ᐆᒪᔪᕐᓅᖓᔪᓄᑦ ᐊᑭᓕᐅᑕᐅᔪᑦ
ᐃᓚᖓ 1
ᑐᑭᖏᑦ ᑐᑭᓕᐅᖅᑕᐅᓂᖏᓪᓗ
6.1.1
ᐅᕙᓂ ᐃᓛᒃᑰᖅᑐᒥ:
“ᓇᓪᓕᐅᒃᑯᒫᖅᑖᕋᓱᐊᖅᑐᖅ” ᑐᑭᓕᒃ ᐃᓄᐃᑦ ᐅᕝᕙᓘᓐᓃᑦ ᐃᓄᒃ;
“ᐊᑭᓖᓂᖅ” ᑐᑭᓕᒃ ᑮᓇᐅᔭᑎᒍᑦ ᐊᑭᓖᓂᖅ ᐱᖃᓯᐅᑎᑦᓱᑎᒃ ᑮᓇᐅᔭᓄᑦ ᐊᑭᓖᓂᖅ ᐃᓗᐃᒃᑲᐅᓈᖅᑎᓪᓗᒋᑦ ᐃᒥᒃᑯᐊᖅᑎᑎᓪᓗᒋᓪᓘᓐᓃᑦ, ᐱᖃᓯᐅᑎᑦᓱᑎᒃ ᑮᓇᐅᔭᐅᓐᖏᑦᑐᑎᒍᑦ ᐊᑭᓖᓂᖅ ᓲᕐᓗ ᐊᑭᖏᑦ ᓄᑦᑎᖅᑕᐅᑲᐃᓐᓇᕐᓂᐅᑉ ᓄᑦᑎᖅᑕᐅᓪᓚᕆᓐᓂᐅᓪᓘᓐᓃᑦ, ᐊᓯᔾᔩᓂᐅᑉ ᓴᓇᒋᐊᕐᓂᐅᓪᓘᓐᓃᑦ ᐱᖁᑎᒋᔭᐅᔪᒥᒃ, ᐊᑭᓖᓂᖅ ᐃᑲᔫᑎᒃᑯᑦ, ᑐᓐᖓᕕᒋᑦᓱᒋᑦ ᓴᐳᔾᔨᓂᕐᒧᑦ ᑭᓪᓕᒋᔭᐅᔪᑦ, ᐅᕝᕙᓗ ᓇᓪᓕᑐᐃᓐᓇᖏᓐᓅᖓᔪᑦ;
“ᐱᕙᓪᓕᐊᑎᑦᓯᔪᖅ” ᑐᑭᓕᒃ ᓇᐅᑐᐃᓐᓇᖅ ᐃᓄᒃ ᓴᓇᓂᕐᒧᑦ ᐊᐅᓚᓂᓕᒃ;
“ᐱᕙᓪᓕᐊᓂᖅ” ᑐᑭᓕᒃ ᓇᐅᑐᐃᓐᓇᖅ ᑮᓇᐅᔭᓕᐅᕈᑕᐅᔪᖅ ᓴᓇᕕᐅᔪᕐᓘᓐᓃᑦ, ᓇᐅᑐᐃᓐᓇᖅ ᓄᓇᓕᐅᔪᑦ, ᐊᕕᑦᑐᖅᓯᒪᔪᑦ, ᒐᕙᒪᑐᖃᒃᑯᓪᓘᓐᓃᑦ ᓴᓇᔪᑦ ᓴᓇᓂᕐᒥᓪᓘᓐᓃᑦ ᐅᖓᕝᕙᕆᐊᕆᔪᑦ, ᓄᓇᒥ ᐃᒪᕐᒥᓘᓐᓃᑦ ᓄᓇᕗᒻᒥ ᑭᓪᓕᓕᓐᓂ I ᐊᒻᒪᓗ II ᑭᓯᐊᓂ ᐅᑯᓇᓐᖓᑦ ᐱᖃᓯᐅᔾᔨᖏᑦᑐᖅ:
(a)
ᑕᕆᐅᒃᑯᑦ ᐃᖏᕐᕋᔾᔪᑏᑦ; ᐅᕝᕙᓗ
(b)
ᓇᐅᑐᐃᓐᓇᖅ ᐆᒪᔪᕐᒨᖓᔪᖅ ᐅᕝᕙᓘᓐᓃᑦ ᐊᑐᖅᑕᐅᔪᖅ ᐊᖏᖅᑕᐅᓯᒪᑦᓱᓂ ᑐᓐᖓᕕᖃᖅᓱᑎᒃ ᐃᓛᒃᑯᑦ 5-ᒥᒃ;
“ᐆᒪᔪᐃᑦ” ᐱᖃᓯᐅᔾᔨᖏᑦᑐᖅ ᐱᕈᖅᑐᓂᒃ.
6.1.2
ᐅᓇ ᐃᓛᒃᑰᖅᑐᖅ ᑐᑭᓕᐅᖅᑕᐅᓂᐊᖅᑐᖅ ᑐᓐᖓᕕᖃᕐᓗᑎᒃ ᑲᓇᑕᐅᑉ ᑎᒍᒥᐊᕐᓂᖓᓂᒃ, ᑎᒍᒥᐊᕐᓂᕐᒧᑦ ᐱᔪᓐᓇᐅᑎᓂᒃ ᐊᒻᒪᓗ ᑲᓇᑕᐅᑉ ᓄᓇᕐᔪᐊᕐᒨᖓᔪᓄᑦ ᑲᒪᒋᔭᕆᐊᓕᖏᓐᓄᑦ.
