ᒥᓐᖑᐃᕐᓯᕐᕖᑦ
ᐃᓚᖓ 1
ᑐᑭᖏᑦ
8.1.1
ᐅᕙᓂ ᐃᓛᒃᑰᖅᑐᒥ:
“ᑲᓇᑕᒥ ᒥᓐᖑᐃᕐᓯᕐᕖᑦ ᐊᑦᑐᖅᑕᐅᓯᒪᓐᖏᑦᑐᓃᑦᑐᑦ ᓄᓇᓂ” ᑐᑭᓕᒃ ᐱᓱᑦᑎᓄᑦ ᓇᔪᒐᐅᔪᑦ ᓇᓗᓇᐃᔭᖅᑕᐅᓯᒪᓂᖏᑦ ᒪᓕᓪᓗᒋᑦ ᑲᓇᑕᒥ ᒥᓐᖑᐃᕐᓯᕐᕖᑦ ᐊᐅᓚᓂᖏᓐᓄᑦ ᐸᕐᓇᐅᑏᑦ 1990-ᒥ ᓴᖅᑭᖅᑕᐅᔪᑦ ᐊᕙᑎᓕᕆᔨᒃᑯᓐᓄᑦ ᑲᓇᑕᒥ;
“ᑭᓪᓕᓕᒃ I - ᖁᒥᐅᑕᐅᔪᑦ” ᑐᑭᓕᒃ ᓇᓗᓇᐃᖅᑕᐅᓯᒪᔪᑦ ᓄᓇᐃᑦ ᐃᓚᐃᓐᓇᖏᓪᓘᓐᓃᑦ ᓄᓇᐃᑦ ᖁᒥᐅᑕᐅᒪᒋᐊᓖᑦ ᐃᓗᓕᖃᕐᓂᖏᓐᓄᑦ ᐃᑲᔪᖅᓯᓂᖏᓐᓄᓘᓐᓃᑦ ᐊᔾᔨᐅᖏᑦᑐᓂᒃ, ᐱᑕᖃᕋᔪᐃᑦᑐᓂᒃ ᐅᕝᕙᓗ ᐅᓗᕆᐊᓇᖅᑐᒦᑦᑐᓂᒃ ᓄᓇᓂᒃ ᐱᐅᓂᖅᐸᐅᓂᖏᓐᓄᑦ ᐆᑦᑑᑎᑦᓯᐊᕙᐅᖁᓪᓗᒋᑦ ᐊᑦᑐᖅᑕᐅᒻᒪᐃᑦᑐᑦ;
“ᑭᓪᓕᓕᒃ II - ᑐᑭᓕᒃ ᓄᓇᐸᐅᔭᐃᑦ ᑭᒡᒐᖅᑐᐃᔾᔪᑕᐅᑦᓯᐊᖅᑐᑦ ᐊᑦᑐᖅᑕᐅᒻᒪᐃᑦᑐᓄᑦ ᓂᐊᖁᖅᑕᕆᔭᖏᓐᓂᒃ ᐱᐅᓯᐅᓯᒪᔪᓄᑦ ᒥᓐᖑᐃᕐᓯᕐᕖᑦ ᐊᒻᒪᓗ ᐃᓄᐃᓚᐅᖏᓐᓇᕐᓂᐊᖅᓱᑎᒃ.
ᐃᓚᖓ 2
ᑲᓇᑕᒥ ᒥᓐᖑᐃᓯᕐᕖᑦ
8.2.1 - ᐃᓘᓐᓇᐃᓐᓄᑦ ᐱᔭᐅᒍᒪᒐᔭᖅᑐᑦ
ᐱᔪᒥᓇᕐᒪᑦ ᓴᖅᑮᓂᖅ ᑲᓇᑕᒥ ᒥᓐᖑᐃᕐᓯᕐᕕᓐᓂᒃ ᑲᓇᑕᒥ ᒥᓐᖑᐃᕐᓯᕐᕕᖃᕐᕕᐅᔪᓂ ᐊᑦᑐᖅᑕᐅᒻᒪᐃᑦᑐᓂ 39, 38, 37, 36, 29, 26, 25, 17, 16 ᐊᒻᒪᓗ 15. ᑲᓇᑕᒥ ᒥᓐᖑᐃᕐᓯᕕᓐᓄᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᖃᕐᓂᐊᑦᑯᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ, ᐊᑦᑐᖅᑕᐅᓯᒪᔪᓂᒃ ᓄᓇᓕᓐᓂᒃ, ᐊᒻᒪᓗ ᐊᕕᑦᑐᖅᓯᒪᔪᓂ ᒐᕙᒪᐅᔪᓂᒃ ᓴᖅᑮᓗᑎᒃ ᑲᓇᑕᒥ ᒥᓐᖑᐃᕐᓯᕐᕕᓐᓂᒃ ᐱᔭᕆᐊᖃᖅᑎᑕᐅᔪᓂᒃ ᒐᕙᒪᒃᑯᖏᓐᓄᑦ ᑲᓇᑕᐅᑉ ᓄᓇᕗᒻᒥ ᐱᔭᕇᕈᑕᐅᓗᑎᒃ ᑭᒡᒐᖅᑐᖅᑕᐅᓂᖏᓐᓂᒃ ᑕᐃᒃᑯᐊ ᑲᓇᑕᒥ ᒥᓐᖑᐃᕐᓯᕐᕖᑦ ᐊᑦᑐᖅᑕᐅᒻᒪᐃᑦᑐᒦᑦᑐᑦ, ᐃᓕᑕᕆᓪᓗᒋᑦ ᑭᓯᐊᓂ ᑲᓇᑕᒥ ᒥᓐᖑᐃᕐᓯᕐᕕᓐᓂ ᐊᑦᑐᖅᑕᐅᒻᒪᐃᑦᑐᑦ 39, 37, ᐊᒻᒪᓗ 26 ᐃᓗᐊᓃᓐᓂᖏᑦ ᓄᓇᕗᑦ.
8.2.2 - ᐊᐅᔪᐃᑦᑐᕐᒥ ᑲᓇᑕᐅᑉ ᒥᓐᖑᐃᕐᓯᕐᕕᖓ
ᐊᐅᔪᐃᑦᑐᖅ ᑲᓇᑕᒥ ᒥᓐᖑᐃᕐᓯᕐᕕᒃ ᑲᓇᑕᒥ ᒥᓐᖑᐃᕐᓯᕐᕕᕈᕐᓂᐊᖅᑐᖅ ᓯᕗᓪᓕᖅᐹᒥ ᓇᓪᓕᐅᓂᖅᓯᐅᕐᓂᖃᓚᐅᖅᑎᓪᓗᒋᑦ ᐱᔭᕇᖅᑕᐅᓂᖏᓐᓂᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᑐᓐᖓᕕᒋᑦᓱᒋᑦ 8.4.4 ᐋᒡᒐᐅᒐᓗᐊᖅ ᓴᖅᑭᖅᑕᒥᓂᐅᑉᐸᑕ ᓯᕗᕐᖓᓂ ᐅᓪᓗᕐᒥ. ᐊᖏᖃᑎᒌᑦᑑᒃ ᑐᓂᓂᖃᖅᑑᒃ ᐅᖃᖃᑎᒌᓐᓂᕐᒧᑦ ᐱᔭᕇᕐᓗᑎᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᓐᓄᑦ ᐊᐅᔪᐃᑦᑐᖅ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᐊᕐᕌᒎᒃ ᒪᕐᕉᒃ ᐃᓗᐊᓂ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ. ᑭᓪᓕᒋᔭᐅᔪᑦ ᐊᐅᔪᐃᑦᑐᖅ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᐅᓪᓗᖓᓂ ᓴᖅᑭᖅᑕᐅᓂᖓᑕ ᑭᓪᓕᒋᔭᖏᑦᑕᓗ ᐊᐅᔪᐃᑦᑐᕐᒥ ᑲᓇᑕᐅᑉ ᒥᓐᖑᐃᕐᓯᕐᕕᖓᓄᑦ ᖁᒥᐅᑕᐅᔪᑦ ᐅᓪᓗᖓᓂ ᐊᖏᕈᑕᐅᓂᖓᑕ ᓇᓗᓇᐃᔭᖅᑕᐅᓂᐊᖅᑐᖅ 8-1-ᒥ.
8.2.2
ᐋᖅᑭᒋᐊᖅᑕᐅᔪᑦ P.C. 1996-1462. ᓯᑦᑕᕝᕙ 17, 1996
ᐊᐅᔪᐃᑦᑐᖅ ᑲᓇᑕᒥ ᒥᓐᖑᐃᕐᓯᕐᕕᒃ ᑲᓇᑕᒥ ᒥᓐᖑᐃᕐᓯᕐᕕᕈᕐᓂᐊᖅᑐᖅ ᓯᕗᓪᓕᖅᐹᒥ ᓇᓪᓕᐅᓂᖅᓯᐅᕐᓂᖃᓚᐅᖅᑎᓪᓗᒋᑦ ᐱᔭᕇᖅᑕᐅᓂᖏᓐᓂᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᑐᓐᖓᕕᒋᑦᓱᒋᑦ 8.4.4 ᐋᒡᒐᐅᒐᓗᐊᖅ ᓴᖅᑭᖅᑕᒥᓂᐅᑉᐸᑕ ᓯᕗᕐᖓᓂ ᐅᓪᓗᕐᒥ. ᐊᖏᖃᑎᒌᑦᑑᒃ ᑐᓂᓂᖃᖅᑑᒃ ᐅᖃᖃᑎᒌᓐᓂᕐᒧᑦ ᐱᔭᕇᕐᓗᑎᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᓐᓄᑦ ᐊᐅᔪᐃᑦᑐᖅ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᔪᓚᐃ 9, 1997 ᐅᖓᑖᓂᐅᓐᖏᑦᑐᖅ. ᑭᓪᓕᒋᔭᐅᔪᑦ ᐊᐅᔪᐃᑦᑐᖅ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᐅᓪᓗᖓᓂ ᓴᖅᑭᖅᑕᐅᓂᖓᑕ ᑭᓪᓕᒋᔭᖏᑦᑕᓗ ᐊᐅᔪᐃᑦᑐᕐᒥ ᑲᓇᑕᐅᑉ ᒥᓐᖑᐃᕐᓯᕐᕕᖓᓄᑦ ᖁᒥᐅᑕᐅᒪᔪᑦ ᐅᓪᓗᖓᓂ ᐊᖏᕈᑕᐅᓂᖓᑕ ᓇᓗᓇᐃᔭᖅᑕᐅᓯᒪᓂᐊᖅᑐᑦ ᐅᐃᒍ 8-1-ᒥ.
