐱᔪᓐᓇᐅᑎᖏᓐᓂᒃ ᐱᔪᒪᔭᕆᔭᖏᓐᓂᓪᓗ ᐊᐃᑉᐸᐃᖏᑦᑕ ᐃᒻᒥᒃᑰᖅᑐᑦ.
40.2.18
ᐊᑑᑎᔭᐅᑎᓪᓗᒋᑦ ᐱᔪᓐᓇᐅᑎᖏᑦ ᐊᑦᑐᐊᓂᖃᖅᑐᑦ ᐊᖑᓇᓱᓐᓂᕐᒧᑦ ᓄᓇᒥᐅᑕᕐᓂᓪᓗ ᐊᐅᓚᑦᓯᓂᕐᒧᑦ ᐊᑦᑐᐃᓂᖃᑐᐃᓐᓇᕆᐊᓖᑦ ᐊᐃᑉᐸᖏᓐᓂᒃ ᐃᒻᒥᒃᑰᖅᑐᓂᒃ, ᐊᑐᓂᑦ ᐃᒻᒥᒃᑰᖅᑐᑦ ᖃᐅᔨᒪᓕᑕᖃᕐᓂᐊᖅᑐᑦ ᑐᓐᖓᕕᖏᓐᓂᒃ ᓄᖑᑎᕆᓕᐊᑦᑕᐃᓕᓂᐅᑉ ᐊᒻᒪᓗ ᐱᒻᒪᕆᐅᓂᖓᓂᒃ ᐊᑑᑎᓂᖃᑦᓯᐊᖅᑐᑦ ᐊᕙᑕᒥᒃ ᓴᐳᔾᔨᓂᐅᔪᓄᑦ ᐊᐅᓚᓂᐅᔪᑦ ᑐᕌᒐᖃᖅᑐᑦ ᑲᔪᓯᓂᖃᑦᓯᐊᖅᑐᑦ ᐊᑐᕐᓂᕐᒥᒃ ᓄᓇᒥᐅᑕᕐᓂᒃ.
40.2.19
ᐊᑐᓂᑦ ᐃᒻᒥᒃᑰᖅᑐᑦ ᐅᖃᖃᑎᖃᕐᓂᐊᖅᑐᑦ ᐊᐃᑉᐸᐃᒥᓂᒃ ᐊᑦᑐᐊᔪᓄᑦ ᐃᓱᒫᓘᑕᐅᔪᓕᒫᓄᑦ ᐃᓘᓐᓇᖏᓐᓅᖓᔪᓄᑦ ᐊᖑᓇᓱᕐᓂᕐᒧᑦ ᓄᓇᒥᐅᑕᕐᓂᓘᓐᓃᑦ ᐊᐅᓚᑦᓯᓂᕐᒧᑦ ᐃᒻᒥᒃᑯᐊᖅᑐᑦ ᐊᐅᓚᑦᓯᕕᖃᕐᕕᒋᔭᖏᓐᓂ ᐊᑦᑐᐃᓂᖃᑐᐃᓐᓇᕆᐊᖃᖅᐸᑕᓗ ᐊᐃᑉᐸᐃᖏᓐᓂᒃ. ᑐᓂᒪᓂᖃᕐᓂᖅ ᐅᖃᖃᑎᖃᕐᓂᕐᒧᑦ ᐱᖃᓯᐅᔾᔨᓂᐊᖅᑐᖅ ᑐᓂᒪᓂᕐᒥᒃ ᑐᓴᐅᒪᑎᑦᓯᑦᓯᐊᕐᓂᕐᒥᒃ ᑎᑎᕋᖅᓯᒪᔪᑎᒍᑦ ᐊᐅᓚᑦᓯᓗᑎᓪᓗ ᓴᓇᔭᐅᑎᓪᓗᒋᑦ ᓈᒻᒪᓈᖅᓯᒪᔪᑦ ᑎᑎᕋᖅᓯᒪᔪᑦ ᐅᓂᒃᑳᑦ.
40.2.20
ᑭᖑᕐᖓᓂ ᐊᖏᖃᑎᒌᒍᑎ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᒻᒪᓗ ᓯᕗᕐᖓᓂ ᓄᓇᕕᐅᑉ ᐃᓄᖏᑦᑕ ᓄᓇᑖᕈᑎᖓᑦ ᒪᓕᒐᓐᖑᖅᑎᑕᐅᓚᐅᖅᑎᓐᓇᒍ, ᐱᔪᓐᓇᕐᓂᖃᕐᕕᒋᓗᓂᐅᒃ, ᐃᓄᐃᑦ ᓄᓇᕕᒻᒥᐅᑦ ᐱᕕᖃᖅᑎᑦᓯᓂᐊᖅ ᐃᓄᖏᓐᓂᒃ ᓄᓇᕗᒻᒥᐅᑦ ᑎᓕᓯᓗᑎᒃ ᓂᕈᐊᕋᑦᓴᓕᐅᕐᓗᑎᓪᓘᓐᓃᑦ ᖃᑦᓯᐅᓂᖏᑦᑕ ᐊᔾᔨᓪᓗᐊᖏᓐᓂᒃ ᑲᑎᒪᔩᑦ ᓇᐅᑐᐃᓐᓇᕐᓄᑦ ᓄᓇᒥᐅᑕᕐᓂᒃ ᐊᐅᓚᑦᓯᓂᕐᒨᖓᔪᓄᑦ ᑎᒥᐅᔪᓄᑦ ᕿᒥᕐᕈᔨᓄᓪᓘᓐᓃᑦ, ᐃᓄᖏᑦ ᑯᐸᐃ ᑕᕐᕋᖓᑕ ᑎᓕᓯᒍᓐᓇᖅᑐᑦ ᓂᕈᐊᕋᑦᓴᓕᐅᕐᓗᑎᓪᓘᓐᓃᑦ ᑲᑎᒪᔨᑦᓴᓂᒃ, ᑎᒥᐅᔪᖅ ᕿᒥᕐᕈᔩᓪᓘᓐᓃᑦ ᖃᓄᖅᑑᕈᑎᖃᓕᖅᐸᑕ ᐊᑦᑐᐃᑐᐃᓐᓇᕆᐊᓕᓐᓂᒃ ᐱᔪᓐᓇᐅᑎᖏᓐᓂᒃ ᐱᔪᒪᔭᕆᔭᖏᓐᓂᓘᓐᓃᑦ ᐃᓄᐃᑦ ᓄᓇᕗᒻᒥᐅᑦ ᓄᓇᓄᑦ ᐊᔾᔨᒌᑦᑐᒥᒃ ᐊᑐᖅᑕᐅᔪᓄᑦ ᓇᔪᒐᐅᔪᓄᓪᓘᓐᓃᑦ.
40.2.21
ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 31.1.1, ᒪᕐᕉᓕᖅᑲᖓᔫᒃ ᐊᔾᔨᒌᓪᓕᐊᖅᑐᒥᒃ ᐊᕕᓐᓂᐊᖅᑐᑦ ᓇᐅᑐᐃᓐᓇᕐᓂᒃ ᐃᑖᔪᓂᒃ ᐱᔭᐅᔪᓂᒃ ᓇᓪᓕᑐᐃᓐᓇᖏᓐᓄᑦ ᐃᒻᒥᒃᑰᖅᑐᑦ ᐱᔭᖏᑦ ᓇᐅᑐᐃᓐᓇᕐᓂᒃ ᐱᔪᓐᓇᐅᑎᓂᒃ ᐊᒥᖅᑲᐅᑎᖃᕐᓂᕐᒧᑦ ᓄᓇᒥᐅᑕᕐᓄᑦ ᐃᑖᔪᓂᒃ ᓄᓇᓂ ᐊᑐᖅᑕᐅᖃᑎᒌᑦᑐᓂᒃ ᓇᔪᖅᑕᐅᖃᑎᒌᑦᑐᓂᓗ ᑐᓐᖓᕕᒋᑦᓱᒍ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᒃ.