ᐃᓚᖓ 2
ᐊᑑᑎᕕᖏᑦ
6.2.1
ᐆᒪᔪᐃᑦ ᐊᑭᓕᖅᑕᐅᓂᖏᓐᓄᑦ ᐱᕕᑦᓴᖃᕐᓂᐅᔪᑦ ᐃᓛᒃᑰᖅᑐᓂ 20, 21-ᒥᓗ ᐊᑑᑎᔪᑦ ᓱᕋᑦᑕᐅᔪᓄᑦ ᓇᓗᓇᐃᖅᑕᐅᒍᓐᓇᖅᑐᓄᑦ ᓯᕗᕐᖓᓂ. ᐊᓯᓕᒫᖏᑦ ᑐᑦᓯᕋᐅᑕᐅᔪᑦ ᐆᒪᔪᕐᓄᑦ ᐊᑭᓕᖅᑕᐅᓂᕐᒧᑦ ᐊᑑᑎᓂᐊᖅᑐᑦ ᐱᕕᖃᖅᑎᑦᓯᓂᖏᑦᑎᒍᑦ ᐆᒪ ᐃᓛᒃᑰᖅᑑᑉ.
6.2.2
ᑐᓐᖓᕕᒋᑦᓱᖑ 6.2.3, ᐅᓇ ᐃᓛᒃᑰᖅᑐᖅ ᐊᑑᑎᓂᐊᖅᑐᖅ ᑕᕆᐅᒃᑯᑦ ᐃᖏᕐᕋᔾᔪᑎᓅᖓᔪᓄᑦ ᑐᕋᐃᓐᓇᖅᑐᒥᒃ ᐊᑦᑐᐊᓂᖃᖅᑐᓄᑦ ᐊᓯᖏᓐᓄᑦ ᑮᓇᔭᐅᓕᐅᕋᓱᐊᕈᑕᐅᔪᓄᑦ ᓴᓐᓇᕕᓐᓄᓘᓐᓃᑦ ᐅᕝᕙᓗ ᓇᐅᑐᐃᓐᓇᖅ ᓄᓇᓖᑦ, ᐊᕕᑦᑐᖅᓯᒪᔪᑦ, ᒐᕙᒪᑐᖃᒃᑯᓪᓘᓐᓃᑦ ᐊᐅᓚᓂᖏᑦ, ᐅᖓᕝᕙᕆᐊᖅᑕᐅᓯᒪᔪᓪᓘᓐᓃᑦ ᑕᕝᕙᓐᖓᑦ, ᓄᓇᒥ ᐃᒪᕐᒥ ᓄᓇᕗᒻᒥ ᐊᒻᒪᓗ ᑭᓪᓕᓕᓐᓂ I ᐊᒻᒪᓗ II ᑭᓯᐊᓂ ᐊᑑᑎᓐᖏᑦᑐᖅ ᑕᕆᐅᒃᑯᑦ ᐃᖏᕐᕋᔾᔪᑎᓄᑦ ᑐᕋᐃᓐᓇᖅᑐᒥᒃ ᐊᑦᑐᐊᖏᑦᑐᓄᑦ ᐊᐅᓚᓂᐅᔪᓄᑦ.
6.2.3
ᒐᕙᒪᒃᑯᖏᑦ ᑲᓇᑕᐅᑉ ᐃᓄᒻᒥᒃ, ᑮᓇᐅᔭᓂᒃ ᑕᒪᒃᑮᓐᓂᓘᓐᓃᑦ, ᑲᒪᒍᓐᓇᖅᑐᓂᒃ ᐊᑭᓖᔾᔪᑕᐅᒋᐊᖃᕐᓂᖏᓐᓄᑦ ᑕᕆᐅᒃᑯᑦ ᐃᖏᕐᕋᔾᔪᑏᑦ ᐅᖃᐅᓯᐅᔪᑦ ᐆᒪ ᐃᓛᒃᑰᖅᑑᑉ ᐊᑖᓂ 6.2.2-ᒥ, ᑕᐃᓐᓇᓗ ᐃᓄᒃ ᓇᓗᓇᐃᖅᑕᐅᓯᒪᔪᖅ, ᑮᓇᐅᔭᐃᓪᓘᓐᓃᑦ, ᑕᒪᒃᑮᓐᓂᓘᓐᓃᑦ, ᐃᓱᒪᒋᔭᐅᓂᐊᖅᑐᖅ ᐱᕙᓪᓕᐊᑎᑦᓯᓂᖓᓂᒃ, ᐊᒻᒪᓗ ᑕᕆᐅᒃᑯᑦ ᐃᖏᕐᕋᔾᔪᑎ ᐃᓱᒪᒋᔭᐅᓂᐊᖅᑐᖅ ᐱᕙᓪᓕᐊᓂᕐᒧᑦ ᐊᐅᓚᓂᐅᒋᐊᖓ ᐱᔾᔪᑕᐅᓗᓂ ᐅᓇ ᐃᓛᒃᑰᖅᑐᖅ.
6.2.4
ᐊᑦᑐᐊᔪᓄᑦ ᑮᓇᐅᔭᓕᐅᕋᓱᐊᕈᑕᐅᔪᓄᑦ ᑕᕆᐅᒃᑯᑦ ᐃᖏᕐᕋᔾᔪᑎᓄᑦ ᐃᒪᖏᑦᑎᒍᑦ ᓄᓇᕗᑦ ᐊᒻᒪᓗ ᑭᓪᓕᓖᑦ I ᐊᒻᒪᓗ II , ᐊᓯᖏᓐᓄᑦ ᑕᕆᐅᒃᑯᑦ ᐃᖏᕐᕋᔾᔪᑏᑦ ᐆᒪ ᐃᓛᒃᑰᖅᑑᑉ ᐊᑑᑎᕕᒋᔭᖏᑦ ᑐᓐᖓᕕᖃᖅᓱᑎᒃ 6.2.2, ᐃᓄᐃᑦ ᐱᔪᓐᓇᕐᓂᖃᕐᓂᐊᖅᑐᑦ ᐆᒪᔪᕐᓄᑦ ᐊᑭᓕᖅᑕᐅᓗᑎᒃ ᐊᑖᓂ ᒪᓕᒐᖏᑦᑕ ᐃᓘᓐᓇᐃᓐᓄᑦ ᐊᑑᑎᔪᑦ. ᐱᕕᖃᖅᑎᑦᓯᒍᑕᐅᔪᑦ ᐆᒪᔪᕐᓄᑦ ᐊᑭᓕᖅᑕᐅᓂᕐᒧᑦ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑑᑎᔪᑦ ᓄᓇᕗᒻᒥ ᓴᐳᑎᔭᐅᓂᐊᖅᑐᑦ ᐃᓄᐃᑦ ᐃᑲᔪᖅᑐᖅᑕᐅᓗᑎᒃ ᓴᐳᔾᔭᐅᒍᑕᐅᒍᓐᓇᖅᑐᓄᑦ ᐆᒪᔪᕐᓂᒃ ᐊᖑᓇᓱᑦᑎᓄᑦ ᐊᓯᖏᓐᓂ ᑕᕆᐅᕐᓂ ᑲᓇᑕᒥ ᐊᑖᓂ ᒪᓕᒐᖏᑦᑕ ᐃᓘᓐᓇᐃᓐᓄᑦ ᐊᑑᑎᔪᑦ.