8.2.3 - ᑲᓇᑕᒥ ᒥᓐᖑᐃᕐᓯᕐᕕᒃ - ᐊᐅᔪᐃᑦᑑᑉ ᕿᑭᖅᑕᖓᓂ
ᐊᐅᔪᐃᑦᑐᕐᒥ ᑲᓇᑕᒥ ᒥᓐᖑᐃᓯᕐᕕᒻᒧᑦ ᖁᒥᐅᑕᐅᔪᖅ ᑲᓇᑕᒥ ᒥᓐᖑᐃᕐᓯᕐᕕᕈᕐᓂᐊᖅᐳᖅ ᓯᕗᓪᓕᖅᐹᒥ ᓇᓪᓕᐅᓂᖅᓯᐅᕐᓂᖃᓕᖅᐸᑦ ᐱᔭᕇᖅᑕᐅᓂᖓ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ ᑐᓐᖓᕕᒋᑦᓱᖏᑦ 8.4.4 ᐋᒡᒐᐅᒐᓗᐊᖅ ᓴᖅᑭᖅᑕᐅᓂᖅᐸᑦ ᐅᓪᓗᕐᒥ ᓯᕗᕐᖓᓂ. ᐊᖏᖃᑎᒌᑦᑑᒃ ᑐᓂᒪᓂᖃᖅᐴᒃ ᐋᖏᖃᑎᒌᓐᓂᕐᒧᑦ ᐱᔭᕇᕐᓂᕐᒧᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂᒃ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᐊᕐᕌᒎᒃ ᒪᕐᕉᒃ ᐃᓗᐊᓐᓂ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ. ᑭᓪᓕᒋᔭᖏᑦ ᑖᑦᓱᒪ ᑲᓇᑕᒥ ᒥᓐᖑᐃᕐᓯᕐᕕᐅᑉ ᓇᓗᓇᐃᔭᖅᑕᐅᓂᐊᑦᑐᑦ ᐅᐃᒍᒥ 8-2.
8.2.3
ᐋᖅᑭᒋᐊᖅᑕᐅᔪᑦ P.C. 1996-1462 ᓯᑦᑕᕝᕙ 17, 1996
ᐊᐅᔪᐃᑦᑐᕐᒥ ᑲᓇᑕᒥ ᒥᓐᖑᐃᓯᕐᕕᒻᒧᑦ ᖁᒥᐅᑕᐅᔪᖅ ᑲᓇᑕᒥ ᒥᓐᖑᐃᕐᓯᕐᕕᕈᕐᓂᐊᖅᐳᖅ ᓯᕗᓪᓕᖅᐹᒥ ᓇᓪᓕᐅᓂᖅᓯᐅᕐᓂᖃᓕᖅᐸᑦ ᐱᔭᕇᖅᑕᐅᓂᖓ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ ᑐᓐᖓᕕᒋᑦᓱᖏᑦ 8.4.4 ᐋᒡᒐᐅᒐᓗᐊᖅ ᓴᖅᑭᖅᑕᐅᓂᖅᐸᑦ ᐅᓪᓗᕐᒥ ᓯᕗᕐᖓᓂ. ᐊᖏᖃᑎᒌᑦᑑᒃ ᑐᓂᒪᓂᖃᖅᐴᒃ ᐋᖅᑮᖃᑎᒌᓐᓂᕐᒧᑦ ᐱᔭᕇᕐᓂᕐᒧᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂᒃ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᒥᑦᓯᑎᓐᓂ ᔪᓚᐃ 9, 1997. ᑭᓪᓕᒋᔭᖏᑦ ᑖᑦᓱᒪ ᑲᓇᑕᒥ ᒥᓐᖑᐃᕐᓯᕐᕕᐅᑉ ᓇᓗᓇᐃᔭᖅᑕᐅᓂᐊᑦᑐᑦ ᐅᐃᒍᒥ 8-2.
8.2.4 - ᑲᓇᑕᒥ ᒥᓐᖑᐃᕐᓯᕐᕕᒃ - ᐅᐊᓐᓇᖓᓂ ᕿᑭᖅᑖᓘᑉ
ᒐᕙᒪᒃᑯᑦ ᐊᐅᓚᑦᓯᔨᖏᓐᓄᑦ ᐱᔭᐅᔪᑦ P.C. 1992-345 ᐅᓪᓗᖓ ᕕᕝᕗᐊᕆ 25, 1992 ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᐅᐊᓐᓇᖓᓂ ᕿᑭᖅᑖᓘᑉ ᑲᓇᑕᒥ ᒥᓐᖑᐃᕐᓯᕐᕕᕈᕐᓂᐊᖅᑐᖅ ᓯᕗᓪᓕᖅᐹᒥ ᓇᓪᓕᐅᓂᖅᓯᐅᕐᓂᖃᖅᑎᓪᓗᒍ ᐱᔭᕇᖅᑕᐅᓚᐅᖅᑎᓪᓗᒍ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ ᑐᓐᖓᕕᒋᑦᓱᒍ 8.4.4 ᐋᒡᒐᐅᒐᓗᐊᖅ ᓴᖅᑭᖅᑕᐅᓂᖅᐸᑦ ᐅᓪᓗᕐᒥ ᓯᕗᕐᖓᓂ. ᐊᖏᖃᑎᒌᑦᑑᒃ ᑐᓂᒪᓂᖃᖅᑑᒃ ᐋᔩᖃᑎᒌᓐᓂᕐᒧᑦ ᐱᔭᕇᕐᓂᕐᒧᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂᒃ ᑖᑦᓱᒧᖓ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ ᐊᕐᕌᒍᐃᑦ ᐱᖓᓱᑦ ᐃᓗᐊᓐᓂ ᐊᖏᕈᑕᐅᓚᐅᖅᑎᓪᓗᒍ ᐅᓇ ᐊᖏᕈᑎ. ᑭᓪᓕᖏᑦ ᑖᑦᓱᒪ ᑲᓇᑕᒥ ᒥᖑᐃᕐᓯᕐᕕᐅᑉ ᐅᓪᓗᖓᓂ ᓴᖅᑭᖅᑕᐅᓂᖓᑕ ᓇᓗᓇᐃᔭᖅᑕᐅᓯᒪᓂᐊᖅᑐᑦ ᒐᕙᒪᒃᑯᑦ ᐊᐅᓚᑦᓯᔨᖏᓐᓄᑦ ᐋᒡᒐᐅᒐᓗᐊᖅ ᐊᓯᐊᒍᑦ ᐊᖏᖃᑎᒌᒍᑕᐅᓯᒪᑉᐸᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ.
8.2.5 - ᑲᓇᑕᒥ ᒥᓐᖑᐃᕐᓯᕐᕕᒻᒥᒃ ᑐᑦᓯᕋᐅᑎ - ᐅᒃᑯᓯᒃᓴᓕᒃ
ᐃᓕᑕᕆᓪᓗᒋᑦ ᓄᓇᖁᑎᖏᑦ ᐃᓄᐃᑦ RE-31/56H ᐊᒻᒪᓗ RE-32/56H ᐃᓗᐊᓃᑐᐃᓐᓇᕆᐊᖃᕆᐊᖏᑦ ᑭᓪᓕᖏᒃᑕ ᑐᑦᓯᕌᖑᑐᐃᓐᓇᕆᐊᓖᑦ ᑲᓇᑕᒥ ᒥᓐᖑᐃᕐᓯᕐᕕᐅᓂᕐᒧᑦ ᐅᒃᑯᓯᒃᓴᓕᒻᒥ, ᒐᕙᒪᒃᑯᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐃᓱᒪᒋᔭᖃᕐᓂᐊᖅᑐᑦ ᑕᐅᖅᓰᓂᐅᑐᐃᓐᓇᕆᐊᓕᖏᓐᓂᒃ ᐃᓚᖏᓐᓂᒃ ᑕᐃᒃᑯᐊ ᓄᓇᐃᑦ ᐊᓯᖏᓐᓄᑦ ᓄᓇᓄᑦ ᐃᓱᒪᓯᐅᕆᓂᕐᒧᑦ ᐊᐅᓚᓂᖅᑕᖃᖅᑎᓪᓗᒍ ᑎᑭᐅᑎᕙᓪᓕᐊᒍᑕᐅᔪᒥᒃ ᖃᓄᖅᑑᕈᑕᐅᓂᖓᓄᑦ ᒥᓐᖑᐃᕐᓯᕐᕕᒻᒥᒃ ᓴᖅᑮᓂᐅᑉ. ᓇᐅᑐᐃᓐᓇᐃᑦ ᓄᓇᐃᑦ ᐱᔭᐅᔪᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᑕᐅᖅᓰᓂᐅᔪᒥ ᑕᐃᔭᐅᓂᐊᖅᑐᑦ ᐃᓄᓐᓄᑦ ᓄᓇᖁᑕᐅᒋᐊᖏᑦ ᐊᒻᒪᓗ ᓇᐅᑐᐃᓐᓇᐃᑦ ᓄᓇᐃᑦ ᑕᐅᖅᓰᒍᑕᐅᔪᑦ ᐃᓄᓐᓄᑦ ᓄᓇᖁᑎᒋᔭᐅᒍᓐᓃᕐᓂᐊᖅᑐᑦ.