40.2.22
ᓇᐅᑐᐃᓐᓇᐃᑦ ᓄᓇᐃᑦ, ᕐᑳᖓᒍᒃᑲᓐᓂᖅ ᑕᐃᒃᑯᐊ ᓇᓗᓇᐃᔭᖅᑕᐅᓯᒪᔪᑦ ᐅᐃᒍ 40-2-ᒥ ᐱᔭᐅᑉᐸᑕ ᐃᓄᖏᓐᓄᑦ ᓄᓇᕕᐅᑉ ᓄᓇᓂ ᐊᑐᖅᑕᐅᖃᑎᒌᑦᑐᓂ ᓇᔪᖅᑕᐅᖃᑎᒌᑦᑐᓂᓗ ᐊᑖᓂ ᓄᓇᕕᒻᒥᐅ ᐃᓄᐃᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖓᑦᑕ, ᐃᓄᐃᑦ ᓄᓇᕕᒻᒥᐅᑦ ᐱᓂᐊᖅᑐᑦ ᑎᒍᓯᓂᕐᒥᒃ ᑲᑐᔾᔨᓪᓗᑎᒃ ᓄᓇᖃᖃᑎᒌᓐᓂᕐᒥᒃ ᐊᒻᒪᓗ ᓄᓇᖃᖃᑎᖃᕐᓂᑐᐃᓐᓇᐅᖏᑦᑐᒥᒃ ᐃᓄᖏᓐᓂᒃ ᓄᓇᕗᑦ.
40.2.23
ᑎᑎᕋᖅᓯᒪᔪᒥ 40.2.22 ᐅᖃᖅᓯᒪᔪᖃᓐᖏᓚᖅ ᑐᓂᒪᓂᖅᑕᖃᕋᓂᓗ ᒐᕙᒪᒃᑯᓐᓄᑦ ᐊᐃᕙᓂᕐᒧᑦ ᕐᑳᖓᒍᒃᑲᓐᓂᖅ ᐃᓄᐃᑦ ᓇᒻᒥᓂᖃᕐᓂᖓᓐᓄᑦ ᓄᓇᓂᒃ ᓄᓇᓂ ᐊᑐᖅᑕᐅᖃᑎᒌᑦᑐᓂ ᓇᔪᖅᑕᐅᖃᑎᒌᑦᑐᓂᓗ.
40.2.24
ᑎᑎᕋᖅᓯᒪᔪᑦ 40.2.17 ᑎᑭᑦᓱᒍ 40.2.21 ᑕᑯᑦᓴᐅᑎᑦᓯᔪᑦ ᐸᕐᓇᐅᑎᖏᓐᓂᒃ ᒪᕐᕉᓕᖅᑲᖓᔫᒃ ᐃᒥᒃᑯᐊᖅᑑᒃ ᑖᒃᑯᐊᓗ ᓇᓪᓕᑐᐃᓐᓇᖏᑦ ᑎᑎᕋᖅᓯᒪᔪᑦ ᐅᕝᕙᓗ ᓇᐅᑐᐃᓐᓇᖅ ᐊᐅᓚᓂᐅᔪᖅ ᓱᓐᖏᓐᓂᐅᔪᕐᓘᓐᓃᑦ ᓇᓪᓕᑐᐃᓐᓇᖏᓐᓄᑦ ᑖᒃᑯᐊ ᐃᒻᒥᒃᑰᖅᑑᒃ ᑲᑎᒪᔨᖏᑦᑕᓘᓐᓃᑦ ᐊᑦᑐᐊᔪᓄᑦ ᐅᑯᓄᖓ ᑎᑎᕋᖅᓯᒪᔪᓄᑦ ᐊᑭᓖᑎᑦᓯᒐᓱᐊᕐᓂᐊᖏᑦᑐᑦ ᒐᕙᒪᒃᑯᓐᓂᒃ ᐅᕝᕙᓗ ᑭᓇᑐᐃᓐᓇᕐᒥᒃ ᐃᓄᒻᒥᒃ ᐅᕝᕙᓗ ᐊᑦᑐᐃᓂᖅ ᓇᐅᑐᐃᓐᓇᕐᒥᒃ ᓴᓐᖏᓂᖓᓂᒃ ᐱᔪᓐᓇᕐᓂᖓᓂᓪᓘᓐᓃᑦ ᒐᕙᒪᐃᑦ ᐅᕝᕙᓗ ᑭᓇᑐᐃᓐᓇᐅᑉ ᐃᓅᑉ.
40.2.25 - ᖃᓄᐃᓕᖓᓂᐅᔪᖅ ᓴᐳᒻᒥᔮᖅᑕᐅᓂᖏᓪᓗ ᐱᔪᓐᓇᐅᑏᑦ
ᕐᑳᖓᒍᒃᑲᓐᓂᖅ ᓇᐅᑐᐃᓐᓇᐅᑉ ᐃᓅᑉ ᑎᒥᐅᔫᓪᓘᓐᓃᑦ ᐃᓕᑕᕆᔭᐅᔫᑉ ᒪᓕᒐᖅᑎᒍᑦ ᐃᓘᓐᓇᐃᓐᓄᑦ ᐊᑑᑎᔪᓄᑦ ᐱᔪᓐᓇᕐᓂᖃᕆᐊᖏᑦ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑭᒡᒐᖅᑐᕐᓗᑎᒃ ᐃᓄᖏᓐᓂᒃ ᓄᓇᕗᑦ ᐊᒻᒪᓗ ᒪᑭᕕᒃᑯᑦ ᑭᒡᒐᖅᑐᕐᓗᑎᒃ ᐃᓄᖏᓐᓂᒃ ᓄᓇᕕᐅᑉ ᐱᔪᓐᓇᕐᓂᖃᕐᓂᐊᖅᑐᑦ ᑖᒃᑯᐊᓪᓗᐊᑦ ᐃᖅᑲᖅᑐᐃᕕᐅᑉ ᓵᖓᓂ ᐅᕝᕙᓗ ᐊᓯᐊᑕ ᑎᒥᐅᔫᑉ ᑲᔪᓯᑎᑕᐅᓗᓂ ᐅᓇ ᐃᓚᖓ ᐊᑭᕋᖅᑑᑕᐅᓗᓂ ᒐᕙᒪᒃᑯᓐᓂᒃ ᑭᓇᑐᐃᓐᓇᕐᒥᓪᓘᓐᓃᑦ ᐃᓄᒻᒥᒃ.
40.2.26
ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 2.13.1, ᐅᓇ ᐃᓚᖓ ᐋᖅᑭᒋᐊᑦᑕᐅᒋᐊᖃᓐᖏᑦᑐᖅ ᑎᑎᖅᑲᑎᒍᑦ ᐊᖏᖅᑕᐅᓯᒪᑎᓐᓇᒍ ᒪᑭᕕᒃᑯᓐᓄᑦ.
40.2.27
ᐊᐳᖅᓯᒪᓂᖅᑕᖃᕐᓂᖅᐸᑦ ᐅᕝᕙᓗ ᑲᔪᓯᑦᓯᐊᖏᓐᓂᖅᑕᖃᕐᓂᖅᐸᑦ ᐊᑯᕐᖓᓐᓂ ᑎᑎᕋᖅᓯᒪᔪᑦ ᐅᕙᓂ ᐃᓚᖓᓂ ᐊᓯᖏᓐᓂ ᑎᑎᕋᖅᓯᒪᔪᑦ 40.2.17 ᑎᑭᑦᓱᒍ 40.2.20 ᓵᓚᖃᖅᓯᒪᓂᐊᖅᑐᑦ.
40.2.28
ᒐᕙᒪᒃᑯᑦ ᑲᓇᑕᒥ ᐃᓚᒍᑦᓯᐅᔾᔨᔾᔮᖏᑦᑐᑦ ᐱᕕᖃᖅᑎᑦᓯᒍᑕᐅᔪᓂᒃ ᓄᓇᕕᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ ᐃᓚᒋᔭᐅᓂᕐᒧᑦ ᐆᒧᖓ ᐃᓚᖓᓄᑦ.