ᐃᓚᖓ 3
ᐃᓘᓐᓇᐃᓐᓄᑦ ᑐᓐᖓᕕᐅᔪᑦ ᐊᑭᓖᑎᑕᐅᓂᕐᒧᑦ
6.3.1
ᐱᕙᓪᓕᐊᑎᑦᓯᔪᖅ ᐊᑭᓖᔪᑦᓴᓪᓗᐊᑕᐅᔪᖅ, ᑕᑯᑦᓴᐅᑎᑦᓯᖏᒃᑲᓗᐊᕈᓂ ᑕᐃᒪᐃᒃᑲᐃᓂᕐᒥᓂᒃ ᐃᑉᐱᒍᓱᑦᓯᐊᖏᓐᓂᕐᒥᓂᓪᓘᓐᓃᑦ ᐋᓐᓂᕈᑕᐅᔪᒧᑦ ᑐᑦᓯᕋᖅᑐᒧᑦ ᐱᕙᓪᓕᐊᓂᕐᒧᑦ ᐊᐅᓚᓂᖅ ᐱᔾᔪᑎᒋᓪᓗᒍ ᓄᓇᕗᒻᒥ ᐊᑦᑐᐊᔪᑦ ᐅᑯᓄᖓ:
(a)
ᔭᒐᐃᓂᖅ ᓱᕋᐃᓂᕐᓘᓐᓃᑦ ᐱᖁᑎᒋᔭᐅᔪᓂᒃ ᓱᓇᒃᑯᑎᖏᓐᓂᓘᓐᓃᑦ ᐊᑐᖅᑕᐅᔪᓂᒃ ᐆᒪᔪᕐᓂᒃ ᐊᖑᓇᓱᓐᓂᕐᒧᑦ ᐅᕝᕙᓗ ᐆᒪᔪᒥᓃᑦ ᐸᐸᑕᐅᓕᕐᓂᖏᓐᓄᑦ;
(b)
ᒫᓐᓇ ᓯᕗᓂᑦᑎᓐᓂᓗ ᔭᒐᐃᓂᖅ ᑮᓇᐅᔭᐅᓕᕈᑕᐅᒍᓐᓇᖅᑐᓂᒃ ᐆᒪᔪᕐᓂᕐᒃ ᐊᖑᓇᓱᓐᓂᕐᒧᑦ; ᐊᒻᒪᓗ
(c)
ᒫᓐᓇ ᓯᕗᓂᑦᑎᓐᓂᓗ ᔭᒐᐃᓂᖅ ᐆᒪᔪᕐᓂᒃ ᐊᖑᓇᓱᑦᑕᐅᔪᓂᒃ ᓇᒻᒥᓂᖅᓱᖅᓱᑎᒃ ᑐᑦᓯᕋᖅᑐᓄᑦ.
6.3.2
ᐱᕙᓪᓕᐊᑎᑦᓯᔪᖅ ᐊᑭᓖᔪᑦᓴᐅᖏᑦᑐᖅ ᑕᐃᓐᓇ ᐱᕙᓪᓕᐊᑎᑦᓯᔪᖅ ᓴᖅᑮᑉᐸᑦ ᔭᒐᐃᔭᐅᔪᖅ ᐅᕝᕙᓗ ᓱᕋᑦᑕᐅᔪᖅ ᐱᔾᔪᑎᖃᕆᐊᖓ ᐅᓇᑕᕐᓂᖅ ᐱᔾᔪᑕᐅᓪᓗᓂ, ᐊᑭᕋᖅᑐᕐᓃᑦ, ᓄᓇᓕᓐᓂ ᐅᓇᑕᕐᓃᑦ, ᐋᓐᓂᑎᖅᑕᐅᓂᖏᓐᓄᑦ ᓯᕗᓕᖅᑏᑦ ᓄᓇᓕᕐᔪᐊᓂ, ᐅᕝᕙᓗ ᓄᓇᐅᑉ ᓇᒻᒥᓂᖅ ᓱᕋᓐᓂᖓᓄᑦ.
6.3.3
ᑐᑦᓯᕋᖅᑐᑦ ᐱᕕᓕᒫᒃᑯᑦ ᒥᑭᓪᓕᑎᕆᒐᓱᐊᕆᐊᓖᑦ ᓱᕋᑦᑕᐅᔪᓅᖓᔪᓂᒃ ᔭᒐᑕᐅᔪᓄᓪᓘᓐᓃᑦ.
