ᓄᓇᓕᕋᓛᑦ
ᐃᓚᖓ 1
ᑐᑭᖏᑦ ᑐᑭᓕᐅᖅᑕᐅᓂᖏᓪᓗ
7.1.1
ᐅᕙᓂ ᐃᓛᒃᑰᖅᑐᒥ:
“ᓄᓇᓕᕋᓛᑦ” ᑐᑭᓕᒃ ᓄᓇᓕᒋᔭᐅᔪᑦ ᐃᓚᒌᓄᒃ ᐊᓯᖏᓐᓄᓘᓐᓃᑦ ᑲᑎᒪᐅᖅᑐᓄᑦ ᐃᓄᓐᓄᑦ ᓄᓇᖃᑲᐃᓐᓇᐸᑦᑐᓄᑦ, ᐊᕐᕌᒎᑉ ᐃᓗᐊᓂ ᓯᓚᐅᑉ ᐊᓯᔾᔨᑕᕐᓂᖓ ᒪᓕᑦᓱᒍ, ᑮᑕᑲᐃᓐᓇᖅ, ᓄᓇᖃᑯᑖᑲᐃᓐᓇᖃᑦᑕᕐᓂᖏᑦ ᐅᕝᕙᓗ ᓄᓇᖃᐃᓐᓇᕐᓗᑎᒃ ᐊᕐᕌᒍᓕᒫᖅ ᐱᔾᔪᑕᐅᓪᓗᓂ ᐆᒪᔪᕐᓂᒃ ᐊᖑᓇᓱᓐᓂᖅ ᐊᒻᒪᓗ ᐊᑐᖅᑕᐅᓂᖏᓐᓄᑦ ᖁᕕᐊᒋᓪᓗᒍ ᓄᓇᐃᑦ, ᐱᖃᓯᐅᑎᑦᓱᑎᒃ
(a)
ᐃᓪᓗᖃᕐᕕᒋᔭᖓ, ᐊᒻᒪᓗ
(b)
ᕐᑳᖓᓃᑦᑐᑦ ᓄᓇᐃᑦ ᐃᓪᓗᖃᕐᕕᒋᔭᖓ ᐊᒻᒪᓗ ᕐᑳᖏᑦ ᓄᓇᐃᑦ ᐅᖓᓯᓐᓂᖃᖅᑐᑦ 2 ᑭᓗᒦᑕᓂᒃ ᕿᑎᖓᓂᒃ ᐃᓪᓗᖃᕐᕕᖓᑕ,
ᑭᓯᐊᓂ ᐱᖃᓯᐅᔾᔨᖏᑦᑐᑦ ᑕᒻᒫᕐᕕᒋᔭᐅᑲᐃᓐᓇᐸᑦᑐᑦ ᐅᓪᓗᓂᒃ ᖃᑦᓯᒐᓛᓂᒃ ᐱᓇᓱᐊᕈᓯᕐᓂᓘᓐᓃᑦ.
7.1.2
ᐅᓇ ᐃᓛᒃᑰᖅᑐᖅ ᑐᑭᓕᐅᖅᑕᐅᓂᐊᖅᑐᖅ ᑐᓐᖓᕕᖃᕐᓗᓂ ᐃᓛᒃᑯᑦ 5-ᒥᒃ.
ᐃᓚᖓ 2
ᒐᕙᒪᒃᑯᑦ ᓄᓇᖁᑎᖏᑦ ᐊᑐᐃᓐᓇᐅᔪᑦ ᓄᓇᓕᕋᓛᖃᕐᕕᐅᓂᕐᒧᑦ
7.2.1
ᐃᓄᐃᑦ, ᑐᓐᖓᕕᖃᕐᓗᑎᒃ ᑐᑭᖏᓐᓂᒃ ᐊᖏᕈᑎᐅᑉ, ᓄᓇᖃᐃᓐᓇᕈᓐᓇᖅᑐᑦ ᓄᓇᓕᕋᓛᓂᒃ.