8.2.6 - ᐊᓯᔾᔨᕐᓂᐅᔪᑦ ᑲᓇᑕᒥ ᒥᓐᖑᐃᕐᓯᕐᕕᓐᓄᑦ
ᒐᕙᒪᒃᑯᖏᑦ ᑲᓇᑕᐅᑉ ᖃᖓᑐᐃᓐᓇᖅ ᐋᖅᑭᒋᐊᕆᒍᒪᒍᑎᒃ ᑭᓪᓕᒋᔭᐅᔪᓂᒃ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ, ᐅᕝᕙᓗ ᐊᐅᓚᓂᖃᖅᐸᑕ, ᓄᓇᓂᒃ ᐲᖅᓯᓗᑎᒃ ᑲᓇᑕᒥ ᒥᓐᖑᐃᕐᓯᕐᕕᒻᒥᒃ, ᐃᒪᐃᓐᓂᐊᖅᑐᑦ:
(a)
ᓯᕗᓪᓕᕐᒥ ᐃᓗᓕᖅᑐᔪᒥᒃ ᐊᐅᓚᓂᖃᕐᓗᑎᒃ ᑭᓇᒃᑯᑐᐃᓐᓇᕐᓂᒃ ᐃᓱᒪᓯᐅᕆᓗᑎᒃ; ᐊᒻᒪᓗ
(b)
ᒪᓂᒪᑎᓪᓗᒋᑦ ᓄᓇᐃᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ
(i)
ᐊᑭᓪᓗᐊᖏᓐᓂᒃ ᐊᑭᖃᕐᓗᑎᒃ ᒐᕙᒪᒃᑯᑦ ᑲᓇᑕᒥ ᓴᒃᑯᐃᓂᐊᖅᐸᑕ ᓄᓇᒥᒃ, ᐅᕝᕙᓗ
(ii)
ᓂᕈᐊᕐᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᑕᐅᖅᓰᓗᑎᒃ ᑕᐃᒪᐃᓪᓗᐊᒐᓚᖓᓄᑦ ᐊᑭᖏᑦᑕ ᐃᓄᐃᑦ ᓄᓇᖁᑎᖏᑦᑕ; ᑭᓯᐊᓂ ᑕᒪᓐᓇ ᓂᕈᐊᕐᓂᖅ ᐊᑑᑎᔾᔮᖏᑦᑐᖅ ᒐᕙᒪᒃᑯᑦ ᑲᓇᑕᒥ ᐲᖅᓯᒍᒫᕐᓂᐊᖅᐸᑕ ᓄᓇᒥᒃ ᑲᓇᑕᒥ ᒥᓐᖑᐃᕐᓯᕐᕕᒻᒥᒃ ᐱᔾᔪᑎᑐᐊᖑᓪᓗᓂ ᓴᖅᑮᓂᖅ ᓇᒻᒥᓂᖅ ᐃᓪᓗᖁᑎᒥᓐᓂᒃ ᐊᐅᓚᓂᐅᔪᓂᓪᓘᓐᓃᑦ ᓄᓇᒥ ᐅᖃᐅᓯᐅᔪᒥ.
8.2.7
8.2.6(b) ᐊᑑᑎᔾᔮᖏᑦᑐᖅ ᑕᕆᐅᕐᓄᑦ ᐃᓗᐊᓃᑦᑐᓄᑦ ᑲᓇᑕᒥ ᒥᓐᖑᐃᕐᓯᕐᕕᐅᑉ.
8.2.8 - ᒥᓐᖑᐃᕐᓯᕐᕕᓐᓂᒃ ᐊᐅᓚᑦᓯᓂᖅ
ᑐᓐᖓᕕᒋᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂ ᐊᑦᑐᐊᔪᑦ ᑲᓇᑕᒥ ᒥᓐᖑᐃᕐᓯᕐᕕᒻᒧᑦ, ᐊᑐᓂᑦ ᑲᓇᑕᒥ ᒥᓐᖑᐃᕐᓯᕐᕖᑦ ᓄᓇᕗᒻᒥ ᐃᓗᓕᖃᕐᓂᐊᖅᑐᑦ ᐊᓚᒡᒐᐃᑦᑐᒥᒃ ᑭᓪᓕᓕᒻᒥᒃ I - ᐊᔾᔨᐅᖏᑦᑐᒥᒃ ᓴᐳᑎᔭᐅᓯᒪᓂᖅ ᐊᒻᒪᓗ ᑭᓪᓕᓕᒃ II - ᐃᓄᖃᓐᖏᑦᑐᖅ.
8.2.9
ᓴᖅᑭᖅᑕᐅᓂᖏᑦ ᓄᑖᑦ ᑲᓇᑕᒥ ᒥᓐᖑᐃᕐᓯᕐᕖᑦ ᓄᓇᕗᒻᒥ ᑭᖑᓂᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ ᑐᓐᖓᕕᖃᕐᓂᐊᑦᑐᑦ ᐃᓛᒃᑯᑦ 11-ᒥᒃ ᐊᒻᒪᓗ 12-ᒥᒃ, ᑭᓯᐊᓂ ᑕᐃᒃᑯᐊ ᐃᓛᒃᑰᖅᑐᑦ ᐊᑑᑎᔾᔮᖏᑦᑐᑦ ᐊᐅᔪᐃᑦᑐᕐᒧᑦ, ᐊᐅᔪᐃᑦᑑᑉ ᕿᑭᖅᑕᖓᓄᑦ ᐅᕝᕙᓗ ᐅᐊᓐᓇᖓᓂ ᕿᑭᖅᑖᓘᑉ ᒥᓐᖑᐃᕐᓯᕐᕕᓐᓄᑦ.
8.2.10
ᐃᓛᒃᑰᖅᑐᖅ 11 ᐊᑑᑎᔾᔮᖏᑦᑐᖅ ᐅᕝᕙᓗ ᐃᓗᐊᓂ ᑭᓪᓕᖏᑦᑕ ᑲᓇᑕᒥ ᒥᓐᖑᐃᕐᓯᕐᕖᑦ, ᓴᖅᑭᖅᑕᐅᓯᒪᓕᑐᐊᖅᐸᑕ.
8.2.11
ᐃᓛᒃᑰᖅᑐᖅ 12 ᐊᑑᑎᓂᐊᖅᑐᖅ ᐊᐅᓚᓂᐅᔪᑦ ᑐᑦᓯᕋᐅᑎᓄᑦ ᑲᓇᑕᒥ ᒥᓐᖑᐃᕐᓯᕐᕕᓐᓂ.
8.2.12
ᐃᒪᕐᒥᒃ ᐊᑐᕐᓂᖅ ᑲᓇᑕᒥ ᒥᓐᖑᐃᕐᓯᕐᕕᓐᓂ ᐊᐅᓚᑕᐅᓂᐊᖅᑐᖅ ᑐᓐᖓᕕᖃᕐᓗᑎᒃ ᒥᓐᖑᐃᕐᓯᕐᕕᓐᓂᒃ ᐊᐅᓚᑦᓯᓂᕐᒧᑦ ᐸᕐᓇᐅᑎᓂᒃ ᒪᓕᒐᕐᓂᓪᓗ ᐃᓘᓐᓇᐃᓐᓄᑦ ᐊᑦᑐᐊᔪᓂᒃ. ᑎᒍᒥᐊᕐᓂᖏᑦ ᓄᓇᕗᒻᒥ ᐃᒪᓕᕆᔨᒃᑯᑦ ᐃᓗᐊᓐᓂ ᑲᓇᑕᒥ ᒥᓐᖑᐃᕐᓯᕐᕖᑦ ᓇᓗᓇᐃᖅᑕᐅᓯᒪᓂᐊᖅᑐᑦ ᑖᒃᑯᓄᖓᓪᓗᐊᖅ ᒪᓕᒐᕐᓄᑦ. ᐃᒪᕐᒥᒃ ᐊᑐᕐᓂᖅ ᑲᓇᑕᒥ ᒥᓐᖑᐃᕐᓯᕐᕕᓐᓂ ᐊᑦᑐᐃᓂᖃᖅᐸᑦ ᐃᓄᐃᑦ ᐃᒪᕐᒧᑦ ᐱᔪᓐᓇᐅᑎᖏᓐᓄᑦ ᐃᓄᐃᑦ ᓄᓇᖁᑎᖏᓐᓂ, ᐃᓄᐃᑦ ᐊᑭᓕᖅᑕᐅᒍᓐᓇᕆᐊᖃᕐᓂᐊᖅᑐᖅ ᑐᓐᖓᕕᒋᓗᒋᑦ ᐋᖅᑭᑦᑕᐅᓯᒪᓂᖏᑦ ᐃᓛᒃᑯᑦ 20-ᒥ ᐅᕝᕙᓗ ᑖᒃᑯᓇᓂᓪᓗᐊᖅ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑎᖏᓐᓂ.
ᐃᓚᖓ 3
ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ
8.3.1 - ᐃᓘᓐᓈᒍᑦ ᐱᔪᒪᔭᕆᔭᐅᔪᑦ
ᐱᔪᒥᓇᕐᒪᑦ ᓴᖅᑮᓂᖅ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓂᒃ ᓄᓇᕗᒻᒥ.