6.3.4
ᒪᓕᒐᖅ ᐱᕕᖃᖅᑎᑦᓯᒍᑕᐅᑐᐃᓐᓇᕆᐊᓕᒃ ᑭᓪᓕᒋᔭᐅᒋᐊᓕᓐᓂᒃ ᐊᑭᓖᔾᔪᑎᒋᒋᐊᓕᖏᓐᓄᑦ ᐱᕙᓪᓕᐊᑎᑦᓯᔪᑦ ᐅᕝᕙᓗ ᐊᐅᓚᓂᖏᓐᓄᑦ ᐋᖅᑭᓂᐅᔪᑦ ᑭᓪᓕᒋᔭᐅᔪᓂᒃ ᐊᒻᒪᓗ ᑕᑯᑦᓴᐅᑎᑦᓯᓂᖅᑕᖃᕆᐊᖃᕐᒥᔪᖅ ᑮᓇᐅᔭᑎᒍᑦ ᑎᒍᒥᐊᕐᓂᖏᓐᓂᒃ ᐊᒻᒪᓗ ᐃᓕᓯᔪᖃᕆᐊᖃᑐᐃᓐᓇᕆᐊᓕᒃ ᓇᓪᓕᐅᒃᑯᒫᓂᒃ ᐊᓯᖏᓐᓂᓪᓗ ᐊᐅᓚᓂᐅᔪᓂᒃ ᐊᑦᑐᐊᖏᑦᑐᓂᒃ ᐆᒧᖓ ᐃᓛᒃᑰᖅᑐᒧᑦ. ᐃᓕᑕᕆᓯᒪᓗᒋᑦ ᐃᓄᐃᑦ ᐃᓱᒫᓘᑎᖏᑦ ᐱᔾᔪᑎᖃᖅᑐᑦ ᓄᐊᑕᐅᓂᖏᓐᓄᑦ ᐊᑭᓕᐅᑎᑦᓴᐃᑦ, ᒐᕙᒪᒃᑯᑦ ᐃᓱᒪᒋᔭᖃᖃᓯᐅᑎᓂᐊᕐᒥᔪᑦ ᐃᓚᒍᑦᓯᐅᔾᔨᓂᕐᒥᒃ ᑲᔪᓯᑎᑕᐅᓂᖏᓐᓄᑦ ᐊᐅᓚᓂᐅᔪᓂᒃ. ᑭᓪᓕᒋᔭᐅᔪᑦ ᐊᑭᓖᔾᔪᑕᐅᒋᐊᓕᓐᓄᑦ ᐋᖅᑭᑦᑕᐅᓂᐊᖅᑐᑦ ᓈᒻᒪᓈᖅᓯᒪᓗᑎᒃ ᓂᕆᐅᒋᔭᐅᒍᓐᓇᖅᑐᓄᑦ ᓱᕋᓐᓂᐅᔪᓄᑦ ᐊᑦᑐᐊᔪᓄᑦ ᐊᔾᔨᒌᓐᖏᑦᑐᓄᑦ ᐱᕙᓪᓕᐊᑎᑦᓯᓂᕐᔪᓄᑦ ᐊᐅᓚᓂᐅᔪᓄᑦ.
ᐃᓚᖓ 4
ᐊᐅᓚᓂᐅᔪᖅ ᑐᑦᓯᕋᕐᓂᕐᒧᑦ ᓇᓪᓕᐅᒃᑯᒫᓂᒃ
6.4.1
ᑐᑦᓯᕋᖅᑐᖅ, ᐅᕝᕙᓘᓐᓃᑦ ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ ᐅᕝᕙᓗ ᐊᖑᓇᓱᑦᑎᓄᑦ ᒥᑭᒋᐊᕐᓂᐊᖅᑎᓄᓪᓗ ᑲᑐᔾᔨᖃᑎᒌᑦ ᑭᒡᒐᖅᑐᕐᓗᑎᒃ ᑐᑦᓯᕋᖅᑐᒥᒃ, ᑐᑦᓯᕋᐅᓯᐅᕆᐊᓖᑦ ᔭᒐᐃᔭᐅᔪᓄᑦ ᓱᕋᑦᑕᐅᔪᓄᓪᓘᓐᓃᑦ ᑎᑎᕋᖅᓯᒪᓗᑎᒃ ᐱᕙᓪᓕᐊᑎᑦᓯᔪᒧᑦ. ᑐᑦᓯᕌᖑᔪᖅ ᐋᖅᑭᒍᑕᐅᓐᖏᑐᐊᖅᐸᑦ ᐅᓪᓗᐃᑦ 30 ᐃᓗᐊᓐᓂ, ᐱᕙᓪᓕᐊᑎᑦᓯᔪᖅ ᑐᑦᓯᕋᖅᑐᓘᓐᓃᑦ, ᐅᕝᕙᓗ ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᔨᖏᓪᓘᓐᓃᑦ, ᑐᓂᓯᒋᐊᓖᑦ ᑐᑦᓯᕌᖑᓯᒪᔪᒥᒃ ᐋᖅᑭᒋᐊᒃᑲᐃᔨᓄᑦ.
6.4.2
ᐅᓇ ᐱᔾᔪᑎᑐᐊᖑᓪᓗᓂ ᐃᓛᒃᑰᖅᑐᖅ, ᑐᑦᓯᕋᖅᑐᖅ ᓵᖓᓐᓅᕆᒍᓐᓇᕐᒥᔪᖅ ᐋᖅᑭᒋᐊᒃᑲᐃᔩᑦ ᑐᑦᓯᕋᐅᑎᓂᒃ ᐊᑦᑐᐊᔪᓂᒃ ᐱᕙᓪᓕᐊᑎᑦᓯᓂᕐᒧᑦ ᐊᐅᓚᓂᐅᔪᓄᑦ ᑭᓪᓕᓕᓐᓂ I ᐊᒻᒪᓗ II-ᒥ ᐊᒻᒪᓗ ᑐᑦᓯᕌᖑᔪᖅ ᑲᒪᒋᔭᐅᒐᔭᖅᑐᖅ ᒪᓕᓪᓗᑎᒃ ᐆᒥᖓ ᐃᓛᒃᑰᖅᑐᒥᒃ.