7.2.2
ᐅᓪᓗᖓᓂᒃ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ, ᐃᓄᐃᑦ, ᑐᓐᖓᕕᖃᕐᓗᑎᒃ ᐅᖃᐅᓯᐅᔪᓂᒃ 7.2.3-ᒥ 7.2.4-ᒥᓗ, ᐊᒻᒪᓗ ᑐᓐᖓᕕᖃᕐᓗᑎᒃ ᐊᖏᖅᑕᐅᓂᕐᒥᓂᒃ ᑖᒃᑯᓄᖓᓪᓗᐊᖅ ᓄᓇᓕᓐᓂ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓄᑦ, ᓴᖅᑮᖑᓐᓇᖅᑐᑦ ᓇᔪᒐᖃᕐᓗᑎᓪᓗ ᓄᑖᕐᒥᒃ ᓄᓇᓕᕋᓛᓂᒃ ᓇᒥᑐᐃᓐᓇᖅ ᓄᓇᓂ ᓄᓇᕗᒻᒥ ᐃᓄᐃᑦ ᖁᕕᐊᒋᔭᖏᓐᓂ ᐱᔪᓐᓇᐅᑎᖃᕐᕕᒋᑦᓱᒍ ᐆᒪᔪᕐᓂᐊᕈᓐᓇᕐᓂᕐᒥᒃ ᑐᓐᖓᕕᒋᑦᓱᒍ 5.7.16. ᐊᖏᖅᑕᐅᓂᖅ ᑖᒃᑯᓄᖓᓪᓗᐊᖅ ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖏᓐᓄᑦ ᐱᔾᔪᑎᖃᑦᓯᐊᖏᓪᓗᑎᒃ ᕿᐱᓗᑦᑕᐅᔾᔮᖏᑦᑐᑦ.
7.2.3
ᓄᓇᓕᕋᓛᑦ ᓴᖅᑭᖅᑕᐅᒋᐊᖃᓐᖏᑦᑐᑦ ᐅᑯᓇᓂ ᓄᓇᓂ:
(a)
ᑎᒍᒥᐊᖅᑕᐅᔪᑦ ᐊᑭᓕᖅᑕᐅᓯᒪᑦᓱᑎᒃ ᐊᒻᒪᓗ ᐃᓄᓐᓄᑦ ᓇᒻᒥᓂᖅ ᓄᓇᖁᑎᒋᔭᐅᒐᑎᒃ ᐅᕝᕙᓗ ᓄᓇᓕᓐᓄᑦ ᓄᓇᖁᑎᒋᔭᐅᓐᖏᑦᑐᑦ;
(b)
ᑎᒍᒥᐊᖅᑕᐅᔪᑦ ᐊᑖᓂ ᕐᑳᖓᑕ ᐊᑐᖅᑐᐊᖅᑕᐅᓂᐅᑉ; ᐅᕝᕙᓗ
(c)
ᐃᓗᐊᓂ ᓄᓇᓖᑦ ᑭᓪᓕᖏᑦᑕ, ᐊᖏᖅᑕᐅᖅᑳᓚᐅᕋᑎᒃ ᓄᓇᓖᑦ ᑯᐊᐳᕇᓴᒃᑯᖏᓐᓄᑦ, ᐊᖏᖅᑕᐅᓂᖅ ᐱᔾᔪᑎᑦᓴᖃᑦᓯᐊᖏᓪᓗᑎᒃ ᑲᔪᓯᑎᑕᐅᓯᒪᓐᖏᑐᐊᖅᐸᑦ.