ᐃᓚᖓ 3
ᐊᓯᖏᑦ ᓄᓇᖃᖅᑳᖅᓯᒪᔪᑦ -ᓄᓇᑦᓯᐊᖅ
40.3.1
ᐅᕙᓂ ᐃᓚᖓᓂ:
“ᓄᓇᑦᓯᐊᖅ” ᑐᑭᓕᒃ ᓄᓇᑦᓯᐊᖅ ᑕᐃᒫᒃ ᓇᓗᓇᐃᔭᖅᑕᐅᓯᒪᒻᒪᑦ ᓄᓇᑦᓯᐊᕐᒥ ᒪᓕᒐᕐᔪᐊᕐᒥ R.S.C. 1985 c. N-27;
“ᐆᒪᔪᐃᑦ” ᑕᐃᒫᑦᓴᐃᓐᓇᖅ ᑐᑭᓕᒃ ᑎᑎᕋᖅᓯᒪᔪᒥ 1.1.1-ᒥᑎᑐᑦ ᑭᓯᐊᓂ ᐱᖃᓯᐅᔾᔨᖏᑦᑐᖅ ᐊᕐᕕᓐᓂᒃ.
40.3.2
ᑐᓐᖓᕕᒋᑦᓱᒋᑦ ᐱᕕᖃᖅᑎᑦᓯᒍᑕᐅᔪᑦ ᓇᐅᑐᐃᓐᓇᕐᒧᑦ ᐊᖏᖃᑎᒌᒍᑎᖓᓐᓄᑦ ᐃᓄᐃᑦ ᐊᓯᖏᑦᑕᓗ ᓄᓇᖃᖅᑳᖅᓯᒪᔪᑦ ᓄᓇᑦᓯᐊᕐᒥ, ᐃᓄᐃᑦ ᐊᖑᓇᓱᒍᓐᓇᖅᑐᑦ ᐆᒪᔪᕐᓂᒃ ᓄᓇᓂ ᓄᓇᑦᓯᐊᕐᒥ ᐅᐊᓐᓇᖓᓂ ᓄᓇᕗᑦ ᐃᓄᐃᑦ ᐊᑐᖃᑦᑕᕇᖅᓯᒪᔭᖓᑦ ᐱᖅᑯᓯᑐᖃᖅᑎᒍᑦ ᐊᑐᐃᓐᓇᖅᓱᒍᓗ ᑕᒪᓐᓇ ᐱᔾᔪᑕᐅᓪᓗᓂ:
(a)
ᓄᓇᒥ ᐊᓪᓚᓄᑦ ᓄᓇᑖᕈᑕᐅᓯᒪᔪᒥ ᐅᕝᕙᓗ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᑎᒍᑦ, ᑐᓐᖓᕕᐅᓗᑎᒃ ᐊᔾᔨᒐᓚᖏᑦ ᓄᓇᖃᖅᑳᖅᓯᒪᔪᑦ ᓄᓇᑦᓯᐊᕐᒥ ᐊᖏᖃᑕᐅᓯᒪᔪᑦ ᓄᓇᑖᕈᑎᑎᒍᑦ ᐅᕝᕙᓗ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᑎᒍᑦ, ᐅᕝᕙᓗ
(b)
ᓄᓇᒥ ᓄᓇᑖᕈᑎᖃᓐᖏᑦᑐᑦ ᐅᕝᕙᓗ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖃᓐᖏᑦᑐᒥ, ᑐᓐᖓᕕᐅᓗᑎᒃ ᐊᔾᔨᒐᓚᖏᑦ ᓇᐅᑐᐃᓐᓇᐃᑦ ᓄᓇᖃᖅᑳᖅᓯᒪᔪᑦ ᓄᓇᑦᓯᐊᕐᒥ ᐊᑐᖅᑐᑦ ᑕᐃᑦᓱᒪᓐᖓᑦ ᓄᓇᒥᒃ.
40.3.3
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᐃᓛᒃᑯᑦ 5-ᒥ, ᐃᓚᒋᔭᐅᔪᑦ ᓄᓇᖃᖅᑳᖅᓯᒪᔪᓄᑦ ᓄᓇᑦᓯᐊᕐᒥ ᐊᓯᖏᑦ ᐃᓄᐃᑦ ᐊᖑᓇᓱᒍᓐᓇᖅᑐᑦ ᐆᒪᔪᕐᓂᒃ ᐃᓗᐊᓐᓂ ᓄᓇᕗᑦ ᓄᓇᖃᖅᑳᖅᓯᒪᔪᓄᑦ ᐊᖑᓇᓱᕝᕕᐅᖃᑦᑕᖅᓯᒪᔪᓂᒃ ᐊᑐᖃᑦᑕᑐᓪᓗ ᓱᓕ ᓄᓇᒥᒃ ᑕᒪᓐᓇ ᐱᔾᔪᑎᒋᓪᓗᒍ, ᑐᓐᖓᕕᖃᕐᓗᑎᒃ ᑕᐃᒫᒃ ᐃᓄᐃᑦ ᐱᔪᓐᓇᕐᓂᖏᓐᓂᒃ ᐊᑖᓂ ᐃᓛᒃᑯᑦ 5, ᑐᓐᖓᕕᒋᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᓇᐅᑐᐃᓐᓇᕐᒧᑦ ᐊᖏᖃᑎᒌᒍᑎᒧᑦ ᐃᓄᓐᓄᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ. ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ ᓴᖅᑭᖅᑕᐅᑉᐸᑕ ᐆᒪᔪᓄᑦ ᐊᖑᔭᐅᕙᑦᑐᓄᑦ ᐃᓄᓐᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᓯᒪᔪᓄᑦ ᓄᓇᑦᓯᐊᕐᒥ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓂᓯᓂᐊᖅᑐᑦ ᐆᒪᓇᓱᐊᕈᑎᑦᓴᓂᒃ ᑕᐃᒃᑯᓄᖓ ᓄᓇᖃᖅᑳᖅᓯᒪᔫᔪᓄᑦ, ᐃᒻᒥᒃᑰᕐᓗᑎᒃ ᐆᒪᓇᓱᐊᕈᑕᐅᔪᓄᑦ ᐃᓄᓐᓄᑦ, ᑐᓐᖓᕕᖃᕐᓗᑎᒃ ᑕᑯᑦᓴᐅᔪᓂᒃ ᓇᓗᓇᐃᕈᑎᑦᓴᓂᒃ ᓄᓇᖃᖅᑳᖅᓯᒪᔪᑦ ᐊᖑᓇᓱᖃᑦᑕᕐᓂᖏᓐᓂᒃ ᑕᐃᒃᑯᓇᓐᖓᑦ ᐆᒪᔪᕐᓂᒃ ᓄᓇᕗᑦ ᐃᓗᐊᓂ. ᐆᒪᓇᓱᐊᕈᑎᖏᑦ ᐃᓄᐃᑦ ᐊᓯᖏᑦᑕᓗ ᓄᓇᖃᖅᑳᖅᓯᒪᔪᑦ ᓄᓇᑦᓯᐊᕐᒥ ᐅᖓᑖᓅᖅᐸᑕ ᐆᒪᓇᓱᐊᕈᑕᐅᒋᐊᓖᑦ ᑲᑎᓪᓗᑎᒃ, ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ ᑐᓂᐅᖅᑲᖅᑕᐅᓂᐊᖅᑐᑦ ᐃᓄᓐᓄᑦ ᓄᓇᖃᖅᑳᖅᓯᒪᔪᓄᓪᓗ ᑕᑯᑦᓴᐅᑎᑦᓯᓗᑎᒃ ᐃᓅᓇᓱᐊᕈᑎᒋᒋᐊᓕᖏᓐᓂᒃ.
ᐃᓚᖓ 4
ᑕᓇᓱᓖᓐ ᐃᖅᑭᓖᑦ ᑎᒥᖁᑎᖏᑦ
40.4.1
ᐅᕙᓂ ᐃᓚᖓᓂ, “ᑎᒦᑦ” ᑐᑭᓕᒃ ᑰᔾᔪᐊᕌᓗᒻᒥ ᐊᓪᓚᐃᑦ ᑎᒥᖓᑦ ᐊᒻᒪᓗ ᐅᐊᓐᓇᖅᐸᓯᒻᒥ ᐊᓪᓚᐃᑦ ᑎᒥᖓᑦ.