8.3.2
ᖃᖓᑐᐃᓐᓇᑦᓯᐊᖅ ᐊᕕᑦᑐᖅᓯᒪᔪᓂ ᒐᕙᒪᐃᑦ ᐋᖅᑭᒋᐊᕆᒍᒫᕐᓂᐊᖅᐸᑕ ᑭᓪᓕᒋᔭᐅᔪᓂᒃ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓄᑦ, ᐊᓯᐊᒍᓪᓘᓐᓃᑦ ᐊᐅᓚᓂᖃᕈᑎᒃ, ᐲᖅᓯᓗᑎᒃ ᓄᓇᓂᒃ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓂ, ᐃᒪᐃᓐᓂᐊᖅᑐᖅ:
(a)
ᓯᕗᓪᓕᕐᒥ ᐊᐅᓚᓂᖃᕐᓗᓂ ᐃᓗᓕᖅᑐᔪᒥᒃ ᐊᐅᓚᓂᕐᒥᒃ ᐃᓱᒪᓯᐅᕆᓗᑎᒃ ᐃᓄᓐᓂᒃ; ᐊᒻᒪᓗ
(b)
ᒪᓂᒪᑎᑦᓯᓗᑎᒃ ᓄᓇᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑎᒋᔭᐅᔪᓄᑦ
(i)
ᐊᑭᖃᑦᓯᐊᕐᓗᓂ ᐊᕕᑦᑐᖅᓯᒪᔪᓂ ᒐᕙᒪᐃᑦ ᓴᒃᑯᐃᓚᖓᑉᐸᑕ ᓄᓇᓂᒃ, ᐅᕝᕙᓗ
(ii)
ᓂᕈᐊᕐᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᑕᐅᖅᓰᓗᑎᒃ ᐊᔾᔨᓪᓗᐊᒐᓚᖏᓐᓂᒃ ᐃᓄᐃᑦ ᓄᓇᖁᑎᖏᓐᓂᒃ; ᑭᓯᐊᓂ ᑖᓐᓇ ᓂᕈᐊᕐᓂᖅ ᐊᑑᑎᔾᔮᖏᑦᑐᖅ ᐊᕕᑦᑐᖅᓯᒪᔪᓂ ᒐᕙᒪᐃᑦ ᐲᖅᓯᒍᒫᕐᓂᐊᖅᐸᑕ ᓄᓇᓂᒃ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓂᒃ ᐱᔾᔪᑎᑐᐊᕆᓪᓗᒍ ᓴᖅᑮᓂᖅ ᓇᒻᒥᓂᖅ ᐃᓪᓗᖁᑎᒥᓐᓂᒃ ᐊᐅᓚᓂᕆᔭᒥᓂᓪᓘᓐᓃᑦ ᓄᓇᒥ ᑲᒪᒋᔭᐅᔪᒥ.
8.3.3
8.3.2(b) ᐊᑑᑎᔾᔮᖏᑦᑐᖅ ᑕᕆᐅᕐᓄᑦ ᐃᓗᐊᓂ ᐊᕕᑦᑐᖅᓯᒪᔪᑦ ᒥᓐᖑᐃᕐᓯᕐᕖᑦ.
8.3.4 - ᐃᓚᐅᑎᑕᐅᓂᖏᑦ ᐃᓄᐃᑦ - ᐃᓘᓐᓇᒍᑦ
ᐊᕕᑦᑐᖅᓯᒪᔪᓂ ᒐᕙᒪᐃᑦ ᐃᓄᐃᓪᓗ ᐊᖏᖃᑎᒌᑉᐳᑦ ᐃᓘᓐᓈᒍᑦ ᐱᔪᒥᓇᕆᐊᖓ ᐃᓚᐅᑎᑦᓯᓂᖅ ᐃᓄᓐᓂᒃ, ᐊᓯᖏᓐᓂᓪᓗ ᓄᓇᓕᐅᖃᑕᐅᔪᓂᒃ, ᐸᕐᓇᑕᐅᓂᖏᓐᓄᒃ ᐊᐅᓚᑕᐅᓂᖏᓐᓄᓪᓗ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ ᓄᓇᕗᒻᒥ. ᑕᐃᒪᐃᓐᓂᖓᓄᑦ, ᕐᑳᖓᒍᒃᑲᓐᓂᖅ ᐊᓯᓕᒫᖏᑦᑕ ᐱᔪᓐᓇᐅᑎᖏᑦᑕ ᐱᕚᓪᓕᕈᑎᑦᓴᖏᑦᑕᓗ, ᐃᓄᐃᑦ ᐊᓯᖏᓪᓗ ᓄᓇᓕᐅᖃᑕᐅᔪᑦ ᓄᓇᕗᒻᒥ ᐃᓚᐅᓂᐊᖅᑐᑦ ᐸᕐᓇᑕᐅᓂᖏᓐᓄᑦ ᐊᐅᓚᑕᐅᓂᖏᓐᓄᓪᓗ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ ᓄᓇᕗᒻᒥ.
8.3.5 - ᒥᓐᖑᐃᕐᓯᕐᕕᓐᓂᒃ ᐊᐅᓚᑦᓯᓂᖅ
ᓴᖅᑭᖅᑕᐅᓂᖏᑦ ᓄᑖᑦ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ ᓄᓇᕗᒻᒥ ᑭᖑᓂᖓᓂ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ ᐊᑦᑐᐊᓂᖃᕐᓂᐊᑦᑐᑦ ᐃᓛᒃᑯᑦ 11-ᒧᑦ 12-ᒧᓪᓗ.
8.3.6
ᐃᓛᒃᑰᖅᑐᖅ 11 ᐊᑑᑎᔾᔮᖏᑦᑐᖅ ᐅᕝᕙᓗ ᐃᓗᐊᓃᑦᑐᓄᑦ ᑭᓪᓕᖏᑦᑕ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ ᓴᖅᑭᖅᑕᐅᓯᒪᓕᑐᐊᖅᐸᑕ.
8.3.7
ᐃᓛᒃᑰᖅᑐᖅ 12 ᐊᑑᑎᓂᐊᖅᑐᖅ ᐊᐅᓚᓂᐅᔪᓄᑦ ᑐᑦᓯᕋᐅᑎᓄᑦ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓂ.
8.3.8
ᐃᓛᒃᑰᖅᑐᖅ 13 ᐊᒻᒪᓗ 20 ᐊᑑᑎᓂᐊᖅᑐᑦ ᐃᒪᕐᓄᑦ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓂ ᓄᓇᕗᒻᒥ.
8.3.9
ᐊᕕᑦᑐᖅᓯᒪᔪᓂ ᒐᕙᒪᐃᑦ ᐊᒻᒪᓗ ᐊᑦᑐᖅᑕᐅᓯᒪᔪᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖃᑎᒌᑉᐸᑎᒃ, ᐋᔩᖃᑎᒌᒍᓐᓇᖅᑑᒃ ᐃᓄᓐᓂᒃ ᐃᓚᐅᖁᔨᓗᑎᒃ ᐸᕐᓇᑕᐅᓂᖏᓐᓂ ᐊᐅᓚᑕᐅᓂᖏᓐᓂᓗ ᐊᕕᑦᑐᖅᓯᒪᔪᓂ ᒥᓐᖑᐃᓯᕐᕖᑦ ᐊᕕᑦᑐᖅᓯᒪᔪᑦ ᐊᕕᑦᑐᖅᓯᒪᔪᓂᓘᓐᓃᑦ ᒥᓐᖑᐃᕐᓯᕐᕕᑦᑎᒍᑦ.
8.3.10 - ᑐᑦᓯᕌᖑᓯᒪᔪᖅ ᑲᑕᓐᓂᓕᒃ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᒃ
ᑐᑦᓯᕌᖑᓯᒪᔪᖅ ᑲᑕᓐᓂᓕᒃ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᒃ ᓴᖅᑭᖅᑕᐅᑉᐸᑦ ᓯᕗᕐᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ ᑎᒍᔭᐅᖁᓪᓗᒍ ᐃᓄᐃᑦ ᓄᓇᖁᑎᖓᑦ LH-5/25K, ᓴᖅᑭᖅᑕᐅᓂᖓ ᖃᓄᓕᒫᖅ ᐊᐳᖅᑕᕈᑕᐅᔾᔮᖏᑦᑐᖅ ᐱᔪᓐᓇᐅᑎᓄᑦ ᐊᑐᐃᓐᓇᖃᕐᓂᕐᒧᑦ ᐱᓯᒪᔪᓂᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ, ᐱᔾᔪᑕᐅᓪᓗᓂ ᓇᒻᒥᓂᕆᔭᐅᓂᖏᑦ ᐅᔭᕋᑦᓯᐊᕙᐃᑦ, ᒪᓕᒐᖅᑎᒍᑦ ᐊᒻᒪᓗ ᐃᓕᑕᕆᔭᐅᓯᒪᓂᖓᒍᑦ ᐊᖏᕈᑎᑎᒍᑦ, ᑭᓯᐊᓂ ᐊᑐᐃᓐᓇᖃᕐᓂᐅᔪᑦ ᑐᓐᖓᕕᖃᕐᓂᐊᑦᑐᑦ ᒪᓕᒐᕐᓂᒃ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᓂ ᐊᑦᑐᐊᔪᓂᒃ ᓴᐳᑎᔭᐅᓂᖓᓄᑦ ᐊᕙᑎᐅᑉ ᐊᒻᒪᓗ ᓱᓕᔪᕐᓇᕐᓂᖓᓄᑦ ᒥᓐᖑᐃᕐᓯᕐᕕᐅᑉ.
8.3.11
ᑐᑦᓯᕌᖑᓯᒪᔪᖅ ᑲᑕᓐᓂᓕᒃ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᒃ ᓴᖅᑭᖅᑕᐅᖏᑉᐸᑦ ᓯᕗᕐᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ ᐱᔪᓐᓇᕐᓂᖃᕐᓂᐊᖅᑐᖅ ᑎᒍᓯᓂᕐᒧᑦ, ᐃᓄᐃᑦ ᓄᓇᖁᑎᖏᓐᓂᒃ ᒪᓕᓪᓗᑎᒃ ᓇᓗᓇᐃᔭᖅᑕᐅᔪᓂᒃ 19.2.1(b)-ᒥ, ᓇᐅᑐᐃᓐᓇᐃᑦ ᐃᓘᓐᓇᑎᓪᓘᓐᓃᑦ ᐃᓄᐃᑦ ᓄᓇᖁᑎᖏᑦᑕ ᓇᓗᓇᐃᔭᖅᑕᐅᓂᖏᑦ LH-25K-01, LH-25K-01(SS01) ᐊᒻᒪᓗ LH-25N-01 ᑕᐃᒫᒃ ᑕᑯᑦᓴᐅᑎᑕᐅᒻᒪᑕ ᒪᕐᕉᓐᓂ ᓄᓇᓐᖑᐊᓂ ᑕᐃᔭᐅᔪᓂ ᐃᓄᐃᑦ ᓄᓇᖁᑎᖏᓐᓂᒃ ᓄᓗᓇᐃᖅᓯᓂᖅ ᐃᓕᓯᔪᖃᓚᐅᖅᑎᓪᓗᒍ ᑎᑎᕋᖅᑕᐅᕕᒻᒧᑦ ᑕᐅᖅᓰᓗᑎᒃ ᐊᔾᔨᓗᐊᖓᓂᒃ ᐃᓄᐃᑦ ᓄᓇᖁᑎᖏᓐᓂᒃ ᐃᓗᐊᓂ ᓂᒋᐊᑕ ᕿᑭᖅᑖᓗᒻᒥ ᓄᓇᒥᒃ ᐊᑐᕐᓂᕐᒧᑦ ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑦ ᐅᐃᒍ 19-3-ᒥ.