7.2.4
ᐃᓄᐃᑦ ᓴᖅᑮᒍᓐᓇᖅᑐᑦ ᓄᓇᓕᕋᓛᓂᒃ ᒥᓐᖑᐃᕐᓯᕐᕕᓐᓂ ᓴᐳᑎᔭᐅᓯᒪᔪᓂᓗ ᓄᓇᓂ, ᐋᒡᒐᐅᒐᓗᐊᖅ ᓴᖅᑭᖅᑕᐅᓂᖏᑦ ᓄᓇᓕᕋᓛᑦ ᒪᓕᑦᓯᐊᓐᖏᑐᐊᖅᐸᑕ ᐱᔭᕆᐊᓕᓐᓂᒃ ᒥᓐᖑᐃᕐᓯᕐᕕᓐᓂ ᓴᐳᑎᔭᐅᓯᒪᔪᓂᓘᓐᓃᑦ ᓄᓇᓕ ᐊᐅᓚᑦᓯᓂᕐᒧᑦ ᐸᕐᓇᐅᑎᓂ ᐱᔭᕆᐊᓕᓐᓂ 8.4.13-ᒥ ᐊᒻᒪᓗ 9.3.7-ᒥ. ᐃᓂᒋᔭᐅᔪᑦ ᓇᓗᓇᐃᖅᑕᐅᓂᐊᖅᑐᑦ ᐱᕕᖃᖅᑎᑦᓯᒍᑕᐅᓂᖏᑦᑎᒍᑦ ᐃᓄᐃᑦ ᐱᕚᓪᓕᕈᑎᑦᓴᖏᓐᓄᓪᓗ ᐃᑲᔫᓯᐊᖏᓐᓄᓪᓗ ᐊᖏᕈᑎᓂ ᑖᒃᑯᓄᖓ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᑖᒃᑯᓄᖓᓪᓗᐊᕐᓗ ᐊᐅᓚᑦᓯᓂᕐᒧᑦ ᑎᒥᐅᔪᓄᑦ.
ᐃᓚᖓ 3
ᑎᒍᒥᐊᖅᑕᐅᓂᖏᑦ ᓄᓇᓕᕋᓛᑦ
7.3.1
ᐃᓄᐃᑦ ᓄᓇᖃᕈᓐᓇᖅᑐᑦ ᓄᓇᓕᕋᓛᕐᓂᒃ ᐅᖃᐅᓯᐅᔪᓂᒃ 7.2.1-ᒥ ᐊᒻᒪᓗ 7.22-ᒥ ᐊᑐᖅᑐᐊᖅᑎᐅᓗᑎᒃ ᐃᓱᒪᖅᓱᖅᓱᑎᒃ.
7.3.2
ᐃᓄᐃᑦ ᐊᑐᖅᑐᐊᕈᓐᓇᕐᓂᐊᖅᑐᑦ ᐃᓱᒪᖅᓱᕐᓗᑎᒃ ᑖᒃᑯᐊ ᐃᓄᐃᑦ ᓄᓇᓖᑦ ᑎᑎᖅᑲᐅᓯᐊᓐᖏᓂᕐᒥᓂ ᒐᕙᒪᒃᑯᖏᓐᓂᒃ ᑐᕌᒐᕆᔭᐅᓪᓗᓂ ᓄᓇᐅᑉ ᐊᑐᖅᑕᐅᓂᐊᕐᓄᖏᑦ ᐱᔾᔪᑎᖃᕐᓗᑎᒃ ᓄᓇᓕᕋᓛᖃᕐᕕᐅᓂᖏᑦ ᐊᑲᐅᓈᔾᔮᖏᑉᐸᑕ, ᐅᕝᕙᓗ ᓄᓇᒥᒃ ᓴᓂᕐᕙᐃᓯᒪᓚᕿᒐᔭᖅᐸᑕ ᐃᓄᐃᑦ ᐊᖑᓇᓱᒍᓐᓇᕐᓂᖏᓐᓄᑦ ᐱᕕᖃᖅᑎᑦᓯᒍᑕᐅᔪᓄᑦ 5.7.16-ᒥ. ᑎᑎᖅᑲᐅᓯᐊᓚᐅᕐᓗᑎᒃ, ᓄᓇᓖᑦ ᐱᕕᑦᓴᖃᑦᓯᐊᖅᑎᑕᐅᓂᐊᖅᑐᑦ ᓄᑦᑎᕈᓐᓇᖅᓯᑦᓯᐊᖁᓪᓗᒋᑦ ᓱᓇᒃᑯᑎᖏᑦ.