6.4.3
ᓈᓚᓐᓂᖅᑕᖃᖅᑎᓪᓗᒍ ᑐᑦᓯᕌᖑᔪᒧᑦ, ᐋᖅᑭᒋᐊᒃᑲᐃᔨᒃᑯᑦ ᑕᑯᑦᓴᐅᑎᑦᓯᑦᓴᐃᓐᓇᕆᐊᖃᓐᖏᑦᑐᑦ ᒪᓕᒋᐊᓕᓪᓚᕆᓐᓂᒃ ᒪᓕᒐᖃᕐᓗᑎᒃ ᓇᓗᓇᐃᕈᑎᑦᓴᓂᒃ ᐊᒻᒪᓗ ᐃᓱᒪᒋᔭᖃᖃᓯᐅᑎᑐᐃᓐᓇᕆᐊᖃᖅᓱᑎᒃ ᓇᐅᑐᐃᓐᓇᕐᓂᒃ ᓱᓇᑐᐃᓐᓇᕐᓂᒃ ᐊᑑᑎᓂᖃᖅᑐᕆᔭᒥᓂᒃ. ᐋᖅᑭᒋᐊᒃᑲᐃᔨᒃᑯᑦ ᓈᓚᓐᓂᖃᕐᓗᑎᒃ ᑐᑦᓯᕌᖑᔪᒧᑦ ᐊᑑᑎᖃᖅᑎᑦᓯᓂᖅᓴᐅᓐᓂᐊᖅᑐᑦ ᐃᓄᐃᑦ ᖃᐅᔨᒪᓂᖏᓐᓂᒃ ᐆᒪᔪᕐᓂᒃ ᐊᒻᒪᓗ ᐊᕙᑎᒥᒃ ᐃᓱᒪᒋᔭᖃᖃᓯᐅᑎᓂᐊᖅᓱᑎᓪᓗ ᐃᓅᓯᕐᒥᒃ, ᐱᖅᑯᓯᕐᒥᒃ ᐊᒻᒪᓗ ᖃᕿᒪᓇᓱᐊᕐᓂᕐᒧᑦ ᐱᒻᒪᕆᐅᓂᖏᓐᓂᒃ ᐆᒪᔪᐃᑦ ᐃᓄᓐᓄᑦ. ᐋᖅᑭᒋᐊᒃᑲᐃᔨᒃᑯᑦ ᑎᓕᓯᒍᓐᓇᖅᑐᑦ ᖃᐅᔨᒪᔪᒻᒪᕆᓐᓂᒃ ᖃᐃᖁᔨᒍᓐᓇᖅᓱᑎᓪᓗ ᐅᖃᕆᐊᖅᑐᖅᑐᓂᒃ.
6.4.4
ᐃᓘᓐᓈᒍᑦ ᑐᓐᖓᕕᐅᓪᓗᓂ, ᐊᑭᓖᒍᑎᑦᓴᐃᑦ ᓇᓗᓇᐃᖅᑕᐅᓯᒪᒋᐊᖃᓐᖏᑦᑐᑦ ᐊᕐᕌᒍᒧᑦ ᑮᓇᐅᔭᓕᐅᕈᑕᐅᓂᐊᕆᐊᖏᑦ. ᐊᑭᓕᖅᑕᐅᒃᑲᐃᔾᔪᑕᐅᔪᑦ ᕿᒥᕐᕈᔭᐅᒍᓐᓇᖅᑐᑦ ᐋᖅᑭᒋᐊᒃᑲᐃᔨᒃᑯᓐᓄᑦ ᑐᑦᓯᕋᑐᐊᖅᐸᑕ ᓇᓪᓕᖏᑦ ᐊᖏᖃᑎᒌᒐᓱᐊᖅᑐᑦ ᓈᓚᓐᓂᕐᒥ.
6.4.5
ᑐᑦᓯᕋᖅᑐᖃᕐᓂᐊᖅᐸᑦ ᑐᑦᓯᕌᖑᒋᐊᓖᑦ ᐊᕐᕌᒍᐃᑦ ᐱᖓᓱᑦ ᐃᓗᐊᓐᓂ ᐱᒋᐊᕐᓗᓂ ᐅᓪᓗᖓᓂᒃ ᔭᒐᐃᔪᖃᓚᐅᖅᑎᓪᓗᒍ ᓱᕋᑦᑕᐅᔪᖃᓚᐅᖅᑎᓪᓗᒍᓘᓐᓃᑦ, ᐅᕝᕙᓗ ᐊᕐᕌᒍᐃᑦ ᐱᖓᓱᑦ ᐃᓗᐊᓐᓂ ᐱᒋᐊᕐᓗᓂ ᐅᓪᓗᖓᓂᒃ ᔭᒐᐃᓂᐅᔪᖅ ᓱᕋᑦᑕᐅᓂᕐᓘᓐᓃᑦ ᖃᐅᔨᓕᓚᐅᖅᑕᖓᓂ ᑐᑦᓯᕋᖅᑑᑉ
6.4.6
ᐋᖅᑭᒋᐊᒃᑲᐃᔨᒃᑯᑦ ᓈᒪᓐᓂᖃᕐᓂᐊᖅᑐᑦ ᓇᓗᓇᐃᖅᓯᓕᕐᓗᑎᓪᓗ ᐊᑭᓖᑎᑦᓯᓂᐅᔪᒥᒃ ᐊᑭᓖᔾᔪᑕᐅᔪᓂᓪᓗ. ᐋᖅᑭᒋᐊᒃᑲᐃᔨᒃᑯᑦ ᐋᖅᑮᒋᐊᓖᑦ ᐅᓪᓗᐃᑦ 30 ᐃᓗᐊᓐᓂ ᓈᓚᓐᓂᖅᑕᖃᓚᐅᖅᑎᓪᓗᒍ ᑐᑦᓯᕌᖑᔪᓅᖓᔪᓂᒃ.