40.4.2
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᐃᓛᒃᑯᑦ 5-ᒥ, ᐃᓚᒋᔭᐅᔪᑦ ᐊᓪᓚᓄᑦ ᐊᖑᓇᓱᒍᓐᓇᖅᑐᑦ ᐆᒪᔪᕐᓂᒃ ᐃᒻᒥᓅᖓᔪᓄᑦ, ᐃᓚᒥᓄᑦ ᓄᓇᓕᓐᓄᓘᓐᓃᑦ ᓂᕆᔭᐅᓂᐊᖅᑎᓪᓗᒋᑦ ᐊᒻᒪᓗ ᒥᑭᒋᐊᖅᑎᑦᓯᒍᓐᓇᖅᓱᑎᒃ ᐆᒪᔪᕐᓂᒃ ᓄᓇᕗᒻᒥ ᐱᖅᑯᓯᖅᑎᒍᑦ ᐊᑐᖃᑦᑕᖅᓯᒪᔭᕐᒥᑎᒍᑦ ᓱᓕᓗ ᐊᑐᖅᐸᑦᑕᒥᑎᒍᑦ ᑕᒪᒃᑯᐊ ᐱᔾᔪᑕᐅᓪᓗᑎᒃ, ᑐᓐᖓᕕᖃᕐᓗᑎᒃ ᐊᔾᔨᖏᓐᓂᒃ ᐃᓄᐃᑦ ᐊᑖᓂ ᐃᓛᒃᑯᑦ 5. ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ ᓴᖅᑭᖅᑕᐅᑉᐸᑕ ᐆᒪᔪᕐᓄᑦ ᐊᖑᔭᐅᕙᑦᑐᓄᑦ ᐃᓚᒋᔭᐅᔪᓄᑦ ᐊᓪᓚᓄᑦ ᐃᓄᓐᓄᓪᓗ, ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑐᓂᓯᓂᐊᖅᑐᑦ ᐆᒪᓇᓱᐊᕈᑎᑦᓴᓂᒃ ᐊᓪᓚᓄᑦ, ᐃᒻᒥᒃᑯᖓᑎᓪᓗᒋᑦ ᐆᒪᓇᓱᐊᕈᑎᑦᓴᖏᓐᓂᒃ ᐃᓄᐃᑦ, ᑐᓐᖓᕕᖃᕐᓗᑎᒃ ᐊᑐᐃᓐᓇᐅᔪᓂᒃ ᓇᓗᓇᐃᕈᑎᑦᓴᓂᒃ ᐊᓪᓚᓄᑦ ᐊᖑᓇᓱᑉᐸᑦᑐᓄᑦ ᑕᐃᒃᑯᓇᓐᖓᑦ ᐆᒪᔪᕐᓂᒃ ᐃᓗᐊᓂ ᓄᓇᕗᑦ, ᐃᓱᒪᒋᖃᓯᐅᑎᓗᒍ ᐊᓪᓚᐃᑦ ᐊᖑᓇᓯᓐᖏᑦ ᑕᐃᒃᑯᓇᓐᖓᑦ ᐆᒪᔪᕐᓂᒃ ᓄᓇᕗᑦ ᓯᓚᑖᓂ. ᐆᒪᓇᓱᐊᕈᑕᐅᔪᑦ ᐃᓄᓐᓄᑦ ᐊᒻᒪᓗ ᐊᓪᓚᓄ ᐅᖓᑖᓅᖅᐸᑕ ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ, ᑲᑎᓪᓗᑎᒃ ᐊᖑᔭᐅᒍᓐᓇᖅᑐᑦ ᑐᓂᐅᖅᑲᖅᑕᐅᓂᐊᖅᑐᑦ ᐃᓄᓐᓄᑦ ᐊᓪᓚᓄᓪᓗ ᑕᑯᑦᓴᐅᑎᑦᓯᓗᑎᒃ ᐆᒪᓇᓱᐊᕈᑎᒋᒋᐊᓕᖏᓐᓂᒃ,
40.4.3
ᐱᔾᔪᑕᐅᓪᓗᑎᒃ ᐊᑐᕐᓂᐅᔪᑦ ᐱᔪᓐᓇᐅᑎᓂᒃ ᐊᑖᓂ ᑎᑎᕋᖅᓯᒪᔪᖅ 40.4.2 ᐃᓗᐊᓂ ᓄᓇᕗᑦ ᐊᑐᖃᑦᑕᖅᓯᒪᔭᑐᖃᕐᒥᓂ ᓱᓕᓗ ᐊᑐᖅᐸᑦᑕᒥᓐᓂ ᐃᓚᒋᔭᐅᔪᑦ ᐊᓪᓚᓄᑦ ᑕᐃᒫᑦᑕᐅᖅ ᐊᑐᕈᓐᓇᕐᓂᐊᖅᑐᑦ ᓄᓇᓂᒃ, ᐱᖃᓯᐅᑎᑦᓱᑎᒃ ᐃᓄᐃᑦ ᓄᓇᖁᑎᖏᑦ, ᑕᐃᒪᐃᒻᒪᑕᑦᑕᐅᖅ ᐃᓄᐃᑦ.
40.4.4
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᑎᑎᕋᖅᓯᒪᔪᖅ 40.4.2 ᐊᒻᒪᓗ 40.4.3, ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓴᖅᑮᒍᓐᓇᖅᑐᑦ ᑭᓪᓕᒋᔭᐅᔪᓂᒃ ᒪᓕᒐᕐᓂᓪᓗ ᐊᐅᓚᑦᓯᔾᔪᑕᐅᔪᓂᒃ ᐆᒪᔪᕐᓂᒃ ᐊᖑᓇᓱᓐᓂᖏᓐᓂᒃ ᐊᓪᓚᐃᑦ ᐅᐊᓐᓇᒥᐅᑕᐃᑦ ᑰᔾᔪᐊᕌᓗᓪᓗ ᐃᓗᐊᓂ ᓄᓇᕗᑦ ᑲᑐᓯᐅᑎᓗᑎᒃ ᓇᐅᑐᐃᓐᓇᕐᓄᑦ ᑭᓪᓕᒋᔭᐅᔪᓄᑦ ᒪᓕᒐᕐᓄᓪᓗ ᐊᐅᓚᑦᓯᔾᔪᑕᐅᔪᓄᑦ ᐆᒪᔪᐃᑦ ᐊᖑᔭᐅᓂᖏᓐᓂᒃ ᐃᓄᓐᓄᑦ ᐃᓄᐃᑦ ᐊᑐᖃᑦᑕᖅᓯᒪᔭᑐᖃᖏᓐᓂ ᓱᓕᓗ ᐊᑐᖅᐸᑦᑕᖏᓐᓂ ᐆᒪᔪᕋᓱᐊᖅᓱᑎᒃ ᐅᐊᓐᓇᖓᓂ ᒫᓂᑑᕙᐅᑉ.
40.4.5
ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐅᖃᖃᑎᖃᕐᓂᐊᖅᑐᑦ ᑲᑎᒪᔨᖏᓐᓂᒃ ᑎᒥᐅᔪᓄᑦ ᐋᖅᑭᑦᑕᐅᔪᓄᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓄᑦ ᐃᓱᒫᓘᑕᐅᔪᓄᑦ ᐊᓪᓚᓄᑦ ᖃᓄᖅᑑᕈᑎᖃᕐᓗᑎᓪᓗ ᖃᓄᖅ ᐊᔾᔨᐅᑎᑦᓯᓂᖅᑕᓕᒃᑯᑦ ᐊᑦᑐᐃᓂᖃᕈᓐᓇᕐᒪᖔᑕ ᑎᑎᕋᖅᓯᒪᔪᑦ 40.4.2 ᐊᒻᒪᓗ 40.4.4.
40.4.6
ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᑲᑐᔾᔨᖃᑎᖃᕐᓂᐊᖅᑐᑦ ᓇᐅᑐᐃᓐᓇᕐᓂᒃ ᐊᐅᓚᑦᓯᖃᑎᒌᑦᑐᓂᒃ ᑎᒥᐅᔪᓂᒃ ᓴᐳᔾᔨᓂᕐᒧᑦ ᓄᖑᑎᕆᑦᑕᐃᓕᓂᕐᒧᓪᓗ ᑐᑦᑐᓂᒃ ᐅᕝᕙᓗ ᐊᓯᖏᓐᓂᒃ ᐆᒫᔪᕐᓂᒃ ᐊᖑᔭᐅᕙᑦᑐᓂᒃ ᐊᓪᓚᓄᑦ ᐃᓄᓐᓄᓪᓗ.
40.4.7
ᑕᐃᒪᐃᓕᖓᒐᓗᐊᖅᑎᓪᓗᒍ ᐃᓚᖓ 8 ᐃᓛᒃᑯᑦ 5, ᑐᑦᓯᕋᐅᑏᑦ ᐃᓚᒋᔭᐅᔪᒥᒃ ᐊᓪᓚᓄᑦ ᓴᖅᑮᒍᒪᓗᓂ ᐅᕝᕙᓗ ᑲᔪᓯᑎᑦᓯᒍᒪᓗᓂ ᓇᐅᑐᐃᓐᓇᕐᒥᒃ ᐃᓪᓗᒥᒃ ᑮᓇᐅᔭᓕᐅᕋᓱᐊᕐᓂᕐᒥᓪᓘᓐᓃᑦ ᓇᓗᓇᐃᔭᖅᑕᐅᓯᒪᔪᒥ ᐃᓚᖓᓂ 8-ᒥ ᐃᓛᒃᑯᑦ 5-ᒥ ᓄᓇᒥ ᐱᖅᑯᓯᑐᖃᖅᑎᒍᑦ ᐊᑐᖅᑕᐅᖃᑦᑕᖅᓯᒪᔪᑐᖃᕐᒥ ᓱᓕᓗ ᐊᑐᖅᑕᐅᕙᑦᑐᒥ ᐊᓪᓚᓄᑦ ᓯᕗᓪᓕᖅᐹᒥ ᕿᐱᓕᑦᑕᐅᒋᐊᖃᔾᔮᖏᑦᑐᑦ ᐃᓄᓐᓄᑦ. ᑕᐃᒪᐃᑦᑐᒥᒃ ᐊᑑᑎᔪᖃᕐᓂᖅᐸᑦ ᑐᓐᖓᕕᖃᕐᓂᐊᖅᑐᖅ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑦᑑᑎᔪᓂᒃ.
40.4.8
ᓄᓇᕗᒻᒥ ᐸᕐᓇᐃᔨᑦ, ᓄᓇᕗᒻᒥ ᐱᓕᒻᒪᑦᓴᐃᔩᑦ ᐊᒻᒪᓗ ᓄᓇᕗᒻᒥ ᐃᒪᓕᕆᔩᑦ, ᐊᐅᓚᓂᖃᓕᕈᑎᒃ ᕿᒥᕐᕈᓗᑎᒃ ᐊᐅᓚᓂᕐᒥᒃ, ᐱᕕᖃᖅᑎᑦᓯᓂᐊᖅᑐᖅ ᑲᑎᒪᔨᖏᓐᓂᒃ ᐊᓪᓚᐃᑦ ᐅᓂᒃᑳᓕᐅᕐᓗᑎᒃ ᐊᑦᑐᐊᔪᓄᑦ ᐱᔪᒪᔭᕆᔭᖏᓐᓄᑦ ᓄᓇᐃᑦ ᐊᑐᖃᑦᑕᖅᓯᒪᔭᑐᖃᓂ ᓱᓕᓗ ᐊᑐᖅᐸᑦᑕᓂ, ᑖᒃᑯᓇᓐᖓᑦ ᐅᓂᒃᑳᖑᔪᑦ ᐃᓱᒪᒋᔭᐅᖃᓯᐅᑎᓂᐊᖅᑐᑦ.
40.4.9
ᐃᓚᖓ 7 ᐃᓛᒃᑯᑦ 33-ᒥ ᐊᑑᑎᔾᔮᖏᑦᑐᖅ ᐊᑦᑐᐊᔪᓄᑦ ᑕᓂᓱᓕ ᐃᑦᓴᕐᓂᑕᖁᑎᖏᓐᓄᑦ.
40.4.10
ᐃᓪᓗᕋᓛᖅᑕᖃᕋᔭᕐᓂᖅᐸᑦ ᐱᒋᔭᐅᔪᒥᒃ ᐊᓪᓚᓄᑦ ᐃᓄᐃᑦ ᓄᓇᖁᑎᖏᓐᓂ ᐃᓪᓗᕋᓛᕐᓗ ᑕᕝᕙᒥᓂᐅᑦᓱᓂ ᔮᓐᓄᐊᕆ 1, 1992, ᐊᓪᓚᐃᑦ ᓱᓕ ᐊᑐᕈᓐᓇᖅᑐᑦ ᓇᔫᑎᓪᓗᑎᓪᓗ ᐃᓪᓗᕋᓛᕐᒥ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᑐᑦᓯᕋᖅᐸᑕ ᐊᓪᓚᐃᑦ ᑲᑎᒪᔨᖏᑦ ᐊᑕᐅᑦᓯᒃᑰᖃᑕᐅᑎᓪᓗᒋᑦ ᓈᒻᒪᓈᖅᓯᒪᔪᑦ ᓇᓗᓇᐃᕈᑎᑦᓴᐅᔪᑦ, ᓴᒃᑯᐃᒋᐊᓖᑦ ᒐᕙᒪᒃᑯᑦ ᑎᒍᒥᐊᖅᑕᖓᓐᓂᒃ ᑕᐃᑯᖓ ᐃᓂᖓᓄᑦ ᐃᓪᓗᕋᓛᑉ. ᓴᒃᑯᐃᒋᐊᖃᕐᓂᖅ ᓄᓇᒥᒃ ᒐᕙᒪᒃᑯᓐᓄᑦ ᐊᑑᑎᔾᔮᖏᑦᑐᒧᑦ ᑐᑦᓯᕌᖑᔪᒧᑦ ᐊᕐᕌᒎᒃ ᒪᕐᕉᒃ ᐅᖓᑖᓃ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ. ᐊᖏᖃᑎᒌᓐᖏᓐᓂᖅᑕᖃᓕᕐᓂᖅᐸᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᐊᓪᓚᐃᑦ ᑲᑎᒪᔨᖏᓐᓄᑦ ᐱᔾᔪᑎᖃᕐᓗᑎᒃ ᓇᐅᑐᐃᓐᓇᕐᒥᒃ ᐅᕙᓂ ᑎᑎᕋᖅᓯᒪᔪᒥᒃ, ᓇᓪᓕᑐᐃᓐᓇᖏᑦ ᐊᖏᖃᑎᖃᕐᓐᖏᓂᕐᒥᒃ ᖃᓄᖅᑑᕈᑕᐅᕈᑕᐅᖁᔨᑐᐃᓐᓇᕆᐊᓖᑦ ᑐᓐᖓᕕᒋᓗᒍ ᐊᕕᑦᑐᖅᓯᒪᔪᕐᔪᐊᓂ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔨᓄᑦ ᒪᓕᒐᕐᔪᐊᕐᒧᑦ. ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᓴᒃᑯᐃᓂᖅ ᒐᕙᒪᒃᑯᓐᓄᑦ ᐊᑦᑐᐃᓂᖃᔾᔮᖏᑦᑐᖅ ᓄᓇᓂᒃ ᖁᒥᐅᑎᖃᕐᓂᕐᒥᒃ ᐃᓗᐊᓂ ᑐᑭᖓᑦᑕ ᐊᓪᓚᐃᑦ ᒪᓕᒐᕐᔪᐊᖓᑦᑕ.
ᐃᓚᖓ 5
ᑕᓇᓱᓕᓐ ᐊᓪᓚᐃᑦ ᑎᒥᖏᑦ: ᐅᐊᓐᓇᖓᓂ ᓴᔅᑳᑦᓱᐊᓐ
40.5.1
ᐅᕙᓂ ᐃᓚᖓᓂ “ᑎᒥᐅᔪᑦ” ᑐᑭᓕᒃ ᕙᓛᒃ ᓚᐃᒃ ᐊᓪᓚᖏᓐᓂᒃ, ᕼᐋᑦᓴᑦ ᓚᐃᒃ ᐊᓪᓚᖏᓐᓂᒃ ᐊᒻᒪᓗ ᕙᓐᑐᓛᒃ ᐊᓪᓚᖏᓐᓂᒃ.