7.3.3
ᐃᓄᐃᑦ ᖃᐅᔨᒃᑲᐃᑉᐸᑕ ᒐᕙᒪᒃᑯᓐᓂᒃ ᓇᒥᓪᓚᕆᒃ ᓄᓇᖃᕐᓂᐊᕐᒪᖔᕐᒥᒃ ᒐᕙᒪᒃᑯᓪᓗ ᖃᐅᔨᒃᑲᐃᖏᑉᐸᑕ ᑎᑎᖅᑲᑎᒍᑦ ᐊᑐᖅᑕᐅᓂᐊᕐᓂᖏᓐᓂᒃ ᐅᕝᕙᓗ ᐱᔪᒪᔭᕆᔭᐅᓂᖓᓂᒃ ᐊᑲᐅᓈᓐᖏᒍᑕᐅᒐᔭᖅᑐᒥᒃ ᒫᓐᓇᒫᒃᑯᑦ ᓄᓇᓕᕋᓛᖅᑕᖃᖅᐸᑦ, ᐃᓄᐃᑦ, ᑕᐃᒪᐃᓕᖓᒐᓗᐊᖅᑎᓪᓗᒋᑦ 7.3.2-ᒥ, ᓄᓇᓕᖃᕈᓐᓇᖅᑐᖅ ᐊᕐᕌᒍᓪᓗᐊᖅ ᑎᑭᓪᓗᒍ ᒐᕙᒪᒃᑯᑦ ᑎᑎᕋᖅᓯᒪᓂᕆᔭᖏᑦ ᐊᑐᕋᔭᕐᓂᕐᒥᓄᑦ ᓄᓇᓂᒃ.
ᐃᓚᖓ 4
ᒐᕙᒪᒃᑯᑦ ᐊᑐᐃᓐᓇᐅᑦᓯᓂᐊᖅᑐᑦ ᓄᓇᓂᒃ
7.4.1
ᑐᑦᓯᕋᖅᑐᖃᓚᐅᖅᑎᓪᓗᒍ ᓄᓇᓕᕋᓛᕈᑐᐃᓐᓇᕆᐊᓕᓐᓂᒃ ᓇᓗᓇᐃᖅᑕᐅᓯᒪᔪᓂᓪᓘᓐᓃᑦ ᐃᓄᓐᓄᑦ ᑎᒥᖁᑕᐅᔪᓂᒃ ᑭᒡᒐᖅᑐᖅᑎᐅᓗᑎᒃ, ᓄᓇᕗᒻᒥ ᒐᕙᒪᒃᑯᑦ ᓄᓇᖁᑎᒥᓂᒃ ᐊᑐᐃᓐᓇᐅᑎᑦᓯᓂᐊᖅᐳᑦ ᓈᒻᒪᑦᓯᐊᖅᑐᓂᒃ, ᐊᑐᐃᓐᓇᐅᒍᓐᓇᑦᓯᐊᖅᑐᓂᒃ, ᓄᓇᓕᕋᓛᖃᕐᕕᐅᒍᓐᓇᑦᓯᐊᕐᓗᑎᒃ ᓄᓇᐃᑦ ᐊᑐᖅᑕᐅᔪᓐᓇᖅᐳᑦ ᐅᕝᕙᓘᓐᓃᑦ ᓚᐃᓴᓐᓯᒃᑯᑦ ᓇᔪᖅᑕᐅᓂᐊᕐᓂᖓᓄᑦ ᐅᕝᕙᓘᓐᓃᑦ ᐊᓯᐊᒍᑦ ᑖᓐᓇ ᐃᓛᒃᑰᖓᔪᖅ ᐊᑐᓕᖅᑎᑕᐅᒍᓐᓇᖅᓯᖁᓪᓗᒍ ᑐᕌᒐᖓᓄᑦ ᑕᒪᑐᒪ ᑎᑎᕋᖅᓯᒪᔫᑉ. ᐊᕐᕌᒍᓂᒃ ᑕᓪᓕᒪᓂᒃ ᐊᑐᖅᑐᐊᕈᓐᓇᖅᓱᑎᒃ ᐅᕝᕙᓘᓐᓃᑦ ᐊᑯᓂᐅᓂᖅᓴᐅᒍᓐᓇᖅᓱᓂ ᖃᓄᐃᒋᔭᐅᓐᖏᑐᐊᖅᐸᑦ. ᓄᑖᕈᖅᑎᑕᐅᓂᖓ ᐊᑐᖅᑐᐊᕈᑎᐅᑉ, ᑐᑦᓯᕋᖅᐸᑦ ᓇᔪᒐᖃᖅᑐᖅ ᐅᕝᕙᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑭᒡᒐᖅᑐᖅᑎᐅᓗᑎᒃ, ᓄᖅᑲᖓᑎᑕᐅᒋᐊᖃᓐᖏᑦᑐᑦ ᐱᔾᔪᑎᑦᓴᖃᑦᓯᐊᖏᓪᓗᑎᒃ. ᓄᓇᓕᕋᓛᖅᑖᕈᒪᔪᖃᖅᐸᑦ ᒥᓐᖑᐃᕐᓯᕐᕕᓐᓂ ᓴᐳᑎᔭᐅᓯᒪᔪᓂᓗ, 7.2.4 ᐊᑑᑎᓂᐊᖅᑐᖅ.
ᐃᓚᖓ 5
ᐃᓘᓐᓇᐃᓐᓅᖓᔪᑦ ᐱᔪᓐᓇᐅᑏᑦ
7.5.1
ᐃᓄᐃᑦ ᓄᓇᖃᖅᑐᖅ ᓄᓇᓕᑦᑖᖅᑐᓪᓘᓐᓃᑦ ᐊᑭᓖᒋᐊᑐᓐᖏᑦᑐᑦ, ᐊᑐᖅᑐᐊᕈᑎᓂᓪᓘᓐᓃᑦ ᑖᒃᓰᔭᕆᐊᑐᒐᑎᓪᓗ ᓄᓇᓕᖃᕐᓂᕐᒧᑦ ᓴᖅᑮᓂᕐᒧᓪᓘᓐᓃᑦ, ᐊᑦᑐᐊᔪᓄᑦ ᐱᔾᔪᑎᖃᕐᓗᑎᒃ ᐆᒪᔪᕋᓱᐊᓂᕐᒧᑦ.
7.5.2
ᑎᒍᒥᐊᖅᑎᐅᔪᑦ ᐱᔪᓐᓇᐅᑎᓂᒃ ᐃᑭᐊᖏᓐᓄᑦ ᓄᓇᐃᑦ ᓄᓇᓕᕋᓛᕐᓂ ᑕᐃᒫᑦᓴᐃᓐᓇᖅ ᖁᕕᐊᒋᓗᒋᑦ ᐊᑐᕐᓂᐊᖅᑐᑦ ᐱᔪᓐᓇᐅᑎᒥᓂᒃ ᐊᑐᐃᓐᓇᖃᕐᓂᕐᒧᑦ ᑕᐃᒫᑦᓴᐃᓐᓇᖅ ᓄᓇᐅᑉ ᐃᑭᐊᖓᓄᑦ ᐱᔪᓐᓇᐅᑎᓂᒃ ᑎᒍᒥᐊᖅᑎᐅᔪᑦ ᒪᓕᒐᖅᑎᒍᑦ.