ᐃᓚᖓ 4
ᐃᓘᓐᓇᐃᓐᓄᑦ ᐱᕕᖃᖅᑎᑦᓯᓂᐅᔪᑦ ᐊᑦᑐᐊᔪᓄᑦ ᑕᒪᒃᑮᓐᓄᑦ ᑲᓇᑕᒥ ᐊᕕᑦᑐᖅᓯᒪᔪᓂᓗ ᒥᓐᖑᐃᕐᓯᕐᕕᓐᓄᑦ
8.4.1 - ᐃᓘᓐᓈᒍᑦ
ᐅᓇ ᐊᑑᑎᓂᐊᖅᑐᖅ ᑲᓇᑕᒥ ᒥᓐᖑᐃᕐᓯᕐᕕᓐᓄᑦ ᓴᖅᑭᖅᑕᐅᔪᓄᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐊᕕᑦᑐᖅᓯᒪᔪᓂᓗ ᒥᓐᖑᐃᕐᓯᕐᕖᑦ ᓴᖅᑭᖅᑕᐅᔪᑦ ᐊᕕᑦᑐᖅᓯᒪᔪᓂ ᒐᕙᒪᓄᑦ
8.4.2 - ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ
ᓇᐅᑐᐃᓐᓇᕐᒥᒃ ᒥᓐᖑᐃᕐᓯᕐᕕᒻᒥᒃ ᓴᖅᑭᖅᑕᐅᔪᖃᕆᐊᖃᓐᖏᑦᑐᖅ ᓄᓇᕗᒻᒥ ᐊᑑᑎᒋᐊᓖᑦ ᓇᓗᓇᐃᔭᖅᑕᐅᓯᒪᔪᑦ 8.4.4-ᒥ ᐊᒻᒪᓗ 8.4.5-ᒥ ᒪᓕᑦᑕᐅᓯᒪᒐᓗᐊᕐᒪᖔᑕ.
8.4.3
ᒐᕙᒪᒃᑯᖏᑦ ᑲᓇᑕᐅᑉ, ᐊᕕᑦᑐᖅᓯᒪᔪᓂ ᒐᕙᒪᐃᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖃᑎᒌᑉᐸᑕ, ᐊᕕᑦᑐᖅᓯᒪᔪᓂ ᒐᕙᒪᐃᑦ ᐃᓚᒋᔭᐅᒍᓐᓇᖅᑐᑦ ᐋᔩᕈᑕᐅᓂᖏᓐᓄᑦ ᐱᔭᕇᖅᑕᐅᓂᖏᓐᓄᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎ ᐊᑦᑐᐊᔪᖅ ᑲᓇᑕᒥ ᒥᓐᖑᐃᕐᓯᕐᕕᓐᓄᑦ.
8.4.4
ᓯᕗᕐᖓᓂ ᓴᖅᑭᖅᑕᐅᓂᖓᑕ ᒥᓐᖑᐃᕐᓯᕐᕕᐅᑉ ᓄᓇᕗᒻᒥ, ᒐᕙᒪᒃᑯᑦ ᑎᒍᒥᐊᖅᑐᑦ ᓴᖅᑭᖅᑕᐅᓂᖓᓂᒃ ᒥᓐᖑᐃᕐᓯᕐᕕᐅᑉ, ᐊᒻᒪᓗ ᒐᕙᒪᒃᑯᒋᑉᐸᒋᑦ ᑲᓇᑕᐅᑉ, ᑲᓇᑕᒥ ᒥᓐᖑᐃᕐᓯᕐᕕᓐᓄᑦ ᐱᔨᑦᓯᕋᖅᑏᑦ ᑲᑐᔾᔨᖃᑎᖃᕐᓗᑎᒃ ᐊᓯᖏᓐᓂᒃ ᐊᑦᑐᖅᑕᐅᒪᔪᓂᒃ ᒐᕙᒪᑐᖃᒃᑯᓐᓂ ᑎᒥᐅᔪᓂᒃ, ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐋᔩᕋᕐᓂᐊᖅᑐᑦ, ᐱᑦᓯᐊᕐᓗᑎᒃ, ᐱᔾᔪᓴᖁᓪᓗᓂ ᐱᔭᕇᖅᑕᐅᓂᖓ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ. ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ ᐋᔩᕋᕈᑕᐅᔪᖅ ᐊᑖᓂ ᐆᒪ ᐃᓛᒃᑰᖅᑑᑉ ᐱᖃᓯᐅᔾᔨᓂᐊᖅᑐᖅ ᓇᐅᑐᐃᓐᓇᕐᒥᒃ ᐊᐅᓚᓂᐅᔪᒥᒃ ᐊᑦᑐᐊᔪᒥᒃ ᑐᑦᓯᕌᖓᔪᒧᑦ ᒥᓐᖑᐃᕐᓯᕐᕕᒻᒧᑦ ᐊᑦᑐᐃᓂᕐᓗᓐᓂᖃᕋᔭᖅᑐᒧᑦ ᐃᓄᓐᓂᒃ, ᐅᕝᕙᓗ ᓈᒻᒪᓈᖅᑐᓂᒃ ᐱᕚᓪᓕᕈᑕᐅᒍᓐᓇᖅᑐᓄᑦ ᐃᓄᓐᓄᑦ ᓇᓪᓕᑐᐃᓐᓇᖏᓐᓂ ᓄᓇᕗᓕᒫᒥ, ᐊᕕᑦᑐᖅᓯᒪᔪᓂᓗ ᓄᓇᓕᓐᓂᓗ. ᐱᓗᐊᖅᑐᒥᕐ, ᑭᓯᐊᓂ ᑭᓪᓕᖃᓐᖏᒃᑲᓗᐊᖅᓱᑎᒃ ᐃᓘᓐᓇᐃᓐᓅᖓᔪᑦ ᐅᑯᐊ, ᐊᐅᓚᓂᐅᔪᑦ ᓇᓗᓇᐃᖅᑕᐅᔪᑦ ᐅᐃᒍ 8-3-ᒥ ᐃᓱᒪᒋᔭᐅᓂᐊᖅᑐᑦ ᓈᒻᒪᑦᑑᒋᐊᖏᑦ ᐋᔩᕋᕈᑎᒋᓗᒋᑦ ᐃᓚᒍᑦᓯᐅᔾᔭᐅᓪᓗᑎᓪᓗ ᐃᓗᐊᓂ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓄᑦ ᐊᑦᑐᐊᔪᓄᑦ ᒥᓐᖑᐃᕐᓯᕐᕕᓐᓄᑦ.
8.4.5
ᒐᕙᒪᐃᑦ ᑎᒍᒥᐊᖅᑐᑦ ᓴᖅᑭᖅᑕᐅᓂᖓᓂᒃ ᒥᓐᖑᐃᕐᓯᕐᕕᐅᑉ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᖏᖃᑎᒌᒍᓐᓇᖏᑉᐸᑕ ᑐᑭᖏᓐᓄᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓄᑦ ᐱᕕᑦᓴᖃᑦᓯᐊᓚᐅᕐᓗᑎᒃ, ᓂᕈᐊᕐᓂᐊᖅᑐᑦ ᐃᖅᑲᓇᐃᔭᖃᑎᒌᑦᑎᑦᓯᔪᑦᓴᒥᒃ ᑐᓂᓯᒋᐊᓕᒻᒥᒃ ᐅᓂᒃᑳᓂᒃ ᒥᓂᔅᑕᒧᑦ, ᐃᓱᒪᑦᓴᖅᓯᐅᕈᑎᒋᓂᐊᖅᑕᖏᓐᓂᒃ ᐋᖅᑮᒍᔾᔨᓂᐊᖅᑕᖏᓐᓂᓪᓗ. ᐱᔭᕇᔭᕆᐊᖃᕐᓂᖅ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂᒃ ᐊᑦᑐᐊᔪᒥᒃ ᓇᐅᑐᐃᓐᓇᕐᒧᑦ ᑐᑦᓯᕌᖑᓯᒪᔪᒧᑦ ᒥᓐᖑᐃᕐᓯᕐᕕᒻᒧᑦ, ᑲᔪᓯᓂᐊᖅᑐᖅ ᑭᓯᐊᓂ ᐊᐃᑉᐸᐃᖏᑦ ᐱᑦᓯᐊᕐᓂᖃᐃᓐᓇᖅᐸᑕ. ᐅᓇ ᑎᑎᕋᖅᓯᒪᔪᖅ ᓄᖅᑲᖓᑎᑦᓯᒍᑕᐅᓐᖏᑦᑐᖅ ᐱᔭᕆᐊᓕᓐᓂᒃ 8.4.11-ᒥᒃ ᑎᑭᓪᓗᒍ 8.4.14.