40.5.2
ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᐃᓛᒃᑯᑦ 5-ᒥ, ᐃᓚᒋᔭᐅᔪᑦ ᑎᒥᐅᔪᓄᑦ ᐊᖑᓇᓱᒍᓐᓇᖅᑐᑦ ᐆᒪᔪᕐᓂᒃ ᐃᒻᒥᓅᖓᔪᓄᑦ, ᐃᓚᒥᓄᑦ ᓄᓇᓕᓐᓄᓘᓐᓃᑦ ᓂᕆᔭᐅᓂᐊᖅᑎᓪᓗᒋᑦ ᐊᒻᒪᓗ ᒥᑭᒋᐊᕐᓂᐊᕈᓐᓇᖅᓱᑎᒃ ᐆᒪᔪᕐᓂᒃ ᐃᓗᐊᓂ ᓄᓇᕗᑦ ᐊᑐᖃᑦᑕᖅᓯᒪᔭᑐᖃᕐᒥᓂ ᓱᓕᓗ ᐊᑐᖅᐸᑦᑕᒥᓂ ᑖᒃᑯᐊ ᐱᔾᔪᑎᒋᓪᓗᒋᑦ, ᑐᓐᖓᕕᖃᕐᓗᑎᒃ ᐊᔾᔨᖓᓂᒃ ᐃᓄᐃᑦ ᐊᑖᓂ ᐃᓛᒃᑯᑦ 5. ᑲᑎᑦᓱᑎᒃ ᐊᖑᔭᐅᒍᓐᓇᖅᑐᖅ ᓴᑭᖅᑕᐅᑉᐸᑕ ᐆᒪᔪᕐᓄᑦ ᐊᖑᔭᐅᕙᑦᑐᓄᑦ ᐊᓪᓚᓄᑦ ᐃᓄᓐᓄᓪᓗ, ᓄᓇᕗᒻᒥ ᐅᒪᔪᓕᕆᔨᕐᔪᐊᒃᑯᑦ ᑐᓂᓯᓂᐊᖅᑐᑦ ᐆᒪᓇᓱᐊᕈᑎᑦᓴᓂᒃ ᐊᓪᓚᓄᑦ, ᐃᒻᒥᒃᑰᖓᓗᑎᒃ ᐆᒪᓇᓱᐊᕈᑎᑦᓴᖏᓐᓂᒃ ᐃᓄᐃᑦ, ᑐᓐᖓᕕᖃᕐᓗᑎᒃ ᓇᓗᓇᐃᕈᑎᑦᓴᖏᓐᓂᒃ ᐊᓪᓚᐃᑦ ᐊᖑᓇᓱᖃᑦᑕᕐᓂᕐᒧᑦ ᑕᐃᒃᑯᓇᓐᖓᑦ ᐆᒪᔪᕐᓂᒃ ᓄᓇᕗᑦ ᐃᓗᐊᓐᓂ, ᐃᓱᒪᒋᖃᓯᐅᑎᓗᒋᑦ ᐊᓪᓚᐃᑦ ᐊᖑᓇᓱᓐᓂᕆᕙᑦᑕᖏᑦ ᑕᐃᒃᑯᓇᓐᖓᑦ ᐆᒪᔪᕐᓂᒃ ᓯᓚᑖᓂ ᓄᓇᕗᑦ. ᐆᒪᓇᓱᐊᕈᑕᐅᔪᑦ ᐃᓄᓐᓄᑦ ᐊᓪᓚᓄᓪᓗ ᐅᖓᑖᓅᖅᐸᑕ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ, ᑲᑎᑦᓱᑎᒃ ᐊᖑᔭᐅᒍᓐᓇᖅᑐᑦ ᑐᓂᔭᐅᓂᐊᖅᑐᑦ ᐃᓄᓐᓄᑦ ᐊᒻᒪᓗ ᐊᓪᓚᓄᑦ ᑕᑯᑦᓴᐅᑎᑦᓯᓗᑎᒃ ᐆᒪᓇᓱᐊᕈᑎᒋᒋᐊᓕᖏᓐᓂᒃ.
40.5.3
ᐱᔾᔪᑕᐅᓪᓗᓂ ᐊᑑᑎᓂᖅ ᐱᔪᓐᓇᐅᑎᓂᒃ ᐊᑖᓂ ᑎᑎᕋᖅᓯᒪᔪᖅ 40.5.2 ᐃᓗᐊᓂ ᓄᓇᐃᑦ ᓄᓇᕗᒻᒥ ᐊᑐᖅᑕᐅᖃᑦᑕᖅᓯᒪᔪᑐᖃᐃᑦ ᐊᒻᒪᓗ ᐊᑐᖅᑕᐅᖃᑦᑕᖏᓐᓇᖅᑐᑦ, ᐊᓪᓚᐃᑦ ᑕᐃᒫᑦᓴᐃᓐᓇᖅ ᐊᑐᕈᓐᓇᕐᓂᐊᖅᑐᑦ ᓄᓇᒥᒃ, ᐱᖃᓯᐅᑎᑦᓱᑎᒃ ᐃᓄᐃᑦ ᓄᓇᖁᑎᖏᑦ, ᐃᓄᐃᑦ ᑕᐃᒪᐃᑦᓱᓐᓇᕐᒪᑕ.
40.5.4
ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐅᖃᖃᑎᖃᕐᓂᐊᖅᑐᑦ ᑲᑎᒪᔨᖏᓐᓂᒃ ᐊᓪᓚᐃᑦ ᐋᖅᑭᑦᑕᐅᔪᓄᑦ ᓄᓇᕗᒻᒥ ᐅᒪᔪᓕᕆᔨᕐᔪᐊᑦ ᑲᑎᒪᔨᓐᖏᓄᑦ ᐃᓱᒫᓘᑕᐅᔪᓄᑦ ᑕᐃᒃᑯᓄᖓ ᐊᓪᓚᓄᑦ ᓇᓗᓇᐃᔭᕈᑕᐅᓂᐊᖅᑎᓪᓗᒋᑦ ᖃᓄᖅ ᓈᒻᒪᑦᑐᒥᒃ ᐊᑑᑎᓂᖃᕈᓐᓇᕐᒪᖔᑕ ᑎᑎᕋᖅᓯᒪᔪᒥ 40.5.2.
40.5.5
ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑲᑐᔾᔨᖃᑎᖃᕐᓂᐊᖅᑐᑦ ᑎᒍᒥᐊᖃᑎᒌᑦᑐᓄᑦ ᐊᐅᓚᑦᓯᓂᕐᒧᑦ ᑎᒥᐅᔪᓂᒃ ᓴᐳᔾᔨᓂᕐᒧᑦ ᓄᖑᑎᕆᓗᐊᑦᑕᐃᓕᓂᕐᒧᓪᓗ ᑐᑦᑐᓂᒃ ᐊᓯᖏᓐᓂᓘᓐᓃᑦ ᐆᒪᔪᕐᓂᒃ ᐊᖑᓇᓱᑦᑕᐅᕙᑦᑐᓂᒃ ᐊᓪᓚᓄᑦ ᐊᒻᒪᓗ ᐃᓄᓐᓄᑦ.