6.4.7
ᐃᓕᑕᖅᓯᓯᒪᓂᖅ ᑐᕌᒐᕆᔭᐅᒋᐊᖓ ᔭᒐᐃᔭᐅᔪᖅ ᓱᕋᑦᑕᐅᔪᓪᓘᓐᓃᑦ ᐋᓐᓂᕈᑕᐅᔪᒧᑦ ᑐᑦᓯᕋᖅᑐᒧᑦ ᒥᑭᓪᓕᑎᖅᑕᐅᒋᐊᓕᑦ ᓱᑲᔾᔫᒥᔪᒥᒃ ᐊᐅᓚᓂᖃᕐᓗᑎᒃ ᑐᑦᓯᕋᕐᓂᐅᔪᑦ ᐊᑭᓕᐅᑕᐅᔪᓪᓗ, ᐋᖅᑭᒋᐊᒃᑲᐃᔨᒃᑯᑦ ᐃᒪᐃᑦᓱᓐᓇᖅᑐᑦ:
(a)
ᑲᒪᓗᑎᒃ ᑐᑦᓯᕌᖑᔪᒥᒃ ᐊᑦᑐᐊᔪᒥᒃ ᔭᒐᐃᓂᕐᒧᑦ ᓱᕋᐃᓂᕐᒧᓪᓘᓐᓃᑦ ᐱᖁᑎᒋᔭᐅᔪᒥᒃ ᓱᓇᒃᑯᑎᓂᓪᓘᓐᓃᑦ ᐊᑐᖅᑕᐅᔪᓂᒃ ᐆᒪᔪᕋᓱᐊᖅᑐᓄᑦ ᐅᕝᕙᓗ ᐆᒪᔪᐃᑦ ᐸᐸᑕᐅᑐᐃᓐᓇᓕᖅᑐᑦ ᑲᔪᓯᒋᐊᓐᖏᓐᓂᖓᓂ ᓈᓚᓐᓂᕐᒥ ᓇᓗᓇᐃᕈᑎᑦᓴᐅᔪᑦ ᐊᓯᖏᓐᓄᑦ ᔭᒐᐃᔭᐅᔪᓄᑦ ᓱᕋᑦᑕᐅᔪᓄᓪᓘᓐᓃᑦ;
(b)
ᕿᑐᕐᖏᐅᑎᑦᓯᓗᑎᒃ ᑮᓇᐅᔭᓂᒃ ᐋᖅᑭᑦᓯᒪᔭᖏᑦᑎᒍᑦ ᐋᖅᑭᒋᐊᒃᑲᐃᔨᒃᑯᑦ; ᐊᒻᒪᓗ
(c)
ᐊᑭᓕᐅᑕᐅᔪᑦ ᕐᑳᖓᒍᑦ ᐊᑭᓖᒃᑲᓐᓂᑎᑦᓯᓗᑎᒃ ᐊᑑᑎᓂᐊᖅᑐᓄᑦ ᕐᑳᖓᒍᑦ ᔭᒑᒃᑲᓂᖅᑐᓄᑦ ᓱᕋᑦᑕᐅᒃᑲᓐᓂᖅᑐᓄᓪᓗ, ᐊᑭᒋᔭᐅᔪᓪᓗ, ᐱᖃᓯᐅᑎᑦᓱᓂ ᓄᐊᑕᐅᓂᖏᑦ ᐊᑭᓕᐅᑎᑦᓴᐃᑦ, ᓱᓇᑐᐃᓐᓇᖅ ᐱᓪᓗᒍ ᑭᖑᕙᐅᖅᑲᒍᑕᐅᔪᖅ ᐊᑭᓕᐅᑕᐅᔪᑦᓴᐅᔪᑦ ᖃᓄᖅᑑᕈᑕᐅᓂᖏᓐᓄᑦ.
6.4.8
ᑐᑦᓯᕋᖅᐸᑦ ᑐᑦᓯᕋᖅᓯᒪᔪᖅ, ᐋᖅᑭᒋᐊᒃᑲᐃᔨᒃᑯᑦ ᑎᑎᕋᖅᑕᐅᒃᑲᐃᒍᓐᓇᖅᑐᑦ ᐊᑭᓖᑎᑦᓯᓂᕐᒧᑦ ᐋᖅᑭᑦᑕᐅᔪᒥᒃ ᐃᖅᑲᖅᑐᐃᔨᕐᔪᐊᒃᑯᓐᓄᑦ ᓄᓇᕗᒻᒥ ᐊᒻᒪᓗ ᑐᑦᓯᕋᖅᓯᒪᔪᖅ ᐊᑐᕈᓐᓇᖅᑐᖅ ᐃᖅᑲᖅᑐᐃᔨᕐᔪᐊᒃᑯᓐᓂᒃ ᑲᔪᓯᑎᑦᓯᒍᑎᒋᓗᒋᑦ ᐋᖅᑭᑦᑕᐅᔪᒥᒃ. ᐋᖅᑭᒋᐊᒃᑲᐃᔨᒃᑯᑦ ᐃᑲᔪᕈᓐᓇᖅᑐᑦ ᑲᔪᓯᑎᑕᐅᓂᖓᓄᑦ ᐋᖅᑭᑦᑕᐅᔫᑉ.
6.4.9
ᐋᖅᑭᒋᐊᒃᑲᐃᔨᒃᑯᑦ ᐋᖅᑮᑉᐸᑕ ᖃᖓᒃᑯᑦ ᓈᓚᓐᓂᖃᕋᔭᕐᒪᖔᕐᒥᒃ, ᐊᑲᐅᓈᖅᓯᒪᓂᕆᒍᓐᓇᖅᑕᖓ ᑐᑦᓯᕋᖅᑑᑉ ᑐᓐᖓᕕᓪᓗᐊᑕᐅᓂᐊᖅᑐᖅ.