8.4.6
ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓄᑦ ᓴᖅᑭᖅᑕᐅᓯᒪᔪᓄᑦ ᓯᕗᕐᖓᓂ ᑕᕝᕙᐅᖏᓐᓇᖅᓱᑎᓪᓗ ᐅᓪᓗᖓᓂ ᐊᖏᕈᑕᐅᑎᓪᓗᒍ ᐊᖏᕈᑎ, ᐊᕕᑦᑐᖅᓯᒪᔪᓂ ᒐᕙᒪᐃᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔭᕇᔭᕆᐊᓖᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕙᓪᓕᕈᑎᑦᓴᓄᓪᓗ ᐊᖏᕈᑎᖓᓂᒃ ᓯᕗᕐᖓᓂ ᑕᓪᓕᒪᖓᓐᓂ ᓇᓪᓕᐅᓂᖅᓯᐅᕐᓂᖓᑦᑕ ᐅᓪᓗᖓᑕ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ.
8.4.7
ᐊᓯᐊᒍᑦ ᐅᖃᖅᓯᒪᓐᖏᑐᐊᖅᐸᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ ᐃᖏᕐᕋᑦᓯᐊᖅᑐᖅ, ᐊᑐᓂᑦ ᐊᖏᕈᑏᑦ ᐋᔩᕋᕈᑕᐅᒃᑲᓐᓂᕐᓂᐊᖅᑐᑦ ᐊᕐᕌᒍᐃᑦ 7 ᐊᑖᓂᐅᓐᖏᑦᑐᖅ.
8.4.8 - ᐊᓯᖏᑦ ᐃᓄᐃᑦ ᖃᑭᒪᓇᓱᐊᕐᓂᒃᑯᑦ ᐱᕚᓪᓕᕈᑎᑦᓴᖏᑦ
ᒐᕙᒪᒃᑯᑦ ᑳᑦᑐᓛᑦᑕᐅᑎᑦᓯᓂᐊᖅᐸᑕ ᓴᖅᑭᖅᑕᐅᓂᖓᓄᑦ, ᐊᐅᓚᑕᐅᓂᖓᓄᑦ ᒪᑭᒪᔭᐅᓂᖓᓄᓪᓘᓐᓃᑦ ᒥᓐᖑᐃᕐᓯᕐᕕᒻᒥ ᐃᓪᓗᐃᑦ ᓄᓇᕗᒻᒥ, ᒐᕙᒪᒃᑯᑦ ᐃᒪᐃᓐᓂᐊᖅᑐᑦ:
(a)
ᓂᕈᐊᓗᐊᓐᖑᐊᕆᐊᓖᑦ ᐃᓄᓐᓂᒃ ᐱᔪᓐᓇᕐᓂᓕᓐᓂᒃ ᑳᑦᑐᓛᑦᑎᓂᒃ ᒐᕙᒪᒃᑯᑦ ᑐᑦᓯᕋᖅᐸᑕ ᐊᑭᑦᑐᕋᐅᑎᓂᒃ ᑕᐃᒪᐃᑦᑐᓄᑦ ᑳᑦᑐᓛᓄᑦ; ᐊᒻᒪᓗ
(b)
ᖃᐅᔨᓴᑦᓯᐊᕐᓗᑎᒃ ᑳᑦᑐᓛᑦᑎᓕᒫᑦ ᓂᕈᐊᓗᐊᓐᖑᐊᕋᓗᐊᕐᒪᖔᑕ ᐃᓄᓐᓂᒃ.
8.4.9
ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᓯᕗᓪᓕᖅᐹᒥ ᕿᐱᓗᒍᓐᓇᖅᑐᑦ ᐊᐅᓚᑕᐅᓂᖏᓐᓄᑦ ᐱᓇᓱᐊᕐᓂᕐᒧᑦ ᐱᕕᑦᓴᖃᕐᓂᐅᔪᑦ ᑳᑦᑐᓛᑦᑕᐅᓯᒪᔪᑦ ᐊᑦᑐᐊᔪᓄᑦ ᒥᓐᖑᐃᕐᓯᕐᕕᓐᓄᑦ ᓄᓇᕗᒻᒥ. ᑐᑦᓯᕋᖅᑐᖃᖅᐸᑦ, ᒐᕙᒪᒃᑯᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐅᓂᒃᑳᓕᒫᓂᒃ ᐊᓯᓕᒫᖏᓐᓂᓪᓗ ᓱᓇᑐᐃᓐᓇᕐᓂᒃ ᐸᐸᑕᒥᓂᒃ ᐊᑦᑐᐊᔪᓂᒃ ᕿᒥᕐᕈᔭᐅᓂᖓᓄᑦ ᖃᕿᒪᓇᓱᐊᕐᓂᕐᒧᑦ ᐊᐅᓚᓂᐅᒍᓐᓇᖅᑐᖅ ᐱᓇᓱᐊᕐᓂᕐᒧᑦ ᐊᐅᓚᓂᐅᔪᓂ ᑮᓇᐅᔭᓕᐅᕋᓱᐊᕈᑕᐅᔪᓂᓪᓗ ᒥᓐᖑᐃᕐᓯᕐᕕᓐᓂ ᓄᓇᕗᒻᒥ.
8.4.10
8.4.8 ᐊᒻᒪᓗ 8.4.9 ᐊᐳᖅᓯᒪᒍᑕᐅᔾᔮᖏᑦᑑᒃ ᐱᕕᖃᖅᑎᑦᓯᓂᐅᔪᓄᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕙᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂ ᐊᑦᑐᐊᔪᓂ ᑐᑦᓯᕌᖑᓯᒪᔪᒧᑦ ᒥᓐᖑᐃᕐᓯᕐᕕᒻᒧᑦ ᓄᓇᕗᒻᒥ ᑲᒪᔪᓂᒃ ᖃᕿᒪᓇᓱᐊᕐᓂᕐᒧᑦ ᐱᕚᓪᓕᕈᑎᑦᓴᖏᓐᓂᒃ ᐃᓄᐃᑦ.
8.4.11 - ᐊᐅᓚᑦᓯᓂᖅ
ᑲᑐᔾᔨᓗᑎᒃ ᐃᓄᐃᑦ/ᒐᕙᒪᒃᑯᓪᓗ ᒥᓐᖑᐃᕐᓯᕐᕕᖏᓐᓄᑦ ᐸᕐᓇᓐᓂᕐᒧᑦ ᐊᐅᓚᑦᓯᓂᕐᒧᓪᓗ ᑲᑎᒪᔨᕋᓛᑦ (“ᑲᑎᒪᔨᕋᓛᑦ”) ᓴᖅᑭᖅᑕᐅᓂᐊᖅᑐᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᑎᒍᑦ ᑐᑦᓯᕌᖑᑐᐊᖅᐸᑕ ᒐᕙᒪᒃᑯᓐᓄᑦ ᐅᕝᕙᓗ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ. ᑲᑎᒪᔨᕋᓛᑦ ᐱᓯᒪᓂᐊᖅᑐᑦ ᐊᔾᔨᒌᓪᓗᐊᓂᒃ ᑖᒃᑯᓇᓐᖓᑦᓯᐊᖅ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐊᒻᒪᓗ ᑖᒃᑯᓇᓐᖓᓪᓗᐊᖅ ᐊᕕᑦᑐᖅᓯᒪᔪᓂᒃ ᒐᕙᒪᑐᖃᒃᑯᓐᓂᓪᓗ ᒥᓂᔅᑕᖓᓐᓂᒃ ᑎᒍᒥᐊᖅᑐᒥᒃ ᒥᓐᖑᐃᕐᓯᕐᕕᓐᓂᒃ. ᐃᒻᒥᒃᑯᑦ ᑲᑎᒪᔨᕋᓛᖅᑕᖃᕐᓂᐊᖅᑐᖅ ᐊᕕᑦᑐᖅᓯᒪᔪᓄᑦ ᑲᓇᑕᒥᓗ ᒥᓐᖑᐃᕐᓯᕐᕕᓐᓄᑦ.
8.4.12
ᑲᑎᒪᔨᕋᓛᑦ ᐅᖃᐅᔾᔨᒋᐊᕈᓐᓇᖅᑐᑦ ᒥᓂᔅᑕᒥᒃ ᒥᓂᔅᑕᐅᓪᓘᓐᓃᑦ ᑎᓕᓯᒪᔭᖓᓂᒃ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ, ᐅᕝᕙᓗ ᐊᓯᖏᓐᓂᒃ ᑎᒥᐅᔪᓂᒃ, ᓈᒻᒪᑦᑐᕆᑦᓯᑐᐊᕈᑎᒃ, ᓱᓇᓕᒫᓄᑦ ᐊᑦᑐᐊᔪᓄᑦ ᒥᓐᖑᐃᕐᓯᕐᕕᓐᓂᒃ ᐊᐅᓚᑦᓯᓂᕐᒧᑦ.