40.5.6
ᑕᐃᒪᐃᓕᖓᒐᓗᐊᖅᑎᓪᓗᒍ ᐃᓚᖓ 8 ᐃᓛᒃᑯᑦ 5, ᑐᑦᓯᕋᐅᑏᑦ ᐃᓚᒋᔭᐅᔪᒥᒃ ᐊᓪᓚᓄᑦ ᓴᖅᑮᒍᒪᓗᓂ ᐅᕝᕙᓗ ᑲᔪᓯᑎᑦᓯᒍᒪᓗᓂ ᓇᐅᑐᐃᓐᓇᕐᒥᒃ ᐃᓪᓗᒥᒃ ᑮᓇᐅᔭᓕᐅᕋᓱᐊᕐᓂᕐᒥᓪᓘᓐᓃᑦ ᓇᓗᓇᐃᔭᖅᑕᐅᓯᒪᔪᒥ ᐃᓚᖓᓂ 8-ᒥ ᐃᓛᒃᑯᑦ 5-ᒥ ᓄᓇᒥ ᐱᖅᑯᓯᑐᖃᖅᑎᒍᑦ ᐊᑐᖅᑕᐅᖃᑦᑕᖅᓯᒪᔪᑐᖃᕐᒥ ᓱᓕᓗ ᐊᑐᖅᑕᐅᕙᑦᑐᒥ ᐊᓪᓚᓄᑦ ᓯᕗᓪᓕᖅᐹᒥ ᕿᐱᓕᑦᑕᐅᒋᐊᖃᔾᔮᖏᑦᑐᑦ ᐃᓄᓐᓄᑦ. ᑕᐃᒪᐃᑦᑐᒥᒃ ᐊᑑᑎᔪᖃᕐᓂᖅᐸᑦ ᑐᓐᖓᕕᖃᕐᓂᐊᖅᑐᖅ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑦᑑᑎᔪᓂᒃ.
40.5.7
ᓄᓇᕗᒻᒥ ᐸᕐᓇᐃᔨᑦ, ᓄᓇᕗᒻᒥ ᐱᓕᒻᒪᑦᓴᐃᔩᑦ ᐊᒻᒪᓗ ᓄᓇᕗᒻᒥ ᐃᒪᓕᕆᔩᑦ, ᐊᐅᓚᓂᖃᓕᕈᑎᒃ ᕿᒥᕐᕈᓗᑎᒃ ᐊᐅᓚᓂᕐᒥᒃ, ᐱᕕᖃᖅᑎᑦᓯᓂᐊᖅᑐᖅ ᑲᑎᒪᔨᖏᓐᓂᒃ ᐊᓪᓚᐃᑦ ᐅᓂᒃᑳᓕᐅᕐᓗᑎᒃ ᐊᑦᑐᐊᔪᓄᑦ ᐱᔪᒪᔭᕆᔭᖏᓐᓄᑦ ᓄᓇᐃᑦ ᐊᑐᖃᑦᑕᖅᓯᒪᔭᑐᖃᓂ ᓱᓕᓗ ᐊᑐᖅᐸᑦᑕᓂ, ᑖᒃᑯᓇᓐᖓᑦ ᐅᓂᒃᑳᖑᔪᑦ ᐃᓱᒪᒋᔭᐅᖃᓯᐅᑎᓂᐊᖅᑐᑦ.
40.5.8
ᐃᓚᖓ 7 ᐃᓛᒃᑯᑦ 33-ᒥ ᐊᑑᑎᔾᔮᖏᑦᑐᖅ ᐊᑦᑐᐊᔪᓄᑦ ᑕᓂᓱᓕ ᐃᑦᓴᕐᓂᑕᖁᑎᖏᓐᓄᑦ.
40.5.9
ᐃᓪᓗᕋᓛᖅᑕᖃᕋᔭᕐᓂᖅᐸᑦ ᐱᒋᔭᐅᔪᒥᒃ ᐊᓪᓚᓄᑦ ᐃᓄᐃᑦ ᓄᓇᖁᑎᖏᓐᓂ ᐃᓪᓗᕋᓛᕐᓗ ᑕᕝᕙᒥᓂᐅᑦᓱᓂ ᔮᓐᓄᐊᕆ 1, 1992, ᐊᓪᓚᐃᑦ ᓱᓕ ᐊᑐᕈᓐᓇᖅᑐᑦ ᓇᔫᑎᓪᓗᑎᓪᓗ ᐃᓪᓗᕋᓛᕐᒥ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᑐᑦᓯᕋᖅᐸᑕ ᐊᓪᓚᐃᑦ ᑲᑎᒪᔨᖏᑦ ᐊᑕᐅᑦᓯᒃᑰᖃᑕᐅᑎᓪᓗᒋᑦ ᓈᒻᒪᓈᖅᓯᒪᔪᑦ ᓇᓗᓇᐃᕈᑎᑦᓴᐅᔪᑦ, ᓴᒃᑯᐃᒋᐊᓖᑦ ᒐᕙᒪᒃᑯᑦ ᑎᒍᒥᐊᖅᑕᖓᓐᓂᒃ ᑕᐃᑯᖓ ᐃᓂᖓᓄᑦ ᐃᓪᓗᕋᓛᑉ. ᓴᒃᑯᐃᒋᐊᖃᕐᓂᖅ ᓄᓇᒥᒃ ᒐᕙᒪᒃᑯᓐᓄᑦ ᐊᑑᑎᔾᔮᖏᑦᑐᒧᑦ ᑐᑦᓯᕌᖑᔪᒧᑦ ᐊᕐᕌᒎᒃ ᒪᕐᕉᒃ ᐅᖓᑖᓃ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ. ᐊᖏᖃᑎᒌᓐᖏᓐᓂᖅᑕᖃᓕᕐᓂᖅᐸᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᐊᓪᓚᐃᑦ ᑲᑎᒪᔨᖏᓐᓄᑦ ᐱᔾᔪᑎᖃᕐᓗᑎᒃ ᓇᐅᑐᐃᓐᓇᕐᒥᒃ ᐅᕙᓂ ᑎᑎᕋᖅᓯᒪᔪᒥᒃ, ᓇᓪᓕᑐᐃᓐᓇᖏᑦ ᐊᖏᖃᑎᖃᕐᓐᖏᓂᕐᒥᒃ ᖃᓄᖅᑑᕈᑕᐅᕈᑕᐅᖁᔨᑐᐃᓐᓇᕆᐊᓖᑦ ᑐᓐᖓᕕᒋᓗᒍ ᐊᕕᑦᑐᖅᓯᒪᔪᕐᔪᐊᓂ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔨᓄᑦ ᒪᓕᒐᕐᔪᐊᕐᒧᑦ. ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᓴᒃᑯᐃᓂᖅ ᒐᕙᒪᒃᑯᓐᓄᑦ ᐊᑦᑐᐃᓂᖃᔾᔮᖏᑦᑐᖅ ᓄᓇᓂᒃ ᖁᒥᐅᑎᖃᕐᓂᕐᒥᒃ ᐃᓗᐊᓂ ᑐᑭᖓᑦᑕ ᐊᓪᓚᐃᑦ ᒪᓕᒐᕐᔪᐊᖓᑦᑕ.
ᐅᐃᒍᖓ 40-1
ᓇᓗᓇᐃᔭᕈᑏᑦ ᓄᓇᓂᒃ ᐊᑐᖅᑕᐅᖃᑎᒌᑦᑐᓂᒃ ᓇᔪᖅᑕᐅᖃᑎᒌᑦᑐᓂᓪᓗ ᑕᓯᐅᔭᕐᔪᐊᑉ ᑕᓪᓗᕈᑖᓂ ᑕᓯᐅᔭᕐᔪᐊᒥᓗ
(ᑎᑎᕋᖅᓯᒪᔪᖅ 40.2.2)
(a)
ᓄᓇᓗᓇᐃᕈᑕᐅᔪᑦ ᓄᓇᓂᒃ ᐊᑐᖅᑕᐅᖃᑎᒌᑦᑐᓂᒃ ᓇᔪᖅᑕᐅᖃᑎᒌᑦᑐᓂᓪᓗ ᑕᓯᐅᔭᕐᔪᐊᑉ ᑕᓪᓗᕈᑎᖓᓂ
-ᑎᑎᖅᓯᒪᔪᖅ ᐱᒋᐊᕐᓂᐊᖅᑐᖅ ᑲᓱᖅᓯᒪᕕᖓᓂ 63 E25'N ᐊᒻᒪᓗ 76E10'W;
- ᑲᔪᓯᓯᑦᑕᖅᑯᖅ ᓂᒋᖅᐸᓯᒻᒧᑦ ᐊᓱᐃᓪᓛᒃ ᐱᖓᓐᓇᖅᐸᓯᒻᒧᑦ - ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 63E12'N ᐊᒻᒪᓗ 77E00'W;
- ᐊᓱᐃᓪᓛᒃ ᐱᖓᓐᓇᖅᐸᓯᒻᒧᑦ ᐊᓱᐃᓪᓛᒃ ᓂᒋᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 63E00'N ᐊᒻᒪᓗ 77E40'W;
- ᐊᓱᐃᓪᓛᒃ ᐅᐊᓐᓇᖅᐸᓯᒻᒧᑦ ᐊᒻᒪᓗ ᐱᖓᓐᓇᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 63E03'N ᐊᒻᒪᓗ 78E25'W;
- ᐊᓱᐃᓪᓛᒃ ᐅᐊᓐᓇᖅᐸᓯᒻᒧᑦ ᐊᒻᒪᓗ ᐱᖓᓇᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 63E30'N ᐊᒻᒪᓗ 78E47'W;
- ᐊᓱᐃᓪᓛᒃ ᐅᐊᓐᓇᖅᐸᓯᒻᒧᑦ ᐊᒻᒪᓗ ᑲᓇᓐᓇᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄ 63E52'N ᐊᒻᒪᓗ 77E15'W;
- ᐊᓱᐃᓪᓛᒃ ᓂᒋᖅᐸᓯᒻᒧᑦ ᑲᓇᓐᓇᖅᐸᓯᒻᒧᓪᓗ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 63E25'N ᐊᒻᒪᓗ 76E10'W.