6.4.10
ᐋᖅᑭᒋᐊᒃᑲᐃᔨᒃᑯᑦ ᓇᓗᓇᐃᖅᓯᑉᐸᑕ ᔭᒐᑕᐅᔪᖅ ᓱᕋᑦᑕᐅᔪᕐᓘᓐᓃᑦ ᐊᑕᐅᓯᐅᓐᖏᑦᑐᒧᑦ ᐱᕙᓪᓕᐊᑎᑦᓯᔪᒧᑦ ᑕᐃᒪᐃᒃᑲᖅᑕᐅᒋᐊᖓ, ᑕᐃᒃᑯᐊ ᐱᕙᓪᓕᐊᑎᑦᓯᔪᑦ ᐊᑭᓕᕆᐊᓕᓐᓂᒃ ᐊᑭᓖᔪᑦᓴᐅᔪᑦ. ᐋᖅᑭᒋᐊᒃᑲᐃᔨᒃᑯᑦ ᐃᒻᒥᒃᑯᐊᖅᑎᑦᓯᓂᐊᖅᑐᑦ ᐊᑭᓕᕆᐊᓕᓐᓂ ᒪᓕᓪᓗᑎᒃ ᐃᓘᓐᓈᒍᑦ ᐊᑐᖅᑕᐅᓲᓂᒃ ᑐᓐᖓᕕᐅᑦᓱᑎᒃ ᒪᓕᒐᕐᓄᑦ.
6.4.11
ᐊᑭᓕᕆᐊᖃᖅᑎᑕᐅᔪᑦ ᐋᖅᑭᒋᐊᒃᑲᐃᔨᓄᑦ ᓇᓗᓇᐃᔭᐃᓕᕈᑎᒃ ᐊᑭᓕᕆᐊᓕᓐᓂᒃ ᐊᑖᓂ ᐆᒪ ᐃᓛᒃᑰᖅᑑᑉ ᐊᑭᓕᕋᑦᓴᐅᔾᔮᖏᑦᑐᑦ ᑐᑦᓯᕋᖅᑐᓄᑦ ᐅᕝᕙᓗ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᖑᓇᓱᑦᑎᓄᑦ ᒥᑭᒋᐊᓂᐊᖅᑎᓄᑦ ᑲᑎᒪᔨᓄᑦ ᑭᒡᒐᖅᑐᕐᓗᑎᒃ ᑐᑦᓯᕋᖅᑐᒥᒃ. ᐊᑭᓕᕆᐊᖃᖅᑎᑕᐅᔪᑦ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᑭᒡᒐᖅᑐᕐᓗᑎᒃ ᑐᑦᓯᕋᖅᑐᒥᒃ ᑎᒍᒥᐊᖅᑕᐅᓂᐊᓐᖏᑦᑐᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ.
ᐃᓚᖓ 5
ᐊᓯᖏᓐᓅᖓᔪᑦ
6.5.1
ᐃᓄᐃᑦ ᐱᕚᓪᓕᕈᑎᑦᓴᖏᓐᓄᑦ ᐃᑲᔫᓯᐊᖏᓐᓄᓪᓗ ᐊᖏᕈᑎ ᐱᖃᓯᐅᔾᔨᔪᖅ ᐆᒪᔪᕐᓅᖓᔪᑦ ᐊᑭᓕᖅᑕᐅᓂᖏᓐᓄᑦ ᐱᕕᑦᓴᖃᕐᓂᐅᔪᓄᑦ, ᐊᖏᕈᑎ ᐃᓚᐅᑎᑦᓯᓂᐊᖅᑐᖅ ᐆᒪᔪᕐᓄᑦ ᐊᑭᓕᐅᑕᐅᒍᓐᓇᖅᑐᓄᑦ ᐊᑖᓂ ᐃᓛᒃᑰᖅᑐᑦ 20 ᐊᒻᒪᓗ 21.
6.5.2
ᐋᔩᕋᕈᑕᐅᑎᓪᓗᒍ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᓴᖏᓐᓄᓪᓗ ᐃᑲᔫᓯᐊᖏᓐᓄᓪᓗ ᐊᖏᕈᑎ, ᐊᖏᕈᑕᐅᔪᕐᓘᓐᓃᑦ ᐅᖃᐅᓯᐅᔪᖅ 6.6.2-ᒥ, ᐊᖏᖃᑎᒌᑦᑑᑉ ᐋᔨᕋᓂᐅᔪᓄᑦ ᑭᓪᓕᖃᓐᖏᑦᑐᑦ ᓇᓗᓇᐃᔭᖅᑕᐅᓂᖏᓐᓄᑦ ᔭᒐᐃᓂᐅᔪᑦ ᓱᕋᐃᓂᐅᔪᓪᓘᓐᓃᑦ ᐅᕙᓂ ᐃᓛᒃᑰᖅᑐᒥ. ᑐᓐᖓᕕᒋᑦᓱᒍ ᐅᓇ ᑎᑎᕋᖅᓯᒪᔪᖅ, ᐱᔾᔪᑕᐅᓪᓗᑎᒃ ᐃᓘᓐᓇᑎᒃ ᐊᖏᕈᑎᒨᖓᔪᑦ, ᐆᒪᔪᕐᓄᑦ ᐊᑭᓕᐅᑕᐅᔪᑦ ᑐᑭᓕᐅᖅᑕᐅᓂᐊᖅᑐᑦ ᐊᑭᓕᐅᑕᐅᒋᐊᖏᑦ ᑕᐃᑦᓱᒪᖓ ᔭᒐᐃᔭᒧᑦ ᓱᕋᑦᑕᐅᔪᒧᓪᓘᓐᓃᑦ ᐅᖃᐅᓯᐅᔪᒧᑦ 6.3.1-ᒥ.