8.4.13
ᐊᐅᓚᓂᕐᒧᑦ ᐸᕐᓇᐅᑏᑦ ᒥᓐᖑᐃᕐᓯᕐᕕᓐᓄᑦ ᐱᕙᓪᓕᐊᑎᑕᐅᓂᐊᖅᑐᑦ ᐊᕐᕌᒍᐃᑦ ᑕᓪᓕᒪᑦ ᐃᓗᐊᓐᓂ ᓴᖅᑭᖅᑕᐅᓚᐅᖅᑎᓪᓗᒍ ᒥᓐᖑᐃᕐᓯᕐᕕᒃ ᐅᕝᕙᓘᓐᓃᑦ ᐅᓪᓗᖓᓂᒃ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ, ᓇᓪᓕᑐᐃᓐᓇᖓ ᑭᖑᓪᓕᐅᑉᐸᑦ ᐅᓪᓗᖅ, ᑲᓇᑕᒥ ᒥᓐᖑᐃᕐᓯᕐᕕᓕᕆᔨᓄᑦ ᑲᓇᑕᒥ ᒥᓐᖑᐃᕐᓯᕐᕕᓐᓄᑦ ᐊᒻᒪᓗ ᐊᕕᑦᑐᖅᓯᒪᔪᓂ ᒐᕙᒪᐅᔪᓄᑦ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᓐᓄᑦ. ᑕᐃᒪᐃᑦᑐᑦ ᐸᕐᓇᐅᑏᑦ ᑐᓐᖓᕕᖃᕐᓂᐊᖅᑐᑦ ᐃᓱᒪᓕᐅᕈᑕᐅᔪᓂᒃ ᑲᑎᒪᔨᕋᓛᓄᑦ, ᑲᑎᒪᔨᕋᓛᑦ ᓴᖅᑭᖅᑕᐅᓯᒪᑉᐸᑕ, ᐃᓱᒪᒋᖃᓯᐅᑎᓗᒋᑦ ᐃᓱᒪᓕᐅᕈᑕᐅᔪᑦ ᐊᓯᖏᓐᓄᑦ ᐱᔪᒪᔭᖃᖅᑐᓄᑦ ᐃᓄᓐᓄᑦ ᑎᒥᐅᔪᓄᓪᓘᓐᓃᑦ. ᕿᒥᕐᕈᔭᐅᓚᐅᖅᑎᓪᓗᒋᑦ ᑲᑎᒪᔨᕋᓛᓄᑦ, ᒥᓐᖑᐃᕐᓯᕐᕕᒻᒥᒃ ᐊᐅᓚᑦᓯᓂᕐᒧᑦ ᐸᕐᓇᐅᑏᑦ ᓯᕗᒧᑦᑎᑕᐅᓂᐊᖅᑐᑦ ᒥᓂᔅᑕᒧᑦ ᐃᓱᒪᑦᓴᖅᓯᐅᕈᑎᒋᓂᐊᖅᑕᖏᓐᓂ ᐊᖏᕐᓗᒋᓪᓗ. ᒥᓐᖑᐃᕐᓯᕐᕕᓐᓂᒃ ᐊᐅᓚᑦᓯᓂᕐᒧᑦ ᐸᕐᓇᐅᑏᑦ ᕿᒥᕐᕈᔭᐅᓂᐊᖅᑐᑦ ᐋᖅᑭᒋᐊᖅᑕᐅᑐᐃᓐᓇᕆᐊᖃᖅᓱᑎᓪᓗ ᐊᑐᐃᓐᓇᐅᑎᑕᐅᔪᑦ ᐸᕐᓇᐅᑎᓂ.
8.4.14
ᐊᐅᓚᑦᓯᓂᕐᒧᑦ ᐸᕐᓇᐅᑏᑦ ᒥᓐᖑᐃᕐᓯᕐᕕᓐᓄᑦ ᒪᓕᓐᓂᐊᖅᑐᑦ ᐅᕝᕙᓗ ᐋᖅᑭᒋᐊᖅᑕᐅᓂᐊᖅᑐᑦ ᒪᓕᓐᓂᐊᕐᓗᑎᒃ ᑖᒃᑯᓇᓐᖓᓪᓗᐊᖅ ᑐᑭᖏᓐᓂᒃ ᐃᒪᐃᓕᖓᓂᖏᓐᓂᓪᓗ ᑖᒃᑯᐊᓪᓗᐊ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦᑕ.
8.4.15 - ᐃᓄᐃᑦ ᐃᑎᕈᓐᓇᐅᑎᖏᑦ
ᕐᑳᖓᒍᒃᑲᓐᓂᖅ ᐊᓯᖏᑦᑕ ᐱᔪᓐᓇᐅᑏᑦ ᐃᑎᕈᓐᓇᕐᓂᕐᒧᑦ ᐊᑐᕐᓂᖏᓪᓗ ᖁᕕᐊᒋᓪᓗᒍ ᐃᓄᐃᑦ, ᐃᓄᐃᑦ ᐃᑎᕈᓐᓇᖅᑐᑦ ᐊᑭᖃᖅᑎᓐᓇᒍ ᒥᓐᖑᐃᕐᓯᕐᕕᓐᓄᑦ.
8.4.16 - ᑐᓴᕋᑦᓴᐃᑦ
ᒐᕙᒪᒃᑯᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᐃᓄᑦᑎᑑᓕᖅᑎᑕᐅᓯᒪᔪᓂᒃ ᑎᑎᕋᖅᓯᒪᔭᒥᓂᒃ ᑐᕌᒐᖃᖅᑐᓂᒃ ᑐᓴᐅᒪᑎᑦᓯᓂᕐᒥᒃ ᑲᓇᑕᒥᐅᓂᒃ ᒥᓐᖑᐃᕐᓯᕐᕖᑦ ᒥᑦᓴᐃᓐᓄᑦ ᓄᓇᕗᒻᒥ, ᑐᓴᐅᒪᑎᑦᓯᔾᔪᑕᐅᔪᑦ ᑭᓇᒃᑯᑐᐃᓐᓇᕐᓂᒃ ᒥᓐᖑᐃᕐᓯᕐᕕᓐᓂ ᓄᓇᕗᒻᒥ ᑕᐃᒫᑦᓴᐃᓐᓇᖅ ᐊᓚᒡᒐᐃᓐᓂᐊᖅᑐᑦ ᐊᑕᐅᓯᕐᒥ ᐊᑕᐅᓯᐅᓐᖏᑦᑐᒥᓘᓐᓃᑦ ᑲᓇᑕᒥ ᐃᓕᑕᕆᔭᐅᓯᒪᔪᓂᒃ ᐅᖃᐅᓯᕐᓂ ᐊᒻᒪᓗ ᐃᓄᑦᑎᑐᑦ.
8.4.17 - ᒥᓐᖑᐃᕐᓯᕐᕕᑦᑖᖅᑲᐅᑦ
ᓴᖅᑭᖅᑕᐅᔪᖅ, ᑭᖑᓂᖓᓂ ᐅᓪᓗᖓᑕ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᒥᓐᖑᐃᓯᕐᕕᓐᓄᑦ ᓇᓗᓇᐃᖅᑕᐅᓯᒪᓐᖏᑦᑐᓄᑦ ᐅᐃᒍᖏᓐᓂ ᐆᒪ ᐃᓛᒃᑰᖅᑑᑉ, ᐊᖏᓪᓕᒋᐊᖅᑕᐅᓂᕐᒧᓪᓗ ᒥᓐᖑᐃᕐᓯᕐᕕᒻᒧᑦ, ᑐᓐᖓᕕᖃᕐᓂᐊᖅᑐᑦ ᐱᕕᖃᖅᑎᑦᓯᒍᑕᐅᔪᓄᑦ ᐋᔩᕋᑕᐅᓂᖏᓐᓄᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᒃᑯᑦ ᐊᒻᒪᓗ ᐊᓯᖏᑦᑎᒍᑦ ᐱᕕᖃᖅᑎᑦᓯᓂᐅᔪᒃᑯᑦ ᐃᓄᓐᓂᒃ ᐱᕕᑦᓴᖃᖅᑎᑕᐅᑦᓱᑎᒃ ᐱᕚᓪᓕᕈᑎᑦᓴᓂᒃ ᓴᖅᑭᖅᑕᐅᓂᖓᓂᒃ, ᐸᕐᓇᑕᐅᓂᖓᓂᒃ ᐊᐅᓚᑕᐅᓂᖏᓐᓂᓪᓗ ᒥᓐᖑᐃᕐᓯᕐᕖᑦ ᓄᓇᕗᒻᒥ.
8.4.18 - ᑐᓂᒪᓂᖅ
ᑖᒃᑯᓇᓐᖓᓪᓗᐊᖅ ᐃᓕᑕᕆᔭᐅᓂᖅᑕᕐᓂᐊᖅᑐᖅᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ ᑕᒫᓃᓐᓂᖏᓐᓂᓪᓗ ᐃᓚᒋᔭᐅᓗᓂ ᐊᐅᓚᓂᖓᓄᑦ ᓴᖅᑭᖅᑕᓂᖓᑕ ᐊᐅᓚᑕᐅᓂᖓᑕᓗ ᒥᓐᖑᐃᕐᓯᕐᕕᐅᑉ.
8.4.19 - ᑐᑭᓕᐅᖅᑕᐅᓂᖅ
ᐊᐳᖅᓯᒪᓂᖃᕐᓂᖅᐸᑎᒃ ᐅᓇ ᐃᓛᒃᑰᖅᑐᖅ ᐊᒻᒪᓗ ᐃᓛᒃᑰᖅᑐᖅ 5, ᐃᓛᒃᑰᖅᑐᖅ 5 ᓴᓐᖏᓂᖅᓴᐅᓂᐊᖅᑐᖅ.
ᐅᐃᒍᖓ 8-1
ᐊᐅᔪᐃᑦᑐᕐᒥ ᒥᓐᖑᐃᕐᓯᕐᕕᒃ
(ᑎᑎᕋᖅᓯᒪᔪᖅ 8.2.2)
ᓄᓇ ᓇᓗᓇᐃᔭᖅᑕᐅᓯᒪᔪᖅ ᐃᓚᖓᓂ III ᐅᐃᒍ V S.C. 1974, c. 11, ᐱᖃᓯᐅᑎᓇᑕᑎᒃ ᐱᖃᓯᐅᑎᒐᑎᒃ ᓈᖅᐸᐃᓐ ᐊᒻᒪᓗ ᖁᐊᔭᕐᓇᐅᑉ ᑲᖏᖅᓱᖏᒃ, ᑲᖏᖅᓱᒃ ᐊᑯᕐᖓᓐᓃᑦᑐᖅ ᖁᐊᔭᕐᓇᐅᑉ ᑲᖏᖅᓱᖓᑕ ᐊᒻᒪᓗ ᐃᓄᐃᑦ ᓄᓇᖁᑎᑦ BI-38/26P, ᕿᑭᖅᑕᐃᑦ ᑕᐃᑲᓂ ᑲᖏᖅᓱᖓᓃᑦᑐᑦ, ᕿᕕᖅᑑᑉ ᑲᖏᖅᓱᖓ ᐊᒻᒪᓗ ᕿᕕᖅᑑᒥ ᓈᓚᕝᕕᖃᕐᕕᒥᓂᖅ ᐊᒻᒪᓗ ᐅᑯᐊ ᐃᓄᓐᓄᑦ ᓄᓇᖁᑎᒋᔭᐅᔪᑦ:
BI-20/26P,27A
BI-23/260,27A
BI-24/260,27A
BI-25/26,27A
BI-38/26P
ᐅᐃᒍᖓ 8-2
ᑲᓇᑕᒥ ᒥᓐᖑᐃᕐᓯᕐᕕᒃ - ᐊᐅᔪᐃᑦᑑᑉ ᕿᑭᖅᑕᖓᓂ
(ᑎᑎᕋᖅᓯᒪᔪᖅ 8.2.3)
ᓄᓇ ᓇᓗᓇᐃᔭᖅᑕᐅᔪᒻ S.C. 1988, c. 48, ᐅᐃᒍ III.