(b)
ᓇᓗᓇᐃᕈᑏᑦ ᓄᓇᓂᒃ ᐊᑐᖅᑕᐅᖃᑎᖐᑦᑐᓂᒃ ᓇᔪᖅᑕᐅᖃᑎᒌᑦᑐᓂᓪᓗ ᑕᓯᐅᔭᕐᔪᐊᒥ.
-ᑎᑎᖅᓯᒪᓂᖓ ᑐᕋᐃᓐᓇᕐᓗᓂ ᐱᒋᐊᕐᓂᐊᖅᑐᖅ 56 E22'N ᐊᒻᒪᓗ 77E25'W;
- ᑲᔪᓯᓗᓂ ᐱᖓᓐᓇᖅᐸᓯᒻᒧᑦ ᐊᒻᒪᓗ ᓂᒋᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 56E07'N ᐊᒻᒪᓗ 78E10'W;
- ᑲᔪᓯᓗᓂ ᐅᐊᓐᓇᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 56E45'N ᐊᒻᒪᓗ 78E15'W;
- ᐊᓱᐃᓪᓛᒃ ᑲᔪᓯᓗᓂ ᐱᖓᓐᓇᖅᐸᓯᒻᒧᑦ ᐊᒻᒪᓗ ᐅᐊᓐᓇᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 57E00'N ᐊᒻᒪᓗ 78E40'W;
- ᑲᔪᓯᓗᓂ ᐱᖓᓐᓇᖅᐸᓯᒻᒧᑦ ᐊᒻᒪᓗ ᐅᐊᓐᓇᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 57E15'N ᐊᒻᒪᓗ 80E00'W;
- ᐊᓱᐃᓪᓛᒃ ᐅᐊᓐᓇᖅᐸᓯᒻᒧᑦ ᑐᕋᐃᓐᓇᕐᓗᓂ 58E00'N ᐊᒻᒪᓗ 79E45'W;
- ᐊᓱᐃᓪᓛᒃ ᑲᓇᓐᓇᖅᐸᓯᒻᒧᑦ ᓂᒋᖅᐸᓯᒻᒧᓪᓗ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 57E40'N ᐊᒻᒪᓗ 78E00'W;
- ᐊᓱᐃᓪᓛᒃ ᑲᓇᓐᓇᖅᐸᓯᒻᒧᑦ ᐊᒻᒪᓗ ᓂᒋᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ ᐊᒻᒪᓗ 77E25'W;
- ᐊᓱᐃᓪᓛᒃ ᓂᒋᖅᐸᓯᒻᒧᑦ ᑐᕋᐃᓐᓇᕐᓗᓂ ᑲᓱᕐᕕᖓᓄᑦ 56E22'N ᐊᒻᒪᓗ 77E25'W.
ᐅᐃᒍᖓ 40-1
ᐃᓚᒍᑕᖅ:
ᓄᓇᓐᖑᐊᒥ ᓄᓇᐃᑦ ᐊᑐᖅᑕᐅᖃᑎᒌᑦᑐᑦ ᓇᔪᖅᑕᐅᖃᑎᒌᑦᓱᑎᓪᓗ (ᑐᓴᐅᒪᔾᔪᑎᓪᓗᐊᑕᑐᐃᓐᓇᖅ)

A ᓄᓇ ᐊᑐᖅᑕᐅᖃᑎᒌᑦᑐᑦ ᓇᔪᖅᑕᐅᖃᑎᒌᑦᓱᓂᓗ ᑕᓯᐅᔭᕐᔪᐊᑉ ᑕᓪᓗᕈᑎᖓᓂ
B ᓄᓇ ᐊᑐᖅᑕᐅᖃᑎᒌᑦᑐᖅ ᓇᔪᖅᑕᐅᖃᑎᒌᑦᑐᕐᓗ ᑕᓯᐅᔭᕐᔪᐊᒥ
ᐅᐃᒍᖓ 40-2
ᓇᓗᓇᐃᔭᐃᔾᔪᑎ ᑲᑐᔾᔨᓪᓗᑎᒃ ᓄᓇᖁᑎᒋᔭᐅᔪᓂᒃ
ᐃᓄᐃᑦ ᓄᓇᕗᒻᒥ ᐊᒻᒪᓗ ᐃᓄᐃᑦ ᓄᓇᕕᒻᒥ
(ᑎᑎᕋᖅᓯᒪᔪᑦ 40.2.8, 40.2.10, 40.2.22)
ᓄᓇᐃᑦ ᑕᑯᑦᓴᐅᔪᑦ ᓇᒻᒥᓂᖃᖃᑎᒌᒍᑕᐅᒋᐊᓐᖏᑦ ᓄᓇᓐᖑᐊᓂ ᑎᒍᒥᐊᖅᑕᐅᔪᑦ ᑲᑐᔾᔨᓪᓗᑎᒃ ᓇᒻᒥᓂᕆᔭᐅᔪᑦ, ᐃᓄᐃᑦ ᓄᓇᕗᒻᒥᐅᑦ ᐊᒻᒪᓗ ᐃᓄᐃᑦ ᓄᓇᕕᒻᒥᐅᑦ, ᓇᒻᒥᓂᖃᕐᓂᕐᒧᑦ ᓄᓇᓐᖑᐊᖅ ᓄᓇᓐᖑᐊᓕᐊᓯᒪᔪᓂ 1-4 ᑲᑐᔾᔨᓪᓗᑎᒃ ᑐᓂᔭᐅᓚᐅᖅᓯᒪᔪᑦ ᐊᖏᖃᑎᒌᖅᑐᓄᑦ ᑎᑎᕋᖅᑕᐅᓯᒪᕕᒻᒪᕆᒻᒧᑦ ᐄᑉᐳᕉᓪ 15, 1993.
ᐃᓄᐃᑦ ᐱᕙᓪᓕᐊᔪᓕᕆᓂᕐᒧᑦ, ᐃᓅᓯᓕᕆᓂᕐᒧᑦ ᐊᒻᒪᓗ ᐱᖅᑯᓯᓕᕆᓂᕐᒧᑦ ᐃᓅᑦᑎᐊᕆᐊᖃᕐᓂᕐᒧᑦ ᒪᑯᐊ ᐃᓂᓪᓚᒃᑕᐅᕙᓪᓕᐊᔪᑦ ᐊᑐᓕᖅᑎᑕᐅᓇᓱᒃᑐᓄᑦ ᐃᓗᐊᓂ ᐅᑯᐊ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ.

ᕿᓂᕐᓗᒍ

ᕿᓂᕐᕕᑦ

ᓯᕗᓪᓕᑦ ᐸᐃᑉᐹᑦ

Plain Language Guide

For citations, please refer to the official document.