7.5.3
ᐃᓘᓐᓇᐃᓐᓄᑦ ᑐᓐᖓᕕᐅᓪᓗᓂ, ᐃᓗᐊᓂ ᐊᐅᓚᓂᐅᔪᑦ ᐊᐅᓚᑕᐅᓂᖏᓪᓗ ᓄᓇᓕᕋᓛᑦ ᐃᓱᒪᖅᓲᑕᐅᓂᐊᖅᑐᑦ ᐃᓄᓐᓄᑦ ᓄᓇᓕᖃᖅᑐᓄᑦ ᓄᓇᓕᕋᓛᓂ.
ᐃᓚᖓ 6
ᐊᓯᖏᓐᓅᖓᔪᑦ
7.6.1
ᑲᑐᔾᔨᖃᑎᒌᖑᔪᑦ ᑎᒥᐅᔪᓪᓗ ᑎᒍᒥᐊᖅᑐᑦ ᐊᐅᓚᑕᐅᓂᖏᓐᓂᒃ ᐆᒪᔪᐃᑦ, ᓄᓇᐃᑦ, ᓄᓇᒥᐅᑕᐃᓪᓘᓐᓃᑦ ᐃᑭᕐᒦᑦᑐᓂᓪᓘᓐᓃᑦ ᐱᕕᖃᖅᑎᑦᓯᒍᑕᐅᔪᓂ ᐅᕘᓇ ᐊᖏᕈᑎᑎᒍᑦ ᐅᕝᕙᓗ ᒪᓕᒐᒃᑯᑦ ᐊᑑᑎᓂᐊᖅᑐᑦ ᓴᐳᔾᔨᒍᑕᐅᓗᑎᒃ ᐱᔪᒪᔭᕆᔭᐅᔪᓂᒃ ᖃᓄᐃᓐᖏᓐᓂᖏᓐᓂᓪᓗ ᐃᓄᐃᑦ ᓄᓇᖃᖅᑐᑦ ᓄᓇᓕᕋᓛᓂᒃ.
7.6.2
ᓇᐅᑐᐃᓐᓇᖅ ᐅᕙᓃᑦᑐᖅ ᐊᒋᕈᑎᒥ ᓄᖅᑲᖓᑎᑦᓯᒍᑕᐅᔾᔮᖏᑦᑐᖅ ᓄᓇᓕᕋᓛᓂᒃ ᓄᓇᓕᕈᕐᓂᖏᓐᓂ
7.6.3
ᐃᓄᐃᑦ ᓴᖅᑮᒍᓐᓇᖅᑐᑦ, ᑐᓐᖓᕕᖃᕐᓗᑎᒃ 7.2.4, ᓄᓇᓕᕋᓛᓂᒃ ᐃᑦᓴᕐᓂᑕᓕᓐᓂ. ᐸᐸᑦᓯᔨᒃᑯᑦ ᓴᖅᑮᑐᐃᓐᓇᕆᐊᓖᑦ ᐊᑐᐊᒐᕐᓂᒃ ᖃᐅᔨᒪᓕᑕᐅᔪᓂᒃ ᐊᑐᖅᑕᐅᓂᖏᓐᓄᑦ ᓇᔪᖅᑕᐅᓂᖏᓐᓄᓪᓗ ᐃᑦᓴᕐᓂᑕᖅᑕᓖᑦ. ᐸᐸᑦᓯᔩᑦ ᐋᖅᑮᑐᐃᓐᓇᕆᐊᖃᕐᒥᔪᑦ ᑐᑭᒋᔭᐅᔪᓂᒃ ᐃᒪᐃᓕᖓᓂᐅᔪᓂᓪᓗ ᐊᑐᖅᑕᐅᓂᖏᓐᓪᓄᑦ ᐃᓂᒋᔭᐅᓂᖏᓐᓄᓪᓗ ᐃᑦᓴᕐᓂᑕᕐᓄᑦ ᐃᓂᒋᔭᐅᔪᑦ.