ᐅᐃᒍᖓ 8-3
ᐊᐅᓚᓂᐅᔪᑦ ᓈᒻᒪᑦᑐᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᓄᑦ ᐊᑦᑐᐊᔪᑦ ᒥᓐᖑᐃᕐᓯᕐᕕᓐᓄᑦ
(ᑎᑎᕋᖅᓯᒪᔪᖅ 8.4.4)
1
ᐃᓄᐃᑦ ᐃᓕᓐᓂᐊᖅᑎᑕᐅᓂᖏᑦ ᖁᑦᓯᓕᕇᓕᒫᓂ.
2
ᐃᓄᐃᑦ ᐃᖅᑲᓇᐃᔭᖅᑎᑖᕆᔭᐅᓗᐊᓐᖑᐊᕐᓂᖏᑦ.
3
ᐃᖅᑲᓇᐃᔮᓂᒃ ᓇᓪᓕᑭᑕᖃᑦᑕᕐᓂᖅ ᐊᑦᑐᐊᓂᖃᕐᓗᓂ ᐃᓄᐃᑦ ᑭᓐᖒᒪᒋᔭᖏᓐᓄᑦ ᐱᔪᒪᔭᖏᓐᓄᓪᓗ.
4
ᐃᓕᓐᓂᐊᕆᐊᒃᑲᓐᓂᖅᑐᓄᑦ ᑮᓇᐅᔭᐃᑦ.
5
ᐃᖅᑲᓇᐃᔭᖅᑎᓄᑦ ᐊᑦᑐᐊᔪᑦ.
6
ᐱᓇᓱᐊᕐᓂᕐᒧᑦ ᐱᕕᑦᓴᖃᕐᓂᖏᑦ ᐃᓄᐃᑦ ᐊᑦᑐᐊᔪᑦ ᒥᓐᖑᐃᕐᓯᕐᕕᓕᒫᓄᑦ ᐱᔨᑦᓯᕋᐅᑎᓄᑦ ᐃᓪᓗᓄᓪᓗ ᐱᖃᓯᐅᑎᑦᓱᑎᒃ:
(a)
ᐊᑐᐃᓐᓇᐅᑎᑕᐅᓂᖏᑦ ᑮᓇᐅᔭᐃᑦ ᐱᒋᐊᕈᑎᑦᓴᐃᑦ;
(b)
ᐊᑐᐃᓐᓇᖃᖅᑎᑕᐅᓂᖅ ᖃᐅᔨᒪᔪᒻᒪᕆᓐᓂᒃ ᑐᓴᕆᐊᕐᕕᑦᓴᓂᒃ;
(c)
ᐳᓚᕋᑦᑎᓅᖓᔪᑦ ᐃᓗᐃᒃᑲᐅᓈᖅᓯᒪᔪᑦ ᖃᐅᔨᒪᔭᐅᑎᑦᓯᓂᐅᔪᓪᓗ.
7
ᐃᓪᓗᖃᕐᓂᖅ, ᓇᔪᒐᖃᕐᓂᖅ ᐊᒻᒪᓗ ᐱᓐᖑᐊᕕᑦᓴᐃᑦ ᐃᓄᓐᓄᑦ ᐃᖅᑲᓇᐃᔭᖅᑐᓄᑦ ᒥᓐᖑᐃᕐᓯᕐᕕᓐᓂ ᐊᒻᒪᓗ ᒥᓐᖑᐃᕐᓯᕐᕖᑦ ᐃᓪᓗᖁᑎᖏᓐᓂ ᐱᖃᓯᐅᑎᑦᓱᑎᒃ ᐃᓚᖏᑦ.
8
ᐅᖃᐅᓯᖅ ᐊᑐᖅᑕᐅᔪᖅ ᐃᖅᑲᓇᐃᔭᕐᕕᒻᒥ ᒥᓐᖑᐃᕐᓯᕐᕕᓐᓂ ᐱᔨᑦᓯᕋᕐᕕᓐᓂ ᐃᓪᓗᓂᓗ.
9
ᐃᓄᐃᑦ ᐃᑎᕈᓐᓇᕐᓂᖏᑦ ᒥᓐᖑᐃᕐᓯᕐᕕᓐᓄᑦ ᐱᔨᑦᓯᕋᕐᕕᓐᓄᑦ ᐃᓪᓗᓄᓪᓗ.
10
ᐊᖅᑯᑏᑦ ᐃᓂᒋᔭᐅᔪᓪᓗ ᐃᑎᕈᓐᓇᕐᓂᕐᒧᑦ ᒥᓐᖑᐃᕐᓯᕐᕕᓐᓄᑦ.
11
ᐱᒻᒪᕆᐅᔪᑦ ᐊᕙᑎᒨᖓᔪᑦ ᐃᓱᒫᓘᑕᐅᔪᑦ, ᐱᓗᐊᖅᑐᒥᒃ ᐅᓚᕕᑕᐅᓂᖏᑦ ᐆᒪᔪᐃᑦ, ᐱᖃᓯᐅᑎᑦᓱᑎᒃ ᓴᐳᔾᔭᐅᓃᑦ ᐱᔭᐅᓗᐊᑦᑕᐃᓕᓃᓪᓗ.
12
ᓄᓇᓕᕋᓛᑦ.
13
ᐊᑐᖅᑕᐅᓂᖏᑦ ᒥᓐᖑᐃᕐᓯᕐᕖᑦ ᐊᑦᑐᐃᒻᒪ ᐃᓄᓐᓂᒃ, ᓲᕐᓗ ᒪᑯᐊ:
(a)
ᓄᓇᒥᒃ ᐊᑐᕐᓂᒧᑦ ᐊᐅᓚᓂᐅᒍᓐᓇᖅᑎᑕᐅᔪᑦ ᒥᓐᖑᐃᕐᓯᕐᕕᓐᓂ;
(b)
ᑭᓪᓕᒋᔭᐅᔪᑦ ᐊᓯᖏᓪᓗ ᓴᐳᑎᔭᐅᒋᐊᓖᑦ, ᑭᓪᓕᖃᕆᐊᓖᑦ ᐊᐳᖅᑕᕐᕕᐅᒋᐊᓖᓪᓗ ᐊᑐᖅᑕᐅᓂᖏᓐᓄᑦ;
(c)
ᐊᔾᔨᒌᓐᖏᑦᑐᑦ ᖃᐅᔨᒪᔾᔪᑕᐅᕙᑦᑐᑦ ᐃᖏᕐᕋᔾᔪᑏᓪᓗ ᐊᑐᖅᑕᐅᒍᓐᓇᖅᑐᑦ;
(d)
ᓴᐳᔾᔭᐅᓂᖏᑦ ᐊᐅᓚᑕᐅᓂᖏᓪᓗ ᐃᑦᓴᕐᓂᑕᖅᑕᓖᑦ ᐊᓪᓚᒡᒐᐃᓗᐊᓐᖑᐊᖅᑐᓪᓗ ᐅᐸᒐᐃᑦ.
14
ᑐᓴᕋᑦᓴᐃᑦ ᐃᖏᕐᕋᓂᖏᑦ ᑐᑭᓕᐅᖅᑕᐅᓂᖏᓪᓗ ᐱᖃᓯᐅᑎᑦᓱᑎᒃ ᑭᒡᒐᖅᑐᖅᑕᐅᓃᑦ ᐃᓄᓐᓄᑦ ᑖᒃᑯᓄᖓᓪᓗᐊᕐᓗ ᒥᓐᖑᐃᕐᓯᕐᕕᓐᓄᑦ ᑎᒥᐅᔪᑦ ᐱᔾᔪᑕᐅᓪᓗᑎᒃ ᒥᓐᖑᐃᕐᓯᕐᕖᑦ ᐊᐅᓚᑕᐅᓂᖏᑦ ᐊᒻᒪᓗ ᐃᓄᐃᑦ ᐃᓚᐅᑎᑕᐅᓂᖏᑦ ᐃᓱᒫᓘᑎᖏᓪᓗ.
15
ᑲᓲᒪᖃᑕᐅᔪᑦ ᓯᕗᕐᖓᓂ ᐊᑐᓕᖅᑎᓪᓗᒋᓪᓗ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓗᕈᑎᑦᓴᓄᓪᓗ ᐊᖏᕈᑎᖏᑦ.
16
ᐋᖅᑭᒋᐊᕆᓂᕐᒧᑦ ᐱᕕᖃᖅᑎᑦᓯᒍᑕᐅᔪᑦ.
17
ᐊᑐᓕᖅᑎᑦᓯᓂᖅ ᑲᔪᓯᑎᑦᓯᓂᕐᓗ.
18
ᐊᓯᓕᒫᖏᑦ ᐊᖏᖃᑎᒌᑦᑐᓄᑦ ᐃᓱᒪᒋᔭᐅᔪᑦ ᐊᑐᕐᓂᖃᕆᐊᖏᑦ ᑭᓐᖒᒪᒋᔭᐅᔪᓄᑦ ᒥᓐᖑᐃᕐᓯᕐᕕᓐᓄᑦ ᐃᓄᓐᓄᓪᓗ.