ᐃᓚᖓ 6
ᓴᐳᒻᒥᔪᑏᑦ
6.6.1
ᐱᕕᖃᖅᑎᑦᓯᓂᐅᔪᑦ ᐅᕙᓂ ᐃᓛᒃᑰᖅᑐᒥ ᐊᑲᐅᓐᖏᓪᓕᐅᕈᑎᖃᖅᑎᑦᓯᓂᐊᓐᖏᓚᑦ ᐊᓯᖏᓐᓂᒃ ᐱᔪᓐᓇᐅᑎᐅᔪᓂᒃ ᐋᖅᑭᒋᐊᕈᑕᐅᔪᓄᓪᓘᓐᓃᑦ ᑐᑦᓯᕋᖅᑐᒧᑦ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑑᑎᔪᓄᑦ ᔭᒐᐃᔭᐅᔪᓄᑦ ᓱᕋᑦᑕᐅᔪᓄᓪᓘᓐᓃᑦ ᐱᓯᒪᔪᓄᑦ ᐱᕙᓪᓕᐊᑎᑦᓯᓂᕐᒧᑦ ᐊᐅᓚᓂᕐᒥᒃ. ᑭᓯᐊᓂᓕ, ᑐᑦᓯᕌᖑᔪᖅ ᐅᖃᐅᓯᐅᔪᖅ ᐊᑖᓂ ᐋᖅᑭᒋᐊᒃᑲᐃᔪᑦ ᑖᒃᑯᐊᖑᓂᐊᖅᑐᑦ ᐊᑦᑐᐊᔪᓄᑦ ᐃᓘᓐᓇᖏᓐᓄᑦ ᔭᒐᑕᐅᔪᓄᑦ ᓱᕋᑦᑕᐅᔪᓄᓪᓘᓐᓃᑦ ᓇᓗᓇᐃᔭᖅᑕᐅᔪᑦ ᑎᑎᕋᖅᓯᒪᔪᓂ 6.3.1(a), (b), ᐊᒻᒪᓗ (c), ᑐᓐᖓᕕᖃᕐᓗᑎᒃ ᑭᓯᐊᓂ ᕿᒥᕐᕈᓂᖏᓐᓂᒃ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᑦᑎᒍᑦ ᐊᔪᐃᓐᓇᕆᐊᒃᑲᓐᓂᕐᓂᖓᓂᒃ ᐊᑖᓂ 28 ᒐᕙᒪᑐᖃᒃᑯᑦ ᐃᖅᑲᖅᑐᐃᔨᖏᑦᑕ ᒪᓕᒐᕐᔪᐊᖏᓐᓂᒃ, R.S.C. 1985, c.F-7. ᑐᑦᓯᕌᖑᔪᖅ ᐱᕙᓪᓕᐊᑎᑦᓯᔪᒧᑦ ᐃᒋᑕᐅᑐᐃᓐᓇᖅᐸᑦ, ᑐᑦᓯᕋᖅᓯᒪᔪᖅ ᓱᓕ ᑐᑦᓯᕋᕈᓐᓇᖅᑐᖅ ᑖᒃᑯᓄᖓᑦᓴᐃᓐᓇᖅ ᔭᒐᐃᔭᒥᓄᑦ ᓱᕋᑦᑕᐅᔪᓄᓪᓘᓐᓃᑦ ᐊᓯᐊᓄᑦ ᐱᕙᓪᓕᐊᑎᑦᓯᔫᑉ.
6.6.2
ᓇᐅᑐᐃᓐᓇᖅ ᐅᕙᓃᑦᑐᖅ ᐊᓯᐊᓂᓘᓐᓃᑦ ᐃᓛᒃᑰᖅᑐᒥ ᐊᑦᑐᐊᔪᑦ ᐆᒪᔪᐃᑦ ᐊᑭᓕᖅᑕᐅᓂᖏᓐᓄᑦ ᓄᖅᑲᖓᔾᔪᑕᐅᔾᔮᖏᑦᑐᖅ ᐃᓄᓐᓄᑦ ᐱᕙᓪᓕᐊᑎᑦᓯᔪᒧᓪᓗ ᐆᒪᔪᕐᓄᑦ ᐊᑭᓕᖅᑕᐅᓂᕐᒧᑦ ᐊᖏᕈᑎᒧᑦ ᐃᓇᖐᒐᔭᖅᑐᒧᑦ ᐊᓯᓕᒫᖏᓐᓂᒃ ᑲᒪᒋᔭᕆᐊᓕᓐᓂᒃ ᐊᑦᑐᐊᔪᓂᒃ ᐆᒪᔪᐃᑦ ᐊᑭᓕᖅᑕᐅᓂᖏᓐᓄᑦ ᐆᒪ ᐊᑖᓂ ᐊᖏᕈᑎᐅᑉ.
6.6.3
ᓇᐅᑐᐃᓐᓇᖅ ᐅᕙᓃᑦᑐᖅ ᐃᓛᒃᑰᖅᑐᒥ ᑐᑭᓯᔭᐅᓂᐊᖏᖅᑐᖅ ᑭᓪᓕᖃᕈᑕᐅᒋᐊᖏᑦ ᐊᐳᖅᑕᕐᕕᐅᒋᐊᖏᓪᓘᓐᓃᑦ ᐱᔪᓐᓇᐅᑎᖏᓐᓄᑦ ᐱᕙᓪᓕᐊᑎᑦᓯᔫᑉ ᐊᑭᓖᒍᓐᓇᖅᑎᑕᐅᒍᓐᓇᖅᑑᑉ ᐊᑖᓂ ᐃᓚᖓ 3 ᐊᑭᕋᖅᑐᕈᑎᒋᑐᐃᓐᓇᕆᐊᓕᖏᑦ ᐊᓯᐊᓂᒃ ᐃᓄᒻᒥᒃ ᑐᑦᓯᕋᖅᑑᑉ ᐊᓯᐊᓂᒃ.
